Kalaallit Nunaanni inissianik pilersuineq, inissialiortiternermut tapersiissuteqartarneq, inissianik attartortitsisarneq il.il. pillugit inatsimmi nr. 944-mi decembarip 23-anni 1986-imeersumi § 1 naapertorlugu aalajangersarneqarpoq:

§ 1. Peqqussut manna inissianut, immikkut pigineqartunut (inissiat nammineq pigisat) atuutsinneqarpoq.

§ 2. Inissiat nammineq pigisat taamaallaat illuni, ataatsimut isigalugu inissianut nammineq pigisanut agguarneqartuni pilersinneqarsinnaapput.
Imm. 2. Inissiat nammineq pigisat tamarmik immikkut illutut pigisatut immikkoortutut isigineqassapput.

§ 3. Inissiamik nammineq pigisamik piginnittoq inissianik piginnittut allat peqatigalugit agguaqatigiisitsineq brøkitut aalajangersarneqarsimasoq naapertorlugu pisattanut aammalu atortunut assigisaannullu ataatsimoorussanut piginnittuussaatitaapput. Agguaqatigiisitsinissamik aalajangersaasoqarsimanngippat inissiat naligiittut inissisimassapput.
Imm. 2. Inissiamut nammineq pigisamut piginnittup, piginnittunut tamarmiusunut ataatsimoorfiusumut (piginnittut peqatigiiffiannut) ilaasup pisinnaatitaaffiisa pisussaaffiisalu assingi atuutsinneqarput.
Imm. 3. Pisinnaatitaaffiit pisussaaffiillu imm. 1-imi aamma 2-mi taaneqartut inissiamik nammineq pigisamik piginnittuusinnaatitaanermit immikkoortinneqarsinnaanngillat.

§ 4. Ataatsimut aningaasartuutit, taakkununnga ilanngullugit sillimmasiinermut akiliutinut allaffissornermullu aammalu pisattanik ataatsimorussanik atortunillu aserfallatsaaliuinermut aningaasartuutit § 3, imm. 1-imi agguaqatigiisitsinissaq taaneqartoq malillugu piginnittut ataasiakkaat akilertassavaat.
Imm. 2. Piginnittup inissiami nammineq pigisamini iliuuserisai aningaasartuutit imm. 1-imi taaneqartut annertusinerinik kinguneqarpata, piginnittup aningaasartuutaanerusussat akilertussaavai.
Imm. 3. Imm. 1 aamma 2 naapertorlugit piginnittut peqatigiiffiata ilaasortanut ataasiakkaanut piumasaqaataanut qularnaveeqqutitut inissiani nammineq pigisani tamani tammarnaveeqqusiinermut uppernarsaammik piginnittut peqatigiiffiannut sanasoqassaaq, taannalu qularnaveeqqusiinermi pingaarnertut nalunaarsorneqassaaq. Tammarnaveeqqusiinermut uppernarsaatip oqaasertai peqatigiiffiup pisussaaffiinut naleqquttuussapput.

§ 5. Piginnittup piginnittut peqatigiiffiat taassumaluunniit sinniisua pisariaqartillugu inissiamut isersinnaatissavaa, tassunga ilanngullugit misissuinissaq iluarsaassinissarlu eqqarsaatigalugit.

§ 6. Piginnittut peqatigiiffiat malittarisassanik ilanngussaq 1-imut naapertuuttumik ilusilersorneqarsinnaasunik piginnittut peqatigiiffianni aqutsisut, naatsorsuutinik saqqummiussisarneq, kingumut misissuisarneq il. il. pillugit aalajangersaasinnaavoq. Piginnittut peqatigiiffiat malittarisassanik aalajangersaasimanngippat nalunaarsuisimanngippallu ilanngussaq 1-imi malittarisassanut tunngavissat atuutissapput.
Imm. 2. Piginnittut peqatigiiffiat illumi affarleriimmi inissianik marlunnik pigisaqartoq malittarisassanik ilanngussaq 2-mut naapertuuttumik ilusilersorneqarsinnaasunik piginnittut peqatigiiffianni aqutsisut, naatsorsuutinik saqqummiussisarneq, kingumut misissuisarneq il. il. pillugit aalajangersaasinnaavoq.

§ 7. Piginnittut peqatigiiffiat torersaarnissamut maleruagassanik sukumiisunik, ilanngussaq 3 naapertorlugu ilusilersorneqarsinnaasunik aalajangersaasinnaapput. Piginnittut peqatigiiffiat torersaarnissamut maleruagassanik aalajangersaasimanngippat ilanngussaq 3-mi torersaarnissamut maleruagassanut tunngavissat atuutissapput.

§ 8. Piginnittoq piginnittut peqatigiiffiannut tassaniluunniit ilaasortaasut tungaannut sakkortuumik imaluunniit akulikitsumik § 3, imm. 2 naapertorlugu pisussaaffimminik sumiginnaasarsimappat, tamatuma pinerata kingunitsianngua piginnittut peqatigiiffiata piginnittoq pissutsinik iluarseeqqullugu allakkatigut peqqussavaa. Piginnittup peqquneqarnini naalanngippagu, piginnittut peqatigiiffiata naleqquttumik siumut piffissaliilluni ilisimatitsinikkut piginnittoq inissiamit nammineq pigisaminit nooqqusinnaavaa. Taamatuttaaq attartortoq inissiamik nammineq pigisamik piginnittumiit attartorsimasoq pineqassaaq.
Imm. 2. Piginnittoq naleqquttumik siumut piffissaliilluni ilisimatinneqareerluni inissiamit nammineq pigisaminit aninngippat, piginnittoq pineqaatissiinikkut anisinneqarsinnaavoq. Taamatuttaaq attartortoq inissiamik nammineq pigisamik piginnittumiit attartorsimasoq pineqassaaq.

§ 9. Inissiamik nammineq pigisamik allamut tunniussinermi, isumaqatigiissutip atsiorneqannginnerani tunniussisup inissiamik pisisoq inissiami nammineq pigisami piginnittullu peqatigiiffianni aningaasalersuineq ingerlatsinermullu aningaasartuutit inissititernerat pillugit ilisimatissavaa, kiisalu inissianik nammineq pigisanik nutaanik tunniussinermi sananermi aningaasartuutaasut naatsorsornerinik saqqummiussivigissallugu.

§ 10. Inatsisartut peqqussutaat 1. juli 2007-imi atuutilerpoq.
Imm. 2. Piginnittut peqatigiiffiat inissiat marluk sinnerlugit pigisaqartoq, 1. juli 2007-imi atuutilereersimasoq piginnittut peqatigiiffianni malittarisassanik aalajangersaasimanngippat nalunaarsuisimanngippallu, imaluunniit illuummi torersaarnissamut malittarisassanik aalajangersaasimanngippat 1. juli 2008-p kingorna §§ 6 aamma 7 piginnittut peqatigiiffiinut taakkununnga atuutissaaq.
Imm. 3. Piginnittut peqatigiiffiat illumi affarleriimmi inissianik marlunnik pigisaqartoq, 1. juli 2007-imi atuutilereersimasoq illuummi torersaarnissamut malittarisassanik aalajangersaasimanngippat 1. juli 2008-p kingorna § 7 piginnittut peqatigiiffiinut taakkununnga atuutissaaq.

Namminersornerullutik Oqartussat, ulloq 7. maj 2007

Hans Enoksen

/

Kim Kielsen

Ilanngussaq 1

Ilanngussaq 2

Ilanngussaq 3