Pinngortitamik illersuineq pillugu Inatsisartut inatsisaanni nr. 29-imi, 18. december 2003-imeersumi § 16, imm. 1, § 39, imm. 5 aamma 6, § 46, § 60, imm. 2 aamma imm. 4 naapertorlugit aalajangersarneqarpoq:
 

Siunertaq

§ 1. Ilulissat Kangerluata, Kangiata, nunaminertallu avatangiisaasut Ilulissat Kommuniani inissisimasut nunatut eqqissisimatitassanngortinneqarput nunap kusanassusersuata, nunami pinngortitaassutsikkut oqaluttuarisaanermi, kulturikkut oqaluttuarisaanermi allallu pinngortitatut naleqassusiisa illersorneqarnissaat siunertaralugit. Eqqissisimatitsineq sumiiffiup pinngortitaassutsikkut nungullariartunnginnissaanut illersueqataassaaq.

Killiliineq

§ 2. Nuna eqqissisimatitaq nunap assingani ilanngunneqartumi 1-imi nalunaarneqarpoq. Nunap eqqissisimatitap ilaa immikkoortunut pingasunut agguataarneqarpoq.
Imm. 2. Nunap ilaa immikkoortoq A tassaavoq nuna Sermermiut eqqaanniittoq. Tamanna nunap assingani ilanngussami 2-mi nalunaarneqarpoq. Nunap ilaa immikkoortoq B tassaavoq Ilulissat Kangerluata, Kangiata qinnguata ilaa. Tamanna nunap assingani ilanngussami 3-mi nalunaarneqarpoq. Nunap ilaa immikkoortoq C tassaavoq Ilulissat Kangerluata, Kangiata paavata ilaa. Tamanna nunap assingani ilanngussami 3-mi nalunaarneqarpoq.

Tamanit tikinneqarsinnaanera atorneqarsinnaaneralu

§ 3. Kikkulluunniit nunamut eqqissisimatitamut appakaassinnaapput nalunaarutip matuma kingunerisaanik killilersuutaasut malillugit.

§ 4. Nunap eqqissisimatitap iluani tatsinik, kuunnik, kangerlunnik, sermip iigartartuinik nunamiluunniit eqqissisimatitami mingutsitsineq arlaatigulluunniit eqqagassanik, aalisarnermi atortukunik, nalunaarsuutinik ilisimatusarnikkulluunniit atortunik qimatsinissaq inerteqqutaavoq.
Imm. 2. Nunap naasoqassusianik akornusiinissaq nunalluunniit qaavanik allanngortitsinissat inerteqqutaapput. Nunap naasuinik tamanik naasulluunniit ilaannik katersinissaq inerteqqutaavoq, taamaattoq takuuk imm. 3.
Imm. 3. Naak imm. 2-mi inerteqquteqaraluartoq, aalisarnermut, aallaaniarnermut piniarnermullu atatillugu nerisassiornissami nunap naasuinik ikummatissanik katersinissaq ajornartitaanngilaq.

Tupertorneq aamma silami ikumatitsineq

§ 5. Nunap eqqissisimatitap iluani uninnganermi tupertorneq ikumatitsinissarlu taamaallaat ullup unnuallu ataatsip ingerlanerani uninngaffigisamilu ataatsimi pisinnaavoq. Aammattaaq tupertorneq aamma silami ikumatitsineq matuma kingorna taamaallaat pisinnaavoq siullermik uninngaffigisatut atorneqartumit minnerpaamik 100 meterinik ungasissulimmi, taamaattoq takuuk imm. 2.
Imm. 2. Avatangiisinut Pinngortitamullu Pisortaqarfiup tusarniaavigneqareernerata kingornatigut, tupertornissamut atatillugu nunaminertat aalajangersimasut Ilulissani kommunalbestyrelsimit toqqarneqarsinnaapput. Tupertorfiginiagaq erseqqissumik nalunaaqutserneqassaaq.

Illuliorneq, sanaartorneq angalanerlu

§ 6. Nunap eqqissisimatitap iluani illuliorneq imaluunniit aalaakkaasunik allanik sanaartorneq kiisalu aqquserniornerit aamma amitsunik aqquserniornerit inerteqqutaapput, taamaattoq takuuk imm. 2 aamma imm. 3.
Imm. 2. Ilulissat Kommuniani kommunalbestyrelsimik tusarniaareernermi kingornatigut, Avatangiisinut Pinngortitamullu Pisortaqarfik illuliornissamut allanillu aalaakkaasunik sananissamut akuersissuteqarsinnaavoq. Ilulissani kommunalbestyrelsimik tusarniaareernermi kingornatigut Avatangiisinut Pinngortitamullu Pisortaqarfik, sananeqartussap annertussusaanik, suuneranik, sumiiffissaanik aammalu qanoq iluseqarnissaanik piumasaqaatinik akuersissutinut taamaattunut atorneqartussamik aalajangersaasinnaavoq.
Imm. 3. Ilulissat Kommuniani kommunalbestyrelsimik tusarniaareernermi kingornatigut, aqquserniornissamut aamma amitsunik aqquserniornissamut Avatangiisinut Pinngortitamullu Pisortaqarfik akuersissuteqarsinnaavoq. Ilulissat Kommuniani kommunalbestyrelsimik tusarniaareernermi kingornatigut Avatangiisinut Pinngortitamullu Pisortaqarfik akuersissutinut taamaattunut piumasaqaatinik aalajangersaasinnaavoq.
Imm. 4. Nunap eqqissisimatitap iluani qamutinik motorilinnik angalaneq, matumani qamuteralinnik (snescooter), qamutinik illiniliuutinik aamma qamutinik qiterutaasalinnik angalaneq inerteqqutaapput.
Imm. 5. Imm. 4-mi inerteqquteqarnermi pineqanngillat angallavigineqarsinnaatitaasut pillugit, Ilulissat Kommuniani assartuutit motorinik ingerlatillit atorneqarneri pillugit immikkut ittumik nalunaarummi aalajangersakkat.
Imm. 6. Nunap eqqissisimatitap iluani sikkilerluni angalaneq inerteqqutaavoq.
Imm. 7. Aqquserngit amitsut ujaraaqqanik, qisunnik atortunilluunniit allanik naleqquttunik qallerneqarsinnaapput.
Imm. 8. Nunap ilaani immikkoortumi A-mi, takuuk ilanngussaq 2, taamaallaat piffissami 1. aprilimiit 31. oktoberimut pisummik aqqusinertigut amitsutigut ilisarnarsaasikkatigut angalaneq ajornartitaanngilaq.

Timmisartumik angalanerit

§ 7. Nunap eqqissisimatitap iluani sumiiffimmi pineqartumi uumasoqassuseq eqqarsaatigalugu 1000 meterinik appasinnerusumik timmisartornissat inerteqqutaapput.
Imm. 2. Imm. 1-imi inerteqquteqarnermit pineqanngillat akuersissuteqarluni aalajangersimasunik timmisartuussisarnerit, annaassiniartarnerit ujaasisarnerillu kiisalu imm. 4-mi taanneqartunut mittarfinnut mikkiartortarnerit.
Imm. 3. Nunap eqqissisimatitap iluani nunamut mittarnerit inerteqqutaapput, taamaattorli takuuk imm. 4.
Imm. 4. Ilulissat Kommuniani kommunalbestyrelsip tusarniareernerata kingornatigut Avatangiisinut Pinngortitamullu Pisortaqarfik summiiffinni erseqqinnersumik taaneqartuni marlunni ukiumut ukiunulluunniit arlaqartunut mittarnissamut akuersissutinik tunniussisinnaavoq.
Imm. 5. Ilulissat Kommuniani kommunalbestyrelsip tusarniareernerata kingornatigut Avatangiisinut Pinngortitamullu Pisortaqarfik imm. 4-mi akuersissutinut piumasaqaatinik aalajangersaasinnaavoq.

Imaatigut angalaneq, kisarsimaneq, uninngatitsineq aamma nunamut ikaassinerit

§ 8. Eqqissisimatitap ilaani immikkoortumi B-mi imaatigut angalaneq inerteqqutaavoq.
Imm. 2. Imm. 1-imi inerteqquteqarnermit ilaatinneqanngillat, inuussutissarsiutigalugu aalisarnermut, aallaaniarnermut piniarnermullu kiisalu annaassiniarnermut aamma ujaasinernut atatillugu imaatigut angalanerit.
Imm. 3. Eqqissisimatitap ilaani immikkoortumi C-mi angallatinik usitussutsikkut 1.000 Gross Registered Tonnes-inik anginerusunik imaatigut angalaneq tamarmi inerteqqutaavoq.
Imm. 4. Eqqissisimatitap iluani takornarianik imaatigut angallassineq aatsaat pisinnaavoq, Kalaallit Nunaanni pinngortitamik ilisimannittunik aamma pinngortitamik illersuineq pillugu inatsisinik ilisimasaqartunik ilisimasortanik atuinikkut.

§ 9. Eqqissisimatitap iluani kisarsimanissaq aamma angallatinik uninngatitsinissaq inerteqqqutaapput, taamaattoq takuuk imm. 2.
Imm. 2. Imm. 1-imi inerteqquteqarnermit ilaatinneqanngillat aalisarnermut, aallaaniarnermut piniarnermullu atatillugu kisarsimanerit.

§ 10. Nunap eqqissisimatitap iluani nunamut ikaassineq inerteqqutaavoq.
Imm. 2. Imm. 1-imi inerteqquteqarnermit ilaatinneqanngillat, inuussutissarsiutigalugu aalisarnermut, aallaaniarnermut piniarnermullu atatillugu nunamut ikaassinerit. Inerteqquteqarnerli eqqissisimatitap ilaani immikkoortumi A-mi nunamut ikaassinermi atuutinngilaq.

Aqutsineq, nakkutilliineq aamma immikkut akuersissuteqartarneq 

§ 11. Ilulissat Kommuniani kommunalbestyrelsimik tusarniaareernermi kingornatigut Avatangiisinut Pinngortitamullu Pisortaqarfik nunamik eqqissisimatitamik aqutsineq pillugu pilersaarusiamik suliaqassaaq.

§ 12. Ilulissat Kommuniani kommunalbestyrelsip nalunaarutip matuma eqqortinneqarnissaa nakkutigissavaa.

§ 13. Ilulissat Kommuniani kommunalbestyrelsimik tusarniaareernerup kingornatigut, Avatangiisinut Pinngortitamullu Pisortaqarfiup nalunaarummi matumani § 5, imm. 1, § 7, imm. 1 kiisalu § 8, imm. 4-mi aalajangersakkanit immikkut akuersissuteqarneq nalunaarutigissavaa, tamanna eqqissisimatitsinermi siunertamut akerliunngippat.

§ 14. § 4, imm. 1-imi aamma imm. 2-mi, § 5, imm. 1-imi, § 6, imm. 1-imi, imm. 4-mi, imm. 6-imi, kiisalu imm. 8-mi, § 7, imm. 1-imi aamma imm. 3-mi, § 8, imm. 1-imi kiisalu imm. 3-4-mi, § 9, imm. 1-imi kiisalu § 10, imm. 1-imi, unioqqutitsinerit akiliisitsinermik pineqaatissiissutaasinnaapput.
Imm. 2. § 6, imm. 2-3-mi, kiisalu § 7, imm. 5-imi piumasaqaatinik aalajangersarneqartunik unioqqutitsinerit akiliisitsinermik pineqaatissiissutaasinnaapput.
Imm. 3. Unioqqutitsineq suliffeqarfimmit tamakkiisumik ilaannakuusumilluunnit naalagaaffimmit pigineqartumit, Namminersornerullutik Oqartussanit, kommunimit imaluunniit kommunit ataatsimoorfiannit, kommunalbestyrelsit aamma nunaqarfinni aqutsisut il.il. pillugit Inatsisartut inatsisaanni ilaasunit, aktiaateqarluni piginneqatigiiffimmit, piginneqatigiiffimmit, piginneqatigiinnikkut ingerlatseqatigiiffimmit imaluunniit tamatumunnga assingusoq unioqqutitsisuuppat, suliffeqarfik il.il. pineqartoq akisussaasunngortinneqarsinnaavoq, pinerluttulerineq pillugu inatsimmi akisussaasutut. Tamannattaaq atuuppoq Namminersornerullutik Oqartussat, kommuni imaluunniit kommunit ataatsimoorfiat, kommunalbestyrelsit aamma nunaqarfinni aqutsisut il.il. pillugit inatsisartut inatsisaanni pineqartumi unioqqutitsisuuppata.

§ 15. Nalunaarut 1. juuli 2007 atuutilerpoq.
Imm. 2. Peqatigitillugu Ilulissat Kangerluata, Kangiata, eqqissisimatitassanngortinnera pillugu Namminersornerullutik Oqartussat nalunaarutaat nr. 7, 25. marts 2003-imeersoq atorunnaarsinneqarpoq.



Namminersornerullutik Oqartussat, ulloq 15. juuni 2007



Arkalo Abelsen

/

Alfred E.R. Jakobsen