Kapitali 1
Atuuffissaa aamma siunertat

  § 1.  Inatsisartut inatsisaat tikeraat ornittagaannut aamma takornariartitsivinnut Namminersorlutik Oqartussanit Inatsisartut inatsisaat una naapertorlugu pilersinneqartunut atortuuvoq.

  § 2.  Inatsisartut inatsisaat siunertaqarpoq Kalaallit Nunaanni takujuminartut soqutigisaasullu ineriartortitsinerup iluaquteqarnerullu tapersersornissaanik. Inatsisartullu inatsisaat aamma siunertaqarpoq tapersersussallugit siuarsassallugillu paasissutissiisarnerit takornariartitsisarnermilu ingerlatat tusagassiissutigalugillu takusassiissutigineqartarnerat, Kalaallit Nunaanni takujuminartut soqutigisaasullu eqqarsaatigalugit.
  Imm. 2.  Anguniakkat imm. 1-imi pineqartut naammassineqarnissaat pisassaaq Kalaallit Nunaanni kulturip, oqaluttuarisaanerup inuiaqatigiinnilu pissutsit naapertorlugit ingerlatsinikkut.

Kapitali 2
Nassuiaatit

  § 3.  Tikeraat ornittagaattut Inatsisartut inatsisaat una naapertorlugu paasineqassapput qitiusumik ingerlatsiviit Namminersorlutik Oqartussanit pilersinneqarsimasut, takornariartunit pulaarneqarsinnaasut takusarneqarsinnaasulluunniit, aammalu nunatsinnut takornariartunit takujuminartut imaluunniit soqutiginartut.  

  § 4.  Takornariartitsiviit Inatsisartut inatsisaat una naapertorlugu tassaapput illuutit imaluunnit sanaartukkat Namminersorlutik Oqartussanit pilersinneqarsimasut, takornariartunit pulaarneqarsinnaasut takusarneqarsinnaasulluunniit, aammalu nunatsinnut takornariartunit takujuminartut imaluunniit soqutiginartut.

Kapitali 3
Tikeraat ornittagaat aamma takornariartitsiviit

Tikeraat ornittagaat

  § 5.  Naalakkersuisut pilersissinnaavaat ingerlassinnaallugillu Kalaallit Nunaanni tikeraat ornittagaat.
  Imm. 2.  Tikeraat ornittagaat tassanilu ingerlatat ilaatigut tassaasinnaapput paasissutissiisarneq, ingerlatitseqqittarneq aamma saqqummersitsisarneq, nunatsinni takujuminartuutitsinnik imaluunniit takornariat immikkut soqutigisaannik.

Takornariartitsiviit

  § 6.  Naalakkersuisut pilersissinnaavaat ingerlassinnaallugillu Kalaallit Nunaanni takornariartitsiviit.
  Imm. 2.  Takornariartitsivik tassanilu ingerlatat ilaatigut tassaasinnaapput paasissutissiisarneq, ingerlatitseqqittarneq aamma saqqummersitsisarneq takujuminartunut tunngasoq. Takornariartitsivik aamma illutaqarsinnaavoq, sanaartukkanik atortorissaarutinillu avatangiiseqartoq takornarianullu sammititaasoq.

Tikeraat ornittagaannik aamma takornariartitsivinnik pilersitsinerit ingerlatsinerillu aningaasalersorneqarnerat

  § 7.  Naalakkersuisut tikeraat ornittagaannik aamma takornariartitsivinnik pilersitsinernik ingerlatsinernillu aningaasalersuinerat pisassaaq iluanaarutitigut, soorlu isernermut akiliutitigut il.il., kiisalu tunissutitigut, tapersiissutissanut isumaqatigiissutitigut aamma tapiissuti-tigut imaluunniit sullissinertigut aningaasanut inatsit aqqutigalugu aningaasaliiffigineqartutigut.
  Imm. 2.  Tikeraat ornittagaannik aamma takornariartitsivinnik pilersitsinermut ingerlatsinermullu atatillugu illuutinik sanaartortoqarsinnaavoq, isertarfiliortoqarsinnaavoq, sanaartortoqarsinnaavoq, ikaartarfiliortoqarsinnaavoq, takujuminartunut assiaqutinik sanasoqarsinnaalluni il.il. 
  Imm. 3.  Naalakkersuisut ersarinnerusunik atugassarititaasut aalajangersakkat tunngavigalugit pisortanut allanut imaluunniit namminersortunut suleqatissanut isumaqatigiissute-qarsinnaapput, tamakkiisumik ilaannakuusumilluunniit pilersitsinermut atatillugu ani-ngaasalersuinissamut, imaluunniit tikeraat ornittagaannik takornariartitsivimmilluunniit ingerlatsinissamut atatillugu. 
  Imm. 4.  Naalakkersuisut ersarinnerusumik atugassarititaasunik aalajangersaaneq tunngavigalugu isumaqatigiissuteqarsinnaapput, pisortanut allanut imaluunniit namminersortunut suleqatissanut attartortitsinissaq imaluunniit sillimmasiinissaq pillugu, tikeraat ornittagaannik pilersitsinermut imaluunniit tikeraat ornittagaannik takornariartitsivimmilluunniit ingerlatsinissamut aningaasalersorneqarnerannut atatillugu.

Aktiaateqarluni ingerlatseqatigiiffiit Namminersorlutik Oqartussanit pigineqartut
imaluunniit pisortat suliffeqarfii imminnut ingerlattut isumaqatigiissuteqaqatigisat

  § 8.  Naalakkersuisut §§-ini 5 aamma 6-imi qitiusumik ingerlatsivinnut sanaartukkanullu pineqartunut piginnittuuneq Namminersorlutik Oqartussat aktiaateqarluni ingerlatseqatigiiffiutaannut, suliffeqarfimmut imminut ingerlattumut, pisortat suliffeqarfiinut, ingerlatsivimmut imminut pigisumut assigisaannulluunniit tamakkiisumik imaluunniit ilaannakortumik tunniussinnaavaat.
  Imm. 2.  Naalakkersuisut §§-ini 5 aamma 6-imi eqqaaneqartunik qitiusumik ingerlatsivinnik sanaartukkanillu ingerlatsineq Namminersorlutik Oqartussat aktiaateqarluni ingerlatseqatigiiffiutaannut, pisortat suliffeqarfiinut, ingerlatseqatigiiffimmut imminut ingerlattumut, ingerlatsivimmut imminut pigisumut assigisaanulluunniit tamakkiisumik ilaannakortumilluunniit tunniussinnaavaat. 

Kapitali 4
Oqartussat sulianik ingerlatsinerat

Aalajangersaaneq

  § 9.  Naalakkersuisut tikeraat ornittagaat aamma takornariartitsiviit Inatsisartut inatsisaanni uani ilaasut pillugit aalajangersaassapput, tamatumani aamma taakku pilersinneqartarnerat, ingerlanneqartarnerat, atorneqarnerat aamma pissutsit allat tamatumunnga atatillugu pillugit.

Kapitali 5
Atortuulersitsineq

  § 10.  Inatsisartut inatsisaat 1. januar 2017 atuutilerpoq.

Namminersorlutik Oqartussat, ulloq 28. november 2016

Kim Kielsen