Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaanni nr. 10, 19. maj 2010-meersumi, Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaatigut nr. 3, 4. juni 2012-meersutigut allanngortinneqartumi § 4, imm. 2, § 6, imm. 1, § 7, imm. 5, § 11, imm. 1 aamma § 60 naapertorlugit aalajangersarneqarpoq:

 

Inersimasunik ilinniartitsineq

 

  § 1.  Inuussutissarsiutitigut tunngaviusumik ilinniartitsinerni, qitiusumik ilinniartitaanermi ataatsimiititaliap, Ilinniartitaanermut Naalakkersuisoqarfimmit akuersissutigineqareernermini aalajangersinnaavaa, inunnut immikkut ilinniagaqarnissamik suliffeqalernissamilluunniit naatsorsuutigineqartunut inersimasunik ilinniartitsinernik pilersitsisoqassasoq.

Ilinniartussanik tigusineq

 

  § 2.  Qinnuteqartoq 30-nik ukioqalereersimassaaq attuumassuteqartumillu inuussutissarsiornermik misilittagaqassalluni amerlaqatigalugit ikinnerpaamik ukiuni pingasuni ulloq naallugu sulisarsimasutut imaluunniit allanut inuussutissarsiornermik misilittagaqassalluni amerlaqatigalugit ikinnerpaamik ukiuni sisamani ulloq naallugu sulisuusarsimaneq. Inersimasunik ilinniartitsinermik aallartitsisinnaajumalluni qinnuteqartoq pineqartumi ingerlatseqatigiiffimmik akuerisaasumik ilinniartuunissamut isumaqatigiissuteqarsimassaaq.
  Imm. 2.  Tiguneqarnissami naatsorsuutigineqarpoq aamma ilinniartutut isumaqatigiissuteqarnermi, qinnuteqartoq ilinniarfiup naliliinera naapertorlugu ilinniarfimmi ilinniarnerminik ingerlatsisinnaasutut piffissami ilinniarfiusussatut aalajangiussap iluani, immaqa ilinniartitsinermit immikkoortut ilaannik peersisoqareernerani.
  Imm. 3.  Qitiusumik ilinniartitaanermi ataatsimiititaliaq imaluunniit inuussutissarsiutinut ilinniarfiup siulersuisui pisuni immikkut ittuni annikinnerusunik ukioqarnissamut aamma suliffeqarsimanissamut piumasaqaammit imm. 1-imiittumit immikkut akuersissuteqarsinnaapput.

 

  § 3.  Qinnuteqartunik tigusisarneq inuussutissarsiornermik imaluunniit inuussutissarsiutinut ilinniarfimmit ilinniarnissamik neqerooruteqartumit ingerlanneqartassaaq.

Sivisussuseq aaqqissuussaanerlu

 

  § 4.  Qitiusumik ilinniartitaanermi ataatsimiititaliap pineqartumi ilinniakkatigut sammisaqarfiusumi imaluunniit inuussutissarsiutinut ilinniarfiup siulersuisuisa inersimasunik ilinniartitsinerup aaqqissuussaanera sivisussusialu aalajangersartarpaat, eqqarsaatigalugu ilinniartumit annikinnerpaatigut ilinniakkatigut killiffimmik inuusuttutut lærlingip angusarisartagaatut killiffeqalerluni taamalu aamma soraarummeernissamik/svendeprøveqarnissamik angusinissamut naatsorsuutigineqartunik.
  Imm. 2.  Inuussutissarsiutinik imaluunniit inuussutissarsiutinut ilinniarfiup, ilinniartup aamma mesterip suleqatigiillutik inuttut immikkut ilinniagaqarnissamik ingerlatsinissaq aalajangersarsinnaavaat, taannalu pineqartup qitiusumik ilinniartitaanermi ataatsimiititaliaanut imaluunniit inuussutissarsiutinut ilinniarfiup siulersuisuinut akuersissutigisassanngorlugu saqqummiunneqassaaq.
  Imm. 3.  Inuttut immikkut ilinniagaqarnissamik ingerlatsinermit naliliinermi annertunerpaamik siusinnerusukkut ilinniagaqarsimanerit suliffeqarsimanerillu eqqarsaatigineqassapput, imaasilluguli taamaallaat ilinniartitsineq suliffeqarnerlu, ilinniartup maannakkut ilinniarnerata ilaanut naapertuunnersut pillugit oqimaalutarneqaannaratik, kisiannili aamma ilinniagaqarnernut assingusunut immaqa inuussutissarsiutinut ilinniarnernut aamma suliffeqarnernut avataanniittunut, piviusumik taamaasiornikkut sanilliunneqarsinnaasutut pigineqartunut.

 

  § 5.  Inersimasunik ilinniartitsineq nalinginnaasumik ingerlatseqatigiiffimmi aallartinneqartarpoq, tamatumalu kingorna ilinniarfimmi ilinniagaqarnerup aamma praktikkerluni ilinniagaqarnerup akornanni paarlakaallugu ingerlanneqartarluni.

Ilinniartup aamma ingerlatseqatigiiffiit inatsiseqarnikkut pissusaat

 

  § 6.  Praktikkerneq ilinniarfimmiinnerlu inatsisartut inatsisaanni sulisoqarnermut akitsuummut ilaatinneqanngillat. Taamaattumik inuussutissarsiutinut ilinniartitsinerit pikkorissarnerillu inuussutissarsiutitigut ilinniartitaanermiittut pillugit inatsisartut inatsisaat inersimasutut ilinniartunut sunniuteqanngilaq.
  Imm. 2.  Inersimasunut ilinniartunut ilinniarfimmiinnerup nalaani sulitilluni iluanaarutissaraluanik annaasaqarnersiutit tunniunneqartassapput, inuussutissarsiutinut ilinniartitsinermi pikkorissarnernut, ilinniarfiliarnermut ilinniarfimmiillu aallarnermut, angalanermut aningaasartuutit kiisalu ilinniartunut, ilinniarnerup ingerlanneqarfigisaani illoqarfimmeersuunngitsunut praktikkernerup ilinniarfimmiinnerullu nalaani najugaqarnermut malittarisassat naapertorlugit.
  Imm. 3.  Ilinniartut praktikkernermik nalaani ingerlatseqatigiiffimmit aningaasarsiaqassapput.

Atortuulersinnera

 

  § 7.  Nalunaarut ulloq 1. juni 2016-imi atuutilerpoq.

 

 

Namminersorlutik Oqartussat, ulloq 9. maj 2016

 

 

Nivi Olsen

/

Mikael Kristensen