Pilersitsineq aamma siunertaq

§ 1.  Naalakkersuisut aktiaatileqatigiiffik 100 mio. koruunit tungaannut aktiaatinik aningaasaateqartoq pilersissavaat.
Imm. 2.  Ingerlatseqatigiiffik taaguuteqarpoq SIKUKI Nuuk Harbour A/S. ingerlatseqatigiiffik allanik saniatigut taaguuteqartunik suliffeqarfimmik ingerlatsisinnaavoq.
Imm. 3.  Ingerlatseqatigiiffiup aktiaatinit aningaasaatai Naalakkersuisunit atsiorneqassapput aammalu Namminersorlutik Oqartussanit pigineqarlutik. Aktiaatinit aningaasaatit Nuummi umiarsualivik pioreersoq pigisatut aallarniutissatut akiliutigalugu kiisalu 70 mio. koruunit tikillugit aningaasanngorlugit aningaasaatinut aallarniutissatut akiliutigalugit uppernarsarneqassapput.
Imm. 4.  Ingerlatseqatigiiffiup siunertaraa niuernermik tunngaveqartumik umiarsualivimmik Nuummi nunami sanaartugartaqartumi taassumunngalu assingusumik suliffeqarfittaqartumik sananissaq, piginnittuunissaq aamma ingerlatsinissaq.
Imm. 5.  Tamatuma saniatigut siunertaavoq umiarsualiviup aningaasartuutitigut sunniuteqarluartumik ingerlanneqarnissaa taamaalillunilu Kalaallit Nunaannut, Kalaallit Nunaannit aamma Kalaallit Nunaata iluani sunniuteqarluartumik imaatigut assartuussisarnissap qulakkeerneqarnissaa.

Siulersuisut aamma qullersaqarfik

§ 2.  Siulersuisut ataatsimoorlutik nalinginnaasumik inuussutissarsiornikkut aqutsisuunikkullu piginnaaneqartuussapput kiisalu umiarsualivimmik ingerlatsinerup iluani aqutsisuunikkut piginnaaneqassallutik kiisalu imaatigut assartuussinermi allatigullu umiarsuit angallanneranni ilisimasaqassallutik.
Imm. 2.  Inuk siulersuisuni ilaasortaasinnaanngilaq pineqartoq:
1)  Inatsisartuni imaluunniit Naalakkersuisuni ilaasortaaguni.
2)  Akiliisinnaajunnaartutut imaluunniit akiliisarnerminik unitsitsisimasutut suliarineqaruni imaluunniit suliarineqarnialeruni.
3)  Iliuuseqarnermini pisuusimaguni, pineqartup siulersuisuni ilaasortaaginnarnissaanik piukkunnarunnaarsitsisumik.
4)  Sivisuumik napparsimaneq imaluunniit allatut sanngiillisimaneq pissutigalugu siulersuisuni ilaasortatut sulisinnaajunnaartoq paasineqarpat, imaluunniit erseqqissumik naleqqutinngitsoq paasineqarpat.
5)  Akileraartarnermut inatsisinik peqqarniinnerusumik unioqqutitsisimasutut imaluunniit Kalaallit Nunaanni pinerluttulerinermut inatsimmi aningaasaqarnikkut pinerluttuliorneq pillugu aalajangersakkanik unioqqutitsisimasutut eqqartuussaasimaguni.
Imm. 3.  Siulersuisuni ilaasortap imm. 2-imi tunngavissarititaasut siulersuisuni ilaasortaanissaminut naammassisimanngippagit, siulersuisuni ilaasortap piaartumik siulersuisut pissutsit pillugit ilisimatissavai aammalu piaartumik siulersuisunit anissalluni.
Imm. 4.  Imm. 2 - 3 taamatuttaaq siulersuisunut ilaasortanut sinniisussanut atuupput.

§ 3.  Siulersuisunut ilaasortap siulersuisuni ilaasortaanissamut § 2, imm. 2-imi tunngavissarititaasut naammassisimanngippagit imaluunniit siulersuisunut ilaasortaq allatigut siulersuisunit anisariaqalerpat, siulersuisut piffissap qinigaaffiusup sinneranut siulersuisunut sinniisussanik qinersinissaq siunertaralugu immikkut ittumik ataatsimeersuarnissamut aggersaassapput.

§ 4.  Pisortatut taamaallaat atorfinitsinneqarsinnaavoq siulersuisut piginnaasaasa assinginik ataatsimut isigalugu piginnaasaqartoq, takuuk § 2, imm. 1.
Imm. 2.  Inuk § 2, imm. 2, nr. 1-5-imi pineqartunut ilaasoq pisortaasinnaanngilaq.

Sanaartukkat

§ 5.  SIKUKI Nuuk Harbour A/S Nuummi umiarsualivissap nutaap pilersaarusiorneqarnera sananeqarneralu isumagissavaa. Umiarsualivik nutaaq Umiarsualiviup qeqertaanni sananeqassaaq.
Imm. 2.  Umiarsualivik nutaaq talittarfeqartillugu, umiarsualiviup iluani assartuussinermut aqqusineqartillugu aamma usinik uninngasuuteqarnissamut passussinissamullu nunaminertaqartillugu sananeqassaaq. Nuup umiarsualivianut nutaamut nunami sanaartugartaqartumut nunap assinga ilanngussaq 1-itut ilanngunneqarpoq. Nunap assinga ilanngussaq ilitsersuussutaavoq. Annertussusaa, inissisimaffia aamma ilusilersorneqarnera inaarutaasumik pilersaarusiorneqarneranut sananeqarneranullu ilaatillugu allanngortinneqarsinnaapput.

§ 6.  SIKUKI Nuuk Harbour A/S Nuummi umiarsualivimmi nutaami illuutinik arlalinnik sanaartorsinnaavoq, ilanngullugit quersuaq, sullivik, allaffeqarfiit illutaat il.il. Illuutit umiarsualiviup ingerlanneqarneranut ilaatillugu attartortinneqarsinnaapput.

§ 7.  Naalakkersuisut nuna tamakkerlugu pilersaarusiornermi soqutigisanik isumaginninnermut ilaatillugu, Nuummi umiarsualivimmik nutaamik sananermut atatillugu kommunip sanaartorfigiuminarsaaneranut aningaasartuutit aammalu akilernissai pillugit isumaqatigiissuteqarsinnaapput. 
Imm. 2.  Aqqusernit aqqusersuutillu ingerlaarfissaannut nunap assinga ilanngussaq 2-itut ilanngunneqarpoq. Nunap assinga ilanngussaq ilitsersuussutaavoq. Annertussusaa, inissisimaffia aamma ilusilersorneqarnera inaarutaasumik pilersaarusiorneqarneranut sananeqarneranullu ilaatillugu allanngortinneqarsinnaapput.

§ 8.  Naalakkersuisut Nuummi umiarsualivimmik nutaamik nunami sanaartugartaqartumik aamma illuutitaqartumik sananermut aalajangersakkat erseqqinnerusut pilersaarusiornermi nuna tamakkerlugu malitassani akuerisinnaavaat.
Imm. 2.  Naalakkersuisut aalajangiisinnaapput, pilersaarusiornermi nuna tamakkerlugu malitassat, sumiiffiup ilaata Nuummi nutaamik umiarsualivimmik nunami sanaartugartaqartumik illuutitaqartumillu sananermut atorneqarnissaanut sukumiisunik aalajangersagartaqartoq, kommunimut pilersaarutitut inatsisitigut sunniuteqassasut.

Pinngitsaaliissummik taarsiissutitalimmik pigisanik piginnikkunnaarsitsineq

§ 9.  Naalakkersuisut pisariaqarpat pinngitsaaliissummik taarsiissutitalimmik pigisanik piginnikkunnaarsitsinikkut pigisanik aalaakkaasunik, sanaartornermik inatsimmi matumani pineqartumik piviusunngortitsinissamut pisariaqartunik, piginnilersinnaapput. Pinngitsaaliissummik taarsiissutitalimmik pigisanik piginnikkunnaarsitsineq, pinngitsaaliissummik taarsiissutitalimmik pigisanik piginnikkunnaarsitsisarneq pillugu Inatsisartut inatsisaanni maleruagassat malillugit pissaaq.

Aningasalersuineq

§ 10.  SIKUKI Nuuk Harbour A/S Nuummi umiarsualivimmik nutaamik sananissamut pilersaarusiornerup sananerullu aammalu umiarsualivimmi illuutinik arlalinnik sananerup, aningaasalersorneqarnissaannut taarsigassarsisinnaavoq. Ataatsimeersuarnermi ingerlatseqatigiiffiup taarsigassarsinissaa akuersissuteqarfigineqassaaq.

§ 11.  Allakkiat uppernarsaatit, taarsigassarsinermut uppernarsaatit, pappialanngortitat aamma uppernarsaatit atsiukkat il.il. sanaartornermut inatsimmi matumani pineqartumut atatillugu suliarineqartut, pisortanut naqissusiinermut akitsuusiinikkut akileraaruserneqassanngillat.

Inatsisinik toqqaaneq aamma eqqartuussivimmi suliat sumi suliarineqartarnissaat

§ 12.  Ingerlatseqatigiiffinnik eqqartuussivimmi suliakkiissuteqarneq, nunani tamalaani isumaqatigiissutit malillugit imaluunniit ingerlatseqatigiiffiup pilersuisuminut imaluunniit kiffartuussissutinut isumaqatigiissutai malillugit allatut pisoqartussaasimanngippat, taamaallaat Kalaallit Nunaanni Eqqartuussivinni siullertut suliarinnittussatut suliakkiissuteqarfigineqarsinnaavoq.
Imm. 2.  Ingerlatseqatigiiffiup suliaqarneranut tunngatillugu piumasaqaateqarneq pillugu, ilanngullugit suleqataasunut nunami maani imaluunniit nunani allani angerlarsimaffeqartunut inuinnaat piumasaqaataat, eqqartuussivimmi suliat, nunani tamalaani isumaqatigiissutit malillugit imaluunniit ingerlatseqatigiiffiup pilersuisuminut imaluunniit kiffartuussissutinut isumaqatigiissutai malillugit allatut pisoqartussaasimanngippat, ingerlatseqatigiiffimmit Kalaallit Nunaanni Eqqartuussivinni siullertut suliarinnittussamut, suliakkiissuteqarfigineqarsinnaavoq.
Imm. 3.  Imm. 1 aamma 2 malillugit suliat, nunani tamalaani isumaqatigiissutit malillugit allatut pisoqartussaasimanngippat, Kalaallit Nunaanni inatsisit malillugit aalajangiiffigineqassapput.

Atuutilernera

§ 13.  Inatsisartut inatsisaat nalunaarutigineqarneratigut atuutilissaaq. Taamaattoq § 11 ulloq 23. december 2013 aallarnerfigalugu atuutilerpoq.

Namminersorlutik Oqartussat, ulloq 3. Juni 2015

Kim Kielsen