Suliassaqartitsiniarnermik inunnillu isumaginninnermik Kalaallit Nunaannut inatsit nr. 580, 29. november 1978-imeersoq naapertorlugu matumuuna inissiani attartortittakkani ineqarnermut tapiissutit pillugit makku aalajangersarneqarput:

Aalajangersakkat nalinginnaasut

§ 1. Peqqussut manna malillugu ineqarnermut tapiissutit tunniunneqarsinnaapput inoqutigiinnut inissiani attartortittakkani inissianik attartorneq pillugu Inatsisartut peqqussutaanni pineqartuni najugaqartunut.

§ 2. Inoqutigiittut isigineqarput inersimasut meeqqallu tamarmik inissiami aalajangersimasumik najugallit.
Imm. 2. Ineqarnermut tapiissutit tunniunneqassapput inoqutigiit akileraaruteqaataasussanik isertitaat inigisamilu meeqqat aaliangersimasumik najugallit amerlassusaat tunngavigalugit.

§ 3. Init najugarineqartut najugaqartunut naleqqiullugu ataaseq sinnerlugu amerlaneruppata ineqarnermut tapiissutit tunniunneqarsinnaanngillat.
Imm. 2. Pissutsit immikkut ittut pissutissaqartippassuk imm. 1-imi aalajangersakkat kommunimit sanioqqunneqarsinnaapput.

§ 4. Ineqarnermut tapiissutit tunniunneqarsinnaapput taamaallaat inissiani attartortittakkani ineqarnermut akiliummut. Atukkanut aamma atukkanut akitsuutinut ineqarnermut tapiissutit tunniunneqarsinnaanngillat.
Imm. 2. Inissiani attartortittakkani ineqarnermut akiliut tassaavoq inissianik attartorneq pillugu inatsisartut peqqussutaanni nassuiarneqartutut ineqarnermut akiliut.

§ 5. Ineqarnermut tapiissutit tunniunneqassapput inoqutigiit tamarmiusut ukiumi akileraarfiusumi kingullermi ilisimaneqartumi isertitaat akileraaruteqaataasussat tamarmiusut tunngavigalugit.
Imm. 2. Imm. 1 naapertorlugu piffissap naatsorsuiffiusup kingorna inoqutigiit isertitaat annertuumik allannguuteqarsimappata imaluunniit nuunneq assigisaaluunniit pissutigalugu isertitanik paasissutissat pigineqanngippata, inoqutigiit ukiumoortumik isertitassaattut akileraaruteqaataasussatut naatsorsuutigineqartut tunngavigalugit ineqarnermut tapiissutit naatsorsorneqassapput.

§ 6. Ineqarnermut tapiissutit tunniunneqassapput inoqutigiit ukiumut isertitaat § 5-imi maleruagassat malillugit naatsorsorlugit, ineqarnermut tapiissutisinissamut aningaasanut killissaliussamit ikinneruppata. Inoqutigiit aningaasanut killissaliussaq ataallugu isertitaqartartut ineqarnermut akiliummut nammineq akileeqataassutissaq procentinngorlugu naatsorsugaq akilissavaat.
Imm. 2. Attartornermi nammineq akileeqataassutissap aalajangersarneqarnerani angerlarsimaffimmi meeqqat najugaqartut amerlassusiat apeqqutaatinneqassaaq. Meeqqat angerlarsimaf-fimmi najugaqartut amerlassusaannik allannguutit nalunaarutigineqarnerisa kingorna qaammatip tulliup aallaqqaataaniit naatsorsuunneqartassaaq. Angerlarsimaffimmi meeqqat najugaqartut qaammatip 18-inik ukioqalerfimmik naanerata tungaanut naatsorsuunneqartassapput.
Imm. 3. Aningaasanut killiliussat, nammineq akileeqataassutissat kiisalu ineqarnermut tapiissutit ukiumoortut aningaasartaasa annerpaaffissaat minnerpaaffissaallu Naalakkersuisunit aalajangersarneqassapput.

Ineqarnermut tapiissutinik qinnuteqarneq

§ 7. Ineqarnermut tapiissutinik qinnuteqaat kommunimut tunniunneqassaaq.
Imm. 2. Qinnuteqartoq pisussaavoq paasissutissanik suugaluartunik ineqanermut tapiisutit naatsorsornissaannut pingaaruteqartunik tunniussinissamut, taakkununnga ilaapput inoqutigiit amerlassusii, katitigaaneri isertitanullu tunngasut.

§ 8. Ineqarnermut tapiissutit qinnuteqaatip tunniunneqarnerata kingorna qaammatip aallaqqaataaniit atuutilersumik tunniunneqassapput.
Imm. 2. Inissiamut allamut nuunnermi ineqarnermut tapiissutit nutaamik qinnuteqaatigineqassapput.

§ 9. Inissiani attartortittakkani ineqarnermut tapiissutit januarip aallaqqaatai tamaasa iluarsiivigineqartassapput. Taamaattumik ineqanermut tapiissutit ukiuat qaammatisiutit ukiuat malippaat.
Imm. 2. Ineqarnermut tapiissutisisartut ukiumoortumik iluarsiinermut atatillugu nutaamik qinnuteqartassapput nutaanik inoqutigiit amerlassusii, katitigaaneri isertitanullu tunngasut pillugit paasissutissiillutik.

§ 10. Ineqarnermut tapiissutit ukiuata ingerlanerani inoqutigiit isertittagaat annertuumik ataavartumillu appariaateqarsimappata qinnuteqarnikkut ukiumut isertitassatut akileraaruteqaataasussatut naatsorsuutigineqartut tunngavigalugit ineqanermut tapiissutit naatsorsoqqinneqassapput.

Aqutsineq

§ 11. Ineqarnermut tapiissutit pillugit kommuni aalajangiisussaatitaavoq.
Imm. 2. Inissiani attartortittakkani ineqarnermut tapiissutit aningaasartassaat ukiumoortumik naatsorsorneqartassapput, taakkulu 1/12-ii attartortup ineqanermut akiliutaanit qaammatikkuutaartumik sioqqutsisumik ilanngaatigineqartassapput, taamaalilluni ineqarnermut tapiissutit ineqarnermullu akiliutip nikingassutaat taamaallaat attartortumit akileqquneqartassalluni. Ineqarnermut tapiissutit attartortitsisumut toqqaannartumik akilerneqassapput.

Utertitsilluni akiliuteqarneq

§ 12. Kommuni aalajangiissaaq ineqarnermut tapiissutit utertillugit akilerneqassasut §§-ini 7, imm. 2-mi aamma 10, imm. 2-mi piumasaqaatigineqartutut inuup paasissutissat saqqummiussimanngippagit taamaaliornermigullu annertuallaamik ineqarnermut tapiissutinik tunineqartarsimappat, imaluunniit allatigut ilisimaaralugu pisussaanngikkaluarluni ineqarnermut tapiissutinik pissarsisarsimappat.
Imm. 2. Utertitsilluni akiliuteqarnissaq kommunip aalajangiuppagu Kalaallit Nunaanni eqqartuussisarnermik inatsimmi maleruagassat malillugit aningaasat akilersinniarneqassapput.

Aningaasalersuineq

§ 13. Peqqussut manna naapertorlugu ineqarnermut tapiissutinut aningaasartuutit 60%-ii kommunimit aammalu 40%-ii Nunatta Karsianit aningaasartuutigineqassapput.

Naammagittaalliuuteqarsinnaaneq

§ 14. § 3, imm. 2, § 5, imm. 2, § 10 aamma § 12, imm. 1 naapertorlugit kommunip aalajangiineri Isumaginnittoqarfiup aqunneqarnera aaqqissuussaaneralu pillugit inatsisartut peqqussutaanni maleruagassat naapertorlugit Isumaginninnermi Naammagittaalliuuteqartarfimmut suliareqqitassanngortinneqarsinnaapput.
Imm. 2. Peqqussummi matumani aalajangersakkat allat malillugit kommunip aalajangigai aqutsinikkut oqartussanut allanut naammagittaalliuutigineqarsinnaanngillat.

Atortuulersitsineq ikaarsaariarnermilu aalajangersakkat

§ 15. Inatsisartut peqqussutaat manna 1. januar 2002-imi atortuulerpoq. Peqqussut manna malillugu ineqarnermut tapiissutit siullermik tunniunneqassapput ineqarnermut tapiissutit ukiuannut 2002-mut atuuttumik.
Imm. 2. Ineqarnermut tapiiffigineqartarneq pillugu Inatsisartut peqqussutaat nr. 1, 17. oktober 1983-imeersoq, Inatsisartut peqqussutaat nr. 1, 2. juli 1984-imeersoq aamma Inatsisartut peqqussutaat nr. 2, 13. august 1985-imeersoq aammalu nalunaarutit taakkununnga atasut inissiat attartortittakkat eqqarsaatigalugit 31. december 2001-imi aamma boligstøttemit illuutit eqqarsaatigalugit 30. april 2002-imi atuutilersumik atorunnaarsinneqarput.

§ 16. 2001-mi piffissamut 1. oktoberimiit 31. decemberimut inissiani attartortittakkani ineqarnermut tapiissutit tunniunneqassapput ineqarnermut tapiissutit ukiuanni 1. oktober 2000-miit 30. september 2001-mut naatsorsuisimaneq tunngavigalugu.
Imm. 2. Boligstøttemit illuutini ineqarnermut tapiissutit piffissami 30. april 2002 tungaanut tunniunneqassapput ineqarnermut tapiissutit ukiuanni 1. november 2000-miit 31. oktober 2001-mut naatsorsuisimaneq tunngavigalugu.

Namminersornerullutik Oqartussat, ulloq 31. maj 2001.

Jonathan Motzfeldt

/

Jørgen Wæver Johansen