Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi § 66, imm. 3, § 75, imm. 2 aamma 4, § 76, imm. 1 aamma 5, § 78, imm. 1, § 81, § 82, imm. 1, § 100, § 101, imm. 8, § 109, imm. 1, § 112, § 114, imm. 2, Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi § 34, aamma Sulisoqarnermut akitsuut pillugu Inatsisartut inatsisaanni nr. 10, 2. november 2006-imeersumi § 9, naapertorlugit aalajangerneqarput:

 

Kapitali 1
Akiliisitsiniartarnermi oqartussaasut

§ 1. Aningaasarsianit akileraarutit pillugit inatsit naapertorlugu akileraarutit akileraaruseriffimmut, akiliisitsiniarnermik, akileraarutit naatsorsornerannik akileraarutinillu utertitassaqartillugu utertitsisernik, suliaqartumut akilerneqassapput.
Imm. 2. Inuit akileraarutaat, selskabit akileraarutaat aammalu sulisoqarnermut akitsuut, piffissaagallartillugu akilerneqanngitsut, tapiutinik, ernianik akiliutinillu ilallugit akileraaruseriffiup suliniuteqarneratigut Kalaallit Nunaanni eqqartuussisarneq pillugu inatsimmi aammalu pisortanut akiitsut akilersinniarneqartarnerat pinaveersaartinniarnissaallu pillugit Inatsisartut inatsisaanni malittarisassat malillugit akilersinneqassapput.
Imm. 3. Aningaasarsianit akileraarutit pillugit Inatsisartut inatsisaanni § 76 naapertorlugu akileraarutinit A-nit unerartitat, § 86 naapertorlugu iluanaarutinit akileraarutit unerartitat, § 91 naapertorlugu atuisinnaanermut akileraarutinit akiliutit aammalu § 101 naapertorlugu akissarsianit il.il. unerartitat, piffissaagallartillugu akilerneqanngitsut, tapiutinik, ernianik akiliutinillu ilallugit akileraaruseriffiup suliniuteqarneratigut Kalaallit Nunaanni eqqartuussisarneq pillugu inatsimmi aammalu pisortanut akiitsut akilersinniarneqartarnerat pinaveersaartinniarnissaallu pillugit Inatsisartut inatsisaanni malittarisassat malillugit akilersinneqassapput.

 

Kapitali 2
Unerartitsisussaatitaasut nalunaarsugaanerat

§ 2. Kinaluunniitunerartitsisussaatitaasoq, aningaasarsianit akileraarutit pillugit Inatsisartut inatsisaanni § 76 malillugu akileraaruseriffimmi Sulisitsisut allattorsimaffianut nalunaarsortissaaq.
Imm. 2. Nalunaarsortinnermi unerartitsisussaatitaasut immersugassani akileraaruseriffiup sanaavini suliffeqarfik il.il. pillugit paasissutissiissaaq immersugassami inissarisaannut inissillugit immersugassat malillugit.
Imm. 3. Akileraaruseriffimmi Sulisitsisut allattorsimaffianut nalunaarsortinneq unerartitsisussaatitaalernermiit ullut qulit qaangiutsinnagit pissaaq. Allannguutit tamatumani aamma unerartitsisussaanerup atorunnaarnerani, allannguuteqarnermiit ullut qulit qaangiutsinnagit nalunaarutigineqassapput.

§ 3. Sulisitsisut allattorsimaffianut nalunaarsortereernermi INN-normumik tunineqassaaq. Nalunaarsortereernermi unerartitsisussaatitaasoq nalunaarsortinnermut uppernarsaammik paasissutissanik nalunaarutigineqartunik normumillu tunniunneqartumik imaqartumik nassinneqassaaq.
Imm. 2. Unerartitsisussaatitaasut nalunaarsortissimasut namminersortut arlaqartut akornanni piginnittuunermut tunngatillugu aningaasaqarnikkut peqatigiippata, akileraarutinik A-nik unerartitanik akiliisarnerup nalunaarutinillu tunniussinerup ataatsikkoortinnissaannut akuersissummik nalunaaruteqartoqarsinnaavoq.

 

Kapitali 3
Inuit amerlassusaasa siumoortumik nalunaarsorneqarnerat

§ 4. Ukiumut tulliuttumut siumoortumiknalunaarsuinermut tunngavissatut Inunnik nalunaarsuivik eqiteriffiusumi nalunaarsukkat tunngavigalugit, inuit kommunini imaluunniit kommunit aggornerisa avataaniittutut nalunaarsimasut aqqinik amerlassusiinillu tamakkiisumik septemberip aallaqqaataani allagannguineqassaaq. Meeqqat ukiumi aningaasarsiorfiusumi januaarip aallaqqaataani 15-ileereersimasussat kisimik ilanngunneqassapput.
Imm. 2. Akileraaruseriffiup aalajangersinnaavaa inuit akileraartussatitaasut, Inunnik nalunaarsuivik eqiteruffiusumi nalunaarsorsimanngitsut, inuit aqqinik amerlassusiinillu allattuiffimmut ilanngunneqarsinnaasut.
Imm.3. Inuit aqqinik amerlassusiinillu allattukkat imm. 1 naapertorlugu naqinneqarnerani akileraartussaatitaasut inuttut normuisa tulleriinneri malillugit allattugaassapput. Inunni ataatsimut akileraarusigaasussani, aapparisap inuttut normua aamma innersuussutitut allanneqassaaq.
Imm. 4. Akileraaruseriffiup inuit aqqinik amerlassusiinillu allattukkat suliarineqarnissaat malinnaatinnissaallu isumagissavaa.

 

Inaarutaasumik inuit amerlassusaasa nalunaarsorneqarnerat

§ 5. Ukiumoortumikaningaasarsianik angissusiliinissaq sioqqullugu § 4-mi oqaatigineqartutut Inunnik nalunaarsuiffik eqiteriffiusumi allassimasut naapertorlugit kommunimut pineqartumut, Akileraartarnermut Pisortaqarfimmullu kommunitut akileraarfeqartartut aqqinik amerlassusiinillu allattukkanik allagannguineqassaaq.
Imm. 2. Akileraaruseriffiup aalajangersinnaavaa inuit akileraartussatitaasut, Inunnik nalunaarsuivik eqiteriffiusumi nalunaarsorsimanngitsut inuit aqqinik amerlassusiinillu allattuiffimmut ilanngunneqarsinnaasut.

 

Selskabit, peqatigiiffiit il.il. amerlassusaasa nalunaarsorneqarnerat

§ 6. Akileraaruseriffiup ukiup aningaasarsiorfiusupkingornatigut ukiumi januaarip qaammataani selskabit, peqatigiiffiit il.il., kommunimut pineqartumut, Akileraartarnermullu Pisortaqarfimmut kommunitut akileraarfeqartut, ukiumi aningasarsiorfiusumi nalunaarsorneqarnerannik akileraaruseriffik sanassaaq.
Imm. 2. Akileraaruseriffiup selskabit, peqatigiiffiit il.il. nalunaarsorneqarnerannik suliaqarnissaq malinnaatitsinissarlu isumagissavaa.

 

Kapitali 4
Aningaasarsiat A-t

§ 7. Aningaasarsianit akileraarutit pillugit inatsimmi § 75, imm. 1-imi taaneqartunik isertitat saniatigut, aningaasarsianut A-nut ilaatinneqarput:
1) Aningaasat, pisortanit annertussusileriikkanik ikiorsiissutit pillugit Inatsisartut peqqussutaat naapertorlugu annertussusileriikkanik ikiorsiissutitut tunniunneqartut.
2) Aningaasat, pisortanit ikiorsiissutit pillugit Inatsisartut peqqussutaanni kapitali 5 naapertorlugu, pisariaqavissuinnarnut ikiorsiissutitut tunniunneqartut.
3) Soraarnerussutisiat, utaqqiisitut aningaasarsiarititat aammalu assingusunik akileraaruteqaataasussanik aningaasarsiat, siusinnerusukkut sulinikkut atorfeqarsimanermut atatillugu tunniussaappata.
4) Pisortanit pensionisiat pillugit Inatsisartut peqqussutaat naapertorlugu soraarnerussutisianut aningaasat tunngaviusut.
5) Akileraaruteqaataasussanik soraarnerussutisianik tunniunneqartut aningaasarsianit akileraarutit pillugit inatsimmi § 39 aamma § 40-mi oqaatigineqartut.
6) Ullormusiat, naartunermi, erninermi meeravissiartaarnermilu sulinngiffeqartarneq il. il. ullormusiaqartarnerlu pillugit Inatsisartut peqqussutaat naapertorlugu tunniunneqartut.
7) Aningaasarsianik sulisinnaanermulluunniit periarfissamik annaasaqarnermut taartisiat,
8) Namminersuutigalugu kisimiillutik tusarnaartitsisartutut, isiginnaartitsisartutut, nipilersortartutut, atuakkiortutut, allatullu eqqumiitsuliortutut, timersortartutut, allaaserinnittartutut, eqqartuussisutut, eqqartuusseqataasartutut, illersuisutut namminersortutullu nutserisutut ingerlatsinermi akissarsiat.
9) Sulisilluni ajoqusernerit kingunerisinnaasaannut isumannaarineq pillugu inatsisip Kalaallit Nunaanni atuutilersinneqarneranik peqqussut naapertorlugu Kalaallit Nunaanni sulisilluni ajoqusersinnaanermut sillimmasiisarneq pillugu peqqussut malillugu akiliutit:
a) ullormusiat, inatsisikkut peqqussutaasumik sulisilluni ajoqusersinnaanermut sillimmasiinerup nassatarisaanik akilerneqartut,
b) sulisinnaassuseqarnermik annaasaqarnermut aamma ataavartumik ajoqusernermut taartisiat aamma qimagaasunut taartisiarititat, taartisiat ukiumoortumik annertussusilikkatut tunniunneqartarpata.
10) Aalisarnermit, piniarnermit, aallaaniarnermit, savaateqarnermit tuttuuteqarnermillu tunisassianik Kalaallit Nunaanni tunisassiorfinnut tunisanit aningaasarsiat, tunisat selskabinit, peqatigiiffinnit assigisaannilluunniit tunisaanngippata.

 

Aningaasarsiatut A-tut taaneqanngitsut

§ 8. Aningaasarsiat A-nik isertitatut makkua isigineqanngillat.
1) Drikkepengisiat (kujumissaatit) aamma
2) illumi ikiortimut allatigullu inuinnaat angerlarsimaffiini ikiortinut akissarsiarititat, sulisitsisoq taassumaluunniit aapparisaa akileraaruteqaataasussanik isertitanik naatsorsuinermi pineqartumut akissarsiarititanik akilerneqartut ilaanik ilanngaateqarsinnaanngippat.

 

Sulinngiffeqarnersiutit (feriepenge) nalliuttunilu sulinermut akissarsiat

§ 9. Sulinngiffeqarnersiutinit nalliuttunilu sulinermut akissarsianit akileraarutinik A-nik unerartitsinerup qaqugukkut pinissaanut tamakkuninngalu akiliutinik akileraarusiinermut tunngatillugu makkua atuupput:
1) Akissarsiaqartup sulinngiffeqarnerata nalaani sulisitsisoq akissarsiaqartitsippat, akissarsianit taakkunannga unerartitsineqassaaq immikkullu sulinngiffeqarnermut tapinit aningaasarsianut allanut malittarisassat malillugit, akileraartarnermut inatsimmi § 76, imm. 1, oqaaseqatigiit siulliit naapertorlugit. Sulinngiffeqarnermut taartisianit suliunnaarnermi akissarsiaqartup, atorfeqarnermini sulinngiffeqarnerup nalaani akissarsiaqartussaasup, pisassarisaanit matuma ataani nr. 2-mi, oqaaseqatigiit siullerni malittarisassat naapertorlugit unerartitsineqassaaq.
2) Sulisitsisup sulisoq sulinngiffeqarnerani akissarsiaqartinngippagu sulinngiffeqarnermulli ajunngitsorsiaqartillugu, ukiup aningaasarsiorfiusup tulliani ukiumi sulinngiffeqarfiusumi akiligassatut illuartitanit, unerartitsineq sulinngiffeqarnermi ajunngitsorsiassat feriekortip il.il. allanneratigut akissarsiaqartumut pisassanngortinneranni suliarineqassaaq. Unerartitsinerli kingusinnerpaamik ukiumi aningaasarsiorfiusumi 31. december suliarineqassaaq. Tamanna aamma atuuppoq nalliuttuni sulinermut akissarsiassanik pisassaritinneqartunut, ukiup aningaasarsiorfiusup ingerlanerani tunniunneqanngitsunut.
3) Sulinngiffeqarnermi ajunngitsorsiassat nalliuttunilu sulinermut akissarsiat qaammatisiutit malillugit ukiumi, matuma siuliini 1-imi aamma nr. 2-mi malittarisassat naapertorlugit, unerartitsiviusussami akileraaruserneqassapput. Akileraaruserinermik ingerlatsineq pillugu inatsimmi § 30, imm. 1 naapertorlugu aningaasarsianik angissusiliinermi akileraarutillu naatsorsorneqarnerannut atugassanik ukiumut aningaasarsiorfiusumut aamma tassunga pineqartumut paasissutissat tunniunneqassapput.

§ 10. Akissarsiaqartuusup akileraartussaatitaanera taamaatippat, § 9-mi taaneqartunik aningaasarsianik A-nik, tamatumani aamma sulinngiffeqarnermi akissarsiat akileraartussaanerup taamaatinnginnerani akissarsiassarilikkat, tassaapput akileraartussaanerup taamaatinnerani akileraarutaasussanik kingullerpaamik isertitat. Akileraarutinik A-nik unerartitsineq kingusinnerpaamik piffissami tamatumani suliarineqassaaq.

§ 11. Pisortanit pensionisiat pillugit Inatsisartut peqqussutaat naapertorlugu soraarnerussutisianik pisartagaqartunut nunami allami najugaqartunut, taakkunannga isertitat akileraartussaatitaasut akileraartarnermut inatsimmi § 66, imm. 1-imi pineqartunut naatsorsuinertut naatsorsorneqassapput (Inummut ilanngaaserlugit).

 

Kapitali 5
Akileraarutit A-t akilerneri. Naatsorsuusiortussaatitaaneq paasissutissiisussaatitaanerlu

§ 12. Unerartitsisussaatitaasut piffissap nalunaaruteqaatigineqartup nalaani aningaasarsianik A-nik akilikkat akileraarutinillu A-nik unerartitat pillugit akileraaruseriffimmut nalunaaruteqassapput.
Imm. 2. Nassuiaat sukumiisoq akileraaruseriffiup sukumiisumik nassuiaateqarnermi atugassatut immersugassiaa, isertitanik tigusaqartunut ataasiakkaanut immikkoortitikkanik tamanna pillugu akileraaruseriffiup ilitsersuutaa naapertorlugu paasissutissanik immersugassaq atorlugu, tunniunneqassaaq. Nassuiaat sukumiisoq aamma elektronikki atorlugu atuarneqarsinnaasumik, akileraaruseriffimmit akuerisaasumik, tunniunneqarsinnaavoq. Naatsorsuutinut atukkat sukumiisumik nassuiaammut tunngaviusut, unerartitsisussaatitaasumit, qaammatisiutit malillugit ukiup nassuiaammut sukumiisumut attuumassuteqartup naaneraniit sivikinnerpaamik ukiuni tallimani toqqortarineqassapput.
Imm.3. Nassuiaanermi sukumiisumik immersugassat akileraaruseriffimmut nassiunneqassapput.
Imm.4. Qaammammi unerartitat pillugit nassuiaat sukumiisoq akileraaruseriffimmut tunniunneqareersimassaaq qaammammi tulliuttumi ulluinnaat kingullersaanni.

§ 13. Unerartitsisussaatitaasup akileraarutinik A-nik naatsorsuinerani aningaasat akileraarutit naatsorsornerannut tunngaviusut, koruunimut ilivitsumut qaninnerpaamut apparlugit akunnaallineqarsinnaapput.
Imm. 2. Appaaneq imm. 1 malillugu suliarineqarpat, akileraarutissat koruunimut ilivitsumut qaninnerpaamut qummut akunnaallineqassapput. Imm. 1 malillugu akunnaalliliilluni appaaneqanngippat, aningaasat akileraarutissatut naatsorsukkat koruunimut ilivitsumut ammut qaninnerpaamut akunnaallineqassapput.

§ 14. Akileraarutit A-t, unerartitsisussaatitaasup qaammatip ingerlanerani unerartissimasai, qaammatip tulliuttup ulluani siullermi akilerneqartussanngussapput, qaammammi tassani ulluinnaat kingullersaat piffissaagallartillugu akiliiffissarititaalluni.
Imm. 2. Akiliuteqarneq akileraaruseriffimmut pissaaq.

§ 15. Unerartitsisussaatitaasoq suliffeqarfimmik ingerlatsiunnaarpat taannalu aningaasarsianik A-nik akiliisussaanermik nassataqarpat, piffissamut nassuaammik tunniussinermit kingulermiit akileraarutinik A-nik akiliineq aningaasarsianillu A-nik akileraarutillu A-t pillugit nassuiaammik tunniussineq kingusinnerpaamik ingerlatsiunnaarnermiit ullut qulit qaangiutsinnagit naammassineqareersimassaaq. Piffissaliunneqartoq taaneqartoq nalliuttuni, arfininngornermi sapaammiluunniit naappaat, piffissaliussaaq ulluinnarmut tulliuttumut qaninnerpaamut sivitsorneqassaaq.
Imm. 2. Unerartitsisussaatitaasoq unerartitsinermi imaluunniit nassuiaammik tunniussinermi peqqissaannginnermik sumiginnaanermilluunniit takutitsisimatillugu, unerartitsisussaaneq atorunnaarpat, akileraaruseriffik nassuiaammik sukumiisumik tunniussinnissamut akiliinissamullu § 14, imm. 1-imi taaneqartumik piffissaliinermit sivikinnerusumik aalajangiisinnaavoq.
Imm.3. Unerartitsisussaasoq qaammammi pineqartumi aningaasarsianik A-nik tunniussaqarsimanngikkaluarpalluunniit § 12, imm. 4 naapertorlugu nassuiaammik tunniussineqassaaq.

 

Skattekorti

§ 16. Unerartitsisussaatitaasup akissarsiaqartup skattekortia pingaarneq frikortialuunniit tigummissavaa toqqortaralugulu. Utertillugu tunniussineq pisassaaq akissarsiaqartuusup tamanna piumasarippagu, imaluunniit aningaasarsiarititanik A-nik tunniussisarunnaarnermi, kingusinnerpaamilli qaammatisiutit malillugit ukiup naanerani. Akissarsiaqartuusup qaammatisiutit malillugit ukiup naanerani skattekortini pingaarneq frikortiniluunniit tigujumassanngippagu, unerartitsisussaatitaasup taanna isumannaatsumik piujunnaartissavaa.
Imm. 2. Unerartitsisussaatitaasup aningaasarsianik A-nik tunniussanik frikortimut allattuissaaq. Allattukkat allanneqassapput kingusinnerpaamik frikortip akissarsiaqartuusumut tunniunneqarnerani.

§ 17. Unerartitsisussaatitaasup nassuaammik sukumiisumik tunniussinermi atugassanik paasissutissat aammalu aningaasarsianik A-nik aammalu akileraarutit A-t pillugit paasissutissat matuma kingornani allassimasunik malittarisassat malillugit qulakkiissavai akileraaruserinermik ingerlatsineq pillugu Inatsisartut inatsisaanni § 30, imm. 1 naapertorlugu.
Imm. 2. Unerartitsisussaatitaasup skattekorti pingaarneq frikortiluunniit tigusimasaq bikortiluunniit takutinneqarsimasoq tunngavigalugu akissarsiaqartuusup inuttut normua, aqqa, kommuni akileraarfigisaa, aningaasarsiallu A-nit isertitanit ilanngaataasimasinnaasussaq allassavai, unerartitassat naatsorsorneqannginneranni, aammalu procenti (akileraarutinik ilanngaanermi procenti) naatsorsuinermi atugassat naapertorlugit. Frikorti unerartitsisussaatitaasumit akileraaruteqaataanngitsunik akissarsiassat qaffasinnerpaaffissaannik taasinertaqartumik tigusaqarpat, isertitassat taaneqartut aamma allanneqassapput.
Imm.3. Taamatuttaaq imm. 2-mi oqaatigineqartutut allanneqassapput, akileraaruseriffiup unerartitsisussaatitaasoq paasissutissanik skattekortimi, bikortimi frikortimiluunniit allassimasunik nalunaarfigippagu.
Imm. 4. Unerartitsisussaatitaasup skattekortimik pingaarnermik frikortimilluunniit tunniussineqanngippat bikortimillu takutitsineqarani, akissarsiaqartup kinaaneranut uppernarsaatitaqartunik paasissutissat pinissaat qulakkiissavaa pineqartullu aqqa, maannakkut najugaqarfia, inuttullu normuata, taamaattumillu pissarsiassaqanngippat, ulloq inuuia, qaammataa ukiualu allanneqassapput. Akissarsiaqartuusorlu sulinerup ingerlanneqarfiani najugaqarallartuuppat, unerartitsisussaatitaasup aamma pineqartup aalajangersimasumik sumi najugaqartuunera allassavaa.
Imm. 5. Unerartitsisussaatitaasup skattekortimik pingaarnermik imaluunniit frikortimik tunniussineqaraluarpalluunniit, bikortimik allamilluunniit kinaassutsimut uppernarsaammik takutitsineqarluni, pisussaavoq paasissutissat saqqummiunneqartut akissarsiaqartullu kinaasinnaaneranut naapertuunnersut misissussallugit.
Imm. 6. Paasissutissat imm. 2-miit 4-mut oqaatigineqartut naatsorsuutinut immikkut allattaavinnut imaluunniit unerartitsisussaatitaasup akissarsiaqartunut ataasiakkaanut immikkut ingerlatassaani kontomut assigisaanilu allanneqassapput, takkuk § 22.

 

Aalajangersakkat allat

§ 18. Aningaasarsianik A-nik akissarsisitsinermi unerartitsisussaatitaasup akissarsisoq allakkatigut imaluunniit allatut atuarneqarsinnaasumik nalunaarfigissavaa aningaasarsiat, piffissaq isertitanut attuumassuteqartoq aammalu aningaasat akileraarutinut unerartinneqartut annertussusaat pillugit. Nalunaarummi allanneqassapput unerartitsisussaatitaasup aqqa, najugaa, kommuni aamma INN-normu, inuttut normu imaluunniit unerartitsisussaatitaasumit normu akissarsisup kinaaneranut ilisarnaatitut atugarisaa. Inuttut normu allatulluunniit kinaassutsimut ilisarnaataasumik normu amigaatigineqarpat, akissarsiaqartup inuuiata ullua, qaammataa ukiualu allanneqassapput.

 

Kapitali 6
Aningaasarsiat A-nik aamma akileraarutit A-nik naatsorsuusiorneq

§ 19. Unerartitsisussaatitaasoq aningaasarsianik A-nik akissarsiat aamma akileraarutinut A-nut unerartitat pillugit naatsorsuuteqartitsissaaq.
Imm. 2. Naatsorsuusiorneq akileraaruseriffiup immikkut naatsorsuusiorfissiaa tassani ilitsersuutit malillugit atorlugu imaluunniit unerartitsisussaatitaasup §§ 23-26-imi malittarisassat naapertorlugit nalinginnaasumik naatsorsuutaani immikkut kontomi ingerlanneqassaaq.

§ 20. Naatsorsuusiorfissiaq atorneqarpat, taanna bilagillu naatsorsuusiamut atasut ilanngullugit ukiup naatsorsuusiorfiusup naatsorsuusiorfissiami kingullermik ilanngussiviusup naaneraniit ukiuni tallimani toqqorsimaneqassaaq.
Imm. 2. Naatsorsuusiorfissiaq atorneqarpat, inatsisit allat tunngavigalugit naatsorsuusiornissamut naatsorsuusiortussaatitaanerlu annikillilerneqanngillat.

§ 21. Unerartitsisussaatitaasup allatigut naatsorsuummik ingerlatsisup qinersinnaavaa nali-nginnaasumik naatsorsuuteqarnermi immikkut kontomi aningaasarsianik A-nik akileraarutinullu A-nut naatsorsuusiornissani. Taamaassappat naatsorsuusiorneq ingerlanneqassaaq akissarsianik il.il. akiliinerit tamarmik aningaasarsianik A-nik akileraarutillu A-t nalinginnaasumik naatsorsuutini immikkut "aningaasarsianik A-nik akiliinermut konto"-mi inissinneqarnerisigut.
Imm. 2. Aningaasarsianik A-nik akilikkat imm. 1-imi allassimasutut naatsorsuutini inissinneqassapput, pisuni ataasiakkaani tunniussanit pineqartunit akileraarutinik A-nik unerartitsineqassagaluarpallunniit. Akiligassat isumannaarnerannut kontomi aningaasarsianik A-nut tunngasut kisimik inissinneqartassapput. Akiligassanik isumannaarinermut kontomut pisassanik inissiineq kontomi tassani siusinnerusukkut inissitanut illuatungiliinikkut aaqqiissutitut taamaallaat inissiinerussaaq.
Imm.3. Immikkut tunngavissaqartillugu akileraaruseriffiup aalajangersinnaavaa, unerartitsisussaatitaasup imm. 1-imi oqaatigineqartutut naatsorsuuteqarnissamik toqqaasimasup, akiligassanik isumannaarinermut kontut allat, aningaasarsianut A-nut aalajangersimasunut inissiinermut atussagai. Imm. 2-mi taaneqartut taamatulli kontonut taamaattunut aamma atuupput.
Imm. 4. Naatsorsuutinut inissitsiterinermi aamma immikkut kontomik pilersitsineqassaaq. "Akileraarutinut A-nut konto". Kontomi tassani inissinneqassapput akileraarutit A-t unerartitat aammalu akileraaruseriffimmut akileraarutinik A-nik unerartitanik akiligassanik isumannaarinerit. Kontomut tassunga allanik inissiineqassanngilaq.

§ 22. Unerartitsisussaatitaasup aningaasarsianik A-nik akileraarutinullu A-nut nalinginnaasumik naatsorsuutini naatsorsuuteqartitsisoq, tamatumunnga atatillugu akissarsialinnut ataasiakkaanut tamanut immikkoortunik kontoqartitsissaaq, kontokortimik assigisaanilluunniit, tassungalu aningaasarsianit A-nik pineqartumut akissarsiarititat tamaasa akileraarutinillu A-nik unerartitsinerit tamaasa inissinneqassallutik. Aningaasarsiat A-t akilerneqartut kontomut il.il. inissinneqassapput, pisuni ataasiakkaani akileraarutinik A-nik unerartitsineqassagaluarpalluunniit. Kontomi il.il. naqqiinerit allatanik titarsinertigut imaluunniit illuatungiliinermik inissiinikkut taamaallaat pisassapput.
Imm. 2. Aningaasarsianik A-nik akileraaarutinullu A-nut kontomut il.il. taaneqartumut inissinneqassapput, taamaasilluni aningaasarsiat A-t akileraarutillu A-t ingerlaannartumik katinneqarsinnaanngorlugit. Ukiut naanerini tamatigut katiterilluni kisitsineq pisassaaq, katinnerilu kontimut il.il. allanneqassallutik.

§ 23. Unerartitsisussaatitaasup aningaasarsianik A-nik akileraarutinullu A-nut nalinginnaasumik naatsorsuutimini naatsorsuuteqartitsinissaq toqqarsimappagu, akileraaruseriffiup piumasaqaatigisinnaavaa, naatsorsuutit, tamatumani aamma § 22-mi taaneqartunik inissiinerit, erseqqinnerusumik piffissaliussap sivikinnerpaamik ullunik 14-inik sivisussuseqartup qaangiutinnginnerani qaammammi kingullermi pisassarisat saqqummiunneqartinnagit naammassineqarsimassasut naligiissaarneqarsimallutillu.

§ 24. Unerartitsisussaatitaasup aningaasarsianik A-nik akileraarutinullu A-nut nalinginnaasumik naatsorsuutimini naatsorsuuteqartitsisoq, naatsorsuutinut allattaaviit, pappiaqqat ataasiakkaat, kortit assigisaallu aammalu bilagit naatsorsuutinut atasut ukiup naatsorsuuteqarfiusup pineqartup naaneraniit ukiuni tallimani toqqortarinissaannut pisussaaffeqarpoq.

§ 25. Unerartitsisussaatitaasut aningaasarsianik A-nik akileraarutinullu A-nut nalinginnaasumik naatsorsuutiminni naatsorsuuteqartitsisut, akileraaruseriffimmit § 19-mi taaneqartunik naatsorsuutinut allattaaviit atoqqullugit peqquneqarsinnaapput, §§ 21-imiit 24-imut najoqqutassiat malinneqanngippata.

§ 26. Immikkut tunngavissaqartillugu akileraaruseriffiup naatsorsuuserinermut piumasaqaatit saqqummiunneqartut saneqqussinnaavai.

 

Kapitali 7
Danmarkimut akileraarutinik unerartitsineq

§ 27. Inuit, toqukkut qimagussimasut pigisaat, selskabit, peqatigiiffiit, suliffeqarfiit il.il., Kalaallit Nunaanni angerlarsimaffeqartutut nalunaarsorsimasut, Danmarkimut akileraarutinut, Danmarkimi akileraartarneq pillugu inatsit naapertorlugu akileraaruteqaataasussanik akissarsisitsinerni sulinermullu akissarsiassanik pisassanngortitsinerni, unerartitsisussaapput.

§ 28. Unerartitsisussaasunik nalunaarsuineq, isertitanut tunniunneqartunut pisassanngortinneqartunulluunniit aammalu Danmarkimut akileraartussaasunik unerartitsinermut atatillugu naatsorsuutinik ingerlatsineq aammalu akissarsiaqartumut tunngatillugu aningaasarsianik angissusiliinermut akileraarutillu naatsorsorneqarnerannut atugassanik paasissutissiineq unerartitsisussaatitaasunut Kalaallit Nunaanni najugaqartunut malittarisassat atuuttuusut malillugit suliarineqassapput.
Imm. 2. Danmarkimi akileraarutinut unerartitaasut akilerneqassapput nassuiaanerlu sukumiisoq pissalluni malittarisassat Kalaallit Nunaanni atuuttuusut malillugit. Naleqquttunik tunngavissaqartillugu Akileraartarnermut Pisortaqarfiup Danskit akileraaruserinermik oqartussaasuilu isumaqatiginninniareernermi tamatuminnga saneqqutsineqarsinnaanermik aalajangiisinnaavoq.
Imm.3. Akileraartarnermut Pisortaqarfiup aalajangersinnaavaa, imm. 1 naapertorlugu uppernarsaasersuinermi immersugassaq Akileraartarnermut Pisortaqarfiup sanaava akuerisaaluunniit atorneqassasoq.

 

Kapitali 8
Atuisinnaanermut akileraarut

§ 29. Akileraartussaatitaasup atuisinnaanermut akuersissummik pigisaqartup, aningaasarsianit akileraarutit pillugit inatsimmi § 2, imm. 1, nr. 13-imi pineqartunut ilaasup, naalagaaffimmi allami, Danmarkimi Savalimmiuniluunniit, Kalaallit Nunaata marloriaammik akileraannginnissamik isumaqatigiissuteqarfigisimasaani, najugaqartuulluni uppernarsarpagu, unerartitsinissamut procenti atorneqartoq appartinneqassaaq atuisinnaanermulluunniit akileraarutinik unerartitsinissaq atorunnaarsinneqarluni isumaqatigiissummi aalajangersakkat naapertorlugit.
Imm. 2. Uppernarsaasersuineq imm. 1 naapertorlugu, Akileraaruseriffimmut nassiunneqassaaq. Tamannalu tunngavigalugu aalajangerneqassaaq, atuisinnaanermut akileraarut appartinneqassanersoq atorunnaartinneqassanersorluunniit. Aalajangiineq akileraartussaatitaasumut unerartitsisussaasumullu nalunaarutigineqassaaq.
Imm.3. Akileraaruseriffiup aalajangersinnaavaa, uppernarsaasersuinermi akileraaruseriffiup immersugassamik sanaavanik akuerisaanik immersugassamik atuineqassanersoq.

 

Kapitali 9
Akileraarutinik akiliisitsiniaaneq

§ 30. Aningaasat aningaasarsianit akileraarutit pillugit inatsimmi malittarisassat naapertorlugit unerartitat, unerartitsisussaasumilluunniit aningaasarsianit akileraarutit pillugit Inatsisartut inatsisaanni malittarisassat naapertorlugit akiligassiissutigineqartut akileraaruseriffimmut akilerneqassapput.
Imm. 2. Unerartitsinermut atatillugu unerartitsisussaatitaasup akiligassaqartoq allakkatigut allatulluunniit atuarneqarsinnaasumik nalunaarfigissavaa aningaasat unerartitaasut amerlassusii pillugit. Nalunaarummi oqaatigineqassapput unerartitsisussaatitaasup aqqa, najugaa aammalu unerartitsinermi INN-normu, akiitsullillu aqqa aamma inuttut normua.
Imm. 3. Akileraaruseriffimmut akiliinermi unerartitsisussaatitaasup akiitsulik pillugu allakkatigut allatulluunniit atuarneqarsinnaasumik aqqanik, najugaanik inuttullu normuanik aammalu aningaasat unerartitat amerlassusii pillugit nalunaaruteqassaaq.

§ 31. Unerartitsisussaatitaasuppisussaaffigaa kommunimit attuumassuteqartumit akileraaruseriffimmiilluunniit, aningaasarsianit akileraarutit pillugit Inatsisartut inatsisaanni § 101 naapertorlugu peqqussutaasunut tunngasunik, allakkatigut apeqquteqaatit akinissaat. Akissuteqarneq apeqquteqaatip tiguneraniit ullut 14-it qaangiutsinnagit pissaaq.

§ 32. Unerartitsisussaatitaasut,aningaasarsianit akileraarutit pillugitInatsisartut inatsisaanni § 101 naapertorlugu, unerartitsinermut tunngasumik naatsorsuutinut atortut bilagillu qaammatisiutit malillugit ukiup pineqartup unerartitsiviusup naaneraniit sivikinnerpaamik ukiuni tallimani toqqortarinissaannut pisussaaffeqarput.

 

Kapitali 10
Pineqaatissiissutit

§ 33. Aalajangersakkani § 2, imm. 3, § 16, § 17, § 18, § 19, § 20 imm. 1, § 21, § 22, § 23 aamma § 24-imi unioqqutitsinerit akiliisitsinermik pineqaatissiissutigineqassapput, unioqqutitsinerit piaaraluni imaluunniit soqqusaatsumik mianersuaalliornikkut unioqqutitsineruppata.

 

Kapitali 11
Atuutilerfia

§ 34. Nalunaarut 1. januar 2007-imi atuutilerpoq.
Imm. 2. Tamatumunnga ilutigitillugu, Unerartitsisussaatitat nalunaarsugaanerat pillugu Namminersornerullutik Oqartussat nalunaarutaat nr. 2, 26. juni 1979-imeersoq, Aningaasarsiat A-t akileraarutillu A-t il. il. pillugit nassuiateqartarnermut Namminersornerullutik Oqartussat nalunaarutaat nr. 5, 26. juni 1979-imeersoq, Aningaasarsiat A-t akileraarutillu A-t naatsorsuusiorneqarnissaannut Namminersornerullutik Oqartussat nalunaarutaat nr. 6, 26. juni 1979-imeersoq, Arsaarinnillutik akiliisitsisartut (pantefogedit) aamma akileraarutit tiguniarneqartarnerat pillugit Namminersornerullutik Oqartussat nalunaarutaat nr. 10, 26. juni 1979-imeersoq, Akileraartussaatitat allattorsimaffii pillugit Namminersornerullutik Oqartussat nalunaarutaat nr. 26, 28. november 1996-imersoq aamma Aningaasarsiat A-t pillugit Namminersornerullutik Oqartussat nalunaarutaat nr. 3, 3. februar 2005-imeersoq kiisalu Kalaallit Nunaanni sulisitsisut Danmarkimi akileraarutissanik unerartitsisussaanerat pillugu Akileraartarnermut Pisortaqarfiup kaajallaasitaa nr. 13, 5. marts 1980-imeersoq atorunnaarput.

Namminersornerullutik Oqartussat, ulloq 1. december 2006

 

Josef Motzfeldt

/

Kaare Hagemann