Utoqqalinersiaqarneq pillugu Inatsisartut inatsisaat nr. 20, 23. november 2015-imeersumi § 1, imm. 4, § 13, imm. 5, § 17, imm. 7 naapertorlugu aalajangersarneqarput:

Aningaasaqarnermut tapeq

  § 1.  Pissutsini ataasiakkaani nalilersuereernikkut aningaasaqarnermut tapimik tamakkiisumik ilaannakortumilluunniit ukununnga matussusiinissamut kommunalbestyrelsi tunniussisinnaavoq:
1)  ineqarnermut akiliummut aningaasartuutinut,
2)  imeqarnermut, innaallagiamut, kiassarnermut, eqqagassalerinermut, uuliamut il.il. aningaasartuutinut, aamma
3)  aningaasartuutit pinngitsoorneqarsinnaanngitsut, illumik iluarsaasinerit aammalu kissarsuutinik iluarsaasinerit il.il. piaartumik isumannaartariaqartut.
  Imm. 2.  Utoqqalinersiaqartumut aningaasaqarnikkut immikkut ittumik ajornartorsiuteqartumut imaluunniit utoqqalinersiaqartoq aningaasaqarnikkut annertuumik ajornartorsiuteqalernissaa ilimanaateqarpat aningaasaqarnermut tapeq taamaallaat tunniunneqarsinnaavoq.
  Imm. 3.  Aningaasaqarnermut tapeqarnissamik qinnuteqaatip nalilersornerani immikkut aamma aningaasaqarnikkut immikkuullarissumik utoqqalinersiallit allat atugaannik allaanerusumik utoqqalinersiallip atugaqarnera kommunalbestyrelsip ilaatigut pingaaruteqartutut isiginiarsinnaavaa. Aapparisamut imaluunniit nalunaarsukkamik aapparisamut pilersuisussaatitaaneq taamattaaq pingaaruteqartutut isiginiarneqarsinnaavoq.
  Imm. 4.  Aningaasaqarnermut tapeq ataasiartumik tapitut tunniunneqassaaq. Pissutsini immikkuullarissuni aningaasaqarnermut tapeq piffissami qaammatit pingasukkaartumik sivisunerpaamik sivisussusilerneqartumut tunniunneqartarsinnaavoq. 
  Imm. 5.  Aningaasaqarnermut tapeqarnermut aalajangiinermi allassimasassaaq utertitsilluni akileeqqusisoqassanersoq imaluunniit utertitsiluni akileeqqusinertaqanngitsumik tunniussisoqartoq.

  § 2.  Illorisamut, biilerisamut, angallatigisamut il.il. pitsanngorsaanissamut imaluunniit aserfallatsaaliinissamut aningaasartuutinut siunertaqartumik aningaasaqarnermut tapeq tunniunneqarsinnaanngilaq.

Saniatigut tapeq

  § 3.  Aningaasat nammineq atorsinnaasat annertussusissaat pillugit sumiiffigisami inuuniarnikkut pissutsit aallaavigalugit kommunalbestyrelsi aalajangiissaaq.
  Imm. 2.  Aningaasat nammineq atorsinnaasat tassaapput utoqqalinersiaqartup isertitai maanna atuuttut akileraarusereerlugit, aamma aningaasartuutit makku ilanngaatigereerlugit sinneruttut:
1) Nammineq najugarisamut aningaasartuutit imaluunniit inissiani attartortittakkani ineqarnermut akiliutit ineqarnermut tapiissutit ilanngaatigereerlugit.
2) Imeqarnermut, innaallagiamut, kiassarnermut, eqqaagassalerinermut, uuliamut il.il. aningaasartuutit.
  Imm. 3.  Saniatigut tapinut tunngavigineqartuni allannguuteqarpat, utoqqalinersialimmut saniatigut tapiliunneqartut nalimmassarneqassapput, utoqqalinersiallip aningaasat nammineq atorsinnaasaani aallaavigineqartuni tunngavigineqartuni allannguuteqartitsisuuppata.

Paaqqinnittarfinni il.il. angerlarsimaffiup avataani inissisimaneq

Isumaginninnermi ulloq unnuarlu angerlarsimaffimmi inissisimanermi nammineq akiliisarneq

  § 4.  Utoqqalinersiaqartoq nammineq isertitaqarpat isumaginninnermi ulloq unnuarlu angerlarsimaffimmi inissisimaneq tamakkiisumik ilaannakortumilluunniit nammineq akilerneqassaaq. Utoqqalinersiat ilanngullugit saniatigut isertitat akileraaruserneqartut 60 pct.-ii akiliutit qaangersinnaanngilaat.
  Imm. 2.  Isumaginninnermi ulloq unnuarlu angerlarsimaffimmi inissisimanermi aningaasartuutit toqqaannartumik attuumassuteqartut akiliutigineqarnissaat taamaallaat piumasarineqarsinnaavoq.

Pisortat paaqqinnittarfiini inissisimanermi utoqqalinersianit ilanngaassisarneq

  § 5.  Kaasarfimmiut, akissarsiat imaluunniit pisortat aqqutigalugit sammisassaqartitsinermit akissarsiat utoqqalinersianit ilanngaatigineqassapput. Taamaattoq ilanngaassereernerup kingorna utoqqalinersiaqartoq minnerpaamik toqqammaviusumik aningaasartat 46 pct.-iinut annertussuseqartunut nallersuuttunut aningaasaateqartinneqassaaq.

 Ukiut utoqqalinersiaqarfiusut qaffanneqarnerinik kinguartitsineq

  § 6.  Ukiut utoqqalinersiaqarfiusut qaffanneqarnerinik kinguartitsinissamik qinnuteqaateqartoqareernerani kommunalbestyrelsi aalajangiisuussaaq, tak. utoqqalinersiaqarneq pillugu Inatsisartut inatsisaanni § 1, imm. 2 aamma 3.
  Imm. 2.  Qinnuteqaateqartup sulisimanerata sivisussusaa naatsorsorneqassaaq piffissaq ataavartumik suliffeqalerneraniit piffissamut qinnuteqaateqarnerata tungaanut. Qitornartaarsimalluni sulinngiffeqarneq, pikkorissarneq aamma ilinniaqqinneq, tunisassiassanik amigaateqartoqarnera aamma sikusimaneq pissutigalugu, allatulluunniit nammineq pisuussutiginngisamik pissutigalugu piffissami suliffeqarsimannginneq naatsorsuinermut ilaatinneqassapput. Sulisimanerup sivisussusaata naatsorsorneranut ilaatinneqassanngillat suliffeqarsimannginnerit aamma qinnuteqaateqartup piffissani suliffissarsiorsimannginneri.
  Imm. 3.  Ukiut utoqqalinersiaqarfiusut qaffatsinneqarnissaasa kinguartinneqarnissaanut piumasaqaataavoq timikkut imaluunniit tarnikkut sulerulunnerup kinguneranik atuussinnaassutsikkut annikillisitsisimanissaq aammalu sulisinnaassutsikkut atuussinnaassutsip annertuumik killilerneqarsimanissaa.
  Imm. 4.  Piffissaq katillugu sulisimaneq, suliffiup suussusaa aamma sivisussusaa pillugit uppernarsaatissanik pisariaqartunik kommunalbestyrelsip qinnuteqaateqartoq pissarsiniarnissaanik piumasaqaateqarfigisinnaavaa. Atuussinnaassuseq pillugu uppernarsaammik qinnuteqaateqartoq pissarsiniarnissaanik aamma qinnuteqaateqartup siusinnerusukkut sulinerata atuussinnaassusaatalu annikillisimaneranut attuumassuteqartumik patsiseqarnera pillugu kommunalbestyrelsi piumasaqaateqarsinnaavoq.

Naammagittaalliorsinnaaneq

  § 7.  Nalunaarut manna malillugu aalajangiinerit Isumaginnittoqarfiup aqunneqarnera aaqqissuussaaneralu pillugit malittarisassat sukkulluunniit atuuttut naapertorlugit Isumaginninnermi Naammagittaalliuuteqartarfimmut naammagittaalliuutigineqarsinnaapput. 

Atuutilerfia

  § 8.  Nalunaarut atuutilerpoq 1. januar 2016.

Namminersorlutik Oqartussat, ulloq 29. december 2015

Martha Lund Olsen

/

Julie Præst Wilche