Suliassaqartitsinermik isumaginninnermillu ingerlatsineq pillugit Kalaallit Nunaannut inatsimmi nr. 580, ulloq 29. november 1978-imeersumi § 2 naapertorlugu aalajangersarneqarput:

 

Kapitali 1
Piumasaqaatit nalinginnaasut il.il.

§ 1. Utoqqalinermi pensionisianik pisartagaqarnissamut pisinnaatitaanermut, qinnuteqartup danskisut innuttaassuseqarnissaa piumasaqaataavoq.
Imm. 2. Tamannali atuutinngilaq:
1) Inunnut Isumaginninnikkut isumannaallisaaneq pillugu Nunat Avannarliit isumaqatigiissutaanni pineqartunut.
2) Inunnut qinnuteqarnerup siunitsianngua sivikinnerpaamik ukiuni pingasuni Kalaallit Nunaani aalajangersimasumik najugaqarsimasunut. 65-inik ukioqalereernermi qinnuteqartoqarpat najugaqarsimanissamik piumasaqaat 65-inik ukioqalernermi eqquutsinneqarsimassaaq, taamaattorli takuuk, § 27, imm. 3.

§ 2. Utoqqalinermi pensionisianik pisartagaqalerniarnermut piumasaqaataavoq, qinnuteqartup Kalaallit Nunaanni, Nunat Avannarliit arlaanni imaluunniit nunami EØS-ip isumaqatigiissutaanik akuersisimasumi aalajangersimasumik najugaqartuunissaa.

§ 3. Utoqqalinermi pensionisianik pisartagaqalerniartumut piumasaqaataavoq 15-init 65-inut ukioqalernerup akornanni sivikinnerpaamik ukiuni pingasuni Naalagaaffeqatigiit iluanni aalajangersimasumik najugaqarsimanissaq.

§ 4. Inatsisartut peqqussutaanni matumani inuit, aappariittut naatsorsuunneqartut tassaapput, katissimallutik aappariit, nalunaarsukkamik inooqatigiit imaluunniit aappariit, katissimanermut assingusumik sivikinnerpaamik ukiumi ataatsimi inooqatigiissimasut.
Imm. 2. Katissimallugu aapparisaq, nalunaarsukkamik aapparisaq imaluunniit inooqatigisaq isumaginninnerup iluani ulloq unnuarlu angerlarsimaffimmut aalajangersimasumik najugalittut nuuppat, aappaasoq utoqqalinermi pensionisiaqartumut naligitinneqassaaq.

 

Kapitali 2
Pisartagaqarsinnaanngorneq katersisarnerlu

Utoqqalinermi pensionisianik pisartagaqalersarneq

§ 5. Utoqqalinermi pensionisianik pisartagaqalersitsisoqarsinnaavoq qaammatip 65-inik ukioqalerfiup aallaqqaataa aallarnerfigalugu, taamaattorli, § 27, imm. 3 takuuk. 65-inik ukioqalereernerup kingorna pensionisiaqalernissamik qinnuteqarnermi, ullup qinnuteqarfiup kingorna qaammatip aallaqqaataa aallarnerfigalugu pisinnaatitaaneq atuutilissaaq.
Imm. 2. Inuit siusinaartumik pensionisiallit 65-inik ukioqalernerminni, qinnuteqaatitaqanngitsumik utoqqalinermi pensionisiaqarnermut ikaarsaartassapput, taamaattorli, § 27, imm. 3 takuuk.

 

Katersineq

§ 6. Utoqqalinermi pensionisianik ilivitsunik pisartagaqalerniarnermi, 15-it 65-illu akornanni ukioqarnerup nalaani Kalaallit Nunaanni, Qallunaat Nunaanni imaluunniit Savalimmiuni sivikinnerpaamik ukiuni 40-ni aalajangersimasumik najugaqarsimanissaq piumasaqaataavoq. Utoqqalinermi pensinisiassanik ilivitsunik pisinnaatitaanerlernissamut piumasaqaat naammassineqarsimanngippat, piffissap aalajangersimasumik najugaqarfigisimasap ukiuinut ilivitsunut kingumut akunnaallilerlugu naatsorsornera, aamma ukiunut 40-nut naleqqiullugu naatsorsornera najoqqutaralugit, utoqqalinermi pensinisiassanik annertussusiliineq pisassaaq.
Imm. 2. Siusinaartumik pensionisialik utoqqalinermi pensionisiaqalersinneqarpat, piffissami siusinnerusumi siusinaartumik pensionisiat tunniunneqareersimasut 40-rarterutaasa avinneqartarsimanerisa amerlaqataannik utoqqalinermi pensionisiassat tunniunneqartassapput.

 

Kapitali 3
Pensionisiat aningaasartaat

§ 7. Utoqqalinermi pensionisiassanik amerlassusiliinerit:
1) Utoqqalinersialimmut kisimiittumut ukiumut 110.000 kr.
2) Aappariinnut, tassani aapppaasoq kisimi utoqqalinersiaqarpat, aappaasorlu sumilluunniit utoqqalinersiaqartinneqanngippat, ukiumut 110.000 kr.
3) Aappariit, tamarmik utoqqalinersiaqartussaatitaappata ukiumut 150.000 kr.
Imm. 2. Aappariit, tassani aappaasoq utoqqalinermi pensionisiaqarpat, aappaasorlu siusinaartumik pensionisiaqarpat, katillugit pisassavaat ukiumut 140.000 kr.
Imm. 3. Aningaasat amerlassusissaat imm. 1-mi aamma 2-mi taaneqartut, Kalaallit Nunaanni Naatsorsueqqissaartarfiup Kalaallit Nunaanni atuisunut akinik nalunaarsuisarnermini pisortatigoortumik saqqummersitai tunngavigalugit, akit nalimmassaavigineqartassapput. Akinik nalunaarsuisarnermi, akinutt qaffariaataasoq appariaataasorluunniit 3 pointinik ilivitsunik naleqalersimaneri tamaasa, utoqqalinermi pensionisiassat aningaasartaat 3 %-imik qaffanneqarsinnaapput imaluunniit apparneqarsinnaapput. Akit allannguutaat 1. juli atuisartunut saqqummiunneqartut tunngavigalugit, 1. januari tulliuttoq siulleq aallanerfigalugu akinik iluarsiissutit atuutilersinneqartassapput.
Imm. 4. Ukiut tamaasa 1. januari utoqqalinersianut iluarsiissutit Naalakkersuisunit pisortatigoortumik tamanut nalunaarutigineqartassapput.

§ 8. Utoqqalinermi pensionisiat, kiisalu Nunat Avannarliit isumaqatigiissutaat malillugu Isumaginninnermi Sillimmasiisarfinni nalunaarsorsimasut pisartagaat ilanngunnagit, utoqqalinersiallip immaqalu aappaasup, nalunaarsukkamik inooqatigiittut imaluunniit katissimanatik aappariittut ukiumut isertitaasa akileraarutaasussat katinnerisa, kisitsisinik makkuninnga sinniisimappata, taava utoqqalinersiat ilanngaateqartinneqarsinnaapput:
1) Utoqqalinersialik kiimiittoq ukiumut 56.000 kr. Sinniisimappat.
2) Utoqqalinersialinnut aappariinnut, aappaa utoqqalinersialik aappaa siusinaartumik utoqqalinersialik, ukiumut 70.000 kr. sinniisimappata.
3) Utoqqalinersiallit aappaarit, tassani tamarmik utoqqalinerisaqarpata, ukiumut 84.000 kr.-nik sinniisimappata.
4) Aappariit, tassani aappaasoq utoqqalinersiaqarpat aappaasorlu sumilluunniit utoqqalinersiaqanngippat, ukiumut 84.000 kr.-nik sinniisimappata.
Imm. 2. Ukiumut isertitat kisitsisinik ataani taaneqartunik sinniisimappata utoqqalinersiat peerneqartassapput:
1) Utoqqalinersiallip kisimiittup ukiumut isertitaasa 228.000 kr. Sinnersimappagit.
2) Utoqqalinersiallit aappariit, tassani aappaasoq utoqqalinersiaqarpat, aappaasorlu siusinaartumik utoqqalinersiaqarpat, katillutik isertat 300.000 kr. Sinnersimappatigit.
3) Utoqqalinersiallit aappaarit, tassani tamarmik utoqqalinerisaqarlutik ukiumut isertitaasa katillutik 318.000 kr. Sinnersimappatigit.
4) Aappariit, tassani aappaasoq utoqqalinersiaqarpat aappaasorlu sumilluunniit utoqqalinersiaqanngippat, ukiumut isertitat katillugu 318.000 kr.-nik sinniisimappatigit.
Imm. 3. Pensionisialik nammineq inuttut isertitaqanngitsoq, pensionisiallip kisermaap pissartagaasa 50 %-iinik pisinnaatitaavoq, tamatumani aappaasup, nalunaarsukkamik aappaasup imaluunniit katissimanagu aapparisap ukiumut isertitaasa akileraarutaasussat amerlassusaat apeqqutaatinnagit.
Imm. 4. Utoqqalinersiat akinut tulluarsarlugit iluarsiisarneq pillugu malittarisassanik Naalakkersuisut aalajangersaasussaapput.

 

Kapitali 4
Utoqqalinermi pensionisiaqalersitsinermi naatsorsueriaase, ukiumoortumik iluarsiissuteqartarneq il.il

Pisartagaqartitsilernermi naatsorsueriaaseq

§ 9. Utoqqalinermi pensionisiassanik pisartagaqalernissamut ikaarsaariarnerup kingornatigut akileraarutaasussat ukiumut isertikkumaagassatut naatsorsuutigineqartut tunngavigalugit, utoqqalinermi pensionisiassatut pisartagassat annertussusissaat naatsorsorneqartassapput.
Imm. 2. Piffissami utoqqalernermi pensionisianik pisarsisinneqarnerup siulliup kingorna ukiullu tulliuttup naanerata tungaanut, isertitassat akileraarutaasussat naatsorsuutigineqartut tunngavigalugit, utoqqalinermi pensionisiat annertussusissaat ukiumut ataatsimut isertitassatut naatsorsorneqartassapput.

Ukiumoortumik nalimmassaaneq

§ 10. Utoqqalernermi pensionisiat ukiut tamaasa 1. januarimi, ukioq kingulleq isertitarisimasat ilisimaneqartut tunngavigalugit akinut nalimmassarneqartassapput.
Imm. 2. Utoqqalinermi pensionisiat tunniunneqartartut ukiup ingerlanerani, utoqqalinermi pensionisiallip inuttut imaluunnit aningaasaqarnikkut pissutsit atugarisaasa pingaarutilimmik ataavartumillu allannguuteqarsimaneri naapertorlugit nalimmassarneqartassapput. Nalimmassaatit, allannguinermiit qaammatip tulliuttup ullua siulleq aallarnerfigalugu atuutilertassapput.

Ulloq unnuarlu paaqqinniffiusunut nuunneq

 

§ 11. Utoqqalinermi pensionisianik pisartagalik isumaginninnermi ulloq unnuarlu angerlarsimaffimmut nuuppat, tassanilu najugaqarneq pisortanit akilersorneqarpat, utoqqalinermi pensionisiat qaammammi nuuffiusumi qaammatillu tulliani allannguuteqaratik tunniunneqassapput. Tamatuma kingorna utoqqalinermi pensionisiallip kisermaap, tak. § 7, imm. 1, nr. 1 naapertorlugu, utoqqalinermi pensionisiat 20 % pisartagarilissavai, matumani utoqqalinermi pensionisiallip pisartakkami saniatigut allanik isertitaqarnera apeqqutaatinnagu.
Imm. 2. Utoqqalinermi pensionisianik pisartagalik pisortanit pensionisiat saniatigut akileraarutaasussanik isertitaqarpat isumaginninnermi ulloq unnuarlu angerlarsimaffimmiinneq tamakkiisumik ilaannakortumilluunniit nammineq akilersortinneqassaaq. Akiuliutissap taassuma, akileraarutit peereerlugit katillugit isertitat 60 %-ii sinneqqusaanngilai.
Imm. 3. Pisortanit akiligaannik, ulloq unnuarlu angerlarsimaffimmi allaminnermut tunngatillugu, utoqqalinermi pensionisianut tunngasunik assigisaallu iluarsiissutissat pillugit malittarisassat Naalakkersuisut aalajangersagassaraat, tassunga ilaapput Kalaallit Nunaanni imaluunniit Danmarkimi sivisuumik napparsimavimmi uninnganermut tunngatillugu imaluunniit pineqaatissinneqarsimalluni isertitsivimmiinnermut tunngatillugu malittarisassasiat.

 

Kapitali 5
Tapit

Meeqqanut tapit

§ 12. Utoqqalinermi pensionisiallit meeqqanut 18-it inorlugit ukiulinnut pilersuisussaatitaasut meeqqat ataasiakkaarlugit tapisiaqaatigissavaat. Tapiutit tapiutigineqartassapput pilersuisussaatitaaneq toqqaannartumik pilersuinerunersoq imaluunniit meeqqanut akilersuutinik akiliisarnikkut eqquutsinneqarnersoq apeqqutaatinnagu.
Imm. 2. Pilersuisussaatitaaneq meeqqanut akilersuutinik akiliinikkut eqquutsinneqarpat, aningaasat akilersuutinik pisinnaatitaasumut toqqaannartumik tunniunneqassapput. Meeqqamut toqqaannartumik tunniussisoqarsinnaanngilaq.
Imm. 3. Meeqqanut tapit utoqqalinermi pensionisialinnut Kalaallit Nunaata avataanut nunassissimasunut tunniunneqartussaanngillat.

§ 13. Meeqqanut tapiutit tunniunneqartarunnaassapput kinguliini patsisissaatitaasut arlaat eqquutsinneqanngippat:
1) Meeqqanut inuusuttunullu ikiorsiisarneq pillugu inatsisartut peqqussutaat malillugu meeraq angerlarsimaffiup avataanut inissinneqarsimappat imaluunniit pisortanit tamakkiisumik pilersorneqarpat.
2) Meeraq ilinniagaqarnersiutinik pisarpat, matumani aamma sulilluni sungiusarnerup nalaani tamatumunnga malittarisassat malillugit pisartagaqarpat.
3) Meeraq meeqqanut tapiutit pingasoriaataannik amerlanerusunilluunniit sulinermigut isertitaqarpat.
4) Meeraq katissimalluni aapparminut meeqqamulluunniit nammineq pilersuisussaatitaalersimappat.
Imm. 2. Meeqqanut tapiutit pillugit maleruagassat Naalakkersuisut aalajangersassavaat.

Tapit aningaasanut atugassiissutinut tunngasut

§ 14. Utoqqalinermi pensionisiatut aningaasat atugassiissutit kommunemit aalajangersarneqarsimasut minnerpaaffii tunngavigalugit akiligassat aalajangersimasut akilerneqareeraangata kommunalbestyrelsip tapit aningaasanut atugassiissutinut tunngasut tunniussinnaavai.
Imm. 2. Tapit aningaasanut atugassiissutinut tunngasut utoqqalinermi pensionisialinnut Kalaallit Nunaata avataani aalajangersimasumik najugalinnut tunniunneqarsinnaanngillat.
Imm. 3. Tapit aningaasanut atugassiissutit pillugit malittarisassanik Naalakkersuisut aalajangersaasinnaapput, tassunga ilanngullugit aningaasanik atugassiissutit naatsorsorneqartarnerat.

Inummut tapit

§ 15. Utoqqalinermi pensionisialinnut aningaasaqarnermikkut immikkut ittumik ajornartooqqasunut imaluunniit utoqqalinermi pensionisialik aningaasaqarnermi tungaatigut ajornartorsiuteqalernissaa annertuumik ilimanaateqarpat inummut tapiutit tunniunneqarsinnaapput. Inummut tapiutit aningaasartuutinut assigiinngitsunut makkununnga tunngatillugit tunniunneqarsinnaapput:
1) Peqqinnissutsikkut pisariaqatitat malitsigisaanik annetuumik aningaasartuuteqarnermi.
2) Isarussanik allatullu ikiorsiissutinik pissarsiniarnermi.
3) Inuuneq annaanniarlugu ikiorsiinermi.
Imm. 2. Inummut tapiutit utertillugit akileqquneqarsinnaapput
1) illersorneqarsinnaanngitsumik aningaasanik aqutsinerlunneq pissutigalugu inummut tapiutit tunniunneqarpata, imaluunniit
2) Utoqqalinermi pensionisialik inummut tapiutinik pisartagaqartoq kingusinnerusukkut aningaasanik, piffissamut pineqartumut inummullu tapiutit assinganik siunertaqartumik pissarsisimappat.
Imm. 3. Utertillugit akileeqqusineq aatsaat piumasarineqarsinnaavoq, utoqqalinersialimmut tapinik tunniussinermut atatillugu utertitsisussaatitaaneranik ilisimatinneqarsimappat.
Imm. 4. Utoqqalinermi pensionisialinnut Kalaallit Nunaata avataani aalajangersimasumik najugalinnut inummut tapiutit tunniunneqarneq ajorput.
Imm. 5. Inummut tapiutit pillugit Naalakkersuisut malittarisassanik aalajangersaassapput.

 

Kapitali 6
Aqutsineq

§ 16. Inuit Kalaallit Nunaanni najugallit utoqqalinermi pensionisianut, meeqqanut tapinut, tapinut aningaasanut atugassiissutinut tunngasunut kiisalu inummut tapinut qinnuteqaatitik kommunemut najugaqarfigisaminnut nassiutissavaat. Inuit kommuneqarfiit killilersugaanerisa avataanni najugallit qinnuteqaatertik Naalakkersuisunut tunniuttassavaat.
Imm. 2. Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu utoqqalinermi pensionisiaqalernissamik qinnuteqaat Naalakkersuisunut tunniunneqassaaq.
Imm. 3. Inuup nammineerluni qinnuteqarsimanngitsup utoqqalinermi pensionisiaqalernissaa pillugu kommuni najugaq suliassamik aallartitsisinnaallunilu aalajangiisinnaavoq.

§ 17. Utoqqalinermi pensionisiaqartut kommunimut Naalakkersuisunulluunniit nalunaaruteqarnissamik pisussaatitaapput, utoqqalinermi pensionisiamik iluarsiivigineqarnissaannik unitsinneqarnissaannilluunniit kinguneqarsinnaasunik inuttut atugarisamigut aningaasaqarnermigullu allannguuteqartoqarpat.
Imm. 2. Inuttut atugarisanut aningaasaqarnermullu tunngasutigut eqqunngitsumik paasissutissiisimaneq tunngavigalugu pissusissamisuunngitsumik utoqqalinermi pensionisiaqartitsisoqarsimappat aningaasat pisassarinngisat utertillugit akilerneqarnissaat piumasaqaataasinnaavoq imaluunniit pensionisiassanit ilanngaatigalugit akilersorlugit unerartinneqarsinnaallutik.

 

Kapitali 7
Tunniussisarneq

§ 18. Utoqqalinermi pensionisiat tunniunneqartassapput qaammatikkaartumik siumoortumik.

§ 19. Utoqqalinermi pensionisiallip aningaasaqarnerminik aqutsisinnaannginnera kommunalbestyrelsimit missiliorneqarpat, utoqqalinermi pensionisianik tunniuttakkanik aqutsinissaq pillugu aalajangiisoqarsinnaavoq, tassunga ilanngullugit meeqqanut tapit, tapit aningaasanut atugassiissutinut tunngasut inummullu tapit.

§ 20. Utoqqalinermi pensionisiaqarnissamut piumasaqaataasut eqquutsinneqarunnaarpata pisartagaqartitsineq qaammatip tulliuttup naaneranit unitsinneqassaaq. Tunniunneqartartunilli unitsitsineq, nunanut avannarlernut imaluunniit nunanut allanut EØS-imik isumaqatigiissummut atasunut nuunnermi piumasaqaatinik suli eqquutsitsiffiusimappat, Kalaallit Nunaat qimallugu nuunnermi qaammatip nuuffiusup naanerani pisassaaq.
Imm. 2. Utoqqalinermi pensionisiallip maqaasineqarluni nalunaarutigineqarneraniit qaammatit pingasut qaangiunneranni uumaneralu uppernarsarneqarsinnaanngippat pisartagaqartitsineq qaammatip tulliup aallaqqaataanit unitsinneqassaaq. Utoqqalinermi pensionisiaqarneq atuukkunnaassaaq, utoqqalinermi pensionisiaqarnerup unitsinneqarneraniit ukiup ataatsip qaangiunnerani utoqqalinermi pensionisialik suli uumanersoq uppernarsarneqarsinnaanngippat.

 

Kapitali 8
Akiligassanngortitsisarneq

§ 21. Utoqqalinermi pensionisiat tapisiasinnaasulluunniit akiligassanut allatulluunniit inatsisitigut malersuinermut attuumassuserneqarsinnaanngillat. Piumasaqaateqaatit taamaattut pillugit isumaqatigiissusiornerit atuussinnaanngillat, taamaattorli § 15, imm.2, aamma § 17, imm. 2, takukkit.

 

Kapitali 9
Naammagittaalliuuteqarsinnaaneq

§ 22. Inunnik Isumaginninnerup aqunneqarnera aaqqissugaaneralu pillugit Inatsisartut peqqussutaanni malittarisassat atuuttut naapertorlugit, peqqussut manna malillugu aalajangiinerit aalajangersarneqarsimasut Isumaginninnermi Naammagittaalliuuteqartarfimmut naammagittaalliuutigineqarsinnaapput.

 

Kapitali 10
Aningaasalersuineq naatsorsuuserinerlu

§ 23. Utoqqalinermi pensionisianut aningaasartuutit 90%-ii Nunatta karsianit 10%-iilu kommunimit aningaasartuutigineqassapput. Utoqqalinermi pensionisialinnut kommunit aggornerisa avataanni aalajangersimasumik najugaqartunut aningaasartuutit tamakkerlutik Nunatta karsianit aningaasartuutigineqassapput. Pensionisialinnut Kalaallit Nunaata, Danmark-ip Savalimmiulluunniit avataanni aalajangersimasumik najugaqartunut, utoqqalinermi pensionisiaannut aningaasartuutit Nunatta karsianit aningaasartuutigineqassapput.
Imm. 2. Tapit aningaasanut atugassiissutinut tunngasut kiisalu inummut tapit kommunemit aningaasartuutigineqartassapput. Pensionisiallinnut kommunit agguarneqarsimanerisa avataani najugallinnut aningaasartuutit taaneqartut Nunap Karsianit akilerneqartassapput.
Imm. 3. Inatsisartut peqqussutaannik aqutsinermut aningaasartuutit oqartussaasumit akisussaasumit akilerneqartassapput.

§ 24. Kommunit naatsorsuutinik saqqummiussisarnissaat kukkunersiuisarnissaallu pillugit malittarisassat Naalakkersuisunit aalajangersarneqassapput.

§ 25. Qaammatit pingasut ukiullu ullorsiuteqarfiusup naanerata kingorna kingusinnerpaamik qaammatip ataatsip qanngiunnerani kommunimi utoqqalinermi pensionisianik pisartagaqartut pillugit kisitsisitigut paasissutissat kommunalbestyrelsip Naalakkersuisunut nalunaarutigissavai.
Imm. 2. Paasissutissat nalunaarutigineqartussat imarisassaat ilusilersorneqarnissaallu pillugit malittarisassat Naalakkersuisunit aalajangersarneqassapput.

§ 26. § 25 imaluunniit §-ini 24-imi 25-imilu malittarisassatut aalajangersakkat piumasaqaataasut kommunalbestyrelsimit eqquutsinneqarsimanngippata, § 23-mi aningaasartuutinut tamakkiisunut ilaannakuusunulluunniit landskarsip aningaasaatai aningaasaliissutaasut Naalakkersuisut unitsissinnaavaat.
Imm. 2. Peqqussut una malillugu unitsitsineq innuttaasup ikiorsiissutinik pissarsinissamut pisinnaatitaaneranut sunniuteqartussaanngilaq.

 

Kapitali 11
Atortussanngortitsineq ikaarsaariarnermilu aalajangersakkat

§ 27. Inatsisartut peqqussutaat una 1. juli 2007-imi atortuulerpoq.
Imm. 2. Peqatigisaanik pisortanit pensionisiat pillugit Inatsisartut peqqussutaat nr. 9, 15.april, 2003-meersoq atorunnaarsinneqarpoq.
Imm. 3. Ikaarsaariarnermi aalajangersakkat makku aalajangersarneqarput:
1) 31. december 2008 ilanngullugu inuit 63-inik ukioqalersimasut utoqqalinermi pensionisianik tunineqartassapput.
2) 1. januar 2009 aallarnerfigalugu kiisalu 31.december 2009 ilanngullugu inuit 64-inik ukioqalersimasut utoqqalinermi pensionisianik tunineqartalissapput.
3) 1. januar 2010 aallarnerfigalugu inuit 65-inik ukioqalersimasut utoqqalinermi pensionisianik tunineqartalissapput.
Imm. 4. Inuit utoqqalinermi pensionisianik pisinnaatitaalereersimasut, qanorluunniillu imm. 3. malillugu utoqqalinermi pensionisianik tunineqarnissamut ukiutigut piumasaqaataasoq naammasisimajunnaaraluarunikkuluunniit, tamatumunnga pisinnaatitaanertik annaassanngilaat.
Imm. 5. Ulloq unnuarlu paaqqinnittarfinni allani najugaqarallarnermi meeqqat tapii, isertitanik nalimmassaasarneq aamma utoqqalinersitsisarneq pillugit malittarisassat, pisortat inunnik ikiorsiisarnerat pillugu Inatsisartut peqqussutaanni nr. 9, 15. april 2003-meersukkut tunngavissinneqartumik aalajangersakkat, tamanna pillugu tunngavissiineq atorlugu maleruagassanik aalajangersaanikkut imaluunniit Inatsisartut peqqussutaasigut Inatsisartulluunniit inatsisaasigut taarserneqarnissamik atorunnaarsinneqarnissamilluunniit tungaannut atuutiinnarallassapput.

Namminersornerullutik Oqartussat, ulloq 7. maj 2007

Hans Enoksen

/

Aleqa Hammond