§ 1

Atuarfik pillugu Inatsisartut inatsisaanni nr. 15, 3. december 2012-imeersumi imaattunik allannguuteqartitsisoqassaaq:

1.  § 18-imi imm. 4-tut ilanngunneqassaaq:
”  Imm. 4.  Kommunalbestyrelsi angajoqqaat isumasioreerlugit aalajangersinnaavoq atuartoq ukiumik atuarfiusumik atuartitaaffigeriikkamini uteqqiilluni atuaqqissasoq, meeqqap ineriartorneranut tunngatillugu aalajangiisuusumik isiginiagassat tamanna pisariaqartippassuk. Assigisaanillu atuartoq pisuni immikkut illuinnartuni ukiumik atuarfiusumik alluisinnaavoq.”

2.  § 25-mi imm. 6 kingornanut immikkoortutut nutaatut ilanngunneqassaaq:
”  Imm. 7.  Atuartut atuartunut angerlarsimaffinniinneri atuartunullu inissianiinneri, tassunga ilanngullugit atuartunut angerlarsimaffiit atuartunullu inissiat illutaannut atortulersornerinullu aamma ilikkagaqarnissamut imarisassaannut minnerpaamik piumasaqaatit, pillugit Naalakkersuisut sukumiinerusunik maleruaqqusaliussapput.”

3.  § 31, imm. 1-imi imatut oqaasertalerneqassaaq:
“Atuartitaasussaatitaaneq aallartissaaq atuarnerup aallartinnerani qaammatisiutit malillugit ukiumi meeqqap 6-inik ukioqalerfiani, taamaatissallunilu atuartup ukiuni qulini ataavartumik atuartinneqareerneratigut, taamaattoq tak. § 18, imm. 4”.

4.  § 36, imm. 3 imatut oqaasertalerneqassaaq:
”  Imm. 3. Naalakkersuisut ilutigitillugu, kommunalbestyrelsip meeqqat atuarfiannik isumaginninnera nukittorsarniarlugu aamma nukinnik atorluaaneq sapinngisamik annertunerpaaq anguniarlugu, ilisimasanik eqiterineq, tamatumani aamma nalilersuinertigut sunniutaasunillu uuttuinertigut aamma ilisimasanik siammarterineq isumagissavaat.”

§ 2

Inatsisartut inatsisaat ulloq 1. januar 2018 atuutilissaaq.

Namminersorlutik Oqartussat, ulloq 13. november 2017

Kim Kielsen