Kapitali 1
Siunertaq

§ 1.  Inatsisip siunertaraa kalaallinut inuiaqatigiinnut iluaqutaasussamik Kalaallit Nunaanni aallaaveqartumik kalaallit ilisimatusarnerisa siuarsarnissaat nukittorsarnissaallu.
Imm. 2.  Inatsisip siunertaanut ilaapput:
1)  Ilisimatusarnermi sammineqartut ilisimatusarnerullu annertusarnissaat, taakkununnga ilaalluni ilisimatusarnermik ilinniagaqarneq.
2)  Ilisimatusarnermut suliniutip ataqatigiissaarneqarnera pingaarnersiorneqarneralu.
3)  Kalaallit Nunaata nunani tamalaani ilisimatusarnikkut suleqatigiinnermut peqataanissaata nukittorsarnissaa.
4)  Naalagaaffeqatigiinnerup iluani Kalaallit Nunaata ilisimatusarnikkut suleqatigiinnermi peqataanissaata nukittorsarnissaa.
5)  Pisortat namminersortullu ilisimatusarneranni suleqatigiinnerup nukittorsarnissaa.
6)  Kalaallini inuiaqatigiinni ilisimatusarnikkut angusat nutaaliornerullu annerusumik atorneqalernissaat, tassani ilanngullugu niuernerpalaartumik ingerlatsilernissamut tunngavissaq.
7)  Kalaallit ilisimatusarnerat pillugu kikkunnut tamanut annerusumik paasissutissiisarnissaq.

§ 2.  Inatsit ilisimatusarnikkut sulianut tamanut atorneqarpoq, tamanna inatsisinut allanut akerliunngippat.

Kapitali 2
Nunatsinni Ilisimatusarnermik Siunnersuisoqatigiit (Grønlands Forskningsråd, Greenland Research Council) - pilersinneqarnerat suliassaallu

§ 3.  Naalakkersuisut Nunatsinni Ilisimatusarnermik Siunnersuisoqatigiit (Grønlands Forskningsråd, Greenland Research Council) pilersippaat, tamatuma kingorna Siunnersuisoqatigiit, taannalu kikkunnulluunniit attuumassuteqarnani nuna tamakkerlugu ilisimatusarnikkut siunnersuisarfittut, ilisimatusarnikkut aningaasaliisarfittut ilisimatusarnikkullu paasissutissiisarfittut ingerlatsiviussaaq.
Imm. 2.  Siunnersuisoqatigiit siunnersuinerminni allanillu ingerlatsinerminni Naalakkersuisunit ilitsersorneqassanngillat.
Imm. 3.  ; Siunnersuisoqatigiit ilisimatusarnikkut suliassaqarfiit tamakkerlugit sulissapput, taamaattoq takuuk § 2.

§ 4.  Siunnersuisoqatigiit inatsimmi siunertarineqartut piviusunngortissallugit suliassaraat, taamaattoq takuuk § 1.
Imm. 2.  Tamatuma saniatigut Siunnersuisoqatigiit Naalakkersuisut ilisimatusarnikkut siunnersussallugit suliassaraat.

§ 5.  Siunnersuisoqatigiit Naalakkersuisunut Siunnersuisoqatigiit sulinissaannut akisussaassuseqarput, tassani Siunnersuisoqatigiit aningaasatigut atugassaasa aqunneqarnerat ilaalluni.
Imm. 2.  Siunnersuisoqatigiit sulinertik pillugu ukiumoortumik nalunaarusiamik Naalakkersuisunut suliaqartassapput. Nalunaarusiaq tamanut saqqummiunneqassaaq.

§ 6.  Siunnersuisoqatigiit suliassanik suliaqarnerminni suliassaraat:
1)  Ilisimatusarnermi pingaarnertigut politikkikkut anguniakkat piviusunngortissallugit, ilisimatusarnermilu politikkikkut maleruaqqusat Naalakkersuisunit aalajangersarneqartut malissallugit.
2)  Ilisimatusarnermi politikkikkut apeqqutinut Naalakkersuisut siunnersussallugit, qaffasissumillu ilisimatusarneq pillugu kikkunnulluunniit attuumassuteqanngitsumik ilisimasallu tungaasigut Naalakkersuisut siunnersussallugit, tassani ilisimatusarnikkut pisariaqartitat takkuttussat ilanngullugit.
3)  Siunnersuinermi nuna tamakkerlugu misilittakkat anguniarneqartullu attuumassuteqartut ilanngunneqartarnissaasa qulakkeerneqarnissaat, tassunga ilanngullugit inuit ilisimasatoqaat.
4)  Aningaasat ilisimatusarnermut atugassanut qinnuteqaatit nalilersorlugillu tulleriiaarnissaat.
5)  Namminersorlutik Oqartussat susassaqarfii akimorlugit aningaasanik ilisimatusarnermut atorneqartussanik tunniussinermi ataqatigiissaarinissaq tulleriiaarinissarlu.
6)  Ilisimatusarnermut aningaasaliissutaasut tamarmik suliffeqarfinnut aalajangersimasunut attuumassuteqarlutik pisortanit aallaavittut aningaasaliissutaanngitsut imaluunniit aningaasaliissutit ilisimatusarneq aallaavigalugu oqartussaasunit isumagineqartut ilisimatusarnikkut suliatigut pitsaassutsimikkut naliliiffigereerlugit ammasumik unammillerneq aqqutigalugu tunniunneqartarnissaat qulakkeerneqassasoq, aningaasallu tunngavissat kikkunnut tamanut saqqummiunneqartut tunngavigalugit qinnuteqaammik tunniussereernikkut tunniunneqartassasut.
7)  Ilisimatusarneq pillugu paasissutissiisarnerup ilisimatusarnerlu pillugu ingerlatitseqqiisarnerup siuarsarnissaa nukittorsarnissaalu.
8)  Kalaallit Nunaanni ilisimatusarnikkut suliniuteqarnerup malinnaaffiginissaanut nalilersornissaanullu aallartitsinissaq, tassanittaaq ilisimatusarnikkut ilinniarnerit ilisimatusarnikkullu suliaqartut ilanngullugit.
9)  Suliassanik ilisimatusarnermut attuumassuteqartunik Siunnersuisoqatigiinnut Naalakkersuisunit piumasarineqartunut suliaqartarnissaq.

§ 7.  Siunnersuisoqatigiit sulinerminnut atatillugu namminneq piumassutsimikkut imaluunniit qinnuigineqarnermikkut
1)  suliniutigineqartunik ilisimatusarnermut tunngassuteqartunik siunissamilu iliuusissanut soqutiginaateqartunik paasiniaasarnissaq, taakkulu Naalakkersuisunut ilisimatitsissutigalugit,
2)  ajornartorsiutaasinnaasunik ilisimatusarnermut tunngassuteqartunik paasiniaasarnissaq, taakkulu Naalakkersuisunut ilisimatitsissutigalugit,
3)  ilisimatusarnerup iluani suliassanik suugaluartunik Siunnersuisoqatigiit pisariaqartinneqartutut isigisaannik suliaqartarnissaq.
Imm. 2.  Siunnersuisoqatigiit apeqqutinut ilisimatusarnikkut politikkikkut tunngassuteqartunut tamanut tusarniaaffigineqarsinnaapput.

Siunnersuisoqatigiit katitigaanerat akissarsiaqartinnerallu

§ 8.  Siunnersuisoqatigiinni ilaasortat arfineq pingasuupput, taakkunannga ilaasortaq ataaseq siulittaasuulluni ilaasortarlu ataaseq siulittaasumut tulliulluni.
Imm. 2.  Naalakkersuisut Siunnersuisoqatigiit siulittaasuat ilaasortallu allat inuttut pisinnaasaat malillugit toqqassavaat. Siunnersuisoqatigiit namminneerlutik ilaasortaasut akornanneersumik siulittaasup tullianik toqqaassapput.
Imm. 3.  Toqqaaneq kalaallit ilisimatusarnikkut suliffeqarfiutaannit, ilisimatusarnikkut qitiusumik sammisaqarfiinit, ilisimatusarnikkut suliaqartunit kiisalu aallarnisaasutut nutaaliornikkullu suliaqartunit inassuteqartitsinikkut pissaaq. Naalakkersuisut suliffeqarfiit, qitiusumik sammisaqarfiit suliaqartullu inassuteqarsinnaatitaanersut aalajangersassavaat tamanullu saqqummiullugit.
Imm. 4.  Siunnersuisoqatigiit ilaasortaat piukkunneqarlutik inassutigineqartut Kalaallit Nunaanneersut nunarsuullu sinneraneersut akornanni toqqarneqarsinnaapput.
Imm. 5.  Siunnersuisoqatigiit katitigaaneranni minnerpaamik ilaasortat affaasa ilisimatuunik tatigineqartunik nunanit tamalaaneersuunissaat ilaasortallu Nunatsinni pissutsinik ilisimasaqartuunissaat qulakkeerneqassaaq.

§ 9.  Siunnersuisoqatigiit susassaqarfiit akimorlugit katitigaassapput.
Imm. 2.  Ilisimatuussutsikkut suliassaqarfiit Siunnersuisoqatigiinni sammineqartussat tassaapput:
1)  Pinngortitamut ilisimatusarneq.
2)  Peqqissutsimut ilisimatusarneq.
3)  Inuiaqatigiinnut ilisimatusarneq.
4)  Humaniora.
5)  Teknologii.

§ 10.  Siunnersuisoqatigiit allattoqarfiat periutsimik ilisimatusarnikkut suliffeqarfiit, ilisimatusarnikkut qitiusumik ingerlatsiviit, ilisimatusarnermik suliaqartut kiisalu aallarnisaanermik nutaaliornermillu suliaqartut inassuteqarsinnaatitaasut immikkoorlutik suleqatigiillutilluunniit inassuteqarsinnaanerannik qulakkeerinnissaaq. Suleriaaseq avammut saqqummiunneqassaaq.
Imm. 2.  Siunnersuisoqatigiinnut piukkunneqartut siunnersuisoqatigiinni, siunnersuisarfinni suliffeqarfinniluunniit namminersortuni soqutigisatik pissutsillu allat piukkunneqartut tatiginassusaannut sunniuteqarsinnaasut nalunaarutigissagaat Siunnersuisoqatigiit qulakkiissavaat.

§ 11.  Siunnersuisoqatigiit ilaasortaat ukiut pingasukkaarlugit toqqarneqartassapput.
Imm. 2.  Siunnersuisoqatigiit ilaasortaat toqqaqqinneqarsinnaapput.
Imm. 3.  Ilaasortaq atuuffiup iluani ilaasortaajunnaarpat inassutigineqartut kingulliit aallaavigalugit ilaasortamik nutaamik Naalakkersuisut toqqaassapput. Ilaasortanngortoq taanna ukiut pingasut atuuffiusussat sinneranut toqqarneqassaaq.

§ 12.  Siunnersuisoqatigiinni ilaasortaq pisussaaffitik uniorlugit iliuuseqarsimappat Naalakkersuisut Siunnersuisoqatigiinni ilaasortaq ilaasortaajunnaartissinnaavaat, imaluunniit ilaasortaq Siunnersuisoqatigiinni ilaasortaanissamut ilaasortaanissamut ataqqinassuseqanngitsoq paasinarsippat.
Imm. 2.  Siunnersuisoqatigiit pisussaaffii sulineraluunniit pillugit Naalakkersuisut Siunnersuisoqatigiillu akornanni isumaqatigiinnginnermik pilersoqassappat Naalakkersuisut Siunnersuisoqatigiillu akornanni isumaqatigiinngissutaasoq Siunnersuisoqatigiit ataatsimiinnermut allattuiffianni uppernarsarneqarsinnaavoq.

§ 13.  Siunnersuisoqatigiinni ilaasortat Inatsisartuni Naalakkersuisunilu il.il. ilaasortat aningaasarsiaqartitaanerat il.il pillugit Inatsisartut inatsisaanni kapitali 7 naapertorlugu aningaasarsiaqassapput.

Siunnersuisoqatigiit aningaasalersorneqarnerat

§ 14.  Siunnersuisoqatigiit sulinerat Nunatta Karsianit tapiissuteqarnerit aqqutigalugit aningaasalersorneqarpoq.
Imm. 2.  Nunatta Karsianit ukiumoortumik tapiissutit ukiumi tulliuttumi aningaasanut inatsiseqarfiusussap akuersissutigineqarneranut atatillugu Inatsisartunit aalajangersarneqarput.

§ 15.  Siunnersuisoqatigiit ukiumut aningaasanut inatsiseqarfiusumut tullermut Naalakkersuisunit piffissalerneqartumik missingersuutinut siunnersuummik ukiut tamaasa Naalakkersuisunut tunniussaqartassapput. Siunnersuisoqatigiit peqataanik ukiumut aningaasanut inatsiseqarfiusumut tullermut Nunatta Karsianit tapiissutit annertussusissaannut siunnersuuteqartassapput.

§ 16.  Siunnersuisoqatigiit ukioq naatsorsuusiorfigisassaat tassaavoq ukioq aningaasanut inatsiseqarfiusoq. Siunnersuisoqatigiit missingersuutit, naatsorsuusiornerit naatsorsuutinillu tunniussaqartarnerit pillugit Kalaallit Nunaanni Namminersorlutik Oqartussat aalajangersagaat qaqugumulluunniit atuuttut malissavaat.
Imm. 2.  Ukiumoortumik naatsorsuutit Kalaallit Nunaanni Namminersorlutik Oqartussat kukkunersiuisoqarfiannit kukkunersiorneqassapput.
Imm. 3.  Ukiumoortumik naatsorsuutit Siunnersuisoqatigiinnit akuersissutigineqartut piffissaliussaq Naalakkersuisunit aalajangerneqartoq nallertinnagu Naalakkersuisunut akuerisassanngorlugit Siunnersuisoqatigiit saqqummiutissavaat.
Imm. 4.  Naatsorsuutit Naalakkersuisunit akuersissutigineqareerpata Siunnersuisoqatigiit tamanut saqqummiutissavaat.

Siunnersuisoqatigiit sulinerat

§ 17.  Siunnersuisoqatigiit ukiumut ikinnerpaamik marloriarlutik ataatsimiittarput. Ataatsimiinnerit tamanut ammasumik ingerlanneqarneq ajorput. Ataatsimiinnerni ullormut oqaluuserisassat imaqarniliugarlu tamanut saqqummiunneqassapput, takujulli imm. 2.
Imm. 2.  Ullormut oqaluuserisassat ataatsimiinnerniillu imaqarniliat tamakkiisumik ilaannakortumilluunniit isertuunneqarnissaannik Siunnersuisoqatigiit aalajangersinnaapput, tamanna inummut paasissutissat mianernartut imaluunniit qinnuteqartup silappaarinnermi pisinnatitaaffianik mianerinninnissamik tunngavilersorneqarsinnaappat.

§ 18.  Suleriaasissaq Naalakkersuisunit akuersissutigineqartoq Siunnersuisoqatigiit namminneerlutik aalajangersassavaat.
Imm. 2.  Suleriaasissaq ataatsimiittarnernut, taasisarnermut, piukkunnassutsimut imaqarniliornermullu malittarisassanik imaqassaaq. Piukkunnassuseq pillugu suleriaatsimi aalajangersakkat piukkannassuseq pillugu aalajangersakkanit pisortat ingerlatsineranni suliassat suliarineqartarnerat pillugu Inatsisartut inatsisaanni aalajangersakkanit sakkortunerusinnaapput.
Imm. 3.  Suleriaasissaq ulluinnarni aqutsisut pilersinneqarnissaannik taakkulu pisinnaatitaaffiinut malittarisassanik imaqarsinnaavoq.

§ 19.  Siunnersuisoqatigiit suliassat aalajangersimasut suliarineqarnissaannut ataatsimiititalianik aalajangersimasumik suliaqartussanik, suleqatigiissitalianik komiténilluunniit Siunnersuisoqatigiit ilaasortaannik imaluunniit peqataasussanik avataaneersunik immikkut piginnaasalinnik inuttaqartunik pilersitsisinnaapput.
Imm. 2.  Siunnersuisoqatigiit ataatsimiititaliat suliassaannut, katitigaanerannut, sulinerannut annertussusaannullu nammineq aalajangersaassapput.
Imm. 3.  Siunnersuisoqatigiit, aalajangiisartut ataatsimiititalialluunniit atuutereersut Siunnersuisoqatigiit isumasiorsinnaavaat.

§ 20.  Siunnersuisoqatigiit aalajangerneri allaffissornikkut oqartussaasunut allanut ingerlateqqinneqarsinnaanngillat.

§ 21.  Siunnersuisoqatigiit allattoqarnerat Naalakkersuisunit isumagineqarpoq.

Kapitali 3
Atortuulerfia

§ 22.  Inatsisartut inatsisaat 1. januar 2014-imi atuutilerpoq.

Namminersorlutik Oqartussat, 29. november 2013

Aleqa Hammond