Kapitali 1
Atuuffissai

 

  § 1.  Inatsisartut inatsisaanni sermimik imermillu atuinermut niuernikkut iluaquteqarnissaq, tassungalu atatillugu misissuinerit taakkuninngalu Kalaallit Nunaanni avammullu tuniniaanerit malittarisassiorneqarput.

  Imm. 2.  Inatsisartut inatsisaat Kalaallit Nunaanni nunami imaanilu oqartussaaffimmi atuuppoq
  Imm. 3.  Inatsisartut inatsisaat, Kalaallit Nunaanni tamat atuinerannut pilersuinissaq siunertaralugu sermimik imermillu atuinermut imaluunniit imermik nukissiuuteqarnissamut sermimit imermillu isumalluutinik atuinermut kiisalu tamatumunnga atatillugu misissuinernut, atuutinngilaq.

 

  § 2.  Inatsisartut inatsisaat naapertorlugu akuersissummik aatsaat tunniussisoqarsimappat aammalu inatsisartut inatsisaat naapertorlugu aalajangersakkat akuersissuteqarnermilu piumasaqaatit taamaallaat naapertorlugit sermimik imermillu niuernikkut iluaquteqarneq tassungalu atatillugu misissuinerit pisinnaapput.
  Imm. 2.  Namminersorlutik Oqartussat imermut sermersuaqarfinnullu tunngasunik nalinginnaanerusunik aammalu nalunaarsuiffiusunik ilisimatuussutsikkut suliassatigullu misissuisinnaapput. Misissuinerit taamaattut naalagaaffimmit imaluunniit nunani allani oqartussanit sullissivinnillu allanit taamaallaat akuersissut Inatsisartut inatsisaat malillugu Naalakkersuisut tunniunneqarsimasoq malillugu ingerlanneqarsinnaapput.

  Imm. 3.  Kalaallit Nunaannit sermimik imermillu avammut nioqquteqarneq taamaallaat Naalakkersuisunit akuersissummik tunineqareernerup kingorna pisinnaavoq.

 

Kapitali 2
Misissueqqaarnerit

 

  § 3.  Naalakkersuisut sumiiffimmut erseqqinnerusumik killissalersorneqartumut aammalu atugassarititaasut erseqqinnerusumik aalajangersarneqartut tunngavigalugit sermimik imermillu niuernikkut iluaquteqarnissamut periarfissat pillugit misissueqqaarnermik suliaqarnissamut kisermaassiviunngitsumik akuersissuteqarsinnaapput.
  Imm. 2.  Akuersissut ukiut pingasut tikillugit atuuttussanngorlugu tunniunneqarsinnaavoq.

 

Kapitali 3
Atuineq

Atuinissamut akuersissut

 

  § 4.  Naalakkersuisut sumiiffimmut erseqqinnerusumik killissalersorneqartumut aammalu atugassarititaasut erseqqinnerusumik aalajangersarneqartut tunngavigalugit, sermimik imermillu niuernikkut iluaquteqarnissamut akuersissummik tunniussisinnaapput.

  Imm. 2.  Imm. 1 naapertorlugu atuinissamut akuersissummi sermimik imermillu atuinissamut akuersissut naapertorlugu atorneqartumik annerpaaffiliisinnaapput (atorneqartup annertussusia), taamaattorli takukkit §§ 6-7.

  Imm. 3.  Atuinissamut akuersissut immikkut sermimut aamma imermut tunniunneqarsinnaavoq.

  Imm. 4.  Akuersissut malillugu atuineq piffissamut killiliussap akuersissummi aalajangersagaasup iluani aallartinneqarsimanngippat atuinissamut akuersissut atorunnaassaaq.

  Imm. 5.  Piffissamut killiliussaq akuersissummik tunniussinerup kingorna ukiunit 5-init kingusinnerusinnaanngilaq, taamaattoq takuuk § 16.

  Imm. 6.  Inatsisartut inatsisaata matuma atuutsinnera sioqqullugu sermimik imermillu atuinissamut iluaquteqarniarluni aamma Kalaallit Nunaanni nioqquteqarniarluni suliffeqarfiit suliaqartuusut tamakku pillugit qinnuteqarteqqaarnagit Naalakkersuisunit akuersissuteqarfigineqartillugit nalunaarfigineqassapput.

 

Kisermaassisussaatitaalluni imaluunniit kisermaassisussaatitaanani atuinissamut akuersissut

 

  § 5.  § 4 malillugu nunami sumiiffimmut imaluunniit imaani sumiiffimmut atuinissamut akuersissut kisermaassisussaatitaaffilimmik imaluunniit kisermaassisussaatitaaffeqanngitsumik tunniunneqarsinnaavoq.

  Imm. 2.  § 4 malillugu atuinissamut akuersissut kisermaassisussaatitaaffilimmik tunniunneqarsinnaavoq:

1)  Sumiiffimmut aalajangersimasumut, taamaattoq takukkit imm. 3 aamma § 9, imm. 4.

2)  Sermimut isumalluummut imaluunniit imermut isumalluummut aalajangersimasumut, taamaattoq takukkit imm. 3 aamma § 9, imm. 4.

3)  Sumiiffimmit aalajangersimasumit imaluunniit sermimit isumalluummit imaluunniit imermit isumalluummit aalajangersimasumit atuinerup annertussusaanut aalajangersimasumut, taamaattoq takukkit imm. 3 aamma § 9, imm. 5.

  Imm. 3.  Pisinnaatitsissummik pigisaqartoq § 4 malillugu atuinissamut akuersissutip, kisermaassisussaatitaanani atuinissamut akuersissummit kisermaassisussaatitaalluni atuinissamut akuersissummut imaluunniit killormut, allanngortinneqarnissaa pillugu Naalakkersuisunut qinnuteqarsinnaavoq. Taamaattoqarpat pisinnaatitaaffiit kalluarneqartut allat eqqarsaatigalugit, tamanna pillugu Naalakkersuisut aalajangiissapput.

  Imm. 4.  Imm. 3 malillugu atuinissamut akuersissutip allanngortinneqarnerani, atuinissamut akuersissummut tapiliussami akuerineqassaaq.

Atorneqartut annertussusaasa allannguuteqarnerat

 

  § 6.  Pisinnaatitsissummik pigisaqartoq, atuinissamut akuersissut, takuuk § 4, imm. 2, malillugu atuinerup annertussusaata allanngortinneqarnissaa pillugu Naalakkersuisunut qinnuteqarsinnaavoq.

  Imm. 2.  Atuinissamut akuersissummi atuinerup annertussusaata allanngortinnissaa pillugu aalajangiineq, pissutsit makkua tunngavigalugit aalajangiiffigineqassaaq:

1)  Sermip aamma erngup annertussusai ukiumi ataatsimi pingaartumillu ukiumi kingullermi piffissami akuersissuteqarfiusumi atorneqartut, aamma pisinnaatitsissummik pigisaqartup tamatumunnga nalunaarusiaa, takuuk § 22, imm. 2.

2)  Sermip aamma erngup annertussusai, pisinnaatitsissummik pigisaqartup piffissap akuersissuteqarfiusup sinnerani atugassaatut ilimagineqartut, aamma pisinnaatitsissummik pigisaqartup tamatumunnga atuinissamut pilersaarutaa akuerisaasoq.

  Imm. 3.  Atuinerup annertussusaani allanngortitsineq atuinissamut akuersissummut tapiliussami aalajangersarneqassaaq.

 

Pisortat pilersuisussaatitaanerat

 

  § 7.  Atuisartunut najukkameersunut imermik pilersuineq, pisinnaatitsissummik pigisaqartunit Inatsisartut inatsisaat manna malillugu atuinissamut akuersissummik peqartunit salliutillugu pingaarnerutinneqarpoq.

  Imm. 2.  Suliffeqarfiit pilersuisut najukkameersut tamarmik pisariaqartitsinerat tamakkiisumik naammassineqareerpat, takuuk imm. 1, sermimik imermillu atorneqanngitsumik sinneruttoqarpat, sinneruttut allanut Inatsisartut inatsisaat manna malillugu atuinissamut akuersissummut pigisaannut naleqqiullugu pisinnaatitsissummik pigisaqartut akornanni agguarneqassapput.

 

Imermik sinneruttumik atuinissamut akuersissut

 

  § 8.  Naalakkersuisut ingerlatseqatigiiffimmut, pisortat suliffeqarfiannit pilersuisumit imermik sinneruttumik pisinissaq pillugu isumaqatigiissuteqarsimasumut, imermik niuernikkut iluaquteqarnissamut akuersissummik tunniussisinnaapput.

  Imm. 2.  Imm. 1 malillugu atuinissamut akuersissut taamaallaat, pisinnaatitsissummik pigisaqartoq suliffeqarfimmit pilersuisumit imermik sinneruttumik pisinissaq pillugu pisortat suliffeqarfiannut pilersuisumut isumaqatigiissuteqarsimappat, aammalu atuineq isumaqatigiissut tunngavigalugu aammalu isumaqatigiissummut naapertuuttumik ingerlanneqarpat, aatsaat imermik sinneruttumik atuisinnaatitsivoq.

  Imm. 3.  Pisinnaatitsissummik pigisaqartup pisortat suliffeqarfiannit pilersuisumit, imm. 1-imi taaneqartutut, imermik sinneruttumik pisinissaq pillugu isumaqatigiissuteqarnera, pisortat suliffeqarfiata pilersuisup pilersuisussaatitaanera aamma tamatumunnga inatsisit malillugit pisussaaffii allat eqqarsaatigalugit, isumaqatigiissutigineqassaaq naammassineqassallunilu. Imermik pisinissamut isumaqatigiissut tamatumunnga atugassarititaasunik imaqassaaq. Imermik pisinissamut isumaqatigiissut tamatuma saniatigut imermik pilersuinissaq pillugu atugassarititaasunik imaqarsinnaavoq, ilanngullugu imermik minnerpaamik annerpaamillu aalajangersimasumik annertussusilimmik aammalu imermik aalajangersimasumik pitsaassusilimmik pilersuineq, aammalu imermik pilersuinermut akiliuteqarneq pillugit. Pisortanit suliffeqarfik pilersuisoq, ilaatigut suliffeqarfiup pilersuisup inuussutissarsiornikkut soqutigisai aamma atugai tunngavigalugit atugassarititaasut taamaattut aamma allat tunngavigalugit imermik pisinissamut isumaqatigiissuteqarsinnaavoq tassanngalu naammassinnissinnaalluni.

  Imm. 4.  Imm. 1-3 malillugit allatut pisoqartussaasimanngippat, §§ 4-7-imi aalajangersakkat aamma imm. 1 malillugu atuinissamut akuersissummut atuupput.

 

Pisinnaatitsissummik pigisaqartoq

 

  § 9.  §§ 4 imaluunniit 8 malillugit atuinissamut akuersissut taamaallaat aktiaatileqatigiiffimmut imaluunniit piginneqatigiiffimmut, Kalaallit Nunaanni angerlarsimaffeqartumut, taamaallaat Inatsisartut inatsisaat malillugu akuersissummi pineqartunik ingerlatanik suliaqartumut, aammalu ingerlatseqatigiiffinnik allanik akileraaruteqaqateqartanngitsunut, tunniunneqarsinnaavoq, taamaattoq takuuk imm. 2.

  Imm. 2.  §§ 4 imaluunnit 8 malillugit atuinissamut akuersissut aktiaatileqatigiiffimmut imaluunniit piginneqatigiiffimmut, Kalaallit Nunaanni angerlarsimaffeqartumut, ingerlatanik Inatsisartut inatsisaat malillugu akuersissummi pineqartunut ilaasunik aammalu ingerlatanik allanik suliaqartumut, aammalu tamatumunnga inatsisit malillugit ingerlatseqatigiiffinnik allanik akileraaruteqaqateqarsinnaasumut, tunniunneqarsinnaavoq. Atuinissamut akuersissut taamaattoq, akuersissut malillugu pisinnaatitsissummik pigisaqartoq § 25, imm. 3-imi pineqartunut ilaanngitsoq pillugu atugassarititaasunik imaqassaaq.
  Imm. 3.  Atuinissamut akuersissut malillugu pisinnaatitsissummik pigisaqartoq atuinermik ingerlatanik aammalu ingerlatanik allanik akuersissummi pineqartunut ilaasunik suliaqarsinnaanissamut pisariaqartunik suliamut paasisimasaqassaaq aammalu aningaasaqarnikkut pisinnaasaqassalluni.

Imm. 4.  § 4 malillugu atuinissamut akuersissut, sumiiffimmut imaluunniit sermimut isumalluummut imaluunniit imermut isumalluummut aalajangersimasumut, atuinissamut periarfissaqarfiusut pisinnaatitsissummik pigisaqartumit atorneqartussatut naatsorsuutigineqarpata taamaallaat kisermaassisussaatitaanermik ilaqartinneqarsinnaavoq.

  Imm. 5.  §§ 4 imaluunniit 8 malillugit atuinissamut akuersissut, atuinerup annertussusaanut, takuuk § 4, imm. 2, pisinnaatitsissummik pigisaqartup pisariaqartitsineranit annertuumik annertunerusumut, kisermaassisussaatitaanermik ilaqartinneqarsinnaanngilaq.

 

Pisortat pilersuisussaatitaanerat tunngavigalugu akuersissutip allanngortinneqartarnera

 

  § 10.  Naalakkersuisut nunami sumiiffiup iluani § 4 malillugu kisermaassisussaatitaalluni akuersissummi pineqartumi ilaasumi, sumiiffinni najugaqarfigineqartuni atuisunut pilersuinissaq siunertaralugu sermimik imermillu atuinissamut allamut akuersissummik tunniussisinnaapput.

  Imm. 2.  Imm. 1 malillugu akuersissummik tunniussineq § 5 naapertorlugu kisermaassisussaatitaalluni akuersissut malillugu pisinnaatitsissummik pigisaqartup taarsiivigineqarsinnaatitaaneranik imaluunniit Naalakkersuisunut imaluunniit allamut tassunga allanik piumasaqarsinnaatitaaneranik piginnaatitaaffeqarneranillu, malitseqassanngilaq.

 

Piffissaq akuersissuteqarfiusoq

 

  § 11.  §§ 4 imaluunniit  8 malillugu atuinissamut akuersissut piffissamut akuersissuteqarfiusumut ukiut 20-t angullugit tunniunneqarsinnaavoq.
  Imm. 2.  Naalakkersuisut piffissaq akuersissuteqarfiusoq imm. 1-imi taaneqartoq atugassarititaasut erseqqinnerusumik aalajangersarneqartut malillugit sivitsorsinnaavaat. Taamaattoq piffissaq akuersissuteqarfiusoq tamarmiusoq ukiunit 30-nit sivisunerusinnaanngilaq.

  Imm. 3.  Piffissap akuersissuteqarfiusup sivitsorneqarnera atuinissamut akuersissummut tapiliussami aalajangersarneqassaaq.

 

Atuinissamut akuersissummik tunniussineq

 

  § 12.  Naalakkersuisut §§ 4 imaluunniit 8 malillugit periaatsit imm. 2-4-mi taaneqartut arlaat atorlugu atuinissamut akuersissummik tunniussisinnaapput.

  Imm. 2.  Atuinissamut akuersissut tamatuminnga qinnuteqartoqarneratigut tunniunneqarsinnaavoq.

  Imm. 3.  Atuinissamut akuersissut atuinissamut akuersissutit ataatsip imaluunniit arlallit tunniunneqarnissaat pillugu nalinginnaasumik tamanut ammasumik qinnuteqaqqusereernerup kingorna (neqerooruteqartitsineq) tunniunneqarsinnaavoq. Naalakkersuisut neqeroortitsineq pillugu nalunaarut, qinnuteqarnissamut piffissamut killiliussap naannginnerani minnerpaamik ullut 90-it sioqqullugit tamanut saqqummiutissavaat. Nalunaaruteqarneq Naalakkersuisut nittartagaanni aammalu allatut tamanut saqqummiunneqassaaq.

  Imm. 4.  Sumiiffik aalajangersimasoq piffissami aalajangersimasumi tamatuminnga qinnuteqarnikkut atuinissamut akuersissut ataaseq imaluunniit arlallit tunniunneqarnissaannut ammatinneqassasoq (suleriaaseq ammasoq), aalajangersakkanik Naalakkersuisut aalajangersaasinnaapput. Suleriaaseq ammasoq pillugu Naalakkersuisut nittartagaanni aammalu allatut Naalakkersuisut tamanut saqqummiussissapput. Suleriaaseq ammasoq malillugu atuinissamut akuersissummik tunineqarnissamik qinnuteqaat, ammasumik suleriaatsip nalunaarutigineqarnerata tamanut saqqummiunneqareernerata kingorna siusinnerpaamik ullut 90-it qaangiunneranni aatsaat tunniunneqarsinnaavoq.

  Imm. 5.  Naalakkersuisut tamatuminnga qinnuteqaammik, suleriaatsit imm. 2-4-mi taaneqartut arlaat malillugu tunniunneqartumik, tigusaqarsimagaluarunilluunniit, Naalakkersuisut atuinissamut akuersissummik tunniussinngissinnaapput.

 

  § 13.  Naalakkersuisut akuersissummik qinnuteqaatip imarisassai tunniunneqartarneralu aammalu atuinissamut akuersissummik tunniussisarneq pillugit aalajangersakkanik erseqqinnerusunik aalajangersaasinnaapput.

 

Kapitali 4
Atuinissamut pilersaarut

 

  § 14.  Atuinissamut akuersissut malillugu pisinnaatitsissummik pigisaqartoq atuinermi ingerlatassanut tamarmiusunut atuinissamut pilersaarummik suliaqassaaq. Pisinnaatitsissummik pigisaqartup atuinerminik aallartinnginnerani, taakkununnga sanaartukkanik pilersitsinnginnerani imaluunniit tamatumunnga atugassanik allanik iliuusissanik suliaqalinnginnerani, atuinissamut pilersaarut Naalakkersuisunit akuerineqarsimassaaq. Naalakkersuisut akuersissuteqarnermi atugassarititaasut aalajangersarsinnaavaat.
  Imm. 2.  Atuinissamut pilersaarut imm. 1-imi taaneqartut saniatigut pissutsit makkua pillugit paasissutissanik imaqassaaq:

1)  Paasissutissat uppernarsaatillu sermimit tunisassiat aamma imermit tunisassiat allanut tuniniarneqalernerminni qanoq pitsaassuseqassanersut, aammalu pisinnaatitsissummik pigisaqartup qanoq iliorluni tunisassiat pitsaassusaat qulakkeerniarneraat.

2)  Ingerlatseqatigiiffiup pisinnaatitsissummik pigisaqartup aningaasaqarnikkut pisinnaasaqarnera, ilanngullugit atuinermi ingerlatanut atatillugu taassuma akiliisinnaassuseqarnera tigoriaannarnillu aningaasaateqarnera.

3)  Atuinermi ingerlatat aningaasalersorneqarnerat.

4)  Aningaasaqarnikkut pissarsiaqarfiusumik atuinerup ingerlanneqarnissaanut periarfissat.

5)  Atuinermi ingerlatanut atatillugu avatangiisinut tunngasunik nalilersuineq.

6)  Atuinermi ingerlatanut atatillugu kalaallinik nunanillu allamiunik sulisoqarnermik aamma nioqqutissanik pilersuinernik kiffartuussinernillu nalilersuineq.

 

Kapitali 5
Uninnissamut pilersaarut aamma iluaquteqarnermi ingerlatanik unitsitsigallarneq

Uninnissamut pilersaarut

 

  § 15.  § 14 malillugu atuinissamut pilersaarutip akuerineqarnissaa pillugu qinnuteqaammik tunniussinermut atatillugu pisinnaatitsissummik pigisaqartoq uninnissamut pilersaarutip akuerineqarnissaa pillugu qinnuteqaammik Naalakkersuisunut tunniussissaaq. Uninnissamut pilersaarummi allassimassaaq:

1)  Pisinnaatitsissummik pigisaqartoq saliinissamut aamma sanaartukkat akuersissut malillugu pilersinneqarsimasut peernissaannut tunngatillugu, ingerlatat uninneranni qanoq iliussanersoq.

2)  Sanaartukkat sumiiffimmi qimanneqartussatut pilersaarutigineqartut, avatangiisinik imaluunniit isumannaallisaanermik pissuteqartumik ingerlatat unereerneranni aserfallatsaaliorneqartariaqarsimappata, aserfallatsaaliuineq taanna qanoq ingerlanneqarniarnersoq, uninnissamut pilersaarummi allassimassaaq.
3)  Pilersaarutip piviusunngortinneqarsinnaanissaa aningaasaqarnikkut qanoq qulakkeerniarneqarnersoq.

  Imm. 2.  Atuinerup aallartinnginnerani uninnissamut pilersaarut Naalakkersuisunit akuerineqareersimassaaq, takuuk § 14. Uninnissamut pilersaarut ingerlaavartumik nutarterneqassaaq aammalu atuinermi ingerlatanut tunngatillugu imaluunniit pissutsinik allanik uninnissamut pilersaarummut pingaaruteqartunik imaluunniit taassuma ingerlanneqarneranni annertuunik allanngortitsinerni allanngortinneqassalluni. Uninnissamut pilersaarummik allanngortitsinerit Naalakkersuisunit akuerineqassapput.

  Imm. 3.  Atuinissamut akuersissut malillugu ingerlatat unitsinneqarpata, Naalakkersuisut pisinnaatitsissummik pigisaqartoq uninnissamut pilersaarutip piviusunngortinneqarnissaanik peqqusinnaavaat.

 

Ingerlatat unitsikkallarneqarnerat

 

  § 16.  Kingusinnerusukkut ingerlatat aallarteqqinneqarnissaat siunertaralugu atuinermi ingerlatanik suliaqarnerup unitsikkallarneqarnera Naalakkersuisunit akuerineqassaaq.

  Imm. 2.  Ilaatigut ingerlatat unitsinneqarneranni sanaartukkat aserfallatsaaliorneqarnerat aammalu ingerlatat aallarteqqinneqanngippata uninnissamut pilersaarutip § 15-imi taaneqartup piviusunngortinneqarsinnaanissaa qulakkeerniarlugu, Naalakkersuisut akuersissuteqarnermi atugassarititaasunik aalajangersaassapput. Akuersissut ukiut marlukkaarlugit tunniunneqartarsinnaavoq.

  Imm. 3.  Imm. 1 malillugu unitsitsigallarneq ukiunik 2-nik sivisunerusumilluunniit sivisussuseqarsimappat, imaluunniit taassumunnga akuersissuteqarnermut atugassarititaasut naammassineqanngippata, Naalakkersuisut pisinnaatitsissummik pigisaqartoq uninnissamut pilersaarutip piviusunngortinneqarnissaanik peqqusinnaavaat, takuuk § 15.

 

Kapitali 6
Aalajangersakkanik atugassarititaasunillu aalajangersaasarneq aamma oqartussat suliarinninnerat ilaalu ilanngullugit

Atugassarititaasunik aalajangersaaneq

 

  § 17.  §§ 3, 4 malillugit imaluunniit 8 malillugit akuersissummi aamma § 14 malillugu akuersissuteqarnermi, Naalakkersuisut teknikkimut, isumannaallisaanermut, avatangiisinut, nunaminertanut aamma isumalluutinut tunngasut pillugit atugassarititaasunik aalajangersaasinnaapput.
  Imm. 2.  §§ 3, 4 malillugit imaluunniit 8 malillugit akuersissummi aamma § 14 malillugu akuersissuteqarnermi, Naalakkersuisut pisinnaatitsissummik pigisaqartup Inatsisartut inatsisaat, akuersissut aamma akuersissuteqarnerit malillugit pisussaaffimminik naammassinninnissaata qulakkeernissaanut atugassarititaasunik aalajangersaasinnaapput, ilanngullugit qularnaveeqqusiinissaq pillugu atugassarititaasut.

  Imm. 3.  Sermimik imermillu, imerneqartussatut, nerisassiornermut, inuussutissanik piareersaanermut, illup iluani siunertanut allanut assigisaannulluunniit atorneqarsinnaasumik, atuineq pillugu pitsaassusissanut tunngasut aamma peqqinnissamut tunngasut pillugit aalajangersakkanik Naalakkersuisut aalajangersaasinnaapput. Naalakkersuisut aamma tamanna pillugu atuinissamut akuersissummi atugassarititaasunik aalajangersaasinnaapput.

  Imm. 4.  Sermimik imermillu, imerneqartussatut, nerisassiornermut, inuussutissanik piareersaanermut, illup iluani siunertanut allanut assigisaannulluunniit atorneqarsinnaasumik, atuineq pillugu pitsaassusissanut tunngasunik aamma peqqinnissamut tunngasunik nakkutiginninneq aamma pisinnaatitsissummik pigisaqartup nammineq nakkutiginninnera pillugit aalajangersakkanik Naalakkersuisut aalajangersaasinnaapput. Naalakkersuisut aamma tamanna pillugu atuinissamut akuersissummi atugassarititaasunik aalajangersaasinnaapput.

 

  § 18.  Pisinnaatitsissummik pigisaqartoq sumiiffimmi akuersissuteqarfiusumi aammalu sumiiffinni allani kalluarneqartuni ingerlaavartumik saliisassasoq pillugu atugassarititaasunik §§ 3, 4 malillugit imaluunniit 8 malillugu akuersissummi Naalakkersuisut aalajangersaassapput.

  Imm. 2.  Pisinnaatitsissummik pigisaqartoq ingerlatat unitsinneqarneranni, uninnissamut pilersaarummut taaneqartumut naapertuuttumik, takuuk § 15, sumiiffimmi akuersissuteqarfiusumi aamma sumiiffinni kalluarneqartuni allani saliissasoq aammalu sanaartukkat akuersissut malillugu pilersinneqartut, piissagai pillugu atugassarititaasut aamma Naalakkersuisut aalajangersassavaat.
  Imm. 3.  Pisinnaatitsissummik pigisaqartup akuersissut malillugu pisussaaffimminik naammassinninnissaata qulakkeernissaanut atugassarititaasunik Naalakkersuisut §§ 3, 4 malillugit imaluunniit § 8 malillugu akuersissummi aalajangersaasinnaapput, ilanngullugit pisussaaffiit imm. 1-imi taaneqartut. Naalakkersuisut ilanngullugu tamakkiisumik ilaannaasumilluunniit qularnaveeqqusiinissaq pillugu atugassarititaasut aalajangersarsinnaavaat.

 

  § 19.  Pisinnaatitsissummik pigisaqartup saniatigut allat sumiiffimmi akuersissuteqarfiusumi sermimit imermillu isumalluutinik nammineq atugassaminnik atuinissamut periarfissaqassasut pillugu atugassarititaasunik Naalakkersuisut §§ 3, 4 malillugit imaluunniit 8 malillugu akuersissummi aalajangersaasinnaapput.

 

  § 20.  Qanoq pisoqarnerani Naalakkersuisut akuersissut utertissinnaaneraat, aammalu akuersissutip atorunnaareernerata kingorna pisinnaatitsissummik pigisaqartup pisussaaffii qanoq annertutigisumik atuutiinnassanersut pillugit atugassarititaasunik Naalakkersuisut §§ 3, 4 malillugit imaluunniit 8 malillugu akuersissummi aalajangersaasinnaapput.

 

  § 21.  Naalakkersuisut aamma pisinnaatitsissummik pigisaqartup akornanni akuersissut imaluunniit ingerlatat imaluunniit akuersissummut atatillugu pissutsit pillugit aaqqiagiinngissuteqarneq, isumaqatigiissitsiniarnikkut eqqartuussivimmut suliakkiunneqassasoq imaluunniit suliakkiunneqarsinnaasoq aammalu tassani aalajangiiffigineqassasoq pillugu atugassarititaasunik Naalakkersuisut §§ 3, 4 malillugit imaluunniit  8 malillugu akuersissummi aalajangersaasinnaapput. Akuersissummi aamma isumaqatigiissitsiniarnikkut eqqartuussiviup pilersinneqarnera, katitigaanera, inatsisinik toqqaasarneq aamma isumaqatigiissitsiniarnernik suliassat suliarineqartarneri pillugit atugassarititaasut aalajangersarneqarsinnaapput.

 

Nakkutilliineq aamma peqqusissuteqarneq

 

  § 22.  Pisinnaatitsissummik pigisaqartut allallu ingerlataat aamma pissutsit Inatsisartut inatsisaanni pineqartunut ilaasut Naalakkersuisut nakkutigissavaat. Nakkutilliinermi aamma nakkutiginninneq § 17-imi taaneqartoq pineqartunut ilaavoq.

  Imm. 2.  Inatsisartut inatsisaata aamma aalajangersakkat atugassarititaasullu erseqqinnerusut Inatsisartut inatsisaat malillugu aalajangersagaasut malinneqarnissaat aammalu taakkua malillugit pisussaaffiit naammassineqarnissaat pillugu Naalakkersuisut aalajangiisinnaapput, ilanngullugu peqqusissuteqarneq. Peqqusissuteqarneq pisinnaatitsissummik pigisaqartunut aamma allanut Inatsisartut inatsisaanni pineqartunut ilaasunut nalunaarutigineqarsinnaavoq.

  Imm. 3.  Naalakkersuisut Inatsisartut inatsisaanni suliassaqarfiit iluanni suliassat erseqqinnerusumik killissalersugaasumik namminersortunut suleqatigisanut imaluunniit nunatsinni oqartussanut imaluunniit sullissivinnut allanut, nakkutilliinermik, nakkutiginninnermik imaluunniit Inatsisartut inatsisaanni suliassaqarfiit iluanni pitsaassutsinut peqqinnissamullu tunngasunik paasissutissiisarnermik suliaqartunut, suliaritissinnaavaat.

  Imm. 4.  Nakkutilliinermut oqartussami sulisut aamma inuit allat imm. 1 malillugu immikkut piginnaatinneqartut, tamanna suliaqarnerminnik isumaginninnissamut pisariaqarsimappat, sukkulluunniit eqqartuussivimmi aalajangiinertaqanngitsumik aammalu peqqissaartumik kinaassutsimut uppernarsaammik takutitsinikkut suliffeqarfiup ingerlatallu ilaannut tamaginnut isersinnaatitaapput.

  § 23.  Pisinnaatitsissummik pigisaqartup imaluunniit suleqatigisap allap Inatsisartut inatsisaanni pineqartunut ilaasup peqqusissuteqarneq malinngippassuk, takuuk § 22, imm. 2, ilanngullugit ingerlatat iliuusissallu § 17-imi taaneqartut, Naalakkersuisut:

1)  Taakku pisinnaatitsissummik pigisaqartup imaluunniit suleqataasup allap taassuma akiligassaanik annaasaqaatigisinnaasaanillu, suliaritissinnaavaat.

2)  Pisinnaatitsissummik pigisaqartup imaluunniit suleqataasup allap ingerlatai akuersissummi imaluunniit Inatsisartut inatsisaanni pineqartunut ilaasut ingerlaannaq imaluunniit piffissamut killiliussap aalajangersimasup iluani unitsinneqassasut aammalu peqqusissutip naammassineqareernerani aatsaat suliarineqaqqissinnaalissasut.

3)  Sermeq imerlu niuernikkut iluaqutigineqartut nalunaaqutserneqassasut, arsaarinnissutigineqassasoq imaluunniit piuneerutsinneqassasoq, aammalu pisinnaatitsissummik pigisaqartup sermeq imerlu atorneqartoq kaaviiaartitsivinnit kingusinnerusuniittunit utertissagaa, imaluunniit pisinnaatitsissummik pigisaqartup sermimik imermillu atuineq imaluunniit tuniniaaneq unitsikkallassagaa, peqqusissuteqarsinnaapput.

  Imm. 2.  Imm. 1 malillugu peqqusissuteqarneq, pisinnaatitsissummik pigisaqartup Naalakkersuisunit taarsiivigineqarnissamik imaluunniit allanik piumasaqaateqarsinnaanermik imaluunniit pisinnaatitaaffeqarnermik piginnaatitsissummik malitseqassanngilaq.

 

Nalunaarusiortussaatitaaneq aamma isertuussisarneq

 

  § 24.  Pisinnaatitsissummik pigisaqartut allallu Inatsisartut inatsisaanni pineqartunut ilaasut, ingerlatamik Inatsisartut inatsisaanni pineqartunut ilaasut oqartussanit suliarineqarnerannut pisariaqartunik paasissutissanik tamaginnik nalunaarutiginnissapput aammalu uppernarsaatinik tamaginnik tunniussissallutik. Naalakkersuisut oqartussat suliarinninnerata Inatsisartut inatsisaanni pineqartunut ilaasup ingerlannissaanut, pisinnaatitsissummik pigisaqartut allallu paasissutissanik uppernarsaatinillu taamatut aammalu Naalakkersuisut pisariaqartitaattut iluseqartumik tunniussissasut, peqqusisinnaapput.
  Imm. 2.  Pisinnaatitsissummik pigisaqartoq ukiut tamaasa ingerlatat suliarineqartut aammalu taakkua inerneri pillugit ataatsimik arlalinnilluunniit nalunaarusianik Naalakkersuisunut tunniussissaaq, ilanngullugu ingerlatat avatangiisinut sunniinerat. Pisinnaatitsissummik pigisaqartup paasissutissanik tunniussinissaa aammalu nalunaarusianik Naalakkersuisunut tunniussinissaa pillugit atugassarititaasut akuersissummi aalajangersarneqassapput.
  Imm. 3.  Ingerlatat aamma avammut nioqquteqarneq akuersissut imaluunniit allatigut Inatsisartut inatsisaanni pineqartunut ilaasut pillugit nioqqutissanik kiffartuussissutinillu pilersuisumi paasissutissanik uppernarsaatinillu Naalakkersuisunut tunniussinissaa pisinnaatitsissummik pigisaqartup qulakkiissagaa pillugu Naalakkersuisut atugassarititaasunik aalajangersaasinnaapput imaluunniit taakkua pillugit aalajangiisinnaallutik.
  Imm. 4.  Pisinnaatitsissummik pigisaqartup nioqqutissanik kiffartuussissutinillu pilersuisua ingerlatat aamma avammut nioqquteqarneq akuersissummi imaluunniit allatigut Inatsisartut inatsisaanni pineqartunut ilaasut pillugit paasissutissanik uppernarsaatinillu Naalakkersuisunut tunniussissasoq pillugu aalajangersakkanik erseqqinnerusunik Naalakkersuisut aalajangersaasinnaapput aammalu taakkua pillugit aalajangiisinnaallutik.

  Imm. 5.  Suliami pineqartoq aamma Naalakkersuisut suliami pineqartumut akuersissummik tunniussisinnaanermut tunngasut imaluunniit suliami pineqartup akuersissummik qinnuteqaammik tunniussisinnaaneranut tunngasut oqaluuserissappatigit imaluunniit pissutsit taakkununnga tunngasut oqaluuserippatigit, paasissutissat allakkiallu isertuussaanissaat pillugu Naalakkersuisut aalajangiisinnaapput. Naalakkersuisut tamanna pillugu aalajangiisimappata, isertuussinissami paasissutissat allakkiallu, pissutsit taaneqartut aallarniutaasumik oqallisigineqarnissaannut atatillugu suliarineqartut, tunniunneqartut imaluunniit Naalakkersuisunit tiguneqartut, kisimik pineqartunut ilaassapput. Isertuussinissami tamatuma kingorna oqallisiginninnerit pineqartunut ilaanngillat, ilanngullugit akuersissummut qinnuteqaammik tunniussineq. Isertuussinissaq suliami pineqartup Naalakkersuisunik aallarniutaasumik oqaloqateqareernerata kingorna ukiut 3-it qaangiunneranni atorunnaassaaq.

 

Kapitali 7
Akitsuutit, akiliutit aamma oqartussat aningaasartuutaannik utertitsisarneq ilaalu ilanngullugit

 

  § 25.  Pisinnaatitsissummik pigisaqartoq Namminersorlutik Oqartussanut makku tunngavigalugit akiliummik akiliuteqassasoq pillugu atugassarititaasunik §§ 4 imaluunniit 8 malillugu atuinissamut akuersissummi Naalakkersuisut aalajangersaasinnaapput:

1)  sumiiffiup atuinissamut akuersissummi pineqartunut ilaasup annertussusaa (nunaminertamut akiliut).

2)  sermip erngullu ilaalu ilanngullugit annertussusaa imaluunniit nalinga (tunisassiornermut akiliut), imaluunniit

3)  ingerlatanit atuinissamut akuersissummi pineqartunut ilaasunit aningaasaqarnikkut pissariarineqartut (pissarsianut akiliut).

  Imm. 2.  Pisinnaatitsissummik pigisaqartup imm. 1 malillugu Namminersorlutik Oqartussanut akiliummik akilinissaa pillugu atugassarititaasunik aalajangersaanermi, pisinnaatitsissummik pigisaqartoq piffissami akuersissutip tunniunneqarnera aallarnerfigalugu akiliummik akiliisussaatinneqannginnissaa akuerineqarsinnaavoq.

  Imm. 3.  Pisinnaatitsissummik pigisaqartup imm. 1 malillugu Namminersorlutik Oqartussanut akiliummik akiliuteqarnissaa pillugu atugassarititaasunik aalajangersaanermi, pisinnaatitsissummik pigisaqartup piffissami akuersissutip tunniunneqarnera aallarnerfigalugu, ingerlatat akuersissummi pineqartunut ilaasut pillugit, tamatumunnga inatsisit malillugit akileraarutinik akitsuutinillu akiliisussaatinneqannginnissaa akuerineqarsinnaavoq, taamaattoq takuuk imm. 4.

  Imm. 4.  Imm. 3 atuinissamut akuersissut § 9, imm. 2-imi pineqartunut ilaasoq malillugu pisinnaatitsissummik pigisaqartumut atuutinngilaq.

  Imm. 5.  Imm. 3 malillugu akileraaruserneqartussaannginnerup nalunaarutigineqarnissaa sioqqullugu, Naalakkersuisut tamanna pillugu aningaasanut inatsimmi oqaasertaliussamik ilanngussinikkut piginnaatitsissummik pissarsissapput.

 

Akiliutit aamma aningaasartuutinik utertitsisarneq

 

  § 26.  Pisinnaatitsissummik pigisaqartut allallu Inatsisartut inatsisaanni pineqartunut ilaasut Inatsisartut inatsisaat malillugu suliassamik suliarinninnermut allatullu oqartussaasut suliarinninnerannut atatillugu aningaasartuutinik akiliissapput. Akiliutissaq akiliutitut imaluunniit aningaasartuutinik utertitsinertut akilersinneqarsinnaavoq.

  Imm. 2.  Naalakkersuisut Inatsisartut inatsisaat malillugu suliassamik suliarinninnermut allatullu oqartussat suliarinninnerannut atatillugu akiliutinik akiliisarneq imaluunniit tamakkiisumik ilaannaasumilluunniit aningaasartuutinut matussutissanik utertitsilluni akiliisarneq pillugit aalajangersakkanik erseqqinnerusunik aalajangersaasinnaapput.

 

Kapitali 8
Akuersissutip allamut tunniunneqarnera, taarsiinissamut akisussaasuuneq aammalu eqqartuussivinnut aalajangiinissanut suliakkiisarneq ilaalu ilanngullugit

Akuersissutip allamut tunniunneqarnera

 

  § 27.  §§ 3, 4 malillugit imaluunniit 8 malillugu akuersissutip toqqaannartumik imaluunniit toqqaannanngitsumik allamut tunniunneqarnera sunaluunniit Naalakkersuisunit akuerineqassaaq.
  Imm. 2.  §§ 3, 4 imaluunniit 8 malillugu akuersissut akiitsoqarfinnit malersorneqarnernut atorneqarsinnaanngilaq.

 

Taarsiinissamut akisussaaffeqarneq

 

  § 28.  Pisinnaatitsissummik pigisaqartup ajoqusernerit ingerlatani akuersissummi pineqartunut ilaasuni piliarineqartut, ajoqusernerit peratarsinnaagaluarpataluunniit, taarsiivigissavai.
  Imm. 2.  Ajoquserneqartoq piaaraluni imaluunniit mianersuaalliorujussuarluni ajoqusernermut pisooqataasimappat, imm. 1 malillugu taarsiissuteqarneq annikillisinneqarsinnaavoq imaluunniit atorunnaarsinnaalluni.
  Imm. 3.  Pisinnaatitsissummik pigisaqartup taarsiinissamut akisussaasuunera sillimmasiissummi imaluunniit allatut ilusilimmik qularnaveeqqusiinermi ilaatinneqassasoq pillugu atugassarititaasut akuersissummi aalajangersarneqarsinnaapput.
  Imm. 4.  Imm. 1-3-mi aalajangersakkat ingerlatanut allanit Inatsisartut inatsisaanni pineqartunut ilaasunit suliarineqartunut taamaaqataanik atuupput, ilanngullugit akuersissuteqarnerit Inatsisartut inatsisaat malillugu tunniunneqartut malillugit pisinnaatitsissummik pigisaqartut, tamatumani taakkua ingerlataat Inatsisartut inatsisaanni pineqartunut ilaasimappata.
  Imm. 5.  Pisinnaatitsissummik pigisaqartup nioqqutissanik kiffartuussissutinillu pilersuisui sillimmasiissummi imaluunniit qularnaveeqqusiissummi allatut ilusilimmi ilaatinneqassasut, aamma pilersuisup ingerlatani akuersissummi pineqartunut ilaasuni taarsiinissamut akisussaaffeqarnera ilaatillugu, pillugu Naalakkersuisut akuerissummi piumasaqaatinik aalajangersaasinnaapput.

 

Eqqartuussivinnut suliakkiussisarneq

 

  § 29.  Pissutsit Inatsisartut inatsisaanni pineqartunut ilaasut pillugit aalajangiineq, piffissamut killiliussap ukiumik ataatsimik sivisussuseqartup iluani eqqartuussivinnut suliakkiunneqarsinnaavoq, taamaattoq takuuk § 31.
  Imm. 2.  Aalajangiinerup eqqartuussivinnut suliakkiunneqarnera, Naalakkersuisut allamik aalajangiussisimanngippata, kinguartitsinermik sunniuteqassanngilaq.
  Imm. 3.  Aalajangiineq eqqartuussivinnut suliakkiunneqartoq, siullertut suliarinnittussatut Kalaallit Nunaanni Eqqartuussivimmut suliakkiunneqassaaq.

  Imm. 4.  Akuersissut malillugu aalajangiineq pillugu aaqqiagiinngissuteqarneq isumaqatigiissitsiniartartumut eqqartuussivimmut suliakkiunneqartussaappat, akuersissut pillugu aalajangiinermut taamaaqataanik imm. 1-3-mi aalajangersakkat atuupput. Aalajangiineq taamaattoq piffissamut killiliussap ukiumik ataatsimik sivisussuseqartup iluani isumaqatigiissitsiniartartumut eqqartuussivimmut taamaallaat suliakkiunneqarsinnaavoq.

 

Kapitali 9
Tusarniaaneq

 

  § 30.  §§ 3, 4 malillugit imaluunniit 8 malillugu akuersissummik tunniussinissamik qinnuteqaammi sumiiffik kommunimiittoq pineqartunut ilaappat, Naalakkersuisut suliami aalajangiinnginneranni, Naalakkersuisut kommunimut tusarniaassapput. 
  Imm. 2.  Akuersissummik tunineqarnissamik qinnuteqaammi sumiiffik kommunit aggornerisa avataanniittoq pineqartunut ilaappat aammalu innuttaasunut siunnersuisooqatigiit piginnaatitaaffiini pineqartunut ilaappat, Naalakkersuisut suliami aalajangiinnginneranni, Naalakkersuisut innuttaasunut siunnersuisooqatigiinnut tusarniaassapput.

 

Kapitali 10
Arsaarinnissuteqarneq

 

  § 31.  Naalakkersuisut piginnaatitaapput pigisanik aalaakkaasunik arsaarinninnikkut pigisaqalersinnaanermut piginnaatitsissummik pigisaqartut Naalakkersuisullu atorsinnaasaannik inatsit manna malillugu suliffiup pineqartup piviusunngortinnissaanut pisariaqartunik. Arsaarinnissuteqarneq pissaaq pigisanik aalaakkaasunik arsaarinnissuteqartarneq pillugu Inatsisartut inatsisaanni malittarisassat malillugit.

 

Kapitali 11
Inatsisit allat

 

  § 32.  Kalaallit tunisassiaasa avammut nioqqutigineqartarnerat pillugu akuersissuteqartarnermut Inatsisartut peqqussutaat, Inatsisartut inatsisaat malillugu sermip erngullu avammut nioqqutigineqartarneranut atuutinngilaq.
  Imm. 2.  Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat, ingerlatat Inatsisartut inatsisaanni pineqartunut ilaasut pillugit nalunaarusianut Naalakkersuisunut tunniunneqartunut, atuutinngilaq.

  Imm. 3.  Kalaallit Nunaannut, Kalallit Nunaannit Kalaallit Nunaannilu usinik imaatigut assartuineq pillugu inatsisit, ingerlatanut akuersissummi Inatsisartut inatsisaat malillugu tunniunneqartumi pineqartunut ilaasunut atatillugu imaatigut assartuussinermut atuutinngillat.

 

Kapitali 12
Pineqaatissiissutit

 

  § 33.  § 2, imm. 1, aamma imm. 2, oqaaseqatigiit aappaat, § 24, imm. 1, oqaaseqatigiit siulliit, aamma imm. 2, oqaaseqatigiit siulliit, § 28, imm. 1-imik unioqqutitsinerit Kalaallit Nunaanni pinerluttulerinermut inatsimmi maleruagassat malillugit akiliisitsinermik pineqaatissiinermik malitseqarsinnaavoq.

  Imm. 2.  Piumasaqaatit § 14, imm. 1, oqaaseqatigiit aappaat, § 15, imm. 2, oqaaseqatigiit siulliit aapaallu, § 16, imm. 2, § 17, § 18, § 24, imm. 1, oqaaseqatigiit aappaat aamma imm. 2, oqaaseqatigiit aappaat, aamma imm. 3, aamma imm. 4-mi aalajangersakkanik unioqqutitsinerit Kalaallit Nunaanni pinerluttulerinermut inatsimmi maleruagassat malillugit akiliisitsinermik pineqaatissiinermik malitseqarsinnaavoq.

  Imm. 3.  § 22, imm. 2 aamma § 23, imm. 1 najoqqutaralugit peqqussutinik nalunaarutigineqartunik unioqqutitsinerit Kalaallit Nunaanni pinerluttulerinermut inatsimmi maleruagassat malillugit akiliisitsinermik pineqaatissiinermik malitseqarsinnaavoq.

  Imm. 4.  Peqqussutinut § 13 naapertorlugu aalajangersagaasunut Kalaallit Nunaanni pinerluttulerinermut inatsimmi maleruagassat malillugit akiliisitsinermik pineqaatissiinerit aalajangersarneqarsinnaapput.

  Imm. 5.  Inatsisartut inatsisaat imaluunniit peqqussutit Inatsisartut inatsisaat naapertorlugu aalajangersagaasut akiliisitsinissaq inatsimmi tunngavissaqartippassuk, Kalaallit Nunaanni pinerluttulerinermut inatsimmi maleruagassat inatsisit malillugit pisinnaatitaasoq akiliisitaanissamut pisussaaffilerneqarsinnaapput.

  Imm. 6.  Akiliisitsinerit, Inatsisartut inatsisaat imaluunniit aalajangersakkat Inatsisartut inatsisaat malillugu aalajangersarneqartut malillugit pineqaatissiissutigineqartut, Nunatta Karsianut nakkartassapput.

 

Kapitali 13
Atuutilernera, atorunnaarsitsineq aamma ikaarsaarnermi aalajangersakkat

 

  § 34.  Inatsisartut inatsisaat ulloq 1. januar 2019 atuutilerpoq.

  Imm. 2.  Peqatigisaanik sermip erngullu avammut nioqqutissatut atorneqarnissaat pillugu Inatsisartut inatsisaat nr. 7, 31. maj 2001-imeersoq atorunnaarsinneqarpoq.

  § 35.  Avammut nioqquteqarnissaq siunertaralugu sermimik imermillu misissueqqaarnissamut imaluunniit atuinissamut akuersissutit, Inatsisartut inatsisaata atuutilernerani tunniunneqareersut, atuutiinnassapput.

  Imm. 2.  Inatsisartut inatsisaat aamma, Inatsisartut inatsisaata atuutilernerani, akuersissutinut taamaattunut, akuersissutit taamaattut malillugit pisinnaatitsissummik pigisaqartunut kiisalu ingerlatanut sermip erngullu avammut nioqqutissatut atorneqarnissaat pillugu Inatsisartut inatsisaat nr. 7, 31. maj 2001-imeersumi pineqartunut ilaasunut, atuuppoq.

  Imm. 3.  Inatsisartut inatsisaat tamatuma saniatigut ingerlatanut, ilanngullugu avammut nioqquteqarnissaq siunertaralugu sermimik imermillu atuineq, sermip erngullu avammut nioqqutissatut atorneqarnissaat pillugu Inatsisartut inatsisaat nr. 7, 31. maj 2001-imeersumi pineqartunut ilaasunut aammalu Inatsisartut inatsisaata atuutilernissaa sioqqullugu ingerlanneqartunut, atuuppoq.

  Imm. 4.  Inatsisartut inatsisaat aammattaaq aalajangiinernut Inatsisartut inatsisaata atuutilernissaa sioqqullugu sermip erngullu avammut nioqqutissatut atorneqarnissaat pillugu Inatsisartut inatsisaat nr. 7, 31. maj 2001-imeersoq malillugu aalajangiiffigineqartunut, atuuppoq, tassani taamaattoq piffissamut Inatsisartut inatsisaata atuutilernera aallarnerfigalugu naatsorsorneqassallutik.
  Imm. 5.  Ingerlatassanut akuersissummik qinnuteqaatit pillugit suliat § 2, imm. 1-imi taaneqartut, Inatsisartut inatsisaata atuutilernerani naammassillugit suliarineqarsimanngitsut, Inatsisartut inatsisaat malillugu suliarineqarnerat ingerlateqqinneqassaaq.

 

  §  36.  Allaffissornikkut peqqussutit, Inatsisartut inatsisaata atuutilernerani, sermip erngullu avammut nioqqutissatut atorneqarnissaat pillugu Inatsisartut inatsisaat nr. 7, 31. maj 2001-imeersoq malillugu, aalajangersagaasut, taakkua atorunnaarsinneqarnissaasa tungaanut, Inatsisartut inatsisaat malillugu allannguuteqarlutik, atuutiinnassapput.

 

 

Namminersorlutik Oqartussat, ulloq 27. november 2018

 

 

 

Kim Kielsen