Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaanni nr. 3-mi, 2. maj 1996-imeersumi § 11 naapertorlugu kingullermillu Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaanni nr. 13-imi, 15. november 2007-imeersumi allanngortinneqartoq naapertorlugu aalajangersarneqarpoq:

Suliassat takussutissartaat

§ 1. 1. april 2008-mi suliassat akiliisitsiniartarnermut tunngasut, 31. marts 2008-mi suli naammassineqanngitsut kommunalbestyrelsit akileraaruseriffimmut tunniutissavaat. Taamatuttaaq akiliisitsiniarnermut pingaaruteqartunik uppernarsaatit allat tunniunneqassapput.
Imm. 2. Suliat takussutissartaat akileraaruseriffimmut tunniunneqanngitsut isumannaatsumik pineqarlutillu toqqorsimaneqassapput. Suliani takussutissat tamakkua toqqorsimaneqarnissaannut kommunalbestyrelsit pilersaarusiussapput. Pilersaarusiap assilinera akileraaruseriffimmut nassiunneqartussaq, ukiumut minnerpaamik ataasiarluni aaqqissuuteqqinneqartassaaq.
Imm. 3. Suliani takussutissiat, kommunalbestyrelsinit paarineqartut nassiunneqarnissaat tunniunneqarnissaallunniit akileraaruseriffimmit qinnutigineqartillugu, qinnuteqaat suliamut akileraaruseriffimmi suliarineqartumut aalajangersimasumut tunngasuugaangat, kommunalbestyrelsit qinnuteqaat akiliisitsinertaqanngitsumik naammassisassavaat.

Atuutilersitaanera

§ 2. Nalunaarut atuutilissaaq 1. marts 2008.

Aleqa Hammond

/

Peter Schultz