Kapitali 1
Atuuffii ilaalu ilanngullugit

 

  § 1.  Inatsisartut inatsisaat manna piginneqatigiilluni inissiaatillit peqatigiiffiinut atuuppoq, tassani ilaasortaanernut ataasiakkaanut tamaginnut inissiamut najugaqarfigineqartussamut atuisinnaatitaaneq atatinneqarluni.
  Imm. 2.  Piginneqatigiilluni inissiaatillit peqatigiiffiat ataaseq ikinnerpaamik pingasunik najugaqarfiusumik inissiartaqassaaq.
  Imm.3.  Piginneqatigiilluni inissiaatit inissiatut quleriiaatut imaluunniit eqimasutut-pukkitsutut sananeqassapput, tamarmik immikkut silamiit isertarfeqassallutik, namminerisaminnik igaffeqassallutik igasarfeqassallutilluunniit, kiisalu uffarfeqassallutik perusuersartarfeqassallutillu. Piginneqatigiilluni inissiat pissusissamisoortumik ataatsimoortutut ilusiligaassapput.
  Imm. 4.  Pissutsini immikkut ittuni piginneqatigiilluni inissiat ilaqutariinnut ataatsinut inissiatut imaluunniit illutut affarleriittut sananeqarnissaat tiguneqarnissaalluunniit kommunalbestyrelsip akuerisinnaavaa.

 

  § 2.  Piginneqatigiilluni inissiaatillit peqatigiiffiannut imaluunniit piginneqataasumut nutaanik inissialiornissamut imaluunniit pisinissamut imaluunniit kommunip inissiaataanik attartortittakkamik tigusinissamut taarsigassarsititsinermut atugassarititaasutut, piginneqatigiilluni inissiaatillit peqatigiiffiata imaluunniit piginneqataasup illuut imaluunniit piginneqatigiilluni inissiaatillit peqatigiiffiata ingerlanneqarnera pillugu aalajangiisinnaatitaaneranut sunniuteqartarnissaq imaluunniit annikillisitsinissaq, Inatsisartut inatsisaanni matumani maleruagassat malillugit pisussat saniatigut, piumasaqaatigineqarsinnaanngilaq.

Kapitali 2
Nutaanik inissialiornissamut taarsigassarsiarititat

 

Taarsigassarsiarititanut killiliussat

 

  § 3.  Kommunalbestyrelsi piginneqatigiilluni inissiaatillit peqatigiiffiata inissianik nutaanik sanaartornissaanut imaluunniit pisinissaanut aningaasartuutit tamarmiusut ilaannakortumik aningaasalersornissaannut taarsigassarsititsisinnaavoq.
  Imm. 2.  Taarsigassarsiarititat, inissiaq anginerunersoq apeqqutaatinnagu, inissiami inissiap annertussusaanut annerpaamik 110 m² angullugu tunniunneqarsinnaapput.
  Imm. 3.  Taarsigassarsiarititat aningaasartuutit annertunerunersut apeqqutaatinnagu, aningaasartuutinut tamarmiusunut annerpaamik m²-imut kr. 20.000-it angullugit tunniunneqarsinnaapput.
  Imm. 4.  Piginneqataasut ataasiakkaat aningaasartuutit tamarmiusut imaluunniit inissiap piginneqataasup atuisussaatitaaffigiligassaata nalingata piginneqataasut akornanni iluarsineqartup 5 %-iannik siulequtsiillutik akiliuteqarpata, aatsaat taarsigassarsiat tunniunneqarsinnaapput.
  Imm. 5.  Aningaasartuutinit tamarmiusunit sinneruttut, piginneqatigiilluni inissiaatillit peqatigiiffiata nammineerluni aningaasalersussavai.

 

  § 4.  Kommunalbestyrelsi Nuummi sulianut aningaasartuutissat tamarmiusut 45 %-ii tikillugit taarsigassarsititsisinnaavoq, taamaattorli taakku annerpaaffissaat § 3, imm. 2 aamma 3 naapertorlugit naatsorsorneqassapput, tassalu inissiamut ataatsimut taarsigassarsiarititassat annerpaamik 990.000 koruuniussallutik.

 

  § 5.  Kommunalbestyrelsi Qaqortumi, Sisimiuni, Aasianni Ilulissanilu sulianut aningaasartuutissat tamarmiusut 55 %-ii tikillugit taarsigassarsititsisinnaavoq, taamaattorli taakku annerpaaffissaat § 3, imm. 2 aamma 3 naapertorlugit naatsorsorneqassapput, tassalu inissiamut ataatsimut taarsigassarsiarititassat annerpaamik 1.210.000 koruuniussallutik.

 

  § 6.  Kommunalbestyrelsi Maniitsumi Tasiilamilu sulianut aningaasartuutissat tamarmiusut 60 %-ii tikillugit taarsigassarsititsisinnaavoq, taamaattorli taakku annerpaamik § 3, imm. 2 aamma 3 naapertorlugit naatsorsorneqassapput, tassalu inissiamut ataatsimut taarsigassarsiarititassat annerpaamik 1.320.000 koruuniussallutik.

 

  § 7.  Kommunalbestyrelsi illoqarfinni allani nunaqarfinnilu sulianut aningaasartuutissat tamarmiusut 65 %-ii tikillugit taarsigassarsititsisinnaavoq, taamaattorli taakku annerpaamik § 3, imm. 2 aamma 3 naapertorlugit naatsorsorneqassapput, tassalu inissiamut ataatsimut taarsigassarsiarititassat annerpaamik 1.430.000 koruuniussallutik.

 

  § 8.  Piginneqatigiilluni inissiami inigisap annertussusaa inissiami init tamarmik annertussusaattut naatsorsorneqassaaq. Pequusiviit, quit, aneersuartarfiit, biilinut oqquisitsiviit biililluunniit unittarfii qulisat, illup silammut iigaasa avataaniittut imaluunniit inissiamit immikkoortillugit inissitat, oqorsarlugit inigisassatut atorneqassanngippata, naatsorsuinermi ilanngunneqassanngillat.
  Imm. 2.  Inigisap annertussusaa imatut naatsorsorneqassaaq:
1) Naqqup ataani inigisap annertussusaa, naqqup ataata silammut iigaaniit takissusaa silissusaanut amerlisillugu, uuttorneqassaaq. Naqqup ataa tamakkerluni atorneqanngippat, iikkat ilorliit, ininut naatsorsuinermi ilaatinneqartunut killiliisut qeqqiniit inigisap annertussusaa naatsorsorneqassaaq. Init naqqi tamakkerlutik cementimik betonimilluunniit qalligaanngitsut naatsorsuinermut ilaatinneqassanngillat.
2) Inini quleriiaani nalinginnaasuniittuni, inissiami ataatsimi silataani iikkamiit imaluunniit qaliata silataaniit, takuuk nr. 3, aamma inissiat akunnequtaasa qeqqanniit uuttorlugu, takissusaa silissusaanut amerlisillugu, inigisap annertussusaa naatsorsorneqassaaq. Ilaqutariinnut arlalinnut inissiani illup isui naatsorsuinermi inissiat akunnequtaasa affaattut ilanngunneqassapput. Qisuit qalliutit marluuppata, silataani qisummit allermiit uuttuisoqassaaq.
3) Qaliani inigisap annertussusaata naatsorsornerani illup takissusaa silissusaanut amerlisillugu naatsorsorneqassaaq. Takissusaa inini quleriiaani ataatsitut nalinginnaasutut uuttorneqassaaq, silissusaalu illup silataani qaliat qaavisa qaliap naqqaniit 1,5 meterinik portussuseqartut akornanni ungasissusaattut uuttorneqassalluni. Aniinganerit, soorlu qaliani aniingarnit iikkat inimut killiliissutaasut silataannut uuttorneqassapput.
  Imm. 3.  Naqqup ataani qalianilu inigisap annertussusaa, takuuk imm. 2, nr. 1 aamma nr. 3, aatsaat init najugaqarfissatut suliarineqarsimappata ilanngunneqassapput.
  Imm. 4.  Init aalaakkaasumik natiligaanngitsut uuttortaanermut ilanngunneqassanngillat, taamaattorli takuuk imm. 5.
  Imm. 5.  Inissiap iluani majuartarfiit naatsorsuinermi inini quleriiaani tamani aqquteqarfigisaannut ilanngunneqassapput. Torsuusat, majuartarfiit majuartarfiillu sangoriaat ataatsimoorussat, illumi ininut kiassakkanut qallersuutit iluiniittut naapertuuttumik, annerpaamilli 11 m²-inik annertussusilerlugit naatsorsuinermi ilanngunneqassapput.

 

  § 9.  M²-imut inissiamut aningaasartuutit sanaartornermut aningaasartuutitut tamarmiusut naatsorsorneqassapput, inissiat ataatsimut m²-imut annertussusaannut agguarlugu.
  Imm. 2.  Aningaasartuutini tamakkiisuni sanaartornermut atatillugu aningaasartuutissat tamarmik ilaatinneqarsinnaapput.

Qularnaveeqqusiussaq

 

  § 10.  Kommunalbestyrelsip taarsigassarsiarititaat piginneqatigiilluni inissiaatillit peqatigiiffiata illuutaasa qularnaveeqqusiunneqarnerisigut qularnaarneqassapput. Taarsigassarsiat piginneqatigiilluni inissiaatillit peqatigiiffiata illuutaa qularnaveeqqusiullugu sanaartornermut aningaasartuutinit tamakkiisunit sinneruttunut aningaasalersuutissatut taarsigassarsiarititaasimasut akilereernerini, akilerneqartussatut inissisimassaaq.
  Imm. 2.  Taarsigassarsiarititat atuilernissamut akuersissutip imaluunniit illuutip tiguneqarnerata ullua aallarnerfigalugu ukiut 30-it tikillugit ernialersugaanatillu akilersugassaanngillat, tamatuma kingorna Nationalbankip ernialiussaa 3 procentpointinik ilallugu annertussusilimmik erniaqartillugit, ukiut 15-it tikillugit taarsigassarsiatut annertoqqatigiimmik akilersorneqartussatut, akilersorneqassallutik.
  Imm. 3.  Taarsigassarsiat akilersorneqartarnerat aammalu akilersuutinik akiliisarneq pillugit maleruagassanik Naalakkersuisut aalajangersaasinnaapput.

Taarsigassarsititsinissamik neriorsuuteqarneq

 

  § 11.   Inissianik sanaartornissamut taarsigassarsinissamik allakkatigut qinnuteqaatit kommunalbestyrelsimi suliarisassanngorlugit nassiunneqassapput.
  Imm. 2. Qinnuteqaammut ilanngunneqassapput:
1) Pilersitsinermut isumaqatigiissut, pilersitsisunit tamanit atsiorneqarsimasoq.
2) Piginneqatigiilluni inissiaatillit malittarisassaat.
3) Pilersaarusiamut nassuiaat, inissiat amerlassusaannik inigisallu katillugit annertussusaanik paasissutissartalik.
4) Sananermut aningaasartuutit tamakkiisut takussutissiornerat.
5) Piginneqatigiilluni inissiaatillit peqatigiiffiannut nunaminertamik inniminniineq imaluunniit atugassiineq.
6) Piginneqataasut aamma piginneqatigiilluni inissiaatillit peqatigiiffiata namminneerlutik aningaasalersuutissaminnik pissarsisinnaanerannut uppernarsaat.

 

  § 12.  Qinnuteqaat nassiunneqartoq tunngavigalugu taarsigassarsititsinissamik neriorsuut qinnutigineqartoq tunniunneqarsinnaanersoq, kommunalbestyrelsi aalajangiissaaq.
  Imm. 2.  Taarsigassarsiarititassat akuersissutigineqarnissaannut piumasarineqarpoq:
1) Sanasussanut akigitinneqartussat pillugit pisussaaffiliisumik isumaqatigiissuteqartoqarsimannginnissaa, aammalu sanaartugassat aallartinneqarsimannginnissaat.
2) Illuliornerup immikkoortuini tamaginni peqatigiiffiup soqutigisaasa isumaginissaannut illuliornermut sulianut piginnaasaqartumik, piginneqatigiilluni inissiaatillit peqatigiiffiata pissarsisimanissaa.
3) Sanaartukkami piffissami sanaartorfiusumi sanaartornermut pilersaarusiornermullu inatsisit atuuttut naammassineqarsimanissaat.
  Imm. 3.  Siunnersortitut sulianut ilisimasaqartutut isigineqarput inuit imaluunniit suliffeqarfiit, illussanik titartaasartutut, illuliornermi ilusilersuisartutut, illuliornermi ingeniøritut assigisaannilluunniit ilinniagaqarsimanermik tunuliaqutaqartut. Siunnersortimut isumaqatigiissut atugassarititaasut nalinginnaasut tunngavigalugit isumaqatigiissutigineqassaaq aammalu tassani sanaartornerup nalaani nakkutilliineq ilaatinneqassalluni.
  Imm. 4.  Illuliornermik ilisimasalinnik siunnersortissarsisarneq tamatumalu annertussusissaa pillugit maleruagassanik Naalakkersuisut aalajangersaasinnaapput.
  Imm. 5.  Digitalimik illuliornermut suliassanik aqutsinermik atuinissaq pillugu maleruagassanik Naalakkersuit aalajangersaasinnaapput.

 

§ 13.  Kommunalbestyrelsip qinnuteqaat akuerippagu, kommunalbestyrelsi taarsigassarsititsinissamik neriorsuummik tunniussissaaq, tassanilu taarsigassarsiarititassat amerlassuserigallagassaat taarsigassarsititsinermullu atugassarititaasut allassimassapput.
  Imm. 2.  Taarsigassarsiarititassat inaarutaasumik annertussusissaat, sanaartornermut naatsorsuutit arlaannaannulluunniit attuumassuteqanngitsumit akuerisat tunngavigalugit naatsorsorneqassapput.
  Imm. 3.  Sanaartornermut aningaasartuutissanut missingersuusiat, taarsigassarsiat akuerineqarnerannut tunngaviusimasut allannguuteqarpata, aammalu allannguutit taarsigassarsiat inaarutaasumik annertussusissaannut sunniuteqartussanngorpata, piginneqatigiilluni inissiaatillit peqatigiiffiata tunngavissaqanngitsumik kinguarsaanertaqanngitsumik tamanna kommunalbestyrelsimut nalunaarutigissavaa. Tamanna pinngippat taarsigassarsiat inaarutaasut neriorsuutigineqartunit annertunerulersinneqasinnaanngillat.

 

  § 14.  Sanaartorneq kommunalbestyrelsimit taarsigassarsititsinissamik neriorsuutitut allakkiap suliarineqarnerani ulluliussamiit ukiut marluk qaangiutsinnagit aallartinneqarsimassaaq, aammalu ukiut pingasut qaangiutsinnagit naammassineqarsimassalluni atorneqalersimassallunilu. Tamanna pinngippat neriorsuut siumut ilisimatitsinertaqanngitsumik atorunnaarsinneqassaaq.
  Imm. 2.  Piginneqatigiilluni inissiaatillit peqatigiiffiat taarsigassarsititsinissamik neriorsuutitut allakkiap suliarineqarnerani ulluliussamiit ukiut marluk qaangiutsinnagit sanaartorneq aallartinneqareersimanersoq aallartinneqareersimannginnersorluunniit pillugu paasissutissanik kommunalbestyrelsimut nassiussissaaq. Sanaartorneq aallartinneqareersimappat tamanna pillugu nalunaarut, piginneqatigiilluni inissiaatillit peqatigiiffiata suliarisimasaa aammalu kommunip teknikkimut ingerlatsiviani sumiiffimmiittumi uppernarsarneqarsimasoq ilanngunneqassaaq.
  Imm. 3.  Piginneqatigiilluni inissiaatillit peqatigiiffiata taarsigassarsititsinissamik neriorsuutitut allakkiap suliarineqarnerani ulluliussamiit ukiut pingasut qaangiutsinnagit kommunalbestyrelsimit atuilernissamut akuersissutip assilinera nassiutissavaa.
  Imm. 4.  Sanaartornerup kinguaattoornerani kommunalbestyrelsip inassuteqareerneratigut imm. 1-imi piffissamut killissarititassatut allassimasut saneqqunneqarnissaannut immikkut ittumik Kommunalbestyrelsi akuersissuteqarsinnaavoq.

Tunniussineq

 

  § 15.  Inissiat naammassineqareerpata aammalu tiguneqareerpata aammalu aatsaat atuilernissamut akuersissutip, sanaartornermut naatsorsuutit inaarutaasumik arlaannaannulluunniit attuumassuteqanngitsumik uppernarsarneqarsimasut aamma qularnaveeqqusiussaqarluni taarsigassarsititsinermut uppernarsaatip allaqqaarnerata oqaaseqarfigineqarani nalunaarsorneqarsimasup kiisalu ikuallattoornissamut illuutillu ajoqusernissaanut sillimmasiussap takutinneqarneranni kommunalbestyrelsip taarsigassarsiarititai tunniunneqassapput. Aammattaaq piffissakkaartumik pilersaarutaasumillu aserfallatsaaliuinissamut pilersaarut nassiunneqassaaq.
  Imm. 2.  Kommunalbestyrelsip taarsigassarsiarititai ukiumi aningaasaliissutit  kommunalbestyrelsip missingersuutaanni akuerisani ilanngunneqarfianni, siusinnerpaamik tunniunneqassapput.

Kapitali 3
Sanatitsisoq namminersortoq sanatitsisuulluni, piginneqatigiilluni inissiaatillit peqatigiiffiannut tunniunneqartussanik inissialianik nutaanik sanaartorneq

 

Taarsigassarsianut killiliussat il.il.

 

  § 16.  Sanatitsisoq namminersortoq inissianik nutaanik, piginneqatigiilluni inissiaatillit peqatigiiffiannut tunniunneqarnissaat siunertaralugu sanasinnaavoq.

 

  § 17.  Kommunalbestyrelsi § 16 malillugu inissialiornissamut taarsigassarsititsisinnaavoq. §§ 3-10 taamaaqataanik atuutissapput.

Taarsigassarsititsinissamik neriorsuut

 

  § 18.  Inissianik sanaartornissamut taarsigassarsitinneqarnissamik neriorsuummik allakkatigut qinnuteqaat kommunalbestyrelsimi suliassanngorlugu nassiunneqassaaq.
  Imm. 2.  Qinnuteqaammut ilanngunneqassapput:
1) Pilersaarusiamut nassuiaat, inissiat amerlassusaannik inigisallu katillugit annertussusaanik paasissutissartalik.
2) Pitsaassutsinik isumannaarinissamut pisussanut pilersaarummut aamma nakkutilliinissamut pilersaarut.
3) Sananermi sanaartornermut aningaasartuutit tamakkiisut takussutissiornerat.
4) Kommunalbestyrelsimit nunaminertamik tunineqarnissamut neriorsuutaagallartoq.
5) Sanatitsisup namminersortup pisortanut akiitsui pillugit akiliisitsiniartarnermut oqartussamit oqaaseqaat.
6) Sanatitsisup namminersortup sanaartornermut aningaasartuutinit tamakkiisunit sinneruttut pissarsiarisinnaanerannut uppernarsaat.

 

  § 19.  Qinnuteqaat nassiunneqartoq tunngavigalugu taarsigassarsititsinissamik neriorsuut qinnutigineqartoq tunniunneqarsinnaanersoq kommunalbestyrelsi aalajangiissaaq.
  Imm. 2.  Taarsigassarsiarititassat akuersissutigineqarnissaannut piumasarineqarpoq:
1) Sanasussanut akigitinneqartussat pillugit pisussaaffiliisumik isumaqatigiissuteqartoqarsimannginnissaa, aammalu sanaartugassat aallartinneqarsimannginnissaat.
2) Sanaartukkami piffissami sanaartorfiusumi sanaartornermut pilersaarusiornermullu inatsisit atuuttut naammassineqarsimanissaat.
  Imm. 3.  Digitalimik sanaartornermut suliassamik aqutsinermik atuinissaq pillugu maleruagassanik Naalaakkersuisut aalajangersaasinnaapput.

 

  § 20.  Kommunalbestyrelsip qinnuteqaat akuerippagu, kommunalbestyrelsi taarsigassarsititsinissamik neriorsuummik tunniussissaaq, tassanilu taarsigassarsiarititassat amerlassuserigallagassaat taarsigassarsititsinermullu atugassarititaasut allassimassapput.
  Imm. 2.  Taarsigassarsiarititassat inaarutaasumik annertussusissaat, sanaartornermut naatsorsuutit suliamut attuumassuteqanngitsumit akuerisat tunngavigalugit naatsorsorneqassapput.
  Imm. 3.  Sanaartornermut aningaasartuutissanut missingersuusiat, taarsigassarsiat akueri-neqarnerannut tunngaviusimasut allannguuteqarpata, aammalu allannguutit taarsigassarsiat inaarutaasumik annertussusissaannut sunniuteqartussanngorpata, piginneqatigiilluni inissi-aatillit peqatigiiffiata tunngavissaqanngitsumik kinguarsaanertaqanngitsumik tamanna kommunalbestyrelsimut nalunaarutigissavaa. Tamanna pinngippat taarsigassarsiat inaarutaasut neriorsuutigineqartunit annertunerulersinneqarsinnaanngillat.

 

§ 21.  Kommunalbestyrelsi qinnuteqartumut kr. 100.000 sinnerlugit pisortanut akilerneqanngitsunik akiitsoqartumut, taarsigassarsititsinissamut neriorsuummik tunniussisinnaanngilaq.

 

  § 22.  Sanaartorneq kommunalbestyrelsimit taarsigassarsititsinissamik neriorsuutitut allakkiap suliarineqarnerani ulluliussamiit ukiut marluk qaangiutsinnagit aallartinneqarsimassaaq, aammalu ukiut pingasut qaangiutsinnagit naammassineqarsimassalluni atorneqalersimassallunilu. Tamanna pinngippat neriorsuut siumut ilisimatitsinertaqanngitsumik atorunnaarsinneqassaaq.
  Imm. 2.  Piginneqatigiilluni inissiaatillit peqatigiiffiat taarsigassarsititsinissamik neriorsuutitut allakkiap suliarineqarnerani ulluliussamiit ukiut marluk qaangiutsinnagit sanaartorneq aallartinneqareersimanersoq aallartinneqareersimannginnersorluunniit pillugu paasissutissanik kommunalbestyrelsimut nassiussissaaq. Sanaartorneq aallartinneqareersimappat tamanna pillugu nalunaarut, piginneqatigiilluni inissiaatillit peqatigiiffiata suliarisimasaa, aammalu kommunimi teknikkimut ingerlatsivimmit sumiiffimmiittumit uppernarsarneqarsimasoq ilanngunneqassaaq.
  Imm. 3.  Kommunalbestyrelsi sanaartornerup kinguaattoornerani, piffissamut killiliussat imm. 1-imi allassimasut saneqqunneqarnissaannik akuersisinnaavoq.
  Imm. 4.  Piginneqatigiilluni inissiaatillit peqatigiiffiata taarsigassarsititsinissamik neriorsuutitut allakkiap suliarineqarnerani ulluliussamiit ukiut pingasut qaangiutsinnagit kommunalbestyrelsimit atuilernissamut akuersissutip assilinera nassiutissavaa.

Taarsigassarsititsinissamut neriorsuutip aamma inissiat tunniunneqarnerat

 

  § 23.  Sanatitsisup namminersortup kingusinnerpaamik atuilernissamut akuersissutip tunniunneqarnerani inissiat piginneqatigiilluni inissiaatillit peqatigiiffiannut, pisinermut akiusumik, sanatitsisumit aalajangerneqarsimasumik tamakkiisumik akilersillugit tunniutissavai. Taamaattoqanngippat, tamatumani kommunalbestyrelsi allamik aalajangiisimanngippat, taarsigassarsititsinissamik neriorsuut atorunnaassaaq.
  Imm. 2.  Pisinermut akiusumut tamakkiisumut pisinermut atatillugu aningaasartuutit tamakkiisut ilanngunneqassapput.

 

  § 24.  Inissiat sanatitsisumit namminersortumit sananeqartut piginneqatigiilluni inissiaatillit peqatigiiffianni ilaasortanit amerlaneruppata, sanatitsisup kommunalbestyrelsi piginneqataassutissani inuttaqanngitsuni piginneqataalernissamik neqeroorfigissavaa. Kommunalbestyrelsi piginneqataalinngippat, sanatitsisoq piginneqataassutissanik inuttaqanngitsunik piginneqataalissaaq.
  Imm. 2.  Piginneqatigiilluni inissiaatillit peqatigiiffiata ineqarnermut akitsuut, inissiamut atuisinnaatitaaffiusumut aalajangerneqartoq sanatitsisumut imaluunniit kommunalbestyrelsimut, piginneqataalersumut akilersissavaa.

 

  § 25.  Sanatitsisup Inatsisartut inatsisaanni matumani maleruagassat malillugit inissiat § 24, imm. 1, uniffiup aappaa naapertorlugu tiguneqarsimasut, allamut attartortissinnaavai.
  Imm. 2.  Allamut attartortitsineq taamaallaat atugassarititaasut piffissamut killiligaasut tunngavigalugit aammalu qaammatit 12-kkaarlugit pisinnaavoq, qaammatit 6-ikkaarlugit sivitsuisarnissaq periarfissaqarluni. §§ 63-65 taamaaqataanik atuutissapput.
  Imm. 3.  Sanatitsisoq, piginneqataassutiminik inunnut, piginneqatigiilluni inissiaatillit peqatigiiffiata akuersineratigut piginneqatigiilluni inissiaatillit peqatigiiffianni ilaasortanngorsinnaasunut tunniussiniassalluni, pisussaaffeqarpoq.
  Imm. 4.  Attartortoq inigisani qimallugu nuuppat, sanatitsisoq tamanna pillugu piginneqatigiilluni inissiaatillit peqatigiiffiannut nalunaarutiginnissaaq.
  Imm. 5.  Piginneqataassutit atuisinnaatitaaffiusut, Inatsisartut inatsisaannut matumunnga aamma piginneqatigiilluni inissiaatillit peqatigiiffiata malittarisassaannut naapertuuttumik, piginneqatigiilluni inissiaatillit peqatigiiffiat aqqutigalugu, tuniniarneqassapput. Piginneqatigiilluni inissiaatillit peqatigiiffiat piginneqataassutinik tigusisussanik inunnik innersuussinngippat, piginneqataassut tunineqartussatut tamanut ammasumik nalunaarutigineqassaaq.
  Imm. 6.  Sanatitsisup piginneqatigiilluni inissiamik allamut attartortitsinera, piginneqatigiilluni inissiamik piginneqataasup allamut attartortitsineranut sanilliunneqassaaq.

 

§ 26. Kommunalbestyrelsip inissiat § 24, imm. 1. uniffik siulleq naapertorlugu tiguneqarsimasut, inissianik attartortitsisarneq pillugu inatsimmi namminersortut attartortitsisarnerat pillugu maleruagassat sukkulluunniit atuuttut malillugit, attartortissinnaavai. Attartornermut akiliut, annerpaamik piginneqatigiilluni inissiaatillit peqatigiiffiannut ineqarnermut akitsuut 15 %-imik ilassuserlugu, annertussuseqarsinnaavoq.
  Imm. 2.  Kommunalbestyrelsi piginneqataassutimi, inunnut piginneqatigiilluni inissiaatillit peqatigiiffiata akuersissuteqarneratigut, piginneqatigiilluni inissiaatillit peqatigiiffianni ilaasortanngorsinnaasunut, tunniunniarnissaannut pisussaaffeqarpoq. 
  Imm. 3.  Attartortup inigisani qimallugu nuuppat, kommunalbestyrelsip piginneqatigiilluni inissiaatillit peqatigiiffiat tamanna pillugu nalunaarfigissavaa.
  Imm. 4.  Piginneqataassut atuisinnaatitaaffiusoq, Inatsisartut inatsisaannut matumunnga aamma piginneqatigiilluni inissiaatillit peqatigiiffiata malittarisassaannut naapertuuttumik, piginneqatigiilluni inissiaatillit peqatigiiffiat aqqutigalugu, tuniniarneqassaaq. Piginneqatigiilluni inissiaatillit peqatigiiffiat piginneqataassummik tigusisussamik inummik innersuussinngippat, piginneqataassut tunineqartussatut tamanut ammasumik nalunaarutigineqassaaq.
  Imm. 5.  Kommunalbestyrelsi piginneqataasutut, attartortup piffissami attartorfiusumi iliuuseqarnerinut, iliuuseqannginnerinut aamma aalajangiinerinut allanut, piginneqatigiilluni inissiaatillit peqatigiiffiannut tunngatillugu, akisussaasuuvoq. Attartortoq § 65 malillugu taassuma pisinnaatitaaffiini killiliinerit pillugit allakkatigut ilisimatinneqassaaq.
  Imm. 6.  Piginneqatigiilluni inissiaatillit peqatigiiffiata malittarisassaanni aalajangersakkat, attartortumut toqqaannartumik pisussaaffiliipput.

 

§ 27.  Kommunalbestyrelsip sanatitsisumut namminersortumut taarsigassarsititsinissamik neriorsuutaa, inissiat ilanngullugit piginneqatigiilluni inissiaatillit peqatigiiffiannut tunniunneqassaaq.
  Imm. 2.  Pisinermut akigititaasup inissiamut piginneqataasup atuisinnaatitaaffigisaanut naligitinneqartup naleqqussakkap 5%-iinik piginneqataasut ataasiakkaat aallarniutissanut nammineerlutik akiliuteqarpata, taarsigassarsiarititassat aatsaat tunniunneqarsinnaapput.
  Imm. 3.  Aningaasartuutissanit tamakkiisunit sinneruttut, piginneqatigiilluni inissiaatillit peqatigiiffiata nammineerluni aningaasalersussavai.

 

  § 28.  Inissiat tunniunneqarnerinut nalunaarut kommunalbestyrelsimut nassiunneqassaaq.
  Imm. 2.  Nalunaarummut ilanngunneqassapput:
1) Pilersitsinermut isumaqatigiissut, pilersitsisunit tamanit atsiorneqarsimasoq.
2) Piginneqatigiilluni inissiaatillit malittarisassaat.
3) Pisinermut uppernarsaat atsiorneqarsimasoq nunaminertamik atugassiineq aamma atuilernissamut akuersissut tassunga atasoq.
4) Sanatitsisup pitsaassutsimik isumannaarineranut aamma inissiat sananeqarnerisa nalaanni nakkutilliineranut uppernarsaat.
5) Sanatitsisup inissianik piffissakkaartumik pilersaarutaasumillu aserfallatsaaliuinissamut pilersaarutaa.
6) Piginneqataasut aamma piginneqatigiilluni inissiaatillit peqatigiiffiata namminneerlutik aningaasalersuutissaminnik pissarsisinnaanerannut uppernarsaat.

Tunniussineq

 

  § 29.  Inissiat naammassereerpata aammalu piginneqatigiilluni inissiaatillit peqatigiiffiannit tiguneqareerpata aammalu uppernarsaatit § 28, imm. 2-imi allassimasut kiisalu qularnaveeqqusiussaqarluni taarsigassarsititsinermut uppernarsaatip allaqqaarnera oqaaseqarfigineqanngitsumik nalunaarsorsimasoq naqissuserneqarsimasorlu kiisalu ikuallattoornissamut aamma illuutip ajoqusernissaanut sillimmasiissut saqqummiunneqarpata, kommunalbestyrelsip taarsigassarsiarititai tunniunneqassapput.
  Imm. 2.  Taamaattoq kommunalbestyrelsip taarsigassarsiarititai siusinnerpaamik ukiumi aningaasaliissutit missingersuutini kommunalbestyrelsimit akuerineqartuni ilanngunneqarfianni, tunniunneqassapput.
  Imm. 3.  Taarsigassarsiarititat piginneqatigiilluni inissiaatillit peqatigiiffiata illuutaa qularnaveeqqusiullugu qularnaveeqquserneqassapput. Qularnaveeqqusiussaqarluni taarsigassarsititsinermut uppernarsaat, taarsigassarsiat illuut qularnaveeqqusiullugu pisinermi akigititap tamarmiusup ilaata sinneruttup aningaasalersornissaanut tunniunneqarsimasut, akilerneqareerpata akilerneqartussatut inissinneqassaaq.

Kapitali 4
Kommunit inissiaataasa attartortittakkat piginneqatigiilluni inissiatut tiguneqarnissaannut taarsigassarsititsineq

 

§ 30.  Kommunalbestyrelsi, piginneqatigiilluni inissiaatillit peqatigiiffiata kommunip inissiaataannik attartortittakkanik tigusinissaanut aningaasartuutit tamarmiusut ilaannakortumik aningaasalersorneqarnerannut, taarsigassarsititsisinnaavoq. §§ 3-10 taamaaqataannik atuupput.

 

  § 31.  Kommunip illuutaanni attartortittakkanik inissiartaqartumi attartortut inissianik attartukkaminnik piginneqatigiilluni inissiatut tigusinissamik kommunalbestyrelsimut qinnuteqarsinnaapput.
  Imm. 2.  Illuummi attartortittakkanik inissiartaqartumi attartortut, inissianik attartukkaminnik piginneqatigiilluni inissiaatitut tigusinissamik kissaateqartut, illuummi attartortittakkanik inissiartaqartumi tamarmiusumi attartortut tamakkiisut 75%-erissavaat. Inissiami ataatsimi attartortoq ataasiinnartut naatsorsorneqartarpoq, attartornermut isumaqatigiissummi allassimasut amerlassusaat apeqqutaatinnagu.
  Imm. 3.  Illuummi attartortittakkanik inissiartaqartumi attartortut tamarmik piginneqatigiilluni inissiaatillit peqatigiiffiannit piginneqatigiilluni inissiaatillit peqatigiiffiannut ilaasortanngornissamik allakkatigut neqeroorfigineqassapput.

 

§ 32.  Kommunip illuutaat attartortittakkanik arlalinnik inissiartaqartoq tamakkerlugu taamaallaat tiguneqarsinnaavoq, taamaalillunilu piginneqatigiilluni inissiaatillit peqatigiiffiat illuut attartortittagaq inissiartaqartoq tamakkerlugu piginnittussaatitaalissalluni.

 

§ 33.  Attartortut kommunip illuutaannik attartortittakkanik inissiartaqartunik piginneqatigiilluni inissianngortitsinissamik qinnuteqaataat, kommunalbestyrelsimut nassiunneqassaaq. Pilersitsinermi isumaqatigiissut, pilersitsisunit tamanit atsiorneqarsimasoq aammalu piginneqatigiilluni inissiaatillit peqatigiiffiata malittarisassai, qinnuteqaammut ilanngunneqassapput.

 

  § 34.  § 33 naapertorlugu qinnuteqaat akuerineqarpat kommunalbestyrelsi piginneqatigiilluni inissiaatillit peqatigiiffiannut pisinissamut neqeroorummik aamma kommunip inissiaataasa attartortittakkat nassuiaataannik, pisinermi akigititanik allanillu atugassarititaasunik, nassiussissaaq.
  Imm. 2.  Pisinissamut neqeroorut illuummi attartortittakkanik inissiartaqartumi qularnaveeqqusiissutinut nalunaarsorsimasunut pisinnaatitaaffiusinnaasut piginnittumullu immikkut piumasaqaataasimasinnaasut pillugit paasissutissanik imaqassaaq. Kommunalbestyrelsip piumasarisinnaavaa pisinissamut neqeroorut piginneqatigiilluni inissiaatillit peqatigiiffiata illuut attartortittakkanik inissiartaqartoq qularnaveeqqusiullugu taarsigassarsianik pioreersunik kommunalbestyrelsimut taarsigassarsiaritinneqartunik, sapinngisamik annertunerpaanik tigusinissaanut atugassarititaasunik imaqassasoq.

 

  § 35.  Pisinissamut neqeroorummik, takuuk § 34, suliaqarnermut atugassamik kommunalbestyrelsip illuut attartortittagaq illutaanni misissussavaa aammalu teknikkikkut-aningaasaqarnikkut nalilersuinermik suliaqassalluni. Piginneqatigiilluni inissiaatillit peqatigiiffiat illuliortiternermut ilisimasalimmik, qanoq issutsimut nalunaarusiamik suliaqartussamik, siunnersortissarsiussaaq.
  Imm. 2.  Teknikkikkut-aningaasaqarnikkut nalilersuineq aamma qanoq issutsimut nalunaarusiaq ataatsimoorlutik kommunalbestyrelsip pisinissamut neqeroorutaanut tunngavissaliissapput.
  Imm. 3.  Naalakkersuisut teknikkikkut-aningaasaqarnikkut nalilersuineq pillugu aalajangersagaliorsinnaapput.

 

§ 36.  Sanaartornermik ilisimasalik, tak. § 35, imm. 1 sanaartornermi nakkutilliinermik aamma sanaartornermi pilersaarusiornermik misilittagaqassaaq, aammalu illuummut immikkut ittumik attuumassuteqartussaanani. Sanaartornermik ilisimasalik inuussutissarsiornermi akisussaanermut sillimmasersimassaaq.
  Imm. 2.  Piginneqatigiilluni inissiaatillit peqatigiiffiat aningaasalersuinermi siunnersortimik, illuutip attartortittakkanik inissiartaqartup tiguneranut atatillugu piginneqatigiilluni inissiaatillit peqatigiiffiannut ikiuuttussamik atorfinitsitsissaaq.

 

§ 37.  Sanaartornermik ilisimasallip qanoq issutsimut nalunaarusiaanut naapertuuttumik, tak. § 35, imm. 1 kommunip illuutaannut attartortittakkanik inissiartaqartumut pisinermut akigititassaq teknikkikkut aningaasaqarnikkullu nalinganut, tassaasumut illuutip pisiareqqinneranut akigititassaq nalikilliliinerit aserfallatsaaliorneqanngitsullu ilanngaatigalugit, aalajangerneqassaaq. Tassunga tigusinermut atatillugu aningaasartuutinut matussutissatut 2%-it ilanngunneqassapput.
  Imm. 2.  Illuut tigusinerup nalaani aserfallatsaalineqarsimanngippat, aserfallatsaaliinerup aallarteqqinnissaanut aningaasartuutissanut matusissutissanik piginneqatigiilluni inissiaatillit peqatigiiffiat taarsigassarsisinnaavoq. Taarsigassarsiat akilersorneqartussanik tulleriinnilersuinermi kommunalbestyrelsimut taarsigassarsianit sallinngortillugit inissinneqassapput.
  Imm. 3.  Najugaqarfimmi ataatsimi illuummi inissianilu ataasiakkaani sillimmatissatut illuartitat ileqqaakkat illuutip attartortitsiviusartup tigunerani piginneqatigiilluni inissiaatillit peqatigiiffiannut nakkartinneqassanngillat.

 

  § 38.  Illuut attartortittakkanik inissiartaqartoq nutaaq naammassineqarnerminiit atorneqalernerminiillu ukiup ataatsip iluani tiguneqassappat, pisinermut akiusoq sanaartornermut naatsorsuutit akuerisat tunngavigalugit aalajangerneqassaaq, akigititassamullu tigusinermut atatillugu aningaasartuutinut matussutissatut 2%-it ilanngunneqassapput.

 

§ 39.  Pissutsit immikkut tamatumunnga tunngavissaqartitsippata illuutip attartortittakkanik inissiartaqartup §§ 37 aamma 38 naapertorlugit akigititassatut aalajangersarneqartunit akikin-nerusumik tunineqarsinnaanera Naalakkersuisut aalajangersinnaavaat. Pisinissamut akigititassaq illuutip niuernermi nalinganit qaffasinnerulersinneqarsinnaanngilaq.

 

  § 40.  Illuut attartortittakkanik inissiartaqartoq innaallagissamik, imermik, kiassarnermik, kuuffeqarfinnik imaluunniit atortorissaarutinik allanik ataatsimoortumik pilersuinermut attaviligaappat, piginneqatigiilluni inissiaatillit peqatigiiffiannut illuutip attartortittakkanik inissiartaqartup tunniunneqannginnerani, kommunalbestyrelsi pilersuinermik isumaginniffiusussamik pilersitsissaaq. Ataatsimoortumik pilersuinermut ilaatinneqarpoq pilersuineq piginneqataasunut ataasiakkaanut immikkut atuinermut uuttuutit tunngavigalugit akiliisitsisinnaanngippat.
  Imm. 2.  Kommunalbestyrelsip atortorissaarutit ataatsimoorussat nassuiassavai agguassallugillu aammalu taakkua pilersuinermik isumaginnittussamut tunniutissallugit. Atortorissaarutit ataatsimoorussat agguarneri sapinngisamik pisortat pilersuinermut aqqusersuutaannut pingaarnernut atassuserlugit, pissaaq. Pilersuinermut isumaginnittussaq pilersuisussanut ataasiakkaanut isumaqateqassaaq.
  Imm. 3.  Pilersuinermut isumaginnittussamut malittarisassat, atortorissaarutinut ataatsimoorussanut nassuiaatitaqartut agguaanertaqartullu aammalu illuutit attavilerneqartut ilaasortaanissamut pisussaaffigisaat, piginneqatigiilluni inissiaatillit peqatigiiffiannut tunniussisoqarsinnaanngoqqullugu illuummut attartortittakkanik inissiartaqartumut pisussaaffiliisumik nalunaarsorneqassapput.
  Imm. 4.  Pilersuinermut isumaginnittussaq, pilersuisunut ataasiakkaanut isumaqatigiissuteqassaaq. Pilersuinermut isumaginnittussaq illuutini ataasiakkaani piginnittunut, pilersuinermut isumaginnittussap atortorissaarutaannut ataatsimoorussanut attaviligaasunut, akiliutissamik akiliisitsissaaq.
  Imm. 5.  Pilersuinermut isumaginnittumut iluaqutaasussanngorlugit qularnaveeqqut piginneqatigiilluni inissiaatillit peqatigiiffianni inissiamut ataatsimut 50.000 koruuninut nalunaarsortinneqassaaq.

 

  § 41.  Kommunalbestyrelsip tigusinermut atatillugu aningaasartuutit akilissavaat, takukkit §§ 37-38.

 

  § 42.  Attartortoq, inigisaminik attartortittakkamik piginneqatigiilluni inissiatut tigusinissamik kissaateqanngitsoq, takuuk § 31, imm. 3:
1)  Inigisamini attartortittakkami najugaqaannarsinnaavoq.
2)  Illoqarfimmi tassani, inissianik attartortitsisarneq pillugu inatsisit sukkulluunniit atuuttut tamatumunnga periarfissaqartitsippata, inissiamik attartortittakkamik allamik neqeroorfigineqarnissamik kommunalbestyrelsi qinnuigisinnaavaa.
  Imm. 2.  Kommunalbestyrelsi piginneqatigiilluni inissiaatillit peqatigiiffianni piginneqataasutut inississaaq, inissianut attartortunit, inigisaminnik attartortittakkamik piginneqatigiilluni inissiatut tigusinissamut kissaateqanngitsunit, najorneqartunut, atuisinnaatitaassalluni. Kommunalbestyrelsi piginneqatigiilluni inissiaateqartutut attartortup iliuusaanut, iliuuseqarfiginngisaanut suliaanullu allanut attartorneqarnerani piginneqatigiilluni inissiaatillit peqatigiiffianut akisussaasuuvoq. Attartortoq allakkatigut ilisimatinneqassaaq § 65 naapertorlugit pisinnaatitaaffianik annikinnerusumik periarfissaqarnera. Piginneqatigiilluni inissiaatillit peqatigiiffiata kommunalbestyrelsi inissianut atuisinnaatitaaffigiligaannut ineqarnermut akitsuummik akiliisittassavaa.
  Imm. 3.  Attartortumut illuummiiginnartumut ineqarnermut akiliut, inissianik attartortitsisarneq pillugu inatsimmi sukkulluunniit atuuttumi kommunip inissiaataannut attartortittakkanut ineqarnermut akiliutip naatsorsorneqartarneranut maleruagassat nalinginnaasut malillugit, aalajangersarneqassaaq.
  Imm. 4.  Piginneqatigiilluni inissiaatillit peqatigiiffiata malittarisassaanni aalajangersakkat, attartortumut illuummi attartortuuginnartumut, pisussaaffiliipput.

 

  § 43.  Attartortoq inigisaminik attartortittakkamik piginneqatigiilluni inissiamik tigusinissamik kissaateqanngitsoq, aammalu illuummi attartortuuginnartoq, piffissami sukkulluunniit inigisani attartortittagaq piginneqatigiilluni inissiatut tigusinnaavaa. Piginneqatigiilluni inissiaatillit peqatigiiffiat piginneqatigiissutip tunniunneqarneranut akerliusinnaanngilaq.

 

  § 44.  Inissiamik allamik attartornissamik neqeroorut attartortup akuerippagu, kommunalbestyrelsi inissiamut attartortup inoqutaasa amerlassusaannut naapertuuttumut, attartortoq neqeroorfigissavaa. Kommunalbestyrelsip, attartortup nuunnermut aningaasartuutai naleqquttut, akilissavai.
  Imm. 2.  Attartortoq inigisani qimallugu nuuppat, kommunalbestyrelsip tamanna pillugu piginneqatigiilluni inissiaatillit peqatigiiffiat nalunaarfigissavaa. Piginneqataassut atuisinnaatitaaffittaqartoq, Inatsisartut inatsisaannut matumunnga aamma piginneqatigiilluni inissiaatillit peqatigiiffiata malittarisassaannut naapertuuttumik, piginneqatigiilluni inissiaatillit peqatigiiffiat aqqutigalugu tunineqassaaq.
  Imm. 3.  Piginneqatigiilluni inissiaatillit peqatigiiffiata piginneqataassut pisisussamut piginneqatigiilluni inissiaatillit peqatigiiffiannit akuerineqarsinnaasumut aammalu Inatsisartut inatsisaanni matumani aamma peqatigiiffiup malittarisassaanni akuerisaasumik, pitsaanerpaamik anguneqarsinnaasumik akeqartillugu, tuniniarsarissavaa. Piginneqatigiilluni inissiaatillit peqatigiiffiata piginneqataassut, pissutissaqanngitsumik kinguarsaanani, tuniniassavaa.

 

  § 45.  Kommunalbestyrelsip piginneqatigiilluni inissiaatillit peqatigiiffiata illuummik attartortittakkanik inissiartaqartumik tigusineranut atatillugu, atugassarititaasut sukumiinerusumik isumaqatigiissutaareersut tunngavigalugit piginneqatigiilluni inissiaatillit peqatigiiffiannit ininik attartornissamut pisinnaatitaaffeqarnissani piumasarisinnaavaat. Taamatuttaaq tigusinermi attartortut allalluunniit illuummut tunngatillugu atuisinnaatitaasut, tassunga ilaallutik inuussutissarsiutinik ingerlatsinissamik pisinnaatitaaffeqartut, tigusinermi pisinnaatitaaffeqarnerisa atuutiinnarnissaat piumasarineqarsinnaavoq.

Kapitali 5
Tunniussinissaq siunertaralugu kommunip inissialiortarnera

 

§ 46.  Piginneqatigiilluni inissiaatillit peqatigiiffiannut tunniuissinissaq siunertaralugu, kommunalbestyrelsi nutaanik inissialiorsinnaavoq, ilanngullugu piginneqatigiilluni inissiaatillit peqatigiiffiat kommunalbestyrelsi kisimiilluni piginneqataasuulluni.
  Imm. 2.  Kommunalbestyrelsi, inissianik nutaanik kommunalbestyrelsimit pisinissamut, piginneqatigiilluni inissiaatillit peqatigiiffiannut taarsigassarsititsisinnaavoq. §§ 3-10 taamaaqataanik atuutissapput.

 

§ 47.  Piginneqatigiilluni inissiaatillit peqatigiiffiata, kommunalbestyrelsi kapitali manna malillugu piginneqataalersoq, ineqarnermut akitsuummik, inissiamut atuisinnaatitaaffigineqartumut aalajangersagaasumik, akiliisissavaa.

 

§ 48.  Kommunalbestyrelsip inissiat kapitali manna malillugu sanaartorneqartut, inissianik attartortitsisarneq pillugu inatsimmi namminersortut attartortitsisarnerat pillugu maleruagassat sukkulluunniit atuuttut malillugit, attartortissinnaavai. Attartornermut akiliut, annerpaamik piginneqatigiilluni inissiaatillit peqatigiiffiannut ineqarnermut akitsuut 15 %-imik ilassuserlugu, annertussuseqarsinnaavoq.
  Imm. 2. Kommunalbestyrelsi piginneqataassutimi, inunnut piginneqatigiilluni inissiaatillit peqatigiiffiata akuersissuteqarneratigut, piginneqatigiilluni inissiaatillit peqatigiiffianni ilaasortanngorsinnaasunut, tunniunniarnissaannut pisussaaffeqarpoq. 
  Imm. 3.  Attartortup inigisani qimallugu nuuppat, kommunalbestyrelsip piginneqatigiilluni inissiaatillit peqatigiiffiat tamanna pillugu nalunaarfigissavaa.
  Imm. 4.  Piginneqataassut atuisinnaatitaaffiusoq, Inatsisartut inatsisaannut matumunnga aamma piginneqatigiilluni inissiaatillit peqatigiiffiata malittarisassaannut naapertuuttumik, piginneqatigiilluni inissiaatillit peqatigiiffiat aqqutigalugu, tuniniarneqassaaq. Piginneqatigiilluni inissiaatillit peqatigiiffiat piginneqataassummik tigusisussamik inummik innersuussinngippat, piginneqataassut tunineqartussatut tamanut ammasumik nalunaarutigineqassaaq. 
  Imm. 5.  Kommunalbestyrelsi piginneqataasutut, attartortup piffissami attartorfiusumi iliuuseqarnerinut, iliuuseqannginnerinut aamma aalajangiinerinut allanut, piginneqatigiilluni inissiaatillit peqatigiiffiannut tunngatillugu, akisussaasuuvoq. Attartortoq § 65 malillugu taassuma pisinnaatitaaffiini killiliinerit pillugit allakkatigut ilisimatinneqassaaq.
  Imm. 6.  Piginneqatigiilluni inissiaatillit peqatigiiffiata malittarisassaanni aalajangersakkat, attartortumut toqqaannartumik pisussaaffiliipput.

Kapitali 6
Piginneqatigiilluni inissiaatillit peqatigiiffiat

 

  § 49.  Piginneqatigiilluni inissiaatillit peqatigiiffiannut ilaasortaq ataaseq piginneqatigiilluni inissiamut ataasiinnarmut atuisinnaatitaalersinnaavoq.
  Imm. 2.  Piginneqataassut ataaseq inummit ataasiinnarmit pigineqarsinnaavoq.
  Imm. 3.  Inuinnaat aamma inuit namminersorsinnaatitaasut kisimik piginneqatigiilluni inissiaatillit peqatigiiffiannut ilaasortaasinnaapput.
  Imm. 4.  Kommuni, imaluunniit sanatitsisoq namminersortoq piginneqatigiilluni inissiaatillit peqatigiiffianni piginneqataasutut inississimappata, imm. 1 aamma 3 atuutissanngillat.

 

  § 50.  Piginneqatigiilluni inissiaatillit peqatigiiffianni siulersuisut piginneqataassutinut tamaginnut allattuiffeqartitsissapput aamma piginnittoq, ulloq ilaasortaalerfik, inissiamut atuisinnaatitaaffik aamma ilanngaaseereerluni tunisinermi iluanaarutit ingerlaarneri ilanngullugit.
  Imm. 2.  Siulersuisut piginneqataasup qinnuiginninneratigut, piginneqataassummut aalajangersimasumut allattukkat pappialanngortinnerat uppernarsagaasoq, nassiutissavaa.
  Imm. 3.  Naalakkersuisut piginneqataassutsinut allattuiffeqarneq pillugu aalajangersagaliorsinnaapput.

 

  § 51.  Piginneqataasut piginneqataassutsit aggorlugit annertussusilerneqarnerat naapertorlugu piginneqatigiilluni inissiaatillit peqatigiiffiata pisuussutaanut piginneqataapput, taannalu piginneqatigiilluni inissiaatillit peqatigiiffianni inigisap angissusaanut tamakkiisumut naleqqiullugu inissiani piginneqataaffiusuni ataasiakkaani inigisap angissusaa naapertorlugu naatsorsorneqartarpoq.
  Imm. 2.  Kingusinnerpaamik atuilernermi ataatsimeersuartut piginneqataassutsinut naligitinneqartut naleqqussarsinnaavaat.

 

§ 52.  Piginneqataasoq pisussaaffinnut piginneqatigiilluni inissiaatillit peqatigiiffiannut tunngassuteqartunut, taamaallaat aningaasanngorlugu aallarniutissatut akiliutiminik, akiliisussaavoq.
  Imm. 2.  Piginneqataasoq imaluunniit taassuma pigisai, piginneqataasup nutaap piginneqatigiilluni inissiamik tigusinissaata tungaanut, imm. 1 malillugu akiliisussaavoq.
  Imm. 3.  Piginneqataasut piginneqatigiilluni inissiaatillit peqatigiiffiata pisuussutaanit piginneqataassutaat qularnaveeqqusiissutaasinnaanatillu eqqartuussisutigoortitsissutigineqarsinnaanngillat.
  Imm. 4.  Piginneqataasoq taamaallaat tunisinermi ilanngaatissat peereerlugit iluanaarutigisinnaasaminik tigusisinnaatitaasussamik piginnaatitsisinnaavoq. Tigusisinnaatitaasup piginneqataassutip tunineqarnissaa piumasarisinnaanngilaa. Tunisinermi iluanaarutaajunnartut kisimik eqqartuussivikkut suliassanngortinneqarsinnaapput. Akiitsoqarfigineqartup piginneqatigiilluni inissiap tunineqarnissaa siunertaralugu eqqartuussivikkut suliakkiissutigisinnaanngilaa.

 

  § 53.  Piginneqatigiilluni inissiaatillit peqatigiiffianni oqartussaasuni qullersaasut tassaapput ataatsimeersuartut. Ataatsimeersuarnermi piginneqataassut 1 piginneqataasumut taasisinnaatitaassutaassaaq. Ataatsimeersuarnermi taasisinnaatitaasoq tassaavoq piginneqataasut allattuiffianni ateq allassimasoq.
  Imm. 2.  Ataatsimeersuarnermi piginneqataasut tamarmik immikkut ataatsimik taasisinnaatitaapput. Inatsisartut inatsisaanni matumani, piginneqatigiilluni inissiaatillit peqatigiiffianni malittarisassat imaluunniit peqatigiiffeqarnermut inatsisini maleruagassani nalinginnaasuni allanik aalajangiisoqarsimanngippat, ataatsimeersuarnermi aalajangiinerit nalinginnaasumik taasisut amerlanerussuteqarnerisigut akuersissutigineqartarput.
  Imm. 3.  Ukiumoortumik ineqarnermut akitsuut, pigineqataasunut ataasiakkaanut akilersinneqartussaq ataatsimeersuarnermi aalajangersarneqartarpoq.
  Imm. 4.  Naalakkersuisut malittarisassat nalinginnaasut pisussaaffiliisut pillugit maleruagassanik aalajangersaasinnaapput.

 

  § 54.  Ataatsimeersuartut siulersuisunik immaqalu aqutsisumik, ulluinnarni aqutsinermik isumaginnittuusussanik qinersissapput. Ataatsimeersuarnermi aqutsisumik toqqaasoqanngippat, siulersuisut piginneqatigiilluni inissiaatillit peqatigiiffiata ulluinnarni aqunneqarnerannik isumaginnittuussapput. Peqatigiiffimmi ilaasortat kisimik siulersuisunut qinigaasinnaassuseqarput.
  Imm. 2.  Piginneqatigiilluni inissiaatillit peqatigiiffiata ulluinnarni aqunneqarnera siulersuisunit isumagineqarpat, piginneqatigiilluni inissiaatillit siulersuisunut ilaasortat piginneqatigiilluni inissiaatillit peqatigiiffiannut aningaasaqarnikkut akisussaaffiinut isumannaallisaatitut siulersuisut akisussaanerinut sillimmasiissapput.

 

  § 55.  Piginneqatigiilluni inissiaq najugaqarfissatut siunnerfeqartinneqartoq, inuussutissarsiornermut atorneqassanngilaq, taamaattorli takukkit imm. 2, aamma § 45.
  Imm. 2.  Inuussutissarsiutinik ingerlataqarneq illup sullitanit ornigarneqarneranik kinguneqassanngippat, tamannalu najugaqarfittut atuinermut naleqqiullugu annertuallaassanngippat, ataatsimeersuartut piginneqatigiilluni inissiap ilaata inuussutissarsiornermut atorneqarsinnaanera akuerisinnaavaat.

Kapitali 7
Sillimmasiisarneq, aserfallatsaaliuineq allanngortitsisarnerlu

 

  § 56.  Piginneqatigiilluni inissiaatillit peqatigiiffiata illuutaa sukkulluunniit ikuallattoornissamut illutaatalu ajoqusernissaanut sillimmaserneqarsimassaaq.

 

  § 57.  Piginneqatigiilluni inissiaatillit peqatigiiffiata illuutaa inissiallu ataasiakkaat naammaginartumik aserfallatsaalineqassapput. Aserfallatsaaliuineq sanasut suliaattut pitsaassuseqarlutik eqqortumik aammalu sanaartornermi pilersaarusiornermilu inatsisinut atuuttunut naapertuuttumik suliarineqassapput.
  Imm. 2.  Piginneqataasut ataasiakkaat piginneqatigiilluni inissiat iluanni aserfallatsaaliuinermut nutarterinermullu aningaasartuutinut akisussaasuupput akiliisussaallutillu.
  Imm. 3.  Piginneqatigiilluni inissiaatillit peqatigiiffiat illuummut aamma piginneqatigiilluni inissiani ataasiakkaani aserfallatsaaliuinerit nutarterinerillu sinnerinut aningaasartuutinut akisussaasuuvoq akiliisussaallunilu.
  Imm. 4.  Ataatsimeersuartut illup iluani silataanilu aserfallatsaaliuinissamut maleruagassanik, piginneqataasut ataasiakkaat ataqqissallugit naammassissallugillu pisussaaffigisaannik akuersisinnaapput.
  Imm. 5.  Siulersuisut pilersaarutaasumik ataavartumillu aserfallatsaaliuinissamut pilersaarusiussapput, aammalu piginneqataasut ataasiakkaat ineqarnermut akitsuut aqqutigalugu pilersaarutaasumik ingerlaavartumillu aserfallatsaaliuinissamut akiliisinneqassapput.

 

  § 58.  Piginneqataasup illup iluani aserfallatsaaliuisussaatitaanini sumiginnarpagu, siulersuisut piginneqataasoq allakkatigut piffissap naleqquttup, sukumiinerusumik aalajangerneqartup iluani aserfallatsaaliuinissamik peqqussavaat. Piffissaliussap naanerata kingorna siulersuisut aserfallatsaaliuinissaq suliarineqarsimanersoq paasiniarlugu inissiaq takuniassallugu pisinnaatitaapput.

 

  § 59.  Piginneqataasoq inissiap iluani nalinginnaasunik annikinnerusunillu allannguinissamut pisinnaatitaaffeqarpoq. Inissiap iluani annertuunik allannguisoqassappat, tamanna siulersuisunit akuerineqassaaq.
  Imm. 2.  Piginneqataasoq pisinnaatitaanngilaq illup silataani annertuunik allannguinissamut, tamanna ataatsimeersuartunit siumoortumik allakkatigut akuerineqarsimanngippat.
  Imm. 3.  Allannguinerit sanasut suliaattut pitsaassuseqarlutik aammalu sanaartornermut pilersaarusiornermullu inatsisit naapertorlugit suliarineqassapput.

 

  § 60.  Kommunalbestyrelsip piginneqatigiilluni inissiaatillit peqatigiiffiannut pitsanngorsaanernut taarsigassarsiarititanut imaluunniit piginneqatigiilluni inissiaatillit peqatigiiffiata illuutaata allanngortiternissaanut taarsigassarsiarititanut tunngatillugu akilerneqartussat tulleriinnerini nikisitsinissaq akuerisinnaavaa. Kommunalbestyrelsip akilerneqartussat tulleriinnerini nikisitsinissamik akuersinissaanut, tamatuma kingornaniittut qularnaveeqqusiussaqarluni taarsigassarsiat akilerneqartussat taamaaqataanik akilerneqartussat tulleriinnerini nikisitsinissamik akuerineqarnissaat, piumasaqaataavoq.
  Imm. 2.  Kommunalbestyrelsi piginneqatigiilluni inissiaatillit peqatigiiffiata pilersaarutaasumik piffissakkaartumik aserfallatsaaliuinerup aningaasalersornissaanut imaluunniit aserfallatsaaliuisimannginnerup iluarsineqarnissaanut taarsigassarsiaannut tunngatillugu, akilerneqartussat tulleriinnerini nikisitsinissamik akuersisinnaanngilaq.
  Imm. 3.  Allanngortitsinermi piffissaq akilersuiffissaq sivitsorneqarsimanngippat imaluunniit taarsigassarsiat pingaarnerit qaffanneqarsimanngippata, peqatigisaanillu piginneqatigiilluni inissiaatillit peqatigiiffiannut taarsigassarsianit iluanaarutit tunniunneqarsimappata, kommunalbestyrelsip qularnaveeqqutaa, qularnaveeqqusiussaqarluni taarsigassarsititsinermi akiligassat siornaniittut allanngortinneqarnerisa, akilerneqareerneranni akilerneqassapput.

Kapitali 8
Najugaqartussaatitaaneq, attartortitsineq aamma inigisamik allamut attartortitsinissamik akuersisarneq

 

  § 61.  Piginneqataasup inissiami atuisinnaatitaaffigisamini najugaqarnissani pisussaaffigaa. Piginneqataasoq imaluunniit inuk, piginneqataasup inoqutaanut ilaasoq, ukiup ataatsip iluani sivikinnerpaamik qaammatini arfinilinni ataannartuni unnuisarpat, najugaqartussaatitaaneq naammassineqarsimassaaq.

 

§ 62. Siulersuisut qinnuteqartoqartillugu, piginneqataasoq peqanngikkallartussaappat, piginneqataasup piginneqatigiilluni inissiamik inigisaminik inunnut namminersorsinnaatitaasunut attartortitsinissaa akuerisinnaavaat. Qaammatinit 3-nit sivikinnerusumik allamut attartortitsisoqarsinnaanngilaq. Piginneqatigiilluni inissiaatillit peqatigiiffiata siulersuisui, piffissap ukiunik 5-inik sivisussusillip iluani piffissamut ataatsimoortumut sivisunerpaamik qaammatinik 12-inik sivisussusilimmik piginneqatigiilluni inissiap allamut attartortinnissaa, akuerisinnaavaat.
  Imm. 2.  Imm. 1-imi piffissamut killiliineq apeqqutaatinnagu, peqanngikkallarnissaa assersuutigalugu napparsimanermik, ilinniagaqarnermik, pinerluuteqarsimasunik inissiisarfimmiinnermik, imaluunniit piginneqataasup nammineerluni imaluunniit inoqutigiinni ilaasup nuutsikkallarneqarsimaneranik pissuteqarpat, piginneqataasoq inissiap attartortinnissaanik qinnuteqarsinnaavoq. Qaammatinit pingasunit sivikinnerusumik inigisamik allamut attartortitsisoqarsinnaanngilaq.

 

  § 63.  Piginneqatigiilluni inissiaatip inummut allamut attartortinneqarnerani, attartortussaq, attartornermut akiliutissap annertussusissaa, inissiallu inummit allamit attartorneqarneranut atugassarititaasut siulersuisunit akuerineqartussaapput. Attartornermut akiliut annerpaamik ineqarnermut akitsuutip annertoqatigissavaa. Pequtit inummut allamut attartortitsinermi isumaqatigiissummut ilaatinneqarpata, attartornermut akiliut annerutinneqarsinnaavoq, taamaattorli akiliut annertunerpaamik ineqarnermut akitsuut 10%-imik ilallugu annertussuseqarsinnaalluni.
  Imm. 2.  Inigisamik attartortoq ineqarnermut akiliummik piginneqataasumut akiliisassaaq. Allamut attartortitsinermut allaganngorlugu isumaqatigiissutip assilinera, isumaqatigiissuteqareernermi piaartumik siulersuisunut nassiunneqassaaq.
  Imm. 3.  Inigisamik allamut attartortitsiniarluni isumaqatigiissuteqarnermi, inigisamik attartortinneqartup piginneqatigiilluni inissiaatillit peqatigiiffiannut, piginneqataasumut inummulluunniit allamut allanik isumaqatigiissuteqarnissaa piumasarineqarsinnaanngilaq. Taamatut isumaqatigiissuteqartoqarsimappat taakkua atuutissanngillat. Inigisamik allamut attartortitsinissamik isumaqatigiissut atuutiinnassaaq, kisiannili piumasaqaataasut ilanngunneqartut atuutissanatik.
  Imm. 4.  Inigisamik allamut attartortitsiniarluni isumaqatigiissut inummut ataatsimut tunngasuuvoq. Attartortoq allamut attartortitseqqippat imaluunniit piginneqatigiilluni inissiap attartukkani allamut atortippagu, ilimasaarinertaqanngitsumik allamut attartortitsinissamut isumaqatigiissut atorunnaassaaq aammalu attartortup piginneqatigiilluni inissiaq piaartumik qimallugu nuussaaq. Taamaattoqarpat piginneqataasoq nammineerluni piginneqatigiilluni inissiap najornissaanut pisussaaffeqarpoq.

 

  § 64.  Piginneqataasoq piginneqatigiilluni inissiaatillit peqatigiiffinnut tunngatillugu piffissami allamut attartortitsiviusumi attartortup iliuusaannut, iliuuseqannginnerannut aalajangiinerinullu akisussaasuuvoq.

 

  § 65.  Allamut attartortitsinissamut isumaqatigiissuteqarnermi, attartortup § 63, imm. 3 aamma § 79 malillugit pisinnaatitaaffiini killiliinerit, piginneqataasup attartortumut allaganngorlugu nalunaarutigissavai.
  Imm. 2.  Imm. 1 malillugu paasissutissiisimannginneq, piginneqatigiilluni inissiaatillit peqatigiiffiata susassarinngilaa.

Kapitali 9
Piginneqataassutinik tunniussineq

 

  § 66.  Piginneqataassutip atuisinnaatitaaffimmik ilaqartup tunineqarnissaa imalluunniit allatut tunniunnissaa pillugu isumaqatigiissuteqarnissamut siulersuisut kisermaassillutik aalajangiisinnaatitaapput. Piginneqataasup piginneqatigiilluni inissiaatillit peqatigiiffiannit aninissamik kissaateqartup, piginneqataasumut nutaamut piginneqataassutini tunniunneqarnissaanik piginneqatigiilluni inissiaatillit peqatigiiffianni siulersuisut qinnuigissavai.
  Imm. 2.  Piginneqataasoq piginneqataassutimi, tassungalu atatillugu pisinnaatitaaffimmi pisussaaffimmilu piginneqataalersussamut nutaamut tunniunneqarnissaasa tungaanut piginneqatigiilluni inissiaatillit peqatigiiffianni ilaasortaaginnassaaq.

 

§ 67.  Piginneqataassummik tunniussinermi piginneqataassutip akia ukunannga qaffasinnerussanngilaq:
1) Piginneqataasup aallaqqaatissatut akiliutai.
2) Piginneqataasup piginneqatigiilluni inissiaatit pigisarilernerannut atatillugu piginneqatigiilluni inissiaatillit peqatigiiffiata taarsigassarsiaanut akiliutigisimasai.
3) Piginneqatigiilluni inissiaammi pitsanngorsaatit nalingi.
4) Piginneqataasup piginneqatigiilluni inissiaatillit peqatigiiffianni ingerlatsinermi sinneqartoorutitut naatsorsorneqartunit aamma sillimmatissatut illuartitanit atorneqarsimanngitsunit pisassai.
5) Piginneqatigiilluni inissiaatip illuutillu aserfallatsaaliorneqannginnerata nalinga ilanngaatigalugu.
  Imm. 2.  Imm. 2. Imm. 1, nr. 1-imi aamma 2-mi aningaasartaliunneqartut ukiumoortumik ukiumi naatsorsuiffimmi ulloq siulleq erniap kisitsisitaanut 1,5%-imik ilallugu qaffanneqartarput. Aallaqqaatissatut akiliutit piffissami piginneqataassutip pisiarineqarfiani qaffanneqartarput, taamaattorli siusinnerpaamik atuilernissamut akuersissutip suliarineqarnerani ulluliunneqartoq aallarnerfigalugu. Akilersuutit piffissamit akilerneqarfissaanit qaffanneqartarput, taamaattorli siusinnerpaamik atuilernissamut akuersissutip suliarineqarnerani ulluliunneqartoq aallarnerfigalugu.
  Imm. 3.  Atuilernissamut akuersissutip suliarineqarnissaata tungaanut, piginneqataassut tunniunneqartoq piginneqataasup aallaqqaatissatut akiliutaata nalinganik akeqartinneqartarpoq.

 

  § 68.  § 67, imm. 1, nr. 3 naapertorlugit pitsannguinerit inissiap nutaamik atorsinnaassuseqalersinneqarneranik imaluunniit atorneqarnerata nalingata qaffasinnerulersinneqarneranik paasineqassapput. Pisoqaassuseq aamma nungullarnerit pissutigalugit nalinga ajorseriaateqarsimappat taakku ilanngaatigineqassapput.
  Imm. 2.  Pitsannguinerit tunniussinermut akiusumut ilaatinneqassappata, tamanna pitsannguinerit naammassineriniit kingusinnerpaamik qaammatit arfinillit qaangiunnerini siulersuisunit allakkatigut akuerineqarsimassaaq.

 

  § 69.  Piginneqataasup toqunerani aappaasoq qimataasoq piginneqataassummik tigusinissamut aamma piginneqataasutut ingerlaannarnissamik pisinnaatitaaffeqarpoq. Katissimallugu aappaasup piginneqataasup toqunera sioqqutitsiarlugu piginneqataasoq illoqatigisimassagaa aammalu inuit nalunaarsorsimaffianni najugaqatigisimassagaa, piumasaqaataavoq.
  Imm. 2.  Taamatuttaaq inuk, sivikinnerpaamik ukiuni marlunni aammalu piginneqataasup toqunngitsiarnerani aammalu inuit nalunaarsorsimaffianniilluni piginneqataasumut inoqutaasoq, pisinnaatitaaffeqarpoq.

 

  § 70.  Piginneqataasoq illumut paaqqinnittarfimmut assigisaanulluunniit nuuppat, § 69­imi aalajangersakkat taamatuttaaq atorneqassapput.
  Imm. 2.  Siulersuisut tunngavissaqarluarunik tunniussinissamut akerliusinnaapput.

 

  § 71.  Piginneqataasup averusernerani, avinnerani, imaluunniit piginneqataasup aappaqarnerata atorunnaarsinneqarnerani aappariiusuni arlaat piginneqataasutut ingerlaannarnissamut pisinnaatitaaffeqassanersoq, pisariaqassappat akuersissuteqarnikkut eqqartuussinikkulluunniit aalajangerneqassaaq.
  Imm. 2.  Siulersuisut tunngavissaqarluarunik tunniussinissamut akerliusinnaapput.

 

  § 72.  Piginneqataasup inooqateqarnerminik unitsitsinerani, inooqatigiinnerup unitsinneqarnissaa sioqqullugu piginneqatigiilluni inissiaammi minnerpaamik ukiuni marlunni ataatsimoorlutik aamma inuit nalunaarsorsimaffiat malillugu inoqutigiinniissimagunik, piginneqataasup piginneqataassutini inooqatigisaminut tunniussinnaavaa.
  Imm. 2.  Siulersuisut tunngavissaqarluarunik tunniussinissamut akerliusinnaapput.

 

  § 73.  §§ 69-72­imi taaneqartunit allaanerusumik pisoqartillugu, piginneqataassutinik tunniussineq piginneqatigiilluni inissiaatillit peqatigiiffiata malittarisassaanni maleruagassiarineqartut naapertorlugit pisinnaavoq.

 

  § 74.  Piginneqataasoq piginneqataassutimi tunniunneqarnissaa pillugu siulersuisunut qinnuteqarpat, piffissaq inissiamit nuuffissaq aamma piffissaq piginneqatigiilluni inissiaammik misissuiffissaq siulersuisut piginneqataasullu allakkatigut isumaqatigiissutigissavaat. Piginneqataasoq misissuinermut peqataanissaminik pisinnaatitaaffeqarpoq, aammattaaq suliamik ilisimasalimmik ilaqarluni.
  Imm. 2.  Misissuinermi siulersuisut misissuinermut nalunaarusiussapput, tassanilu amigaataasinnaasut sumiginnagaasimasinnaasulluunniit, siulersuisut piginneqataasup akisussaaffiisut isumaqarfigisaat allanneqassapput. Piginneqataasoq tamatumunnga isumaqataanngippat, tamanna misissuinermut nalunaarusiami allanneqassaaq, piginneqataasup isummersuutai nalunaarneqassallutik. Misissuinermi illuatungeriit marluullutik peqataasimappata, misissuinermut nalunaarusiaq misissuinermut atatillugu illuatungeriinnit atsiorneqassaaq. Piginneqataasoq taassumaluunniit sinniisigisaa misissuinerup kingunitsianngua nalunaarusiap assilineranik tunineqassaaq.
  Imm. 3.  Piginneqataasoq taassumaluunniit peqataanissamut piginnaatitaa misissuinermut takkutinngippat, siulersuisut misissuinermut nalunaarusiaq suliassanut, piginneqataasup akiligaanik suliarineqartussanut tunngavigissallugu pisinnaatitaaffeqarput.
  Imm. 4.  Suliassanut piginneqataasup akiligaanik suliarineqartussanut aningaasartuutit tunisinermi iluanaarutissanit matussuserneqassapput. Piginneqatigiilluni inissiaatillit peqatigiiffiata aningaasartuutai matussuserneqanngitsut piginneqataasumit inissiamit nuuttumit piginneqatigiilluni inissiaatillit peqatigiiffiannut akilerneqassapput.

 

  § 75.  Piginneqatigiiffimmi inissiap tunniussinissaa sioqqullugu siulersuisut piginneqataalersumut uku tunniutissavaat:
1) Piginneqatigiilluni inissiaatillit peqatigiiffiata malittarisassai.
2) Ukiumoortumik naatsorsuutit missingersuutillu kingulliit assilineri.
3) Piginneqataassummik tunniussinermi akiusup qanoq iliorluni naatsorsorneqarsimanerinut takussutissat immikkoortiterlugit allassimaffiat.
4) Piginneqatigiilluni inissiat pillugit Inatsisartut inatsisaat sukkulluunniit atuuttoq.
  Imm. 2.  Piginneqataassummut akiliutissaq piginneqatigiilluni inissiaatillit peqatigiiffiannut akilerneqassaaq, tassanngaanniillu pisassaasinnaasut ilanngaatigereernerini sinneruttut piginneqataajunnaartumut akilerneqassapput. Piginneqatigiilluni inissiaatillit peqatigiiffiata annikitsumik naleqquttumillu piginneqatigiilluni inissiami piginneqataajunnaartup atuinermut akiligassaanut kingusinnerusukkut matussusiinissamut immikkoortitsisinnaavoq.
  Imm. 3.  Piginneqataalersup piginneqataajunnaartumut allanik isumaqatigiissuteqarnissaa tunniussinermi piumasarineqarsinnaanngilaq, tassanili pequtit aalaakkaasunngorlugit ikkussat, piginneqatigiilluni inissiaammut immikkut naleqqussarneqarsimasut ikkunneqarsimasulluunniit pineqanngillat.

Kapitali 10
Ilaasortaajunnaarsitsineq

 

  § 76.  Siulersuisut piginneqataasoq ilaasortaajunnaarsissavaat atuisinnaatitaaneralu atorunnaarsissallugu, piginneqataasup:
1) Allakkatigut piumaffigineqarnerminiit kingusinnerpaamik ulluinnaat arfineq marluk qaangiunnerini akiligassani akilinngippagit.
2) Ineqarnermut akitsuutit akiligassalluunniit tassunga ilaasussat allat akilersimanngippagit, aammalu allakkatigut piumaffigineqarnerminiit kingusinnerpaamik ulluinnaat arfineq marluk qaangiunnerini akilinngitsuukkani akilinngippagit.
3) Siulersuisut akuersiteqqaarnagit piginneqatigiilluni inissiaat najukkani allamut attartortippagu, aammalu allakkatigut piumaffigineqarnerminiit kingusinnerpaamik ulluinnaat 14-it qaangiunnerini tamanna iluarsisimanngippagu.
4) Piginneqatigiilluni inissiaat najukkani najugaqarfiginngippagu, aammalu allakkatigut piumaffigineqarnerminiit kingusinnerpaamik ulluinnaat 30-t qaangiunnerini tamanna iluarsisimanngippagu.
5) Aserfallatsaaliuinissamut maleruagassat allakkatigut piumaffigineqarnerminiit kingusinnerpaamik ulluinnaat 30-t qaangiunnerini malissimanngippagit.

 

  § 77.  Piginneqataasup qaammatit aqqaneq marluk ataannartut iluanni siulersuisunit allakkatigut minnerpaamik pingasoriarluni piumaffigineqarsimagaluarluni, piginneqatigiilluni inissiaatillit peqatigiiffiata torersaarnissamut maleruagassiaanik malinninnissamut pisussaaffini malinngippagit, piginneqataasoq ataatsimeersuartut ilaasortaajunnaarsissavaat atuisinnaatitaaneralu atorunnaarsissallugu.
  Imm. 2.  Piginneqataasoq siulersuisunit allakkatigut marloriarluni piumaffigineqarsimagaluarluni § 57, imm. 2 aamma 4 aamma § 58 naapertorlugu inissiap iluani aserfallatsaaliuisimanngippat, tamannalu piginneqatigiilluni inissiaatillit peqatigiiffiata illuutaanik aammalu inissianut ataasiakkaanut ajoqusiisinnaanermik kinguneqarsinnaappat, ataatsimeersuartut piginneqataasoq ilaasortaajunnaarsissinnaavaat.

 

  § 78.  §§ 76 aamma 77 naapertorlugit allakkatigut piumasaqaat allakkatut nalinginnaasutut aamma tammatsaalisatut piginneqataasup najukkamini allakkanik tigusisarfianut nassiunneqassaaq. Tamatuma saniatigut pisuni § 76, nr. 3­mi aamma 4­mi taaneqartuni, piumasaqaat piginneqatigiilluni inissiaammut piginneqataasup atuisinnaatitaaffigisaanut, siulersuisunut ilaasortanit marlunnit tunniunneqassaaq. Piginneqataasoq pissarsiarineqarsinnaanngippat siulersuisunut ilaasortat allakkat piginneqatigiilluni inissiaammut, piginneqataasup atuisinnaatitaaffigisaanut tunniunneqarsimanera atsiornermikkut uppernarsassavaat. Uppernarsaatip assilinera erngerluni piginneqatigiilluni inissiaatillit peqatigiiffianni siulittaasumut tunniunneqassaaq.
  Imm. 2.  Ataatsimeersuartut imaluunniit siulersuisut piginneqataasumik ilaasortaajunnaarsitsinermik aalajangernerat allakkiatut suliarineqassaaq, tassungalu allakkatigut paasissutissat uku ilaatinneqassapput:
1) Ilaasortaajunnaarsitsinermut tunngaviusoq, inatsisitigut tamatumunnga tunngavigineqartoq allallugu.
2) Piginneqatigiilluni inissiaat qaqugu qimanneqarsimassanersoq pisattallu annisereersimassanersut.
3) Piginneqatigiilluni inissiaammut matuersaatit qaqugu siulersuisunut tunniunneqarsimassanersut.
4) Piginneqatigiilluni inissiaat qaqugu misissorneqassanersoq.
5) Piffissap qanoq ilinissaata tungaanut ineqarnermut akitsuut, kiassarneq il.il. akilersorneqassanersut.
6) Aningaasartuutit allat suut piginneqataasup piginneqatigiilluni inissiaatillit peqatigiiffiannut taarsissanerai.
  Imm. 3.  § 76, nr. 1 aamma 2, aamma § 77 tunngavigalugit ilaasortaajunnaarsitsinermi, atuisinnaatitaaneq sivikinnerpaamik qaammammik ataatsimik sioqqutsilluni nalunaaruteqarnikkut atorunnaarsinneqarsinnaavoq. § 76, nr. 3­5 naapertorlugit ilaasortaajunnaarsitsinermi atuisinnaatitaaneq erniinnaartumik atuuttussanngorlugu atorunnaarsinneqarsinnaavoq.
  Imm. 4.  Imm. 2 naapertorlugu aalajangiinermik nalunaarut piumasaqaatip nassiunneqartarneratut nassiunneqassaaq, takuuk imm. 1.

 

  § 79.  Piginneqataasoq ilaasortaajunnaarsinneqarpat, inissiamut piginneqataassutaasumut atuisinnaatitaaneq atorunnaassaaq. Peqatigisaanik inissiamik piginneqataassummut attuumassuteqartumik attartortitsinermut imaluunniit inigisamik allamut attartortitsinermut isumaqatigiissut atorunnaassaaq. Attartortup imaluunniit inigisamik attartortinneqartup isumaqatigiissut unioqqutissimanngikkaluarpaguluunniit tamanna atuutissaaq.
  Imm. 2.  Piumasaqaatip naammassineqannginnerani piginneqataasoq piumasaqaammik, ilaasortaajunnaarsinneqarnissamik kinguneqartussamik tigusippat, aammalu piginneqataasup piumasaqaat naammassiniarnagu aalajangersimappat, piginneqataasup attartortoq imaluunniit attartortinneqartoq ilaasortaajunnaarsinneqarnissaq pillugu nalunaarfigissavaa. Piumasaqaammik naammassinninnissamut piffissarititaasup naaneraniit kingusinnerpaamik ulluinnaat tallimat qaangiunnerini ilisimatitsissut allakkatut nalinginnaasutut aamma tammatsaalisatut attartortup imaluunniit inigisamik attartortinneqartup najukkamini allakkanik tigusisarfianut nassiunneqassaaq.
  Imm. 3.  Imm. 2 ilisimatitsisoqarsimanngippat, tamanna piginneqatigiilluni inissiaatillit peqatigiiffiata susassarinngilaa aammalu attartortup imaluunniit allap attartortinneqartup piginneqatigiilluni inissiaq qimallugu nuunnissamik pisussaaffeqarneranut pingaaruteqarani.

Kapitali 11
Taarsigassarsiat erniaqanngitsut akilersugassaanngitsullu akiligassanngortinneqartarnerat

 

  § 80.  Kommunalbestyrelsi allamik aalajangigaqanngippat, kommunalbestyrelsimit taarsigassarsiarititat erniaqanngitsut akilersugassaanngitsullu akiligassanngortinneqassapput, imatut pisoqartillugu:
1) Taarsigassarsititsinermi atugassarititaasut annertuumik sumiginnarneqarpata.
2) Piginneqatigiilluni inissiaatillit peqatigiiffiata siulersuisui imaluunniit ataatsimeersuartut §§ 76 aamma 77 naapertorlugit piginneqataasumik ilaasortaajunnaarsitsinissamik pisussaaffimminnik naammassinninngippata.
3) Kommunalbestyrelsimit taarsigassarsiarititat saniatigut taarsigassarsiat allat, piginneqatigiilluni inissiaatillit peqatigiiffiata illuutaa qularnaveeqqusiullugu qulakkeerneqarsimasut atorunnaarsinneqarlutik akiligassanngortinneqarpata.
4) Piginneqatigiilluni inissiaatillit peqatigiiffiata illuut ilanngullugillu inissiat ataasiakkaat naammaginartumik aserfallatsaalinngippagit, aammalu kommunalbestyrelsimut qularnaveeqqusiissut ajorseriarsinnaappat.
5) Piginneqatigiilluni inissiaatillit peqatigiiffiata illuutaa minnerpaamik ikuallattoornissamut illuutillu ajoqusernissaanut sillimmaserneqarsimanngippat.
6) Piginneqatigiilluni inissiaatillit peqatigiiffiata inissiaatai § 55­imi piumasaqaatit unioqqutillugit atorneqarpata.
7) Piginneqatigiilluni inissiaatillit peqatigiiffiata kommunalbestyrelsi taassumaluunniit aallartitaa illuummik ilanngullugulu inissianik ataasiakkaanik takuniaanerani isernissaanut tunngavissaqanngitsumik itigartippagu.
8) Piginneqatigiilluni inissiaatillit peqatigiiffiata ukiumoortumik naatsorsuutit kingumoortumik misissortinngippagit imaluunniit piginneqatigiilluni inissiaatillit peqatigiiffiata ukiumoortumik naatsorsuutit kommunalbestyrelsimut taarsigassarsititsisimasumut nassiukkumanngippagit.
9) Ukiuni tulleriinni marlunni ukiumoortumik nalunaarusianik kukkunersiunermi peqatigiiffiup pigisaasa nalillit akiligassaasalu, aammalu aningaasaqarnikkut inissisimanerata eqqortumik takutinneqarsimannginnerat tunuarsimaarfeqartinneqarpat.
10) Piginneqatigiilluni inissiaatillit peqatigiiffiat aningaasanik, pilersaarutaasumik ataavartumillu aserfallatsaaliuinissamut naammattunik akiliisitsisanngippat sillimmatissanillu illuartitsisanngippat.
11) Piginneqatigiilluni inissiaatillit peqatigiiffiat pilersaarutaasumik ataavartumillu aserfallatsaaliuinissamut pilersaarusiorsimanngippat.
12) Piginneqatigiilluni inissiaatillit peqatigiiffiat atorunnaarsinneqarpat, imaluunniit taassuma inissiaatai piginneqatigiilluni inissiatut atorneqarnerminnit allaanerusumik atorneqalerpata.
  Imm. 2.  Imm. 1 naapertorlugu taarsigassarsiarititat kommunalbestyrelsimit atorunnaarsinneqannginneranni, pissutsit aaqqinneqarnissaat pillugu qaammammik ataatsimik piffissaliilluni tamanna piginneqatigiilluni inissiaatillit peqatigiiffiannut allakkatigut nalunaarutigineqassaaq.

Kapitali 12
Missingersuutit naatsorsuutillu

 

  § 81.  Piginneqatigiilluni inissiaatillit peqatigiiffiata ukioq naatsorsuusiorfigisaa qaammatinik aqqaneq marlunnik sivisussuseqassaaq. Kisiannili piginneqatigiilluni inissiaatillit peqatigiiffiata ukioq naatsorsuusiorfigisaa siulleq sivikinnerusinnaavoq sivisunerusinnaalluniluunniit, taamaattorli sivisunerpaamik qaammatinik 18-inik sivisussuseqarsinnaalluni. Taamatuttaaq piginneqatigiilluni inissiaatillit peqatigiiffiata piffissap naatsorsuusiorfigisassaata allanngortinneqarnissaanut atatillugu piffissaq naatsorsuusiorfiusoq sivikinnerusinnaavoq sivisunerusinnaalluniluunniit.
  Imm. 2.  Piginneqatigiilluni inissiaatillit peqatigiiffiat ukiumoortumik naatsorsuutit kingumoortumik misissorneqarnissaannut kukkunersiuisumik naalagaaffimmit akuerisamik imaluunniit kukkunersiuisutut nalunaarsorsimasumik atorfinitsitsissaaq. Kukkunersiuisoq kukkunersiuinermut inatsimmi tamatumunnga aalajangersakkat sukkulluunniit atuuttut naapertorlugit siulersuisunut nalunaarusiortassaaq.
  Imm. 3.  Kukkunersiuisumik naalagaaffimmit akuerisamik imaluunniit kukkunersiuisutut nalunaarsorsimasumik atuinissamut pisussaaffik sapinngisamik siusissukkut piffissani ukunani atuutilissaaq:
1)  Pisinnaatitaanerup nalunaarsorneqarnerani.
2)  Piginneqatigiilluni inissiaatillit peqatigiiffiata piginneqatigiilluni inissiaataanik atuilernermi.
  Imm. 4.  Naalakkersuisut pisuni immikkut ittuni piginneqatigiilluni inissiaatillit peqatigiiffiata kukkunersiuisumut naalagaaffimmit akuerisamut imaluunniit kukkunersiuisutut nalunaarsorsimasumit ukiumoortumik nalunaarummik kukkunersiuinissamut suliakkiisarnissaanut piumasaqaammik saneqqutsinissamut immikkut ittumik akuersissuteqarsinnaapput. Saneqqutsinissamut immikkut ittumik akuersissuteqartoqassappat, kukkunersiuinissaq minnerpaamik naatsorsuutinik ilisimasalimmit isornartoqartinneqanngitsumit isumagineqassaaq.
  Imm. 5.  Piginneqatigiilluni inissiaatillit peqatigiiffiisa missingersuutinik, ukiumoortumik naatsorsuutinik, oqaaseqaatinik kisitsisinillu pingaarnernik suliaqarnissaannut ilusiliinissaannullu Naalakkersuisut maleruagassanik aalajangersaasinnaapput.

 

  § 82.  Piginneqatigiilluni inissiaatillit peqatigiiffiat, kommunalbestyrelsimit taarsigassarsilluni piginneqatigiilluni inissianik pisisimasoq, ukiumoortumik naatsorsuutit ataatsimeersuartunit akuerineqarneranni erngerluni ukiumoortumik naatsorsuutit assilinerinik kommunalbestyrelsimut nassiussissaaq.

Kapitali 13 
Piginneqatigiilluni inissiaatillit peqatigiiffiannik atorunnaarsitsineq

 

  § 83.  Piginneqatigiilluni inissiaatillit peqatigiiffiata atorunnaarsinneqarnissaa aammalu piginneqatigiilluni inissiaatillit peqatigiiffiata inissiaataasa inissiatut nammineq pigisatut tunineqarnissaat ataatsimeersuartunit aalajangerneqarsinnaavoq.
  Imm. 2.  Piginneqatigiilluni inissiaatillit peqatigiiffiata inissiaataasa inissiatut nammineq pigisatut tunineqarnissaat siunertaralugu peqatigiiffik atorunnaarsinneqassappat, tamatuma piginneqataasunit tamanit akuerineqartariaqarpoq.
  Imm. 3.  Atorunnaarsitsineq inunnit marlunnit isumagineqassaaq, taassumalu aappaa tassaassaaq eqqartuussissuserisoq, aappaalu ataatsimeersuartunit toqqarneqassaaq.
  Imm. 4.  Atorunnaarsitsinermi naatsorsuutit inaarutaasut piginneqatigiilluni inissiaatillit peqatigiiffiata kukkunersiuisuanit kukkunersiorneqassapput, aammalu piginneqatigiilluni inissiaatillit peqatigiiffiannut pisortanit taarsigassarsititsisoqarsimappat kommunalbestyrelsimut nassiunneqassallutik.
  Imm. 5.  Piginneqatigiilluni inissiaatillit peqatigiiffiata atorunnaarsinneqarnerata kingorna pisussutsit ilanngaaseriikkat piginneqataasunit, piginneqataassutsinut ataasiakkaanut naligitinneqartut naapertorlugit agguarneqassapput.

 

  § 84.  § 83 imm. 1 naapertorlugu tunisinermut atatillugu piginneqatigiilluni inissiaatillit peqatigiiffiannut Inatsisartut inatsisaat manna naapertorlugu pisortanit taarsigassarsiarititat illuliortiternermut taarsigassarsiat malillugit paarlaassinermut taarsigassarsiarititassanik taarserneqarnissaat piumasarineqarsinnaapput, illiliortiternermut aningaasalersuineq pillugu inatsisit piffissami atuuttut imm. 2-mi allannguutit malitsigisai ilanngullugit.
  Imm. 2.  Imm. 1 naapertorlugu taarsigassarsiarititassat ullormit pisinissamik isumaqatigiissutip atsiorneqarfianiit ukiuni qulini erniaqartinneqassanngillat akilersugassaassanatillu, tamatumalu kingorna taarsigassarsiat angeqqatigiinnik aningaasartalerlugit ukiuni qulini akilersugassanngortinneqassallutik. Taamaattoq taarsigassarsiat akilersoqarneri kingusinnerpaamik piginneqatigiilluni inissiat peqatigiiffiannut taarsigassarsiarineqaqqaartut assigalugit aallartinneqassapput.

 

§ 85.  § 83 imm. 1 naapertorlugu tunisinermut atatillugu piginneqatigiilluni inissiaatillit peqatigiiffiannut Inatsisartut inatsisaat siusinnerusukkut atuussimasoq naapertorlugu pisortanit taarsigassarsiarititat illuliortiternermut taarsigassarsiat malillugit paarlaassinermut taarsigassarsiarititassanik taarserneqarnissaat piumasarineqarsinnaapput, illuliortiternermut aningaasalersuineq pillugu inatsisit piffissami atuuttut imm. 2-mi allannguutit malitsigisai ilanngullugit.
  Imm. 2.  Imm. 1 naapertorlugu taarsigassarsiarititassat ullormit pisinissamik isumaqatigiissutip atsiorneqarfianiit ukiuni qulini erniaqartinneqassanngillat akilersugassaassanatillu, tamatumalu kingorna taarsigassarsiat angeqqatigiinnik aningaasartalerlugit ukiuni qulini akilersugassanngortinneqassallutik.

 

  § 86.  Piginneqatigiilluni inissiamik pisisup tunisisullu namminneq pisinermut atatillugu aningaasartuutitik tamaasa akilissavaat.

 

  § 87.  Piginneqatigiilluni inissiaatillit peqatigiiffiat atorunnaarsinneqarpat, aammalu inissiat siornatigut pisortat attartortittakkatut inissiaatigisimappatigit, tamatumunngalu peqatigitillugu piginneqatigiilluni inissiaatillit peqatigiiffiata inissiaatai inissiatut nammineq pigisatut tunineqarnissaat aalajangerneqarsimanngippat, inissiat inissiatut attartortittakkatut nalinginnaasutut Namminersorlutik Oqartussanut imaluunniit kommunalbestyrelsimut inissianik piginnittuusimasunit tiguneqassapput. Piginneqataasimasut inissiani attartortutut najugaqaannarnissamik pisinnaatitaaffeqarput.
  Imm. 2.  Attartortitsisup qularnaveeqqummik attartortitsineq pillugu peqqussummi atuuttut naapertorlugit akiliisoqarnissaa piumasarisinnaavaa.
  Imm. 3.  Piginneqatigiilluni inissiaatillit peqatigiiffiata atorunnaarsinneqarnerani inissiat inissiatut attartortittakkatut nalinginnaasutut atorneqalernissaat pillugu Naalakkersuisut maleruagassiorsinnaapput.

Kapitali 14
Atuutsitsilernissamut aalajangersakkat aamma ikaarsaarnermut aalajangersakkat

 

  § 88.  Inatsisartut inatsisaat ulloq 1. januar 2018 atuutilerpoq.
  Imm. 2.  Peqatigisaanik piginneqatigiilluni inissiat pillugit Inatsisartut peqqussutaat nr. 2, 16. maj 2008-imeersoq atorunnaarsinneqarpoq.
  Imm. 3.  Namminersornerullutik Oqartussat kommunillu inissiaataasa attartortittakkat teknikikkut aningaasatigullu nalilivigineqartarnerat pillugu Namminersornerullutik Oqartussat nalunaarutaat nr. 9, 12. maj 2003-meersoq, Inatsisartut inatsisaat manna naapertorlugu aalajangersaanikkut allanngortinneqarnissami atorunnaarsinneqarnissamilu tungaanut atuutiinnassaaq.

 

  § 89.  Qinnuteqaatit aamma akuersinerit pillugit piginnittut nikinnerat, taarsigassarsianik allanngortitsinerit, akilerneqartussat tulleriinnerini nikisitsinissamik akuersinerit, akiliinissamut naatsorsukkat, taarsiilluni taarsigassarsiarititat il.il., Inatsisartut inatsisaat malillugu kommunalbestyrelsimut nassiunneqartut, Namminersorlutik Oqartussat akiligassaqarfiullutik taarsigassarsititsinermut tunngassutillit, Namminersorlutik Oqartussanut nassiunneqassapput.

 

  § 90.  Taarsigassarsiarititat aamma taarsigassarsititsinissamik neriorsuutit, ulloq 1. januar 2018 tunniunneqartut imaluunniit tamanna sioqqullugu akuerineqartut, atugassarititaasut allanngortinnagit ingerlateqqinneqassapput. 

 

§ 91.  Qinnuteqartut ulloq 1. januar 2018 sioqqullugu taarsigassarsitinneqarnissamik neriorsorneqarsimasut aammalu taarsigassarsiarititassat tunniunneqarsimanatik, qinnuteqarneq malillugu Inatsisartut inatsisaanni matumani maleruagassat malillugit nutaamik taarsigassaritinneqarnissaq pillugu neriorsuummik tunineqarsinnaapput.

 

 

Namminersorlutik Oqartussat ulloq 23. november 2017

 

 

Kim Kielsen