Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi § 13, imm. 7 aamma 8, § 14, imm. 1, § 15, imm. 2, § 28, § 42, imm. 2, § 45, imm. 3, aamma § 83, kiisalu aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi § 83, imm. 2 naapertorlugit aalajangersarneqarput:

 

Kapitali 1
Siumoortumik nalunaarsuineq, § 15 naapertorlugu utertitsinerit aamma nammineerluni nalunaaruteqarneq

Nalinginnaasumik siumoortumik nalunaarsuineq

§ 1. Akileraaruseriffiup ukioq isertitaqarfiusoq sioqqullugu 1. septemberiutinnagu siumoortumik nalunaarsuinermut atugassanik immersugassanik ilitsersuutinillu sanassaaq.

§ 2. Nalinginnaasumik siumoortumik nalunaarsuinermi naatsorsuutigineqassagaanni, immersukkat allanillu paasissutissiissutaasinnaasut akileraaruseriffimmi tiguneqareersimassapput kingusinnerpaamik ukioq isertitaqarfiusoq sioqqullugu 1. november nallertinnagu. Immersukkat paasissutissiissutaasinnaasullu allat akileraaruseriffimmut digitalinngorlugit nassiunneqarsinnaapput
Imm. 2. Kinngusinnerpaamik oktoberip qiteqqunnerani akileraasuseriffik naqitatigut elektronikkilu atorlugu nuna tamakkerlugu saqqummmersartutigut imm. 1-imi piffissaliussaq pillugu tamanut ammasumik nalunaaruteqassaaq.

§ 3. Akileraartussaatitaasut akileraaruserinermik ingerlatsineq pillugu Inatsisartut inatsisaanni § 13, imm. 6-imi pineqartut, Kalaallit Nunaanni akileraartussaalernerminniit ullut 14-init qaangiutsinnagit isertitassatut naatsorsuutigisatik pillugit nassuiaateqassapput.

 

Skattekorti aamma akileraarutissanut allagartat

§ 4. Akileraaruseriffik skattekortimik akileraarutissallu allagartaannik sanassaaq taakkulu akileraartussaasumut nassiullugit, takukkilli imm. 2 aamma 3.
Imm. 2. Akileraarutinik A-nik unerartitsisussaatitaasup 1. december nallertinnagu akileraartussaatitaasumut unerartitsisussaasumi sulisumut skattekortimik piniarsinnaavoq, unerartitsisussaatitaasup ukiumi aningaasarsiorfiusumi tulliuttumi akileraartussaasumut akissarsisitsinissani naatsorsuutigiguniuk.
Imm. 3. Akileraaruseriffiup skattekorti unerartitsisussaatitaasumut tunniukkuniuk tamanna pillugu akileraaruseriffiup akileraartussaatitaasoq ilisimatissavaa.

§ 5. Tamakkiisumik akileraartussaatitaasumut inaarutaasumik naatsorsuineq ukiup isertitaqarfiusup tulliani 1. oktober sioqqullugu naammassineqarpat, akileraarutissat sinnerisa ilai tapiliussaq ilanngullugu 18.000 koruunit qaangernagit annertussusillit, akileraaruseriffiup erseqqinnerusumik aalajangiinera malillugu ukiumi tullermi akiliutissat ilassaattut, akileraarutinik A-mik B-millu ukiumi tassani amerlanerusunik akileeqqusineqassappat matussutissatut nuunneqassapput. Aappariinnut ataatsimut akileraartussaatitanut tamatumani aningaasat 36.000 koruuniupput. Akileraarutit ukiumut akileraarutissat sinnerinik nuutsiviusumit akileqquneqartut siullermik akileraarutissat sinnerinut nuunneqartunut matusissutissanut ilaasutut isigineqarput.
Imm. 2. Imm. 1 naapertorlugu akileeqqusineq akileraartussaatitaasup ilanngaataanik annikilliliinikkut pissaaq naatsorsueriaaseq imaattoq malillugu: Akileraartussaatitaasup ilanngaataanut ilanngaatigalugu (akileraarutissat sinneri nuunneqartut akileraarummut procentimik agguarlugit 100-millu gangiilluni). Appariinnut ataatsimoortumik akileraartunut akileraarutissat sinneri nuunneqartut aappariinnut ilanngaatip avinneqarneranut naapertuuttumik aappaariinnut avinneqassapput. Skattekortimi allassimasumik ilanngaatissaq minusimut naatsorsorneqarsimappat, 0-umut inissinneqassaaq.
Imm. 3. Aningaasat imm. 1-ip pereerneratigut sinneruttuusinnaasut akileraaruserinermik ingerlatsineq pillugu Inatsisartut inatsisaanni § 24, imm. 3-mi malittarisassat malillugit akiligassanngussapput. Aamma tamanna atuuppoq akileraarutissat sinneri ukiumi tulliuttumi akileraarutaagallartunit unerartinneqarsinnaasorinanngippata.
Imm. 4. Akileraarutissat sinneri aningaasanut ukiumi akileraarusiiffiusumi 1. oktoberimi naatsorsukkanut 6 procentimik taperlugit ilanngunneqassapput. Akileraarutissat sinneri imm. 1 malillugu nuunneqartut erniaannik akiliisitsineqassanngilaq.
Imm. 5. Akileraartussaatitaasup inaarutaasumik naatsorsuunnera ukiup isertitaqarfiusup tulliani 30. septemberip kingornatigut naatsorsorneqarpat akileraarutissat sinnerisa ilaanik ukiumut tulliuttumut nuussineqassanngilaq.
Imm. 6. Aningaasat imm. 2 aamma 4 malillugu pinngortut koruunimut ilivitsumut qaninnerpaamut apparneqassapput.

§ 6. Aningaasat § 5, imm. 1-imi pineqartut 18.000 koruunit 36.000 koruunillu akileraarutissat sinnerinut matusissutitut tamakkiisumik atorneqanngippata, aningaasat sinnerinut akileraaruseriffiup erseqqinnerusumik aalajangiinera malillugu ukiumi isertitsiviusumi siusinnerusumi akileraarutinik akiligassanut kinguaattoorutinik tapit ilanngullugit akiligassanngorsimasunik, nuussineqarsinnaavoq. Isertitanit akileraarutit, akitsuutinut, tapinut, akiliutinut ernianullu akileraaruseriffimmit ingerlanneqartunut tunngasut akileraarutinut akiligassanut kinguaattoorutinut ilaapput. Akiligassanut kinguaattoorutit taagorneqartut matuneqassapput kinguaattoorutit nutaannginnerit siulliullugit taavalu matussusigaanissamut oqaatigineqartutut tulleriiaarlugit. Akiligassanut kinguaattoorutit naatsorsuutigineqartut akileraarutissat sinnerinit ilan-ngunneqartunit kingulliullutik, ukiumili isertitsiviusumi pineqartumi A-mik akileraarutinit siulliullutik matussutissinneqassapput.
Imm. 2. Akiligassanut kinguaattoorutit ukiumi pineqartumi 1. oktober naatsorsorneqarsimanermittut naatsorsuutigineqassapput. Taakkununngalu ilanngutissaaq landskarsimut nakkartussamik kinguaattoorutit - tapit, akiliutit erniallugu ilanngunnagit - 6 procentiannik tapeq. Akiligassat koruunimut ilivitsumut qaninnerpaamut apparneqassapput.
Imm. 3. Akileraarutinik akiligassanut kinguaattoorutit imm. 1 malillugu nuunneqartut erniaannik akiliisitsineqassanngilaq.
Imm. 4. Akileraartussaatitaasup siumoortumik nalunaarsuinera kingusinnerusukkut allanngortinneqarpat, akiligassanut kinguaattoorutit naatsorsuutigineqartut skattekortimi unerartinneqarsinnaajunnaarlugit, akiligassanut kinguaattoorutit utertinneqassapput.
Imm. 5. Akiligassanut kinguaattoorutit naatsorsuutigineqartut ukiumi isertitsiviusumi akileraarutaagallartunit A-nit matuneqarsinnaanngitsortai utertinneqassapput, ernianillu naatsorsuineq ukiumi isertitsiviusumi 1. januaarimiit ingerlanneqaqqilissaaq, akiligassanillu ki-nguaattoorutinit utertinneqartunut tunngasumik 6 procentimik tapeq atorunnaarluni.

§ 7. Akileraaruseriffiup § 5, imm. 1, imaluunniit § 6, imm. 1 naapertorlugit aningaasanik nuussinngissinnaavoq, imaluunniit aningaasat ikinnerusut nuunnissaat aalajangersinnaallugu, akileraaruseriffiup naatsorsuutigippagu, akileraartussaatitaasup akileraartussaatitaasullu illumi inoqutaasa naammaannartumik angerlarsimaffeqarnissamut naammaannartumillu inuuniarnermut naammattunik akissaarunnerannik nuussineq kinguneqartitsissappat.

§ 8. Akileraartussaatitaasoq tamakkiisumik akileraartussaajunnaarpat, akileraarutit sinneri § 5, imm. 1 malillugu nuutat, aammalu § 6, imm. 1 malillugu akileraarutinik akiligassanik ki-nguaattoorutit pingasunngorlugit avillugit naafferartumik akiligassanngussapput, akiligassat siulliit qaammaammi akileraartussaanerup taamaatiffigisaata tulliusup ulluisa siullianni tamatumalu kingornatigut qaammatit tulliuttut marluk ulluisa siullersaanni, piffissaagallartillugu akiliiffiussalluni qaammatip akiliiffiusussap ulluisa 20-at. Piffissaagallartillugu akiliiffissaq ulloq sapaataappat nalliuttuuppat arfininngorneruppalluunniit, pifffissaliussaq ulluinnarmut tulliuttumut sivitsorneqassaaq.

§ 9. Aningaasat § 5, imm. 1 malillugu 18.000 koruunit 36.000 koruunillu tamakkerlugit atorneqanngippata, skattekortimi ilanngaatissat sinneri sapinngisamik tamaasa aningaasarsianut B-nut ilanngaatigineqassapput, skattekorti ilanngaatissamik annikillisamik ilanngaatissillugu ilanngaatissalinngilluinarluguluunniit sananeqartussanngorlugu.
Imm. 2. Akileraarutit B-t naatsorsorneqarneranni aningaasarsianik B-nik isertitat sinneri 100-mik agguarneqarsinnaasunut koruuninut qaninnerpaanut appartinneqassapput.
Imm. 3. Akileraarutissat B-t 100 koruunit sinnersimappatigut, akileraarutissanut allagartakkut akilersinneqassapput.

 

§ 15 naapertorlugu utertitsinerit

§ 10. Isertitanit akileraarutinit amerlanaarlugit akilikkanik akileraaruserinermik ingerlatsineq pillugu Inatsisartut inatsisaanni § 15, imm. 1 naapertorlugu utertitsinissamik qinnuteqaat allakkatigut akileraaruseriffimmut tunniunneqassaaq.
Imm. 2. Utertitsinissamik qinnuteqaatip akuerineqarsinnaaneranut tunngavissaatinneqarpoq akileraartussaatitaasup nammineerluni nalunaarsuineq, naatsorsuutit, akissarsianut allagartat assigisaalluunniit atorlugit ilimanarsisissagaa, akileraartussaatitaasup akileraarutaagallartunik akiliivallaarsimanera taamaattumillu ilimagisariaqartoq angissusiliinerup naammassineqarnerani akileraarutinit utertertoorutinik tunineqartariaqarnissani.

 

Nalikilliliissuteqarnermi allattuiffik

§ 11. Akileraartussaatitaasoq ingerlatsinermut naatsorsuutinik akileraaruserinermik ingerlatsineq pillugu Inatsisartut inatsisaanni § 17, imm. 3 aaamma § 18, imm. 1 naapertorlugit akileraaruseriffimmut nassitsisussaanngitsoq, akileraarutitigulli nalikilliliissuteqarsinnaasoq, akileraaruseriffiup nalikilliliissuteqarnermi allattuiffissiaanik atuissaaq.
Imm. 2. Akileraaruseriffiup qinnuteqarneq tunngavigalugu imm. 1 malillugu pisussaaaffeqarneq atorunnaarsissinnaavaa.

 

Kapitali 2
Akileraarutinik isumannaarineq

Kommunimut akileraarut aamma nunamut tamarmut akileraarut immikkut ittoq

§ 12. Kingusinnerpaamik qaammatip sukumiisumik nalunaarummik nassiusiviusup tulliata naanerani akileraaruseriffik kommuninut allanut akileraarutit A-t sukumiisumik nalunaarutip annertussusai naapertorlugit taakkuninnga pisassaqartuusunut isumannaarigallassaaq.

§ 13. Akissarsiat allagartat malillugit akileraarutinik A-nik kommunip akileraarfiusup pisassarisaanik inaarutaasumik isumannaarineq pissaaq ukiup isertitaqarfiusup naanerata kingorna 1. april nallertinnagu. Akissarsiat allagartat 1. martsip kingornatigut takkuttunut tunngatillugu inaarutaasumik isumannaarineq pissaaq kingusinnerpaamik qaammatip akissarsiat allagartaasa tiguneqarfiisa naanerani.

 

Nunamut tamarmut akileraarut aamma kommuninut ataatsimut akileraarut

§ 14. Akileraarutinit akilerneqartunit nunamut tamarmut akileraarutip aamma kommuninut ataatsimut akileraarutip ukiumut isertitaqarfiusumut pineqartumut nunamut tamarmut akileraarutinut, kommuninut ataatsimut akileraarutinut kommunimullu akileraarummut akileraarutissiissutaasut annertussusii naapertorlugit naatsorsorneqassapput.

 

Piginneqatigiiffiit akileraarutaat

§ 15. Akileraaruseriffiup piginneqatigiiffiit akileraarutaasa kommimut akileraarfiusumut agguagassartaanik kommunimut akileraarfiusumut isumannaarinninnera kingusinnerpaamik ukiup isertitaqarfiusup tulliata naanerani pissaaq.
Imm. 2. Piginneqatigiiffiit akileraarutaasa imm. 1 malillugu kommunimut akileraarfiusumut agguagassartai ukiumut pineqartumut nunamut tamarmut akileraarutip, kommuninut ataatsimut akileraarutip aamma kommunit akileraarutaasa agguarneqarnerisa annertussusaannut, akileraaruserinermik ingerlatsineq pillugu Inatsisartut inatsisaanni § 40, imm. 7 naapertorlugu, akileraarutinut akileraarutissiissutaasut annertussusii naapertorlugit naatsorsorneqassapput.

 

Iluanaarutisianit akileraarut

§ 16. Qaammatip atuuttuusup siuliani iluanaarutisianit akileraarutinit akiliutit kommuninut allanut agguagassartaanik kommuninut pisassalinnut taakkununnga isumannaarigallarneq akileraaruseriffiup suliarissavaa kingusinnerpaamik qaammatip naanerani.
Imm. 2. Januaarip naanerani, qaammatini aqqaneq marlunni siuliini iluanaarutisianit akileraarutinik akilerneqarsimasut kommunimut akileraarfiusumut agguagassartaanik inaarutaasumik isumannaarineq akileraaruseriffiup suliarissavaa.
Imm. 3. Iluanaarutisianit akileraarutinit imm. 1 malillugu kommuninut akileraarfiusunut isumannaarneqartussat, nunamut tamarmut akileraarutip, kommuninut ataatsimut akileraarutip aamma kommunimut akileraarutip ukiup siuliani akileraarutissiissutaasut annertussusii naapertorlugit naatsorsorneqassapput.

 

Akileraarutit A-nit annaasanik agguaaneq

§ 17. Unerartitsisussaatitaasut akileraarutinik A-nik akilinngitsuugaqarnerisigut pinngortunik annaasat landskarsip nammatassarai.
Imm. 2. Unerartitsisussaatitaasup akileraarutinik A-nik akiliinngitsoorneratigut annaasat 50.000 koruuniuppata amerlaneruppataluunniit, akileraaruseriffiullu atattuinnartumik akiliisitsiniarnermik aallartitsinermigut, akiliisitsiniarnermut tunniussinikkut, akiliisinnaajunnaartutut suliassiissuteqarnikkut il.il. annaasaqaatit siusinnerusukkut killilersimaarniaraluarsimappagit, unerartitsisussaatitaasup akileraarfittut kommuniata annaasaqaatit ilaannit kommunimut akileraarutip aamma kommuninut ataatsimut akileraarutinik annaasaqaatit aamma nammatassarivai.
Imm. 3. Annaasanik imm. 2 malillugu agguaaneq taamaallaat pisinnaavoq pisassarisat pisoqalivallaarnerinut malittarisassanik, eqqartuussivimmi suliami sunniuteqanngitsoornermik, akiligassaqarfiup allap pinngitsaaliinikkut akiligassaqarfinnik tulleriiaarisitsineranik, piginneqatigiiffiit akiliisinnaajunnaarlutik atorunnaarnerannik, toqukkut qimaguttup pigisanik qimataanik suliaqarnermi akiitsunik kingornussiumanngittoqarneratigut assigisaanilluunniit patsiseqartumik akileraaruseriffik pisassarisanik taamaatitsiinnarsimatillugu. Taamatuttaaq pisassarisat akilerneqarsinnaanngitsutut ilimaginneqarnerat pissutigalugu taamaatiinnakkanut tamanna atuuppoq.

§ 18. Annaasanik § 17, imm. 2 malillugu agguaanerit nunamut tamarmut akileraarut, kommuninut ataatsimut akileraarut aamma kommunimut akileraarutinut aalajangiussat ukiumut isertitsiviusumut akileraarutit attumassuteqarfigisaanni annertussusiligaanerat naapertorlugu naatsorsorneqassapput.
Imm. 2. Annaasaqaatinik agguaanermi kommunimut akileraarfiusumut agguaanneqartussanik inaarutaasumik isumannaarineqassaaq ukiup isertitaqarfiusup annaasaqaatinik inaarutaasumik paasinniffiusup naanerani.

§ 19. Akileraaruseriffik ukiup affaata ingerlareernerini unerartitsisussaatitaasup akileraarutinik A-nik isumannaarinninnginnera pillugu kommunimut akileraarfiusumut nalunaarutiginnittassaaq, unerartitsisussaatitaasut ataasiakkaat akiligassanut kinguaattoorutaat 50.000 koruuniuppata amerlanerullutilluunniit, piffissaagallartillugulu akiliiffissaq qaammatit pingasut sinnerlugit qaangerneqarsimappat.
Imm. 2. Nalunaarutiginninnerit 30. juni aamma 31. december suliarineqartut kommunimut akileraarfiusumut anngutereersimassapput kingusinnerpaamik ukiup affaata qaammataata kingulliup malitsigalugu qaammatip tulliata naanerani.
Imm. 3. Nalunaarutiginninneq aamma akileraaruseriffiup akiliisitsiniarnermi qulakkeerinninniarnermilu iliuuserisimasaanik, aammalu akiliisitsiniarnerup atattuinnartumik atuutsinneqarnissaanik peqqussutaasimasinnaasunik naatsumik allaaserinninnermik imaqassaaq.

§ 20. Akileraaruseriffiup ukiup naanerani unerartitsisussaatitaasut akileraarutinik A-nik akiliuteqannginnerannik patsiseqartunik ukiumi annaasaqaatinik 50.000,- koruuninik amerlanerusunilluunniit aningaasartaqartunik akiligassat ilaannik peersinikkut taamaatiinnakkat pillugit kommuni akileraarfiusoq ilisimatitsissuteqarfigissavaa. Nalunaarutiginninneq akiligassat ilaannik taamaatitsiinnarnermut tunngaviusut pillugit paasissutissiissummik tamatumunngalu uppernarsaatinik ilaqartinneqartumik imaqassaaq.
Imm. 2. Annaasaqaatinik akilerneqarsinnaannginnerannik ilimasunneq tunngavigalugu akiligassat ilaannik taamatitsiinnarnermi kommunip akuersissutaa, kommunip akileraarfiusup ukiup naanerani annaasaqaatinit nammatassaanik nuussivigineqannginnerani, pissarsiarineqarsimassaaq. Kommunip akileraarfiusup annaasaqaatinut akuersissutaanik qinnutiginninnermi, akileraaruseriviup kommunimut akileraarfiusumut annaasaqaatit amerlassusii unerartitsisussaatitaasullu aningaasaqarnikkut pissutsit atugarisai paasisitsissutigissavai.
Imm. 3. Kommunip akileraarfiusup akiligassanut akilerneqarsinnaannginnerannik ilimasunneq pissutigalugu akiligassat ilaasa taamaatitsiinnarnikkut annaasaqaatit akuersissutigippagit, akileraaruseriffik kingusinnerpaamik ukiup naatsorsuuseriviusup naanerata kingornatigut ukiut tamaasa kommunimut ukiup naatsorsuuseriviusup ingerlanerani pisassarisanut taamatut taamaatiinnakkanut akiliineqarsimaneranut nalunaajaammik tunniussisassaaq. Tamatumunngalu peqatigitillugu akileraaruseriffiup taamaatut pisassarisat sorliit ukiup naatsorsuuseriviusup ingerlanerani pisoqalisoornermut assigisaanullu malittarisassat kingunerisaannik atorunnaarsimanersut paasisitsissutigissavai.
Imm. 4. Kommunip akileraarfiusup akiligassanut akilerneqarsinnaannginnerannik ilimasunneq pissutigalugu taamaatitsiinnarnikkut annaasaqaatinik akuerinninnera atorunnaassaaq, kingusinnerusukkut paasinarsippat pisassarisat akilerneqarsinnaasut. Taamatut pisoqartillugu akileraaruseriffiup landskarsip tamatumunnga atatillugu kommunimit akileraarfisumit aningaasat pissarsiarisimasai piaartumik taarsissavai.

 

Akileraarutit sinnerinik aamma piginneqatigiiffiit akileraarutaannik annaasanik agguaaneq

§ 21. Akileraartussaatitaasup akileraarutit sinnerinik akiliinnginneratigut aamma piginneqatigiiffiit akileraarutaannit pilersunik annaasaqaatit landskarsip nammatassarivai.
Imm. 2. Kommunilli akileraarfiusup annaasaqaatit kommunimut akileraarut aamma kommuninut ataatsimut akileraarutinut tunngasortai aamma nammatarissavai, pisassarisat pisoqalivallaarnerinut malittarisassat, eqqartuussivimmi suliami sunniuteqanngitsoornermik, akiligassaqarfiup allap pinngitsaaliinikkut akiligassaqarfinnik tulleriiaarisitsineranik, piginneqatigiiffiit akiliisinnaajunnaarlutik atorunnaarnerannik, toqukkut qimaguttup pigisanik qimataanik suliaqarnermi akiitsunik patsiseqartumik, assigisaasaluunniit kinguerisaannik imaluunniit akilerneqarsinnaannginnerannik ilimasunnerup kingunerisaanik akileraaruseriffik pisassarisanik taamaatitsiinnarsimappat.
Imm. 3. Akileraarutissat sinnerinik annaasaqarnermi kommuni akileraarfiusoq annaasaqaatit kommunimut akileraarut aamma kommuninut ataatsimut akileraarutinut tunngasortaanik aamma nammataqassaaq, pisassarisat akileraaruserinermik ingerlatsineq pillugu Inatsisartut inatsisaanni §§ 53-imiit 55-imut tunngavigalugit tamakkiisumik ilaannakortumilluunniit akiligassat ilaasa peernerisigut taamaatiinnarneqarsimappata.

§ 22. Akileraarutissat sinnerinik annaasaqaatinik § 21, imm. 2 aamma 3 naapertorlugit agguaaneq nunamut tamarmut akileraarutip aamma kommuninut ataatsimut akileraarutip, kommunimullu akileraarutinut ukiumi isertitsiviusumi akileraarutit attuumassuteqarfigisaanni akileraarutissiissutaasut annertussusii naapertorlugit naatsorsorneqassaaq.
Imm. 2. Piginneqatigiiffiit akileraarutaannik annaasaqaatinik § 21, imm. 2 naapertorlugu agguaaneq, nunamut tamarmut akileraarutip aamma kommuninut ataatsimut akileraarutip aamma kommunit akileraarutaasa agguaqatigiisinneqarnerisa, kommunimullu akileraarummut pineqartumut akileraarutit attuumassuteqarfigisaanni, akileraaruserinermut ingerlatsineq pillugu Inatsisartut inatsisaanni § 40, imm. 7 naapertorlugu akileraarutissiissutaasut annertussusii naapertorlugit naatsorsorneqassaaq.
Imm. 3. Kommunip akileraarfiusup annaasaqaatinut agguagassarsiassaa inaarutaasumik naatsorsorneqarnera kingusinnerpaamik ukiup isertitsiviusup annaasaqaatit paasineqarfigisaata naanerani suliarineqassaaq.

 

Iluanaarutisianit atuisinnaanermullu akiliutinit akileraarutinik annaasanik agguaaneq

§ 23. Annaasaqaatit unerartitsisussaatitaasup iluanaarutinit atuisinnaanermullu akiliutinit akileraarutinik akiliinnginneratigut pinngortunik annaasaqaatit landskarsip nammassavai.

 

Ernialersuinermik unitsitsineq

§ 24. Akileraarutinut akiligassanik kinguaattoorutinik ernialersuinerup unitsinnissaanik aalajangiineq nalinginnaasumik pisinnaanngilaq
1) akiligassaqartuusup aningaasat tungaasigut atugarisai ilisimaneqanngippata, imaluunniit
2) akiligassaqartoq akiligassanut kinguaattoorutinut akilersuisimanngippat tamatumunnga periarfissaqarluarsimagaluarluni.
Imm. 2. Akileraarutinut akiligassanik kinguaattorutinik ernialersuineq aallarteqqissaaq, akiligassaqartup aningaasat tungaasigut atugarisai sivisunerpaamik ukiut pingasut ingerlaneranni kinguaattoorutiminut akiliinissaanut periarfissaqartitsippata.

 

Kapitali 3
Pineqaatissiissutit aamma atortuulerfia

§ 25. Kinaluunniit, piaaraluni imaluunniit soqqusaatsumik mianersuaalliornikkut §§-it 3 aamma 11, imm. 3-imik, unioqqutitsisoq akiliisinneqarnikkut pillarneqarsinnaavoq.

§ 26. Nalunaarut 1. januar 2007 atuutilerpoq.
Imm. 2. Ilutigitillugu siumoortumik nalunaarsuineq pillugu Inatsisartut nalunaarutaat nr. 3, 26. juni 1979-imeersoq aamma Akileraarutit akiligassat kommunit landskarsillu akornanni isumannaarneqartarneri pillugit Namminersornerullutik Oqartussat nalunaarutaat nr. 15, 15. juni 1995-imeersoq atorunnaarsinneqarput.

Kalaallit Nunaanni Namminersornerullutik Oqartussat, ulloq 1. december 2006

Josef Motzfeldt

/

Kaare Hagemann