Kalaallit Nunaanni ilinniartitaanermut inuussutissarsiutinillu siunnersuisarneq pillugu Namminersorlutik Oqartussat inatsisaanni nr. 4-mi, 29. november 2013-meersumi 7, imm. 6 naapertorlugu aalajangersarneqarput:

Kalaallit Nunaanni Ilitsersuisarneq pillugu siunnersuisoqatigiit suliassaat

§ 1.  Kalaallit Nunaanni Ilitsersuisarneq pillugu siunnersuisoqatigiit suliassani Naalakkersuisunit saqqummiunneqartuni inassuteqartassapput.
Imm. 2.  Siunnersuisoqatigiit namminneq piumassutsiminnik suliani naapertuuttutut isigisaminni suliaqarsinnaallutillu inassuteqarsinnaapput.
Imm. 3.  Apeqqutit nutaat saqqummersut pillugit misissueqqissaarnerit uppernarsaasersuinerillu ingerlanneqarnissaannik pisariaqartitsinerit siunnersuisoqatigiit inassuteqarnerminni tikkuarsinnaavaat, sumiiffinni ataasiakkaani nunallu immikkoortuini pisariaqartitsinerit ilanngullugit taamatullu ajornartorsiutit aalajangersimasut pinngitsoornissaannut siunnersuuteqarsinnaallutik.
Imm. 4.  Siunnersuisoqatigiit ilitsersuinerup pitsaassusaa aamma ilitsersorneqartup imminut pilersornissaanut suliamigullu ineriartornissaanut naleqqiullugu qanoq naapertuutsiginera pillugit inassuteqaateqartassapput.

§ 2.  Kalaallit Nunaanni Ilitsersuisarneq pillugu siunnersuisoqatigiit sulinerminni makku isumagissavaat:
1) Ilitsersuisarnermut tunngasut ataqatigiissarnissaasa qularnaarneqarnissaannut peqataaneq, ilitsersuinikkut suliniutinut assigiinngitsut ilanngullugit.
2) Suliffeqarfinnut naleqqiullugu ilinniartitaanerullu iluani piffissami sivikinnerusumi ungasinnerusumilu ilitsersuisarnikkut pisariaqartitat matussuserneqarnissaannut peqataanissaq.
3) Ilitsersuisarnikkut suliniutit ineriartornerannik malinnaaneq tamannalu pillugu oqaaseqaateqartarneq, ilitsersuisarnerup aaqqissugaanera suliniutillu naapertuuttut aallartinneqartarnerat ilanngullugit.
4) Ilitsersuisarnermut tunngasutigut susassaqartut naapertuuttut oqaloqatigiittarnissaasa qularnaarnissaat, ilitsersuisarnerup ilusilersorneranut aamma pisariaqartitanut paasineqartunut naleqqiullugu ilitsersuisarnikkut suliniutit ataqatigiissarneqarnissaannut tunngatillugu.

Kalaallit Nunaanni Ilitsersuisarneq pillugu siunnersuisoqatigiit ataatsimiittarneri il.il.

§ 3.  Kalaallit Nunaanni Ilitsersuisarneq pillugu Siunnersuisoqatigiit minnerpaamik ukiumut marloriarlutik nalinginnaasumik ataatsimiittassapput.
Imm. 2.  Siunnersuisoqatigiit siulittaasuata ataatsimiigiaqqusissutit, ataatsimiiffissat piffissallu aalajangertarpai nakkutigalugulu siunnersuisoqatigiit suliassaasa naammattumik pilertortumillu siuarsarnissaat.
Imm. 3.  Oqaluuserisassatut siunnersuutit siunnersuisoqatigiillu suliarinninnissaannut paasissutissat allaganngukkat pisariaqartinneqartut siunnersuisoqatigiit siulittaasuannut allattoqarfimmullu nassiunneqassapput kingusinnerpaamik ataatsimiinnissaq sap.ak. pingasunik sioqqullugu. Siunnersuisoqatigiit siulittaasua immikkut pissutissaqartillugu piffissaliussamut tunngatillugu immikkut akuersissuteqarsinnaavoq.
Imm. 4.  Siunnersuisoqatigiit siulittaasuat ataatsimiigiaqqusisuussaaq, ataatsimiinnermilu atortussat ataatsimiinneq sapaatip akunnerinik marlunnik sioqqullugu nassiuttassallugit.
Imm. 5.  Siunnersuisoqatigiit immikkut ittumik ataatsimiittassapput, tamanna siunnersuisoqatigiit siulittaasuata pissutissaqartippagu, imaluunniit siunnersuisoqatigiit ilaasortaasa amerlanerussuteqartut tamanna piumasarippassuk. Immikkut ittumik ataatsimiigiaqqusineq tamatumanilu atortussanik nassiussineq sivikinnerusumik piffissaliilluni pisinnaavoq, pissutsit tamanna pisariaqalersippassuk.

§ 4.  Siunnersuisoqatigiit siulittaasuata siunnersuisoqatigiinni sulineq aaqqissuutissavaa, siunnersuisoqatigiillu ataatsimiinnerini isumaqatigiinniarnerit aqutarissallugit.
Imm. 2.  Siunnersuisoqatigiit oqaluuserisassanik aalajangersimasunik ima imaqartussanik aalajangersaassapput:
1) Oqaluuserisassat akuerineqarnerat.
2) Kingullermik ataatsimiinnermit imaqarniliamik malitseqartitsineq.
3) Siunnersuisarfimmit ilisimatitsissutit.
4) Siunnersuisoqatigiinnut ilaasortanit ilisimatitsissutit.
5) Suliassatut siunnersuutigineqartut.
6) Siunnersuisarfimmit siunnersuisoqatigiinnulluunniit ilaasortanit sammisassaq attuumassuteqartoq.
7) Siunnersuisoqatigiinni avataaniilluunniit ilisimatitsissutit katersuinerlu.
8) Tulliani ataatsimiinnissamik aalajangersaaneq.
9) Tamalaat.

§ 5.  Siunnersuisoqatigiit aalajangiisinnaatitaapput ilaasortat affaat sinnerlugit najuuppata, taamaattorli takuuk imm. 2.
Imm. 2.  Aalajangernerni amerlanerussuteqarneq atorneqassaaq. Taasisut naligiippata siulittaasup taasinera aalajangiisuussaaq.
Imm. 3.  Suliani kinguartinneqarsinnaanngitsuni siulittaasoq siunnersuisoqatigiit sinnerlugit aalajangiisinnaavoq ilaasortat sinnerisa ataatsimiigiaqquneqarnissaat ajornarpat.
Imm. 4.  Siulittaasup imm. 3 naapertorlugu aalajangiinera pillugu siunnersuisoqatigiit piaarnerpaamik ilisimatinneqassapput.

§ 6.  Siunnersuisoqatigiit aalajangersimappassuk, ilaasortaq suliamut attuumassuteqarpallaarnini pissutigalugu suliap suliarineranut  peqataasinnaanngitsoq, suliaq ilaasortat sinnerinit suliarineqassaaq.

§ 7.  Siunnersuisoqatigiit siulittaasuata isumagissavaa, siunnersuisoqatigiit isumaqatigiinniarnerisa aalajangernerisalu imaqarniliarineqarnissaat.
Imm. 2.  Ilaasortaq aalajangiinermut isumaqataanngitsoq, isummami imaqarniliamut ilanngunneqarnissaanut pisinnaatitaavoq. Ilaasortaq aalajangiinermut isumaqataanngippat tamanna aalajangiinermi ersissaaq.
Imm. 3.  Allattoqarfik siulittaasumut saqqummiussereernikkut imaqarniliassatut missingiummik ilaasortanut akuerisassanngorlugu nassiussissaaq.
Imm. 4.  Imaqarniliaq akuerineqartutut isigineqassaaq nassiunneqartup tiguneranit sap.ak. marluk qaangiutsinnagit akerliussummik tigusaqartoqanngippat.
Imm. 5.  Imaqarniliamut akerliussuteqartoqarpat ataatsimiinnerup kingorna kingusinnerpaamik qaammat ataaseq qaangiuppat taakku suliarineqassapput.

§ 8.  Siunnersuisoqatigiit ataatsimiinneranni aalajangiinerit imaqarniliallu akuerisat Ilitsersuisarneq pillugu siunnersuisoqatigiit internetikkut nittartagaanni tamanut saqqummiunneqassapput.
Imm. 2.  Ataatsimiinnermit imaqarniliap tamakkiisumik ilaannakortumilluunniit tamanut saqqummiunneqannginnissaa siunnersuisoqatigiit aalajangersinnaavaat.

§ 9.  Ilinniartitaanermut naalakkersuisoqarfik imaluunniit naalakkersuisoqarfiup piginnaatitaa Kalaallit Nunaanni Ilitsersuisarneq pillugu siunnersuisoqatigiinnik allattoqartitsissaaq.
Imm. 2.  Allattoqarfik siunnersuisoqatigiit ataatsimiinnissaasa piareersarnerinut ataatsimiinnerillu ingerlannerinut peqataassaaq, suliassanik piareersaalluni siunnersuisoqatigiillu nalunaarummi matumani suliassatut aalajangersarneqartut pillugit aalajangiinerinik malitseqartitsilluni.
Imm. 3.  Suliassanut imm. 2-mi taaneqartunut atatillugu allattoqarfiup ullormi oqaluuserisassat nassiussuutissavai, taakku pillugit allattoqarfiup allattugai ilanngullugit.

§ 10.  Siunnersuisoqatigiit ilaasortaat, allattoqarfik ikiortitullu isigineqartut suliassat suliarineqartarnerannik inatsisip § 27-ia aammalu pinerluttuliorneq pillugu inatsisip § 50, imm. 1. aamma 3 aamma §§ 52-54 naapertorlugit nipangiussisimasussaatitaapput.

§ 11.  Kalaallit Nunaanni Ilitsersuisarneq pillugu siunnersuisoqatigiit kingusinnerpaamik 1. april ukiup siuliani suliatik pillugit Ilinniartitaanermut Naalakkersuisoqarfimmut ukiumoortumik nalunaarusiortassapput. Nalunaarusiap imarissavai siunnersuisoqatigiit ukiup siuliani suliaasa allattorneqarnerat.

Atuutilernera

§ 12.  Nalunaarut manna atuutilerpoq ulloq 1. maj 2015.

Namminersorlutik Oqartussat, ulloq 9. marts 2015

Nivi Olsen

/

Mikael Kristensen