Piniarneq aallaaniarnerlu pillugit Inatsisartut inatsisaanni nr. 12, 29. oktober 1999-meersumi § 2, imm. 4, § 8, §§ 12-13, § 15 aamma §§ 17 aamma 18, kingullermik Inatsisartut inatsisaatigut nr. 1, 16. maj 2008-meersukkut allanngortinneqartumi, malillugit aalajangersarneqarpoq:

Kapitali 1
Atuuffia

§ 1.  Nalunaarummi matumani "arferit angisuut" tassaapput tikaagulliit (Balaenoptera acutorostrata), tikaagulliusaat (Balaenoptera physalus), arfiviit (Balaena mysticetus), qipoqqaat (Megaptera novaeangliae) arferillu tikaagullinnit anginerusut soqqallit allat, kiisalu kigutilissuit (Physeter macrocephalus).

Kapitali 2
Eqqissisimatitsineq

§ 2.  Imartani Kalaallit Nunaata aalisarnikkut oqartussaaffigisaani arferit angisuut eqqissisisimatitaapput, taamaattorli imm. 2 takuuk.
Imm. 2.  Tikaagulliit, tikaagulliusaat, arfiviit aamma qipoqqaat imm. 1-imi inerteqqummut ilaatinneqanngillat.

 

Kapitali 3
Pisassiissutinik aalajangiisarneq

§ 3.  Tikaagullinnik, tikaagulliusaanik, arfivinnik qipoqqarnillu immikkoortiterlugit pisassiissutinik Naalakkersuisut ukiumoortumik aalajangiisarput. Pisassiissutinik aalajangiinermi isiginiarneqassapput nunat tamat akornanni isumaqatigiissutit, biologit siunnersuinerat, atuisut ilisimasaat kiisalu Piniarneq pillugu Siunnersuisoqatigiinnik tusarniaaneq.
Imm. 2.  Pisassiissutinik aalajangiinernik taakkununngalu piumasaqataatinik nalunaarutit www.nanoq.gl tusagassiuutillu atorlugit avammut nalunaarutigineqassapput.

Kapitali 4
Licensit, akuersissutit nakkutilliinerlu

Licensit aamma akuersissutit agguaanneqarneri

§ 4.  Naalakkersuisut pisassatut aalajangersimasaat naapertorlugu,  kommunalebestyrelsi tikaagulliusaanut piniarsinnaanermut akuersissummik, angallammik piginnittumut, angallammut atia taasamut imaluunniit angallammut aalajangersimasumut tunniussissaaq, takuuk § 14.
Imm. 2.  Naalakkersuisut pisassatut aalajangersimasaat naapertorlugu, kommunalbestyrelsi tikaagullimmik ataatsimik, takuuk § 10, arfivimmik ataatsimik, takuuk § 17 aamma qipoqqarmik ataatsimik, takuuk § 20, pinerit tamaasa licensimik ataatsimik, licensinik normulersukkanik tunniussissaaq, licensimut piginnittumut, angallammik piginnittumut, angallammut atia taasamut imaluunniit angallammut aalajangersimasumut.
Imm. 3.  Tikaagullinniarnissamut arfivinniarnissamut qipoqqarniarnissamullu licensit sumiiffinni kommunalbestyrelsimut qinnuteqareernikkut aammalu nunaqarfinni aqutsisunik sumiiffinnilu aalisartut  piniartullu peqatigiiffiannik tusarniaareernikkut tunniunneqassapput. Licensit normulersukkat tunniunneqassapput, taakkulu Piniarnermut Naalakkesuisoqarfiup kommunalbestyrelsimut nassiutissavai.
Imm. 4.  Kommunimi arfernut angisuunut licensit imaluunniit akuersissutit agguaanneqartut qinnuteqaatinit tiguneqarsimasunit ikinnerussappata tikaagullinniarnissamut agguaassisoqassaaq tulleriiaarilluni, ukiumi siuliani pisarineqarsimasut kiisalu licensit aamma akuersissutit atorneqanngitsut isiginiarlugit.

§ 5.  Arfernut assigiinngiiaartunut taakkununnga sisamanut pisassiissutit tamarmiusut piffissaq piniarfissaq aallartitsinnagu ataatsikkut agguaanneqassapput.
Imm. 2.  Kommunalbestyrelsi tikaagulliusaarniarnissamut akuersissutinik tunniussisinnaavoq inunnut inuussutissarsiutigalugu piniarnermut atuuttumik allagartalinnut, aammalu  akuerisaasumik tuukkartalimmik qamutililimmik angallatilinnut. Angallammik piginnittoq nammineerluni imaluunniit inuttaasoq qaartartumik tuukkap nuuanut ikkuttakkamik atuinissamut pikkorissartitsinermut peqataasimanermut atuuttumik uppernarsaateqassaaq. Akuersissut tassaavoq allagaq kommunalbestyrelsip qinnuteqartumut tikaagulliusaarniarnissamut piumasaqaataasunik naammassinnissimasunut tunniussaa.   
Imm. 3.  Kommunalbestyrelsi arfivinniarnissamut qipoqqarniarnissamullu licensinik tunniussisinnaavoq  inunnut inuussutissarsiutigalugu piniarnermut atuuttunik allagartalinnut, akuerisaasumillu tuukkartalimmik angallataatilinnut, aamma angallammi piginnittumut imaluunniit inuttaasumut tuukkanik qaartartortalinnik atuisinnaanermut pikkorissarsimanermut atuuttumik uppernarsaatilinnut.
Imm. 4.  Kommunalbestyrelsi tikaagullinniarnissamut licensinik tunniussisinnaavoq inunnut inuussutissarsiutigalugu piniarnermut atuuttunik allagartalinnut, imaluunniit: 
1)  angallammut akuerisamik tuukkartalimmik qamutililimmut, piginnittaalu imaluunniit inuttaasut ilaat arfernut atortartut qaartartut atornissaannut pikkorissarsimanermut uppernarsaammik atuuttumik peqartumut, imaluunniit
2)  ataatsimoorluni piniarnissamut immikkut, § 12 malillugu, immikkut akuerineqarsimasumut.
Imm. 5.  Kinaluunniit angallammut tuukkartalimmik qamutililimmut imaluunniit ataatsimoorluni piniarnissamut ataatsikkut licensimik tunineqarsinnaanngilaq.
Imm. 6.  Ataatsimoorluni piniartoqassatillugu piniarnermut naalakkatut toqqarneqartumut licens tunniunneqassaaq. Ataatsimoorluni piniarnermut peqataasussat allat aqqi licensip  tunuani allanneqassapput.
Imm. 7.  Akuersissutit qaammatisiutit malillugu ukiumut ataatsimut atuupput, taamaattorli takuuk § 7, imm. 4.

§ 6.  Kommunalbestyrelsi tikaagullinniarnissami, arfivinniarnissami qipoqqarniarnissamilu pisassanut naapertuuttunik normulikkanik  tunniusereeriarpat, kommunalbestyrelsip Piniarnermut Naalakkersuisoqarfimmut nassiutissavai licenseqartut aqqi, inuttut normui, akuersissutit normui aamma GR-normut pillugit paasissutissat kingusinnerpaamik kommunalbestyrelsip licensinut immersuiffissanik Naalakkersuisoqarfimmiit tigusaqarnerata kingornatigut qaammat ataaseq qaangiutsinnagu.
Imm. 2.   Tikaagullimmik  arfivimmik qipoqqarmillu licensi Kalaallit Nunaata Kitaani aamma Tunumi atorneqassaaq arfeq pisarineqarpat pissanneqarpalluunniit.
Imm. 3.  Licens ukiakkut pisassanik sinneruttunik agguaasseqqittoqartinnagu atorneqarsimanngitsoq pisassanut agguaateqqitassanut ingerlaannartumik ilanngunneqassaaq, tamatumalu kingornatigut licensimik piginnittuusimasumit atorneqarsinnaassanani.
Imm. 4.   Piniarnermut Naalakkersuisoq ukiumi pineqartumi imaluunniit tulliuttumi kommunimi pisassat ikilisissinnaavai paasineqassagaluarpat:
1)  kommunimi akuersissuteqartoqartinnagu tikaagulliusaartoqarsimasoq imaluunniit pissaasoqarsimasoq,
2)  akuersissuteqartoqartinnagu tikaagullimmik, arfivimmik qipoqqarmilluunniit pisaqartoqarsimasoq imaluunniit pissaasoqarsimasoq, imaluunniit
3)  qaammatisiutit ukiuanni akuersissutigineqartunit amerlanerusunik tikaagullittoqarluniluunniit, tikaagulliusaartoqarsimasoq, arfivittoqarsimasoq qipoqqartoqarsimasorluunniit. Tikaagullinnik, tikaagulliusaanik, arfivinnik imaluunniit qipoqqarnik pisassat ikilisinneqarsinnaapput apeqqutaatinnagu arferit sorliit unioqqutitsivigineqarsimanersut.
Imm. 5.  Arfernik eqqissisimatitanik pisaqarneq pissaasoqarsimanerluunniit ukiumi tulliuttumi kommunimi inatsisinik unioqqutitsiviusumi pisassat ikilisinneqarnerannik kinguneqarsinnaavoq. Pisassanik ikilisitsineq tikaagullittassat, tikaagulliusaartassat, arfivittassat qipoqqartassalluunniit ikilisinneqarnerisigut pisinnaavoq.

Licensinik agguaasseqqinneq

§ 7.  Pisassiissutit tamakkerneqarneranni, Piniarnermut Naalakkersuisoq sumiiffinni aalisartut piniartullu peqatigiiffiat tusarniaavigereerlugu aalajangiisinnaavoq, licensi tunniunneqarsimasoq imaluunniit licensit tunniunneqarsimasut kommunip iluani nuunneqassasut imaluunniit atorunnaassasut tamanna pillugu www.nanoq.gl radiulu tusagassiuutilluunniit allat aqqutigalugit, piffissamit nalunaaruteqarfiusumiit atuutilersumik.
Imm. 2.  Nalunaaruteqartoqareerpat licensimik piginnittup imaluunniit licensinik piginnittut licensi imaluunniit licensit kommunalbestyrelsimut tunniutissavaat.
Imm. 3.  Piniarnermut Naalakkersuisup kommunalbestyrelsi imm. 1 naapertorlugu piumaffigisinnaavaa licensit imaluunniit akuersissutit tunniunneqarsimasut atorunnaarseqqullugit, piffissaq eqqorlugu arfernik angisuunik pisanik pissatanillu nalunaarutiginnittarneq pillugu Namminersornerullutik Oqartussat nalunaarutaanni maleruagassat malillugit arferit pisat pissatallu pillugit Naalakkersuisoqarfimmut nalunaaruteqartoqarsimanngippat.
Imm. 4.  Piniarnermut Naalakkersuisoq, Kalaallit Nunaanni Aalisartut Piniartullu Kattuffiannut (KNAPK-mut) aamma Kommunit Kattuffiannut (KANUKOKA-mut) siumut tusarniaareerluni www.nanoq.gl radio tusagassiorfiillu allat aqqutigalugit nalunaaruteqarsinnaavoq, licensit atortussanngortinneqarsimasut kommunip iluani imaluunniit kommunemut allamut nuunneqartut imaluunniit atorunnaarsinneqartut, piffissaq nalunaaruteqarfiusoq aallarnerfigalugu. Licensit tamassuma kingorna utertinneqassapput, takuuk imm. 2.

Pisassanik agguaasseqqinneq

§ 8.  Piniarnermut Naalakkersuisoq, KNAPK aamma KANUKOKA tusarniaavigereerlugit tikaagulliit, tikaagulliusaat, arfiviit aamma qipoqqaat pisassat sinneruttut agguaateqqissavai. Tikaagulliit, tikaagulliusaat aamma qipoqqaat pillugit kingusinnerpaamik agguaasseqqittoqassaaq qaammatisiutit ukiuini tamani septembarip aallaqqaataani. Arfanniarneq, agguaasseqqinnissaq ullormik ataatsimik sioqqullugu inerteqqutaavoq, aatsaallu aallarteqqinneqarsinnaalluni kommunalbestyrelsi najukkami aalisartut peqatigiiffiat tusarniaavigereerlugu nutaamik agguaasseqqereerpat tamanullu nalunaaruteqareerpat.
Imm. 2.  Agguaasseqqinneq tamatumanilu piumasaqaatit pillugit nalunaarut www.nanoq.gl  aqqutigalugu tamanut tusarliunneqassaaq sapinngisamillu radio tusagassiorfiillu allat aqqutigalugit.
Imm. 3. Nalunaaruteqartoqareerpat licensimik pigisaqartup imaluunniit licensinik pigisaqartut akuersissutit kommunalbestyrelsimut tunniutissavaat.
Imm. 4.  Piffissami augustip ulluisa 15-ianniit agguaasseqqinnissap tungaanut tikaagullinniartoqarnissaa, tikaagulliusaarniartoqarnissaa, arfivinniartoqarnissaa qipoqqarniartoqarnissaalu eqqarsaatigalugit kommunalbestyrelsit ataasiakkaat pisassaminnik sinneruttunik akunnerminni agguaasseqqissinnaapput. Agguaasseqqinneq pissaaq kommunini pineqartuni najukkani aalisartut piniartullu peqatigiiffii tusarniaavigereerlugit.
Imm. 5.  Kommuneqarfik Sermersuumi, aqutsiveqarfinni Tasiilami aamma Ittoqqortoormiuni nunap immikkoortuani inuussutissarsiornermut allaffiup sumiiffinni KNAPP-it suleqatigalugit 1. augustip kinguninngua Kalaallit Nunaanni Tunumi pisassiissutinik agguaasseqqinnissaq akunnerminni oqallisigisinnaavaat.
Imm. 6.  Imm. 3 aamma 4 naapertorlugu agguaasseqqissinnaanerit pillugit aalajangiinerit allakkatigut kingusinnerpaamik agguaasseqqinnissaq sapaatip akunneranik ataatsimik sioqqullugu Piniarnermut Naalakkersuisoqarfimmut nalunaarutigineqassapput. Taamatuttaaq pisassanik sinneruttunik agguaasseqqinnerup inernera nalunaarutigineqassaaq.
Imm. 7.  Piniarnermut Naalakkersuisup, KNAPK aamma KANUKOKA tusarniaaffigereerlugit, www.nanoq.gl aamma radio tusagassiorfiilluunniit allat aqqutigalugit nalunaaru­teqarsinnaavoq licensit tunniunneqarsimasut kommunimut allamut imaluunniit kommunip iluani nuunneqartut imaluunniit ullormi nalunaarutip naalunaarutigineqarneraniit atorunnaartut. Tamatuma kingorna licensit utertinneqassapput, takuuk imm. 3.

Kapitali 5
Arfernik piniarneq

Tikaagulliit

§ 9.  Piniarnermut Naalakkersuisup KNAPK KANUKOKA-lu tusarniaaffigereerlugit ukiut tamaasa nalunaarutigisarpai Kitaani Tunumilu amerlanerpaamik tikaagulliit qassit qaammatisiutit malillugit ukioq taanna pisarineqarsinnaassanersut.

§ 10.  Tikaagullit taamaallaat pisarineqarsinnaapput piffissami 1. aprilimiit 31. decemberimut, ullut taaneqartut ilanngullugit.
Imm. 2.  Tikaagulliit piaqqisarpata arnavissat piaqqalluunniit eqqaanneqarnatillu pisarineqassanngillat.
Imm. 3.  Taamaallaat inuit licensimik peqartut akuerisanillu tikaagullinniarnissamut atortoqartut tikaagullinniarsinnaapput, takukkit §§ 4, 11 aamma 22. Atortut ingerlatsivinnit  Piniarnermut Naalakkersuisoqarfiup taamaaliornissamut pisinnaatissimasaanit akuerineqarsimasuussapput.

Tikaagullinniarnermi atortut

§ 11.  Angallatit tuukkartalimmik qamutilillit tikaagullinniarnermut ilaasut 9,2 meterit (t.t.) aamma 22,0 meterit (t.t.) akornanni tamakkerlugu takissuseqassapput (t.t.), ningittakkanut qalorsuarnulluunniit amooruteqassallutik minnerpaamik tonsinik marlunnik kivitsisinnaasunik, imaluunniit angallatit kraftblokimik atortuligaasimassallutik.
Imm. 2.  Angallatit imm. 1-imi taaneqartut Søfartsstyrelsemi GR-normulerlugit nalunaarsorsimassapput, radiukkut kaldesignaleqassallutik piginnittuilu nalunaarsorsimasuussallutik.
Imm. 3.  Tikaagullinniarnermi taamaallaat qamutillit tuukkartallit 50 mm-imik sulloqqortussusillit tikaagullinnut atugassamik qaartartortallit atorneqarsinnaapput, takukkit §§ 22 aamma 23. Qaartartut arfernut atugassat Piniarnermut Naalakkersuisumit akuerineqarsimasuussapput.
Imm. 4.  Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit taamaattunik pisisinnaallutillu passussisinnaapput.
Imm. 5.  Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 4 naapertorlugu atuuttumik uppernarsaammik, kiisalu ukiumut pineqartumut akuersissummik atuuttumik takutitsisoqarneratigut.
Imm. 6.  Tikaagullik  ikiligaq toqunneqanngitsorli sapinngisamik piaartumik toqunneqassaaq. Toqutsineq pissaaq niaquatigut aallaallugu, tuukkarmik qaartartortalimmik imaluunniit qoorortuumik minnerpaamik 7,62x63 mm-imik (.30-06) sulloqqortussusilimmik.
Imm. 7.  Akuersissumik pigisaqartoq piffissaq naleqquttoq sioqqullugu piniarnermut pilersaarummik ullormillu piniarnermik aalisarnermillu nakkutilliisumut sumiiffimmi qaninnermut nalunaaruteqassaaq.

Ataatsimoorluni tikaagullinniarneq

§ 12.  Piniarnermut Naalakkersuisoq akuersisinnaavoq ataatsimoorluni piniarnermi amerlanngitsunik qamutilimmik tuukkartalimmik sakkoqanngikkaluarluni tikaagullittoqarsinnaaneranut. Taamatut akuerinnittoqarsinnaavoq piniarneq nunaqqatigiinnut annertuumik pingaaruteqarpat aamma nunaqqatigiit angallatinit tuukkartalinnik qamutililinnit neqinik nutaanik naammattumik pilersorneqarsinnaanngippata.
Imm. 2.  Piniarnermut Naalakkersuisup ataatsimoorluni tikaagullinniarnermut immikkut akuersissutit aalajangersarneqarsimasut kommuninut agguaatissavai KNAPK aamma KANUKOKA tusarniaavigereerlugit, nunamut tamarmut pisassat tamarmiusut agguaannerannut peqatigitillugu.
Imm. 3.  Kommunip ataatsip iluani ataatsimut licensinik agguaassinermi nunaqarfiit salliutinneqartassapput tulliullugillu illoqarfiit tuukkartalinnik qamutililinnik angallateqanngitsut.
Imm. 4.  Taamaallaat umiatsiaaqqamik pigisallit ataatsimoorluni tikaagullinniarsinnaanermut akuersissummik tunineqarsinnaapput.
Imm. 5.  Akuersissuteqarnermut piumasaqaataapput:
1)  piniarneq ataatsimoorluni piniarnertut aaqqissuunneqassasoq ikinnerpaamik umiatsiaaqqat tallimat piniarnerni ataasiakkaani peqataatillugit,
2)  angallatit tuukkartalinnik qamutileqanngitsut 9,2 meterit (t.t.) tikillugit angissusillit ataatsimoorluni piniarnermut peqataasinnaapput, kisiannili angallatitut siuuttuutinneqassanatik,
3)  piniarneq qoorortuut minnerpaamik 7,62x63 mm-imik (.30-06) sulloqqortussusillit atorlugit ingerlanneqassaaq,
4)  umiatsiaaqqat tamarmik unaaqassapput alertalinnik avataqassallutillu pisap kivisinnginnissaanut naammattunik,
5)  angallatit ataatsimoorluni piniarnermut peqataasut taamatuttaaq ningittakkanut qalorsuarnulluunniit amoortaateqassapput minnerpaamik tonsinik marlunnik qaqitsissutaasinnaasunik kraftblokimilluunniit atortuligaassallutik,
6)  piniarneq ingerlanneqassasoq naalakkamit agguaanermut atatillugu najukkami aalisartut piniartullu peqatigiiffiannit kommunimillu umiatsiaaqqanik piginnittut akornannit toqqarneqartumit licensimillu piginneqataasunit tamanit siumut ilisimaneqartumit aqunneqarluni,
7)  piniarneq aallartinneqassanngilaq ataatsimoorluni piniarnermut peqataasussat licensimik piginneqataasut tamarmik piniarnerup aallartinnissaanik kalerrinneqareertinnagit,
8)  tikaagullik sapinngisamik pilertortumik toqusarneqassaaq, aamma
9)  licensimik piginneqataasut pisaqarnermi peqataasut pisap agguarneqarnerani ilaatinneqassapput.
Imm. 6.  Licensimik pigisaqartoq piffissaq naleqquttoq sioqqullugu piniarnermut pilersaarummik ullormillu piniarnermik aalisarnermillu nakkutilliisumut sumiiffimmi qaninnermut nalunaaruteqassaaq.

Tikaagulliusaat

§ 13.  Piniarnermut Naalakkersuisoq ukiut tamaasa KNAPK aamma KANUKOKA tusarniaavigereerlugit nalunaarutigisassavaa qaammatisiutit malillugit ukiumi tassani Kalaallit Nunaata Kitaani tikaagulliusaat amerlanerpaamik qassit pisarineqarsinnaanersut.

§ 14.  Taamaallaat tikaagulliusaat 15,2 meterinit takinerusut eqqaanneqarlutillu pisarineqarsinnaapput piffissami 1. januarimiit 31. decemberimut, ullut taaneqartut ilanngullugit.
Imm. 2.  Tikaagulliusaat piaqqisarpata arnavissat piaqqalluunniit eqqaanneqarnatillu pisarineqassanngillat.
Imm. 3.  Taamaallaat inuit akuersissummik peqartut akuerisanillu tikaagulliusaarniarnissamut atortoqartut tikaagulliusaarniarsinnaapput, takukkit §§ 4, 15 aamma 22. Atortut ingerlatsivinnit Piniarnermut Naalakkersuisoqarfiup taamaaliornissamut pisinnaatissimasaanit akuerineqarsimasuussapput.

Tikaagulliusaarniarnermi atortut

§ 15.  Angallatit tikaagulliusaarniarnissamut akuerisat ukuupput:
1)  Angallat minnerpaamik 11,0 meter t.t.-imik takissusilik.
2)  Tikaagulliusaamut ataatsimut angallatit marluk tamarmik minnerpaamik 9,2 meterinik (t.t.) takissusillit.
Imm. 2.  Angallatit imm. 1-imi taaneqartut Søfartsstyrelsemi GR-normulerneqarlutik nalunaarsorsimassapput, radiukkut kaldesignaleqarlutik nalunaarsorsimasumillu piginnitseqarlutik.  
Imm. 3.  Angallatit imm. 1-imi taaneqartut qamutilinnik tuukkartalinnik aamma ningittakkanut qalorsuarnulluunnit amoorutinik minnerpaamik tonsinik tallimanik qaqitsisinnaassusilinnik amooruteqassapput imaluunniit kraftblokimik atortuligaassallutik. Angallatit tamarmik aleqassapput sioqutalimmik avataqassallutillu pisarineqartup kivisinnginnissaanut naammattunik.
Imm. 4.  Tikaagulliusaarniarnermi taamaallaat atorneqarsinnaapput qamutillit tuukkartallit minnerpaamik 50 mm-inik sulloqqortussusillit tuukkallu nuuatigut ikkuttakkanik tikaagulliusaamut atortakkamik qaartartortallit, takukkit §§ 22 aamma 23. Qaartartut, Piniarnermut Naalakkersuisumit akuerineqarsimasuussapput.
Imm. 5.  Tikaagulliusaarniarnerit tamaasa tuukkamik qaartartortalimmik allamik piareersimatitsisoqassaaq.
Imm. 6.  Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit qaartartunik taamaattunik pisisinnaallutillu passussisinnaapput.
Imm. 7.  Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 6 naapertorlugu atuuttumik uppernarsaammik, kiisalu ukiumut pineqartumut akuersissummik atuuttumik takutitsisoqarneratigut.
Imm. 8.  Tikaagulliusaaq ikiligaq toqunneqanngitsorli sapinngisamik piaartumik toqunneqassaaq. Toqutsineq pissaaq tuukkaq qaartartortalik atorlugu niaquatigut qaartartortalimmik tuukkartalerlugu.
Imm. 9.  Akuersissumik pigisaqartoq piffissaq naleqquttoq sioqqullugu piniarnermut pilersaarummik ullormillu piniarnermik aalisarnermillu nakkutilliisumut sumiiffimmi qaninnermut nalunaaruteqassaaq.

Arfiviit

§ 16.   Piniarnermut Naalakkersuisoq KNAPK KANUKOKA-lu tusarniaaffigereerlugit ukiut tamaasa nalunaarutigisarpai Kitaani arfiviit qassit qaammatisiutit malillugit ukioq taanna pisarineqarsinnaassanersut.

§ 17.  Taamaallaat arfiviit inersimasut eqqaallugillu piniarneqarsinnapput piffissami 1. aprilimiit 31. decemberimut, ullut taaneqartut ilanngullugit.
Imm. 2.  Arfiviit piaqqisarpata arnaat piaraalluunniit eqqaanneqarnatillu pisarineqassanngillat.
Imm. 3.  Taamaallaat inuit licensimik peqartut akuerisanillu arfivinniarnissamut atortoqartut arfivinniarsinnaapput, takukkit §§ 4, 18 aamma 22. Atortut ingerlatsivinnit Piniarnermut Naalakkersuisoqarfiup taamaaliornissamut pisinnaatissimasaanit akuerineqarsimasuussapput.

Arfivinniarnermi atortut

§ 18.  Angallatit arfivinniarnissamut akuerisat ukuupput:
Arfivimmut ataatsimut angallatit pingasut tamarmik minnerpaamik 11,0 meter takissuseq tamakkerlugu (t.t.) takissusillit.
Imm. 2.  Angallatit imm. 1-imi taaneqartut Søfartsstyrelsenimi GR-normulerneqarlutik nalunaarsorsimassapput, radiukkut kaldesignaleqarlutik nalunaarsorsimasumillu piginnitseqarlutik.
Imm. 3.  Angallatit imm. 1-imi taaneqartut qamutilinnik tuukkartalinnik aamma ningittakkanut qalorsuarnulluunnit amoorutinik minnerpaamik tonsinik tallimanik qaqitsisinnaassusilinnik amooruteqassapput imaluunniit kraftblokimik atortuligaassallutik. Angallatit tamarmik aleqassapput sioqutalimmik avataqassallutillu pisarineqartup kivisinnginnissaanut naammattunik.
Imm. 4.  Arfivinniarnermi taamaallaat atorneqarsinnaapput qamutillit tuukkartallit min-nerpaamik 50 mm-inik sulloqqortussusillit tuukkallu nuuatigut ikkuttakkanik tikaagulliusaamut atortakkamik qaartartortallit, takukkit §§ 22 aamma 23. Qaartartut Piniarnermut Naalakkersuisumiit akuerineqarsimasuussapput.
Imm. 5.  Arfivinniarnerit tamaasa angallatit arfivinniarnermi ilaasut tuukkamik qaartartortalimmik allamik piareersimatitsisoqassaaq.
Imm. 6.  Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit taamaattunik pisisinnaallutillu passussisinnaapput.
Imm. 7.  Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 6 naapertorlugu atuuttumik uppernarsaammik, kiisalu ukiumut pineqartumut normulikkamik licensimik atuuttumik takutitsisoqarneratigut.
Imm. 8.  Arfivik  ikiligaq toqunneqanngitsorli sapinngisamik piaartumik toqunneqassaaq. Toqutsineq pissaaq tuukkaq qaartartortalik atorlugu sakiaatigut qaartartortalimmik tuukkartalerlugu.
Imm. 9.  Licensimik pigisaqartoq piffissaq naleqquttoq sioqqullugu piniarnermut pilersaarummik ullormillu piniarnermik aalisarnermillu nakkutilliisumut sumiiffimmi qaninnermut nalunaaruteqassaaq.

Qipoqqaat

§ 19.  Piniarnermut Naalakkersuisoq, KNAPK KANUKOKA-lu tusarniaaffigereerlugit ukiut tamaasa nalunaarutigisarpai Kitaani qipoqqaat qassit ukioq taanna pisarineqarsinnaassanersut.

§ 20.  Taamaallaat qipoqqaat inersimasut eqqaallugillu piniarneqarsinnaapput piffissami 1. januarimiit 31. decemberimut, ullut taaneqartut ilanngullugit.
Imm. 2.  Qipoqqaat piaqqisarpata arnaat piaraalluunniit eqqaanneqarnatillu pisarineqassanngillat.
Imm. 3.  Taamaallaat inuit normulikkamik licensiuteqartut qipoqqarniarnissamullu atortunik akuerisanik peqartut qipoqqarniarsinnaapput, takukkit §§ 4, 21 aamma 22. Atortut, ingerlatsivinnit, Piniarnermut Naalakkersuisup taamaaliornissamut pisinnaatissimasaanit akuerineqarsimasuussapput.

Qipoqqarniarnermi atortut

§ 21.  Angallatit qipoqqarniarnissamut akuerisat ukuupput:
1)  Angallat ataaseq minnerpaamik 11,0 meterimik (t.t.) takissusilik
2)  Qipoqqarmut ataatsimut angallatit ikinnerpaamik marluk tamarmik minnerpaamik 9,2 meter-inik (t.t.) takissusillit.
Imm. 2.  Angallatit imm. 1-imi taaneqartut Søfartsstyrelsenimi GR-normulerneqarlutik nalunaarsorsimassapput, radiukkut kaldesignaleqarlutik nalunaarsorsimasumillu piginnitseqarlutik.
Imm. 3.  Angallatit imm. 1-imi taaneqartut qamutilinnik tuukkartalinnik aamma ningittakkanut qalorsuarnulluunniit amoorutinik minnerpaamik tonsinik tallimanik qaqitsisinnaassusilinnik amooruteqassapput imaluunniit kraftblokimik atortuligaassallutik. Angallatit tamarmik aleqassapput sioqutalimmik avataqassallutillu pisarineqartup kivisinnginnissaanut naammattunik.
Imm. 4.  Qipoqqarniarnermi taamaallaat atorneqarsinnaapput qamutillit tuukkartallit min-nerpaamik 50 mm-inik sulloqqortussusillit tuukkallu nuuatigut ikkuttakkanik qipoqqarniarnermut atortakkamik qaartartortallit, takukkit §§ 22 aamma 23. Qaartartut Piniarnermut Naalakkersuisumiit akuerineqarsimasuussapput.
Imm. 5.  Qipoqqarniarnerit tamaasa tuukkamik qaartartortalimmik allamik piareersimatitsisoqassaaq.
Imm. 6.  Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit taamaattunik pisisinnaallutillu passussisinnaapput.
Imm. 7.  Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 6 naapertorlugu atuuttumik uppernarsaammik, kiisalu ukiumut pineqartumut normulikkamik licensimik atuuttumik takutitsisoqarneratigut.
Imm. 8.  Qipoqqaq  ikiligaq toqunneqanngitsorli sapinngisamik piaartumik toqunneqassaaq. Toqutsineq pissaaq tuukkaq qaartartortalik atorlugu niaquata nalaatigut qaartartortalimmik tuukkartalerlugu.
Imm. 9.  Licensimik pigisaqartoq piffissaq naleqquttoq sioqqullugu piniarnermut pilersaarummik ullormillu piniarnermik aalisarnermillu nakkutilliisumut sumiiffimmi qaninnermut nalunaaruteqassaaq.

Qamutillit tuukkartallit ataatsimut isigalugit

§ 22.  Qamutillit tuukkartallit tikaagullinniarnermut, tikaagulliusaarniarnermut, arfivinniarnermut qipoqqarniarnermullu atorneqartut teknikikkut atorsinnaassutsimikkullu akornuteqassanngillat, taamaalilluni inuit ajoquseriataarnissaannut ulorianartorsiortitsissanatik. Taamatuttaaq piniarnermut atortut imatut siunertarineqartunut naleqqutsigissapput arfermik toqusaaneq sapinngisamik sukkanerpaamik pisinnaassalluni.
Imm. 2.  Qamutilimmik tuukkartalimmik angallammut ikkussineq tamatigut suliffeqarfimmit Piniarnermut Naalakkersuisumit taamaaliornissamut piginnaatinneqarsimasumit akuersissutigineqarsimassaaq.

§ 23.  Qamutillit tuukkartallit tamarmik ukioq allortarlugu ingerlatsivimmit Piniarnermut Naalakkersuisumiit taamaaliornissamut piginnaatinneqarsimasumit misissorneqarlutillu akuerineqartassapput. 

Akuersissuteqarluni arfernik toqutsisariaqarneq

§ 24.  Arfernik angisuunik annertuumik ikilikkanik toqulersunik, qassutini aalisarnermulluunniit atortuni allani ilagussimasunik sassaasunilluunniit toqutsineq siumut Piniarnermut Naalakkersuisumit akuersissuteqarfigineqareerluni pisinnaavoq.
Imm. 2.  Maleruaqqusanik unioqqutitsinani tikaagullimmik, tikaagulliusaamik, arfivimmik imaluunniit qipoqqarmik pisaqarnermi, pisaq inunnit nerissallugu piukkunnanngitsoq paasinarsissagaluarpat, pisap nappaateqarneranik imaluunniit allamik pissuteqartumik, Piniarnermut Naalakkersuisoq akuersissuteqarsinnaavoq, pisaq toqutsinertut isigineqarsinnaasoq. Pisaqarnermi normulikkamik licensi imaluunniit akuersissut atorneqarsimappat taanna atuutiinnassaaq.
Imm. 3.  Imm. 1 aamma imm. 2 malillugit arferit toqunneqartut atorneqarnissaannut piumasaqaatit Piniarnermut Naalakkersuisumit aalajangersarneqassapput.

Kapitali 6
Pilaffik pisallu atorluarneqarnissaat

Pilaffik

§ 25.  Kommunalbestyrelsi piffimmi aalisartut piniartullu peqatigiiffiat tusarniareerlugu arfernut angisuunut pilattarfinnik akuerisaasunik toqqaanissamut akisussaasuuvoq.
Imm. 2.  Arfanniarnermi angallammi ittuusup arfermik pisaqarfimmiit pilaffissamut ungasissuseq qaninnerpaanissaa nakkutigissavaa, asiutitsisoornissaq taamaasillunilu annaasaqarnissaq pinaveersaartinniarlugu.

Pisamik atorluaanissaq

§ 26.  Kikkulluunniit arfermik angisuumikpisaqartut pisarineqartup nerineqarsinnaasortai tamaasa iluaqutigissallugit pisussaapput. Pisarineqartoq tamakkerlugu atorneqarsinnaanngippat tunineqarsinnaanani­luunniit pisaqartoq pisussaavoq sinneruttut pisaqarfiusumi najugaqartunut tunniutissallugit.
Imm. 2.  Arfermik pilanneq kiisalu arferup perlukuinik eqqaaneq inuussutissalerinermi nakkutilliinermik inatsisit avatangiisillu illersorneqarnissaat pillugu inatsisit malillugit pissaaq. Arferup saanikuinik saliinissaq siunertaralugu arferup timaanik inissiigallartarneq pissaaq Piniarnermut Naalakkersuisoq aamma kommunemi oqartussat isumaqatigiissuteqarfigalugit.

Kapitel 7
Pisanik nalunaarsuineq, tunitsivinnut tunisineq aamma tuniniaaneq

Nalunaarsuineq

§ 27.  Tikaagulliit, tikaagulliusaat, arfiviit qipoqqaalluunniit pisarineqartut tuniniarneqalissanngillat kommunip allaffia taassumaluunniit immikkoortortaqarfia licensimi naqitsimmik naqissusiilluni pisarineqartunik nalunaarsuereertinnagu.
Imm. 2.  Qamutilimmik tuukkartalimmik piniarnissamut licensimik  akuersissummilluunniit  piginnittoq naqitsimmik naqissusiisoqartinnagu pisussaavoq tuukkarmik qaartartortalimmik pisiami allagartaa  takutissallugu kiisalu qaartartut atoriikkani takutissallugit normuisa misissorneqarnissaat siunertaralugu.
Imm. 3.  Pisamik imaluunniit ilaanik tuniniaallunilu pisisoqassanngilaq licensimik piginnittoq normulikkamik licensip assilineranut, tuniniaanerup pinerani takuneqarsinnaasussap uppernarsaatitut atsiortinnagu, taannalu qinnuiviginnittoqarneratigut takutinneqarsinnaassaaq. Assilinerani takuneqarsinnaassaaq, pisaq kommunimi oqartussaasunit nalunaarsorneqarsimasoq.
Imm. 4.  Taamaattorli allaffiup ammanerata avataatigut tuniniaasoqalersinnaavoq, allaffiup ammarnerata kingornatigut piaartumik nalunaarsuisoqassappat.

Tunisineq

§ 28.  Angallatit, arferit angisuut nerisassartaannit tuniniaanermut tunitsivittut atorneqassanngillat.
Imm. 2.  Tunitsivinnut akuerisaasunut inuussutissarsiutigalugu piniartut piniarnermut allagartamik atuuttumik licensimillu naqissusersimasumik takutitsisinnaasut kisimik pisanik tunisisinnaapput, tak. § 27, imm. 1 aamma 3.
Imm. 3.  Kommuninut pisassiivigineqarsimasunut pisassiissutit iluanni pisassiissutinik tunineqarsinnaasunik Naalakkersuisut aalajangersaasinnaapput.
Imm. 4.  Pisassiissutinik tunineqarsinnaasunik aalajangersaasoqarsimappat tunisiviit piffissami tunisisinnaanermik akuersissuteqarfiusumi tunisat annertussusaat Piniarnermut Naalakkersuisoqarfimmut ullut tamaasa nalunaarutigisassavaat.
Imm. 5.  Kommunimi aqutsiveqarfimmiluunniit pineqartumi tunisineq qaqugukkut unitsinneqassanersoq www.nanoq.gl aqqutigalugu Piniarnermut Naalakkersuisup tamanut nalunaarutigissavaa.

Tuniniaaneq

§ 29.  Najukkami atuisunut, taassuma ataani suliffeqarfinnut nerisassanik pajuttuisunut, neriniartarfinnut, paaqqinnittarfinnut assigisaaluunniit kiisalu kalaalimineerniarfinni allatullu tuniniaaneq inuussutissarsiutigalugu piniartunit atuuttumik piniarnermut allagartalinnit pisaqarnissamullu akuersisummik naqissusikkamik peqartunit taamaallaat ingerlanneqarsinnaavoq, tak. § 27, imm. 1 aamma 3, imaluunniit inunnit tamatumunnga piginnaatitaasunit piumasaqarneq naapertorlugu uppernarsaammik takutitsisinnaasunit.
Imm. 2.  Toqqaannartumik suliffinnut, tunisineq inuussutissarsiutigalugu piniartunit, suliffeqarfiit inuussutissaleriffiusut pillugit inatsisit naapertorlugit akuerineqarsimasut aamma atuuttumik inuussutissarsiutigalugu piniarnermut allagartalinnit pisaqarnissamullu akuersissummik naqissusikkamik peqartunit taamaallaat ingerlanneqarsinnaavoq, tak. § 27, imm. 1 aamma 3, imaluunniit inunnit tamatumunnga piginnaatitaasunit piumasaqarneq naapertorlugu uppernarsaammik takutitsisinnaasunit.
Imm. 3.  Suliffeqarfiit nerisassanik pajuttuisut, neriniartarfiit, pisortat suliffeqarfiutaat paaqqinnittarfiit assigisaaluunniit, kiisalu suliffeqarfinnut,  imm. 2-mi taaneqartut arferup neqaa, orsua, qiporaa mattaaluunniit inuussutissarsiutigalugu piniarnermut allagartalimmit atuuttumik licensimillu naqissusikkamik imaluunniit akuersissumik peqartunit pisiaasimanera uppernarsarsinnaassavaat, tak. § 27, imm. 1 aamma 3.
Imm. 4.  Uppernarsaatit, imm. 1-3-mi pineqartut tassaapput pisinermut uppernarsaatit atsiorneqarsimasut inuussutissarsiutigalugu piniarnermut allagartap piniarsinnaanermullu normulikkamik licensip imaluunniit akuersissutip naqissusersimasup assilineranik ilallit.

§ 30.  Inuussutissarsiutigalugu piniarsinnaanermut allagartat, licensit, akuersissutit imaluunniit tunisisinnaanermut akuersissutit tamatigut politiit, piniarnermut aalisarnermullu nakkutilliisut inuillu taamatut pisinnaatinneqartut qinnuiginninnerisigut takutinneqarsinnaassapput.

Kapitel 8
Uumasorsiuunit misissugassat assillu

§ 31.  Kinaluunniit arfermik angisuumik pisaqarsimasoq pisussaavoq pisap mattaanik aamma neqaanik anginngitsunik misissugassanik kommunip allaffianut tunniussissalluni pilannerup kingornatigut piaartumik pisap suunera, ulloq sumilu pisarineqarsimanera nalunaarutigalugit. Misissugassat Pinngortitaleriffiup plastikkimik puussarititaanut tunniunneqarsimasumut asiunaveersaammik imerpalasortalimmut ikineqassapput.
Imm. 2.  Misissugassat paasissutissallu tunniunneqartut kommunip allaffiata Pinngortitaleriffimmut, Box 570, 3900 Nuuk, tigunerisa kingornatigut erniinnaq ingerlateqqillugit nassiutissavai.

Kapitel 9
Arfernik takornarniartitsisarneq

§ 32.  Kommunemi ileqqoreqqusanik arfanniarneq aamma arfernik takornarniartitsineq pillugu kommunalbestyrelsi atulersitsisinnaavoq.

 

Kapitel 10
Kommunemi ileqqoreqqusaq

§ 33.  Kommunalbestyrelsip nunaqarfimmi aqutsisut aamma najukkami aalisartut piniartullu peqatigiiffiat tusarniaaffigereerlugit kommunip ileqqoreqqusaatigut piumasaqaatinik aalajangersaasinnaavoq, § 4, § 5, § 8, imm. 3 aamma 4, § 12, §§ 25-27, kiisalu § 32-miittunit sukanganerusunik.
Imm. 2.  Kommunip ileqqoreqqusai Piniarnermut Naalakkersuisumit atortussangortinneqassapput.

Kapitel 11
Immikkut akuersissuteqartarneq

§ 34.  Piniarnermut Naalakkersuisoq ilisimatusarnermut atugassanik nalunaarummi matumani aalajangersakkanik immikkut saneqqutsisoqarnissaanut akuersissuteqarsinnaavoq.

Kapitel 12
Nalunaaqutsersuineq, nunanut allanut annissuineq pineqaatissiissutillu

§ 35.  Misissugassanik tigusineq, nalunaaqutsersuineq suliallu allat arfernik angisuunik uumasunik attuumassuteqartut taamaallaat Pinngortitaleriffimmit ingerlanneqarsinnaapput. Inuit allat Piniarnermut Naalakkersuisumit akuersissuteqarnissamik qinnuteqaqqaassapput.

§ 36.  Uumasunik nujuartanik naasunillu nungutaariaannarnik niuerneq pillugu isumaqatigiissut 3. Marts 1973-imeersoq (Washingtonimi isumaqatigiissut aamma CITES) malillugu arferit angisuut neqaannik niuernikkut iluanaarniuteqarnermik siunertaqartumik nunanut allanut annissineq inerteqqutaavoq. Taamaattorli arferit angisuut § 31 naapertorlugu pisarineqartut ilamerngi nunanut allanut anninneqarsinnaapput.

§ 37.  §§ 2-3, § 6 imm. 2 aamma 3, § 7, imm. 2 aamma 4, § 8, imm. 3 aamma 6, §§ 9-22, §§ 24-31, § 35 aamma § 36-nik unioqqutitsisumut Kalaallit Nunaanni pinerluttulerinermut inatsit malillugu pillaammik akiligassiisoqarsinnaavoq pisamillu arsaarinnittoqarsinnaalluni.
Imm. 2.  Nalunaarut malillugu kommunini ileqqoroqqusalianik unioqqutitsineq pillaammik akiligassiisoqarsinnaavoq pisanillu Kalaallit Nunaanni pinerluttulerinermut inatsit malillugu arsaarinnittoqarsinnaalluni.

Kapitel 13
Atuutilernera

§ 38.  Nalunaarut 20. februar 2013 atuutilerpoq.
Imm. 2.  Peqatigitillugu arfernik angisuunik illersuineq piniarnerlu pillugu Namminersorlutik Oqartussat nalunaarutaat nr. 11, 16. juli 2010-meersoq atorunnaarsinneqarpoq.
Imm. 3.  Licensit akuersissutillu nalunaarutip atuutilernerani suli atuuttut nalunaarummi matumani aalajangersakkat naapertorlugit ingerlaannassapput.

Namminersorlutik Oqartussat, ulloq 7. februar 2013.

Ane Hansen

/

Jens K. Lyberth