Atuarfik pillugu Inatsisartut peqqussutaanni nr. 8-mi, 21. maj 2002-meersumi § 40, imm. 1, nr. 1, immikkoortoq kingulleq, atuarfik pillugu inatsisartut peqqussutaata allanngortinnissaa pillugu Inatsisartut peqqussutaanni nr. 8-mi, 15. april 2003-meersumi allanngortinneqartoq naapertorlugu aalajangerneqarput:

 

Kapitali 1
Qinersinermut piffissaliussaq

§ 1. Kommunalbestyrelsip isumagissavaa kommunimi atuarfinni tamani, ukiumi kommunalbestyrelsimut qinersiviusumi kingusinnerpaamik 1. november, atuarfiit siulersuisuini angajoqqaat ilaasortaatitassaannik sinniisussaannillu qinersisoqarsimassasoq, kiisalu atuarfiup siulersuisui nutaat ukiumi qinersiviusumi kingusinnerpaamik 8. november ivertitereersimassasut.
Imm. 2. Atuarfiup siulersuisuini angajoqqaat ilaasortaatitassaannik sinniisussaannillu nikerartumik qinersisoqarnissaa pillugu kommunalbestyrelsip aalajangiinera, tak. Atuarfik pillugu Inatsisartut peqqussutaanni (Atuarfik pillugu peqqussut), § 40, imm. 10, kingusinnerpaamik 31. juli ukiumi siullermik nikerartumik qinersiffiusumi pissaaq. Nikerartumik qinersineq ingerlanneqassaaq imm. 1-imi qinersinerup taaneqartup kingorna ukiut aappassaanni. Angajoqqaat ilaasortaatitassaannik sinniisussaannillu qinersisoqarnissaanut kiisalu atuarfiup siulersuisuisa ivertitereersimanissaannut piffissaliussat pillugit imm. 1-imi aalajangersakkat aamma nikerartumik qinersisoqarnerani atuutissapput.
Imm. 3. Nikerartumik qinersisoqartarnissaa pillugu siusinnerusukkut aalajangiisimaneq kommunalbestyrelsimit atorunnaarsinneqarsinnaavoq. Nikerartumik qinersisoqarnissaa pillugu siusinnerusukkut aalajangiisimanerup atorunnaarsinneqarnissaa pillugu aalajangiineq ukiumi kommunalbestyrelsimut qinersiviusumi kingusinnerpaamik 31. juli pissaaq.
Imm. 4. Atuarfimmi atuarfiup siulersuisuini angajoqqaat ilaasortaatitaasa pingasuinnaanissaat pillugu kommunalbestyrelsip aalajangiinera, tak. Atuarfik pillugu peqqussummi § 40, imm. 2, ukiumi qinersiviusumi kingusinnerpaamik 31. juli pissaaq, tak. imm. 1 aamma 2.

§ 2. Nikerartumik qinersisarnerit ingerlanneqarpata, tak. § 1, imm. 2, § 1, imm. 1-imi taaneqartutut qinersinermi angajoqqaat ilaasortaatitassaat pingasut sinniisussallu pingasut qinerneqassapput, taavalu § 1, imm. 2-mi taaneqartutut qinersinermi angajoqqaat ilaasortaatitassaat marluk sinniisussallu marluk qinerneqassallutik, taamaattorli tak. imm. 2.
Imm. 2. Atuarfiit siulersuisuinik angajoqqaat ilaasortaatitaannik pingasunik ilaasortalinnik, tak. § 1, imm. 4, nikerartumik qinersisarnerit ingerlanneqarpata, tak. § 1 imm. 2, § 1, imm. 1-imi taaneqartutut qinersinermi angajoqqaat ilaasortaatitassaat marluk sinniisussallu marluk qinerneqassapput, taavalu § 1, imm. 2-mi taaneqartutut qinersinermi angajoqqaat ilaasortaatitassaat ataaseq sinniisussarlu ataaseq qinerneqassallutik.

§ 3. Angajoqqaat ilaasortaatitaannut sinniisussaannullu piffissaq qinigaaffik ukiunik sisamanik sivisussuseqarpoq, tak. Atuarfik pillugu peqqussummi § 40, imm. 8, ukiumi qinersiffiusumi ulloq 8. november aallartilluni, taamaattorli tak. imm. 2 aamma kapitali 10.
Imm. 2. § 1, imm. 2, naapertorlugu nikerartumik qinersineq siullermik ingerlanneqarpat, angajoqqaat ilaasortaatitaannut marlunnut sinniisussanullu marlunnut, tak. § 2, imm. 1, imaluunniit angajoqqaat ilaasortaatitaannut ataatsimut sinniisussamullu ataatsimut, tak. § 2, imm. 2, piffissaq qinigaaffiusoq ukiunik marlunnik sivikillineqassaaq.
Imm. 3. Imm. 2 naapertorlugu qinersineq ingerlanneqarpat, angajoqqaat ilaasortaatitaasa sinniisussallu tunuartussaasut kikkuunissaat atuarfiup siulersuisuisa kommunalbestyrelsimut inassutigissavaat. Tamanna pillugu angajoqqaat ilaasortaatitaat sinniisussallu isumaqatigiissinnaanngippata, atuarfiup pisortaata makitsisitsineratigut tamanna aalajangerneqassaaq.
Imm. 4. Nikerartumik qinersinerit ingerlanneqartarnissaat pillugu siusinnerusukkut aalajangiinerup § 1, imm. 3 naapertorlugu atorunnaarsinnissaanik kommunalbestyrelsi aalajangiissappat, angajoqqaat ilaasortaatitaannut marlunnut aammalu sinniisussanut marlunnut, tak. § 2, imm. 1, imaluunniit angajoqqaat ilaasortaatitanut ataatsimut sinniisussamullu ataatsimut piffissaq qinersiviusoq ukiunik marlunnik sivikillineqassaaq.

§ 4. Ukiumi qinersiviusumi kingusinnerpaamik 31. juli, atuarfiup siulersuisuini angajoqqaat ilaasortaatitassaannik sinniisussaannillu qinersinissap piareersarnissaata ingerlanneqarnissaatalu piffissalersorlugu pilersaarusiornera kommunalbestyrelsip aalajangissavaa, tamatumunnga ilaallutik:
1) Ilisimatitsinermik qinigassanngortitsinermilu ataatsimiinnissamut piffissaq, tak. § 11, imm. 1.
2) Qinersinermi qinigassanngortittussatut siunnersuutit kingusinnerpaamik saqqummiunnissaannut piffissaq, tak. § 13, imm. 1.
3) Qinigassanngortinnermik tunuartitsinerup nalunaarutiginissaanut piffissaliussaq kingullerpaaq, tak. § 13, imm. 5.
4) Taasinermut piffissaliussaq sumiiffissarlu, tak. §§ 15, 19, imm. 1, aamma § 21, imm. 4, appassaanik qinigassanngortitsilluni ataatsimiisitsinissaq pisariaqassappat, taasinissamut piffissaliussamik allamik aalajangiineq ilanngullugu, tak. § 14, imm. 2.
Imm. 2. Piffissaliussanik pilersaarutip taasisoqarnissallu sumiinnissaata aalajangiunneqareernerata kingorna sapinngisamik piaarnerpaamik kommunalbestyrelsip taakku atuarfinni, sumiiffinni allani taasisoqarfissaasinnaasuni aamma illoqarfimmi nunaqarfimmiluunniit nalinginnaasumik allagarsiiviusartuni tamanut allagarsiinermigut nalunaarutigissavai, kiisalu qinersisinnaasut allassimaffiannut § 10, imm. 1-imi, taaneqartumut piffissami tassani pineqartumi ilanngunneqarsimasunut allakkerivikkoortillugit allagaqarnermigut nalunaarutigissallugit.

 

Kapitali 2
Qinersinerup piareersarnissaanut ingerlannissaanullu akisussaaffik

§ 5. Atuarfinni tamani qinersinermut siulersuisussanik pingasunik ilaasortaqartussanik kommunalbestyrelsi toqqaassaaq kingusinnerpaamik ukiumi qinersiviusumi 31. juli. Qinersinermut siulersuisut inuttarissavaat kommunalbestyrelsimit ilaasortaasoq ataaseq imaluunniit inuk kommunalbestyrelsimit toqqagaasoq ataaseq siulittaasutut, atuarfiup siulersuisuisa tunuartut siulittaasorisimasaat aamma atuarfiup pisortaa.
Imm. 2. Qinersinermut siulersuisut kommunalbestyrelsimut akisussaallutik atuarfimmi pineqartumi atuarfiup siulersuisuini angajoqqaat ilaasortaatitassaannik sinniisussaannillu qinersinissap piareersarnissaa qinersinerullu ingerlanneqarnera isumagissavaat.
Imm. 3. Taasinerup ingerlanerani atuarfiup pisortaa taasinermut pisortaassaaq.

§ 6. Atuarfiup ilinniartitsisuisa pisussaaffigaat siulersuisunut qinersinermut qinersinerup piareersarneqarnerani ingerlanneqarneranilu ikiuunnissartik.

 

Kapitali 3
Qinersisinnaassuseq qinigaasinnaassuserlu

§ 7. Inuit meeqqamut atuarfimmi allatsissimasumut angajoqqaatut oqartussaassuseqartut atuarfiup siulersuisuinut qinersisinnaapput, taamaattorli tak. imm. 2.
Imm. 2. Meeraq atuarfimmi allatsissimasoq kommunalbestyrelsimit namminerluunniit aaqqissuussamik ilaqutariinni inissinneqarsimappat, inuit qinersinissaq kingusinnerpaamik ukioq ataaseq sioqqullugu paarsinissamik akuerisaasut meeqqamillu suli najugaqartitsisut qinersisinnaassuseq atorsinnaavaat tamanna pillugu atuarfiup pisortaanut kissaatertik saqqummiussimagunikku. Siuliani eqqaaneqartutut pisoqartillugu ilutigisaanik inuit meeqqamut angajoqqaatut oqartussaassuseqartut qinersinermi peqataasinnaanngillat.
Imm. 3. Meeraq immikkut atuarfimmi atuartinneqarallarpat, inuit imm. 1-2-mi taaneqartut atuarfimmi immikkut atuarfimmut innersuussiffiusumi qinersinermi peqataassapput.

§ 8. Inuit makku atuarfiup siulersuisuinut qinigaasinnaapput:
1) Inuit § 7-imi taaneqartut.
2) Inuit nammineersinnaassusillit inunnit § 7-imi taaneqartunit ataatsimit arlalinnilluunniit qinigassanngortinneqartut.

§ 9. Inuit atuarfimmi atuartitsisutut pisortatulluunniit suliffeqartut atuarfiup siulersuisuini angajoqqaat ilaasortaatitaattut sinniisussaattullu qinerneqarsinnaanngillat, tak. Atuarfik pillugu peqqussummi § 40, imm. 8, imm. 3.

 

Kapitali 4
Qinersisinnaasut allattorsimaffiat

§ 10. Atuarfiup pisortaata isumagissavaa inuit qinersisinnaasut allattorneqarnissaat, tak. § 7. Allattuineq suliarineqassaaq, atuarfimmi atuartut allattorsimaffiat, kiisalu § 7, imm. 2 naapertorlugu qinersisinnaasut allattorsimaffiannut ilanngunneqarnissamik kissaatigisaajunnartut tunngavigalugit.
Imm. 2. Qinersisinnaasut allattorsimaffiannut ilaassapput qinersisussat aqqi najugaallu pillugit paasissutissat kiisalu krydsiliiffissat.
Imm. 3. Qinersisinnaasut allassimaffiat misissorneqarsinnaanngorlugu atuarfimmi saqqumitinneqassaaq ukiumi qinersiviusumi piffissami 1. – 14. september.
Imm. 4. Qinersisinnaasut allattorsimaffianni ilanngunneqarnissamik imaluunniit allassimaffimmi allassimasut allanngortinneqarnissaannik kissaatigisaasinnaasut atuarfiup pisortaanut nalunaarutigineqassapput kingusinnerpaamik ullormi allassimaffiup misissorneqarsinnaaffiani kingullermi nal. 16.
Imm. 5. Qinersinermut siulersuisut ullup misissuisinnaaffiusup kingulliup kinguninngua kingusinnerpaamillu maalaaruteqarsinnaanermut periarfissaq, tak. imm. 7, ullunik marlunnik sioqqullugu aalajangissavaat, qinersisinnaasut allattorsimaffianni ilanngunneqarnissamik imaluunniit allattorsimaffimmi allassimasut allanngortinneqarnissaannik piffissaq eqqorlugu qinnuteqaataasimasut akuerineqarsinnaanersut. Qinnuteqarneq itigartitsissutigineqarpat, qinersinermi siulersuisut qinnuteqartumut erniinnaq tamanna pillugu allakkatigut nalunaaruteqassapput.
Imm. 6. Qinersinermut siulersuisut piumasarisinnaavaat inuup qinersisinnaasut allattorsimaffiannut ilanngunneqarnissaminik kissaateqartup meeqqamut atuarfimmi allatsissimasumut, tak. § 7, imm. 1, imaluunniit meeqqamut immikkut atuarfimmi atuartinneqarallartumut, tak. § 7, imm. 3, angajoqqaatut oqartussaassuseqartuunerata, imaluunniit paarsinissamik akuersissuteqartuunerata, tak. § 7, imm. 2, naleqquttumik uppernarsaaserneqarnissaa.
Imm. 7. Qinersinermut siulersuisut qinersisinnaasut allattorsimaffiat pillugu aalajangiineri kommunalbestyrelsimut maalaarutigineqarsinnaapput. Maalaaruteqarneq allakkatigut pissaaq, kommunalbestyrelsimiillu tiguneqareersimassalluni kingusinnerpaamik misissuisinnaanerup ulluanit kingullermit ullut sisamat qaangiunneranni. Kommunalbestyrelsi aalajangeereersimassaaq kingusinnerpaamik misissuisinnaanerup ulluanit kingullermit ullut arfineq-marluk qaangiunneranni. Kommunalbestyrelsip aalajangiinera aqutsinermik oqartussaasunut allanut maalaarutigineqarsinnaanngilaq.
Imm. 8. Kommunalbestyrelsip maalaarutaasimasinnaasut aalajangiiffigereerniariaraalu atuarfiup pisortaata qinersisinnaasut allattorsimaffiat inaarutaasoq suliarissavaa.

 

Kapitali 5
Ilisimatitsilluni qinigassanngortitsillunilu ataatsimiinnerit

§ 11. Qinersinermut siulersuisut inuit qinersisinnaasut allattorsimaffianni allanneqarsimasut, tak. § 10, imm. 8, allakkatigut ataatsimiigiaqqussavaat, tassanilu atuarfiup siulersuisuisa suliarisaat akisussaaffiilu ilisimatitsissutigineqassapput, taavalu maleruagassat qinersinermut atuuttut, qinigassanngortittunut, taasinermut, taasisssutinik kisitsinermut, taasissutit naatsorsornerinut aammalu maalaaruteqarsinnaanermut periarfissanut maleruagassat ilanngullugit nassuiaatigineqassallutik.
Imm. 2. § 8, nr. 2 naapertorlugu qinigassanngortitsinissaq siunertaralugu qinersinermut siulersuisut aammattaaq tamanut ammasumik allagarsiinikkut assigisaatigulluunniit inuit inersimasut soqutiginnittut allat ataatsimiigiaqqusinnaavaat.
Imm. 3. Ataatsimiigiaqqusineq minnerpaamik sapaatip-akunnerinik marlunnik siumoortumik nalunaaruteqarluni pissaaq. Ataatsimiinneq aatsaat pisinnaavoq, qinersisinnaasut allattorsimaffiat inaarutaasoq naammassippat. Ataatsimiinneq ukiumi qinersiviusumi kingusinnerpaamik 25. september ingerlanneqareersimassaaq.
Imm. 4. Ataatsimiinnermi peqataasut qinersisinnaasut allattorsimaffiata inaarutaasup misissornissaanut periarfissaqassapput.
Imm. 5. Ilisimatitsereernerup kingorna qinigassanngortitsilluni ataatsimiisitsisoqassaaq.

§ 12. Qinigassanngortitsiniarluni ataatsimiinnermi peqataasut arlaat, qinersisinnaasut allattorsimaffianni allatsissimasoq, qinersinermi qinigassanngortinnissaminik kissaateqarpat, pineqartup tamanna allakkatigut siunnersuutigissavaa atini, najukkani kiisalu qinigassanngortinnini uppernarsarlugu atsiornini ilanngullugit.
Imm. 2. Qinigassanngortitsiniarluni ataatsimiinnermi peqataasut arlaat, qinersisinnaasut allattorsimaffianni allatsissimasoq, inummik allamik, qinersisinnaasut allattorsimaffianni allatsissimasumik, § 8, nr. 2 naapertorlugu qinigaasinnaasumik, qinersinermi qinigassanngortitsiniarluni siunnersuuteqarnissamik kissaateqaruni, tamanna allakkatigut saqqummiutissavaa, qinigassanngortittup aqqa najugaalu allallugit kiisalu siunnersuuteqartutut atini, najukkani atsiorninilu ilanngullugit. Periarfissaqarpat siunnersuut qinigassanngortittutut siunnersuutigineqartup nammineerluni atsiorneranik uppernarsaaserneqassaaq.
Imm. 3. Qinersinermut siulersuisut ataatsimiinnermi qinigassanngortitsiffiusumi qinigassanngortittussatut siunnersuutigineqartut tunngavigalugit qinigassanngortittut allassimaffigigallagaat suliarissavaat, ataatsimeeqataasunullu nalunaarutigalugu.

 

Kapitali 6
Qinigassanngortittut allattorsimaffiat

§ 13. Qinigassanngortitsilluni ataatsimiinnermi qinigassatut siunnersuutigineqartut, tak. §§ 11 aamma 12, saniatigut siunnersuutigineqartut, inunnit qinersisinnaasut allattorsimaffianni allatsissimasunit, allaganngorlugit qinersinermut siulersuisunut tunniunneqassapput, paasissutissat § 12, imm. 1 aamma 2-mi oqaatigineqartut allallugit, kingusinnerpaamik qinigassanngortitsilluni ataatsimiinnerup kingorna ullut tallimaanni nal. 16.
Imm. 2. Siunnersuutigineqartutut tiguneqartut qinigassanngortittut allattorsimaffigigallagaannut qinersinermut siulersuisut suliarisaannut, tak. § 12, imm. 3, normulersorlugit allattorneqassapput, qinigassanngortittut aqqi sumilu najugaqarneri ilanngullugit.
Imm. 3. Qinigassanngortittussatut siunnersuutigineqartup qinigassanngortissimanini siunnersuutikkut atsiorluni uppernarsarsimanngippagu, qinersinermut siulersuisut sapinngisamik piaartumik kingusinnerpaamillu qinigassanngortitsilluni ataatsimiinnerup kingorna ullut arfinillit qaangiunneranni siunnersuutigineqartoq taamaalioqqullugu allakkatigut qinnuigissavaat. Atsiorluni uppernarsaaneq qinigassanngortitsilluni ataatsimiinnerup kingornatigut kingusinnerpaamik ullut 14-nit qaangiunneranni tiguneqarsimanngippat, qinigassanngortinneq atorunnaartutut isigineqassaaq, tamatumalu kinguninnguatigut qinersinermut siulersuisut tamanna qinigassatut siunnersuutigineqartumut siunnersuuteqartumullu allakkatigut nalunaarutigissavaat.
Imm. 4. Qinersinermut siulersuisut misissussavaat qinigassatut siunnersuutigineqartut qinigaasinnaasutut akuerineqarsinnaanersut, tak. § 8. Tamanna pillugu aalajangiisoqassaaq kingusinnerpaamik qinigassanngortitsilluni ataatsimiinnermit ullut 14-it qaangiunneranni. Qinigassatut siunnersuutigineqartoq qinigaasinnaasutut akuerineqarsinnaanngippat, qinersinermi siulersuisut tamanna erniinnaq siunnersuutigineqartumut siunnersuuteqartumullu allakkatigut nalunaarutigissavaat.
Imm. 5. Qinigassatut siunnersuutigineqartup tamatuma kingorna qinigassatut tunuarnissani kissaatigiguniuk, tamanna qinersinermi siulersuisunut allakkatigut nalunaarutigissavaa, qinigassanngortitsilluni ataatsimiinnerup kingorna ullut 14-it qaangiutsinnagit.

§ 14. Qinigassatut siunnersuutigineqarnerup tunuartinnissaanut piffissaliussaq, tak. § 13, imm. 5, qaangiunniariarpat qinersinermut siulersuisut qinigassanngortittut allattorsimaffiat inaarutaasoq suliarissavaat qinigassat normulersorlugit tulleriiaarlugit, aqqi sumilu najugaqarneri nalunaarlugit.
Imm. 2. Qinigassatut siunnersuutigineqartut, angajoqqaat ilaasortaatitassaasa atuarfiup siulersuisuinut qinigaasussat ikinnerpaamik marloriaataannik amerlassuseqanngippata, qinersinermi siulersuisut qinersisinnaasut allattorsimaffianni allassimasunik qinigassanngortitsilluni ataatsimiisitsinerit aappaassaannut ataatsimiigiaqqusissapput, qinigassatut siunnersuutinik uppernarsaatilinnik amerlanerusunik saqqummiussisoqarnissaa siunertaralugu. Ataatsimiigiaqqusineq minnerpaamik ullunik pingasunik sioqqutsilluni nalunaaruteqareernikkut pissaaq, qinigassanngortitsillunilu ataatsimiinnerup siulliup kingornagut sapaatip-akunneri pingasut qaangiutsinnagit ingerlanneqassalluni, tak. §§ 11 aamma 12.
Imm. 3. § 8, nr. 2, naapertorlugu qinigassanngortitsinissaq siunertaralugu qinersinermut siulersuisut aamma tamanut ammasumik allagarsiinikkut assigisaatigulluunniit inunnik nammineersinnaassusilinnik allanik soqutiginnittunik qinigassanngortitsilluni ataatsimiisitsinerit aappassaannut ataatsimiigiaqqusisinnaapput.
Imm. 4. Qinigassanngortitsilluni ataatsimiinnerit aappaanni qinigassaatut siunnersuutigineqartunik uppernarsaatilinnik nutaanik saqqummiussisoqarpat, qinersinermut siulersuisut pineqartut qinigaasinnaanerat ataatsimiinnermi misissussavaat, tak. § 8. Qinigassatut siunnersuutigineqartut nutaat qinigaasinnaasutut akuerineqarsinnaasut, qinigassanngortittut allattorsimaffiannut inaarutaasumut erniinnaq ilanngunneqassapput. Qinigassatut siunnersuutigineqartoq qinigaasinnaasutut akuerineqanngippat, tamanna qinersinermut siulersuisut erniinnaq pineqartumut siunnersuuteqartumullu allakkatigut nalunaarutigissavaat.
Imm. 5. Qinigassanngortitsilluni ataatsimiinnerit aappaata kingorna qinigassatut siunnersuutigineqartut uppernarsaatillit aammalu qinersinermut siulersuisunit akuerineqartut angajoqqaat ilaasortaatitassaannit atuarfiup siulersuisuinut qinigaasussanit amerlanerunngippata qinigassanngortittut qinigaasutut isigineqassapput.Tamatuma kingorna angajoqqaat ilaasortaatitassaat amigaataasinnaasut sinniisussallu kommunalbestyrelsip toqqassavai, tak. imm. 7.
Imm. 6. Qinigassanngortitsilluni ataatsimiinnerit aappaata kingorna qinigassatut siunnersuutigineqartut uppernarsaatillit aammalu qinersinermut siulersuisunit akuerineqartut, angajoqqaat ilaasortaatitassaannit atuarfiup siulersuisuinut qinigaasussanit amerlaneruppata, marloriaataannilli ikinnerullutik, qinigassanngortittut akornanni qinersisoqassaaq kapitali 7-mi maleruagassat naapertorlugit, qinersinermilu kisitsisoqassalluni kapitali 8-mi malittarisassat naapertorlugit. Tamatuma kingorna sinniisussat amigaataasut kommunalbestyrelsip toqqassavai, tak. imm. 7.
Imm. 7. Angajoqqaat ilaasortaatitassaannik taakkuluunniit sinniisussaannik kommunalbestyrelsi toqqaappat, toqqarneqartup toqqarneqarnerminut atatillugu tamatuminnga akuersinini kommunalbestyrelsimut nalunaarutigissavaa. Toqqarneqartoq kommunalbestyrelsimut ilaasortaassanngilaq.

 

Kapitali 7
Taasineq

Nammineerluni takkulluni taasineq

§ 15. Qinigassanngortittut allattorsimaffiat inaarutaasoq qinersinermut siulersuisunit suliarineqartoq tunngavigalugu §§ 16 – 22-mi maleruagassat malillugit taasisoqareersimassaaq kingusinnerpaamik ukiumi qinersiviusumi 31. oktober.
Imm. 2. Qinigassanngortitsilluni ataatsimiinnerup kingorna sapaatip-akunnerinik sisamanik siusinnerusumik taasineq ingerlanneqassanngilaq, tak. §§ 11 aamma 12.

§ 16. Taasisinnaaneq ammatinneqassaaq nal. 14-20 iluani.

§ 17. Qinersinermut siulersuisut isumagissavaat qinigassanngortittut allassimaffiata inaarutaasup kikkunnilluunniit misissorneqarsinnaalluni qinersivimmiitinneqarnissaa, aammalu taasinermi atugassanik pappiaqqanik taasivissaqarnissaa.
Imm. 2. Taasivissani allassimassapput qinigassatut siunnersuutigineqartut akuerisaasut tamarmik qinigassanngortittut allattorsimaffiat malillugu normulerlugit aaqqissuullugit. Qinigassanngortittut tamarmik nalaasigut krydsiliiffissaqassaaq.

§ 18. Qinersineq pissaaq nammineerluni taasiartorluni takkunnikkut, taamaattorli tak. §§ 19-22.
Imm. 2. Qinersisussap kinaanermut uppernarsaataa takujumaneqarsinnaavoq taasivissaq tunniutsinnagu. Qinersinermut siulersuisut isumagissavaat taasivissap tunniunneqarnerata nalunaarsorneqarnissaa qinersisussap aqqata qinersisinnaasut allassimaffianniittup nalaatigut krydsiliinikkut.
Imm. 3. Taasineq pissaaq qinersisup taasivissami qinigassanngortittup taajumasap nalaatigut krydsiliineratigut. Ataasiinnarmik krydsiliisoqassaaq.
Imm. 4. Taasineq isertortuussaaq. Taasineq matuneqassanngilaq taasisussanik taasinissamut suli periarfissaqarsimanngitsunik najuuttoqartillugu.

 

Allakkatigut taasineq il.il.

§ 19. Qinersisussat taasinissamut periarfissaasup iluani taasivimmut anngussinnaanngitsut imaluunniit taasivimmukassallutik ajornartorsiuteqartut, atuarfiup pisortaanut taasiartorsinnaatitaassapput ulloq taasivissaq sioqqullugu minnerpaamik ulluinnaat arfinillit ingerlaneranni imaluunniit allakkatigut taasisinnaallutik §§ 20-22-mi maleruagassat malillugit. Nalinginnaasumik suliffiup kingorna taasinissamut ataatsimik arlalinnilluunniit periarfissaqartitsisoqassaaq.
Imm. 2. Taasinissamut tunniunneqassaaq taasivissaq allakkat puussaat ilanngullugu. Qinersisussap kinaanermut uppernarsaataa takujumaneqarsinnaavoq. Taasivissat nalinginnaasut suli pissarsiarineqarsimanngippata, taasivissaq immikkut ittoq atorneqassaaq, tassungalu qinersisussap nammineq allassavai qinigassanngortittup taajumasami aqqa, najugaa normualu.
Imm. 3. Atuarfiup pisortaata qinersisinnaasut allattorsimaffiannut qinersisup taasinera nalunaassavaa, taasinerullu ullua allallugu. Ilutigalugu qinersisup tamatumunnga uppernarsaat atsiussavaa.
Imm. 4. Taasivik allakkat puuanniitillugu toqqorneqassaaq, taasinerup naammassinissaata tungaanut. Tamatuma kingorna taasivik kisitsinermut ilanngunneqassaaq.

§ 20. Taasisussap pissutissat § 19, imm. 1-imi taaneqartut innersuussutigalugit allakkatigut taasinissani kissaatigissappagu, taasisussap kingusinnerpaamik qinigassanngortittut allattorsimaffiata inaarutaasup saqqummiunneqarnerata aqaguani, tamanna qinersinermut siulersuisunut allakkatigut nalunaarutigissavaa.
Imm. 2. Qinersinermut siulersuisut isumagissavaat allakkatigut taasinermi pisariaqartinneqartunik atortussaqarnissaa, tak. § 21, imm. 1.

§ 21. Allakkatigut taasinissamik qinnuteqaat piffissaq eqqorlugu nassiunneqarsimappat, qinersinermi siulersuisut qinigassanngortittut allattorsimaffiata inaarutaasup suliarineqarnerata kingornagut kingusinnerpaamik ullut pingasut qaangiunneranni, tak. § 14, imm. 1, aamma § 14, imm. 4, allakkatigut taasiumasumut nassiutissavaat qinigassanngortittut allattorsimaffiat inaarutaasoq ilanngullugit taasivissaq, allakkat puussaat, allagaq ilanngussaq taakkununngalu puuliussaq. Nalinginnaasumik taasivissat suli pissarsiarineqarsimanngippata, taasivissaq immikkut ittoq nassiunneqassaaq tassungalu qinersisussap nammineq allassavai qinigassanngortittup taajumasami aqqa, najugaa normualu.
Imm. 2. Qinersisussap allanit najorneqarnani taasivissaq krydsiliiffigissavaa qinigassanngortittup taajumasami aqqata nalaatigut, imaluunniit taasivissami immikkut ittumi, tak. imm. 1, allallugit qinigassanngortittup taajumasami aqqa, najugaa normualu.
Imm. 3. Qinersisussap taasivissaq taasiffigereeriarpagu, allagaq ilanngussaq immersorneqassaaq makkuninnga imaqartussaq:
1) Qinersisartup nammineq piumassutsiminik allanillu najorneqarnani taasivissamik immersuisimaneranik, allakkap puuanut ikisisimaneranik matusisimaneranillu uppernarsaat. Qinersisartup allakkamik ilanngussamik atsiornera pissaaq isiginnittumik najuuttoqartillugu, tak. nr. 2, allakkamilu ilanngussami allassimassapput ulloq atsiorfiusoq kiisalu qinersisup aqqa najugaalu.
2) Uppernarsaat inuup nammineersinnaassusillip allap atsiugaa isiginnissimasutut uppernarsarlugu, qinersisartup atsiornerata ilumoortuunera aamma piffissami sumiiffimmilu qinersisartup taasimasaani allanneqarsimanera, kiisalu taasinerup allanik najuuttoqartinnagu pisimanera. Uppernarsaat uppernarsaasumit namminermit atsiorneqassaaq, ateq najugarlu nalunaarlugit.
Imm. 4. Allakkat puua taasivimmik imalik aamma allakkat ilanngussat puuliussamut tamatumunnga atugassamut ikineqassapput, taannalu matuneqassaaq qinersinermullu siulersuisunut qaatiguuliorneqassalluni. Puuliussap tunuatigut erseqqissumik allanneqassapput qinersisup aqqa najugaalu. Puuliussaq qinersinermut siulersuisunut nassiunneqassaaq ima kingusinaanngitsigisumik, qinersinermut siulersuisunit tiguneqareersimassalluni taasineq naammassitinnagu.

§ 22. Taasinerup naammassineqarnerata kingorna erniinnaq qinersinermut siulersuisunit puuliussat tiguneqartut ammarneqassapput, taakkualu misissussavaat allakkatigut taasinerit ilanngullugit naatsorsuutigineqarsinnaanersut.
Imm. 2. Allakkatigut taasineq ilanngullugu naatsorsuutigineqarsinnaappat, qinersisup aqqata qinersisinnaasut allassimaffianniittup nalaatigut krydsiliisoqassaaq, kingornatigullu allakkap puua qinersissummik imalik ammarneqarani taasinermi ikioraavimmut ikineqassalluni.
Imm. 3. Paasineqarpat puuliussaq inummit qinersisinnaasut allattorsimaffianni allassimanngitsumit imaluunniit toqusimasumit pisoq, allakkatigut taasineq naatsorsuutigineqassanngilaq. Aamma tamanna atuutissaaq puuliussaq allanik imaluunniit allakkanik ilanngussanik ataasiinnaanngitsumik allakkalluunniit puuannik ataasiinnaanngitsumik imaqarpat, paasineqarpat taasinermi atorneqarsimasut tassaanngitsut qinersinermut siulersunit nassiunneqartut originaliusut, imaluunniit immersorneqarneri, uppernarsarneqarneri atsiorneqarneriluunniit peqqussutigineqartutut pisimanngitsut, tak. § 21.
Imm. 4. Puuliussat taasineq naammassereersoq aatsaat tiguneqartut ilanngullugit naatsorsuutigineqarsinnaanngillat.
Imm. 5. Allakkatigut taasissutit qinersisunit ullormi qinersiviusumi taasisimasunit pisut ilanngullugit naatsorsuutigineqarsinnaanngillat.

 

Kapitali 8
Qinersinerup naatsorneqarnera

§ 23. Taasineq naammassippat erniinnaq taasinerit kisinneqassapput. Kisitsineq tamanut ammavoq. Kisitsisuussaapput qinersinermut siulersuisut inuit, qinersisinnaasut allattorsimaffianni allassimasut ikinnerpaamik marluk, najuuttoralugit.

§ 24. Kisitsinermi taasinerit atuuttuusinnaasut kisiisa ilanngunneqassapput, tak. imm. 2 aamma 3.
Imm. 2. Taasivik inimi taasivimmi imaluunniit atuarfiup pisortaanut § 19 naapertorlugu tunniunneqartoq atuutissanngilaq:
1) Taasivissaq allaffigineqarsimanngippat.
2) Qularnaatsumik ersinngippat, qinigassanngortittut arlaat kina qinersisup taaniarsimaneraa.
3) Pissutissaqarsorinarpat, taasivik tassaanngitsoq originaliusoq atuarfiullu pisortaanit imaluunniit qinersinermut siulersuisunit tunniunneqartoq.
Imm. 3. Taasivik allakkatigut nassiunneqartoq atuutissanngilaq:
1) Taasivissaq allaffigineqarsimanngippat.
2) Qularnaatsumik ersinngippat, qinigassanngortittut arlaat kina qinersisup taaniarsimaneraa.
3) Allakkat puuat allamik imaluunniit taasivinnik arlalinnik imaqarpat.
4) Pissutissaqarsorinarpat, taasivik tassaanngitsoq originaliusoq atuarfiullu pisortaanit imaluunniit qinersinermut siulersuisunit tunniunneqartoq.
5) Taasivissap immersorneqarnerani periusissatut najoqqutassiunneqartoq atorneqanngippat.

§ 25. Taasissutinik kisitsinerup naammassineqarnerata kingorna erniinnaq taasissutit kingumut kisinneqassapput. Marloriarluni kisitsinerit assigiimmik inerneqarpata aatsaat, taasinermut pisortaasup taasinerit inerneri inaarutaasumik naatsorsussavai.

§ 26. Atuarfiup siulersuisuini angajoqqaat ilaasortaatitassaattut qinigassaasutut amerlassusillit qinigaasutut nalunaarutigineqassapput taaneqarnermik amerlassusii tunngavigalugit tulleriinneqarlutik.
Imm. 2. Sinniisussatut qinigaasussat amerlaqataannik, qinigassanngortittut angajoqqaat ilaasortaatitassaattut qinerneqanngitsoortut, tak. imm. 1, taaneqarnermik amerlassusii tunngavigalugit tulleriinneqarlutik sinniisussatut qinigaasutut nalunaarutigineqassapput.
Imm. 3. Qinigassanngortittut marluk amerlanerilluunniit amerlaqatigiinnit taaneqarsimappata, tulleriinneqarnissaat, pisariaqartitsineq naapertorlugu, taasisitsinermi pisortaasup makitsineratigut aalajangerneqassaaq.
Imm. 4. Angajoqqaat ilaasortaatitassaannik sinniisussanillu qinigaasussatut amerlatigisunik taasisoqarsimanngippat, angajoqqaat ilaasortaatitassaat sinniisussallu amigaataasut toqqarneqassapput qinigassanngortittut taaneqarsimanngitsut akornanni makitsinikkut.

§ 27. Taasinermi pisortaasup qinersineq pillugu allattuiffimmi allassavai qinigassanngortittut ataasiakkaat qanoq taaneqartigisimaneri, kikkut angajoqqaat ilaasortaatitassaattut qinigaasut kikkullu sinniisussatut qinigaasut qanorlu tulleriinneqartut. Taasivik atuutinngitsutut nalunaarutigineqarpat, tamannattaaq qinersineq pillugu allattuiffimmut erseqqissarneqassaaq atuutinnginneranut peqqutaasoq naatsumik nassuiaaserlugu.
Imm. 2. Qinersinerup inernerata naatsorsorneqarnera naammasseriarpat, kommunalbestyrelsimut nalunaarutigineqassaaq qinersineq pillugu allattuiffiup assilinerata, qinersinermi siulersuisunut ilaasortanit atsiorneqarsimasussap, nassiunneratigut. Nalunaarummut ilanngunneqassapput qinersi-sinnaasut allattorsimaffianni allassimasut qassiuneri pillugit paasissutissat, kiisalu qinersinerup ingerlanneqarnerani naleqqutinngitsunik pisoqarsimanersoq imaluunniit allanik pisoqarsimanersoq qinersinerup inernerata atuutsinnissaanut sunniuteqarsinnaasunik.
Imm. 3. Qinersinerup inernera kommunalbestyrelsip tamanut nalunaarutigissavaa.

§ 28. Qinersinermut siulersuisut angajoqqaat ilaasortaatitassaattut sinniisussaattullu qinigaasut qinigaanerannik allakkatigut ilisimatissavaat.

 

Kapitali 9
Atuarfimmi siulersuisunngortut sulilernerat

§ 29. Qinersinerup naammassinerata kingorna erniinnaq atuarfiup pisortaata atuarfiup siulersuisui nutaat inissitsiterluni siulittaasussamillu toqqaalluni ataatsimiinnissamut aggersassavai. Siulittaasoq angajoqqaat ilaasortaatitaasa akornannit qinerneqassaaq. Ataatsimiinneq angajoqqaat ilaasortaatitaannit angajullermit aqunneqassaaq. Angajoqqaat ilaasortaatitaat marluk amerlanerilluunniit ilutigiippata, ataatsimiinnermi aqutsisoq makitsinikkut nassaarineqassaaq.
Imm. 2. Inissitsiternissamut ataatsimiigiaqqusineq minnerpaamik ullunik pingasunik sioqqutsilluni aggersaanikkut pissaaq, kingusinnerpaamillu ukiumi qinersiviusumi 8. november ingerlanneqareersimassalluni.

§ 30. Atuarfimmi siulersuisunngorlaat atuutilissapput inissitsiterluni ataatsimiinnermi, tamannalu ilutigalugu atuarfiup siulersuisorisimasai tunuassapput.

 

Kapitali 10
Qinigaaffiup ingerlanerani allannguutit

§ 31. Atuarfimmik nutaamik pilersitsisoqarpat, sapinngisamik piaartumik nalunaarummi uani maleruagassat malillugit atuarfimmi pineqartumi siulersuisunut angajoqqaat ilaasortaatitassaannik sinniisussaannillu qinersisoqassaaq.

§ 32. Atuarfiit marluk amerlanerusulluunniit ataatsimut katinneqarpata sapinngisamik piaartumik nalunaarummi uani maleruagassat malillugit atuarfimmi pineqartumi siulersuisunut angajoqqaat ilaasortaatitassaannik sinniisussaannillu qinersisoqassaaq. Atuarfiup siulersuisuisa nutaat atuutilerneranni atuarfiit siulersuisorisimasai tunuassapput.
Imm. 2. Kommunalbestyrelsi aalajangiisinnaavoq atuarfiup siulersuisuinut ilaasortaasut tamarmik atuuteqatigiissasut ilaasortaasut ataasiakkaat qinigaaffiisa naanissaasa tungaannut. Taama pisoqartillugu atuarfiup siulersuisussaannik nutaanik qinersisoqassanngilaq.

§ 33. Angajoqqaat ilaasortaatitaat piffissap qinigaaffiup ingerlanerani atuarfiup siulersuisuinit tunuarniarluni qinnuteqarpat, kommunalbestyrelsip aalajangissavaa qinnuteqaat akuerineqassanersoq. Qinnuteqaat peqqiilliornermik imaluunniit sulinermut ilaqutariinnulluunniit tunngasunik assigisaannilluunniit annertuunik, qinnuteqartup ilaasortaanissaanut ajornakusuulersitsisunik, pissuteqarpat, qinnuteqaat nalinginnaasumik akuerineqassaaq.
Imm. 2. Angajoqqaat ilaasortaatitaata atuarfiup siulersuisuinut ilaasortaajunnaarnissani piumasarisinnaavaa, qitornani atuarfimmit anisutut nalunaarsorneqarpat.

§ 34. Angajoqqaat ilaasortaatitaat atuarfiup siulersuisuinit tunuarpat imaluunniit toquppat sinniisussaq qinersinermi amerlanernit taaneqarsimasoq ilaasortanngussaaq.
Imm. 2. Angajoqqaat ilaasortaatitaata napparsimanermik allamilluunniit peqquteqarluni atuarfiup siulersuisuini suliani piffissami sivisunerusumi isumagisinnaanngippagit, kommunalbestyrelsip atuarfiup siulersuisuisa tamanna pillugu qinnuteqarnerisigut aalajangiussinnaavaa, sinniisussap qinersinermi taaneqarnerpaasup angajoqqaat ilaasortaatitaattut ilanngunnissaa, ilaasortaasup suliaminik ingerlatseqqissinnaalernissaata tungaanut. Sinniisoq piffissami atuuffigisamini atuarfiup siulersuisuini angajoqqaat ilaasortaatitaattut allatut pisinnaatitaaffeqarlunilu pisussaaffeqassaaq.

§ 35. Angajoqqaat ilaasortaatitaasa arlaata ilaasortaajunnaarnerani atuarfiup siulersuisuini taassumunnga sinniisussaqanngippat, sapinngisamik piaartumik ilassutissanik qinersisoqassaaq nalunaarummi uani malittarisassat malillugit. Ilassutissanik qinersinermut peqatigitillugu atuarfiup siulersuisuinut sinniisussanik qinersisoqassaaq.

 

Kapitali 11
Qinersinermi aningaasartuutit

§ 36. Qinersinermi aningaasartuutit kommunip qinersiviusup akilissavai.

 

Kapitali 12
Maalaarutit il.il.

§ 37. Qinersinerup ingerlanneqarnerata eqqortumik ingerlanneqarsimanera pillugu nalornisoorutit kommunalbestyrelsimit aalajangiiffigineqassapput.
Imm. 2. Qinersineq pillugu maalaarutit, qinersinerup inaarutaasumik naatsorsorneqarnerata kingornagut ullut 8 qaangiutsinnagit, tak. § 25, allakkatigut kommunalbestyrelsimut tunniunneqassapput, taannalu qinersinermut siulersuisut oqaaseqaataat pissarsiariniariarlugit, sapinngisamik piaartumik aalajangiissaaq. Maalaarut nassiunneqartoq suliamik unitsitsinermik kinguneqartussaanngil aq.
Imm. 3. Maalaarummut atatillugu nutaamik qinersisoqarnissaanik kommunalbestyrelsi aalajangiissappat, ullormi qinersivioqqaartumi qinersisinnaatitaasimasut kisimik peqataasinnaapput. Qinerseqqinneq aamma pissaaq maleruagassat kapitalini 7-8-mi taaneqartut malillugit.

 

Kapitali 13
Atortuulersitsineq

§ 38. Nalunaarut atuutilerpoq ulloq 1. maj 2005.
Imm. 2. Tamatuma peqatigisaanik meeqqat atuarfiini atuarfiup siulersuisuini angajoqqaat ilaasortaatitassaannik qinersisarneq pillugu Namminersornerullutik Oqartussat nalunaarutaat nr. 16, 20. august 1997-imeersoq, atorunnaassaaq, taamaattorli tak. imm. 3.
Imm. 3. Meeqqat atuarfiini atuarfiup siulersuisuini angajoqqaat ilaasortaatitassaannik qinersisarneq pillugu Namminersornerullutik Oqartussat nalunaarutaat nr. 16, 20. august 1997-imeersumi § 1, imm. 3, ulloq 31. juli 2005-ip tungaanut atuukkallassaaq.

Namminersornerullutik Oqartussat, ulloq 12. april 2005

Henriette Rasmussen

/

Lise Lennert Olsen