§ 1

Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaanni nr. 20 ulloq 3. december 2012-meersumi, Inatsisartut inatsisaanni nr. 4, 3. juni 2016-imeersumi allanngortinneqartumi, imaattunik allannguuteqartitsisoqassaaq:

1.  § 1 a-p kingorna ilanngunneqassaaq:
”  § 1 b.  Aningaasaliissutinik immikkoortitsisoqassaaq annikitsunik taarsigassarsititsinermut aningaasaliissutaasartussanik, aallarnisaasuaqqat aningaasalersornissaannik siunertaqartumik.
  Imm. 2.  Kommunit aningaasalersueqataallutik annikitsunik taarsigassarsititsisarnermut aaqqissuussinermi peqataanissamut periarfissaqarput. Aningaasalersueqataanissamut atugassarititaasut Naalakkersuisut aamma kommunit ataasiakkaat akornanni isumaqatigiissummi aalajangersarneqassapput.
  Imm. 3.  Imm. 1-imi annikitsunik taarsigassarsititsisarnermut aaqqissuussineq, atuutilernerata kingorna ukiut 4-t qaangiunneranni atorunnaassaaq.”

2.  § 5 a-p kingorna ilanngunneqassaaq:
”  § 5 b.  Qinnuteqartoqareerneratigut taarsigassarsititsisoqarsinnaavoq § 5, imm. 1-imi siunertanut nalunaarsorneqartunut imaluunniit aningaasaliissutitut sulisitassatut.
  Imm. 2.  Naalakkersuisullu aalajangersagaliorsimappata inuussutissarsiutini ingerlatanut imaluunniit suliffeqarfinnut aalajangersimasunut tapersiissuteqartarniarlutik § 6 naapertorlugu, aamma taarsigassarsititsisoqarsinnaavoq inuussutissarsiutini ingerlatanut pineqartunut suliffeqarfinnulluunniit aalajangersimasunut.”

3.  Kapitali 4-p qulequtaa imatut oqaasertalerneqassaaq:

”Tapiissutit annertussusiat aamma sivisussusiat il.il.”

4.  § 9 -p kingorna ilanngunneqassaaq:
”  § 9 a.  Taarsigassarsititsinissamut neriorsuummi § 5 b naapertorlugu nalunaarneqassaaq taarsigassarsiarititassat annertussusiat, 20.000 kr.-nit 100.000 kr.-nut annertussuseqarsinnaasut, taamaattoq tak. imm. 7.
  Imm. 2.  Taarsigassarsititsinissamik neriorsuinermi atugassarititaavoq aningaasartuutissatut missingersuusiat suliniummut toqqaannartumik attaveqarneri imaluunniit aningaasaliissutitut sulisitassatut, taarsigassarsiassanut tunngasumik.
  Imm. 3.  Aningaasat taarsigassarsiaritinneqartussat 1-imik imaluunniit arlalinnut agguarlugit tunniunneqarsinnaapput.
  Imm. 4.  Aningaasat taarsigassarsiaritinneqartussat annerpaamik aningaasartuutissatut missingersuusiaasut 75 pct.-erisinnaavaat suliniummik allaaserinninneq naapertorlugu suliaasut, qinnuteqarnermilu tunngaviusut. Taamaattoq aningaasat taarsigassarsiaritinneqartussat annerpaamik 25 pct.-iusinnaapput, taarsigassarsitinneqarnissamut qinnuteqaammi inatsisip tapiissuteqartarnermut periarfissatut aaqqissuussai allat ilanngullugit atorneqarpata, takukkit § 5, imm. 1 aamma § 6, imaluunniit aningaasartuutissatut missingersuusiaasut 50 pct.-ii, aningaasaliissutit sulisitassat pineqarpata.
  Imm. 5.  Taarsigassarsititsineq pisassaaq niuernermi atugassarititaasut tunngavigalugit, tamatumani aamma erniat, akilersuineq, akitsuutit aamma taarsigassarsititsinermut aningaasartuutit eqqarsaatigalugit atugassarititaasuni, taarsigassarsisup aamma taarsigassarsititsinermi allaffissornikkut sullissisuusup akornanni isumaqatigiissutaasumi, tak. taamaattoq imm. 4.
  Imm. 6.  Taarsigassarsiaritinneqartunut qularnaveeqqusiisoqartassanngilaq, taarsigassarsitinneqartussallu nalilerneqarnerani taarsigassarsititsisarnerup siunertaa isiginiarneqartassaaq, tak. § 1 b.
  Imm. 7.  Naalakkersuisut taarsigassarsititsisarnermik aaqqissuussineq pillugu ersarinnerusunik aalajangersagaliorsinnaapput, tamatumani aamma aningaasat pineqartut killissaannik.”

5.  § 10, imm. 1, imatut oqaasertalerneqassaaq:
”  § 10.  Naalakkersuisut allaffissornikkut tapiissuteqartarnermi suliassat §§-ini 5, 5 a aamma 5 b suliassat pillugit kommunalbestyrelsimut imaluunniit allaffissornikkut ingerlatsivimmut isumaqatigiissuteqarsinnaapput.”

6.  § 12, imm. 4, nr. 1, imatut oqaasertalerneqassaaq:
”  1)  naatsorsuutinik imaluunniit uppernarsaatinik allanik § 11, imm. 1 malillugu Naalakkersuisut piumasarisimasaannik, tassani piffissamut killiliussap allassimasup iluani nassiussinngippat, imaluunniit”

§ 2

Inatsisartut inatsisaat 1. januar 2018 atuutilissaaq.

Namminersorlutik Oqartussat, ulloq 17. november 2017

Kim Kielsen