Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, inatsisartut inatsisaatigut nr. 6-ikkut, 20. maj 1998-imeersukkut allanngortinneqartumi, § 21, imm. 3, § 23, imm. 1 aamma §§ 33, 34 naapertorlugit aalajangersarneqarpoq:

 

§ 1. Nalunaarut imartanut Kalaallit Nunaata aalisarnikkut oqartussaaffigisaanut atuuppoq.

§ 2. Nalunaarummi matumani "tunngaviusumik killeqarfiit" paasineqassapput tunngaviusumik killeqarfittut imartat Kalaallit Nunaata aalisarnikkut oqartussaaffigisai pillugit statsministereqarfiup nalunaarutaani nr. 629-imi, 22. december 1976-imeersumi, 176-imi, 14. maj 1980-imeersumi statsministereqarfiup nalunaarutaatigut nr. 637-ikkut, 6. september 1991-imeersukkut aamma nr. 1011-ikkut, 29. november 1996-imeersukkut allanngortinneqartuni aalajangersarneqartut.

§ 3. Nalunaarummi sumiiffiit pineqartut WGS84 naapertorlugu nalunaarneqarsimapput, imartat assinginut Kalaallit Nunaannut atuuttunut iluarsiissutinik iluarsisarlugit.

§ 4. Nalunaarummi matumani angallatip usitussutsimut killigititamik qaangiisimaneranut ataassisimaneranulluunniit aalajangiisuussaaq usitussutsip angallatip uuttuutaanut uppernarsaammi (målebrev) allassimanera. Uuttueriaatsit pillugit maleruagassat sorliit angissusaanut uuttuummik atulersitsinermut tunngaviliisuusimanersut apeqqutaatinnagit.

 

Nigartaqqortussutsit uuttuutaasa minnerpaaffissaat

§ 5. Nalunaarummi matumani nigartaqqortussuseq najoqqutarineqartoq tassaavoq nigartap tamakkerluni iluatungimigut nerutussusiata uuttuutaa, taamaattorli saattuanut pullatit nigartat angissusiat uuttorneqassaaq nigartat affaannut uuttorlugit. Qalorsuarni nigartaqqortussuseq qalorsuit ilaannut tamanut atuuppoq. Nigartat sanerai sisamat tamarmik takeqqatigiilluinnartut sananeqaammik assigiimmik qilernernik sisamanik aalajangikkat kisimik atorneqarsinnaapput. Uanili pineqanngilaq ammassanniarneq, tamatumani atorneqarsinnaammata nigartat arfinilinnik takeqatigiinnik sanerallit assigiimmik sananeqaatillit.

§ 6. Aalisakkanik imm. 2-miit 8-mut taaneqanngitsunik aalisarnermi qaluni nigartaqqortussutsimut 140 mm-it minnerpaaffissatut atuupput.
Imm. 2. Kinguppanniarnermi qaluni nigartaqqortussutsimut 40 mm-it minnerpaaffissatut atuupput.
Imm. 3. Eqalukkanik, ammassanik, saarullernanik, ammassassuarnik, putooruttunik qaleruaqanngitsunillu aalisarnermi qassutini/qaluni nigartaqqortussutsimut 16 mm-it minnerpaaffissatut atuupput.
Imm. 4. Qassusersorluni saarullinniarnermi qassutini nigartaqqortussutsimut 160 mm-it minnerpaaffissatut atuupput.
Imm. 5. Pullasersorluni saattuarniarnermi nigartaqqortussutsimut 70 mm-it nigartat affaannut uuttorlugit minnerpaaffissatut atuupput.
Imm. 6. Qassusersorluni arnarlunniarnermi qassutini nigartaqqortussutsimut 260 mm-it minnerpaaffissatut atuupput.
Imm. 7. Qalorsuarnik ikerinnarsiutinik suluppaagarniarnermi qaluni nigartaqqortussutsimut 100 mm-it minnerpaaffissatut atuupput. Taamaattorli takuuk § 8, imm. 8.
Imm. 8. Qassusersorluni eqalunniarnermi qassutini nigartaqqortussutsimut 100 mm-it minnerpaaffissatut atuupput.
Imm. 9. Aalisarnermut atortut imm. 2-miit 7-mut naapertorlugit atorneqartunit nigartakinnerusut angallammiitinneqassanngillat qajannaarlugit aalajangerneqarsimanngikkunik imatullu ittujaarneqarsimanngikkunik ajornanngitsumik tigullugit atorneqarsinnaajunnaarlugit.

 

Nigartaqqortussutsit uuttorneqartarnerat

§ 7. Qassutini nigartaqqortussutsit nalunaarummut matumunnga ilanngussami allassimasutut aalajangersarneqassapput.

 

Atortut qassutinut/qalorsuarnut aalajangikkat

§ 8. Angallatinik qalorsuarnut qaqitsivilinnik raajarniarnermi immikkoortiterissutit atorneqassapput annerpaamillu paakkarutai 22 mm-inik akuttussusilik. Immikkoortitserissutit inissinneqassapput ikkunneqarlutillu aalisakkanik saniatigut pisanik sapinngisamik pitsaanerpaamik immikkoortiterisoqarsinnaaqqullugu. Immikkoortiterissutini paakkarutit akuttussusissaat nalunaarummut matumunnga ilanngussami taaneqartutut aalajangersarneqarput.
Imm. 2. Naalakkersuisut imm. 1-imi uniffiit siullianni aalajangersakkat saneqqunneqarnissaannut akuersissuteqarsinnaapput angallatini usitussutsimik uuttuutsik malillugu 150 BRT-iusuni mikinerusuniluunniit takussutissaqarpat angallatip aaqqissuussaanera pissutigalugu, angallammi immikkoortiterissutinik atuinissami, angallammi inuttat navianartorsiortinneqarsinnaassasut. Immikkut akuersissut taamaattoq ukiut ataasiakkaarlugit tunniunneqartassaaq umiarsuaatillillu akuersissummut pigisaannut allanneqartassalluni.
Imm. 3. Nigartaqqortussusissat pillugit § 6-imi aalajangersakkat apeqqutaatinnagit atortulersuutit imm. 4-mit 6-imut taaneqartut qalorsuit qulaatungaannut taamatuttaaq ataatungaannut ikkunneqarsinnaapput nungullarsaaneq annikillilerniarlugu aamma/imaluunniit qalorsuit ninngunerulersinniarlugit.
Imm. 4. Atortup affaani kingullermi qalussianik qajannaallisaatinik (aqajarua qalleq) ataasiinnavinnik ikkussisoqarsinnaavoq. Qalussiat qajannaallisaatit nigartaat minnerpaamik aqajaruata ilorliup nigartaannit marloriaammik annertunerussapput. Qalussiat qajannaallisaatit kaajallallugit nigartussusiat aqajaruata ilorliup kaajallallugu nigartussusianit annerussaaq.
Imm. 5. Atortut suugaluartulluunniit (tingerlaatissiaq, allungiartorfissiat, qalussiat) qalorsuit ataannut affaanut kingullermut ikkunneqarsinnaapput. Nungullarnaveeqqutit sukkulluunniit qalorsuit kaajallallugit 50 %-at sinnerlugu qallersimassanngilaat.
Imm. 6. Qalorsuarnik immap natersiutinik aalisarnermi nungullarnaveeqqutit manngertut qajannaatsumik sananeqaatillit, soorlu nersussuup amianik, qalorsuit aqajaruanni kivitsissutip ataani allinngorlugit ilorlinngorlugit ikkunneqarsinnaapput. Ujaqqanut nungullarnaveeqqutit annerpaamik 4m²-nik angissuseqassapput, qalorsuit aqajaruat ataaseq atorneqarpat aamma 2m²-nik qalorsuit aqajarui marluk atorneqarpata.
Imm. 7. Rundstroppit qajannaallisaatitut qalorsuit ilaannut atorneqarpata taakkua qalorsuit kaajallallugit annerpaamik 60%-ianit naannerussaanngillat. (uuttuut: nigartat amerlassusii nigartussutsimik amerlisarlugu). Rundstroppit taamaattut akornanni akuttussuseq minnerpaamik 1 meteriussaaq. Rundstroppit taamatullu qalussiat qajannaallisaatit (aqajarua qalleq) ataatsikkut atorneqarpata rundstroppit aqajaruanut ilorlermut taamaallaat ikkunneqarsinnaapput.
Imm. 8. Qalorsuarnik ikerinnarsiutinik suluppaagarniarnermi rundstroppit qajannaallisaatitut qalorsuit ilaannut atorneqarpata taakkua qalorsuit kaajallallugit annerpaamik 40%-ianit naannerunngitsut atorneqarsinnaapput (uuttuut: nigartat amerlassusii nigartussutsimik amerlisarlugu). Rundstroppit taamaattut akornanni akuttussuseq minnerpaamik 1 meteriussaaq. Rundstroppit taamatullu qalussiat qajannaallisaatit (aqajarua qalleq) ataatsikkut atorneqarpata rundstropit aqajaruanut ilorlermut taamaallaat ikkunneqarsinnaapput. Rundstroppit qajannaallisaatitut qalorsuit ilaannut atorneqartut qalorsuit kaajallallugit 60%-ianit naannerit atorneqartillugit nigartaqqortussutsimut 140 mm-it minnerpaaffissatut atuupput.
Imm. 9. Atortussat imm. 4-miit 8-mut taaneqanngitsut atorneqaqqusaanngillat.

 

3 sømilit iluanni aalisarnissamut inerteqqutit

§ 9. Imartami sinerissap titarnerullu tunngaviusumik titarnerit avataanni 3 sømilinik avasinnerusup akornanniittumi inerteqqutit makku atuupput:
1) Uiluinniarluni aalisarneq eqqaassanngikkaanni angallatinut angallatip uuttuutaanut uppernarsaat naapertorlugu 75 BRT/BT 120-mik taannaluunniit akimorlugu angissusilinnut aalisarneq inerteqqutaavoq.
2) Taamaattoq nr. 1-imi inerteqqut atuutinngilaq kujataani Kap Farvelip avannaanilu Kap Møstingip akornanni imartamut (63°37´N), tamaani tunngaviusumik titarneq tikillugu aalisartoqarsinnaalluni. Imartami 61°49,6´N-p aamma 62°51,9´N-p akornanni (Timmiarmiut eqqaanni kangerliumanermi) aammattaaq tunngaviusumik titarnerup iluani aalisartoqarsinnaavoq.
3) Ungusiniutit qalorsuilluunniit atorlugit saarullinniarneq, suluppaagarniarneq, nataarnarniarneq, qaleralinniarneq qeerarniarnerlu angallatinut tamanut inerteqqutaavoq.
4) Normu 3-mi aalajangersakkat apeqqutaatinnagit qalorsuit ungusiniutit imaluunniit kilisaatit qalorsui atorlugit saarullinniartoqarsinnaavoq Qaqortup pigisaani Sermersuup aalisarfiani (60^o18,5'N - 60^o26'N - 45^o26'W - 45^o19'W akornanni). Tamannali taamaallaat pisinnaavoq 200 meterit sinnerlugit ititigisumi aammalu angallatit angallatip uuttuutaanut uppernarsaat malillugu 50 BRT/BT 90 init mikinerusut atorlugit.
Imm. 2. Naalakkersuisut imm. 1, nr. 1-imi aalajangersakkat saneqqunneqarnissaannut akuersissuteqarsinnaapput sinerissami imartanut angallatinik mikinerusunik aalisarfiunngitsunut aamma anginerusunik angallateqarluni aalisarneq tamaani sinerissamut qanittumi aalisarnerup ineriartortinneqarneranut ajoqutaasinnaassanngippat.

 

Aalisakkat ilaasa sumiiffinni
aalajangersimasuni aalisaqqusaannginnerat

 

§ 10. Angallatit Kalaallit Nunaata kitaani suluppaagarniarsinnaatitaasut saarullinniarsinnaatitaanatilli suluppaagarniaqqusaanngillat sumiiffimmi allorniusaq sanimukartoq 64^o30'N-mit sumiiffiillu uku akornanni titarnerni:
- 64^o30'N, 55^o00'W
- 61^o30'N, 50^o30'W
- Kalaallit Nunaata Kitaani sumiiffik 61^o30'N.

 

Aalisariaatsit ilaasa inerteqqutaanerat

§ 11. Qaartiterutissat, toqunartut imaluunniit ilisimajunnaartitsissutaasinnaasut kiisalu aallaasit aalisarnermi atoqqusaanngillat. Qupinnguallatsitsisarluni aalisartoqaqqusaanngilaq immikkut ittumik akuersissuteqartoqartinnagu.
Imm. 2. Qassutit kivisittakkat atorneqaqqusaanngillat tunngaviusumik killeqarfinnit 3 sømilit avataani aalisarnermi.
Imm. 3. Kitaani qalorsuarsorluni qaleralinniarneq inerteqqutaavoq 64⁰30´N aamma 68⁰N-p akornanni.

 

Atortut aalajangersimasut atorneqaqqusaannginnerat

§ 12. Angallammi atortut imaluunniit ilusilersuinerit pisanik angallammit toqqaannartumik avammut eqqaassutaasinnaasut inerteqqutaapput.
Imm. 2. Aalisarnermi saniatigut pisat pillugit Namminersornerullutik Oqartussat nalunaarutaanni nr. 32-imi, 14. december 1995-imeersumi, § 5 aamma § 8, imm. 2, naapertorlugit, qalorsuarsorluni raajarniarnermut atatillugu aalisakkanik niuernermi soqutiginaateqarsinnaasunik igitsinissamut immikkut akuersissuteqartoqarsimatillugu, saniatigut pisat suuneri amerlassusiilu nalunaarsorneqassapput iginneqartinnagillu umiarsuup allattaaviinut allanneqassallutik.

 

Aalisarnermut atortunik nalunaaqutsersuineq

§ 13. Aalisarnermut atortut piginnittup aqqanik aamma najugaanik imaluunniit angallatip aqqanik aamma umiarsualiviup ilisarnaataatut naqinnernik nalunaaqutserneqarsimassapput. Nalunaaqutsiussat imermit arrortinneqarsinnaassanngillat. Qassutini kivisittakkani nalunaaqutsiussat qimiaanut aalajangerneqassapput. Ningittakkanut nalunaaqutsiussat ningittakkanut namminernut aalajangerneqassapput. Qalorsuarnut nalunaaqutsiussat qimiarsuarmut qullermut aalajangerneqassapput. Uiluinniutini saattuarniutinilu nalunaaqutsiussat sinaakkutaannut qullernut aalajangerneqassapput. Aalisarnermi atortuni uninngasuni puttaqutit nalunaaqutsersuutit atorneqarsimasut taamatuttaaq nalunaaqutsersimassapput.

 

Pineqaatissiissutit

§ 14. Nalunaarummi matumani § 5-imik, § 8-mik, § 9, imm. 1-imik aamma §§-ini 10-miit 13-imut aalajangersakkanik unioqqutitsineq akiliisitaanermik kinguneqarsinnaavoq. Angallammiit unioqqutitsisumik aalisartoqartillugu aalisarnermut atortut atorneqartut, angallatip pisai tamakkerlugit taakkualuunniit nalingat, taakkununnga ilanngunnagit pisat, unioqqutitsisuunngitsumik aalisarnikkut pisarineqarsimasutut uppernarsarneqartut, arsaarinnissutigineqarsinnaapput.

 

Atuutilerfia

§ 15. Nalunaarut atuutilerpoq ulloq 1. januar 2002.
Imm. 2. Peqatigitillugu piujuartitsinissaq siunertaralugu aalisarnerup teknikikkut iluarsartuussivigineqarnera pillugu Namminersornerullutik Oqartussat nalunaarutaat nr. 2, 1. januar 2001-imeersoq atorunnaarsinneqarpoq.

Namminersornerullutik Oqartussat, ulloq 6. december 2001.

Hans Enoksen

/

Jørn Birk Olsen

 

---

Ilanngussaq

 

 

1. Nigartanik uuttuutinut nassuiaat

 

a) Nigartaqqortussutsinik aalajangiiniarnermut nigartanik uuttuut 2 mm-inik issussuseqarpoq, saalimasoq, ninngusuumik ilutsimigullu allanngujaatsumik sanaaq. Ilusiligaavoq sanerai sammiveqatigiissillugit, taakku l:8-mik amiliartortunik illuttut attaveqartunik, imaluunniit narluinnartunik killilimmik amiliartussutsip taaneqartup assinganik. Nigartanut uuttuut nuuatigut putoqartinneqassaaq.
b) Nigartanik uuttuutip saava mm-ikkaarlugu nalunaaqutsersorneqarsimassaaq killingisigut akuttoqatigiinnik sammivilitsigut iluseq taanna atorneqarpat, kiisalu killingisigut amiliartortutigut. Kingullertut taaneqartumik iluseqartinneqarpat silissusia mm-inik akuttussusilinnik nalunaaqutsersorneqassaaq akuttoqatigiinnillu silissusia kisitsisilerlugu nalunaaqutsersorneqassalluni.

 

2. Nigartanik uuttuutip atorneqartarnera

a) Aalisarnermut atortut tasissimatinneqassapput nigartat teqeqqui atortup takissusia malillugu imminnut ungasinnerpaanngorlugit.
b) Nigartanik uuttuutip imm. l-mi taaneqartup nuua nigartamut mangunneqassaaq uuttuut nigartanut naleqqiullugu equngatinnagu aamma atortup tanneranoortuanoortillugu.
c) Nigartanik uuttuut nigartanut mangunneqassaaq assaannarmik imaluunniit oqimaalutaq naqitsinermilluunniit uuttuut atorlugu nigartanik uuttuutip nigartat killinginut tattoqilluni uninnissaata tungaanut.

 

3. Nigartanik uuttorneqartussanik toqqaaneq

a) Nigartat uuttorneqartussat tulleriiaaginnaat 20-ussapput aalisarnermut atortup tanneranoornera malillugu toqqarneqartussat.
b) Katitillugit mersorneriniit, allunaasaniit qilersuutinilluunniit 5o cm-imik qaninnerusumi nigartanik uuttuisoqassanngilaq. Ungasissusissaa ilaartornerniit, allunaasaniit qilersuutaasunilluunnit kipunganngitsumik uuttorneqassaaq, aalisarnermut atortut uuttuiffiup tungaanut isivillugit. Nigartat iluarsarsimasut alissimasulluunniit uuttorneqassanngillat, imaluunniit atortunut iluaqutinik aalajangiivigineqarsimasut.
c) Immikkoortoq a)-mi allassimasutut nigartat uuttorneqartussat tulleriiaaginnartuusariaqanngillat, tassa immikkoortoq b)-mik atuinikkut tamanna ajornassappat.
d) Atortut masatsillugit aatsaat uuttorneqarsinnaapput qerisimassanatillu.

 

4. Nigartat ataasiakkaat angissusiat

a) Nigartap angissusia nigartanik uuttuutip uniffiani kisitsisitalerneqarsimasumi silissutsimut naapertuuppoq, tassa uuttuut immikkoortoq 2 malillugu atorneqarpat.
b) Nigartap sinai takeqqatigiissutut akuerineqassapput uuttortaanermi qilernerit marluk nigartamik tukimut katititsisut uuttuutip qeqqaniittutut naatsorsuunneqarpata.

 

5. Piniutip nigartaqqortussusianik aalajangiineq

a) Piniutip nigartaqqortussusia mm-inut uuttorneqassaaq immikkoortut 3 aamma 4 malillugit uuttugassatut toqqarneqarsimasut amerlassusiisa nerutussusiinik agguaqatigiissitsinikkut. Agguaqatigiissitsineq mm-imut ilivitsumut qaninnerpaamut akunnaallisinneqassaaq.
b) Nigartat uuttorneqartussat katillutik amerlassusissaat immikkoortoq 6-imi aalajangersarneqarpoq.

 

6. Nigartanik uuttortaanermi periaaseq

a) Nakkutilliinermi oqartussaasut nigartat tulleriiaat 2o-t imm. 3 malillugu toqqarneqarsimasut uuttortassavaat, oqimaalutaq atornagu uuttuutip assaannarmik mangunneqarneratigut.
Tamatuma kingorna immikkoortoq 5 malillugu piniutit nigartaqqortussusiat aalajangerneqassaaq.
b) Nigartaqqortussutsimik naatsorsuereernikkut paasinarsippat nigartaqqortussuseq aalajangersakkanut atuuttunut naapertuutigunanngitsoq nigartat tulleriiaat 20-t marluk, immikkoortoq 3 malillugu toqqakkat uuttortaqqinneqassapput.
Tamatuma kingorna immikkoortoq 5 malillugu nigartat uuttukkat 60-it tunngavigalugit nigartaqqortusseseq naatsorsoqqinneqassaaq. Taanna piniutip nigartaqqortussuseraa, taamaattorli immikkoortoq C. takuuk.
c) Immikkoortoq a) imaluunniit b) malillugu nigartaqqortussutsimik aalajangiineq angallatip naalagaaniit assortorneqarpat, uuttortaaneq taanna nigartaqqortussutsimik aalajangiinermi najoqqutarineqassanngilaq, piniutillu uuttortaqqinneqassapput.
Oqimaalutaq atorlugu uuttortaasoqassaaq.
Nigartanik uuttuutip nuuani putumut oqimaalutaq nissimmik aalajangerneqassaaq.
Oqimaalutap eqqortuulluinnassusia Dantestimit akuersissutigineqarsimassaaq.
Immikkoortoq a) malillugu aalajangersaavigineqartutut piniutinut 35 mm-inik taakkuninngaluunniit nerukinnerusunik nigartaqqortussusilinnut nakkutilliilluni uuttortaanermi oqimaaluta 2 kg atorneqassaaq, piniutinullu allanut nakkutilliilluni uuttortaanermi oqimaalutaq 5 kg atorneqassaaq.
Immikkoortoq 5 malillugu nigartaqqortussutsimik aalajangiiniarnermi oqimaalutaq atorlugu nigartat 20-t tulleriiaat ataasiinnaat uuttortarneqassapput.

 

7) Saattuanut pullatit nigartaanik uuttortaanermi periaaseq

a) Pullatinut qalut ikkunneqassapput siaarneqarlutillu ima, nigartat sapinngisamik kippareqqissaartunik ammanersaqalersillugit.
b) Nigartat uuttuuttaat aalajangerneqassaaq qilernerit "X"-it amerlassusiisa akunnerisa uuttornerisigut kisitsillu pissarsiarineqartup "X-1"-mik agguarneqarneratigut (qilernerit amerlassussii ataatsimik ilanngarlugit). Katinnera millimeterimut qaninnermut akunnaallisinneqassaaq.
c) Nigartat ammaneri pullatit killinginut aalajangerneqarsimasut uuttorneqassanngillat.

 

8) Immikkoortiterissutini paakkarutit akuttussusiinik uuttuinermi periaaseq

a) Paakkarutit akuttussiat uuttorneqassaaq atortup teqeqqorissumik saviminernut ussersaammik uuttorneqarneratigut.
b) Akunnequtit uuttorneqartussat quliussapput aalajangersimanngitsut.
c) Immikkoortiterissutit paakkarutaasa akuttussusiat mm-inngorlugu taaneqassaaq, paakkarutit akuttussusiisa tamarmiusut agguaqatigiissillugu angissusiat, immikkoortoq a-mut naapertuuttumik toqqarneqaasoqarlunilu uuttuisoqassaaq.
Agguaqatigiissitsineq mm-imut qaninnerpaamut ilivitsumut akunnaallineqassaaq.
d) Paakkarutit akuttussusiannik naatsorsuinermi takutinneqarpat, tamanna malittarisassanut atuuttunut naapertuutinngitsoq, immikkoortiterissutini akunnequtit tamarmik atortup sinaakkutaata iluaniittut iluatungaanniit iluatungaannut uttortarneqassapput taakkulu katinnerat akunnequtit amerlassusiannik agguarneqassaaq. Agguaqatigiissinnerat mm-imut qaninnermut ilivitsumut akunnaallineqassaaq.
e) Paakkarutini paakkarutit akuttussusiat paakkarutit akuttussusissaannut annerpaamut sukkulluunniit atuuttumut naleqqiullugu 1 mm sinnerlugu allanngorassanngilaq.