Pinngortitamik illersuineq pillugu Inatsisartut inatsisaanni nr. 29-mi, 18. december 2003-meersumi § 11, imm. 1, § 46, imm. 2 aamma, § 60, imm. 2 naapertorlugit aalajangersarneqarput:

 

§ 1. Qinnguata Qoorua, Qinngup Kujalliup, Tasersuup kiisalu tatsip sinaavaniit 50 meteri tikillugu nunataq, kuuk Kuussuaq, kiisalu Kuussuup kujammut sinaavaniit orpeqarfik Qasigeerneq ilanngullugu 50 meteri tikillugu eqqissisimatitassanngortinneqarput. Eqqissisimatitsinerup siunertaraa sumiiffimmi naasoqarnerup assissaqanngitsup, tassunga ilanngullugit avaalaqiakuluut, kiisalu sumiiffiup nunataani eriagisassat illersorneqarnissaat.
Imm. 2. Sumiiffik eqqissisimatitaq assitaliussatut ilanngussaq 1-imi titarnilersukkatut nalunaagaavoq, allorniusami avannarlerpaami 60^o N-imi, allorniusami kujallerpaami 60^o S-imi, allorniusamilu killerpaami 44^o V-mi allorniusamilu kangillerpaami 44^o Ø-mi sumiiffiligaalluni.

§ 2. Nalunaarummi matumani killiliinernik malittarinnittut kikkulluunniit sumiiffimmut eqqissisimatitamut appakaassinnaapput.

§ 3. Sumiiffimmi eqqissisimatitami orpiit orpikkallu innarlerneqarnissaat, tassunga ilanngullugit orpiiaaneq kiisalu avalequtit killornissaat peerneqarnissaallu, inerteqqutaapput.

§ 4. Savaatillit savaatitik Qinnguata Qooruanut imaluunniit Qinngeq Kujallermut appakaattut naammattooraangamikkit, savat taakkunanngaanniit piaarnerpaamik peersinneqartarnissaat isumagisassavaat.

§ 5. Sumiiffimmi eqqissisimatitami tupertornissat ikumalaartitsinissallu taamaallaat pisinnaapput sumiiffinni ammaannartuni, orpiit orpikkallu innarlerneqarsinnaanngiffiini.
Imm. 2. Sumiiffimmi eqqissisimatitami kuuit kuuillu sinaaviniit 50 meterit pallillugit tupertornissat inerteqqutaapput.

§ 6. Sumiiffimmi eqqissisimatitami illuliornissaq imaluunniit atortunik aalaakkaasunik allanik sanaartornissat inerteqqutaapput.
Imm. 2. Sumiiffimmi eqqissisimatitami assaasoqarnissaa inerteqqutaavoq.

§ 7. Sumiiffimmi eqqissisimatitami angallatinik motorilinnik cykelinillu angallannissat inerteqqutaapput, taamaattorli imm. 2 takuuk.
Imm. 2. Sumiiffinni savaatillit, qanorluunniit imm. 1-imi inerteqquteqaraluarpat, savanik katersuinermut atatillugu angallatinik motorilinnik atuisinnaapput.

§ 8. Sumiiffimmi eqqissisimatitami igitanik sunilluunniit maangaannartitsinissat, ilisarnaasersuinissat imaluunniit ilisimatusarnermi atortunik qimatsinissat inerteqqutaapput.

§ 9.

Avatangiisinut Pinngortitamullu Pisortaqarfik Nanortalimmi kommunalbestyrelsi tusarniaa vigeqqaarlugu nalunaarummi matumani aalajangersakkanit immikkut akuersissuteqarsinnaavoq.

§ 10. Nanortalimmi kommunalbestyrelsip nalunaarummi aalajangersakkat malinneqarnerat nakkutigisarissavaa.

§ 11. Paragraffini 3-miit 6-imi, § 7, imm. 1-imi aamma § 8-mi aalajangersakkanik unioqqutitsinerit akiliisitsinermik pineqaatissiissutaasinnaapput.

§ 12.

Avatangiisinut Pinngortitamullu Pisortaqarfik peqatigalugu Nanortalimmi kommunalbestyrelsi sumiiffimmik eqqissisimatitamik nakkutilliinissamut, tassunga ilanngullugu nakkutilliinissamut iliuutsit qanoq ittut aallartinneqarnissaannut, pilersaarusiussaaq.

§ 13. Nalunaarut atuutilerpoq ulloq 1. juni 2005.
Imm. 2. Peqatigitillugu ukua atuukkunnaarsinneqarput:
1) Nanortallup Kommuniani "Qinngua"-ni orpippassuit naasullu atajuartinnissaannik 13. september 1962-imi Landsrådip ileqqoreqqusaliaa, 6. maj 1963-imi atuutilersinneqartoq.
2) Nanortallup Kommuniani Kuussuup eqqaata illersorneqarnissaa pillugu ileqqoreqqusaq 17. februar 1964-imeersoq, 16. maj 1964-imi atuutilersinneqartoq, kiisalu Nanortallup Kommuniani Kuussuup eqqaata illersorneqarnissaa pillugu ileqqoreqqusap allanngortinneqarnissaa pillugu ileqqoreqqusaq 21. marts 1980-imeersoq.
3) Nunap Nanortallup Kommunianiittup Kuussuup avannaani kangianiittup orpinnik naatitsiniartarfittut immikkoortitaanissaa pillugu Landsrådip ileqqoreqqusaa 30. september 1965-imeersoq, 25. april 1966-imi atuutilersinneqartoq.

Namminersornerullutik Oqartussat, ulloq 19. april 2005

Jens Napãtôk

/

Alfred ER Jakobsen

---

Ilanngussaq (pdf-format)