Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaanni nr. 21-mi, 18. december 2003-imeersumi § 6, imm. 4 naapertorlugu aalajangersarneqarpoq:

§ 1.  Fuldmægtigitut, immikkut siunnersortitut, siunnersortit pisortaattut aammalu pisortatut atorfinni Namminersorlutik Oqartussat nunanut allanut kiffartuussivianni atorfinitsinneqarneq sumi inissisimanissaq pillugu ilisimatitsissutitaqanngitsumik pisassaaq. Nunanut allanut tunngassuteqartunut Naalakkersuisup sulisorisanik sumi inissiinissaq aalajangiiffigissavaa Nunanut allanut Pisortaqarfimmi Kalaallit Nunaatalu avataani sinniisoqarfinni atorfeqarnermut sumilu atorfeqarnissamut tunngatillugu.
Imm. 2. Namminersorlutik Oqartussat nunani allani kiffartuussineranni Nunanut allanut Pisortaqarfimmi imaluunniit sinniisoqarfinni sulisorisanik inissiineq taamaattumik  allagarsiinertaqanngitsumik pisassaaq. Tamanna aamma atorfimmi qaffatsitaanermi atuuppoq.
Imm. 3. Namminersorlutik Oqartussat qitiusumik aqutsisoqarfianni allani sulisorisat suliffigisami allagarseereernikkut Namminersorlutik Oqartussat nunanut allanut kiffartuussiviannut nuunneqarsinnaapput imaluunniit Namminersorlutik Oqartussat Kalaallit Nunaata avataani sinniisoqarfiinut aallartinneqarsinnaapput.
Imm. 4. Namminersorlutik Oqartussat nunani allani kiffartuussiviini sulisorisanik atorfinitsitsineq tamanut saqqummiussamik allagarseereernikkut pisassaaq.

§ 2. Nalunaarut ulloq 12. november 2013-imi atuutilersinneqarpoq.
Imm. 2. § 1, imm. 1-2-mi aalajangersakkat sulisorisanut 12. november 2013-imi Namminersorlutik Oqartussat nunanut allanut kiffartuussivianni inissisimasunut atuupput, pineqartut atorfinitsitaanerannut atatillugu allakkami atorfik taaneqartoq imaluunniit sumi inissinneqarneq apeqqutaatinnagu.

Kalaallit Nunaanni Namminersorlutik Oqartussat, ulloq 12. november 2013

Vittus Qujaukitsoq

/

Peter Hansen