Eqqissisimatitsisarneq aamma allatigut kulturikkut eriagisassanik kulturikkut kingornussatut illersuineq pillugu Inatsisartut Inatsisaanni nr. 11, 19. maj 2010-meersumi § 24, imm. 5 aamma § 32 naapertorlugu, aamma Nunatta Katersugaasiviata Allagaateqarfiatalu tamanna pillugu inassuteqarneratigut aalajangersarneqarpoq:

 

 

Sumiiffimmik killiliineq

 

  § 1.  Sumiiffiit ilanngussaq 1-imi nunap assingani nalunaarsukkami kulturikkut oqaluttuarisaanermi naleqarnera tunngavigalugu kulturikkut oqaluttuarisaanertut isigineqarpoq, taassumalu pigiinnarnissaa illersorneqarnissaalu pingaaruteqarluni, taamaammallu sumiiffik allatigut kulturikkut eriagisassanik kingornussanut illersugassanut ilaavoq. Kulturikkut oqaluttuarisaanermi sumiiffimmik sumiiffinnut immikkoortunut tallimanut agguagaasoq nunap assingani koordinatinilu takuneqarsinnaavoq, tak. imm. 2-6.
  Imm. 2.  Sumiiffiup immikkoortua 1 killiligaavoq Qassiarsuup nunaminertaanut. Sumiiffik ilanngussaq 2-mi takuneqarsinnaavoq.
  Imm. 3.  Sumiiffiup immikkoortua 2 killiligaavoq Igalikup nunaminertaanut. Sumiiffimmik ilanngussaq 3-mi takuneqarsinnaavoq.
  Imm. 4.  Sumiiffiup immikkoortua 3 killiligaavoq Sissarluttup nunaminertaanut. Sumiiffik ilanngussaq 4-mi takuneqarsinnaavoq.
  Imm. 5.  Sumiiffiup immikkoortua 4 killiligaavoq Tasikuluullip nunaminertaanut. Sumiiffik ilanngussaq 5-imi takuneqarsinnaavoq.
  Imm. 6.  Sumiiffiup immikkoortua 5 killiligaavoq Qaqortukulooq-Upernaviarsuup nunaminertaanut. Sumiiffik ilanngussaq 6-imi takuneqarsinnaavoq.

Tikinneqarsinnaaneranut tamanut tunngasut atuinerlu

 

  § 2.  Kikkulluunniit nalunaarummi uani killiliinerit kingunerisai atorlugit kulturikkut oqaluttuarisaanikkut sumiiffiit tikissinnaavaat, tak. §§ 3-9.

 

  § 3.  Kulturikkut oqaluttuarisaanermi sumiiffiup ilaata tikinneqarsinnaaneranik annertunerusumik aalajangiinermi akiliummik akiliinissaq piumasaqaataasinnaavoq. Akiliuteqartitsisoqarsinnaassanngilaq inunnut, pisortanut, suliffeqarfinnut il.il. inuussutissarsiutitik naapertorlugit imaluunniit inatsisit allat naapertorlugit sumiiffinnik tikitsisinnaasussaasunut.
  Imm. 2.  Akiliut kiap pissaneraa akiliutillu annertussusia Kultureqarnermut Naalakkersuisoqarfiup aalajangissavaa.
  Imm. 3.  Akiliummi siunertaavoq sanaartukkanik sumiiffiit akiliuteqarfiusut tikinneqarsinnaanerat siunertaralugu sananeqarsimasunik aserfallatsaaliuinermut, ingerlatsinermut pilersitsinermullu tunngasut matussuserneqarnissaat.  

 

  § 4.  Kulturikkut oqaluttuarisaanermi sumiiffimmi sumiiffiit ilaannik sumiiffilluunniit ataatsimut isigalugu kusanaallisaataasinnaasunik aseruisinnaasunilluunniit ingerlatsisoqaqqusaanngilaq. Kalaallit Nunaata Katersugaasiviata Allagaateqarfiatalu immikkut ittumik pissutissaqartillugu tamatuminnga saneqqutsinissamut akuersisinnaavoq.
  Imm. 2.  Kulturikkut oqaluttuarisaanermi sumiiffimmut tikitsinerit atuinerillu itsarsuarmit kingornussat nunamiittut illullu eqqissisimatitaanerat pillugu aammalu kulturikkut oqaluttuarisaanermi sumiiffinni allatigut kulturikkut eriagisassanik kingornussanik allanik eqqissisimatitsineq illersuinerlu pillugit malittarisassat ataqqillugit pissapput.
  Imm. 3.  Kulturikkut oqaluttuarisaanermi sumiiffimmik tikitsinerit atuinerillu aqutsinermi pilersaarut sumiiffimmut suliarineqarnikoq ataqqillugu pissapput, tak. § 9.

Mingutsitsineq

 

  § 5.  Imermik, sikumik, qaqqanik nunamillu mingutsitsinissaq imaluunniit eqqagassanik sunilluunniit qimatsinissaq inerteqqutaavoq.
  Imm. 2.  Piffissap ilaanni atorneqartarnerannik tunngavilersuutissaqanngippat pequtinik, atortunik assigisaannilluunniit nunami qimatsinissaq inerteqqutaavoq, tassunga ilanngullugit inuussutissarsiornermi atortut il.il.

Naasoqassuseq nunalu

 

  § 6.  Inuussutissarsiornermut, savaateqarnermut allatullu nunalerinermut atatillugu suli ingerlatsisoqarsinnaavoq, kisiannili nalunaarummi siunertaq, tak. § 4, sumiiffimmillu atuineq pillugu malittarisassat tamanut tunngasut naapertorlugit ingerlanneqassallutik.
  Imm. 2.  Imm. 1-imi pisut pinnagit naasoqarnermik ajoqusiinissaq nunamilluunniit allannguinissat inerteqqutaapput, taamaattoq tak. imm. 3.
  Imm. 3.  Naasunik taamaallaat katersuisoqarsinnaavoq tamanna imatut pippat sumiiffimmi naasoqassuseq ajoquserneqanngippat.

Tuperneq ikumatitsinerlu

 

  § 7.  Tupernerit ikumatitsinerillu piffissani sivikitsuni taamaallaat pisinnaapput aammalu sumiiffimmi naasoqassuseq mianeralugu pissallutik.
  Imm. 2.  Nunaminertat tamatigut tuperfigineqarsinnaasut Nunatta Katersugaasivia Allagaateqarfialu tusarniareerlugu Kommune Kujallermi Kommunalbestyrelsimit toqqarneqarsinnaapput.

Kisarneq, nunamut ikaarneq angallannermillu piffissat ilaanni killilersuinerit

 

  § 8.  Kommune Kujallermi kommunalbestyrelsi uku pillugit najoqqutassanik aalajangersaasinnaavoq:
1)  Kulturikkut oqaluttuarisaanermi sumiiffiup ilaanni kisarneq angallatinillu uninngatitsineq.  
2)  Kulturikkut oqaluttuarisaanermi sumiiffiup ilaat pillugit nunamut ikaarneq, taamaattoq tak. § 3.
3)  Kulturikkut oqaluttuarisaanermi sumiiffiup ilaanni angallannermik piffissat ilaanni killilersuinerit.
  Imm. 2.  Najoqqutassanik aalajangersaanerni isiginiarneqassaaq inuit, pisortat, suliffeqarfiit il.il. inuussutissarsiutitik naapertorlugit, imaluunniit inatsisinik allanik tunngavilimmik sumiiffimmut isersinnaasussat pisariaqanngitsunik isersinnaanerminnut killilersuiffigineqannginnissaat.

Ingerlatsineq nakkutilliinerlu

 

  § 9.  Nunatta Katersugaasivia Allagaateqarfialu Kommune Kujallermi kommunalbestyrelsi isumasioqatigalugu soqutigisaqartullu suliamut attuumassuteqartut peqataatereerlugit kulturikkut oqaluttuarisaanermi sumiiffimmik aqutsinermut pilersaarusiussaaq. Aqutsinermut pilersaarusiaq nutarterneqartassaaq.
  Imm. 2.  Aqutsinermut pilersaarut aqutsinermi atortuuvoq kulturikkut oqaluttuarisaanermi sumiiffimmi kulturikkut oqaluttuarisaanermi naleqartut qulakkeerniarlugit aqutsiveqarfinnit atorneqartussaq tassungalu peqatigitillugu kikkulluunniit sumiiffimmik tikitsisinnaassallutik taassuminngalu atuisinnaassallutik ineriartortitsisinnaassallutillu.
  Imm. 3.  Aqutsinermut pilersaarut ukuninnga allaaserinninnermik minnerpaamik imaqassaaq:
1)  sumiiffimmik ataatsimut isigalugu taassumalu ilaanik aqutsinermi kina akisussaasuunersoq,
2)  inatsit sorleq kulturikkut oqaluttuarisaanermi killilersuinersoq,
3)  kulturikkut oqaluttuarisaanermi naleqartut suut kulturikkut oqaluttuarisaanermi sumiiffimmik illersuinermi tunngaviunersut,
4)  ajornartorsiutit annertunerit suut kulturikkut oqaluttuarisaanermi sumiiffimmut kinguneqarnersut kinguneqarsinnaanersulluunniit (kulturikkut oqaluttuarisaanermi naleqartunik navianartorsiortitsisinnaanersut),
5)  sumiiffimmi inuussutissarsiornermik ineriartortitsinissamik suut kissaataanersut,
6)  kulturikkut oqaluttuarisaanermi naleqartunik navianartorsiortitsisut pinngitsoorniarlugit inuussutissarsiornermillu ineriartortitsinissamik kissaatigineqartut ingerlannissaannut aqutsinermi iliuutsit suut aallartinneqarsimanersut aallartinneqarniarnersulluunniit,
7)  aqutsinermut pilersaarut piviusunngortinniarlugu aningaasatigut inunnillu isumalluutit suut immikkoortinneqarnersut immikkoortinniarneqarnersulluunniit aamma
8)  ingerlaavartumik nutarterisarnissaq siunertaralugu aqutsinermut pilersaarummik piviusunngortitsinermik qanoq misissuisoqartassanersoq nalilersuisoqartassanersorlu.

 

  § 10.  Kalaallit Nunaata Katersugaasiviata Allagaateqarfiatalu Kommune Kujallermi kommunalbestyrelse suleqatigalugu nakkutigissavaat nalunaarummi matumani aalajangersakkat malinneqarnissaat, taamaattoq tak. imm. 2.
  Imm. 2.  Kommune Kujallermi kommunalbestyrelsip nakkutigissavaa § 8 naapertorlugu kommunalbestyrelsip najoqqutassatut aalajangersagaasa malinneqarnissaat. 

Pineqaatissiissutit

 

  § 11.  §§ 4-6-imut aamma § 7. imm. 1 uteqattaartumik annertuumillu unioqqutitsinerit akiliisitsinermik kinguneqarsinnaapput.
  Imm. 2.  § 8 malillugu najoqqutassianik aalajangersarneqartunik uteqattaartumik annertuumillu unioqqutitsinerit akiliisitsinermik kinguneqarsinnaapput.
  Imm. 3.  Ingerlatsivik, tamakkiisumik ilaannakortumilluunniit naalagaaffimmit, Kalaallit Nunaanni Namminersorlutik Oqartussanit, kommunimit imaluunniit kommunimi ataatsimooqatigiiffimmit kommunalbestyrelsit nunaqarfinnilu aqutsisut il.il. pillugit Inatsisartut inatsisaanni ilaasumit pigineqartoq, aktieselskabi, piginneqatigiiffiit (anpartseskabi aamma andelselskabi) assigisaaluunniit unioqqutitsisuuppat suliffeqarfiit ilaallu ilanngullugit pinerluttulerinermi akisussaatinneqarsinnaapput. Taamatuttaaq tamanna atuuppoq Kalaallit Nunaanni Namminersorlutik Oqartussat, kommuni imaluunniit kommunip ataatsimoorfia kommunalbestyrelsit nunaqarfinnilu aqutsisut il.il. pillugit Inatsisartut inatsisaanni ilaasoq unioqqutitsisuuppata.

Atuutilersitsineq

 

  § 12.  Nalunaarut ulloq 1. august 2016 atuutilerpoq.

 

 

Namminersorlutik Oqartussat, ulloq 5. Juuli 2016

 

 

Nivi Olsen

/

Mikael Kristensen