§ 1

 Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaanni nr. 10, 5. december 2008-meersumi makku allanngortinneqarput: 

1.  § 5 atorunnaarsinneqarpoq.

2.  § 6-imi imm. 4-tut aamma imm. 5-itut ilanngunneqassapput:
”Imm. 4.  Naalakkersuisut kommunalbestyrelsip nalinginnaasumik aamma perorsaanikkut nakkutilliinissaanut aalajangersaasinnaapput, kommunimi ulluunerani neqeroorutaasut tamaasa eqqarsaatigalugit.

Imm. 5.  Naalakkersuisut nunatsinni nakorsaaneq isumasiorlugu tunillaassortumik nappaatinut tunngatillugu periusissanik aalajangersaasinnaapput.”

3.  § 13-imi, imm. 1 aamma imm. 3 kiisalu § 14, imm. 2, nr. 8-mi ”Sullivinnik Nakkutilliisoqarfik” allanngortinneqassaaq ”sanaartornermi oqartussat”-ngorlugu.  

4.  § 13-imi ilanngunneqassaaq imm. 4-tut:
”Imm. 4.  Naalakkersuisut meeqqeriviit pilersinneqartarnerat aaqqissuunneqartarnerallu pillugu aalajangersaassapput.”

5.  § 16-imi imm. 2-tut ilanngunneqassaaq:
”Imm. 2.  Naalakkersuisut imm. 1 naapertorlugu paasissutissanik naapertuuttunik ingerlatitseqqiisarneq pillugu aalajangersagaliorsinnaapput.” 

6.  § 19-imi, imm. 1, oqaaseqatigiit kingulliit peerneqassapput  ”ullut tamaasa qanoq sivisutigisumik najuunnerat nalunaarlugu.”

7.  § 27-mi, imm. 1-imi kalaallisuuani allanngortinneqassaaq ”neqerooruteqarsinnaavoq”, ”neqerooruteqassaaq”-ngorlugu.

8.  § 28, imm. 1 imatut oqaasertalerneqassaaq:
”§ 28.  Meeqqerivinnut aningaasartuutit, angerlasimaffinni paarsisarneq aamma sammisassatut neqeroorutaasut allat peqqussut una naapertorlugu ingerlanneqartut kommuninit isumagineqassapput, taammaattoq tak. § 28a.”

9.  § 28 kingornagut ilanngunneqassaaq:
”§ 28a.  Kommunalbestyrelsi meeqqanut suli atualinngitsunut kommunip ulluunerani ingerlanneqartunik neqeroorutaani peqataasunut akiliuteqartitsisinnaavoq, Naalakkersuisunit aalajangersakkat naapertorlugit, tak. imm. 3. Akiliut annertussusilerneqartassaaq kommunip ulluunerani ingerlanneqartunik meeqqanut suli atualinngitsunut neqeroorutaanut aningaasartuutai naapertorlugit, aammalu akiliuteqartussaatitaasup akiliuteqartussaatitaasulluunniit aningaasaqassusiat naapertorlugu annertussusilerneqartunik.
Imm. 2.  Kommunip ulluunerani ingerlanneqartumik neqeroorutaanut atuinermut akiliuteqartussaatitaavoq meeqqamut pilersuisussaatitaasoq. Meeraq angajoqqaajusut aappaanni najugaqarpat, angajoqqaajusorlu taanna katissimappat, aappariittut nalunaarneqarsimappata imaluunniit katinnikut assigalugit ataavartumik inooqateqaruni minnerpaamik ukiumik ataatsimik sivisussuseqartumik, angajoqqaajusoq taassumalu aappaa, aappariittut nalunaarsorsimaqataa imaluunniit aalajangersimasumik inooqateqaruni, taava angajoqqaajusoq aappaasorlu, nalunaarsorneqarsimasumik inooqataa aalajangersimasumilluunniit inooqataalu tamarmik angajoqqaatut akiliuteqartussatut naatsorsuutigineqassapput.
Imm. 3.  Naalakkersuisut imm. 1 aamma imm. 2 naapertorlugit meeqqat kommunip meeqqanut suli atualinngitsunut ulluunerani neqeroorutaani atuinerannut akiliuteqartarneq pillugu, tassunga ilanngullugit isertitaqqortussuseq naapertorlugu akiliuteqartarnermut, akiligassaqalersimanerup kingunerisaanik meeqqap neqeroorutaasuniikkunnaarsinneqartarneranut aammalu kommunip ulluunerani neqeroorutaanit aninissamut siumut nalunaartussaatitaanermut aalajangersagaliussapput.” 

10.  Inatsisartut peqqussutaanni sumiluunniit danskisut ”Landsstyre” ”Naalakkersuisut”-nik taarserneqassaaq.

§ 2

Inatsisartut peqqussutaat 1. august 2010-mi atortuulersinneqassaaq.
Imm. 2.  § 5 naapertorlugu aalajangersakkat atortuuinnassapput, Inatsisartut peqqussutaanni uani aalajangersakkat naapertorlugit taarserneqarnissami tungaannut, imaluunniit Inatsisartut peqqussutaat una naapertorlugu atorunnaarsinneqarnissami tungaannut.

Namminersorlutik Oqartussat, ulloq 19. maj 2010.

Kuupik Kleist

/

Mimi Karlsen