Efterskolit pillugit Inatsisartut inatsisaanni nr. 13, 5. december 2008-meersumi, Inatsisartut inatsisaatigut nr. 17, 3. december 2012-imeersukkut allanngortinneqartumi § 20, imm. 2 naapertorlugu makku aalajangersarneqarput:

 

Kapitali 1

Tapiissuteqariaatsit sammisallu tapiiffigineqarsinnaasut

 

  § 1.  Ilinniartitaanermut Naalakkersuisoqarfik Danmarkimi efterskolernermut atatillugu makkununnga tapiissuteqartarpoq:

1)  Angajoqqaat akiliutaannik appartitsinissamut.

2)  Ilinniarnerup aallartilerneranut ilinniarunnaarnermullu atasumik Kalaallit Nunaannit utimullu ilinniartup angalaneranut.

3)  Ilinniartup angalanerminut atasumik pisariaqartumik unnuisariaqarnerinut.

4)  Ilinniartup angalanerani pisariaqartitsineq naapertorlugu nerisaqarneranut.

5)  Qanigisat napparsimarulunnerannut toqukkulluunniit qimagunnerannut atasumik Kalaallit Nunaannut utimullu ilinniartup angalanera.

6)  Ilinniartup napparsimarulunneranut toqukkulluunniit qimagunnerannut angajoqqaatut oqartussaassuseqartup Danmark-imut utimullu angalaneranut.

7)  Timikkut tarnikkulluunniit innarluutillip taassumalu ikiortaata misissuiartorlutik angalanerannut, taakkununnga assersuutigalugu ilaallutik ilaqutaasoq, attaveqaataasoq najugaqaqatigiiffimmeersoq, paaqqinnittarfimmeersoq assigisaanniluunniit pisoq, tak. § 2. 

8)  Ilinniartunut immikkut pisariaqartitsisunut ikiorsiissutinut, tak. § 3.

  Imm. 2.  Qanigisatut, tak. imm. 1, nr. 5, paasineqassapput qatanngutit, aapparisaq, qitornat, angajoqqaat aamma aanaa/aataakkut. Immikkut ittumik pisoqartillugu Ilinniartitaanermut Naalakkersuisoqarfiup inuit allat qanigisatut isigineqarnissaat aalajangersinnaavaa.

 

  § 2.  Misissuiartorluni angalanermut tapiissutit, tak. § 1, imm. 1, nr. 7, tunniunneqartarput immikkut efterskolertitsineq sorleq ilinniartup immikkut pisariaqartitaanut tulluarnerpaanersoq misissuiffiginissaa siunertaralugu.

  Imm. 2.  Misissuiartorluni angalanermut ilaassaaq ilaqutariinnut attaveqaataasinnaasunut pulaarneq, ilinniartup efterskolernerani suleqatigiinnissamut tunngatillugu ataatsimoorussamik ilimagisaasut qulaajarnissaat siunertaralugu.

  Imm. 3.  Ilinniartoq timikkut tarnikkulluunniit innarluutilittut paasineqassaaq ilinniartoq inunnut annertuumik innarluutilinnut ikiorsiisarneq pillugu inatsisinut atuuttunut ilaasoq.

 

  § 3.  Ilinniartunut immikkut pisariaqartitsisunut, tak. § 1, imm. 1, nr. 8 ikiorsiissutinut ilaapput ingerlassat ilinniartup immikkut pisariaqartitaanik aallaaveqarlutik ilinniartup iluatsitsisumik efterskolimiinnissaanut tapertaasinnaasut. Ikiorsiissutit suussusissaat annertussusissaallu Ilinniartitaanermut Naalakkersuisoqarfimmut qinnuteqartoqareerneratigut akuersissutigineqassapput.

 

  § 4.  Ilinniartitaanermut Naalakkersuisoqarfik aningaasanut inatsimmi aningaasaliissutinik aalajangersaasoqarneratigut ilinniartut Københavnimut aanerannut aningaasartuutinut akiliuteqarsinnaavoq, matumani angalaneq naalakkersuisoqarfimmit aaqqissugaasimappat kiisalu efterskolernerup aallartinneranut atatillugu ilitsersuinernut piareersarnernullu pikkorissartitsinernut aningaasartuutit.

 

  § 5.  Ilinniartitaanermut Naalakkersuisoqarfik aningaasanut inatsimmi aningaasaliissutinut aalajangersaasoqareerneratigut makkununnga aningaasartuuteqarsinnaavoq:

1)  Ilinniartut efterskolit ammanerisa avataanni ilaqutariinnit attaveqaataasunit allanilluunniit angajoqqaatut oqartussaassuseqartunit taamaaliornissamut pisinnaatinneqarsimasunit isumagineqarsinnaanngitsut inissinneqarallarnerinut.

2)  Taamaatinnermi akiliut, tak. § 18, imm. 1, taamaattorli annerpaamik kr.-it 8000-it.

  Imm. 2.  Imm. 1 malillugu Naalakkersuisoqarfiup aningaasartuutai kingusinnerusukkut angajoqqaatut oqartussaassusilinnut akiligassanngortinneqassapput.

 

  § 6.  Ilinniartitaanermut Naalakkersuisoqarfiup aningaasaliissutaasut iluanni Danmarkimi efterskolini ilinniartut tamarmik ilinniarnissamik ilitsersorneqarnissaannut aningaasartuutit akilissavai.

 

Kapitali 2

 Tapiissutit annertussusaat

 

Efterskolimiinnerup akilernissaanut tapiissutit

 

  § 7.  Ilinniartitaanermut Naalakkersuisoqarfik Danmarkimi efterskolernermut angajoqqaat akiliutaasa ilanngaaffiginissaannut aningaasarsiat annertussusiat tunngavigalugu tapiissuteqarsinnaapput. Tapiissutit Ilinniartitaanermut Naalakkersuisoqarfimmut qinnuteqareernikkut inunnut ataasiakkaanut tunniunneqassapput.

 

  § 8.  Tapiissutit naatsorsorneranni aningaasarsianut tunngavigineqassapput angajoqqaatut oqartussaassuseqartut ataatsimoorlutik maannakkorpiaq aningaasarsiarisaat, takuuk Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaat, taamaattoq takuuk imm. 2-6. Ilinniartoq katissimassappat ilinniartup taassumalu aappaata qinnuteqarnerup nalaani maannakkorpiaq aningaasarsiaat tamarmiusut atorneqassapput.

  Imm. 2.  Angajoqqaatut oqartussaassuseqartut avissimappata averusersimappataluunniit angajoqqaatut oqartussaassuseqartup meeqqap najugaqarfigisaata maannakkorpiaq aningaasarsiai tapiissutip annertussusissaata naatsorsuiffiginissaanut tunngavigineqassapput. Tamanna aamma atuuppoq meeraq angajoqqaarisamini assigiimmik najugaqartarpat.

  Imm. 3.  Angajoqqaatut oqartussaassuseqartoq ilinniartup najugaqarfigisaa inummik allamik aappaqarsimappat tapiissutit annertussusissaata naatsorsornerani aapparisap maannakkorpiaq aningaasarsiai aningaasarsianut tunngavigineqartumut ilanngullugit naatsorsuunneqassapput, matumani qinnuteqarfissap nalaani ukioq ataaseq sinnerlugu aappariit katissimappata imaluunniit katinnermut assingusumik inooqatigiissimappata.

  Imm. 4.  Ilinniartoq oqartussaassusilimmik angajoqqaaqanngippat tapiissutit annertussusissaata naatsorsuiffiginerani aningaasarsiat 0 kr. tunngavigineqassapput.

  Imm. 5.  Ilinniartup qatanngutai efterskolernerup aallartinnerani 18-it inorlugit ukiullit ataasiakkaarlugit 30.000 kr.-inik aningaasarsianut tunngavigineqartumi ilanngaataasassapput, matumani pineqartut ilinniartoq najugaqatigippassuk. Meeqqamut 18-it inorlugit ukiulimmut ataatsimut, aningaasarsianut tunngaviusoq aamma 30.000 kr. -inik appartinneqassaaq, nunami allamiinnerup aallartinnerani meeqqamik najugaqateqartunut, meeraq aapparisatut inooqatigisap meerarippagu, tak. imm. 3.

  Imm. 6.  Angajoqqaatut oqartussaassuseqartup aningaasarsiai tapiissuteqartarfiup nalaani malunnaatilimmik ikilisimassappata qinnuteqartoqareerneratigut tapiissutit naatsorsuiffigeqqinneqarsinnaapput. Qinnuteqaammut aningaasarsiat ikilisimanerannut uppernarsaatit ilanngunneqassapput. Tamatuma kingorna aningaasarsianut tunngavigineqartoq maannakkorpiaq qaammammut aningaasarsiarineqartut 12-imik amerlisarlugit nutaamik naatsorsuiffigineqassaaq. Naatsorsueqqinneq tapiissutinik amerlanernik kinguneqassappat aningaasarsiatigut malunnaatilimmik qaffattoqarsimanera pillugu tapiissuteqarfigineqartoq Ilinniartitaanermut Naalakkersuisoqarfimmut nalunaartussaatitaavoq.

 

  § 9.  Ukiumoortumik aningaasanut inatsisini maannakkorpiaq aningaasarsiat tapiissutillu akornanni nikingassummut najoqqutassaq aalajangersarneqassaaq, taamaattoq takuuk imm. 2 aamma 3.

  Imm. 2.  Ukiumoortumik aningaasanut inatsisini angajoqqaat akiliutaasa appartinnissaannut tapiissuteqarnissamut annerpaaffiliinissaq aalajangersarneqassaaq.

  Imm. 3.  Ukiumoortumik aningaasanut inatsisini aningaasarsiakinnernut angajoqqaat akiliutissaannut tamakkiisumik akiliussisoqarsinnaanera aalajangersarneqarpoq.

 

Angalanerit akilernissaannut, ineqarnermut nerisaqarnermullu tapiissutit

 

  § 10.  Ilinniartup angajoqqaatulluunniit oqartussaassusillip angalaneranut aningaasartuutinut, tak. § 1, imm. 1, nr. 2, 5 aamma 6 tapit tassaapput angallassissutinut tamanut atuuttunut akikinnerpaanut aningaasartuutit tamarmiusut.

  Imm. 2.  Aqqut alla, imm. 1-imi taaneqarsimanngitsoq, atorlugu angalasoqarsimappat pisortat angallassisinnaanermik akuerisaannut akikinnerpaamut aningaasartuutit killigalugit akiliussisoqassaaq. Aqqummut pisortat angallassisinnaanermik akuerisaannik angallassisinnaaneq periarfissaqanngippat angalanertut akikinnerpaatut periarfissaasumut aningaasartuutit qaffasinnerpaaffigisinnaasaannik akiliussisoqassaaq. 

  Imm. 3.  Timmisartumut bilitsit suliarereernerisa kingorna allannguinermi aningaasartuutaanerujunnartunut aningaasartuutit angajoqqaanit akilerneqassapput, tamanna angajoqqaatut oqartussaassuseqartut angalanermut kissaatinik allannguinerannik pissuteqarpat.

  Imm. 4.  Angalanermut aningaasartuutit ilinniartunut inunnut annertuumik innarluutilinnut ikiorsiissutit imaluunniit meeqqanut inuusuttunullu ikiorsiissutit pillugit malittarisassat atuuttut naapertorlugit isumaginnittoqarfinniit akilerneqartut imm. 1 aamma 2-mi aalajangersarneqartuni killiliussat iluini utertinneqassapput.

 

  § 11.  Misissuiartorluni angalanernut, tak. § 1, imm. 1, nr. 7, tapiissutit tassaapput Danmarkimut utimullu pulaarfiillu akornanni angallassissutinut tamanut atuuttunut akikinnerpaanut aningaasartuutit tamarmiusut, taamaattoq timikkut tarnikkulluunniit innarluutilimmut ingiallortaanullu ataatsimut annerpaamik katillugit 30.000 kr.

  Imm. 2.  Ilinniartitaanermut Naalakkersuisoqarfiup imm. 1-imi aningaasanut killigititap qaangerneqarnissaa immikkut akuersissutigisinnaavaa, tamanna pissutsinik immikkut ittunik tunngaveqarpat, tamatumunnga ilanngullugu najugaqarfiup sumiiffia pissutigalugu angalaneq immikkut ittumik angalanermut aningaasartuutaalersimappat.

 

  § 12.  Ilinniartup angalanerminut atatillugu pisariaqartumik unnuisariaqarnerinut tapiissutitut aningaasartuutit tamakkiisumik akilerneqassapput, tak. § 1, imm. 1, nr. 3

  Imm. 2.  Angalaneq ilinniartup pisuussutiginngisaanik allanngortariaqalersillugu tassanngaannartumik ineqartitsinissaq pisariaqalissappat, ineqarfissaq aningaasartuuteqarnissarlu inissiineq sioqqullugu Ilinniartitaanermut Naalakkersuisoqarfimmit akuerineqaqqaassapput.

 

  § 13.  Ilinniartup angalanerminut atatillugu pisariaqartumik nerisaqarnissaanut tapiissutit, tak. § 1, imm. 1, nr. 4 tunniunneqartarput najugaqarfigisami nerinermut allagartatut.

  Imm. 2.  Ineqarfigisaq nerinermut allagartanik tigusineq ajorpat, nerisaqarnermut tapiissutit tunniunneqassapput, angalareernermi aningaasartuutigisimasanut uppernarsaatinik tunniussisoqarpat nerinermullu ataatsimut 100 kr. tapiissutaassalluni.

  Imm. 3.  Angalanerup ingerlanerani ilinniartup pisuussutiginngisaanik allannguisoqarneratigut nerinissaq pisariaqalersimappat, nerisaqarnermut tapiissuteqartoqassaaq angalareernermi aningaasartuutigisimasanut uppernarsaatinik tunniussisoqareerpat, nerinermullu ataatsimut 100 kr. tapiissutaassalluni.

 

Kapitali 3

Tapiiffigineqarnissamut piumasaqaatit

 

  § 14.  Tapiissuteqassappat makkua piumasaqaataapput:

1)  Ilinniartoq danskisut innuttaassuseqassaaq. 

2)  Ilinniartoq aamma ilinniartumut angajoqqaatut oqartussaatitaasut efterskolimiinnerup aallartinnerani Kalaallit Nunaanni najugaqavissuussapput efterskolimiinnerullu aallartinnera sioqqullugu sivikinnerpaamik ukiumi ataatsimi Kalaallit Nunaanni najugaqavissuusimassallutik.   Kalaallit Nunaata avataani najugaqarfiit isumassuiffittut naatsorsuussaassanngillat kalaallit oqartussaasui najugaqartitsinermut aamma najugaqartitsinermut ilinniagaqarnermuinnaq pissuteqartumut peqataasimatillugit.

3)  Ilinniartoq efterskolimiinnerup aallartinnerani ukiuni arfineq-pingasuni atuarsimassaaq imaluunniit 14-inik ukioqalereersimassalluni, 18-inillu ukioqalereersimassanani,

4)  Ilinniartoq efterskolimi Danmarkimi ilinniartitaanermut ministerimit akuerisaasumi ilinniartussatut akuerineqarsimassaaq, takuuk § 15. Ilinniartoq angerlarsimaffiup avataanut inissitaq, takuuk § 19, efterskolimi Danmarkimi oqartussaasut meeqqanik inissitanik ilinniartoqarsinnaasutut akuerisaanni ilinnialersinnaanerminik akuerisaasimassaaq, takuuk § 15.

5)  Ilinniartoq efterskolimiitsilluni Danmarkimi ilaqutariinnut attaveqarfigisassaminut angajoqqaatut oqartussaassuseqartut toqqagaannut attaveqassaaq, takuuk § 16.

6)  Ilinniartoq siusinnerusukkut Kalaallit Nunaanni Danmarkimiluunniit efterskolernissanut tapiiffigineqarsimassanngilaq, taamaattoq takukkit imm. 4 aamma 5, imaluunniit paarlaaqatigiilluni ilinniariarnermut tapiiffigineqarsimassanani.

  Imm. 2.  Ilinniartitaanermut Naalakkersuisoqarfik immikkorluinnaq pisoqarsimatillugu najukkamut piumasaqaat imm. 1, nr. 2-miittoq saneqqussinnaavaat, soorlu assersuutigalugu ilinniartoq angajoqqaatullu oqartussaassuseqartoq ukiuni arlalinni Kalaallit Nunaanni aalajangersimasumik najugaqarsimappata imaluunniit meeraq Kalaallit Nunaanni aalajangersimasumik najugaqarsimappat ukiuni arlaqartuni najugaqareersimappat, taamaalineranilu angajoqqaatut oqartussaassuseqartoq nunami allami aalajangersimasumik najugaqarsimappat.

  Imm.3.  Ilinniartitaanermut Naalakkersuisoqarfiup immikkut pisoqartillugu ukiuni arfineq-pingasuni atuarsimanissamik piumasaqaat aamma ilinniartup 18-inik ukioqalersimannginnissaanik piumasaqaat saneqqussinnaavai, tak. imm. 1 nr. 3, tamatumunnga ilanngullugu ukiut arfineq-pingasut ataallugit atuarsimaneq atuartup klassimik alluisimaneranik pissuteqarpat, ukioqqortuallaarnerlu atuartup klassimik uteqqiisimaneranik allamilluunniit pissuteqarluni atuarnermini kinguaattoorsimaneranik pissuteqarpat.

  Imm. 4.  Ilinniartitaanermut Naalakkersuisoqarfiup immikkut pisoqartillugu imm. 1, nr. 6-imi siusinnerusukkut tapiiffigineqarsimannginnissamik piumasaqaat saneqqussinnaavaa, tamatumunnga ilanngullugu ilinniartoq nammineq pisuussutiginngisaminik siusinnerusukkut efterskolernerminik unitsitsiinnarsimappat imaluunniit naalakkersuisoqarfiup nalilerpagu efterskolernerup nanginnissaa ilinniartup ilinniaqqinnissamut periarfissaqalernissaanut pingaaruteqarluinnartoq.

  Imm. 5.  Ilinniartunut inunnut annertuumik innarluutilinnut ikiorsiisarneq pillugu malittarisassanut ilaasunut, imm. 1, nr. 6 apeqqutaatinnagu, ukiut pingasut tikillugit tapiisoqarsinnaavoq.

  Imm.6.  Ilinniartitaanermut Naalakkersuisoqarfik tapiissutinut tunngatillugu piumasaqaateqarsinnaavoq, taakkununnga ilaassalluni ilinniartup ilinnialernermut piareersarnissamullu pikkorissartitsinernut peqataanissaa, takuuk § 4, imaluunniit ilinniartoq efterskolernermut atatillugu immikkut perorsaanerup tungaatigut ikiorsiiffigineqarnissaa pisariaqarnersoq, tak. § 3.

 

  § 15.  Efterskolerfimmi akuerisaasumi atualernissaq allakkatigut efterskolimiit atsiorneqartumik uppernarsarneqassaaq.

 

  § 16.  Angajoqqaatut oqartussaassuseqartut ilaqutariinnik atassuteqarfissanik toqqaasimanerat, tak. § 14, imm. 1, nr. 5, angajoqqaatut oqartussaassuseqartut aamma ilaqutariinnik atassuteqarfigineqartussanit atsiorneqartumik nalunaaruteqarnikkut uppernarsarneqarsimassaaq. Akuersissuteqarnermut nalunaarut aalajangersimasoq Ilinniartitaanermut Naalakkersuisoqarfimmit suliarineqartoq atorneqassaaq.

 

  § 17.  Ilinniartoq efterskolip aallartinnerani takkutinngitsoorpat tapiissuteqartarneq unitsinneqassaaq.

  Imm. 2.  Ilinniartitaanermut Naalakkersuisoqarfiup imm. 1 sanioqqussinnaavaa, ilinniartup efterskolip aallartinnerani takkutinngitsoornera pissutsinik immikkut ittunik akuerineqarsinnaasunik pissuteqarsimappat, tamatumunnga ilanngullugu tamanna ilaqutariinni peruluttoqarneranik angallannermiluunniit pissutsinik ilinniartup pisuussutiginngisaanik pissuteqarpat.

 

  § 18.  Efterskolerneq unitsinneqarpat ullormiit unitsitsiffiusumiit tapiiffigineqarsinnaaneq unissaaq. Uniinnarnerup kingorna efterskolerfiusoq piffissami aalajangersimasumi efterskolimiinnerup akilerneqarnissaanik piumasaqarpat (taamaatinnermi akiliut), tapiiffigineqarnissamik pisinnaatitaaffik piffissami tassani pigiinnarneqassaaq, taamaattorli sivisunerpaamik sapaatip akunnerini sisamani.

  Imm. 2.  Angerlamut angalanermut aamma pisariaqartumik unnuiffissanut nerisaqarnermullu aningaasartuutinik akiliunneqarsinnaaneq taamaallaat atuutissaaq, ilinniartoq angerlannginnermini Kalaallit Illuutaannit efterskolimut attuumassuteqartumit aaqqissuunneqartumik oqaloqatigineqaqqaarsimappat. Oqaloqatigiinnermi qularnaarneqassaaq ajornartorsiutinut uniinnarnermut patsisaasunut aaqqiissutaasinnaasut tamarmik misilinneqarsimanissaat, tamakkununnga ilanngullugit ilinniartunut ataasiakkaanut ikiorsiissutit, tak. § 1, imm. 1, nr. 8. Oqaloqatigiinneq ilinniartup efterskoliani pissaaq, ilinniartup efterskolernerminik unitsitsiinnarniarluni nalunaaruteqarnerata kinguninnguatigut.  Oqaloqatigiinnermut peqataassapput Kalaallit Illuutaanni sulisoq, efterskolimi sulisoq ilinniartorlu, ilinniartorlu 18-it inorlugit ukioqarpat angajoqqaatut oqartussaassuseqartut imaluunniit ilaqutariit ilinniartumut attaveqaataasut peqataassapput.

 

Kapitali 4

 Qinnuteqarnermi periutsit

 

Ilinniartut annertuumik innarluutillit aamma ilinniartut angerlarsimaffiup avataanut inissinneqarsimasut pillugit immikkut paasisassat

 

  § 19  Ilinniartunut inunnut annertuumik innarluutilinnut ikiorsiisarneq pillugu malittarisassanut qaqugukkulluunniit atuuttunut ilaasunut aamma ilinniartunut meeqqanik inuusuttunillu ikiorsiisarneq pillugu malittarisassat qaqugukkulluunniit atuuttut naapertorlugit angerlarsimaffimmik avataanut inissinneqarsimasunut tapiissutit aatsaat tunniunneqarsinnaapput efterskolernissaq isumaginninnermi oqartussaasunit akuerineqarsimappat.

 

Ilinniartunut perorsaanikkut immikkut tapersersorneqarnissamik pisariaqartitsisunut immikkut paasisassat

 

  § 20.  Ilinniartut Danmarkimi efterskolernermik ingerlatsinissaminnut perorsaanikkut immikkut tapersersorneqarnissamik pisariaqartitsisut aamma ilinniartunut taakkununnga angajoqqaatut oqartussaassuseqartut ikiorsiissutinik pisariaqartitsisoqarnersoq qulaajaaffiginiarlugit efterskolimi atualernissaq eqqarsaatigalugu ilinniartut atuarfiannit ilitsersorneqarnissamik piumasaqarsinnaapput.  

 

Ilinniartunut tamanut tunngatillugu

 

  § 21.  Ilinniartunut § 19-imi pineqanngitsunut tunngatillugu ilinniartup efterskolimi akuerisaasumi atualernissaa pillugu ilinniartumut angajoqqaatut oqartussaassuseqartut qinnuteqassapput. 

  Imm. 2.  Ilinniartup efterskolimi akuerisaasumi ilinniartunngorsinnaaneranik nalunaarut aamma ilaqutariinnit attaveqaataasartussanit uppernarsaat pigineqalerpata, Namminersorlutik Oqartussanit tapiiffigineqarnissamik qinnuteqaat Ilinniartitaanermut Naalakkersuisoqarfiup immersugassiaa atorlugu immersugaq nassiunneqassaaq.

  Imm. 3.  Qinnuteqarfissatut immersuiffissaq nittartakkami naalakkersuisoqarfiup innersuussaani nassaarineqarsinnaavoq. Immersuiffissaq immersorneqassaaq naalakkersuisoqarfiullu aqutsisussat toqqagaanut angajoqqaatut oqartussaassuseqartuniit atsiorlugu nassiunneqarluni.  Qinnuteqaammut ilanngussatut makku ilanngunneqassapput:

1)  Efterskolip ilinniartup atualersinnaaneranut neriorsuutaa, takuuk § 15.

2)  Ilaqutariinnit attaveqaataasunit akuersinermut nalunaarut immersoriigaq atsioriigarlu, takuuk § 16.

3)  Inoqutigiinnut najugaqarnermut uppernarsaat qangarnisaanerusoq. 

4)  Kuisinnermut allagartaq imaluunniit angajoqqaatut oqartussaassuseqartut kikkuunerinut allatut uppernarsaat. 

5)  Angajoqqaatut oqartussaassuseqartunut inuup normui maannakkorpiaq aningaasarsiarineqartut pillugit paasissutissanik piniarnermut atugassat. § 8, imm. 3 malillugu qinnuteqartoqarnerani aapparisamut inuup normua paasissutissiissutigineqassaaq.  

6)  Ukiuni arfineq-pingasuni atuarsimanermut uppernarsaatissatut karakteerinut uppernarsaat, takuuk § 14, imm. 1, nr. 2.

  Imm. 4.  Ilinniartoq § 19-imut ilaasimappat ilumut ilinniartoq meeqqanik inuussuttunillu ikiorsiisarneq pillugu malittarisassat atuuttut malillugit angerlarsimaffiup avataanut inissinneqarsimanersoq imaluunniit inunnut annertuumik innarluutilinnut ikiorsiisarneq pillugu malittarisassanut atuuttunut ilaanersoq oqartussaasunit pisinnaatitaasunit eqqortunit uppernarsaat aamma ilanngullugu nassiunneqassaaq.

 

  § 22.  Ilinniartitaanermut Naalakkersuisoqarfik ilinniartup Danmarkimut angalanissaanik aaqqissuussimatillugu qinnuteqaat naalakkersuisoqarfimmiit aqutsisussatut toqqakkamit ukiumi efterskolernerup aallartiffissaani marsip 15-ia tikitsinnagu tiguneqareersimassaaq. 

  Imm. 2.  § 2 malillugu misissuiartorluni angalanerit tapiiffiginissaat pillugu qinnuteqaat efterskolernissap aallartinnissaa ukiumik ataatsimik sioqqullugu aqutsisussamit naalakkersuisoqarfimmiit toqqakkamit kingusinnerpaamik februaarip aallaqqaataani tiguneqareersimassaaq.

 

  § 23.  Ilinniartitaanermut Naalakkersuisoqarfik efterskolit ilinniartoriligassaannut tapiissutit tunniunneqartut taakkualu tunniuneqarnissaannut periutsit pillugit nalunaaruteqassaaq.

  Imm. 2.  Ilinniartitaanermut Naalakkersuisoqarfik ilinniartut kikkut Kalaallit Illuutaasa ataasiakkaat Danmarkimiittut qanittuini aallartittussaanerat pillugit nalunaaruteqassaaq.

 

Nalunaarutiginnittussaatitaaneq aamma utertitsilluni akiliisarneq

 

  § 24.  Angajoqqaatut oqartussaassuseqartut ilinniartup efterskolimiinnerminik unitsitsinera, ilinniarfimmut allamut nuunnera paasissutissallu allat tapiissutisiuarnissamut pingaaruteqartut pillugit Ilinniartitaanermut Naalakkersuisoqarfimmut nalunaarnissamik pisussaaffeqarput.

  Imm. 2.  Ilinniartitaanermut Naalakkersuisoqarfik paasissutissanik tapiissutit pillugit qinnuteqaatip naliliiffiginissaanut pisariaqartinneqartunik piniarnissamik piginnaatinneqarpoq, taakkununnga ilanngullugit aningaasarsianut tunngatillugu paasissutissat aamma tapiissutit ingerlaannarnissaannut pisinnaatitaaffimmik naliliinissaq. Naalakkersuisoqarfik aningaasarsianut paasissutissanut paasissutissanullu allanut tapiissuteqarsinnaanermut pingaaruteqarsinnaasunut tunngatillugu misiligutissanik tigusisinnaatitaavoq, taakkununnga ilanngullugu tapiissutit annertussusissaat.

 

  § 25.  Ilinniartitaanermut Naalakkersuisoqarfik tapiissutit utertinneqarnissaannik piumasaqarsinnaavoq, imaattoqarsimappat:

1)  angajoqqaatut oqartussaassuseqartut tapiissutinik tunineqarnissamut pissutsinik pingaaruteqarsinnaasunik eqqunngitsunik paasissutissiisimappata imaluunniit allannguutit pillugit nalunaarusussimanngippata,

2)  tapiissutit eqqunngitsoq tunngavigalugu tunniunneqarsimappata, 

3)  tapiissutit aningaasaliiffigineqartunut atorneqarsimanngippata, 

4)  najugaqarnerup aallartinnissaa inniminnerneqareersoq akilerneqareersorlu angalanerup kingorna efterskolerneq aallartinneqarsimanngippat, imaluunniit

5)  ilinniartup efterskolimiinnera ima sivisutigisimappat efterskolerneq ilumoortumik aallartinneqarsimanani, unitsitsiinnarnerlu naammattumik tunngavilersorneqarsimanngippat.

 

Angalanerit aqunneqarnerat

 

  § 26.  Ilinniartitaanermut Naalakkersuisoqarfiup ilinniartullu kommunerisaani ingerlatsiviup angajoqqaatut oqartussaassuseqartut isumasiorlugit ilinniartut efterskolimut angalanissaasa piareersarnissaat isumagissavaa, taamaattoq tak. imm. 3 aamma § 28 imm. 1.

  Imm. 2.  Ilinniartitaanermut Naalakkersuisoqarfiup ilinniartut Danmarkimut tikinneranni isumagineqarnissaat ataqatigiissassavaa.

  Imm. 3.  Ilinniartunut angerlarsimaffiup avataanut inissitanut tunngatillugu isumaginninnermi oqartussaasup pisinnaatitaaffeqartup angajoqqaatut oqartussaassuseqartut isumasiorlugit ilinniartut efterskolimut angalanissaasa piareersarnissaat Danmarkimullu tikinneranni isumagineqarnissaat isumagissavaat.

 

  § 27.  Kalaallit Illuutaata inissisimanermigut ilinniartup efterskolianut attuumassuteqartup angajoqqaatut oqartussaassuseqartut isumasioqatigalugit ilinniartup efterskolereerluni angerlamut angalanissaata piareersarnissaa isumagissavaa, taamaattoq tak. imm. 2 aamma § 28 imm. 2. 

  Imm. 2.  Ilinniartunut angerlarsimaffiup avataanut inissitanut tunngatillugu isumaginninnermi oqartussaasup pisinnaatitaaffeqartup angajoqqaatut oqartussaassuseqartut isumasiorlugit ilinniartut efterskolimit angerlarnissaat isumagissavaa.

 

  § 28.  Angajoqqaatut oqartussaassuseqartut ilinniartup efterskoleriarluni angalanissaanut namminneerlutik piareersaarusuttut isumaginnikkusuttullu tamanna pillugu angalanissaq sioqqullugu kingusinnerpaamillu marts-ip 15-iani ilisimatitsissapput. 

  Imm. 2.  Angajoqqaatut oqartussaassuseqartut efterskolimiit ilinniartup angerlarnissaanut angalanissamik piareersaarusuttut isumaginnikkusuttullu tamanna pillugu Kalaallit Illuutaannut kingusinnerpaamillu angerlarnissaq qaammatinik tallimanik sioqqullugu ilisimatitsissapput.

 

Angalanermut aningaasartuutinik utertitsineq

 

  § 29.  Angajoqqaatut oqartussaassuseqartut efterskolimut efterskolimiillu ilinniartup angalaneranik namminneerlutik aaqqissuussisut ilinniartup angerlarneranut bilitsimut akikinnerpaamut killeqartitamullu utertinneqarsinnaanngitsumullu aningaasartuutaasut uppernarsarneqarsinnaasut Ilinniartitaanermut Naalakkersuisoqarfimmit utertinneqarsinnaapput, taakkununnga angalanermut atatillugu unnuisariaqarnernut pisariaqartunut aningaasartuutit ilanngullugit. Angerlarsimaffiup Københavnillu akornanni angalanermut aningaasartuutit kiisalu Danmarkimi akikinnerpaamik angallassisunut aningaasartuutit atuartumut immikkut aningaasartuutitut naatsorsorneqassapput.

  Imm. 2.  Bilitsi akikinnerpaaq imaluunniit allanngortinneqarsinnaanngitsoq atorneqanngippat, utertoorutigineqarsinnaapput ullormi angalaffimmi bilitsip allanngortinneqarsinnaanngitsup akia angalanerulluunniit akikinnerpaap nalinga.

  Imm. 3.  Angajoqqaat Kalaallit Nunaanni mittarfeqarfimmut qaninnermut namminneerlutik angallassigunik aningaasartuutitik namminneq akilissavaat.

 

Tapiissutit tunniunneqartarnerat

 

  § 30.  Efterskolernerup akilernissaanut tapiissutit, takuuk § 7, efterskolimut pineqartumut qaammatit tamaasa tunniunneqartarput. Tapiissutit aningaasartaat piffissap tapiiffiusup ingerlanerani allanngussappata, takuuk § 8, imm. 6, isertitanut tunngavigineqartup nutaap naatsorsoreernerisa kingorna qaammatip qaangiunneratigut tapiissutit allanngortut tunniunneqassapput. 

  Imm. 2.  Efterskolerneq taamaatiinnarneqarpat tapiissutit tunniunneqartarnerat unitsinneqassaaq, taamaattoq tak. § 18, imm. 1.

 

Naammagittaalliuuteqarneq

 

  § 31.  Tapiissutinut tunngatillugu aalajangiinerit allaffissornikkut oqartussaasunut allanut naammagittaalliuutigineqarsinnaanngillat.

 

Kapitali 5

Atuutilersitsinermut atorunnaarsitsinermullu aalajangersakkat

 

  § 32.  Nalunaarut 1. august 2019 atuutilissaaq, ukiorlu atuarfiusoq 2019/2020-miit atortussanngortinneqassalluni.

  Imm. 2.  Peqatigitillugu Danmarkimi efterskolimiinnermut tapiissuteqartarneq pillugu Namminersorlutik Oqartussat nalunaarutaat nr. 2, 17. januar 2017-imeersoq atorunnaarpoq.

 

 

 

Namminersorlutik Oqartussat, ulloq 4. juli 2019

 

 

 

Ane Lone Bagger

/

Lone Nukaaraq Møller