Kapitali 1
Aalajangersakkat aallarniutaasut

  § 1.  Suliffissanut, ilitsersuisarnernut pikkorissaqqinnernullu qitiusumik ingerlatsivinni ilinniartunut pikkorissaqqinnermi atuartunut, Inatsisartut inatsisaanni matumani maleruagassat malillugit ilinniartunut tapersiissuteqartoqassaaq.

  § 2.  Ilinniartut pisortanit allatigut ikiorsiissutinik inuuniarnissamut aningaasartuutinik matussutissatut naatsorsuussanik pisartut ilinniartunut tapersiissutissanik pisartagaqarsinnaatitaanngillat.

  § 3.  Suliffissanut, ilitsersuisarnernut pikkorissaqqinnernullu qitiusumik ingerlatsivinni pikkorissaqqinnermi atuartut paasineqassaaq:
1) Meeqqat atuarfiannit soraarummeernissamut piginnaanngorsarnermi (FA) peqataanikkut meeqqat atuarfianni soraarummeernerup naligisaanik, atuagarsorluni pikkorissaqqinneq
2)  atuagarsorani pikkorissaqqinneq, ilanngullugit sannavimmi tunisassiornermullu assingusumi piginnaangorsarneq,
3)  suliffeqarfinni sullissivinnilu suliffissanut sungiusarluni atuagarsorani pikkorissaqqinneq,
4)  atugarsorluni atuagarsoranilu Danmarkimi højskole-mi piginnaanngorsarneq, pikkorissaqqinnermi ilinniagaqalernissamut ingerlaqqinnissaq siunertaalluni, aamma
5)  pikkorissaqqinneq allatut iluseqartoq, soorlu ilinniagaqalernissamut imaluunniit suliffeqalernissamut piareersarneq imaluunniit periarfissaqalernissaq aammalu Naalakkersuisunit akuerisaasoq.

  § 4.  Kommunit ataasiakkaat tamarmik, ilinniartunut suliffissanut, ilitsersuisarnernut pikkorissaqqinnernullu qitiusumik ingerlatsivinniittunut, ilinniartunut tapersiissutinik pisartagaqarsinnaasunut, Naalakkersuisunut angusassanut isumaqatigiissuteqartarnikkut ukiumut ilinniartut amerlassusissaannik tunineqartassapput.

  § 5.  Ilinniartunut suliffissanut, ilitsersuisarnernut pikkorissaqqinnernullu qitiusumik ingerlatsivimmi pikkorissaqqillutik ilinniartunut tapersiissutit aammalu ilinniartunut tapersiissutinik tunniussinissaq pillugu qinnuteqaatit, Inatsisartut inatsisaanni matumani maleruagassat aammalu maleruagassat taanna malillugu aalajangersarneqartut tunngavigalugit kommunalbestyrelsimit aqunneqassapput.

Kapitali 2
Taperseeriaatsit

  § 6.  Ilinniartunut tapersiissutit ilinniarnermi tapiissutitut, meeqqanut tapitut aamma akiliunneqarluni angalanertut, tunniunneqarsinnaapput.
  Imm. 2.  Nerisaqarnermut tapit, akiliunneqarluni ineqarnermut aningaasanik ilanngaassisarneq, meeqqanut tapit angissusaat aammalu akiliunneqarluni angalanissamut piumasaqaatit, pillugit maleruagassat erseqqinnerusut Naalakkersuisut aalajangersarsinnaavaat.

  § 7.  Ilinniartunut tapiissutit qaammammut tigusartagassaq imatut aalajangersarneqarpoq:
1)  ilinniartunut 18-it inorlugit ukiulinnut imaluunniit ilinniartunut ilinniartut inaanniittunut suliffissanut, ilitsersuisarnernut pikkorissaqqinnernullu qitiusumik ingerlatsivimmi pikkorissaqqittunut 2.225 kr. Ilinniartut 18-it inorlugit ukiullit ilinniartut inaanniittut akeqanngitsumik nerisaqartinneqarput ineqartinneqarlutillu. Ilinniartut inaanni nerisaqarnissaq periarfissaqartinneqanngippat imaluunniit ilaannakortumik periarfissaqartinneqarpat, ilinniartut ilinniartut inaanniittut qaammammut kr. 1.550-inik imaluunniit kr. 950-inik nerisaqarnermut tapinik tigusaqartassapput.
2)  ilinniartunut 18-it sinnerlugit ukiulinnut suliffissanut, ilitsersuisarnernut pikkorissaqqinnernullu qitiusumik ingerlatsivimmi pikkorissaqqittunut 4.400 kr. Ilinniartut taamatut tigusaqartartut, pikkorissaqqinnermut ingerlatsivimmut atatillugu akeqanngitsumik nerisaqartinneqartut ineqartinneqartullu, tamatumunnga aningaasanik ilanngaavigitittassapput.

  § 8.  Aningaasartat § 6-imi taaneqartunut procenti aaqqiissutissaq aamma maannakkorpiaq aningaasarsiat pillugit Inatsisartut inatsisaanni maleruagassat malillugit procentimik aaqqiissutissamik ataatsimik ukiuni aningaasanut inatsiseqarfiusunut ataasiakkaanut tamaginnut iluarsineqartassapput.

Kapitali 3
Ilinniartunut tapersiissutinik tigusinissamut piumasaqaatit

  § 9.  Ilinniartut atuanngiffeqartut, ilanngullugu erninermut atatillugu sulinngiffeqarneq, ilinniartunut tapersiissutinik pissarsisinnaanngillat.

  § 10.  Atuagarsorluni pikkorissaqqinnermi annerpaamik qaammatinik 10-inik sivisussuseqartumik ilinniartunut tapersiissutit marloriarluni tunniunneqarsinnaapput.
  Imm 2.  Piumasaqaatip tamatuma saneqqunneqarnissaa qinnuteqaatigineqarpat, tamatumunnga pissutsit immikkut ittut pissutissaqartitsippata, Naalakkersuisut imm. 1-imi piumasaqaatip saneqqunneqarnissaanik akuersisinnaapput.

  § 11.  Atuagarsorani pikkorissaqqinnermi annerpaamik qaammatinik 10-inik sivisussuseqartumik ataasiarluni ilinniartunut tapersiissutit tunniunneqarsinnaapput.
  Imm 2.  Piumasaqaatip tamatuma saneqqunneqarnissaa qinnuteqaatigineqarpat, tamatumunnga pissutsit immikkut ittut pissutissaqartitsippata, Naalakkersuisut imm. 1-imi piumasaqaatip saneqqunneqarnissaanik akuersisinnaapput.

  § 12. Ilinniartunut tapersiissutinik tunniussinissamut piumasaqaatit annertunerusut pillugit maleruagassanik Naalakkersuisut aalajangersaasinnaapput.

Kapitali 4
Atuariartortarnernik nalunaarsuisarneq aamma atuariartortannginnermi ilinniartunut tapersiissutini annikillilerisarneq

  § 13.  Suliffissanut, ilitsersuisarnernut pikkorissaqqinnernullu qitiusumik ingerlatsiviit ilinniartut atuariartortarnerannut atuariartornermut allattuiffinnik allattuinissamut pisussaaffeqarput.
  Imm 2.  Suliffissanut, ilitsersuisarnernut pikkorissaqqinnernullu qitiusumik ingerlatsiviit ilinniartut atuariartortarneri pillugit kommunalbestyrelsimut nalunaarutiginnittarnissamik pisussaaffeqarput.
  Imm 3.  Suliffissanut, ilitsersuisarnernut pikkorissaqqinnernullu qitiusumik ingerlatsiviit ilinniartut atuariartortarnerat pillugu kommunalbestyrelsimut nalunaarutiginnittarnissaat pillugu Naalakkersuisut maleruagassanik erseqqinnerusunik aalajangersaasinnaapput.

  § 14.  Atuariartunnginnermi imaluunniit atuarnissamut aalajangersagaasumut imaluunniit sulilluni sungiusarnermut isumaqatigiissutigineqartumut inortuilluni takkunnermi, atuariartunnginneq imaluunniit inortuilluni takkunneq suliffissanut, ilitsersuisarnernut pikkorissaqqinnernullu qitiusumik ingerlatsivimmit akuerineqarneq malillugu pisimanngippat, kommunalbestyrelsi ilinniartunut ilinniarnermut tapiissutini annikillisitsissaaq.
  Imm 2.  Ikiorsiissutini annikillisitsineq imm. 1-imi taaneqartoq nalunaaquttap akunneri qaammammut agguaqatigiissillugu 173,3-it aallaavigalugit naatsorsorneqassapput, tapersiissutit aningaasartaat malillugit iluarsiisoqassalluni.
  Imm. 3.  Nalunaaquttap akunnerini aalajangersimasumik amerlassusillit inorlugit atuanngitsoorneq ilinniartunut ilinniarnermut tapiissutini annikillilerinermik malitseqassanngitsoq pillugu maleruagassanik erseqqinnerusunik Naalakkersuisut aalajangersaasinnaapput.

  § 15.  Kommunalbestyrelsi ilinniartunut tapersiissutinut aningaasassanik Naalakkersuisunut utertitsilluni akiliinissamik qinnuteqarpat, kommunalbestyrelsip ilinniartut atuariartortarnerat pillugu paasissutissat Naalakkersuisunut nalunaarutigissavai.
  Imm 2.  Kommunalbestyrelsip ilinniartut atuariartortarnerat pillugu paasissutissat Naalakkersuisunut nalunaarutiginngippagit, Naalakkersuisut ilinniartunut tapersiissutinut utertitsilluni akiliinissaq itigartissinnaavaat.
  Imm 3.  Naalakkersuisut kommunalbestyrelsip ilinniartut atuariartortarnerat pillugu Naalakkersuisunut nalunaaruteqartarnera pillugu maleruagassanik erseqqinnerusunik aalajangersaasinnaapput.

  § 16.  Kommunalbestyrelsip ilinniartup ilinniartunut tapersiissutini pisassaani ilinniartunut tapersiissutit annertunaarlugit tunniunneqarsimasut, ilinniartup pisussaatitaanani nalunngikkaluarlugu tigusimasai, ilanngaatigisinnaavai.
  Imm. 2. Annerpaamik qaammammut 500 kr. ilanngaatigineqarsinnaapput.

Kapitali 5
Atuutilernera

  § 17.  Inatsisartut inatsisaat ulloq 1. januaari 2018 atuutilerpoq.

Namminersorlutik Oqartussat, ulloq 23. november 2017

Kim Kielsen