§ 1

Unammilleqatigiinneq pillugu (unammilleqatigiinnermut inatsit) Inatsisartut inatsisaanni nr. 1, ulloq 15. maj 2014 -imeersumi imaattunik allannguuteqartitsisoqassaaq:

1.  § 23-ip kingorna ikkunneqassaaq:

”Kapitali 5a
Suliaqarfiit aalajangersimasut siunnerfigalugit elektroniskiusunik attaveqaqatigiinnermut aamma kiffartuussinermut atatillugu unammilleqatigiinnermik aqutsineq

Internetimut appakaaffissaqartitsineq aamma peqatigiilluni ataatsimut atuisitsisinnaatitsineq pillugit ataatsimut aalajangersakkat

  § 23 a.  Attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut peqatigiillutik ataatsimut atuisitsisinnaatitsineq pillugu akunnerminni isumaqatigiissusiornissaq pisussaaffigaat attaveqaqatigiissutit elektroniskiusut kikkunnut tamanut neqeroorutigineqarsinnaanissaat siunertaralugu, taamaalilluni kiffartuussissutit taamaattut Kalallit Nunaanni tamarmi neqeroorutigisinnaaqqullugit aamma unammilleqatigiit neqeroorutigisaat suleqatigiissinnaaqqullugit.
  Imm. 2.  Atuisartoqarnermut Unammilleqatigiinnermullu Aqutsisoqarfik pisussaaffiliisinnaavoq, tamanna pisariaqaraangat, atuisut attaveqaqatigiissutini ataasiakkaani atassuserneqarnissaannik qularnaarukkumallugit imaluunniit attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik neqerooruteqartartunut, atuisup ataatsip amerlanerusulluunniit iserfigineqarsinnaanerannik paarsisuusunut, ilanngullugu unammilleqatigiit ataqatigiissaarutaasa ataatsimut suleqatigiissinnaalersinnissaat, unammilleqatigiit neqeroorutigisaasa suleqatigiissinneqarnissaat qularnaarumallugit.

  § 23 b.  Internetimut appakaaffissaqartitsineq aamma peqatigiilluni ataatsimut atuisitsisinnaatitsineq isumaqatigiissutit imminut akilersinnaasunik atugassarititaasut iluanni aalajangersarneqartassapput. 
  Imm. 2.  Naak imm. 1 atuukkaluartoq attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut, § 23 a, imm. 2 imaluunniit § 23 i naapertorlugit pisussaaffilerneqarsimasut, attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut allat internetimut appakaaffissaqartitsinermik aamma peqatigiilluni ataatsimut atuisitsisinnaatitsinermik neqerooruteqassapput naammassisassat piumasallu neqerooruteqartumut pisussaaffigineqarsimasunut naapertuuttunik.

  § 23 c.  Attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik neqerooruteqartartut internetimut appakaaffissaqartitsineq imaluunniit ataatsimut ingerlaarneq pillugit isumaqatigiinniarnerit sioqqullugit, ingerlanneranni kingornaluunniit attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik neqerooruteqartartunit allanit paasissutissanik tigusaqartut taamaallaat paasissutissat pissarsiarisani siunertaasumut tunniunneqarnerat naapertorlugu atorsinnaavai, aammalu sukkulluunniit paasissutissat taakkua tigusimasani isertuuttussaallugit.
  Imm. 2.  Paasissutissat tigusimasat allanut ingerlatseqqinneqassanngillat, taamaaliornikkut unammilleqatigiinnermi iluaqutissarsisinnaasumut, tamatumani aamma immikkoortortanut allanut, ingerlatseqatigiiffinnut allequtaasunut imaluunniit piginneqatigisanut.

Internetimut appakaaffissaqartitsinermi teknikkikkut aqutsineq

  § 23 d.  Naalakkersuisut Atuisartoqarnermut Unammilleqatigiinnermullu Aqutsisoqarfimmit oqaaseqaatinik piniareernermi kingornatigut ersarinnerusunik malittarisassiorsinnaavoq, attaveqaasersuisartut niuerfimmi annerpaamik tigummisuusut, internetimut appakaaffissaqartitsinissamik pisussaaffiligaasut, takuuk § 23 j, aamma  attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut internetimut appakaaffissamik taamaattumik atuisuusut, ingerlatsinermut atatillugu teknikkikkulluunniit piumasaqaatinik naammassinnittassapput, tamanna pisariaqaraangat attaviit ingerlanneqarnerisa nalinginnaasuunissaasa qularnaarneqarnissaannut.

Unammillernermi atugassarititaasunik misissuisarnerit

  § 23 e.  Atuisartoqarnermut Unammilleqatigiinnermullu Aqutsisoqarfiup akuttoqatigiissaakkamik nalunaarasuartaateqarnermi unammilleqatigiinnermi pissutsit misissuiffigisarpai (niuerfimmi misissuineq), pisariaqartitsineq nalilersorsinnaajumallugu, § 23 i-lu naapertorlugu pisussaaffiliinissamut pisariaqartitsineq nalilersorsinnaajumallugu.
  Imm. 2.  Atuisartoqarnermut Unammilleqatigiinnermullu Aqutsisoqarfiup niuerfimmi misissuinerusimasut nutarsartarpai, niuerfiusuni pissutsinilu atuuttuni pisariaqarneranik nalileereernermi.
  Imm. 3.  Neqerooruteqartartut niuerfimmi annerpaamik tigummisuusut pisussaaffiligaasullu, takuuk § 23 i, aaqqissuussaanikkut allannguinerit pisussaaffiliunneqarsimasunut annertuumik pingaaruteqartut pillugit Atuisartoqarnermut Unammilleqatigiinnermullu Aqutsisoqarfik ilisimatittassavaat.

Niuerfiusunik killilersuisarneq

  § 23 f.  Niuerfiusunik misissuisarnernut atatillugu, takuuk § 23 e, Atuisartoqarnermut Unammilleqatigiinnermullu Aqutsisoqarfiup niuerfiusut killissaat nalunaarsortassavai, nunarsuarmiut akornanni periaatsit pitsaanerpaat tunngavigalugit, Kalaallit Nunaanni pissutsinut naleqqussarlugit.

Niuerfinnik misissuineq

  § 23 g.  Niuerfinnik misissuisarnernut atatillugu, takuuk § 23 e, Atuisartoqarnermut Unammilleqatigiinnermullu Aqutsisoqarfiup niuerfinnik nalilersuineq ingerlattarpaa, § 23 f-imut naapertuuttumik killiligaasoq, nalilersorsinnaajumallugu niuerfinni taakkunani piviusumik unammilleqatigiittoqarnersoq.

Neqerooruteqartartumik niuerfimmi annerpaamik tigummisumik toqqaaneq

  § 23 h.  Niuerfimmik misissuinerup, takuuk § 23 g, ersersippagu piviusumik niuerfiusumi unammilleqatigiittoqanngitsoq, taava Atuisartoqarnermut Unammilleqatigiinnermullu Aqutsisoqarfiup niuerfimmi pineqartumi annerpaamik tigumminnittumik attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik neqerooruteqartartoq ataaseq amerlanerusulluunniit toqqassavaa imaluunniit toqqassavai.
  Imm. 2.  Niuerfimmi ingerlatsisuusoq annertuumik ingerlatsivimmi tigumminnittuusutut isigineqassaaq, imm. 1 naapertorlugu, neqerooruteqartartoq annertuumik tigumminnittoq kisimiilluni imaluunniit neqerooruteqartartut allat peqatigalugit, aningaasaqarnikkut ima nukittutigisumik inissisimaguni unammillertit allat kiffartuussallu apeqqutaatinnagit iliuuseqarsinnaassuseqarluni.
  Imm. 3.  Niuerfimmi aalajangersimasumi neqerooruteqartartoq imaluunniit niuerfimmi neqerooruteqartartutut annerpaamik tigumminnittutut toqqarneqarpat, takuuk imm. 1, Atuisartoqarnermut Unammilleqatigiinnermullu Aqutsisoqarfik tamatuma ilutigisaanik neqerooruteqartartoq taanna niuerfimmi assingusumi annerpaamik neqerooruteqartartussatut toqqarsinnaavaa, niuerfimmi ataatsimi inissisimaneq niuerfiup aappaanut nuunneqarsinnaara niuerfiusut taakkua marluk imminnut attaveqarnerisa periarfissaqartippagu, taamalu neqerooruteqartartup taassuma niuerfinni inissisimanera annertusaqqissinnaallugu nukittorsaqqillugulu.
  Imm. 4.  Niuerfimmik misissuinerup, takuuk § 23 g, ersersippagu niuerfimmi pineqartumi piviusumik unammilleqatigiittoqartoq, imaluunniit neqerooruteqartartoq niuerfimmi annerpaamik tigumminnittuujunnaarsimappat, taava Atuisartoqarnermut Unammilleqatigiinnermullu Aqutsisoqarfiup pisussaaffiit tamaasa atorunnaarsissavai, immikkoortoq una naapertorlugu, imaluunniit immikkoortoq una naapertorlugu malittarisassiaasut naapertorlugit niuerfimmik annerpaamik tigumminnittuusimasumut pisussaaffiliunneqarsimasut, niuerfimmi pineqartumi annerpaamik tigumminnittuusimaneranni pisussaaffiliussaasut aqunniarlugit.

Neqerooruteqartartut niuerfimmi annerpaamik tigummisuusut malittarisaliuunneqarneranni pisussaaffiit

Niuerfimmi aalajangiinerit

  § 23 i.  Aalajangiinerni § 23 h, imm. 1 naapertorlugu, Atuisartoqarnermut Unammilleqatigiinnermullu Aqutsisoqarfik neqerooruteqartartut niuernermik annerpaamik tigumminnittuusut, takuuk § 23 h, ataatsimik arlaqartunilluunniit pisussaaffiliissaaq.
  Imm. 2.  Atuisartoqarnermut Unammilleqatigiinnermullu Aqutsisoqarfiup aalajangikkani ataasiakkaani pisussaaffiliunneqartuni annertussusiusussanik aamma taakkua imarisassaannik aalajangersaasassaaq. Pisussaaffinnut imm. 1-imi pineqartunut ilaasinnaapput:
1) Internetimut appakaaffissaqartitsineq, takuuk § 23 j.
2) Assigiinngisitsinnginnissaq, takuuk § 23 k.
3) Akimut ersittuutitsinissaq, takuuk § 23 l.
4) Naatsorsuutit immikkoortukkuutaartumik aaqqissuussaanissaat, takuuk § 23 m.
5) Akinik nakkutilliineq, takuuk § 23 n.
6) Aaqqissuussamik immikkoortitseqqanissaq, takuuk § 23 o.
  Imm. 3.  Atuisartoqarnermut Unammilleqatigiinnermullu Aqutsisoqarfik pisuni immikkut ittuni niuerfimmik annerpaamik tigumminnittunut allanik pisussaaffiliisinnaavoq, imm. 2-mi allattukkat saniatigut.
  Imm. 4.  Imm. 3 apeqqutaatinnagu Atuisartoqarnermut Unammilleqatigiinnermullu Aqutsisoqarfik neqerooruteqartartut niuerfimmi annerpaamik tigumminnittut ingerlatsiviisa annikitsut malittarisaliuunneranni pisussaaffinnik allanik atugassiissuteqarsinnaavoq, pisussaaffiit imm. 2-mi eqqaaneqartut unammilleqatigiinnermi ajornartorsiummik § 23 g naapertorlugu paasineqartumik aaqqiinissamut naleqqutinngitsutut nalilerpagu.
  Imm. 5.  Aalajangiinermi imm. 1, 3 imaluunniit 4-mi pineqartumut atatillugu Atuisartoqarnermut Unammilleqatigiinnermullu Aqutsisoqarfiup aalajangissavaa attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik neqerooruteqartartut tamatumunnga kalluarneqartut qanoq ilisimatinneqassanersut. Neqerooruteqartartut taakkua piffissaagallartillugu piffissaqarluartumik tamanna pillugu ilisimatinneqartassapput.

Internetimut appakaaffissaqartitsinermik pisussaaffeqarneq

  § 23 j.  Internetimut appakaaffissaqartitsinermik pisussaaffeqarneq ima paasineqassaaq neqerooruteqartartut niuerfimmi annerpaamik tigumminnittuusut internetimut appakaaffissaqartitsinermik piviusumik imaluunniit piviusuusaartumik neqerooruteqartartup internetimi immikkoortuinut, kiffartuussinerinut assigisaannillu ingerlataanut neqerooruteqartassasut. Tassunga atatillugu neqerooruteqartartoq Atuisartoqarnermut Unammilleqatigiinnermullu Aqutsisoqarfimmit internetimut appakaaffissaqartitsinissaq taamaattulluunniit pillugit isumaqatigiissutit allannguuteqartinnissaannik noqqaassutit naleqquttut akuerinissaannut pisussaaffilerneqarsinnaavoq. Pisussaaffik ilaatigut makkuninnga imaqarsinnaavoq:
1) Internetimi immikkoortunut ingerlatanullu, ilanngullugit internetimi immikkoortunut atunngitsunut, atuisartuutit attaviinut pisussaaffilersugaanngitsumik pisinnaaneq aamma atuisartuutit attaviinik tuniniaaqqissinnaanermik neqerooruteqarsinnaanermik pisinnaatitsineq.
2) Attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut atuisinnaanermut qinnuteqartut pimoorussillutik isumaqatiginninniaqatigisassagaat.
3) Atortorissaarutinut siusinnerusukkut attaviliivigineqarsimasunut attavinnik atortitsiinnarnissanut.
4) Kiffartuussinernik assigiinngitsunik annertuukkaartumik pingajuusunut neqerooruteqartarneq niuerutigeqqitassatut.
5) Teknikkikkut saqqumisup ilusaanut, protokollinut imaluunniit teknikkikkut atortorissaarutinut allanut killeqanngitsumik attaveqarnissanut neqerooruteqartarneq, kiffartuussissutaasut imaluunniit kiffartuussissutaasunut assingusut unammilleqatigiit neqeroorutigisaat suleqatigiissinnaanissaannut pingaaruteqartunut.
6) Ataatsimut ineqarnissamik neqerooruteqarneq, ataatsimut ineqarnertut aaqqissuussisinnaanermik imaluunniit allatigut ataatsimut atortorissaarutinik atueqatigiinnissamik neqerooruteqarnerit, tamatumani aamma illuutinik ataatsimoorussilluni atuinissanik, illunut aqqutinik ataatsimut atuinissanik, illuni kabelinik, napparutinik, antenninik, napasulianik, allanillu iluaqusersuutinik, kabelit ledningillu aqqutaannik kabelinullu itersalianik aamma skavinnik atueqatigiinnissanik neqerooruteqartarnerit.
7) Kiffartuussinernik aalajangersimasunik neqerooruteqartarnissaq, atuisartut akornanni internetip attaviullu suleqatigiissinnaanissaasa qularnaarnissaannut pisariaqartunik, tamatumani aamma internetikkut kiffartuussissutit silatuut imaluunniit mobile netikkut atuisuuffigisap isumaqatigiissuteqarfigisimasaasa attaveqaataasa aqqutaannik atuinernik.
8) Ingerlatsinernut ikorfartuutaasunik aaqqissuussinernik software-nilluunniit assigisaannik atuinissamut neqerooruteqartassalluni, unammilleqatigiinnermik piviusumik ingerlatsinissamut pisariaqartunik.
9) Attaveqaatit assigiinngitsut imaluunniit internetikkut ingerlatsiviit tigussaasunik isumaliortaatsikkulluunniit naleqquttunik ataatsimut kattunneqarnissaannik neqerooruteqassalluni.
10) Kiffartuussinernik attuumassuteqartunik atuisinnaanermut neqerooruteqassalluni, soorlu kinaassutsimut, nunap immikkoortuani sumiinnermik peqataanermillu takutitsisinnaasunut.
  Imm. 2.  Internetimut appakaaffissaqartitsinermut pisussaaffinnik aalajangersaasarnerni Atuisartoqarnermut Unammilleqatigiinnermullu Aqutsisoqarfiup ingammik isiginiassavai;
1) niuerfimmi ineriartornerup ingerlasup teknikkikkut aningaasarsiornikkullu ingerlatsiviit imminnut unammillertut atornissai imaluunniit ikkunnissai ajornartinnginneraa, internetimut appakaaffissaqartitsinermik aamma ataatsimut ingerlaarnermut aaqqiissutit qanoq ittuunerat qajassuullugu,
2) internetimut appakaaffissaqartitsineq neqeroorutigineqartoq tigussaasumik periarfissaqarnersoq tigusisinnaassuseq pigineqartoq eqqarsaatigalugu,
3) ingerlatsivimmik piginnittup pilersitsinissamut aningaasaliissutinik qanoq annertutigisunik aallarniuteqartariaqarnersoq, pisortat aningaasaliissutigisimasaannut aamma nalorninaatinut tamatumunnga atasunut sanilliullugu,
4) ungasinnerusoq eqqarsaatigalugu killilersugaanngitsumik unammilleqatigiinnerup qularnaarneqarnissaanut pisariaqartitsineq, ingammik nunap iluani atortorissaarutit aningaasarsiornikkut akilersinnaasumik unammilleqatigiinnermik tunngaveqartoq, aamma
5) pisinnaatitaaffiusinnaasut naleqquttut silatuumillu aaqqissuussat nunarsuarmiullu kiffartuussinertigut neqeroorutaat.

Assigiinngisitsinnginnissamut pisussaaffik

  § 23 k.  Assigiinngisitsinnginnissamut pisussaaffittut paasineqassaaq neqeroorutinik annerpaanik tigummisuusut qularnaassagaat pisussaaffiit, pissutsit assigisaanni attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik neqerooruteqartartut allat neqeroorutaasartut assigisaannik niueruteqartut, atugassarititaasut assigisaasa iluanni aamma akit assigisaasa iluanni, aammalu kiffartuussinernik neqerooruteqartassasut atugassarititaasut assigisaasa iluanni, akit pitsaassutillu assigisaannik, kiffartuussinertut neqerooruteqartartumit allamit atortinneqartutulli, taassuma ataaniittutut ingerlatseqatigiiffiutaanut imaluunniit suleqataanut aamma.
  Imm. 2.  Imm. 1-imi pisussaaffimmut aamma ilaapput pisut, kiffartuussinernik niuerfimmi annerpaamik tigummisuusup, imminut neqeroorutigisaani, ingerlatseqatigiiffimmut allequtaasutut pigisaminut suleqatigisaminulluunniit neqeroorutigisaani, nioqqutinit assigiinngitsunit katitigaasuni, aamma pisuni kiffartuussinerit assingusut neqeroorutigineqarfigisaanni pineqartunut atatillugu, imaluunniit nioqqutini assigiinngitsuni immikkuualuttortaasutut ilaaffigisaanni.
  Imm. 3.  Neqerooruteqartartoq annerpaamik tigummisuusoq akimut ersittuutitsinissamik pisussaaffilerneqarsimasuni, neqerooruteqartartoq pisussaaffigiligaalluni nioqqutissanik nutaanik, pioreersunillu allannguiumaarnissanik tamanut paasissutissiissuteqartarnissamik, takuuk § 23 1, taava Atuisartoqarnermut Unammilleqatigiinnermullu Aqutsisoqarfik niuernermut tunngatillugu aalajangiinermini piumasaqarsinnaavoq nioqqut ataatsimoortoq nutaaq imaluunniit allangortinneqartoq, internetimut appakaaffissaqartitsinermik pisussaaffilikkamut ilaasoq, takuuk § 23, j, piffissami aalajangersimasumi suleqatit akornanni avammulluunniit nioqqutigineqassanngitsoq.

Akimut ersittuutitsinissamut pisussaaffik

  § 23 l.  Akimut ersittumik ingerlatsinissamut pisussaaffeqarneq paasineqassaaq neqerooruteqartartut annerpaamik tigummisuusut paasissutissanik aalajangersimasunik tamanut saqqummiussaqartartussaanerattut.
  Imm. 2.  Neqerooruteqartartoq annerpaamik tigummisuusoq assigiingisitsinnginnissamik pisussaaffigiligaasimappat, takuuk § 23 k, Atuisartoqarnermut Unammilleqatigiinnermullu Aqutsisoqarfiup neqerooruteqartartoq peqqusinnavaa neqeroorummik nalinginnaasumik taaneqartumik tamanut saqqummiinissamik, naammaginartumik qilertaanngitsumik attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut allat ingerlatsivinnik internetimut appakaaffissaqartitsinermut kissaatigineqartumut pisariaqanngitsunik akiliisariaqannginnissaannik qularnaarnissaanut, tamanullu saqqummiussami nalunaarsorneqarsimassallutik kiffartuussissutit ataasiakkaat, taakkununngalu tunngatillugu atugassarititaasut piumasaqaatillu, tamatumani aamma akigititat.
  Imm. 3.  Neqerooruteqartartoq annerpaamik tigumminnittoq pisussaaffilerneqarsimappat § 23 j, imm. 1, nr. 1-imi pineqartutut, atuisut atassutaannit qilertaanngitsut atorlugit internetimut appakaaffissaqartitsilerluni, tamanna pillugu neqeroorut nalinginnaasoq kikkunnut tamanut saqqummiunneqassaaq.
  Imm. 4.  Neqerooruteqartartut annerpaamik tigummisaqartut neqeroorutiminnik nalinginnaasunik tamanut saqqummiussisarnissamik pisussaaffiligaasut imm. 2-mi aamma 3-mi nalunaarneqartutut, kingusinnerpaamik tamanut saqqummiussinermut atatillugu neqeroorut nalinginnaasoq Atuisartoqarnermut Unammilleqatigiinnermullu Aqutsisoqarfimmut nassiutissavaa.
  Imm. 5.  Neqeroorut nalinginnaasoq minnerpaamik pissutsinut niuerfimmi aalajangiinerni taaneqartunik imaqassaaq, tak. § 23 i.

Naatsorsuutini immikkoortitsisarnissamut pisussaaffik

  § 23 m.  Naatsorsuutitsigut immikkoortukkaartumik aaqqissuussinissamut pisussaaffeqarneq paasineqassaaq neqerooruteqartartut annerpaamik tigumminnittuusut internetimut appakaaffissaqartitsinermut tunngatillugu suliat aalajangersimasut immikkut naatsorsuusiornissai pisussaaffigigaat.
  Imm. 2.  Nipangiussisussaatitaanermik malittarisassat, pisortani sulianik ingerlatsisarnermut inatsit aamma inummut tunngasunik paasissutissanut inatsit unioqqutinnagit Atuisartoqarnermut Unammilleqatigiinnermullu Aqutsisoqarfik naatsorsuutinut tunngasumik paasissutissat, tamatumanilu aamma isertitat, tamanut takusassiarisinnaavai.

Akinik nakkutilliinermut pisussaaffik

  § 23 n.  Akinik nakkutillisussaanermik pisussaaffittut paasineqassaaq pisussaaffik neqerooruteqartartut annerpaamik tigumminnittuusut akinik aalajangersaasarnissamut piumasaqaatinik naammassinnittassasut, § 23 i, imm. 1 naapertorlugu niuerfimmut tunngatillugu aalajangigaq tunngavigalugu.
  Imm. 2.  Pisussaaffik imm. 1-imi eqqaaneqartutut ittoq atortussanngortinneqarsinnaavoq niuerfiusunik misissuinerup ersersippagu neqerooruteqartartoq unammillernerup amigarneranik pissuteqartumik annerpaamik tigummisuusup akigititani piviusorsiunngitsumik qaffasissusillit atortiinnarsinnaagai, imaluunniit atuisartunut akornusiisumik akigititanik ”qerititsisimaguni”.
  Imm. 3.  Piumasaqaatinik aaqqissuussisarnerni imm. 1 naapertorlugu, neqerooruteqartartup pisussaaffeqartup aningaasaliissutai isiginiarneqassapput, naammaginartumillu aningaasaliissutaanik erniortitsisoqarnissaa akuersaarneqassalluni, aningaasaliinermi nalorninaatit ilaasut isiginiarlugit.
  Imm. 4.  Pisussaaffiliinermi imm. 1-imi eqqaaneqartutut ittuni qularnaarneqassaaq, aningaasartuutit matussusernissaannut isiginiagassat periaatsilluunniit akit aalajangersarnissaannut atorneqarsinnaasut naammassisaqarluarnissamik siunnerfeqassasut, aamma attanneqarsinnaasumik unammillertoqarnissaanik pilersitsissasut, atuisunullu amerlanerusunik iluaqutissarsisitsissasut.
  Imm. 5.  Elektroniskiusumik attaveqaqatigiissutit ataatsikkut aqqutinut kiffartuussinernut arlaqarnerusunut atorneqarpata, immikkoortukkaartumik isigalugit tamarmik ataasiakkaarlutik elektroniskiusumik attaveqaqatigiissutinut aningaasartuutaasunik taakkualuunniit ilaannik  matussusiisussatut, taava Atuisartoqarnermut Unammilleqatigiinnermullu Aqutsisoqarfiup nioqqutit internetimut appakaaffissaqartitsissutaasut akissaannik aalajangiisarnermi, arlariinnit atorneqaraangata aningaasartuutaasut naapertuuttumik agguarneqartarnissaat isumagisassavaa, atorneqarneranut attuumassuteqartuni, nioqqutinik internetimut appakaaffissaqartitsissutaasunik neqerooruteqartartut akornanni.
  Imm. 6.  Neqerooruteqartartoq annerpaamik tigummisuusoq pisussaaffiligaappat akinik nakkutilliinissamut, takuuk imm. 1, neqerooruteqartartoq tamatumunnga atatillugu pisussaaffilerneqarsinnaavoq aningaasartuutaasunik naatsorsuusiortarnermik atuinissaanik, akinik nakkutiginninnermut tapertatut. Tamatumunngalu atatillugu piumasaqaateqartoqarsinnaavoq neqerooruteqartartup aningaasartuutissanut naatsorsuusiortarneq atorneqartoq allaaserissagaa, tassanilu minnerpaatut aningaasartuutinik immikkoortut pingaarnerit arlariit aningaasartuutinut katersuiffiusut ersersinneqassasut, aamma aningaasartuutit agguarneqarneranni malittarisassat tunngaviusut, kikkunnit tamanit atorneqarsinnaalersillugit.
  Imm. 7.  Neqerooruteqartartoq annerpaamik tigummisuusoq neqerooruteqartartumut atasuunngitsumik pingajuusumik nakkutilliisitsissaaq aningaasartuutaasunut naatsorsuusiat imm. 6 naapertorlugu suliarineqarsimasut, pisussaaffiliussaasimasut naapertorlugit suliaasut, taakkualu naapertuunnerat pillugu oqaaseqaateqassalluni. Atuisartoqarnermut Unammilleqatigiinnermullu Aqutsisoqarfiup naapertuuttuunerinut uppernarsaatit ukiumoortumik tamanut takusassiarisassavai.
  Imm. 8.  Atuisartoqarnermut Unammilleqatigiinnermullu Aqutsisoqarfiup niuerfimmi aalajangiinermi tak.  § 23 i ersarinnerusunik maleruagassiussavai akinik nakkutilliinermi aaqqissuussinerit periaaserineqartussat qanoq ittut atorneqassasut.

Aaqqissuussamik immikkoortitseqqanissamut pisussaaffik

  § 23 o.  Aaqqissuussamik immikkoortitsinertut paasineqassaaq neqerooruteqartartoq annerpaamik tigummisuusoq nioqqutissiornermilu imaluunniit agguaassisarfinni assigiinngitsut iluanni isumaginnittuusoq, niuerfiusumi nioqqutit internetimut appakaaffissaqartitsissutaasut tulluartut amerlasuukkuutaarlugit tuniniarnerannut atatillugu ingerlatsivimmut arlaannaannulluunniit attuumassuteqanngitsumut isumagisassanngortissagaa.
  Imm. 2.  Atuisartoqarnermut Unammilleqatigiinnermullu Aqutsisoqarfik taamaallaat immikkut ittutigut neqerooruteqartartut annerpaamik tigumminnittuusunut suliat immikkoortisimaneqarnissaannik pisussaaffiliisinnaavoq, imaappat:
1) Atuisartoqarnermut Unammilleqatigiinnermullu Aqutsisoqarfiup nalilersuinermut atatillugu, takuuk § 23, g, paasippagu nioqqutit internetimut appakaaffissaqartitsissutaasut tulluartut amerlasuukkuutaarlugit tuniniarnerannut atatillugu pingaaruteqartunik ataavartunillu unammilleqatigiinnermi ajornartorsiuteqartoq imaluunniit niuerfimmi ajutoortoqartoq, aamma
2) Atuisartoqarnermut Unammilleqatigiinnermullu Aqutsisoqarfiup nalilerpagu pisussaaffiit § 23 i, imm. 2, nr. 1-5 naapertorlugit tunniunneqarsimasut unammilleqatigiinnermik naammaginartumik pilersitsisimanngitsut.
  Imm. 3.  Ingerlatsinerit immikkoortisimaneqarnissaannut pisussaaffik makkuninnga imaqarsinnaavoq:
1) Immikkoortortoqarfinnik naleqquttunik ingerlatsivittut namminersortunngortillugit immikkoortitsineq.
2) Ingerlatsiviup ingerlataanik aamma nioqqutaanik imaluunniit kiffartuussinerinik ingerlatsivimmit tassannga isumagineqartussanik immikkoortitsineq.
3) Tigussaasumik sulisunik aamma pisortanik sulisut pisortallu sinneriniit immikkoortitsineq.
4) Ingerlatap iluani nakkutilliissutinik aaqqissuussanik pilersitsineq, ingerlatseqatigiiffiup immikkoortitsisumik ingerlatsinnginnissaanut anguniagaasunik isumaginnittussanik.
5) Aaqqissuussaanikkut iliuusissanik pilersitsineq, ingerlatsivimmi immikkoortitami sulisuusut pituttorsimannginníssaannik qularnaarisussamik, aaqqissuussaanerlu kajujuummisitsisussaq tassunga tulluarsagaq.
6) Pisussaaffiit naammassineqarnissaannut qularnaarisussanik illup iluani atugassamik ilitsersuusiorneq.
7) Ingerlatsinerit akimut ersittuunissaannik qularnaarisumik illup iluani atugassamik ilitsersuusiorneq, minnerunngitsumik soqutiginnitsinut allanut atatillugu.

Nakkutilliineq il.il.

  § 23 p.  Atuisartoqarnermut Unammilleqatigiinnermullu Aqutsisoqarfik nakkutilliisuuvoq malittarisassat kapitalimi uani pineqartut eqqortinneqarnissaannut, aamma malittarisassat kapitali una naapertorlugu suliaasut eqqortinneqartarnissaannut.

Internetimut appakaaffissaqartitsinissamik noqqaassutit naleqquttut aamma peqatigiilluni ataatsimut atuisitsisinnaatitsineq

  § 23 q.  Atuisartoqarnermut Unammilleqatigiinnermullu Aqutsisoqarfik aalajangiisinnaavoq pisumi aalajangersimasumi naleqquttumik internetimut appakaaffissaqartitsinissamik imaluunniit peqatigiilluni ataatsimut atuisitsisinnaatitsinissamik imaluunniit atuuttup allanngortinnissaanut noqqaasoqarnersoq pillugu, § 23 a, imm. 2 imaluunniit § 23 i naapertorlugu.
  Imm. 2.  Qinnuteqaat attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartumit tunniunneqarsimassaaq, § 23 b, imm. 2-mi pineqartuni piumasaqarsinnaasumit imaluunniit ilaasumit.
  Imm. 3.  Atuisartoqarnermut Unammilleqatigiinnermullu Aqutsisoqarfiup imm. 1 tunngavigalugu aalajangiineri sapinngisamik sukkanerpaamik pisassapput, sapinngisamillu kingusinnerpaamik qaammatit sisamat qaangiunneranni, attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartup suliassamik Atuisartoqarnermut Unammilleqatigiinnermullu Aqutsisoqarfimmut suliassanngortitsineraniit, imaluunniit suliap allatigut akerleriissutaasunik suliaqartarnermut imm. 4 naapertorlugu suliassanngortinneqarneraniit.
  Imm. 4.  Atuisartoqarnermut Unammilleqatigiinnermullu Aqutsisoqarfik imm. 1 naapertorlugu aalajangiinissamut taarsiullugu aalajangersinnaavoq internetimut appakaaffissaqartitsinissamik aamma peqatigiilluni ataatsimut atuisitsisinnaatitsinissamik isumaqatigiissuteqarnissamut imaluunniit allannguinissamut naleqquttumik noqqaassuteqarnersoq pillugit pisuni aalajangersimasuni suliat, allatigut akerleriissutaasut suliarineqartarnerinut malittarisassat naapertorlugit suliassanngortinneqassasoq, nalilerneqarpat akerleriissutaasup aaqqiissutissarsinissaanut tamanna naleqqunnerusoq. Naalakkersuisut akerleriissutaasut suliarineqartarneri pillugit ersarinnersunik malittarisassiussapput.
  Imm. 5.  Suliami imm. 1-imi ilaasumi imm. 4-lu naapertorlugu akerleriissutaasut suliarineqartarnerannut malittarisassat naapertorlugit suliassanngortinneqarsimasumi attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut ilaat ataatsip peqataasup noqqaassutigippagu Atuisartoqarnermut Unammilleqatigiinnermullu Aqutsisoqarfiup imm. 1 naapertorlugu suliaq aalajangiiffigissavaa.

Aalajangiigallarnerit il.il.

  § 23 r.  Atuisartoqarnermut Unammilleqatigiinnermullu Aqutsisoqarfik kapitali una imaluunniit malittarisassiat taanna naapertorlugu suliamik ingerlatsinermini paasissutissanik atortussanilluunniit piumasarisimasaminik tigusinngikkuni, takuuk § 30, taava paasissutissat pigineqartut tunngavigalugit aalajangiisinnaavoq.
  Imm. 2.  Atuisartoqarnermut Unammilleqatigiinnermullu Aqutsisoqarfik suliamik attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut akornanni internetimut appakaaffissaqartitsinissaq aamma peqatigiilluni ataatsimut atuisitsisinnaatitsinissaq pillugu ingerlatsinerminut atatillugu suliami akuusut susassaqartut arlaanniit qinnuteqartoqarnera tunngavigalugu aalajangiiffigisinnaavaa:
1) internetimut appakaaffissaqartitsinissaq imaluunniit peqatigiilluni ataatsimut atuisitsisinnaatitsinissaq aallartinneqarallassasoq, ingerlanneqaannassasoq imaluunniit aallarteqqinneqassasoq, kiisalu
2) atugassarititaagallartussanik aamma akiusussanik aalajangiilluni.
  Imm. 3.  Atuisartoqarnermut Unammilleqatigiinnermullu Aqutsisoqarfiup imm. 2 naapertorlugu aalajangiigallarneq allanngortissinnaavaa.
  Imm. 4.  Inaarutaasumik isumaqatigiissutaasussamik isumaqatigiissuteqartoqarpat, aalajangiigallarneq atorunnaassaaq, isumaqatigiissutip atortuulerfianiit.
  Imm. 5.  Inaarutaasumik aalangiisoqarpat, akiusut imm. 2 aamma 3 naapertorlugit aalajangerneqarsimasut iluarsiivigineqassapput, taamaasilluni attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartut ima atugassaqartinneqalissallutik inaarutaasumik aalajangiineq aalajangiigallarnerup atortuulerneraniit atortinneqalissalluni. Akiusunik kingumoortumik iluarsiissuteqarnermi erniatigut annaasat annikinngitsut ilanngullugit isiginiarneqarsinnaapput.
  Imm. 6.  Attaveqaqatigiissutinik imaluunniit kiffartuussissutinik elektroniskiusunik ataqatigiissaakkanik kikkunnut tamanut neqerooruteqartartoq uppernarsaatissanik naammattunik saqqummiisimanngippat, taamaattumillu aalajangiinerugallartumik aalajangiisoqartariaqarsimappat, takuuk imm. 2, imaluunniit pissutsit atuuttut tunngavigalugit aalajangiisoqarsimappat, takuuk, imm. 1, imm. 5 apeqqutaatinnagu akiusunik kingumoortumik aaqqiissuteqartoqassaaq, kingumoortumik aaqqiissuteqarneq suliaqartuni pingajuusumut iluaqutissaappat”.

2.  § 30-mi imm. 3-nngorlugu ikkunneqassaaq:
”  Imm. 3.  Imm. 1-imi paasissutissat taaneqartut Atuisartoqarnermut Unammilleqatigiinnermullu Aqutsisoqarfiup Sverigemi, Norgemi, Islandimi, Finlandimi, Savalimmiuni Danmarkimilu unammilleqatigiinnermik oqartussanut ikiuinermini atornissai aamma piumasarineqarsinnaapput, oqartussat taakku namminneq nunaminni unammilleqatigiinneq pillugu malittarisassanik atuinissaat siunertaralugu.”

3.  § 31-mi imm. 3-ip kingorna nutaatut ikkunneqassaaq:
”  Imm. 4.  Atuisartoqarnermut Unammilleqatigiinnermullu Aqutsisoqarfik Sverigemi, Norgemi, Islandimi, Finlandimi, Savalimmiuni Danmarkimilu unammilleqatigiinnermik oqartussanut ikiuiniarluni nakkutilliilluni misissuisinnaavoq, oqartussat taakku namminneq nunaminni unammilleqatigiinneq pillugu malittarisassanik atuinissaannut tunngatillugu. Taamatuttaaq § 32-imi malitarisassat atortinneqassapput.”

Imm. 4 imm. 5-inngortinneqassaaq.

4.  § 33 ima oqaasertalerneqassaaq:
”  Politiit Atuisartoqarnermut Unammilleqatigiinnermullu Aqutsisoqarfik § 31, imm. 1-3 aamma § 32, imm. 1-4-mi pisinnaatitsissutit naapertorlugit suliaqarnerani ikiortassavaat.”

5.  § 35, imm. 1 ima oqaasertalerneqassaaq:
”  Unammilleqatigiinnermut Aalajangiisartut aamma Atuisartoqarnermut Unammilleqatigiinnermullu Aqutsisoqarfiup Inatsisartut inatsisaat naapertorlugu aalajangigaat allaffissornikkut oqartussanut allanut ingerlateqqinneqarsinnaanngillat.”

6.  § 38 ima oqaasertalerneqassaaq:
”  Piaarinaatsoorluni imaluunniit mianersuaalliorujussuarluni ukuninnga unioqqutitsisoq akiliisitaasinneqarsinnaavoq:
1) § 6, imm. 1-imik unioqqutitsisoq,
2) piumasamik § 8, imm. 3, imm. 3-at naapertorlugu nalunaarutigineqartumik unioqqutitsisoq imaluunniit naalanngitsoq,
3) § 11, im. 1-imik unioqqutitsisoq,
4) § 12, imm. 1 naapertorlugu peqqussummik unioqqutitsisoq imaluunniit naalanngitsoq,
5) § 13, imm. 1 naapertorlugu inerteqqummik eqqortitsinngitsoq,
6) § 17, imm. 1 naapertorlugu kattunnermik nalunaarutiginninngitsoq,
7) § 19, imm. 2 naapertorlugu kattunnissamut inerteqqusineq eqqortinnagu kattunnermik piviusunngortitsisoq, § 19, imm. 5, imm. 1-at naapertorlugu kattunnissap akuerineqannginnerani piviusunngortinnissaanut inerteqqummik unioqqutitsisoq, § 19, imm. 6, imaluunniit § 21, imm. 1 imaluunniit imm. 3 naapertorlugu piumasamik imaluunniit peqqussummik naalanngitsoq, imaluunniit § 23 naapertorlugu peqqussummik naalanngitsoq,
8) § 23 c-mik unioqqutitsisoq,
9) § 23 i, imm. 2, nr. 2 aamma 3-mi allassimasutut pisussaaffimmik § 23 i, imm. 1 naapertorlugu aalajangerneqarsimasoq naapertorlugu neqerooruteqartartumut pisussaaffiliunneqarsimasumik malinninngitsoq,
10) § 28 naapertorlugu peqqussummik unioqqutitsisoq imaluunniit naalanngitsoq,
11) neriorsuummik § 29, imm. 1 naapertorlugu unioqqutinneqassanngitsumik unioqqutitsisoq imaluunniit naalanngitsoq,
12) § 29, imm. 2 naapertorlugu peqqussummik unioqqutitsisoq imaluunniit naalanngitsoq,
13) § 30 naapertorlugu piumasaqaammik naalanngitsoq, imaluunniit
14) Unammilleqatigiinnermut ataatsimiititaliamut imaluunniit Atuisartoqarnermut Unammilleqatigiinnermullu Aqutsisoqarfimmut paasissutissanik eqqunngitsunik imaluunniit tammartitsisunik tunniussaqartoq imaluunniit suliamut paasissutissarsiorfigisamut paasissutissat pingaartut nipangiunneqarpata.
  Imm. 2.  Imm. 1, nr. 1, isumaqatigiissuteqarnermiit, suliffeqarfiit kattunnerisa imaluunniit sulisaatsit ataatsimut aaqqissuunnerisa akuerineqarneranniit § 8, imm. 1, imaluunniit imm. 4 naapertorlugu Unammilleqatigiinnermut ataatsimiititaliamut nalunaarutigineqarneraniit Unammilleqatigiinnermullu ataatsimiititaliap § 8, imm. 1, imaluunniit imm. 4 naapertorlugu aalajangiinissaata tungaanut atortinneqassanngilaq.
  Imm. 3.  Inatsisartut inatsisaat manna naapertorlugu najoqqutassiani Kalaallit Nunaanni pinerluttulerinermut inatsit naapertorlugu akiliisitsisoqarsinnaavoq.
  Imm. 4.  Inatsisartut inatsisaat imaluunniit Inatsisartut inatsisaat naapertorlugu najoqqutassiani akiliisitsinissamik tunngavissaqartitsippat akiliisitsineq Kalaallit Nunaanni pinerluttulerinermut inatsimmi malittarisassat naapertorlugit inatsisitigut inuttut naatsorsuussamut akiligassanngortinneqarsinnaavoq.
  Imm. 5.  Imm. 1 aamma imm. 3-4 naapertorlugit akiliisitsinerit Landskarsimut nakkartinneqassapput.
  Imm. 6.  Kalaallit Nunaanni pinerluttulerinermut inatsit naapertorlugu pineqaatissiisoqarsinnaavoq § 6, imm. 1-imut akerliusumik unammilleqatigiinneq millisillugu niuernikkut isumaqatigiissuteqartoqarpat, unioqqutitsineq siunertaqartumik pisimappat ingasallunilu, ingammik unioqqutitsinerup annertussusia imaluunniit ajoqusiinerit kingunerisinnaasai peqqutigalugit. Imm. 1 naapertorlugu unammilleqatigiinneq millisillugu niuernikkut isumaqatigiissuteqarneq paasineqassaaq isumaqatigiissut, sulisaatsit ataatsimut aaqqissuunneri imaluunniit suliffeqrfiit akornanni kaaviiaartitaqarfimmi assigiinni makku pillugit akuersineq:
1) akit, iluanaarutit assigisaalluunniit nioqqutit kiffartuussissutilluunniit tunineqarnerannit imaluunniit tuneqqinneqarnerannit pisut,
2) nioqqutissiornerup tunisaqarnerulluunniit killilersorneri,
3) niuerfinnik atuisunilluunniit immikkoortiterineq, imaluunniit
4) neqeroorutinik ataqatigiissaarineq.
  Imm. 7.  § 6, imm. 1-imut akerliusumik pissutsit immikkut sakkortunerusut atorlugit unammilleqatigiinneq millisillugu niuernikkut immikkut ingasaassaamik isumaqatigiissuteqartoq Kalaallit Nunaanni pinerluttulerinermut inatsit naapertorlugu pineqaatissinneqarsinnaavoq. Pissutsinut immikkut sakkortunerusunut ingammik ilaatinneqarpoq unioqqutitsineq annertooq imaluunniit annertuumik ajoqusiinermik kinguneqartitsisinnaasoq.”
  Imm. 8.  Suliffeqarfinnut pineqaatissiissutitut akiliisitsissutit annertussusilernerini uku aallaavigineqasssapput:
1) aningaasaqarnikkut iluanaarutit anguneqarsimasut imaluunniit anguniarneqartut, taakku naatsorsorneqarsinnaappata,
2) unioqqutitsinerup annertussusaa,
3) unioqqutitsinerup sivisussusaa aamma
4) suliffeqarfiup kaaviiaartitai.”

§ 2

Nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaat nr. 17, 20. november 2006-imeersumi imaattunik allannguuteqartitsisoqassaaq:

1.  § 6 atorunnaarsinneqarpoq.

2.  § 11, imm. 2, nr. 5 aamma 6 atorunnaarsinneqarput.

  Nr. 7-9 taamaasillutik tassaalissapput nr. 5-7.

3.  § 15 atortunnaarsinneqarpoq.

§ 3

Inatsisartut inatsisaat atortuulissaaq 30. december 2017.

Namminersorlutik Oqartussat, ulloq 17. november 2017

Kim Kielsen