Nukissamik pilersuineq pillugu Inatsisartut peqqussutaanni nr. 14, 6. november 1997-imeersumi § 18, imm. 3, aamma § 21 naapertorlugit aalajangersarneqarput:

 

Kapitali 1
Siunertaq atortuuffiilu

§ 1. Nalunaarutikkut siunertarineqarpoq qularnaassallugu, innaallagissamut, imermut ataatsimoortumillu kiassarnermut immikkoortukkaanut aningaasartuutit assigiiaartumik periuseqarluni naatsorsorneqartarnissaat.

§ 2. Nalunaarummut ilaapput pilersuiviit innaallagissamik, imermik ataatsimoortumillu kiassarnermik pisortat pilersuiviinut pissarsiniartarnermik, ingerlatseqqittarnermik, tunisassiornermik siammarterisarnermillu suliaqartut.

§ 3. Nalunaarutikkut pilersuiviup agguataarneqartussanik naatsorsuusiornermut atugassanik, sumiiffinnut ataasiakkaanut tamanut naatsorsorneqartartussanut immikkoortukkaanut aningaasartuutit naatsorsorneqartarnerinut toqqammaviusunut, aningaasartuutit agguataarneqartarnissaanni periusiussatut tunngavissat aalajangersarneqarput.

 

Kapitali 2
Agguaassinermut naatsorsuutit

Sumiiffikkaarlugu ukiumoortumik suliarinnittarneq

§ 4. Pilersuiviit ataasiakkaat ukiut tamaasa agguaassinermut naatsorsuusiortassapput ukiumoortumik naatsorsuutini paasissutissaatit assingi toqqammavigalugit, sumiiffinnut tamanut ataasiakkaanut atuuttunik, takuulli imm. 3. Sumiiffittut paasineqartassapput illoqarfiit ataasiaakkaat aamma nunaqarfiit ataasiakkaat.
Imm. 2. Illoqarfiit marluk arlallilluunniit tunisassiornermik siammaterinermillu pilersuivimmiit ataatsimit pilersorneqartarpata, tamakku sumiiffittut ataatsitut naatsorsuutigineqassapput.
Imm. 3. Kiassarnermut agguaassinermut naatsorsuutit tunisassiorfiullutik immikkoortunut tamanut naatsorsorneqartassapput sumiiffinnut ataasiakkaanut tamanut siammarterissutit tassunga atasut ilanngullugit, naatsorsuuserisarnermi teknikkikkut periarfissaqalerpat, kingusinnerpaamilli 2010-mi.

§ 5. Agguaassinermut naatsorsuutit illoqarfinnut tulliuttunut naatsorsorneqartassapput: Nanortalik, Qaqortoq, Narsaq, Paamiut, Nuuk, Maniitsoq, Sisimiut, Kangaatsiaq, Aasiaat, Ilulissat, Qasigiannguit, Qeqertarsuaq, Uummannaq, Upernavik, Qaanaaq, Tasiilaq aamma Illoqqortoormiit.

§ 6. Agguaassinermut naatsorsuutit nunaqarfinnut tulliuttunut naatsorsorneqartassapput: Aappilattoq (Nanortalik), Narsaq Kujalleq, Tasiusaq (Nanortalik), Ammassivik, Alluitsup Paa, Saarloq, Eqalugaarsuit, Qassimiut, Igaliko, Qassiarsuk, Arsuk, Qeqertarsuatsiaat, Kapisillit, Atammik, Napasoq, Kangaamiut, Itilleq, Sarfannguit, Attu, Iginniarfik, Niaqornaarsuk, Ikerasaarsuk, Akunnaaq, Kitsissuarsuit, Ikamiut, Oqaatsut, Qeqertaq, Saqqaq, Ilimanaq, Ka-ngerluk, Niaqornat, Qaarsut, Ikerasak, Saattut, Ukkusissat, Illorsuit, Nuugaatsiaq, Upernavik Kujalleq, Kangersuatsiaq, Aappilattoq (Upernavik), Nutaarmiut, Tasiusaq (Upernavik), Nuussuaq, Kullorsuaq, Naajaat, Innaarsuit, Savissivik, Siorapaluk, Moriusaq, Sermiligaaq, Isortoq, Kulusuk, Tiniteqilaaq, Kuummiut, Uunarteq, Itterajivit, Kangerlussuaq aamma Narsarsuaq.

 

Kapitali 3
Periusissatut tunngaviit

Ingerlatsinermi sanaartornermilu aningaasartuutit

§ 7. Agguaassinermut naatsorsuutinut ilaapput pilersuiviit ataasiakkaat ingerlatsinermi sanaartornermilu aningaasartuutaat imatut paasineqartussat:
1) Toqqaannartumik toqqaannartuunngitsumillu aningaasartuutit, taakkununnga ilanngullugit sulisunut, naammassisaqarsinnaassutsikkut aningaasartuutinut, isumakkeerisarnernut, nioqqutissanik atuinermut, ernianut il.il. aningaasartuutit.
2)Pilersuiviup nammineerluni akilersuutigisartagai.

 

Aningaasartuutit isertitallu assigiinngitsut

§ 8. Aningaasartuutit isertitallu assigiinngitsut imatut agguataarneqartassapput:
1) Annertussutsit pilersuutigineqartut aallaavigalugit agguaassisoqartassaaq, annertussutsilli akiligassiissutigineqarsimasut atorneqartassapput, annertussutsinut pilersuutigineqartunut tatiginartunik paasissutissaqanngippat.
2) Innaallagissamut, imermut kiassarnermullu toqqaannartumik aningaasartuutit isertitallu assigiinngitsut toqqaannartumik innersuunneqarsinnaasut illoqarfinnut nunaqarfinnullu ataasiakkaanut naatsorsuutinut ilaatinneqartassapput.
3) Immikkoortortaqarfinnut, illoqarfinni nunaqarfinni assigisaannilu nukissiorfeqarfinnut ataatsimoorussamik aningaasartuutit agguataarneqartassapput innaallagissamik, imermik kiassarnermillu pilersuinermut immikkoortortaqarfinni, innaallagissamut imermut kiassarnermullu sulisunut, naammassisaqarsinnaassutsimut isumakkeerisarnernullu aningaasartuutit malillugit. Qitiusumik allaffeqarfimmut aningaasartuutit, nukissiorfeqarfiit sulisuinut, naammassisaqarsinnaassutsimut immikkoortortaqarfinnilu ataasiakkaani isumakkeerisarnernut tamakkiisumik aningaasartuutit malillugit, innaallagissamik, imermik kiassarnermillu pilersuinermut agguataarneqartassapput. Tamatuma kingorna aningaasartuutit immikkoortortaqarfinni ataasiakkaani pilersuutigineqartut naapertorlugit illoqarfinnut nunaqarfinnullu agguataarneqartassapput. Qitiusumik allaffeqarfimmit tamakkiisumik agguataarisinnaaneq periarfissaqassanngippat, qitiusumik allaffeqarfimmi aningaasartuutinik ilanngaassineq pisinnaasaaq tunngavilersorluakkamik missingersuineq tunngavigalugu.

 

Suliffeqarfimmi namminermi akilersuisarneq

§ 9. Suliffeqarfimmi namminermi innaallagissamut, imermut kiassarnermullu akilersuisarneq imatut ingerlanneqassaaq:
1) Tunisassiorfinnit siammarterivinnit allanit innaallagiaq, imeq kiassarnerlu pissarsiarineqartarpata tamanna akilersorneqartassaaq atuisumut aningaasartuutit sipaarutaasut aallaavigalugit. Taamatut akilersuisarneq nuna tamakkerlugu agguaqatigiissitsisimanermit tunngaveqartinneqassaaq.
2) Erngup nukissiorfimmit innaallagiaq kiassarnerlu sinneruttoq pissarsiarineqartassaaq suliffeqarfimmi 0,01 kWh-tut akilersuinermi aki naapertorlugu.
Imm. 2.Kangerlussuarmut Narsarsuarmullu atuuppoq, nunap sinneranisut suliffeqarfimmi akilersuisarnermi aki atorneqartoq atorneqartassammat.

 

Ilanngaaseereerluni erniat

§ 10. Ilanngaaseereerluni erniat agguataarneqartassapput ukiup naanerani illoqarfinnut nunaqarfinnullu innaallagissamik, imermik kiassarnermillu pilersuinermut sanaartukkat nalingi naatsorsuutini allanneqarsimasup nalinga naapertorlugu.

 

Isumakkeerisarnerit

§ 11. Isumakkeerisarnerit, taakkununnga ilanngullugit nalikilliliinerit naleqarnerulersitsinerit, pilersuiviit ukiumoortumik naatsorsuutaannut maleruagassat naapertorlugit ilanngunneqartassapput, pigisanullu ataasiakkaanut ilanngunneqartassallutik.
Imm. 2. Agguaassinermut naatsorsuutitigut takuneqarsinnaassaaq, pigisat sorliit isumakkeerneqarsimannginnersut.

 

Aningaasaliinernut akiliutit

§ 12. Aningaasaliinernut akiliutit agguaassinermut naatsorsuutinut ilanngullugit naatsorsorneqartassanngillat. Akiliutilli naatsorsuutinut ilanngunneqarsinnaassapput Inuussutissarsiornermut Pisortaqarfik taamaasiornissamut akuersissuteqassappat. Taamaattoqassappat immikkoortukkaanut aningaasartuutip 5%-a angullugu akiliutissaq naatsorsorneqarsinnaassaaq, tassungalu ilanngunneqartassalluni.

 

Kapitali 4
Immikkoortukkaanut aningaasartuutit naatsorsorneqartarnerat

§ 13. Immikkoortukkaanut aningaasartuutit naatsorsorneqartassapput agguataarneqartussanik naatsorsuutini aningaasartuutit naatsorsorneqarsimasut annertussutsinik pilersuutigineqarsimasunik agguarlugit, annertussutsit akiligassiissutigineqarsimasut ikiorsiullugit.
Imm.2. Inuussutissarsiornermut Pisortaqarfiup nalunaarutigisinnaavaa, suli aningaasartuutitigut kisitsisinik allanik naatsorsuisoqassasoq.

 

Kapitali 5
Allaffissorneq

§ 14. Agguaassinermut naatsorsuutit Inuussutissarsiornermut Pisortaqarfimmut nassiunneqassapput.

 

Kapitali 6
Atuutilernera

§ 15. Nalunaarut manna 1. september 2006-mi atuutilerpoq.

Namminersornerullutik Oqartussat, ulloq 10. august 2006.

Siverth K. Heilmann

/

Peter Hansen