§ 1

Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut Inatsisaanni nr. 10, 19. maj 2010-imeersumi uku allanngortinneqarput:

1.  § 27-mi imm. 5-tut ikkunneqassaq:
”Imm. 5.  Naalakkersuisut soraarummeernerit aamma misilitsinnerit pillugit malittarisassaliorsinnaapput, taakkununnga ilaatigut ilanngullugit suliassiissutinik suliaqarneq, naliliinerit, soraarummeersitsinerit, soraarummeertut kikkuunerinik aalajangiinerit, tamanut ammassuutitsinissaq, karakteerit taakkulu soraarummeernerni angusani oqimaaqatigiissinnerat, soraarummeernermut nalunaarneq, soraarummeernermut peqataassagaanni piumasaqaatit, soraarummeernissamut peqataasinnaannginneq, soraarummeernissamut pilersaarusiornerit, ikiuutissanik atortoqarneq, napparsimalluni soraarummeerneq, soraarummeeqqinnerit, soraarummeernermit peersitaanerit, maalaaruteqarneq imaluunniit maalaaruteqarnissamut piffissaliussat pillugit aalajangersakkat.”

2.  § 42, ima oqaasertaqassaaq:
”§ 42.  Qitiusumik ilinniarfiit ukioq naatsorsuiffik naatsorsuusiorfigaat. Qitiusumik ilinniarfiit Namminersorlutik Oqartussat missingersuutit, naatsorsuussiornerit aamma naatsorsuutinik saqqummiinerit pillugit aalajangersagaat qaqukkulluunniit atuuttut malittarissavaat.
Imm. 2.  Ingerlatsinermut naatsorsuutini aningaasanut inatsimmit aningaasaliissutinik atuinerit immikkut naatsorsorneqartassapput.
Imm. 3.  Ingerlatsinermut naatsorsuutit imarissavaat qitiusumik ilinniarfiup ilinniartitsinermut aamma ingerlatsinernut allanut immikkut naatsorsuutai, tamatumunnga ilanngullugit ingerlatsinerit allat suussusii malillugit immikkut naatsorsuutit.
Imm. 4.  Ilinniarfiup ilinniartitsinermut ingerlassanullu allanut naatsorsuutaasa avissaartinneqarnissat pillugu Naalakkersuisut malittarisassanik aalajangersaasinnaapput.
Imm. 5.  Qitiusumik ilinniarfiit aningaasat aningaasanut inatsisimmi annertussusilerneqartut iluanni, ilinniarfiup ingerlanneqarnerani sinneqartoorutaajunnartut amigartoorutaajunnartulluunniit ukiumut aningaasaliiffiusumut tullermut nuussinnaavaat.
Imm. 6  Ingerlatsinermut naatsorsuutit Namminersorlutik Oqartussat kukkunersiuisuinit kukkunersiorneqassapput.
Imm. 7.  Naalakkersuisut piffissaliussatut aalajangiussaat nallertinnagu ingerlatsinermut naatsorsuutit siulersuisunit akuersissutigineqareersimasut kukkunersiuinermit oqaaseqaatitaallit, siulersuisut Naalakkersuisunut akuerisassanngorlugit saqqummiutissavaat.
Imm. 8.  Siulersuisut ingerlatsinermut naatsorsuutit saqqummiunnerisa ilutigisaannik naatsorsuutit tamanut saqqumiutissavaat.”

3. § 44-mi imm. 3-tut inissinneqassaaq:
”Imm. 3: Naalakkersuisut suliamik ilisimasalittut ingerlatsiffimmit inassuteqartoqareerneratigut, suliffeqarfiit ilinniakkanut inuutissarsiutinik imaluunniit qitiusumik ilinniarfimmut attuumanngitsut sungiusarluni suliffissatut akuerisinnaavaat”.

4. § 45-mi ”§ 44”-p kingornatigut inissinneqassaaq: ”imm. 1”.

§ 2

Inatsisartut inatsisaat atuutilissaaq 1. januar 2013.

Namminersorlutik Oqartussat, 4. juni 2012

Kuupik Kleist