Kapitali 1.
Atuuffia

§ 1.  Sukisaarsaatigalugu eqalunnik (Salvelinus alpinus) aalisarnissaq siunertaralugu Kalaallit Nunaanni kuummut aalajangersimasumut imaluunniit imartamut annertunerusumik killilerneqartumut akuersissuteqartarneq inatsimmi killilersorneqarpoq.
Imm. 2.   Danskit naalagaaffianni innuttaasunut Kalaallit Nunaanni aalajangersimasumik najugaqanngitsunut aamma nunat allat naalagaaffiini innuttaasunut ukiut siuliini marlunni Kalaallit Nunaanni aalajangersimasumik najugaqarsimanngitsunut akiliisitsilluni aalisarsinnaanermik akuersissummik pigisaqartoq kisermaassilluni neqerooruteqarsinnaavoq.

 

Kapitali 2.
Sukisaarsaatigalugu aalisartitsinermut akuersissut

§ 2.  Inuit danskit naalagaaffianni innuttaasut Kalaallillu Nunaanni aalajangersimasumik najugaqanngitsut aalisarsinnaanermut akuersissummik nunami namminermi atuutummik pissarsisimagaluarunilluunniit kuummi imaluunniit imartami killilikkami akuersissuteqarfiusumi nalinginnaasumik aalisarsinnaassanngillat.
Imm. 2.  Aammattaaq inuit nunat allat naalagaaffiini innuttaasut ukiut siuliini marlunni Kalaallit Nunaanni aalajangersimasumik najugaqarsimanngitsut aalisarsinnaanermut akuersissummik nunami namminermi atuuttumik pissarsisimagaluarunilluunniit kuummi imaluunniit imartami killilikkami akuersissuteqarfiusumi nalinginnaasumik aalisarsinnaassanngillat.
Imm. 3.  Danskit naalagaaffianni innuuttaasut Kalaallit Nunaanni aalajangersimasumik najugaqartut aamma nunat allat naalagaaffiini Danmarkimiunngitsoq innuttaasut Kalaallit Nunaanni aalajangersimasumik najugaqartut ukiunilu marlunni tulleriinni najugaqarsimasut sumiiffinni akuersissuteqarfiusuni suli aalisarsinnaapput.

§ 3.  Kuummi imaluunniit imartami killilikkami sukisaarsaatigalugu aalisartunik aalisartitsisinnaanermut akuersissut Naalakkersuisunit tunniunneqartarpoq. Akuersissut sumiiffimmut aaliangersimasumik killikkamut akuersissutaassaaq. Sumiiffik akuersissuteqarfiusoq nunap assinnganik ilanngussilluni bilagitut tunniunneqassaaq.

 

Kapitali 3.
Akuersissummik pigisaqarnermut piumasaqaatit

§ 4.  Akuersissummut piumasaqaatit annertunerusut Naalakkersuisut akuersissummillu pigisaqartoq akornanni akuersissut pillugu isumaqatigiissutaanni nalunaarutigineqassapput.

§ 5.  Sumiiffiup eqqiluitsuutinnissaanik sukujoqannginnissaanillu akuersissummik pigisaqartoq pisussaaffeqarpoq.

§ 6.  Sumiiffimmi akuersissuteqarfiusumi aalisarneq pillugu naatsorsueqqissaarusiornissamut akuersissummik pigisaqartoq pisussaaffeqarpoq. Sumiiffimmi ullormut qanoq amerlatigisut sukisaarsaatigalugu aalisarnersut skemanngorlugu nalunaarutigineqassaaq.
Imm. 2.  Paasissutissat ukiut tamaasa kingusinnerpaamik ulloq 1. oktober Naalakkersuisunut nassiunneqartassapput.

§ 7.  Kuunni imartanilu akuersissuteqarfiusuni akiliilluni sukisaarsaatigalugu aalisarnermi taamaallaat qissattaatit atorneqassapput.

§ 8.  Aalisarnerup qanoq ingerlanneqarnissaa pillugu akuersissuteqarneq pillugu isumaqatigiissummi annertunerusunik aalajangersaasoqarsinnaavoq, tassunga ilanngullugit aalisarnermi atortut atorneqarsinnaasut aamma aalisakkat pisarineqartut ilaannik avalatsiteqqiinissamik pisussaaffeqarsinnaaneq.

§ 9.  Akuersissummik pigisaqartoq sumiiffimmi akuersissuteqarfiusumi aalisarsinnaanermut akuersissummik sukisaarsaatigalugu aalisartunut ataasiakkaanut tunniussissaaq. Aalisarsinnaanermut akuersissutit piffissani aalisarfiusinnaasuni tamani  immikkut tulleriinnillu normulersorneqassapput. Aalisarsinnaanermut akuersissutit periutsit Naalakkersuisunit suliarineqartut malillugit suliarineqassapput.
Imm. 2.  Sukisaarsaatigalugu aalisartoq sumiiffimmi akuersissuteqarfiusumi aalisarsinnaasoq sumiiffimmi aalisarnermi aalisarsinnaanermut akuersissummik tigummisaqassaaq, taannalu piumasaqaateqartoqarnerani Kalaallit Nunaanni Aalisarsinnaanermut Akuersissutinik Nakkutilliisoqarfiup aallartitaanut takutinneqartassaaq.

 

Kapitali 4.
Kuunnik akuersissuteqarfiusunik toqqaaneq

§ 10.  Kommunimi kuunnik eqaloqarfinnik atuinissamut soqutigisaqarnerup paasisaqarfiginissaa siunertaralugu kommuni sumiiffimmi tusarniaassaaq.
Imm. 2.   Imm. 1 malillugu tusarniaanermi akissutinik eqikkaaneq kommunimit suliarineqassaaq Naalakkersuisunullu nassiunneqarluni.

§ 11.  Atuinissamik soqutigisaqarnerit pillugit tusarniaareernerup kingorna kuuit imartallu sorliit akuersissuteqarfigineqarnissaannik kommunip inassuteqaataa kommunip Naalakkersuisunut nassiutissavaa.
Imm. 2.  Sumiiffiit illoqarfinnut nunaqarfinnullu illuaraqarfinnulluunniit qanittumiinngitsut sumiiffinnilu innuttaasunit aalisarfittut atorneqarpiarneq ajortut kommunit sapinngisamik inassuteqaateqarfigissavaat.
Imm. 3. Kuuit imartalluunniit sorliit akuersissuteqarfiunissaat pillugu Naalakkersuisut aalajangiissapput.

§ 12.  Sumiiffinni akuersissuteqarfiusuni sukisaarsaatigalugu aalisartut qanoq amerlatigisut nungusaataanngitsumik ullormut aalisartinneqarsinnaanerannik aammalu sukisaarsaatigalugu aalisartut ataasiakkaat avalatsitseqqiinani ullormut qassinik pisaqarsinnaanerannik nalilersuineq inassuteqaat ilanngullugu kommunit suliarissavaat.

§ 13.  Kalaallit Nunaanni sumiiffiit akuersissuteqarfiusut katillugit amerlassusaat piffissami sumiluunniit 20-t sinnissanngilaat.

§ 14.  Akuersissuteqarneq pillugu erseqqarissumik assigiiaartumillu paasissutissiilluni kommuni sumiiffimmi akuersissuteqarfiusumi allagartaliissaaq.

 

Kapitali 5.
Akuersissummik tunniussineq

§ 15.  Inummut innuttaasunik nalunaarsuiffimmi Kalaallit Nunaanni najugaqartutut nalunaarsorneqarsimasumut aammalu ukiuni siuliini tulleriinni marlunni inuttaasunik nalunaarsuiffimmi Kalaallit Nunaanni najugaqartutut nalunaarsorneqarsimasumut aammalu Kalaallit Nunaanni tamakkiisumik akileraartussaatitaasumut akuersissut tunniunneqarsinnaavoq.
Imm. 2. Aammattaaq0anpartsselskabimut, aktieselskabimut interessentselskabimulluunniit Kalaallit Nunaanni angerlarsimaffeqartumut akuersissut tunniunneqarsinnaavoq.
Imm. 3. Anpartsselskabimut aktieselskabimulluunniit akuersissummik tunniussissagaanni suliffeqarfimmi piginneqataassutit 2/3-ii sinnerlugit inunnit imm. 1-imi piumasaqaatinik eqqortitsisunit pigineqassapput. Anpartsselskabimi aktieselskabimiluunniit 2/3-it sinnerlugit taasisinnaatitaaneq suliffeqarfimmi piginneqataassunik 2/3-ii sinnerlugit pigisaqarnermut naligiisinneqassaaq.
Imm. 4. Interessentselskabimut akuersissummik tunniussissagaanni piginneqataasut tamarmik ukiuni siuliini marlunni tulleriinni innuttaasunik nalunaarsuiffimmi Kalaallit Nunaanni najugaqartutut nalunaarsorneqarsimassapput Kalaallillu Nunaanni tamakkiisumik akileraartussaatitaassallutik.

§ 16. Sumiiffiit sorliit akuersissummik qinnuteqaateqarfiusinnaanerat pillugu paasissutissiilluni aviisini nuna tamakkerlugu saqqummersartuni sivikinnerpaamik sapaatit akunnerinik arfinilinnik siumut nalunaaruteqarluni Naalakkersuisut tamanut nalunaaruteqassapput. Inuit suliffeqarfiilluunniit akuersissummik pissarsinissamik soqutigisaqartut qinnuteqaammik Naalakkersuisunut nassiussinissamik kaammattorneqassapput.

§ 17.  Akuersissummik tunineqarnissaq pillugu qinnuteqaat Naalakkersuisunut nassiunneqassaaq, taakkulu akuersissummik tunniussinissaq pillugu aalajangiissapput.
Imm. 2.  Akuersissummik atuinissami suliniummik allaaserinninneq akuersissummik tunineqarnissaq pillugu qinnuteqaammut ilanngunneqassaaq.
Imm. 3. Sukisaarsaatigalugu aalisartunik aalisartitsinissamut akuersissummik qinnuteqartut piukkunnaateqarnerat pillugu Naalakkersuisut Nunatsinni Takornariaqarnermut Inuussutissarsiornermullu Siunnersuisoqatigiinnut tusarniaassapput.
Imm. 4. Qinnuteqartup piukkunnaateqarneranik nalilersuinermut atugassatut suliffeqarfiup imaluunniit suliffeqarfiup inummit ingerlanneqartup naatsorsuutaanik Naalakkersuisut qinnuteqarsinnaapput.

§ 18.   Qinnuteqartumik ataatsimut nalilersuineq tunngavigalugu akuersissummik tunniussinissamik aalajangiisoqassaaq, tassani ilaatigut pissutsit uku pingaartinneqassallutik:
1) Takornarissanik sukisaarsaatigalugu aalisartunik aalisartitsisarnermik qinnuteqartup misilittagaqarnera.
2) Sukisaarsaatigalugu aalisarnermik aaqqissuussinikkut qinnuteqartup siusinnerusukkut aningaasanik kaaviiartitaqartitsilersinnaasimanera.
3) Qinnuteqartup takornariartsitsilluni inuussutissarsiuteqarnermi nalinginnaasumik misilittagai.
4) Qinnuteqartup sumiiffimmut atassuteqarnera.

§ 19.  Qinnuteqartut kikkulluunniit akuersissummik tunineqarnissamut piukkunnaateqanngitsutut nalilerneqarpata akuersissummik tunniussinnginnissaq Naalakkersuisut toqqarsinnaavaat.

§ 20.  Akuersissut ukiuni qulini atuuttussatut tunniunneqassaaq. Nalilerneqarpat siusinnerusukkut akuersissut naammaginartumik ingerlanneqarsimasoq ukiuni qulini atuuteqqittussatut akuersissut sivitsorneqarsinnaavoq.

§ 21.  Inummut ataatsimut suliffeqarfimmulluunniit ataatsimut akuersissutit marlunnit amerlanerusut tunniunneqarsinnaanngillat.
Imm. 2.  Suliffeqarfiit inunnit akuersissutinik marlunnik pigisaqareersunit 50 %-ii sinnerlugit piginneqataassuteqarfigineqartut akuersissutinik tunineqarsinnaanngillat.
Imm. 3.  Inuk suliffeqarfilluunniit aktieselskabimi imaluunniit anpartsselskabimi taasisinnaatitaanernik 50 %-it sinnerlugit pigisaqarpat imalunniit inuk suliffeqarfilluunniit suliffeqarfimmi aktianik anpartinilluunniit amerlanerussuteqartunik pigisaqarpat, tamanna akuersissummik pigisaqarnermut naligiisinneqassaaq.

 

Kapitali 6.
Akiliineq

§ 22.  Sukisaarsaatigalugu aalisartoq sumiiffimmi akuersissuteqarfiusumi ullormi ataatsimi aalisarnermut aalajangersimasumik akiliisassaaq. Inuup ataatsip ullormut ataatsimut akiliutissaa 150,00 kr.-inut aalajangerneqarpoq.
Imm. 2.  Akuersissummik pigisaqartup akiliutaa Nunap Karsiata pissavaa.
Imm. 3.  Akiliut ukiumut ataasiarluni akilerneqartassaaq ukiullu tamaasa ulloq 1. oktober akiligassanngortassalluni. Ulloq piffissaq eqqorlugu akiliiffissaq kingusinnerpaaq tassaavoq akiliutissap akilerneqartussanngornerata kingorna 1. december aallaqqaataa tulliuttoq.

 

Kapitali 7.
Akuersissutip atorunnaarnera tunniunneqarneralu

§ 23.  Akuersissut ukiumut aalisarfiusinnaasuni tulleriinni sisamani piffissami aalisarfiusumi ataatsimi taamaallaat inunnit arfinilinnit ikinnerusunit atorneqarpat imaluunniit ukiumut aalisarfiusinnaasumi inuit arfinillit amerlaqataat akiliippata akuersissut atorunnaassaaq.

§ 24.   Piffissap akuersissuteqarfiusup atorunnaarnerani akuersissuteqartoq sumiiffimmi saliisussaatitaavoq. Sumiiffiup akuersissuteqarfiusup salinneqareerluni qimanneqarsimanera kommunip misissussavaa.

§ 25.  Akuersissumut akiliutissaq akilerneqanngippat, takuuk § 22, imm. 1, imaluunniit akuersissummik nalunaaruteqarnermi piumasaqaatit allatigut annertuumik sumiginnarneqarpata akuersissut Naalakkersuisut utertissinnaavaat.

§ 26.  Akuersissutinik tunniussinerit tamarmik Naalakkersuisunit akuerineqassapput. Akuersissut akiligassaqarfinnit akiliutigitinniarneqarsinnaanngilaq akuersissullu qularnaveeqqutitut tunniunneqarsinnaanani.
Imm. 2. Akuersissut aktieselskabimit imaluunniit anpartsselskabimit pigineqarpat suliffeqarfimmi piginneqataassutsit 50 %-ii sinnerlugit tunniunneqarpata akuersissummik tunniussinertut isigineqassaaq.
Imm. 3.  Inuk suliffeqarfilluunniit taasisinnaassustit 50 %-ii sinnerlugit pigisaqalerpat imaluunnit inuk suliffeqarfilluunniit suliffeqarfimmi aktianik anpartinilluunniit amerlanerussuteqartunik pigisaqalerpat, tamanna tunniussinertut isigineqassaaq.
Imm. 4. Suliffeqarfik akuersissummik pigisaqartoq suliffeqarfimmi pineqartumi piginnittuunnermi pissutsit allannguutai tamaasa pillugit Naalakkersuisunut nalunaaruteqartussaatitaavoq.
Imm. 5.  Interessentselskabimi piginneqataasut allanngornerat Naalakkersuisunit akuerineqassaaq.
Imm. 6.  Akuersissut kingornunneqarsinnaanngilaq.

 

Kapitali 8.
Pineqaatissiissutit

§ 27.  Inuit danskit naalagaaffianni innuttaasut Kalaallit Nunaanni aalajangersimasumik najugaqanngitsut imaluunniit nunani allani naalagaaffinni inuttaasut ukiut siuliini marlunni Kalaallit Nunaanni aalajangersimasumik najugaqarnikuunngitsut akuersissummik piginnittumit akuerineqaratik kuummi imartamiluunniit akuersissuteqarfiusumi aalisartut akiiisitsilluni pineqaatissinneqarsinnaapput.
Imm. 2.  Imm. 1 malillugu pineqaatissiilluni akiliutit Nunap Karsiata pissavai.

§ 28.  Akuersissummik pigisaqartoq piffissap akuersissuteqarfiusup atorunnaarnerata kingorna sumiiffimmi akuersissuteqarfiusumi saliinngippat, akuersissummik pigisaqarsimasup akiligassaanik saliititsisoqarsinnaavoq.

 

Kapitali 9.
Atuutilernera

§ 29.  Inatsit 1. januar 2012-imi atuutilerpoq.

Namminersorlutik Oqartussat, ulloq 22. november 2011

Kuupik Kleist