Pinngortitamik illersuineq pillugu Inatsisartut inatsisaanni nr. 29-imi, 18. decembari 2003-imeersumi § 5, imm. 1, nr. 1, 4, 8-9, § 16, imm. 1, § 46, aamma § 60, imm. 2 aamma imm. 4, naapertorlugit aalajangersarneqarpoq:

 

Siunertaq sumiiffimmillu killiliineq

§ 1. Kuussuaq (Austmannadalen) taassumalu nunap eqqaa Nuup Kommunianiittoq, sumiiffiup isikkuata aamma kulturikkut oqaluttuarisaanerata allanngutsaaliorneqarnissaa kiisalu nunap nungullariartunnginnissaata isumannaallisaavigineqarnissaa siunertaralugu, eqqissisimatitassanngortinneqarpoq. Aammattaaq eqqissisimatitsinermi nunap ilaani savat nujuitsut nujuartatut uummasuusut illersorneqassapput.
Imm. 2. Aatsitassarsiornermut atatillugu misissueqqaarnernik, ujaasinernik piiaanermillu suliaqarnermi nalunaarut atuutinngilaq. Pinngortitamik illersuinissaq pillugu maleruagassat kiisalu sanaartornissaq ilaalu ilanngullugit, inatsisit sulianut taamaattunut piginnaatitsinermut imaluunniit akuersissuteqarnermut tunngaviusut naapertorlugit kiisalu taakkuninnga ataatsimoortumik oqartussaasutut suliarinninnermut ilaatillugit aalajangersaavigineqartassapput.

§ 2. Nuna eqqissisimatitaq nunap assingani ilanngussaq 1-imi takuneqarsinnaavoq.
Imm. 2. Sermip killinga atuallallugu sermip sinaata tungaanut eqqissisimatitamut killeqarfiuvoq.

Kikkulluunniit appakkaasinnaanerat atuinerlu

§ 3. Nalunaarummi matumani killiliinerit eqqaassanngikkaanni kikkulluunniit sumiiffimmut eqqissisimatitamut appakaassinnaapput.

§ 4. Nunap eqqissisimatitap iluani tatsit, kuuit, kangerluit imaluunniit nunat, qanoq iliornikkulluunniit iliuuseqarluni eqqakkanik, aalisarnermi atortunik atornikunik, nalunaarsuutinik imaluunniit ilisimatusarnermi atortunik qimataqarnikkut mingutsinneqarnissaat inerteqqutaavoq.
Imm. 2. Nunap naasuinik innarliineq imaluunniit nunamik allanngortitsinerit inerteqqutaapput.

§ 5. Nunap eqqissisimatitap iluani savanik nujuitsunik nujuartatut uummasuusunik piniarneq inerteqqutaavoq.

§ 6. Nunap eqqissisimatip iluani nunalerinermik suliaqarnerit, uumasuuteqarneq, narsaasiorneq imaluunniit naatitassanik ikkussuineq inerteqqqutaapput.

Tupertorneq silamilu ikumatitsineq

§ 7. Nunap eqqissisimatitap iluani tupertorneq, silami ikumatitsineq, matumani gassimik sprittimillu ikummatilinnik il.il. atuineq ilanngullugit, uninngaffigisami taamaallaat ullunik tallimanik sivisussulimmi pisinnaapput. Tamatuma kingorna tupertorneq aamma silami ikumatitsineq, matumani gassimik sprittimillu assigisaannilluunniit ikummatilinnik atuineq ilanngullugit, ingerlaannassappat, tamanna siullermik uninngaffigisatut atorneqartumit minnerpaamik 100 meterinik ungasissulimmi taamaallaat pisinnaavoq, taamaattoq takuuk imm. 2.
Imm. 2. Nunaminertat aalajangersimasut tupertornermut aamma silami ikumatitsinermut atatillugu, matumani gassimik sprittimillu ikkumatilinnik assigisaannilluunniit atuineq ilanngullugit, ullut unnuallu tallimat sinnerlugit sivisussulimmik atorneqartussat, Attaveqarnermut Avatangiisinullu Naalakkersuisoqarfimmut aamma Aatsitassanut Ikummatissanullu Pisortaqarfimmut tusarniaareernerup kingornatigut Nuummi kommunalbestyrelsimit toqqarneqassapput. Ullunit unnuanillu tallimanit sivisunerusumik sumi tupertortoqarsinnaanersoq aamma silami ikumatitsisoqarsinnaanersoq, matumani gassimik sprittimillu ikummatilinnik assigisaannilluunniit atuineq ilanngullugit, erseqqissumik nalunaaqutserneqassapput.
Imm. 3. Nunami eqqissisimatitami nunami naasut toqunerinik kipparlukunik kiisalu qissianik ikumatitassanik katersineq atuinerlu ajornartitaanngilaq.

Illuliorneq, sanaartorneq aamma pisuinnaat aqqutaat

§ 8. Nunami eqqissisimatitami illuliorneq imaluunniit aalaakkaasunik allanik sanaartorneq kiisalu aqquserniornerit aamma pisuinnartunut aqqutissiornerit inerteqqutaapput, taamaattoq takuuk imm. 2.
Imm. 2. Attaveqarnermut Avatangiisinullu Naalakkersuisoqarfik Nuummi kommunalbestyrelsip aamma Aatsitassanut Ikummatissanullu Pisortaqarfiup tusarniarneqareernerisa kingornatigut, illuliornissamut allanillu aalaakkaasunik sananissamut akuersissuteqarsinnaavoq.
Imm. 3. Illuliat imaluunniit sanaartukkat aalaakkaasut allat annertussusissaat, suussusissaat, sumut inissinneqarnissaat, portussusissaat, ilusissaallu pillugit, kiisalu nunap naasullu ilusimisut iluseqaqqilersinnissaat pillugit Attaveqarnermut Avatangiisinullu Naalakkersuisoqarfik atugassarititaasussanik akuersissutini imm. 2 naapertorlugu tunniunneqartuni aalajangersaasinnaavoq.

§ 9. Pisuinnaat aqqutaat Attaveqarnermut Avatangiisinullu Naalakkersuisoqarfimmut aamma Aatsitassanut Ikummatissanullu Pisortaqarfimmut tusarniaareernerup kingornatigut Nuummi kommunalbestyrelsip innersuussuteqarnera naapertorlugu nalunaaqutsersorneqarsinnaapput.

Nunami imaanilu angalaneq

§ 10. Nunami eqqissisimatitami sikkilinik aamma qamutinik motorilinnik, matumani qamuteralaat (snescooter) ilanngullugit, angalaneq tamarmi inerteqqutaavoq, taamaattoq takuuk imm. 2.
Imm. 2. Ilisimatuussutsikkut misissuinernut atatillugu qamuteralannik atuineq Attaveqarnermut Avatangiisinullu Naalakkersuisoqarfiup akuersissutigisinnaavaa.
Imm. 3. Attaveqarnermut Avatangiisinullu Naalakkersuisoqarfik atugassarititaasussanik akuersissutini imm. 2 naapertorlugu tunniunneqartuni aalajangersaasinnaavoq.

§ 11. Nunami eqqissisimatitami tatsini kuunnilu angallatinik motorilinnik angalaneq inerteqqutaavoq.
Imm. 2. Aalisarnermut, piniarnermut aallaaniarnermut kiisalu ilisimatuussutsikkut misissuinernut atatillugu motorilinnik imaani angalanerit imm. 1-imi pineqanngillat.

Timmisartunik angalanerit

§ 12. Nunami eqqissisimatitami sumiiffimmi pineqartumi uumasoqarnera eqqarsaatigalugu 500 meterinit appasinnerusumi timmisartorneq kiisalu nunami eqqissisimatitami minnissaq inerteqqutaapput, taamaattoq imm. 2 – 5 takukkit.
Imm. 2. Aalajangersimasumik timmisartuussisarnerit akuersissuteqarfiusut, annaassiniarnerit ujaasisarnerillu kiisalu nunami eqqissisimatitami ilisimatuussutsikkut siunertalinnik timmisartornerit imm. 1-imi inerteqquteqarnermit pineqanngillat.
Imm. 3. Annaassiniarnernut ujaasinernullu atatillugu kiisalu nunami eqqissisimatitami ilisimatuussutsikkut siunertalimmik minnerit imm. 1-imi inerteqquteqarnermit pineqanngillat.
Imm. 4. Imm. 2-mi aamma 3-mi taaneqartunit allaanerusunik pisoqartillugu, nunami eqqissisimatitamik timmisartornissanut minnissanullu Nuummi Kommunalbestyrelsimik aamma Aatsitassanut Ikummatissanullu Pisortaqarfimmik tusarniaareernerup kingornatigut, Attaveqarnermut Avatangiisinullu Naalakkersuisoqarfik akuersissuteqarsinnaavoq.
Imm. 5. Nuummi Kommunalbestyrelsimik aamma Aatsitassanut Ikummatissanullu Pisortaqarfimmik tusarniaareernerup kingornatigut Attaveqarnermut Avatangiisinullu Naalakkersuisoqarfik atugassarititaasussanik akuersissutini imm. 4 naapertorlugu tunniunneqartuni aalajangersaasinnaavoq.

Aqutsineq, nakkutilliineq aamma immikkut akuersissuteqartarneq

§ 13. Nuummi Kommunalbestyrelsimik aamma Aatsitassanut Ikummatissanullu Pisortaqarfimmik tusarniaareernerup kingornatigut nunamik eqqissisimatitamik aqutsinissamut pilersaarusiamik Attaveqarnermut Avatangiisinullu Naalakkersuisoqarfik suliaqassaaq.

§ 14. Nalunaarummi matumani aalajangersakkanik maleruaasoqarneranik Nuummi Kommunalbestyrelsi nakkutiginnissaaq.

§ 15. Nuummi kommunalbestyrelsimik aamma Aatsitassanut Ikummatissanullu Pisortaqarfimmik tusarniaareernerup kingornatigut, § 7, imm. 1-imi, § 10, imm.1-imi kiisalu § 11, imm 1-imi aalangersakkanik uniuinissamik, Attaveqarnermut Avatangiisinullu Naalakkersuisoqarfik immikkut akuersissuteqarsinnaavoq.

§ 16. §§ 4-6-mik, § 7, imm. 1-imik, § 8, stk. 1-imik, § 10, imm. 1-imik, § 11, imm. 1-imik kiisalu § 12, imm. 1-imik unioqqutitsinerit akiliisitsissutaasinnaapput.
Imm. 2. § 8, imm. 2-mik aamma § 12, imm. 4-mik piumasaqaatinik aalajangersakkanik unioqqutitsinerit akiliisitsissutaasinnaapput.
Imm. 3. Suliffeqarfik tamakkiisumik ilaannakuusumilluunniit naalagaaffimmit, Namminersornerullutik Oqartussanit, kommunimit imaluunniit kommuninit ataatsimoortunit kommunalbestyrelsit nunaqarfinnilu aqutsisut il.il. pillugit Inatsisartut inatsisaanni pineqartunut ilaasunit, aktiaateqarluni piginneqatigiiffimmit, piginneqatigiiffimmit, piginneqatigiinnikkut ingerlatseqatigiiffimmit imaluunniit tamatumunnga assingusumit pigineqartoq unioqqutitsisuuppat, suliffeqarfik il.il. pineqartoq, pinerluttulerineq pillugu inatsit malillugu akisussaasunngortinneqarsinnaavoq. Tamannattaaq aamma atuuppoq Namminersornerullutik Oqartussat, kommuni imaluunniit kommunit ataatsimoortut, kommunalbestyrelsit nunaqarfinnilu aqutsisut il.il. pillugit inatsisartut inatsisaanni pineqartunut ilaasut unioqqutitsisuuppata.
Imm. 4. Imm. 1- 3 malillugit akiliisitsissutaasut Nunatta karsianut ikineqassapput.

§ 17. Nalunaarut ulloq 1. august 2008 atuutilerpoq.
Imm. 2. Peqatigitillugu Nuup Kommuneani savat nujuitsut nujuartatut uumasuusut eqqissisimatinneqarnerannut ileqqoreqqusaq, 28. august 1989-imeersoq, atorunnaarsinneqarpoq.

Namminersornerullutik Oqartussat, ulloq 14. juli 2008

Kim Kielsen

/

Steffen Ulrich-Lynge

---

Ilanngussaq 1