Peqqinnissaqarfiup sullissineri il.il. pillugit Inatsisartut peqqussutaanni nr. 15-imi, 6. november 1997-imeersumi § 2, imm. 2, takuuk imm. 3, aamma § 15, imm. 2, naapertorlugit aalajangersarneqarput:

Siunertaq

§ 1. Kigutigissaanerup siunertarai angerlarsimaffimmi kigutigissarluartarnikkut, pitsaaliuinissamillu suliaritittarnissamillu ataqatigiissumik neqerooruteqarnikkut inuit kigutigissarnikkut pissusissamisoortumik ileqqoqalernissaat, kiisalu peqqissunik kiguteqarnissaat, qaneqarnissaat aamma alleroqarnissaat ineriartortissallugit, taakkulu inuuneq naallugu atorneqarsinnaanissaat attatiinnarlugu.
Imm. 2. Sulinerup piareersarnerani sumiluunniit najugaqaraluaraanni kigutigissaanikkut assigiimmik sullinneqarsinnaaneq anguniarneqassaaq.

Inuit pineqartut

§ 2. Nalunaarut i nunnut, nunami maani inuit nalunaarsorsimaffianni nalunaarsorneqarsimasunut nunamilu maani najugaqartunut, imaluunniit qaammatit arfinillit sinnerlugit nunami maani najugaqareersunut atuuppoq.

Kigutigissaanerup annertussusia

§ 3. Innuttaasut tamarmik aaqqissuussaasumik kigutigissaanermik neqerooruteqarfigineqarnissaannut naammattunik sulisussaqanngippat aningaasassaqartitsisoqaraniluunniit, meeqqanut inuusuttunullu aaqqissuussaasumik kigutigissaasarnissamik neqerooruteqarnissaq pingaartinneqassaaq.

§ 4. Meeqqat tamarmik atuartinneqartussaasut ukiui inorlugit ukiullit aamma atuartinneqartussaasutut ukiullit akeqanngitsumik aalajangersimasumik akuttussusilimmik kigutileritinnissamut pisinnaatitaaffeqarput.
Imm. 2. Imm. 1 naapertorlugu kigutileritinnissamut ilaapput:
1) Nalinginnaasumik pitsaaliuineq, tassunga ilaalluni qaammarsaaneq.
2) Meeqqanut ataasiakkaanut piffissaliinerit aalajangersimasut naapertorlugit kigutit, qarngup alleqqullu ineriartornerannik qanorlu peqqitsiginerannik misissuinerit.
3) Meeqqat ataasiakkaat pitsaaliorfigineqarneri, taakkununngalu kiisalu angajoqqaanut qaammarsaaneq ilanngullugu.
4) Kigutini, qanermi alleqqunilu nappaatinik katsorsaaneq.

§ 5. Inuusuttut atuartinneqartussat ukiui sinnerlugit ukiullit 20-nik ukioqalernissaasa tungaanut akeqanngitsumik aalajangersimasumillu akuttussusilimmik kigutigissarneqartarnissamik neqeroorfigineqarput. Ujartuisarneq kigutigissaasut ingerlatassaraat, taamaattorli imm. 3 takuuk.
Imm. 2. Imm. 1 naapertorlugu inuusuttunik kigutigissaanermut ilaapput:
1) Nalinginnaasumik pitsaaliuineq, tassunga ilaalluni qaammarsaaneq.
2) Inuusuttunut ataasiakkaanut piffissaliinerit aalajangersimasut naapertorlugit kigutit, qarngup alleqqullu ineriartornerannik qanorlu peqqitsiginerannik misissuinerit.
3) Inuusuttut ataasiakkaat pitsaaliorfigineqarneri.
4) Kigutini, qanermi alleqqunilu nappaatinik katsorsaaneq.
Imm. 3. Pilersaarutaasumik kigutigissaanissamut inuusuttoq marloriarluni takkutinngitsoorpat, aalajangersimasumik neqeroorut atorunnaassaaq. Neqeroorut aallarteqqinneqarsinnaavoq inuusuttoq pineqartoq taamaasiornissamut nammineerluni suliniuteqarpat.

§ 6. Inuit pitsorlunnertik imaluunniit annertuumik timimikkut imaluunniit tarnimikkut innarluuteqarnertik pissutigalugu nalinginnaasumik kigutigissartinnissamut neqeroorummik atuisinnaanngitsut aalajangersimasumik akuttussusilimmik akeqanngitsumillu nakkutiginnilluni kigutigissartinnissamik neqeroorfigineqassapput.
Imm. 2. Imm. 1-imi nakkutiginnilluni kigutigissaanermut ilaapput:
1) Qarngup peqqissuutinnissaanut misissuinerit ikiuinerillu, paaqqutarinnittunut qanigisaasunulluunniit tamanna pillugu ilitsersuinikkut.
2) Ataasiakkaanik timikkut tarnikkullu qanoq issusiat eqqarsaatigalugu pissutsinut ersiutaasunik katsorsaanerit.

§ 7. Inuit allat najukkami tamatumunnga nukissaqartitsisoqassappat akeqanngitsumik kigutileritinnissamut neqeroorfigineqarsinnaapput.
Imm. 2. Neqeroorummut ilaapput pilertortumik katsorsaaneq, aalajangersimasumik akuttussusilimmik misissuinerit aamma ataasiakkaat pisariaqartitsinerat naapertorlugu pitsaaliuinerit, inunnut ataasiakkaanut siusinnerusukkut kigutigissaasarnermut naapertuuttumik kigutit nakorsaata naliliinera naapertorlugu asiunaveersaataasumik kigutileritinneq, kiisalu kigutaasaliineq. Nalinginnaasumik neqeroorummut ilaatinneqanngillat kigutaasanik imaaliallaannaq peerneqarsinnaanngitsunik ikkussilluni suliarinninnerit assigiinngitsut, peqqissaaveqarfiulli nukissai tamatumunnga naammappata neqeroorutigineqarsinnaallutik.

§ 8. Inuit ilinniagaqarnertik pissutigalugu peqqissaaveqarfiup, inuit nalunaarsorsimaffianni nalunaarsorneqarfigisamik avataani najugaqartut inuit nalunaarsorsimaffianni nalunaarsorneqarfiginngisaminni najugaqarfigigallakkaminni kigutigissartinnissartik qinersinnaavaat.

Naammagittaalliorsinnaaneq

§ 9. Nalunaarut manna naapertorlugu kinaluunniit suliap qanoq naammassineqarnissaanut immikkut annertuumik soqutigisaqartoq naammagittaalliorsinnaatitaavoq.

§ 10. Kigutigissaanermik sulisuusut suliaannut tunngatillugu naammagittaalliutit, peqqinnissaqarfiup qitiusumik aqunneqarnera pillugu inatsit naapertorlugu, Peqqinnissaqarfiup Napparsimasut Sullinneqarneranni Maalaaruteqartarfianut ingerlatinneqassapput. Naammagittaalliorneq pisup naammagittaalliutiginiakkap naammagittaalliortumit piffissami ilisimaneqalerneraniit imaluunniit ilisimasariaqalerneraniit ukiut marluk qaangiutsinnagit pissaaq.

§ 11. Naammagittaalliutit, § 9-misut kigutilerinermik suliaqarnermi sulisuusut suliaannut tunngassuteqanngitsut, pisup pinerata kingorna piaarnerpaamik, kingusinnerpaamillu ullormit aalajangiinerup nalunaarutigineqarfianit sap.ak. 4 qaangiunneranni Peqqissutsimut Pisortaqarfimmut ingerlatinneqassapput, tassanngalu Peqqissaaveqarfinnik Aqutsivimmut ingerlateqqinneqassallutik.

Atuutilerfia

§ 12. Nalunaarut atuutilerpoq ulloq 15. oktober 2006.
Imm. 2. Ilutigitillugu Kalaallit Nunaanni kigutit nakorsaannut ilitsersuut 26. november 1975-imeersoq kingusinnerusukkut allannguuteqartinneqartarsimasoq atorunnaarsinneqarpoq.

Namminersornerullutik Oqartussat, ulloq 13. september 2006

Asii Chemnitz Narup

/

Søren Rendal