Pilersaarusiorneq aamma nunaminertat atorneqartarnerat pillugit Inatsisartut peqqussutaanni nr. 11-imi, 5. december 2008-meersumi § 3 naapertorlugu aalajangersarneqarpoq:

 

Kapitali 1
Siunertaq

§ 1. Kommunalbestyrelsip nalunaarummi matumani maleruagassat malillugit pilersaarusiornermigut aqutsinermigullu, kommunip iluani nunaminertat inuiaqatigiit ataatsimut isigalugit nalilersuiffiusumik atorneqarnissaannik qulakkeerinissamut suleqataanissaa nalunaarummi siunertarineqarpoq.

 

Kapitali 2
Kommunimut pilersaarutit

§ 2. Kommunalbestyrelsip kommunimut pilersaarut makkuninnga imaqartoq suliarissavaa:
1) Kommunimut pilersaarummi kommunip ineriartortinneqarnerani siunertaasut anguniakkallu nassuiaasiorneqarnerinut immikkoortoq, tak.§ 5.
2) Kommunip ataatsimut pingaarnertut ilusiligaaneranut immikkoortoq, tak. § 6, kiisalu kommuninimi illoqarfiit, nunaqarfiit aammalu nunaannarmi soqutiginaatillit ataasiakkaat pingaarnertut ilusiligaanerannut immikkoortoq, tak. § 7.
3) Aalajangersakkanut immikkoortoq, tassanilu aalajangersarneqassapput:
a) sumiiffiit ilaanni aalajangersimasuni ataasiakkaani nunaminertat atorneqarnerannut illoqarfeqarfimmullu aalajangersakkat pingaarnerit, tak. § 8, aamma
b) sumiiffiit ilaanni aalajangersimasuni ataasiakkaani nunaminertat atorneqarnerannut illoqarfeqarfimmullu aalajangersakkat sukumiisut, tak. § 9.
4) Kommunalbestyrelsip nunaminertanik atugassiisarneranut aalajangersakkat, tak. § 10.
Imm. 2. Nunaannarmi pilersaarusiornermut nunaminertanullu oqartussaaffiup 1. januar 2011-imi kommuninut tunniunneqarnissaata tungaanut nunaannarmi nunaminertanik aqutsineq Naalakkersuisunit kapitali 4-imi aalajangersakkat naapertorlugit isumagineqassaaq.

Kommunimut pilersaarusiortarnermi periaasissat

§ 3. Kommunalbestyrelsi kommunimi piffissap qinigaaffiusup affaa siulleq qaangiutsinnagu kommunimut pilersaarusiornermut periaasissanik saqqummiussissaaq. Aamma periaasissaq taamaattoq pisariaqartutut naapertuuttutulluunniit isumaqarfigineqarpat kommunalbestyrelsi taamaattumik saqqummiussisinnaavoq. Tamatumunnga peqatigitillugu periaasissatut aalajangiunneqartoq tamanut ammasumik saqqummiunneqartoq Naalakkersuisunut oqartussaasunullu soqutigisaqarnikkut kalluarneqartunut nassiunneqassaaq.
Imm. 2. Kommunalbestyrelsimi ilaasortat arlaalluunniit, periaasissatut siunnersuummut imm. 1-imi taaneqartumut isummaminik allaasumik aalajangernissamut allattaavinnut ilanngussititsinissamik piumasaqarsimasoq, isummami allaasup tamanut ammasumik saqqummiunneqarnissaa piumasarisinnaavaa, tassungalu tunngavilersuut naatsoq, ilaasortamit oqaasertaliorneqartoq ilaatinneqassaaq.
Imm. 3. Periaasissatut siunnersuut, imm. 3 naapertorlugu ikinnerussuteqartut oqaaseqaatigisinnaasaannik ilaqartinneqartoq, sumiiffimmut innuttaasunit tikikkuminartumut, oqaaseqaateqarnissamut allannguutissanillu siunnersuuteqarnissamut sivikinnerpaamik sapaatit akunnerinut arfinilinnut piffissalerlugu tamanut saqqumititassanngorlugu saqqummiunneqassaaq. Saqqummiussineq piffissaliussarlu pillugit tamanut nalunaaruteqarnermi, periaaseq kommunimi nalinginnaasumik atorneqartartoq atorneqassaaq.
Imm. 4. Imm. 3 naapertorlugu piffissaliussap naanerani kommunalbestyrelsip nutaamik suliarinninnermigut periaasissaq inaarutaasumik akuersissutigisinnaavaa. Tamatumunnga atatillugu kommunalbestyrelsip oqaaseqaatit tiguneqartut isummerfigissavai. Kommunalbestyrelsip tamatumunnga atatillugu tamanut ammasumik periaasissamut allannguutissat akuersissutigisinnaavai.
Imm. 5. Kommunalbestyrelsip periaasissaq tamanut ammasumik saqqummiutissavaa, aammalu nalunaarummik tamanut ammasumik saqqummiunneqartumik naqitamik ataatsimik oqartussaasunut, imm. 1-imi taaneqartunut nassiussissalluni.

§ 4. § 3, imm. 5 naapertorlugu tamanut ammasumik nalunaaruteqartoqareerpat, kommunalbestyrelsi periaasissami aalajangerneqartunik taamaattunik kommunimut pilersaarummut tassungaluunniit allannguutissanik siunnersuusiussaaq.

 

Kapitali 3
Kommunimut pilersaarutit imai

Kommunimut pilersaarutit nassuiaasiornermut immikkoortuat

§ 5. Nassuiaammut immikkoortoq § 2, imm. 1-ip immikkoortuini siullermi taaneqartoq makkuninnga imaqassaaq:
1) Suliassaqarfinnut agguataakkamik killiffinnut nassuiaat, ilanngullugit kommunimi najugaqariaatsimut, innuttaasut ineriartornerannut aammalu kommunimi inuussutissarsiutit ineriartornerinut kiisalu sanaartorfiusimaneranut nassuiaat.
2) Immikkoortoq anguniakkanut tunngasoq, kommunalbestyrelsip kommuni ataatsimut isigalugu ineriartortitsinissamut nunaminertanillu atuinissamut anguniagaannik nassuiaateqarfiusoq, ilanngullugit inissiat inuussutissarsiorfiillu annertusarneqarnissaat, attaveqaatinut atortut aamma isumaginninnikkut, kulturikkut ilinniartitaanikkullu sullissivinnik pilersuineq, kiisalu sumiiffiit sukisaarsaartarfiit.
3) Pilersaarummut nassuiaat, kommunimut pilersaarummi pilersaarutit allat qanoq eqqarsaatigineqarsimanersut pillugu nassuiaaffiusoq, ilanngullugit nuna tamakkerlugu pilersaarusiorneq, Naalakkersuisut kommunillu aningaasaqarnikkut pilersaarutaat kiisalu kommunip maannamut pilersaarutai.

Kommunimut pilersaarutit pingaarnertut ilusiliinermut immikkoortuat

§ 6. Kommuni ataatsimut isigalugu pingaarnertut ilusiliineq § 2, imm. 1-ip immikkoortuata aappaani taaneqartoq, kommunimi najugaqariaatsip nunaannarmilu nunaminertat ineriartornerannut pingaarnermut pilersaarutit naliliiffigineqarnerat tunngavigalugu aalajangersarneqassaaq.
Imm. 2. Tamatuma saniatigut kommuni ataatsimut isigalugu pingaarnertut ilusiliineq imm. 1-imi taaneqartoq, killiffinnut nassuiaammik, aammalu attaveqaatit naalagaaffimmit, Namminersornerullutik Oqartussanit kommuninillu pigineqartut ataatsimut atorneqarnerisa siunissami ineriartornissamut periarfissaannik naliliissummik imaqarsinnaavoq.

§ 7. Kommunini illoqarfinni, nunaqarfinni nunaannarmilu soqutiginaatilinni ataasiakkaani ilusissat pingaarnerit § 2, imm. 1, nr. 2-mi taaneqartut, nassuiaasiornermut immikkoortup suliassaqarfinnut pilersaarutitaannik eqikkaalluni naliliinikkut aalajangersarneqassapput kiisalu nunami sumiiffinnut aggornilersuineq killeqarfilersuinerlu aalajangersarneqassalluni.
Imm. 2. Imm. 1 naapertorlugu kommunimut pilersaarutip ilusissaani pingaarnermi kommunimi sumiiffiit ilaasa inissiffissaat killissaallu makku eqqarsaatigalugit aalajangersarneqassapput:
1) inissiat,
2) sumiiffiit inuussutissarsiutinik ingerlataqarfiusut umiarsualiviillu, ilanngullugit nunaminertat suliffeqarfinnut avatangiisinut mingutsitsisunut atorneqartut, kiisalu nunaminertat mingutsitsiviusut mingutsitsiviusinnaasutullu ilimanaateqartut,
3) qitiusoqarfiit, ilanngullugit sumiiffiit ataatsimoortumik atorneqartussatut siunertaqarfiusut kiisalu pisortat sullissiviinut atorneqartut il.il.,
4) sumiiffiit sanaartorfigeqqusaanngitsut aamma sumiiffiit sukisaarsaarnermik siunertaqarfiusut, ilanngullugit sunngiffimmi atortut anginerit il.il.,
5) pilersuinermi teknikkimut atortoqarfiit atortullu attaveqarnermut tunngasut allat, ilanngullugit angallannermi atugassatut sanaartukkat,
6) illuaqqat, nunaleriffiit, orpinnik naatiteriffiit, qimmeqarfiit, kuuit, tatsit, sinerissami nunaminertanik atuineq, imaanik atuineq, sumiiffiit pinngortitap kulturilluunniit oqaluttuarisaaneranik immikkut soqutiginaatillit, sumiiffiit sukisaarsaarnermut immikkut atorneqartut il.il.
Imm. 3. Kommunimut pilersaarutip immikkoortuinik imm. 2 naapertorlugu aalajangersaanermut atatillugu makku aalajangersarneqassapput:
1) sanaartukkanut, isumannaallisaaneq imaluunniit sanaartugartarpiaasa (killeqarfiit immikkut akuerisaasut) isumannaarneqarnissaat eqqarsaatigalugu, kiisalu nunaminertanut imermik milluaaffiusunut il.il. illersuinissamut killeqarfiit,
2) eqqissisimatitanik eriagisassanillu isumaginninneq, ilanngullugit illut illoqarfiullu ilai eqqissisimatitat eriagisassallu, kiisalu pinngortitami pingaartitat sumiiffiilluunniit immikkut eriagisassat.
3) sumiiffiit ilaasa atorneqalernissaannut allilerneqarnissaannullu tulleriiaarineq.
Imm. 4. Aamma imm. 1 naapertorlugu pingaarnertut ilusiliinermi pissutsit allat, nunaminertamik atuinermut sanaartukkanullu annertuumik pingaarutillit aalajangersarneqarsinnaapput.

Kommunimut pilersaarutit aalajangersakkanut immikkoortui, aalajangersakkat pingaarnerit

§ 8. Nunaminertat atorneqarnerannut sanaartukkanullu aalajangersakkat pingaarnerit § 2, imm. 1, nr. 3 a)-mi taaneqartut, sumiiffiit ilaannut aalajangersimasunut ataasiakkaanut makku eqqarsaatigalugit aalajangersarneqassapput:
1) nunaminertat illoqarfeqarfiullu atorneqarnerat, ilanngullugit sullissiviit pisortalluunniit kiffartuussiviisa allat inissisimaffii,
2) illoqarfeqarfiup suussusaa, inissisimanera annertussusaalu, ilanngullugit ilaatigut illut eqimassusissaasa, portussusissaassa, imminnut ungasissusissaasa ilusissaasalu malittarisassiornerat,
3) sumiiffiup ilaani aalajangersimasumi inissiat inuussutissarsiutilluunniit eqqarsaatigalugit sanaartorfiunngitsunit sinneruttut,
4) pigisat eqqissisimatitat eriagisassallu, ilanngullugit illut, sanaartukkat sumiiffiilluunniit eqqissisimatitat eriagisassalluunniit, pinngortitami pingaartitat eriagisassat kiisalu sumiiffiit kulturip oqaluttuarisaaneranut iluatinnaatillit,
5) qaartartuusivinnut, tankeqarfinnut, mittarfinnut, imermut pissamaateqarfittut immikkoortitanut, nalunaarasuartaaserisoqarfinnut ikuallattoqarnissaanullu upalungaarsimaffinnut isumannaallisaanermut killeqarfiit,
6) sumiiffiup ilaani aalajangersimasumi angallaffiit aamma pilersuinermi atortut inissisimaffii, ilanngullugit aqqusernit ledningeqarfiillu,
7) sumiiffiup ilaani aalajangersimasumi illoqarfiup nutarterneqarnera isaterinerlu,
8) sumiiffiup ilaani aalajangersimasumi tulleriiaartumik annertusaaneq,
9) sumiiffiup ilaani aalajangersimasumi, nuna tamakkerlugu pilersaarusiornermut soqutiginaatillit isumannaarneqarnissaat siunertaralugu Naalakkersuisunit aalajangiunneqarsimasumi, immikkut aalajangersakkat.
Imm. 2. Imm. 1 naapertorlugu aalajangersakkani pingaarnerni kommunimut pilersaarutip naammassineqarnissaanut kommunalbestyrelsip akuersinerata saniatigut oqartussaasunit allanit akuersissutinik pissarsinissaq pisariaqartinneqarnersoq allanneqassaaq.

Kommunimut pilersaarutit aalajangersakkanut immikkoortui, aalajangersakkat sukumiisut

§ 9. § 2, imm. 1, nr. 3 b) naapertorlugu aalajangersakkani sukumiisuni sumiiffiup ilaata aalajangersimasup atorneqarneranut siunertaasoq allanneqassaaq.
Imm. 2. § 2, imm. 1, nr. 3 b) naapertorlugu sumiiffiit ilaannut aalajangersimasunut ataasiakkaanut aalajangersakkat sukumiisut pissutsit makku pillugit aalajangersarneqarsinnaapput:
1) illoqarfeqarfiup inissiffissaa, ilanngullugit sanaartorfissanik aalajangersaaneq,
2) illut silataasa isikkussaat, ilanngullugit ilaatigut ilusilersorneqarnissaannut, qaliaasa ilusissaannut, toqqaviisa portussusissaannut, atortunut qalipaasersorneqarnissaannullu aalajangersakkat,
3) aqqusernit pisuinnaallu aqqutaat, aammalu pissutsit allat angallannermut pingaaruteqartut, ilanngullugit angallaffiusunut aqqutissat aamma angallattut assigiinngitsut avissaartisimaneqarnissaannut tunngasut,
4) sumiiffiup ilaani aalajangersimasumi nunaminertanik atorneqanngitsunik sunngiffimmiluunniit atortoqarfiusinnaasunik peqarnissaa,
5) ledningeqarfiit inissisimaffii, ilanngullugit innaallagissamik imermillu pilersuineq,
6) nunaminertat sanaartorfiunngitsut ilusaat, atorneqarnerat allanngutsaalineqarnerallu, ilanngullugit nunaminertat atorneqanngitsut, nunamik manissaanerit, ungalulersuineq, naasunik allanngutsaaliuineq kiisalu aqqusinernik angallaffiusunillu allanik qaammaqqusersuinerit,
7) illunik pioreersunik taakkulu avatangiisaannik qaninnernik allanngutsaaliuineq, taamaalilluni illut aatsaat kommunalbestyrelsip akuersissuteqarneratigut isaterneqarsinnaallutik, allanngortiterneqarsinnaallutik allatulluunniit allannguiffigineqarsinnaallutik,
8) pinngortitamik illersuinissamik soqutigisanik isumaginninneq kiisalu nunaminertanik ilutsimikkut nalilinnik allanngutsaaliuineq,
9) nunalerinermi soqutigisanik isumaginninneq, ilanngullugit nunaleriffiit immikkut naleqartut qulakkerneqarnissaat,
10) atortunut ataatsimoorussanut, angallaffinnut teknikkikkulluunniit pilersuinermi atortunut atugassiineq attaviliinerluunniit, imaluunniit sanaartukkat nutaat atorneqalissappata sumiiffiit pilersaarutip avataaniittut atuilernissaannik piumasaqaateqarneq,
11) atortunik ataatsimoorussanik pilersitsinermut atatillugu aningaasaqarnermut tunngasunik maleruagassiorneq, ilanngullugit atuisinnaatitaanermik pigisaqartunut peqatigiiffimmik pilersitsineq, tassunga ilaasortaanissamut pisussaaffeqarneq aamma peqatigiiffiup nunaminertanik ataatsimoorussanik atortunillu ataatsimoorussanik pilersitsinissamut, ingerlatsinissamut aserfallatsaaliuinissamullu pisinnaatitaaffeqarnerat pisussaaffeqarnerallu, aamma
12) nipimik, pujoralammik, tipimik allanillu avatangiisinut ajoqutaasinnaasunik killilersuineq, ilanngullugit nunaminertat illullu saniliusut eqqarsaatigalugit atorneqarnissaannut killilersuutaasinnaasut.
Imm. 3.§ 2, imm. 1 nr. 3 b) naapertorlugu sumiiffiup ilaanut aalajangersimasumut imm. 2-mi taaneqartut saniatigut pissutsinut allanut aalajangersaasoqarsinnaasoq Naalakkersuisut aalajangiisinnaapput.

Kommunalbestyrelsip nunaminertanik atugassanngortitsisarneranut aalajangersakkat

§ 10. Nunaminertanik atugassanngortitsisarnermut aalajangersakkat § 2, imm. 1, nr. 4-mi taaneqartut kommunimut tamarmiusumut atuuttussanngorlugit aalajangersarneqassapput. Aalajangersakkat nunaannarmi nunaminertanut, illoqarfimmi nunaqarfinniluunniit ataasiakkaanut imaluunniit sumiiffiit ilaannut aalajangersimasunut immikkut aalajangersakkanik ilassuserneqarsinnaapput.
Imm. 2. Aalajangersakkat makku eqqarsaatigalugit aalajangersarneqassapput:
1) nunaminertamik atugassinneqarnissamik qinnuteqaatit assigiimmik suliarineqartarnissaasa qulakkeerneqarnissaa,
2) kommunimut pilersaarusiornermut anguniakkanik naammassinninnissaq, aamma
3) sanaartorfissagissaanermut aningaasartuutaasinnaasunik kiisalu aningaasanik illoqarfiup ineriartorneranut pingaaruteqartunik agguaasseriaatsit.

 

Kapitali 4
Nunaminertanik atugassiisarneq

Nunaminertamik atuisinnaatitaanissamik qinnuteqaateqartarneq

§ 11. Nunaminertamik atuisinnaatitaanissamik qinnuteqaat kommunimi pineqartumi kommunalbestyrelsimut nassiunneqassaaq.

Nunaminertanut qinnuteqaatit tamanut ammasumik saqqummiunneqartarnerat

§ 12. Kommunalbestyrelsi pisussaavoq, illoqarfinni nunaqarfinnilu nunaminertamut atuisinnaatitaanissap inaarutaasumik aalajangiiffigineqannginnerani, qinnuteqaat tamanut ammasumik ilisimatitsissutigissallugu.
Imm. 2. Qinnuteqaatigineqartumi sumiiffiup ilaanut aalajangersimasumut aalajangersakkat atuuttut malinneqarpata, imm. 1-imi ilisimatitsisussaatitaaneq saneqqunneqarsinnaavoq.
Imm. 3. Nunaminertat, illut, sanaartukkat nunaminertanilluunniit atuinerit allat minnerusut imaluunniit pingaaruteqannginnerusut pineqartillugit, ilanngullugit nunaminertamik atuinernik allannguinerit imaluunniit illuutinik tunisinermut atatillugu atuisinnaatitaanermik tunniussinerit il.il., imm. 1-imi ilisimatitsisussaatitaaneq saneqqunneqarsinnaavoq.

§ 13. Qinnuteqaammik paasissutissiinermut atatillugu, qinnuteqaammut akerliliissuteqarnissamut ullunit 14-init sivikinnerunngitsumik piffissaliisoqassaaq.
Imm. 2. Qinnuteqaammut akerliliisoqarsimappat, kommunalbestyrelsip qinnuteqaammik suliaqarnerminut atatillugu akerliliissutaasoq ilanngullugu suliarissavaa.

§ 14. Kommunalbestyrelsi pisussaavoq, nunaannarmi nunaminertamik tunniussinissap nalunaarutigineqarnissaa sioqqullugu tamanna pillugu qinnuteqaat suleqatinut attuumassutilinnut tusarniaassutigissallugu.
Imm. 2. Imm. 1 naapertorlugu tusarniaanermut atatillugu qinnuteqaat attuumassutilinnut nassiunneqassaaq. Tamatuma kingorna tusarniaaffigineqartut kommunalbestyrelsip piffissaliussaata iluani tusarniaanermi akissuteqassapput. Tusarniaanermut akissuteqarnissamut piffissarititaasoq, tusarniaaffigineqartup qinnuteqaammik tigusaqarneraniit sivikinnerpaamik ullunik 14-inik sivisussusilerneqassaaq.

§ 15. Kommunalbestyrelsi pisussaavoq, kommunip illoqarfiini nunaqarfiinilu nunaminertat suut kommunip pilersaarutai sanaartorfissagissaanissamullu pilersaarutai malillugit tunniunneqartussatut naatsorsuutigineqarnersut ingerlaavartumik tamanut saqqummiuttassallugit.

Nunaminertanik atugassiisarneq

§ 16. Kommunalbestyrelsi pisussaavoq, nunaminertamik atugassiinerup nuna tamakkerlugu pilersaarusiornermi soqutiginaatilinnut akerliunnginnissaa nakkutigissallugu.
Imm. 2. Aamma nunaminertamik atugassiineq kommunimut pilersaarummut naapertuutissaaq, ilanngullugit sumiiffiup ilaanut aalajangersimasumut pineqartumut aalajangersakkat, kommunimut pilersaarummi aalajangersarneqarsimasut, tak. §§ 8 aamma 9.
Imm. 3. Pilersaarusiorneq aamma nunaminertat atorneqartarnerat pillugit Inatsisartut peqqussutaanni nr. 11-imi, 5. december 2008-meersumi § 24 naapertorlugu inerteqquteqarnissaq aalajangiunneqarsimanngippat, aammalu tamatuma kingorna sumiiffiup ilaani pineqartumi atuinissamik qinnuteqaateqarnissamut akornusiisumik aalajangersaasoqarsimanngippat, qinnuteqaateqarnissamut piumasaqaatit imm. 1-imi aamma 2-mi naammassineqarsimappata kommunalbestyrelsi nunaminertamik atugassiisusaavoq.

Nunaminertanik atugassiinernut atatillugu atugassarititaasut

§ 17. Kommunalbestyrelsi nunaminertanik tunniussinerminut atatillugu pissutsit makku pillugit piumasaqaateqassaaq:
1) nunaminertamik atuineq,
2) akuersissutip atornissaanut sivisunerpaamik ukiunut marlunnut piffissaliineq,
3) sanaartorfissagissaanissamut aningaasartuutinut akiliinissaq,
4) pisariaqarpat sanaartukkanut ataatsimoorussanut attaviliinissamut pisussaaffiliineq,
5) atuisinnaatitaanerup atorunnaarsinnaanera,
6) nunaminertamik atuinerup naaneranut atatillugu saliinissamut pissusitoqaanullu utertitsinissamut pisussaaffiliineq, aamma
7) oqartussaasunit akuersissutit pisariaqartinneqartut allat, nunaminertamik atuilinnginnermi qinnuteqaatigineqartussat.
Imm. 2. Pissutsit sumiiffiup ilaanut aalajangersimasumut aalajangersakkanut atuuttunut naammaginartumik suliarineqarsimanngippata, aamma kommunalbestyrelsi pissutsit makku pillugit ilassutaasunik piumasaqaateqarsinnaavoq:
1) angallannermut isersinnaanermullu tunngasut,
2) ruujoreqarfiit ledningeqarfiillu inissisimaffii, aamma
3) pissutsit allat, kommunimut pilersaarutip piviusunngortinnissaanut pingaaruteqartut.

Nalunaarsuineq

§ 18. Kommunalbestyrelsi pisussaavoq kommunip iluani nunaminertat tunniunneqartut nutaat nalunaarsussallugit.
Imm. 2. Kommunalbestyrelsi pisussaavoq pisinnaatitaaffiit pioreersut misissussallugit iluarsaatissallugillu, taamaalillunilu kommunimi atuisinnaatitaaffiusut atuuttut ataatsimut takussutissiornissaat isumagissallugu.

§ 19. Nunaminertanik atugassiissuteqarnerit tamanut ammasuussapput, ilanngullugit nunaminertamik atugassiinermut atatillugu atugassarititaasut, tak. § 18.
Imm. 2. Paasissutissat mianerisariallit inunnut ataasiakkaanut tunngasut, nunaminertamik atugassiinermi allassimasut imm. 1-imut ilaatinneqanngillat.

 

Kapitali 5
Atuutsitsilernissamut aalajangersakkat

§ 20. Nalunaarut 1. marts 2009-mi atuutilerpoq.

Namminersornerullutik Oqartussat, ulloq 26. februar 2009.

Kim Kielsen

/

Steffen Ulrich-Lynge