§ 1

Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaat nr. 3, 2. maj 1996-imeersumi, Inatsisartut inatsisaat nr. 3, 12. maj 2005-imeersukkut aamma Inatsisartut inatsisaat nr. 4, 26.april 2007-imeersukkut allanngortinneqartumi, makkua allanngortinneqarput:

1. § 1, imm.2, nr. 23-25 imatut oqaasertaliorneqarpoq:
"23) Takornarianut, Nunamilu suliffeqarfiit siuarsarneqarnissaannut Inatsisartut inatsisaat.
24) Biblioteqarnermi Inatsisartut peqqussutaat.
25) Unammillernermi Inatsisartut inatsisaat."

2. Immikkoortumut qulequtaasup "inatsisip atuuffii" siuliatut ilanngunneqarpoq:

"Kapitali 1
"Atuuffigisaq, akiliisitsiniarneq il.il."

3. § 8, imm. 1-imi, "akiliisitsiniartartup" allanngortinneqarpoq "akileraaruseriviup" aammalu "akiliisitsiniartartoq" allanngortinneqarpoq: "akileraaruserivik"-mut.

4. § 8-mi imm. 2 aamma 3-tut ilanngunneqassapput:
"Imm. 2. Akileraaruserivik pisortat oqartussaasuini allani aamma Pappiaqqanik nalilinnut Centralimit akiliisitsiniartarnermi oqartussaasutut suliassat suliarineqarnissaannut pisariaqartunik paasissutissanik pissarsisinnaavoq.
Imm. 3. Akileraaruserivik nalunaarsuivinnit pisortanit ingerlanneqartunit paasissutissanik akiligassaqartuusup pissutsit atugarisaanut tunngasunik akiliisitsiniarnermut pingaaruteqartunik piumasaqarsinnaavoq. Paasissutissat elektronikkimik atortorissaarutit atorlugit pissarsiarineqarsinnaapput."

5. § 11-p kingornani immikkoortumullu qulequtaq "unioqqutitsinerit" sioqqullugu ilanngunneqassaaq:

"Kapitali 2
Akileraaruserivik

§ 11 a. Akileraaruseriviup akiliisitsiniarnermi oqartussaasutut suliassat ingerlatsissavai.
Imm. 2. Pisassarisanik naatsorsuinerit akiligassiissutinillu assigisaannillu nassiussuinerit pisassaqartuusunit isumagineqassapput, imaluunniit pisassaqartuusoq sinnerlugu pisassarisanik akiligassiisuusumit. Assigisaanik atuutissaaq akiligassaq pillugu akerliliinerit suliarineqartarnissaat.
Imm. 3. Akiligassiissutit akileraaruserivimmut tunniunneqassapput akiliisitsiniarnissaq anguniarlugu, tassani akiliinissamut piffissaliussaq qaangerneqareersimappat, aammalu akiliisitsiniarnerit kinguneqarsimanngippata.
Imm. 4. Pisassaqartuusorli imaluunniit taanna sinnerlugu pisassarisanik akiligassiisoq, akiligassaqartup qinnuteqarneratigut naafferartumik akilersuinissamut imaluunniit akiliinngikkallarnissamut akuersissuteqarsinnaavoq. Pissutsit atuuttuusut immikkut kaammattuutigippasuk, pisassarisat siusinnerusukkut akileraaruserivimmut piffissaq Imm. 3-imi, oqaaseqatigiinni siullerni taaneqartoq sioqqullugu.
Imm. 5. Pisassaqartuusup pisassarisat il.il. akilersinniarneqartussanngorlugit akileraaruserivimmut tunniunneqannginneranni, taannaluunnit sinnerlugu akiligassiisuusup, akiligassaqartuusoq tunniussineq pillugu allakkatigut nalunaarfigissavaa.
Imm. 6. Pisassaqartuussup taannaluunniit sinnerlugu pisassarisanik akiligassiissuteqartuusup, pisassarisanik akileraaruserivimmut tunniussereernerminni akiitsoqartuusup pissutsinik atugarisaasa annertuumik allannguuteqarsimanerannnik ilisimasaqaleruni, akileraaruserivik tamanna pillugu ilisimatissavaa.
Imm. 7. Pisassaqartuusup, pisassaqartuusorluunniit sinnerlugu pisassarisanik akiligassiisup, pisassarisaq akileraaruserivimmut akilersinniarnissaanut nassiunneqarsimasoq tamaat ilaannaasumilluunniit utertissinnaavaa. Akileraaruseriviup utertitsinissamik qinnuteqaat itigartitsissutigisinnaavaa, akiligassaqartuusumut tunngasut piffissami nalaanneqartumi suliarineqarpata. Pisassarisat nunap karsianit taarsiiffigineqartussanut ilaasut, pisassaqartuusumut, imaluunniit pisassaqartuusoq sinnerlugu akiligassiisimasumut utertinneqassanngillat.
Imm. 8. Pissutsinut imm. 1-imiit 7-imut taagorneqartunut tunngatillugu, tamatumani aamma akilersinniakkanik akileraaruserivimmut tunniussinermi periusissaq pillugu, nalinginnaasumik eqqaasitsissuteqartarnermi suleriutsimut minnerpaamik piumasaqaatit pillugit, akilersinniakkanik utertitsisarnermut, naafferartumik akilersorneqarnissamut imaluunniit akilinngikkallartinneqarsinnaasutut akuerineqarsinnaasut pisassarisat annertussusiinut il.il tunngasunik, aammalu naafferartumik akilersuinermi akiliinngikkallarnissamullu piffissaliussat pillugit malittarisassanik Naalakkersuisut aalajangersaasinnaapput. Naalakkersuisut aamma akilersinniakkat elektronikkimik atortorissaarutit atorlugit tunniunneqarsinnaanerat pillugu malittarisassanik aalajangersaasinnaapput.

§ 11 b. Pisassarisat akileraaruserivimmut akilersinniagassanngorlugit tunniunneqartut malittarisassat Naalakkersuisut aalajangigaat malillugit erniaqartinneqassapput. Naalakkersuisut tamatumani pisassarisanut assigiinngitsunut erniat annertussusissaat aalajangersarsinnaavaat aalajangersarlugulu erniat qanoq naatsorsorneqarnissaat.
Imm. 2. Pisassarisat akileraaruserivimmut tunniunneqarnerisa kingornatigut, qaammat siulleq aallarnerfigalugu qaammatit aallartinneri tamaasa ernialerneqartassapput. Erniat akileraarusigaasussanik isertitat naatsorsorneqarneranni ilanngaataasinnaanngillat. Erniat pisassaqartuusunut nakkassapput.
Imm. 3. Pisassarisanik akileraaruserivimmut akilersinniagassanngorlugit tunniussanik ernialersuineq akileraaruseriviup unitsisinnaavaa, akiligassaqartuusup akiitsuni akilersinnaanngippagit, ukiunilu tulliuttuni qaninnerpaani akiitsutigut pisussaaffimminik naammassinnissinnaanissaa ilimanaateqanngippat. Akileraaruseriviup ernialersuineq ingerlateqqilersinnaavaa, akiligassaqartuusup aningaasaqarnikkut pissutsit atugarisai ajunnginnerulerpata imaluunniit paasineqarpat, akileraaruserivik, ernialersuinermik unitsitsinissamik aalajangiinerup nalaani, paasissutissanik attuumassute-qartunik tamakkiisumik pigisaqarsimanngitsoq.
Imm. 4. Akiligassaqartuusut inuinnaasut kisimik imm. 3-mi pineqarput.
Imm. 5. Imm. 3-mik atuinissamut Naalakkersuisut malittarisassaliorsinnaapput.

§ 11 c. Akilersinniakkanik assigisaannillu akileraaruserivimmut tunniussinermi akileraaruseriviup akiligassaqarfigisatut pisinnaatitaaffiit pigilersarpai, tamatumani aamma taarteqarnissamik qinnuteqarsinnaatitaaneq, pisassarisanit ilanngaasinnaaneq, pigisanik akiliuteqartitsisinnaaneq akissarsianilluunniit ilanngaassuisitsineq, akiliutit tulleriiaarissutigisinnaanerat, eqqartuussivikkoortumik suliassiisinnaaneq, akiliisinnaajunnaartutut suliarineqarnissamik qinnuteqarneq, agguagarsiassanik akuersisinnaaneq akiitsunillu iluarsaassiffigineqarnissamut il.il. siunnersuuteqarsinnaaneq. Akileraaruserivilli akiliisinnaajunnaarneq pillugu inatsisip atuuttussanngortinneqarneranik peqqussutip avataani isumakkeerinissamut tunngasunik suliani akiligassaqarfiusup pisussaaffiinik tigusaqanngilaq.
Imm. 2. Akileraaruseriviup akiliisitsiniarnermut ilaatillugu naafferartumik akilersuinissaq akuersissutigisinnaavaa imaluunniit akiliinngikkallarnissamut akuersissuteqarsinnaalluni. Inatsisini allani naafferartumik akilersuineq akiliinngikkallartitsinerlu pillugit erseqqinnerusumik malittarisassaqartillugu, malittarisassat tamakkua suli atorneqartussaapput.
Imm. 3. Naalakkersuisut imm. 1 aamma 2-mi malittarisassat naammassineqarnissaannut erseqqinnerusumik malittarisassanik aalajangersaasinnaapput.Naalakkersuisut aamma pisassaqartuusut pisortanilu oqartussaasut allat elektronikki atorlugu atortorissaarutit atorlugit pisassaqartuusumut pineqartumut tunngatillugu akiligassanut kinguaattoorutit amerlassusaannik, aammalu pisassaqartunut allanut tunngatillugu akiligassanut kinguaattoorutinik peqarnersoq akileraarusersiviup paasissutissanik nalunaarsugaanut isersinnaanerannut malittarisassanik aalajangersaasinnaapput.

Agguaanermut aalajangersakkat

§ 11 d. Kommunit akiliisitsiniartarnermi oqartussaasutut suliassanik suliarinninnerannuinnaq atatillugu pisinnaatitaaffinnut pisussaaffinnullu akileraaruserivik 1. januar 2008-miit pisinnaatitaaffeqalerlunilu pisussaaffeqalissaaq.
Imm. 2. Akileraaruseriviup kommunini tjenestemanditut atorfeqartitaasut, akiliisitsiniarnermi suliassaannarnik annertunerpaamilluunniit suliaqartut, 1. januar 2008-miit atorfeqartitarilissavai. Tjenestemandit Kalaallit Nunaanni Namminersornerullutik Oqartussani atorfeqartitaanermut nuussapput, maannamut atorfimmi atugassarititaasut assinginik tunngaveqartumik.
Imm. 3. Akileraaruserivik akiliisitsiniarnermi suliassat ingerlanniarneranni atugassanik kommunimi pineqartumi illunik ilaannaanilluunnit attartorsinnaapput allaffimmilu atortunik il.il. attartornissamut isumaqatigiissuteqarluni.

§ 11 e. Akileraaruseriviup kommunit akiliisitsiniartarnermi elektronikki atorlugu atortut atugarisaat atorsinnaavai.
Imm. 2. Kommunit akileraaruserivik kommunit akiliisitsiniarnermik suliaqarnermi elektronikki atorlugu atortorissaarutinik atortunik atuisinnaatissavaat, tamatumani aamma kommunit akileraaruserivik naatsorsuuserinermut, naatsorsuutinut il.il. tunngasunik paasissutissaataanut, akileraaruseriviup naliliinera malillugu akiliisitsiniarnermi suliassanik ingerlatsinissamut pisariaqartunik, terminalinut isersinnaatissavaat.

§ 11 f. Suliassat sulisullu kommuneniit akileraaruserivimmut, inatsit manna naapertorlugu nuunneqarnerisa ingerlanneqarnerannut Naalakkersuisut malittarisassanik aalajangersaasinnaapput. Tamatumani kommunit akiliisitsiniarnermut tunngasutigut innuttaasunik sullissinerat pillugu sulianilu allagaatit allagaatinillu toqqortaatit qanoq annertutigisumik akileraaruserivimmut nuunneqarnissaat pillugu malittarisassanik Naalakkersuisut aalajangersaasinnaapput.

§ 11 g. Naalakkersuisut Tele/Post-imik, KNI A/S-imik aningaaserivinnillu isumaqatigissuteqarsinnaapput 300 koruunit ataallugit, pisassarisanut akileraaruserivimmi akilersinniagaasunut, akiliinernik suliaqarnermut akiliutinik akiliisitsinnginnissamik."

6. § 12 aamma qulequtaq "Unioqqutitsinerit" sioqqullugit ilanngunneqassaaq:

"Kapitali 3
Pineqaatissiissutit, atuutilerfissat il.il.."

7. § 12-p kingornanut qulequtarlu "atuutilerfik" sioqqullugu ilanngunneqassaaq:
"§ 12 a. Akileraaruseriviup naatsorsuutigippagu unioqqutitsineq akiliisitaanermit sakkortunerusumik nassataqassanngitsoq, Naalakkersuisut, Naalakkersuisulluunniit tamatumunnga pisinnaatitaata, pineqartoq nalunaarfigisinnaavaa suliaq eqqartuussivikkut malersuinertaqanngitsumik aalajangiivigineqarsinnaasoq, pineqartup unioqqutitsinermi pisuunini nassuerutigippagu piffissallu erseqqinnerusumik taaneqartup, qinnuteqarnikkut kinguartinneqarsinnaasup, qaangiutinnginnerani, nalunaarummi akiliisitaassutissatut nalunaarutigineqartoq akilerniarlugu nalunaarutigalugu.
Imm. 2. Imm. 1-imi nalunaarummut oqaatigineqartumut tunngatillugu Kalaallit Nunaanni Eqqartuussisarneq pillugu inatsimmi unnerluussutip imarisassai pillugit malittarisassat taamatuttaaq matumani atuupput.
Imm. 3. Akiliisitaanermi akiligassaq piffissaagallartillugu akilerneqarpat, imaluunniit aalajangiinerup kingornatigut akilersinneqarpat, annertunerusumik malersuinissaq taamaatinneqassaaq.

§ 12 b. Malittarisassani, Inatsisartut inatsisaat manna malillugu pilersinneqartuni, aalajangersakkanik unioqqutitsinermut akiliisitaanermik pineqaatissiinermut malittarisassat aalajangersarneqarsinnaapput.
Imm. 2. Malittarisassani Inatsisartut inatsisaat manna malillugu pilersinneqartuni, aktiat anpartilluunniit tunngavigalugit ingerlatseqatigiiffimmit, piginneqatigiiffittut ingerlatsivimmit, peqatigiiffimmit, imminut pigisutut suliffeqarfimmit, aningaasaateqarfimmit, naalagaaffimmi oqartussaasunit, Kalaallit Nunaanni Namminersornerullutik Oqartussanit, kommunemit, kommunit ataatsimooqatigisaannit assigisaannillu unioqqutitsinerit akiliisitaanermik pineqaatissiissutigineqarnissaannut malittarisassat aalajangersarneqarsinnaapput.

§ 12 c. Akiliisitaassutit §§ 12-12b naapertorlugit akiliisitsissutaasut nunap karsiata pisassarai."

 

§ 2

Imm. 1. Inatsisartut inatsisaat 1. april 2008-mi atuutilissaaq, takuulli imm. 3.
Imm. 2. Tamatumunnga peqatigitillugu pisassat akileqquneqartarnerannik akiliisitsiniartarnermillu kommunit suleqatigiinnerat pillugu Inatsisartut inatsisaat nr. 4, 12. maj 2005-imeersoq atorunnaarsinneqarpoq..
Imm. 3. § 11e aamma § 11 f atuutilerput, Inatsisartunut, Naalagaaffiup sinniisaanut, politiinut, kommunenut eqqartuussiveqarfimmullu ullormi nassiunneqarneranniit sapaatit akunneri marluk qaanngiunneranni.

Hans Enoksen

/

Aleqa Hammond