Inunngortunik toqusunillu nalunaaruteqartarneq, ilisinerit iliveqarfiillu pillugit Inatsisartut inatsisaanni nr. 13, 6. juni 2016-imeersumi § 7, imm. 3, § 8, imm. 3, § 12, imm. 2, § 15, imm. 3 aamma § 36, imm. 3 naapertorlugit aammalu Biskoppi isumasioqatigereerlugu aalajangerneqarput:

Kapitali 1 
Ilisinissamik toqusulluunniit timaanik ikuallaanissamik qinnuiginninneq

  § 1.  Toqusoqarnerata kinguninngua nammineq oqarasuaatikkut allakkatigulluunniit ilisisarnermi oqartussanut saaffiginnilluni ilisinissamik toqusulluunniit timaanik toqusut timaanik ikuallaasarfimmi akuerisaasumi ikuallaanissamik qinnuiginnittoqassaaq, taamaattoq tak. § 16, imm. 2.
  Imm. 2.  Toqusup aappaa imaluunniit toqusup meerai 18-it sinnerlugit ukiullit imaluunniit toqusup angajoqqaavi ilaqutaasulluunniit allat tulleriinnilersorneri taaneqartut malillugit qinnuiginnissinnaapput. Inooqatigiinneq aappariinnermut assingusoq minnerpaamik ukioq ataaseq sivisussuseqartoq sumi najugaqarnermut uppernarsaatikkut uppernarsarneqartoq aappariinnermut naligiissinneqassaaq.
  Imm. 3.  Imm. 2 malillugu toqusup qanigisai qinnuiginninngippata, toqusup ikinngutigilluagai imaluunniit inuk paaqqinnittarfilluunniit toqusumut paaqqutarinnissimasoq qinnuiginnissinnaapput.

  § 2.  Toqusup timaata ilineqarnissaanik ikuallanneqarnissaanilluunniit aalajangiiniarnermi toqusup kissaatigisimasaa malinneqassaaq. Toqusoq kissaateqarnermini 18-it inorlugit ukioqarsimappat, piffissami meeqqap kissaateqarnerani ukiui inerisimaneralu kiisalu angajoqqaavata oqaaseqaataat aalajangiinnginnermi eqqarsaatigineqassapput.
  Imm. 2.  Toqusoq imm. 1 naapertorlugu kissaateqarsimanngippat ilisinissamik toqusulluunniit timaanik ikuallaanissamik qinnuteqartup kissaataa malinneqassaaq.

  § 3.  Kinaluunniit ilisinissamut toqusulluunniit timaanik ikuallaanissamut tunngatillugu qinnuteqaatip toqusup kissaataanut naapertuutinnginneranik uppernarsaasinnaasoq qinnuteqaat pillugu ilisisarnermi oqartussanut maalaaruteqarsinnaavoq.
  Imm. 2.  Ilisinermut oqartussat aalajangiinerannik maalaaruteqarneq nammineq oqarasuaatikkut allakkatigulluunniit saaffiginninnikkut, aalajangiinermit ulloq ataaseq qaangiutsinnagu ilisinermut oqartussanut pissaaq. Maalaaruteqarneq malinneqanngippat apeqqut ilisisarnermi oqartussat eqqartuussivimmut saqqummiutissavaat.

  § 4.  Ilisineq toqusulluunniit timaanik ikuallaaneq toqusoqarnerata kingorna sapinngisamik ullut qulit qaangiutsinnagit pissaaq, taamaattoq tak. imm. 2 aamma imm. 4.
  Imm. 2.  Ilisisarnermi oqartussat eqqartuussivilluunniit timip ilinissaanik ikuallannissaanilluunniit aalajangiitinnagit ilisisoqassanngilaq toqusulluunniit timaanik ikuallaasoqassanani, taamaattoq tak. imm. 3.
  Imm. 3.  Ilisinermi oqartussat Biskoppi aamma Nunatsinni Nakorsaaneq isumasioqatigineratigut pisuni immikkut ittuni ilisinissamik toqusulluunniit timaanik ikuallaanissamik imm. 2 naapertorlugu aalajangiisinnaapput, matumani ilaatigut ileqqorissaarnissamut peqqissutsimullu tunngasut pissutigalugit.
  Imm. 4.  Toqusoqarnerata kingorna ullut qulit qaangiutereerpata ilisinermi oqartussat Biskoppi aamma Nunatsinni Nakorsaaneq isumasioqatigineratigut pisuni immikkut ittuni ilisinissamik toqusulluunniit timaanik ikuallaanissamik pissutsit immikkut ittut, soorlu sila, tunngavigalugit aalajangiisinnaapput.

Kapitali 2 
Qummuattamik toqqortaateqarneq

  § 5.  Qummuattamik arsanik Kalaallit Nunaannut eqqussinermi najukkami qummuattaq oqaluffiup allaffianut ilineqarfissaanut arsalluunniit siaruarterfissaanut piaartumik tunniunneqassaaq, taamaattoq tak. § 6. 
  Imm. 2.  Arsat qummuattamik sumiiffinnut assigiinngitsunut marlunnut ilineqarnissaat siaruarterneqarnissaalluunniit siunertaralugu arsat marlunnut avinneqassappata qummuattaq najukkami oqaluffiup allaffianut piaartumik periarfissami siullermi tunniunneqassaaq.

  § 6.  Biskoppi pisuni immikkut ittuni qummuattamik najukkami oqaluffiup allaffianiunngitsoq allamili utaqqiisaasumik toqqortaateqarnissamik akuersissuteqarsinnaavoq. Utaqqiisaasumik toqqortaateqarnermi pineqarpoq ullunik arlalialunnguanik annerpaamillu sapaatip akunneranik sivisussuseqartumik toqqortaateqarneq.
  Imm. 2.  Qummuattamik utaqqiisaasumik toqqortaateqarnissamut akuersissummik qinnuiginninneq Biskoppimut oqarasuaatikkut, allakkatigut ornigulluniluunniit saaffiginninnikkut pissaaq. Qinnuiginninnermi kissaateqarnermut pissutaasut nassuiarneqassapput.
  Imm. 3.  Toqusup aappaa imaluunniit toqusup meerai 18-it sinnerlugit ukiullit imaluunniit toqusup angajoqqaavi ilaqutaasulluunniit allat tulleriinnilersorneri taaneqartut malillugit qinnuiginnissinnaapput. Inooqatigiinneq aappariinnermut assingusoq minnerpaamik ukioq ataaseq sivisussuseqartoq sumi najugaqarnermut uppernarsaatikkut uppernarsarneqartoq aappariinnermut naligiissinneqassaaq. Qanigisai qinnuiginninngippata, taava ikinngutigilluagai allalluunniit arsanik siaruarterisussat qummuattamilluunniit ilisisussat qinnuiginnissinnaapput.

  § 7.  Tarnikkut ilungersuuteqartunik isumassuinermut tunngasut imaluunniit pissutsit atuuttut utaqqiisaasumik toqqortaateqarniarnermut tunngavilersuutigineqassapput, tassunga ilanngullugit soorlu pisuni assersuutigalugu silap imaluunniit assartuinikkut pissutsit pissutigalugit arsat siaruarternissaasa imaluunniit qummuattamik ilisinissap tungaanut najukkami oqaluffiup allaffianiunngitsoq allamili utaqqiisaasumik toqqortaateqartoqassagaluarpat.  
  Imm. 2.  Qummuattaq isumannaatsumi toqqortaatigineqassaaq, ileqqorissaartumik toqusumullu ataqqinnittumik pineqassaaq pisariaqanngitsumillu angallanneqassanani.

Kapitali 3
Arsanik avitsineq siaruarterinerlu

  § 8.  Biskoppi § 10 naapertorlugu arsat marlunnut avinneqarnissaannik imaluunniit § 11 naapertorlugu Kalaallit Nunaanni siaruarterinissamut pisuni immikkut ittuni akuersissuteqarsinnaavoq.
  Imm. 2.  Akuersissummik qinnuiginninneq Biskoppimut oqarasuaatikkut allakkatigut ornigulluniluunniit saaffiginninnikkut pissaaq.
  Imm. 3.  Toqusup aappaa imaluunniit toqusup meerai 18-it sinnerlugit ukiullit imaluunniit toqusup angajoqqaavi ilaqutaasulluunniit allat tulleriinnilersorneri taaneqartut malillugit qinnuiginnissinnaapput. Inooqatigiinneq aappariinnermut assingusoq minnerpaamik ukioq ataaseq sivisussuseqartoq sumi najugaqarnermut uppernarsaatikkut uppernarsarneqartoq aappariinnermut naligiissinneqassaaq. Qanigisai qinnuiginninngippata, taava ikinngutigilluagai allalluunniit arsanik siaruarterisussat qummuattamilluunniit ilisisussat qinnuiginnissinnaapput.

  § 9.  Toqusup arsami avinneqarnissaanik siaruarterneqarnissaannillu immikkut kissaateqarsimappat kissaataalu §§ 10-11-mut naapertuuppat qinnuteqaat § 8 naapertorlugu akuerineqassaaq. Toqusoq kissaateqarnermini 18-it inorlugit ukioqarsimappat, piffissami meeqqap kissaateqarnerani ukiui inerisimaneralu kiisalu angajoqqaavisa oqaaseqaataat aalajangiinnginnermi eqqarsaatigineqassapput.
  Imm. 2.  Imm. 1 naapertorlugu toqusoq kissaateqarsimanngippat, § 8, imm. 3 naapertorlugu qinnuteqartup kissaataa malinneqassaaq.

  § 10.  Arsat makku tunngavigalugit akuerineqarsinnaapput: 
1)  Sumiiffinni marlunni siaruarterineq
2)  Iliveqarfinni assigiinngitsuni marlunni ilisineq
3)  Iliveqarfimmi qummuattami ilineqarneq arsaasalu ilaanik allamut siaruarterineq.
  Imm. 2.  Arsat nunani assigiinngitsuni marlunni ilineqarnissaat siaruarterneqarnissaallu siunertaralugu imm. 1 naapertorlugu avinneqarsinnaapput.

  § 11.  Arsat Kalaallit Nunaata imartaanut siuariarterneqarnissaat § 8, imm. 1 naapertorlugu akuerineqarsinnaavoq, matumanilu imartaq kangerluit anginertut kangerliumanertullu paasineqassaaq.
  Imm. 2.  Arsat qaqqanut siaruarterneqarsinnaapput,
1) innuttaasunut tamanut ajoqutaanngippat,
2) illoqarfiit nunaqarfiillu avataanniippat, 
3) inatsimmut allamut, matumani assersuutigalugu imeqarfiup killeqarfilerneqarneranut inatsimmut naapertuuppat.

  § 12.  Arsat avinneqarnissaannik siaruarternissaannillu qinnuiginninnerit imminnut akerleriippata, taava Biskoppi illuatungeriinnit oqaaseqaatinik piniareernermini illuatungeriinnilu toqusup sorliup qaniginerusarineraa tunngavigalugu § 8, imm. 3 naapertorlugu aalajangiissaaq.

  § 13.  Toqusup timaanik ikuallaareernerup kingorna ukioq ataaseq qaangiutsinnagu arsat ilineqassapput siaruarterneqassallutilluunniit.
  Imm. 2.  Imm. 1 naapertorlugu ilisineq siaruarterinerluunniit ukiup ataatsip iluani pinngippat, taava taamaaliornissamut najukkami oqaluffiup allaffia, toqusoq kissaateqarsimappat kissaataa malillugu isumaginnittuussaaq.

Kapitali 4
Naammagittaalliuuteqarneq, pineqaatissiinermut atortuulersitsinermullu aalajangersakkat. 

  § 14.  Nalunaarut manna malillugu ilisisarnermi oqartussat aalajangiineri, aalajangiinerup kingorna sapaatit akunneri sisamat qaangiutsinnagit Ilageeqarnermut Naalakkersuisoqarfimmut maalaarutigineqarsinnaapput.
  Imm. 2.  Nalunaarut manna malillugu ilisisarnermi oqartussat aalajangiineri, aalajangiinerup kingorna sapaatit akunneri sisamat qaangiutsinnagit Biskoppimut maalaarutigineqarsinnaapput.

  § 15.  Nalunaarummi § 5, § 7, imm. 2-mik aamma 13, imm. 1-imik unioqqutitsinermi akiliisitsisoqarsinnaavoq.
  Imm. 2.  Akiliutigineqartut Nunatta karsianut nakkartinneqassapput. 

  § 16.  Nalunaarut ullup saqqummiunneqarfimmi aqaguani atuutilissaaq. 
  Imm. 2.  Toqusut timaannik ikuallaasarneq pillugu aalajangersakkat, ikuallaavik ataaseq arlallilluunniit avatangiisinik illersuineq pillugu inatsit naapertorlugu taamatut akuerineqartut Kalaallit Nunaanni pilersinneqannginneranni, Kalaallit Nunaanni toqusut timaannik ikuallaasarneq eqqarsaatigalugu atuutissanngillat.

Namminersorlutik Oqartussat, ulloq 1. oktober 2019

Ane Lone Bagger

/

Lone Nukaaraq Møller