Peqqinnissaqarfiup sullissineri il.il. pillugit inatsisartut peqqussutaanni nr. 15-imi, 6. november 1997-imeersumi § 2, imm. 3 naapertorlugu imm. 2, § 14, nr. 6, 7 aamma 10, aamma § 24, imm. 1 kiisalu napparsimasut inatsisitigut inissisimanerat pillugu inatsisartut peqqussutaanni nr. 6-imi, 31. maj 2001-imeersumi § 22 naapertorlugit aalajangersarneqarput:

 

Kapitali 1
Siunertaa, atuuffissaa, akiliinermi piumasaqaatit il.il.

§ 1. Nalunaarummi matumani pineqarpoq innuttaasut peqqinnissaqarfimmi sullissinerit ilaannik atuisinnaanerat, akeqanngitsumik imaluunniit tamakkiisumik ilaannakuusumilluunniit akiliinikkut.
Imm. 2. Nunami maani inuit allattorsimaffianni allattorsimasunut nunamilu maani najugaqartunut imaluunniit qaammatinit arfinilinnit sivisunerusumik kipiffeqanngitsumik maani nunamiissimasunut nalunaarut atuuppoq.
Imm. 3. Takornariat inuillu allat tassanngaannartumik napparsimalernikkut akeqanngitsumik napparsimasutut ikiorneqarsinnaatitaaneq pillugu malittarisassanut ilaatinneqanngitsut peqqinnissaqarfimmit pisariaqartinneqartut naapertorlugit sullinneqarsinnaapput, akiligassinneqassallutillu.

§ 2. Nalunaarut manna naapertorlugu sullinneqarsimanermut akiligassat naatsorsorneqarneranni akiligassiinissamut peqqinnissaqarfiup makku ilanngussinnaavai:
1) uninnganermut ullormut akiliutissaq, sullissineq napparsimmavimmi uninnganertaqarsimappat imaluunniit peqqinnissaqarfiup katsorsaaviisa ilaanni unnuiffissaqartuni allatigut illusimanertaqarsimappat,
2) uninnganani katsorsartittunut uninngasunulluunniit sulisunut aningaasartuutit, uninnganermut ullormut akigititamut ilaatinneqarunnartut saniatigut sullissineq peqqinnissaqarfimmi suliaqartunit misissortinnermik, katsorsaanermik imaluunniit paaqqutarinninnermik ilaqarsimappat,
3) nioqqutissanut/atortussanut aningaasartuutit, nakorsaatinik, nioqqutissanik/atortussanik il.il. tunniussisoqarsimappat atuisoqarsimappalluunniit, aamma
4) nassiussinermut akiliut, peqqinnissaqarfik pisarneq malinnagu tigusisussap najugaqarfianut nioqqutissamik/atortussamik nassiussisimappat, takuuk § 3, imm. 3.
Imm. 2. Uninnganermut ullormut akiliutissatut aki immikkoortortaqarfiit pineqartut il.il. ullormut akigitittagassaattut Peqqissutsimut Pisortaqarfimmit aalajangersarneqartoq.
Imm. 3. Uninnganani katsorsartittunut uninngasunullu sulisunut aningaasartuutit Peqqissutsimut Pisortaqarfimmit aalajangersarneqartut, aningaasarsianut allanullu sulisunut tunngassuteqartunut aningaasartuutinut il.il matusissutissat.
Imm. 4. Nioqqutissamut aningaasartuutitut nioqqutissap akia kiisalu allaffissornermut tapiliussassaq naatsorsorneqassapput. Atortussanik atuinermi nioqqutissanut akigitinneqartoq missiliugaasinnaavoq. Nakorsaatinut allaffissornermut tapiliussassaq nioqqutissap akiata 25%-eraa. Nioqqutissanut allanut allaffissornermut tapiliussassaq nioqqutissap akiata taamaallaat 15%-eraa. Tapiliussamut tassunga ilaapput nioqqutissap peqqinnissaqarfimmut nassiunneqarneranut kiisalu peqqinnissaqarfiup iluani napparsimmavimmut, nunaqarfimmi nakorsiartarfimmut, nakorsaataasivimmut assigisaannulluunniit nassiunneqarneranut atasumik aningaasartuutit.
Imm. 5. Peqqinnissaqarfimmit kiffartuussineq peqqinnissaqarfiup pisiniartarfii suleqataaluunniit aqqutigalugit tamakkiisumik ilaannakuusumilluunniit isumagineqarpat, peqqinnissaqarfiup aningaasanik pisiniartarfimmut il.il. akiligassaatut annertutigisunik akiligassiisoqassaaq.

§ 3. Nioqqutissanut kiffartuussinernullu aningaasanngorlugit imaluunniit akiligassiineq malillugu akiliisoqassaaq.
Imm. 2. Nioqqutissanik akilerneqartussaatitaasunik pissarsiniarnerit aatsaat akiliutissat tiguneqareeraangata suliarineqartassapput, nakorsap naliliineratigut immikkut ittumik nukinginnartuunngippata.
Imm. 3. Allamik isumaqatigiissuteqartoqarsimanngippat nioqqutissat akilerneqartussanngorlugit nassiunneqartut najukkami peqqinnissaqarfimmit aaneqarnissaannut piareernerarlugit nalunaaruteqarnerup kingorna piaartumik aaneqassapput. Peqqinnissaqarfik nioqqutissamik tigusisussap najugaqarfianut apuuttussanngorlugu nassiussisussanngorsimappat angallassinermut aningaasartuutinut matusissutissanik nassiussinermut akiliutissanik akileeqqusisoqassaaq, nioqqutissaq peqqinnissaqarfiup pisiniartarfianit toqqaannartumik nassiunneqarsimanngippat.

 

Kapitali 2
Peqqinnissaqarfiup sulissisarfiutaani uninnganeq

§ 4. Napparsimasumut ingiaqataasut qanigisaasulluunniit peqqinnissaqarfiup akiligarinngisaanik angalasut, napparsimasup angerlarsimaffiata avataani misissortinnermi katsorsartinnermilu kiffartuussinerit pillugit nalunaarut naapertorlugu, pissutsit naapertorlugit peqqinnissaqarfiup innersuussaani, Peqqissutsimut Pisortaqarfiup akit aalajangersagai naapertorlugit akiliuteqarnikkut nerisaqarnissamut illusimanissamullu neqeroorfigineqarsinnaapput.

§ 5. Peqqissutsimut Pisortaqarfik atornerluisut pisortanit innersuunneqartut katsorsaasarfimmiinnerinut akigititassanik aalajangersaasinnaavoq, aamma peqqinnissaqarfiup ataani pisortat sullissiviini imaluunniit pisortat sullissiviini peqqinnissaqarfiup isumaqatigiissuteqarfigisaani imerajuttuunermut allanulluunniit pinngitsoorsinnaanngisanut katsorsaanissamik neqerooruteqartuni uninnganani katsorsartittut ilaqutaasullu najugaqarnerannut.

 

Paaqqutarineqarluni uninnganerit

§ 6. Inuit nakorsap naliliinera naapertorlugu napparsimmavimmi uninngatinneqartariaqanngitsut, kisiannili paaqqutarineqarnissamik pisariaqartitsinertik pissutigalugu napparsimmavimmiikkusuttut, peqqinnissaqarfimmik isumaqatigiissuteqarnikkut peqqinnissaqarfimmi uninnganermi inissamik neqeroorfigineqarsinnaapput uninnganermut ullormut akigititaasup akilerneqartarneratigut, takuuk § 2, imm. 1, nr. 1. Aammattaaq immikkut paaqqutarineqarnissamik pisariaqartitsisunut tapiliussamik akileeqqusisoqarsinnaavoq.
Imm. 2. Imm. 1 naapertorlugu nammineq piumassuseq malillugu paaqqutarineqarluni uninnganissaq pillugu isumaqatigiissut sivisunerpaamik qaammatit arfinilikkaarlugit killiligaasassaaq, peqqinnissaqarfik sapertunut paaqqutarinnittarfinni inunnut pineqartunut atugassanngorlugit aaqqissuunneqarsimasuni inissamik neqeroorsinnaanngippat. Isumaqatigiissuteqartoqassanngilaq napparsimmavik taamaaliornissamut periarfissaqanngippat.
Imm. 3. Taamaattoq imm. 1 naapertorlugu akiliineq atorneqassanngilaq peqqinnissaqarfik kommunalbestyrelsimik isumaqatigiissuteqarnermigut soraarninngortunut immikkut paaqqutarineqarnissaminnik pisariaqartitsisunut inissaqartitsereerpat, takuuk utoqqarnik paaqqinniffiit il.il. pillugit Inatsisartut peqqussutaat.

 

Uninnganeq sivitsugaq

§ 7. Napparsimasoq uninngasoq katsorsarneqareernermi kingorna naleqquttumik inissaqartitsinnginnermik pissuteqartumik najugaqarfissaqanngikkallarpat peqqinnissaqarfik pissutsit tunngavigalugit napparsimmavimmi peqqinnissaqarfiulluunniit paaqqinnittarfiini allani uninnganerup sivitsorneqarnissaanik pineqartumut neqerooruteqarsinnaavoq uninnganermut ullormut akigititaasumik akiliisitsisarluni, takuuk § 2, imm. 1, nr. 1. Aammattaaq immikkut paaqqutarineqarnissamik pisariaqartitsisunut tapiliussanik akileeqqusisoqarsinnaavoq.
Imm. 2. Naleqquttumik najugaqarfissamik pissarsinissaq allamit akisussaaffigineqarpat, soorlu kommunimit sulisitsisumilluunniit, imm. 1 naapertorlugu akiliisitsinissamik piumasaqaat tassunga toqqaannartumik saqqummiunneqarsinnaavoq.

 

Kapitali 3
Iluaqusersuutit

§ 8. Inuit iluaqusersuutinik pisariaqartunik, tamatumunnga ilanngullugit timip ilaanut ajoqutilinnut amigaataasunulluunniit taarsiutaasunik, qerattaqqutaasunik imaluunniit iluarsiissutaasunik pisinnaatitaapput, takuuk peqqinnissaqarfiup sullissineri pillugit Inatsisartut peqqussutaat. Iluaqusersuutit taamaattut akeqanngillat, nalunaarummi matumani allanik aalajangersaasoqarsimanngippat.
Imm. 2. Peqqinnissaqarfik taamaallaat iluaqusersuutinik ikiuuttussaatitaavoq nakorsap naliliineratigut tamanna napparsimasumut pisariaqartinneqarpat.

 

Nakorsamit innersuussutigineqartut isikkatigut atukkat

§ 9. Nakorsamit innersuussutigineqartut isikkatigut atukkat nammineq akileeqataanikkut Peqqissutsimut Pisortaqarfimmit aalajangerneqartumik akilerlugit tunniunneqarsinnaapput.
Imm. 2. Siullermeertumik pisaarnermi isikkatigut atugassanik aasarsiutinik ataatsinik ukiorsiutinillu ataatsinik tunniussisoqassaaq. Pisariaqartitsinerup allanngornerata kingunerisaanik, assersuutigalugu pilatsinnermik pissuteqartumik pisaarnerit siullermeertumik pisaarnertut isigineqassapput.
Imm. 3. Pisaaqqinnermi isikkatigut atugassat ukiumut amerlanerpaamik ataatsit pissarsiarineqarsinnaapput, taamaattorlu takuuk imm. 4.
Imm. 4. Inuit 18-it inorlugit ukiullit ukiumut sisamariarlutik isikkatigut atukkanik tunineqarsinnaapput, angissutsip allanngornera imaluunniit nungullaaneq pissutigalugit nakorsap naliliineratigut tamanna pisariaqartutut isigineqarpat.
Imm. 5. Imm. 2-4-mut malittarisassat apeqqutaatinnagit peqqinnissaqarfik isikkatigut atugassanik amerlanernik akiliisitsilluni tunniussinissaminik neqerooruteqarsinnaavoq.
Imm. 6. Inuit 18-it inorlugit ukiullit, utoqqalinersiutillit siusinaartummillu pensionisiallit nammineq akileeqataasartussanut ilaanngillat, tak. imm. 1.

§ 10. Isikkatigut atugassanik pisaaqqinnissamut taarsiullugu nakorsamit innersuussutigineqartut isikkatigut atukkat iluarsaannissaannut peqqinnissaqarfik neqerooruteqarsinnaavoq.
Imm. 2. Pisaaqqinermut taarsiullugu, tak. § 9, imm. 3, isikkatigut atukkat nalinginnaasut naleqqussarlugit akeqanngitsumik iluarsiiviginissaat ukiumut ataasiarluni neqeroorutigineqarsinnaavoq.

 

Iviangiusat iviangequtillu

§ 11. Arnat kusanarsarnissamik peqquteqanngitsumik iviangiminnik millisitsillutik pilatsissimasut, iviangiusatut atorallagassaannik ataatsimik kiisalu iviangequtinik marlunnik akeqanngitsunik suliaritereernerup kinguninngua neqeroorfigineqassapput.
Imm. 2. Sungiussereernerup kingorna iviangiusamik ataatsimik iviangequtinillu marlunnik akeqanngitsunik neqerooruteqartoqassaaq, pisariaqartitsineq tunngavigalugu taarserneqartartussanik, taamaattorli amerlanerpaamik ukiumut iviangiusamik ataatsimik iviangequtinillu marlunnik akeqanngitsumik tunniussisoqarsinnaavoq.

 

Nujaasat

§ 12. Nappaat katsorsartinnerluunniit nujaasanik pisariaqartitsilernermik kinguneqarsimappat, nakorsaq akeqanngitsumik nujaasartaarnissamut innersuussisinnaavoq. Nujaasat pisariaqartitsineq naapertorlugu taarserneqarsinnaapput, taamaattorli ukiumut amerlanerpaamik nujaasat ataatsit akeqanngitsumik tunniunneqarsinnaallutik.
Imm. 2. Nujaasat nujaviunngitsunik sanaat annoraassiassamut ikkussukkat tunniunneqarsinnaapput, allanik nakorsaq innersuussisimanngippat.
Imm. 3. Nujaasat imm. 2-mi taaneqartunit allaanerusut peqqinnissaqarfiup tunniutissallugit neqeroorutigisinnaavai, akit nikingassutaat akilersillugu.

 

Tusartaatit

§ 13. Nakorsamit innersuussutigineqartumik tusartaammik nalinginnaasumik siullermeertumik pissarsineq akeqanngilaq.
Imm. 2. Nakorsamit innersuussutigineqartut tusartaatit nalinginnaanngitsut akeqanngillat, tusartaat nalinginnaasoq tusartaatitaartussap tusaaniarneranut naammaginartumik iluaqutaasinnaanngippat.
Imm. 3. Tusartaatinik imm. 1-imi aamma 2-mi pineqartunik iluarsaassineq taarsiinerluunniit akeqanngillat, atornissaannut ajoqutaasoq nalinginnaasumik atuinerup kingunerisimappagu.
Imm. 4. Tusartaatit imm. 2-mi oqaaseqatigiinni siullerni allassimasunit allaanerusut tunniukkumallugit peqqinnissaqarfiup neqeroorutigisinnaavaa, akit nikingassutaat akilersillugu.

 

Isarussat aamma kontaktlinset

§ 14. Peqqinnissaqarfik isarussanut, kontaktlinsenut imaluunniit taamaaqataannut isiginermut iluaqusersuutinut taamaallaat tapiissuteqarsinnaavoq, taakku:
1) Pilattaanerup kingunerisaanik nakorsamit innersuussutigineqarsimappata.
2) Suliarinninnikkut paasisaqarnerup kingorna nakorsamit innersuussutigineqarsimappata, imatut paasillugu:
a) Isip ameraasaani, isip ameraasaani qaamasumi imaluunniit uisorersaataani nappaateqartoqarpat.
b) Isip tappiutaani nappaateqartoqarpat.
c) Nakunganermut isi assiaquserlugu katsorsaaneruppat aamma isigisinnaassusermik sungiusaaqqinneruppat.
d) Allatigut isikkut nappaateqartoqarpat, nappaatinut normulersuutigalugit naqinnerni a-c-mi taaneqartunut nallersuunneqarsinnaasunik.
Imm. 2. Isarussanut, kontaktlinsenut imaluunniit taamaaqataannut isiginermut iluaqusersuutinut aamma tapiissuteqartoqartarpoq, - 7 ataallugu imaluunniit + 7 sinnerlugu sakkortussusilimmik isigisinnaassuseqaraanni. Isigisinnaassutsip sakkortussusianik naatsorsuinermi isarussanut nalinginnaasumik sakkortussusilinnut aamma isigisap ajoquteqarneranik iluarsiinermut kisitsisinik katiterineq atorneqartarpoq.

§ 15. Isaruartaarnermi, § 14 takuuk, peqqinnissaqarfik isarussat isitaannut taamaallaat tapiissuteqassaaq. Peqqissutsimut Pisortaqarfiup aalajangigaanik isarussat isitaasa nalinginnaasumik pitsaassusillit akiattut tapiissutit annertutigipput.
Imm. 2. Siullermeertumik pissarsinermi taamaallaat tapiissuteqartoqartarpoq, kiisalu tamatuma kingornatigut isigisap sakkortussusiata minnerpaamik 0,5-imik allanngornera paasineqaraangat.
Imm. 3. Aalajangersimasumik sakkortussusilinnut isarussanut ataatsinut taamaallaat tapiissuteqartoqarsinnaavoq. Taamaattoq aalajangersimasumik sakkortussusilinnut isarussanut arlariinnut tapiissuteqartoqarsinnaavoq nakorsap innersuussineratigut, tamanna suliarinninnermi pissutsit immikkut ittut pisariaqartippassuk.

§ 16. Kontaktlinsetaarnermi tapiissuteqartoqassaaq § 15, imm. 2 naapertorlugu aalajangersimasumik tapiissuteqarnertut, kontaktlinset qeratasuut nalinginnaasumik pitsaassusillit akiannut naapertuuttumik Peqqissutsimut Pisortaqarfiup aalajangigaa naapertorlugu.

 

Iluaqusersuutinik utaqqiisaagallartumik attartortitsineq

§ 17. Suliarinninnermut atasumik imaluunniit kapitalimi matumani malittarisassat naapertorlugit peqqinnissaqarfik utaqqiisaagallartumik atortorissaarutinik atukkiissappat Peqqissutsimut Pisortaqarfiup akigititassatut aalajangersagai naapertorlugit qularnaveeqqutinik akileeqqusisoqassaaq. Aningaasat qularnaveeqqutigineqartut erniaqartinneqartussaanngillat.

 

Kapitali 4
Nakorsaatit

§ 18. Pisortat napparsimmaviutaanni napparsimasumut uninngatinneqartumut nakorsaatit tunniunneqartut akeqanngillat.

§ 19. Napparsimasut pisortat napparsimmaviutaanni uninngatinneqanngitsut nakorsaatinik akeqanngitsumik taamaallaat tunineqarsinnaapput nakorsamit, kigutit nakorsaannit peqqinnissaqarfimmiluunniit sulisumit akuersissuteqarfigineqarsimasumit allamit nappaatip tassanngaannartup ataavartulluunniit katsorsarneqarnissaanut allaganngorlugu innersuussisimaneq tunngavigalugu.
Imm. 2. Nakorsaatinik sivisunerpaamik qaammatini pingasuni atorneqartussanik tunniussisoqartarsinnaavoq.

§ 20. Nakorsaatit nioqqutigineqartut pisut § 19-imi taaneqartut avataatigut taamaallaat akilersillugit tunniunneqarsinnaapput. Nakorsaatit nioqqutigineqartut niuertarfinni akissaannik aalajangersaasoqarsimappat taanna aki naapertorlugu § 2, imm. 4-milu allaffissornermut tapiliussassatut aalajangersarneqarsimasoq ilanngullugu tunineqassapput.
Imm. 2. Utoqqalinersiutillit siusinaartumillu pensionisiallit nakorsaatinut nioqqutigineqartunut akiliisassanngillat, nakorsaammik pineqartumik pisariaqartitsineq nakorsap innersuussineratigut uppernarsarneqarsinnaappat.

 

Akiuussutissalersuinerit

§ 21. Akiuussutissalersuinerit peqqinnissaqarfiup meeqqanik akiuussutissalersuineranut ilaasut akeqanngillat.
Imm. 2. Akiuussutissalersuinerit imm. 1-imi taaneqanngitsut akiuussutissartaasa akilernerisigut akiuussutissaliisoqarsinnaavoq, taamaattorli imm. 3 takuuk.
Imm. 3. Utoqqalinersiutillit, siusinaartumik pensionisiallit inuillu qanimanartoqartitsisinnaasut nualluummut akiuussutissamut akiliisussaanngillat, nakorsap akiuussutissalersuinissaq pisariaqartippagu.

 

Nakorsaataasiviit

§ 22. Umiarsuarnik, silaannakkut angallatinik, pisortat suliffeqarfiutaannik, ilisimasassarsiornernut imaluunniit najugaqarfinni avinngarusimasuni nakorsaatinik pilersuinermut atatillugu peqqinnissaqarfik nakorsaatinik allanillu atortussanik tuniniaasassaaq.
Imm. 2. Nakorsaataasivinnik allanillu nakorsaatinut toqqorsivinnik imm. 1-imi pineqartunik nakkutilliinermut immeeqqittarnermullu akigititassanik Peqqissutsimut Pisortaqarfik aalajangersaasuuvoq.

 

Kapitali 5
Peqqissutsimik inunnillu misissuinerit, laboratoriamit sullissinerit il.il.

§ 23. Pisortatut oqartussaasut namminersortullu suliffeqarfiutaasa atugassaannik pisortat peqqinnissaqarfianni taannaluunniit sinnerlugu peqqissutsimik misissuinernut, inunnik misissuinernut, nappaatinik paasiniaalluni laboratoriamit kiffartuussinernut sulianullu assigisaannut peqqinnissaqarfik akileeqqusisinnaavoq. Taakku suliarinerinut atasumik sulisut angalanerinut najugaqarnerinullu aningaasartuutit peqqinnissaqarfiup susassarinngilai, tamanna inatsisini allani allassimanngippat.
Imm. 2. Eqqartuussivinni atugassanik nakorsat inunnik misissuinerannut peqqinnissaqarfik aammattaaq akileeqqusisinnaavoq.
Imm. 3. Peqqinnissaqarfik imermik imerneqartartumik imermillu inuussutissanik nioqqutissiornermi atorneqartartumik laboratoriami misissuinernut aammattaaq akileeqqusisinnaavoq.
Imm. 4. Imm. 1-3 naapertorlugit sullissinernut Peqqissutsimut Pisortaqarfik akigititassanik aalajangersaasuuvoq. Toqunermut nalinginnaasumik uppernarsaasiinermut akiliutissamik akileeqqusisoqarneq ajorpoq.

§ 24. Inuunermut sillimmasiinermut, biilersinnaanermut allagartartaarnermut assigisaannullu atugassanik peqqissutsimik misissuinernut peqqinnissaqarfik neqerooruteqarpat, tamanna pillugu Peqqissutsimut Pisortaqarfik akigititassanik aalajangersaassaaq.

 

Kapitali 6
Journalinit takussutissiat

§ 25. Napparsimasut inatsisitigut inissisimanerat pillugu Inatsisartut peqqussutaanni malittarisassat naapertorlugit napparsimasut journaliinik inuit takunnissinnaatitaasut journalit assilineqarnerannut akiliummik Peqqissutsimut Pisortaqarfiup aalajangersagaanik akiliuteqassapput.

 

Kapitali 7
Sullissinernik tunisisarneq

§ 26. Peqqissutsimut Pisortaqarfimmit akigititassatut aalajangersarneqarsimasut naapertorlugit akiliisitsinikkut peqqinnissaqarfik nerisassanik makkununnga tunniussisinnaavoq:
1) Peqqinnissaqarfimmi sulisunut, suliffiup nalaani nerisaqarnissaq siunertaralugu.
2) Peqqinnissaqarfimmit ingerlanneqartuni pikkorissartitsinermi ilinniartitsisunut peqataasunullu.
3) Inunnut Namminersornerullutik Oqartussat akiligaannik angalasunut, peqqinnissaqarfimmi akeqanngitsumik nerisaqarnissaminnut pisinnaatitaaffeqanngitsunut.
4) Ilaqutaasunut peqqinnissaqarfiup akiligarinngisaanik angalasunut.

§ 27. Nammineq suliffeqarfiutini akiliisitsilluni errorsissussinissamut peqqinnissaqarfik neqerooruteqarsinnaavoq Peqqissutsimut Pisortaqarfiup akigititassatut aalajangersagaanik akiliisitsilluni.
Imm. 2. Imm. 1 naapertorlugu akiliuteqartitsilluni errrorsissussineq illoqarfinni nunaqarfinnilu assigisaanik inuussutissarsiutitut ingerlatsisoqarfiusuni pisinnaanngilaq, Namminersornerullutik Oqartussat, kommunit Naalagaaffiullu ataanni pisortat suliffeqarfiutaannut tunisinerunngippat.

 

Peqqinnissaqarfiup biiliinik ingerlassineq

§ 28. Peqqinnissaqarfik biilinik aquttulinnik attartortitsinikkut ingerlassinissamik neqerooruteqarsinnaavoq Peqqissutsimut Pisortaqarfiup akigititassatut aalajangersagai naapertorlugit akiliuteqartitsilluni, tamanna napparsimmaviup ingerlanneqarneranut akornutaanngippat.
Imm. 2. Illoqarfinni nunaqarfinnilu taamatut inuussutissarsiutitut ingerlatsisoqarfiusuni imm. 1 naapertorlugu akiliuteqartitsilluni ingerlassisoqassanngilaq, Namminersornerullutik Oqartussat ataanni pisortat suliffeqarfiutaannut tunisinerunngippat.

§ 29. Biilit taamatut atussallugit naleqquttut atorlugit toqusut timaannik utoqqaat illuiniit, plejehjemminiit assigisaanniillu ingerlassinissamut peqqinnissaqarfik neqerooruteqarsinnaavoq Peqqissutsimut Pisortaqarfiup akigititassatut aalajangersagai naapertorlugit akiliisitsilluni, tamanna napparsimmaviup ingerlanneqarneranut akornutaanngippat.
Imm. 2. Imm. 1 naapertorlugu toqusut timaannik ingerlassineq illoqarfinni nunaqarfinnilu assigisaanik inuussutissarsiutitut ingerlatsisoqarfiusuni pisinnaanngilaq.

 

Kapitali 8
Atuutilerfia

§ 30. Nalunaarut atuutilerpoq ulloq 15. marts 2006.
Imm. 2. Nalunaarutip atuutilernerata peqatigisaanik atuukkunnaarsinneqarput:
1) Peqqinnissaqarfiup sullissinerinut akiliuteqartarneq pillugu Namminersornerullutik Oqartussat nalunaarutaat nr. 7, 30. marts 1993-imeersoq.
2) Isarussanut kontaktlinsinullu tapiissuteqartarneq pillugu Peqqinnissamut Avatangiisinullu Pisortaqarfiup kaajallaasitaa nr. 5, 24. juni 1993-imeersoq.
3) Atortunut iluaqusersuutinut, kapitinnermut aammalu uppernarsaatinut nakorsiarnernilu nakorsat allattugaasa nuutsinnerinut akiliuteqartitsisarneq pillugu Peqqinnissamut Avatangiisinullu Pisortaqarfiup kaajallaasitaa nr. 6, 12. oktober 1993-imeersoq.
4) Nakorsaatit akii pillugit Peqqinnissamut Ilisimatusarnermullu Pisortaqarfiup kaajallaasitaa nr. 9, 10. september 1997-imeersoq.
5) Peqqinnissaqarfiup sulliviutaasa nerisaqartitsinerinut akigitinneqartut pillugit Peqqinnissamut Pisortaqarfiup kaajallaasitaa nr. 12, 25. april 2001-imeersoq.
6) Napparsimmaviit sapertunut immikkoortortaanut sapertunut ikiuutit isumaginninnikkullu iliuutsit pillugit nakorsaanernut tamanut Peqqinnissamut Aqutsisoqarfiup kaajallaasitaa nr. 115, 1. februar 1979-imeersoq.
7) Kalaallit Nunaanni inunnut aalajangersimasunut napparsimasunik ikiorsiisarneq pillugu Kalaallit Nunaanni Nakorsaanerup kaajallaasitaa nr. 136, 21. april 1983-imeersoq.
8) Kalaallit Nunaanni napparsimmavimmi uninnganermut kiisalu napparsimmavimmut uninnani nakorsartinneq, misissortinneq nakorsaatinillu tunniussinermi akiliutit pillugit Kalaallit Nunaanni Nakorsaanerup kaajallaasitaa nr. 23, 28. februar 1986-imeersoq.
9) Rigshospitalimut suliaritinnissamut innersuunneqarnermi angalanermi aningaasartuutit akilerneqarnissaat pillugu Kalaallit Nunaanni Peqqinnissamut Ingerlatsiviup kaajallaasitaa nr. 27, 24. marts 1988-imeersoq.
10) Peqqinnissaqarfiup errorsisarfiini errorsinermut manissaanermullu akigititat pillugit Kalaallit Nunaanni Peqqinnissamut Ingerlatsiviup kaajallaasitaa nr. 43, 31. januar 1990-imeersoq.
11) Nunanut allanut angalasunut kapitinnerit pillugit akiliuteqartarneq pillugu Kalaallit Nunaanni Peqqinnissamut Ingerlatsiviup kaajallaasitaa nr. 45, 27. november 1990-imeersoq.
12) Kalaallit Nunaanni sulinermi ajoqusernermut sillimmasiisarnermut tunngatillugu nakorsamit nalunaarutit nakorsanit suliarineqartarneri pillugit Kalaallit Nunaanni Nakorsaanerup kaajallaasitaa nr. 25, 27. juli 1990-imeersoq.

Namminersornerullutik Oqartussat, ulloq 15. februar 2006

Asii Chemnitz Narup

/

Søren Rendal