§ 1

Sanaartornermi neqerooruteqartitsisarneq pillugu Inatsisartut inatsisaanni nr. 11-mi, 2. december 2009-meersumi imatut allannguisoqarpoq:

1.  § 7-imi imm. 4-p kingorna immikkoortoq nutaaq ataaseq ivertinneqassaaq:
”Imm. 5.  Neqerooruteqartitsineq AP malillugu ingerlanneqarpat, tak. imm. 4, AP-mik saneqqutsinissaq taamaallaat tunngavissat immikkut ittut pineqartillugit pisinnaavoq. Saneqqutsinissamut aalajangersakkat pisuni ataasiakkaani neqerooruteqartitsinermut najoqqutassiani erseqqissarneqartassapput.”

2.  § 27-mi imm. 1-ip kingorna immikkoortut marluk nutaat ilanngunneqassapput:
”Imm. 2.  Suliani ataasiakkaani aalajangiinermi siulittaasoq ilaasortallu sulianik ilisimasallit marluk peqataassapput, taamaattorli tak. imm. 3. Neqerooruteqartitsisarnermut Maalaaruteqartarfiup siulittaasuata, siulittaasoqarfimmi ilaasortat ilaasortallu sulianik ilisimasallit, suliami aalajangiinermut peqataasussat amerlineqarnissaat aalajangersinnaavaa.
Imm. 3.  Neqerooruteqartitsisarnermut Maalaaruteqartarfiup siulittaasuata ilaasortanik sulianik ilisimasalinnik peqateqarani suliat allakkatigut tunngaviliilluni aalajangiiffigineqarsinnaasut, imaluunniit tunngaviusunut aalajangiisussaanngitsut aalajangiiffisinnaavai, kiisalu suliat ingerlanissaannut apeqqutit aalajangiiffigisinnaallugit.”

Tamatuma kingunerisaanik imm. 2-4 imm. 4-6-inngorlutinneqassapput.

3. § 30-mi imm. 1-ip kingorna immikkoortoq ataaseq nutaaq ilanngunneqassaaq:
”Imm. 2.   Neqerooruteqartitsisarnermut Maalaaruteqartarfiup suliaq itigartissinnaavaa imaluunniit tamakkiisumik ilaannaasumilluunniit aalajangiiffigisinnaallugu, tassungalu ilanngullugu inatsisinik unioqqutitsilluni aalajangiinerit imaluunniit neqerooruteqartitsinernik suliaqarnerit atorunnaarsissinnaallugit imaluunniit suliakkiisoq neqerooruteqartitsinermik suliaqarnerminik inatsisinut naapertuuttunngortitsinissaanik peqqusinnaallugu.”

Tamatuma kingunerisaanik imm. 2 imm. 3-inngortinneqassaaq.

§ 2

Inatsisartut inatsisaat 1. juni 2011-mi atuutilerpoq.

Kalaallit Nunaanni Namminersorlutik Oqartussat, ulloq 15. april 2011

Kuupik Kleist