§ 1

Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaanni nr. 3, 2. maj 1996-imeersumi, Inatsisartut inatsisaatigut nr. 7, 5. december 2008-meersukkut kingullermik allanngortinneqartumi makku allannguutigitinneqarput:

1.  § 5, imm. 1, ima oqaasertaqarpoq:
"§ 5.  Akileraarutinut akiliutaavallaarsimasut utertinneqalerneranni kommunit, pissarsisussap utertitassanngorlugit ikiorsiissutinut, pilersuisussaatitaanermut akilersuutinut siumoortumik tunniunneqartartunut, inuussutissarsiutitigut suliffeqarfinnut aningaasatigut attartortissimasa­nut, kommunit inuussutissarsiutitigut suliffeqarfinnut il.il. aningaasaliinermikkut inuussutis­sarsiutinik ineriartortitseqataasinnaanerannut atatillugu pisassarisanut, kiisalu paaqqinnittar­finni angerlarsimaffinnilu ulluunerani paaqqinnittarnermut, eqqaanermut pujoorfinnillu paavi­aanermut pisassarisanut akilerneqartussanngoreersimagaluartunut akiligassarisaanut naaper­tuuttunik ilanngartuisinnaatitaapput.”

2.  § 5-imi imm. 1-ip kingorna immikkoortutut nutaatut ilanngunneqarpoq:
”Imm.  2. Akileraarutinut akiliutaavallaarsimasut utertinneqalerneranni inuinnaat, pisassaqar­tumut pilersuisussaatitaanermut akilersuutinut akilerneqartussanngoreersimagaluartunut naa­pertuuttunik ilanngartuisinnaatitaapput.”

Imm. 2 taamaasilluni imm. 3-nngorpoq.

3.  § 6-ip kingorna qulequtaq nutaaq ilanngunneqarpoq: 

”Akiitsoqalernissamik pinaveersaartitsineq”

4.  Qulequttap nutaap kingorna ilanngunneqarpoq:
”§ 6 a.  Inuit imaluunniit inatsisitigut pisinnaatitaasut pisussaatitaasullu aningaaseriviup Ka­laallit Nunaanni, Savalimmiuni Danmarkimiluunniit angerlarsimaffeqartup ingerlaannartumik akiliisarnissamik aaqqissuussinermik neqeroorutaanut ilanngunnissaat pisortat oqartussaasut piumasaqaatigisinnaavaat. Tassunga atatillugu aningaasanngorlugit akiliutit akiligassanut naammassinnissutaanissaat pisortanit oqartussaasunit itigartinneqarsinnaavoq.
Imm. 2. Aalajangersakkami pineqarput pisortanut aalajangersimasumik akiliutaasartut tamar­mik, matumani ilanngullugit akileraarutinut akitsuutinullu akiliutit kiisalu nioqqutissanut sul­lissinernullu akiliutit.
Imm. 3. Inuit imaluunniit inatsisitigut pisinnaatitaasut pisussaatitaasullu ingerlaannartumik akiliisarnissaq pillugu aningaaserivimminnik isumaqatigiissuteqarfiginnissinnaanngitsillugit imm. 1 atuutissanngilaq.
Imm. 4. Inuit aamma inatsisitigut pisinnaatitaasut pisussaatitaasullu pisortanut oqartussaasu­nut akiliisarnerat pillugu, matumani ilanngullugu inuk ingerlaannartumik akiliisarnissaq pillu­gu aningaaserivimmik isumaqatigiissuteqarfiginninnissamut periarfissaqanngitsillugu maleru­agassat erseqqinnerusut Naalakkersuisunit aalajangersarneqarsinnaapput.”

§ 2

Inatsisartut inatsisaat ullormi 1. juli 2011-mi atuutilissaaq.

Kalaallit Nunaanni Namminersorlutik Oqartussat, ulloq 15. april 2011

Kuupik Kleist