Naalakkersuinikkut ingerlatsisut partiit naatsorsuutaat

§ 1. Partiit, Folketingimut imaluunniit Inatsisartunut kingullermik qinersinermi Kalaallit Nunaanni qinigassanngortitsisimasut partiip nuna tamakkerlugu kattuffiata isertitai aningaasartuutaalu pillugit ukiut tamaasa ukiumoortumik naatsorsuutinik saqqummiussisassapput. Isertitat assigiinngitsut makku pillugit paasissutissanik ukiumoortumik naatsorsuutit imaqassapput:
1) Pisortaniit partiimut tapiissutit.
2) Ilaasortat akiliutaannit isertitat.
3) Aammattaarlu inuinnarnit akileeqataassutit.
4) Nunani tamalaani suleqatigiiffinnit, inuinnaat ataatsimoorussamik peqatigiiffiinit, suliatigut kattuffinnit, inuussutissarsiortut suleqatigiiffiinit, inuussutissarsiorluni suliffeqarfinnit, aningaasaateqarfinniit peqatigiiffinniillu akileeqataassutit.
5) Ernianit isertitat.
Imm. 2. Partii ukiumi naatsorsuiffimmi akiliuteqartumit ataatsimiit akileeqataassummik imaluunniit akileeqataassutinik arlalinnik katillugit 10.000 kr.-inik amerlanerusunik pissarsisimappat akiliisup aqqa najugaalu ukiumoortumik naatsorsuutinit takuneqarsinnaassaaq. Kinaasutsiminnik nalunaaruteqaratik akiliuteqartunit akileeqataassutit tamarmiusut annertussusaat pillugu paasissutissanik aamma 10.000 kr.-it sinnerlugit kinaassutsiminik nalunaaruteqanngitsumit ataasiakkaanit akileeqataassutit annertussusaat pillugit paasissutissanik aamma ukiumoortumik naatsorsuutit imaqassapput.
Imm. 3. Ukiumoortumik naatsorsuutit oqimaaqatigiissitsineq aamma nammineq aningaasaatit pillugit paasissutissanik imaqassapput.
Imm.4. Ukiumoortumik naatsorsuutit ilassutitut nalunaarsukkatut partiip nuna tamakkerlugu kattuffiata § 4 malillugu pissarsiarisimasaanik paasissutissanik imaqassapput.

§ 2. Ukiumoortumik naatsorsuutit partiip aqutsisuinit atsiorneqassapput aamma ukiumoortumik naatsorsuutini allanneqarsimasunik partii allanik isertitaqarsimanngineranik ani-ngaasartuuteqarsimanngeranilluunniik nalunaarummik imaqassallutik.

§ 3. Ukiup naatsorsuiffiusup naaneraniit kingusinnerpaamik qaammatit arfinillit qaangiutsinnagit partii ukiumoortumik naatsorsuutinik Inatsisartunut nassiussissaaq. Ukiumoortumik naatsorsuutit Inatsisartut Siulittaasooqarfiata tamanut saqqummiutissavai.

Immikkoortortaqarfiit aamma inuusuttut immikkoortortaqarfiit paasissutissiisussaatitaanerat

§ 4. § 1, imm. 1-mi ilaasup partiip immikkoortortaqarfia imaluunniit inuusuttunut immikkoortortaqarfia ukiumi ilivitsumi § 1, imm. 1, nr. 3-4-mi taaneqartunik akileeqataassutinik, katillugit 40.000 kr.-inik amerlanerusunik tigusaqarsimappat, immikkoortortaqarfik ukiup ilivitsup naaneraniit kingusinnerpaamik qaammatit sisamat qaangiutsinnagit partiip nuna tamakkerlugu kattuffianut makku pillugit paasissutissanik nassiussissaaq:
1) Akileeqataassutit tamarmiullutik annertussusaat.
2) Akileeqataassutsip ataatsip annertussusaa, akileqaataasup aqqa najugaalu allallugit, immikkoortortaqarfik akileeqataasumit ataatsimiit akileeqataassummik imaluunniit akileeqataassutinik arlalinnik katillugit 10.000 kr.-inik amerlanerusunik pissarsisimappat.
3) Kinaassutsiminnik nalunaaruteqanngitsunit akileeqataassutit tamarmiusut annertussusaat.
4) Kinaassutsiminnik nalunaaruteqanngitsunit ataasiakkaanit tamanit ataasiarluni akileqataassutit 10.000 kr.-inik amerlanerusut annertussusaat.

Pineqaatissiinerit, atulersinnera il.il.

§ 5.  Akiliisitsisoqarsinnaavoq:
1) § 2, § 3, imm. 1 aamma § 4 unioqqutinneqarpata.
2) §§ 1 aamma 4 malillugit paasissutissanik eqqunngitsunik amigaateqartunilluunniit tunniussisoqarpat.
3) § 2 malillugu eqqunngitsumik nalunaaruteqartoqarpat.
Imm.2. Inatsisartut inatsisaat akiliisitsinissamut tunngavissiippat Kalaallit Nunaanni pinerluttulerinermik inatsimmi inatsisitigut pisussaatitaasup pisinnaatitaasullu akisussaaffia pillugu maleruagassat malillugit partiip kattuffia akiliisinneqarsinnaavoq.

§ 6. Inatsisartut inatsisaat ulloq 1. januar 2013-mi atulersinneqarpoq.
Imm. 2. § 1 malillugu naatsorsuutit 2013-mut ukiumut naatsorsuiffik pillugu siullermeertumik nassiunneqassapput.

Namminersorlutik Oqartussat, ulloq 22. november 2011

Kuupik Kleist