§ 1

Nioqqutissanik eqqussuinermi akitsuutit pillugit Inatsisartut inatsisaat nr. 19, 30. oktober 1992-imeersumi, kingullermik Inatsisartut inatsisaat nr. 21, 23. november 2015-imi allanngorneqartumi, ima allannguisoqassaaq:

1.      § 1, imm. 1, nr. 4, ima oqaasertalerneqassaaq:
”Nr. 4.
Mineralvandit, sodavandit, limonadet aamma imigassat kulsyrimik akullit, ethanolimik akoqanngitsut, nr. 4a-mut 4b-mullu ilaanngippata, literimut 7 kr. 50 øre”.

2.      § 1, imm. 1, nr. 4, litra a, kingornagut ilanngunneqarpoq:
”Nr. 4b.  
Imigassat ethanolimik akoqanngitsut, koffeinimik literimut 149 mg-imit annerusumik akullit, literimut 15 kr. 00 øre”.

3.      § 1, imm. 1, nr. 4, litra b-p, nutaap kingornagut ilanngunneqarpoq:
”Nr. 4c.
Imeq literimut 1 kr. 50 øre”.

§ 2

Inatsisartut inatsisaat 1. juni 2016-imi atuutilissaaq.
  Imm. 2.  Nioqqutissanik eqqussuinermi akitsuutit pillugit Inatsisartut inatsisaata allanngortinneqarneranik Inatsisartut inatsisaat nr. 21, 23. november 2015-imeersumi § 1, imm. 1, nr. 2, 9, litra c aamma d, aamma nr. 27-imi nioqqutissat taaneqartut eqqunneqarnerinut akitsuut, piffissami 20. august-imit 23. november 2015-imut akitsuuteqartussaasimappata, taakkuninnga eqqussinermi akitsuut atuutissanngilaq.
  Imm. 3.  Imm. 2-mi taaneqartut akitsuuteqartussaasut akiliisimappata, akileraartarnermut ingerlatsiviup akitsuutit akilerneqarsimasut utertissavai. Akileraartarnermut ingerlatsiviup utertitsinissamut piumasarisinnaavaa, akitsuuteqartussaasup akitsuutinik akiliisimaneranut naatsorsuutit akiliutillu uppernarsaataanik takutitsinissaa. Aningaasat utertinneqartut ernialersorneqassanngillat.

Namminersorlutik Oqartussat, ulloq 25. maj 2016

Kim Kielsen