Inuutissarsiutinik ilinniartitsinerit aamma inuutissarsiutinik ilinniartitsinerup iluani pikkorissaanerit pillugit Inatsisartut inatsisaanni nr. 10, 19. maj 2010-meersumi § 30, imm. 5 naapertorlugu aalajangersarneqarpoq:

Siunertaa atuuffialu

§ 1.  Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik qitiusumillu ilinniarfiit siulersuisui ukiuni 4-ni atuuttussamik, siullermillu 1. januar 2011-miit 31. december 2013-mut atuuttussamik, angusaqarnissamik isumaqatigiissuteqassapput, ilinniartitsinikkut politikkimi anguniakkat pingaarnerit qitiusumik ilinniarfinni ataasiakkaani ilinniartitsissutigineqartartunut naleqqiullugit malittarisassiunneqarfigisaannik, tak. inuutissarsiutinik ilinniartitsinerit aamma inuutissarsiutinik ilinniartitsinerup iluani pikkorissaanerit pillugit Inatsisartut inatsisaanni nr. 10. 19. maj 2010-meersumi § 30, imm. 1.
Imm. 2.  Angusaqarnissamik isumaqatigiissummi qitiusumik ilinniarfiit suliassaasa annertussusaannik suussusaannillu erseqqinnerusumik aalajangersaasoqassaaq, inuutissarsiutinik ilinniartitsinerit aamma inuutissarsiutinik ilinniartitsinerup iluani pikkorissaanerit pillugit Inatsisartut inatsisaanni §§ 28-30-mi aalajangersarneqarsimasutut. Ilutigisaanik angusaqarnissamik isumaqatigiissutip qitiusumik ilinniarfiit ingerlassaasa siunissami inerisarnissaannik Naalakkersuisut qitiusumillu ilinniarfiit pilersaarutaat ersersissavai, taamatullu isumaqatigiissutip qularnaassavaa qitiusumik ilinniarfimmit ilinniarfittut ersarissusissaanullu atatillugu piumasaqaatit ersarissut uuttorneqarsinnaasullu aamma qitiusumik ilinniarfiup ingerlatsineranut uppernarsaasersuinerit aalajangersarneqarnissaat.
Imm. 3.  Angusaqarnissamik isumaqatigiissutit suliarineqassapput, amerlanerusut ilinniagaqarnissaannut, ilinniakkat suliamut tunngatillugu qaffasissumik pitsaassuseqarnissaannut, ineriartornermut sammisuunissaannut suliffeqarfiillu pisariaqartitaannut naapertuuttumik sunniuteqarluartuunissaannut naleqqiullugu, pingaarnerusutigut anguniakkat qaqugukkulluunniit atuuttut naapertorlugit.

§ 2.  Qitiusumik ilinniarfiit siulersuisuisa angusaqarnissamik isumaqatigiissuteqarnissaq piviusunngortitsinissarlu aamma angusaqarnissamik isumaqatigiissutikkut angusassatut aalajangersarneqartut piviusunngortinnerat pillugu naammaginartumik nalunaarusiornissaq akisussaaffigaat.
Imm. 2.  Siulersuisunut qitiusumik ilinniarfinnut sumiiffinni ataasiinnaanngitsuni neqerooruteqartartunut naleqqiullugu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup aalajangersinnaavaa, siulersuisut akisussaaffii, tak. imm. 1, neqerooruteqarfinnut tamanut atuutissasut.

Imarisai, piffissaliussat il.il.

§ 3.  Angusaqarnissamik isumaqatigiissummi qitiusumik ilinniarfiup ilisarnaqutaa aallaavigalugu allaaserineqassapput qitiusumik ilinniarfiup pilersaarusiukkamik anguniagai, angusiniarnermi atugassat, suliniuteqarfissat aamma qitiusumik ilinniarfiup susassaqarfii pingaarnerit aallaavigalugit tulleriiaarinerit.
Imm. 2.  Angusaqarnissamik isumaqatigiissutit pitsaassutsikkut anguniakkat saniatigut aammattaaq annertuumik imarissavaat qitiusumik ilinniarfiit ingerlassaannut angusaannullu uuttuutit amerlassusilerneqarsinnaasut uuttorneqarsinnaasullu, aqutsinermi sakkutut atorneqarsinnaasut.

§ 4.  Paasissutissat Inuutissarsiutinik ilinniartitsinerit aamma inuutissarsiutinik ilinniartitsinerup iluani pikkorissaanerit pillugit Inatsisartut inatsisaanni nr. 10, 19. maj 2010-meersumi § 30, imm. 2-mi eqqaaneqartut saniatigut angusaqarnissamik isumaqatigiissutit piffissap isumaqatigiissuteqarfiusup iluani ukiunut immikkoortitsiterlugit minnerpaamik inarissavaat:
1) Ilinniakkat qitiusumik ilinniarfiup piffissami isumaqatigiissuteqarfiusumi neqeroorutaasa, taaguutaat ilanngunneqartut, amerlassusaat.
2) Ukiunut sisamanut isumaqatigiissuteqarfiusunut tamakkiisumik misingersuusiorneq, kisiannili tak. § 1, imm. 1.
3) Ilinniartut amerlassusissaattut ilimagisat ilinniakkanut nr. 1-imi taaneqartunut agguaassat, qinnuteqartut ilinniartunngortullu amerlassusaannut naleqqiullugit, tamatumunnga ilanngullugit ilinniartut ilinniakkamik aallartittut naammassisullu amerlassusaat, ikerinnakkut unittussatut naammassisussatullu annertussissaannik ilimagisaasut ilanngullugit.
4) Piffissap isumaqatigiissuteqarfiusup iluani ilinniartut kollegiani ineqartitassat amerlassusissaatut ilimagisat nalunaarnera.
5) Ilinniarfimmi ilinniartut piffissap isumaqatigiissuteqarfiusup ingerlanerani sungiusarlutik sulilersussatut ilimagisaasut amerlassusiata nalunaarsornera.
6) Akunnerit ilinniartitsiffiusussatut ilimagisat nalunaarsornerat, tamatumunnga ilanngullugit piffissami isumaqatigiissuteqarfiusumi ilinniartitsisut tiimiisa ilinniakkanut atuartitsissutinullu ataasiakkaanut agguaanneri.
7) Ilinniartumut ataatsimut aningaasartuutit ilinniakkanut nr. 1-imi taaneqartunut agguaannerisa nalunaasorneri.
8) Piffissami isumaqatigiissuteqarfiusumi ingerlatsinermut aningaasartuutinit akissarsianut aningaasartuutissatut ilimagisat nalunaarsornerat, ilinniartitsinikkut ingerlassanut allaffissornermullu agguaallugit, kiisalu suliat allat, tak.  Inuutissarsiutinik ilinniartitsinerit aamma inuutissarsiutinik ilinniartitsinerup iluani pikkorissaanerit pillugit Inatsisartut inatsisaanni nr. 10, 19. maj 2010-meersumi § 29.
9) Piffissami pineqartumi inerisaalluni ingerlassat allaaserinerat, ilinniakkat pioreersut ataavartinniarnerinut nutarternerinullu aamma pikkorissaanerit ilinniartitsinerillu nutaat inerisarnerinut atatillugu.
10) Piffissami isumaqatigiissuteqarfiusumi suliassat saniatigut ingerlassanik annertuussusaannillu allaaserinninneq, tak. § 29 Inuutissarsiutinik ilinniartitsinerit aamma inuutissarsiutinik ilinniartitsinerup iluani pikkorissaasarnerit pillugit Inatsisartut inatsisaat.
11) Piffissami isumaqatigiissuteqarfiusumi qitiusumik ilinniarfiit ikerinnakkut uniinnartarneq akiorniarlugu nukissanik sakkussanillu atuinerisa nalunaarsornerat.
12) Qitiusumik ilinniarfiup piffissami isumaqatigiissuteqarfiusumi suliffeqarfinnut ornigulluni suliaasa nalunaarsornerat, tamatumunnga ilanngullugit suliffimmik misiliiffissanik pilersitsiniarnermut tunngasut.
13) Aningaasaliissutinit akilerneqartut suliniutit allat nalunaarsornerat.
14) Piffissami isumaqatigiissuteqarfiusumi qitiusumik ilinniarfiup inerisaalluni suliniutinut peqataaneranik nalunaarsuineq, tamatumunnga ilanngullugu avataaneersunik suleqateqarneq.
15) Piffissami isumaqatigiissuteqarfiusumi ilinniakkat pitsaassusaasa ineriartornissaannik ilimagisat allaaserinerat, tamatuma suliamut tunngatillugu anguniakkanut naleqqiunnera illanngullugu.
16) Piffissami isumaqatigiissuteqarfiusumi qitiusumik ilinniarfiup illutaasa ineriartornissaannik ilimagisat, tamatumunnga ilanngullugit inissanik pisariaqartitsineq aamma immikkut ittumik atortunik nutaanik pisaarnissaq.
17) Ukiuni isumaqatigiissuteqarfiusuni aningaasatigut pisariaqartinneqartussatut imaluunniit atunngitsuugassatut ilimagisat nalunaarsornerat.
Imm. 2.  Siulersuisut angusaqarnissamik isumaqatigiissutikkut naliliiffigissavaat piffissap isumaqatigiissuteqarfiusup ukiuinut tamanut naatsorsuutigineqartutut anguniakkat, tamatumuunga ilanngullugit naammaginartuunersut pitsaanerusumillu angusaqarsinnaanermut akornutaasorineqartut nalunaarlugit.
Imm. 3.  Angusaqarnissamik isumaqatigiissummi nalunaarsorneqassaaq, qanoq iliorluni angusaqarnissamik isumaqatigiissummi anguniakkat piviusunngortinnerat uuttorneqarsinnaanersoq.
Imm. 4.  Illuatungeriit isumaqatigiissutigisinnaavaat isumaqatigiissummi immikkut suliniuteqarfissat qitiutinneqassasut, assersuutigalugu ilinniagassani aalajangersimasuni suiaassuseq najoqqutaralugu agguaassineq.

§ 5.  Angusaqarnissamik isumaqatigiissuteqartoqariissaaq piffissap isumaqatigiissuteqarfiusup ukiuani siullermi kingusinnerpaamik 1. april.
Imm. 2.  Angusaqarnissamik isumaqatigiissutip ukiumoortumik naleqqussarnerisa aningaasaqarnermut ukioq malissavaat aningaasanullu ukiumi, naleqqussaanermi pineqartumi, kingusinnerpaamik 1. marts isumagineqareersimassallutik.

Nalunaarusiortarneq il.il.

§ 6.  Anguniakkanut § 4-mi aamma 5-imi taaneqartunut naleqqiullugu nalunaarusiortarnissaq qitiusumik ilinniarfiup siulersuisuisa qularnaassavaat, nalunaarsorlugulu anguniakkanut ataasiakkaanut piffissaliussat ingerlatsinissamillu pilersaarutit eqqorneqarsimanersut.
Imm. 2.  Angusaqarnissamik isumaqatigiissummut tamarmiusumut naleqqiullugu nalunaarusiaq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi tiguneqareersimassaaq angusaqarnissamik isumaqatigiissutip atorunnaarneraniit kingusinnerpaamik 1. april. Tamatuma saniatigut qitiusumik ilinniarfik ukiumi aningaasaliiffiusumi ukiumoortumik nalunaarusiortassaaq, qitiusumik ilinniarfiup ukiumoortumik aningaasanut nalunaarutaanut ilanngunneqartussamik, taannalu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmit aningaasanut ukiup tulliani kingusinnerpaamik 1. april tiguneqareersimassaaq.

§ 7.  Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup aalajangiussinnaavaa qitiusumik ilinniarfiup nalunaarusiaq § 6-imi pineqartoq elektroniskimik suliarissagaa.
Imm. 2.  Qitiusumik ilinniarfiup siulersuisuisa qularnaassavaat nalunaarusiap eqqortuullunilu paasissutissanik nutaanerpaanik imaqarnissaa.
Imm. 3.  Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup qitiusumik ilinniarfiup paasissutissanik nalunaaruteqartarnera nakkutigissavaa.

Atuuttuulersitsineq

§ 8.  Nalunaarut manna atuuttuulissaaq 1. januar 2011.

Namminersorlutik Oqartussat, 23. december 2010

Mimi Karlsen

/

Lise Lennert Olsen