Avatangiisit innarlitsaaliorneqarnissaannik Inatsisartut inatsisaani nr. 9-mi, 22. november 2011-meersumi, Inatsisartut inatsisaatigut nr. 1-ikkut, 29. maj 2012-imeersukkut allanngortinneqartumi § 10, imm. 1, nr. 27, § 66, imm. 3, § 67 aamma § 68 naapertorlugit aalajangersarneqarpoq:

Atuuffissai il.il.

§ 1.  Pinngortitap avatangiisillu illersorneqarnissaat eqqarsaatigalugu assartuutit motoorillit sumi atorneqarsinnaaneri pillugit malittarisassat nalunaarummi uani aalajangersarneqarput.
Imm. 2.  Illoqarfiit nunaqarfiillu nalunaarummi matumani tassaatinneqarput nunaminertat, kommuninut pilersaarummi illoqartittut nunaqarfittullu siunertaqarfiusunut atugassanngortinneqartut.
Imm. 3.  Nunaannaat nalunaarummi matumani tassaatinneqarput nunaminertat, illoqarfiit nunaqarfiillu avataaniittut.
Imm. 4. Kangerluit imartallu sikuunermik nalaani nunaannarmiittutut naatsorsuunneqassapput.
Imm. 5.  Nalunaarut manna Kalaallit Nunaata avannaarsuani Tunumilu nunamut eqqissisimatitamut, kiisalu sermersuarmut serminullu sermersuarmiit iigarfiusartunut atuutinngilaq.

§ 2.  Assartuutit nalunaarummi uani tassaatinneqarput qamutit motoorillit suulluunniit larvefodillit assakaasunilluunniit ingerlatillit, sikumi, apummi, qaqqani kiisalu nunap ilusaani allani allanngortinneqanngitsuni atugassatut sanaat taakkunaniluuniit atorneqartartut.

§ 3.  Aqqusinerni, unittarfinni narsaatinilu il.il., pilersaarusiortarnermut inatsit malillugu atuisinnaatitaanissamik pisariaqartitsiviusuni angallanneq, kiisalu inuussutissarsiutigalugu nersutaateqarnermik ingerlatsinermut atatillugu angallanneq nalunaarummut matumunnga ilaatinneqanngillat.
Imm. 2.  Nakkutilliinermut oqartussaasut avatangiisinik pinngortitamillu nakkutilliinerannut, annaassiniarnernut, politiit paasiniaanerinut, sakkutuut suliaqarnerinut assingusunullu atatillugu angallannerit nalunaarummut matumunnga ilaatinneqanngillat.
Imm. 3. Sumiiffinni, angallatit motoorinik ingerlatillit atorlugit angallannermut inatsisit allat aqqutigalugit maleruagassiuiffiusuni, maleruagassiat sukkulluunniit killilersuiffiunerusut atuutissapput.

Assartuutinik motoorinik ingerlatilinnik atuineq

§ 4.  Illoqarfiup nunaqarfiullu killeqarfiata iluani assartuinermut aqqutini angallannermullu killeqarfiit iluini assartuutinik motoorinik ingerlatilinnik atuisarneq inatsisit allat eqqarsaatigalugit kommunalbestyrelsimit maleruagassiuunneqassaaq.
Imm. 2.  Imm. 1 naapertorlugu assartuinermut aqqutini angallannermullu killeqarfiit iluini assartuutinik motoorinik ingerlatilinnik atuineq kommunip maleruagassiaani aalajangersarneqassaaq.

§ 5.  Nunaannarmi assartuutinik motoorinik ingerlatilinnik atuinissaq inerteqqutaavoq, taamaattorli tak. §§ 3 aamma 6.
Imm. 2.  Sumiiffinnik immikkut sunnertiasunik, assartuutinik motoorinik ingerlatilinnik tamanik atuinissamut inerteqquteqarfiusunik maleruagassiuiffiusunilluunniit Naalakkersuisut toqqaasinnaapput.
Imm. 3.  Angallannermut killeqarfiit iluini aamma/imaluunniit assartuinermut aqqutini, § 6, imm. 1 aamma 2 naapertorlugu atugassanngortinneqarsimasuni Naalakkersuisut angalanissamut inerteqquteqarsinnaapput.

§ 6.  Kommunalbestyrelsip Kalaallit Nunaanni Pinngortitaleriffiup siunnersuinera tunngavigalugu nunaannarmi ukiuunerani assartuinermut aqqutissat aamma/imaluunniit ukiuunerani angallavissat toqqartorsinnaavai, § 7-imi aamma 8-mi piumasaqaatit ataanni assartuutit motoorinik ingerlatillit sukumiisumik nassuiarneqartut angallatigineqarpata.
Imm. 2.  Kommunalbestyrelsip Kalaallit Nunaanni Pinngortitaleriffiup siunnersuinera tunngavigalugu nunaannarmi aasaanerani assartuinermut aqqutissat aamma/imaluunniit aasaanerani angallavissat toqqartorsinnaavai, § 7-imi piumasaqaatit naammassineqarsimanngikkaluarpataluunniit angallatit motoorinik ingerlatillit atorlugit angalanissaq inerteqqutaanngippat.
Imm. 3.  Kommunalbestyrelsi § 7-imi pinngortitamik illersuinissamut piumasaqaatinut minnerpaaffiliussat saniatigut aqqutini angallavinnilu, imm. 1 aamma 2 naapertorlugit atorneqarsinnaasuni aputip issussusissaanut piffissamullu piumasaqaatinik ersarinnerusunik aalajangersinnaapput
Imm. 4.  Aqqutit angallaviillu, imm. 1 aamma 2 naapertorlugit atugassanngortinneqarsimasut atorneqarneri inuussutissarsiutinut ersarinnerusumik aalajangersarneqartunut inuussutissarsiutigalugu angallavissatut killilerneqarsinnaapput.
Imm. 5.  Assartuutinik motoorinik ingerlatilinnik assartuinermut aqqutini angallannermullu killeqarfiit iluini § 6, imm. 1-3 naapertorlugu aalajangersarneqartuni atuinermut kommunip aalajangersagai kommunip malittarisassaani aalajangersarneqassapput.

Angallannermut ataatsimut aalajangersakkat

§ 7.  § 6, imm. 1-imi ukiuunerani assartuinermut aqqutissatut ukiuuneranilu angallavissatut toqqarneqartuni nunap qerinerani, apummik qallerneqarnerani aammalu naasunut nunamullu ajoqusiiviusinaanngitsumik angallavissaalernerani angalanissaq inerteqqutaanngilaq.
Imm. 2.  § 6, imm. 2-mi aasaanerani assartuinermut aqqutissatut aasaaneranilu angallavissatut toqqarneqartuni kommunip maleruagassatut aalajangersagai malillugit angalanissaq inerteqqutaanngilaq.
Imm. 3.  Imm. 1-imi aalajangersakkat immap sikuani aammalu tatsit kuuillu sikuini angalanermut atuutinngillat.

§ 8.  Angalanermi nuna naasunut aseruutaasinnaasumik sangupiloorfigineqassanngilaq, aallarsarfigineqassanngilaq unipiloorfigineqassananiluunniit.
Imm. 2.  Kuuit sinaat uingarnillu kiisalu tatsit killingi, kuuit annerit kiisalu kangerluit ikaarneqartassapput, naasut nunallu ajoquserneqarfissarinngisaasigut.

Immikkut ittumik akuersissuteqartarnerit

§ 9.  Pisuni immikkut ittuni kommunimi assartuinermut aqqutissatut angallannermullu killeqarfiit iluini atugassiissutigineqartut avataani assartuutit motoorinik ingerlatillit atorlugit angalanissamut kommunalbestyrelsi immikkut ittumik akuersissuteqarsinnaavoq.
Imm. 2.  Immikkut ittumik akuersissuteqartoqarnissaanut qinnuteqaat tunngavilersugaq angalanissaq pilersaarutaasoq kingusinnerpaamik sapaatit akunnerinik sisamanik sioqqullugu kommunalbestyrelsimit tiguneqarsimassaaq, aammalu nunaminertat imaluunniit aqqutissat nalunaarsorneqarnerinik imaqassalluni.
Imm. 3.  Kommunalbestyrelsi immikkut ittumik akuersissuteqarnermut atatillugu naapertuuttutut isigineqarsinnaasunik piumasaqaateqarsinnaavoq.
Imm. 4.  Immikkut ittumik akuersissutit Avatangiisinut Naalakkersuisoqarfimmut ilisimatitsissutitut nassiunneqassapput.
Imm. 5.  Imm. 1 aamma imm. 2 naapertorlugu akuersissutit sukkulluunniit kommunalbestyrelsimit imaluunniit Naalakkersuisunit allanngortinneqarsinnaapput utertinneqarsinnaallutilluunniit, immikkut ittumik akuersissuteqarnissamut piumasaqaatit unioqqutinneqarpata, imaluunniit kommunalbestyrelsip Naalakkersuisulluunniit naliliinerat malillugu pissutsit pingortitamut avatangiisinullu ajoqusiisinnaasut pineqarpata.
Imm. 6.  Immikkut ittumik akuersissutit ukioq ataaseq tikillugu tunniunneqartarsinnaapput.
Imm. 7.  Pisuni immikkut ittuni, soorlu piniariarnernut, timersornermik aaqqissuussinernut, pisortat assartuussinerinut, ilisimatusarnikkut suliniutinut il.il. atatillugu, § 6, imm. 3 naapertorlugu aalajangersakkanik aalajangersarneqartunik saneqqutsinissamut kommunalbestyrelsi akuersissuteqarsinnaavoq.

Nakkutilliineq il.il.

§ 10.  Kommunalbestyrelsip nalunaarummi uani malittarisassat malinneqarnersut nakkutigissavaa.
Imm. 2.  § 7, imm. 1-imi aamma 2-imi angalanermut maleruaqqusat piffissap ilaani naammassineqarsimanngippata kommunalbestyrelsi inerteqquteqarsinnaavoq peqqussuteqarsinnaallunilu.
Imm. 3.  Peqqussutit tassaasinnaapput angallaviit aalajangersimasut atorneqarnissaannik piumasaqaatit.
Imm. 4.  Inerteqqutit tassaasinnaapput sumiiffinni aalajangersimasuni piffissami aalajangersimasumi angallannerup tamarmi unitsinneqarnissaanik piumasaqaatit.

§ 11.  Nalunaarut manna naapertorlugu aalajangikkat tamarmik avatangiisit innarlitsaaliorneqarnissaat pillugu Inatsisartut peqqussutaanni nr. 9-mi, 22. november 2011-meersumi kapitali 14-imi malittarisassat naapertorlugit naammagittaalliuutigineqarsinnaapput.

Pineqaatissiinerit atuutilernissaanullu aalajangersakkat.

§ 12.  § 5-imik, § 6 imm. 1-4-mik, § 7 imm. 1-imik aamma 2-mik aamma § 8-mik unioqqutitsineq akiliisitsinermik aamma/imaluunniit arsaarinninnermik kinguneqarsinnaapput.
Imm. 2.  Piumasaqaatinik, § 9, imm. 3 naapertorlugu aalajangersarneqartunik unioqqutitsineq akiliisitsinermik kinguneqarsinnaavoq.
Imm. 3.  § 10, imm. 2-4 naapertorlugit peqqussummik imaluunniit inerteqqummik unioqqutitsineq akiliisitsinermik kinguneqarsinnaavoq.
Imm. 4.  Nalunaarummi akiliisussanngortitsineq tunngavilerneqarsimatillugu, Kalaallit Nunaanni Pinerluttulerinermut inatsimmi maleruagassat malillugit suliffeqarfik akiliisussanngortinneqarsinnaavoq.
Imm. 5.  Imm. 1-4 naapertorlugu akiliisitsissutit Nunap Karsianut nakkartinneqartassapput.

§ 13.  Nalunaarut manna 1. januar 2014-imi atuutilerpoq.
Imm. 2.  Tamatuma peqatigisaanik Sisimiut, Kangerlussuup Maniitsullu eqqaanni assartuutit motoorinik ingerlatillit atorneqarneri pillugit Namminersornerullutik Oqartussat nalunaarutaat nr. 5, 25. maj 1999-imeersoq, kiisalu Uummannami Upernavimmilu assartuutit motoorinik ingerlatillit atorneqarneri pillugit Namminersornerullutik Oqartussat nalunaarutaat atorunnaarsinneqarput.

Namminersorlutik Oqartussat, ulloq 10. oktober 2013

Mette Lynge

/

Søren Stach Nielsen