Nunalerineq pillugu Inatsisartut inatsisaanni nr. 5, 2. maj 1996-imeersumi § 5, § 12, § 13, imm. 2, § 14, imm. 6 aamma § 15, imm. 2 malillugit aalajangersarneqarpoq:

 

Atuuffii

§ 1. Nalunaarut nerukkaatissat nerukkaasarnerillu annertussusissaasa aalajangersarneqartarnerannut kiisalu savat hestillu inaasa aaqqissuunneqartarnerannut atuuppoq.

 

Paasinninnissamik nassuiaatit

§ 2. Nalunaarummi paasinninnissamik nassuiaatit uku atorneqarput:
1) "FE" imatut paasineqassaaq "Nunani Avannarlerni nerukkaatissanut uuttuut ataaseq", taanna nassuiarluagaalluni, akuerisaalluni nerukkaatissani inuussutissap annertussusiannut ataatsimut uuttuutaataavoq.
2) "Ivikkanit nerukkaatissat" imatut paasineqassapput nerukkaatissat ipaasaqarluartut sivisuumik tamuasassat (FE-mut ataatsimut minuttit qulit sinnerlugit) aamma nerukkaatissat panertortai kiiluugaangata 1 FE-mik annikinnerusut.
3) "Nerukkaatissat kimittuut" imatut paasineqassapput nerukkaatissat ipaasaqarpianngitsut sivikitsumik tamuasassat (FE-mut ataatsimut sivisunerpaamik minuttit qulit) aamma nerukkaatissat panertortai kiiluugaangata minnerpaamik 1 FE-mik nalillit.
4) "Agguaqatigiissillugu ulloq piaqqiviusussaq" imatut paasineqassaaq ulloq angutikuluut savanut akulerutsinneqarnerat nuliartussanngorlugit ullunik 144-nik kingoqqullugu.
5) "Naasut naarlerlaat" imatut paasineqassaaq qaqqami sivinganerni kujammut-kujammut kimmut sammisuni naasut naalersut.
6) "Nunaatilik" paasineqassaaq inuk Nunalerineq pillugu Inatsisartut inatsisaanni nr. 5, 2. maj 1996-imeersumi § 3-mi piumasaasunik naammassinnissimasoq.

 

Nerukkaatissanik pigineqartussanik kiisalu
savanik hestinillu nerukkaasarnermut piumasaqaatit

§ 3. Nunalerinermik ingerlatalik kinaluunniit savaateqartoq
1) ukiut tamaasa kingusinnerpaamik 1. november minnerpaamik 125 FE-nik savanut ataasiakkaanut tamanut nerukkaatissaateqassaaq, taakkunannga minnerpaamik 35 FE savanut ataasiakkaanut tamanut ivikkanit nerukkaatissaassapput.
2) ukiumi tulliuttumi 1. april minnerpaamik 36 FE-nik savanut ataasiakkaanut tamanut nerukkaatissaateqassaaq, taakkunannga minnerpaamik 12 FE savanut ataasiakkaanut tamanut ivikkanit nerukkaatissaassapput.
3) minnerpaamik piffissami 1. novemberimiit agguaqatigiissillugu ulloq piaqqiviusussaq sapaatit akunnerinik arfinilinnik sioqqullugu savanut ataasiakkaanut tamanut ullormut 0,5 FE-nik nerukkaasassaaq,
4) minnerpaamik piffissami agguaqatigiissillugu ulloq piaqqiviusussaq sapaatit akunnerinik arfinilinnik sioqqullugumiit piffissap piaqqivissap tungaanut savanut ataasiakkaanut tamanut ullormut 0,8 FE-nik nerukkaasassaaq. Piffissami tassani ivikkanik nerukkaatissat minnerpaamik savamut ataatsimut ullormut 0,27 FE-usassapput, aamma
5) minnerpaamik piffissamit piaqqiviusumiit naasunik naalerlaaqalernissaata tungaanut savanut ataasiakkaanut tamanut ullormut 1,35 FE-nik nerukkaaasassaaq, taamaattoq sivikinnerpaamik ulloq 1. maj tikillugu. Piffissami tassani ivikkanit nerukkaatissat minnerpaamik savamut ataatsimut ullormut 0,27 FE-usassapput.
Imm. 2. Nunalerinermik ingerlatalik nunanik neriniartitsivinnik nersutaatinillu malittarisassaqartitsinikkut aqutsineq pillugu Namminersornerullutik Oqartussat nalunaarutaat naapertorlugu ukiuunerani neriniartitsisarnissamut akuersissuteqarfigineqarsimappat imm. 1, nr. 3-mi minnerpaamik nerukkaasarnissamik piumasaqaat savamut ataatsimut ullormut 0,4 FE-nut appartinneqassaaq, ulluni ukiuunerani neriniartitsisarnissamut akuersissutip atorneqarfiini.

§ 4. Nunalerinermik ingerlatalik kinaluunniit hestiuteqartoq
1) ukiut tamaasa kingusinnerpaamik 1. november minnerpaamik 500 FE-nik hestinut ataasiakkaanut tamanut nerukkaatissaateqassaaq, taakkunannga annerpaamik 300 FE hestinut ataasiakkaanut tamanut nerukkaatissat kimittuujussapput, aamma
2) minnerpaamik ullormut hestinut ataasiakkaanut tamanut 3,0 FE-nik nerukkaasassaaq.

§ 5. Savat taamatullu hestit naammalluartumik annertussusilimmik imersinnaatinneqassapput.

 

Nersutit inaasa aaqqissuunneqarnissaannut piumasaqaatit

§ 6. Nunalerinermik ingerlatalik kinaluunniit savaateqartoq nersutit inaateqassaaq, tassani savanut ataasiakkaanut tamanut minnerpaamik 0,75 m²-inik inissaqassaaq kiisalu savanut ataasiakkaanut tamanut 40 cm-inik nerukkaanissamut inissaqartitsilluni.

§ 7. Nunalerinermik ingerlatalik kinaluunniit hestiuteqartoq nersutit inaateqassaaq, tassani hestinut ataasiakkaanut tamanut minnerpaamik 2 m²-inik inissaqassaaq kiisalu hestinut ataasiakkaanut tamanut 120 cm-inik nerukkaanissamut inissaqartitsilluni.

 

Nersutaatit nalunaarutigineqartarnerat kiisalu nakkutilliineq

§ 8. Nunalerinermik ingerlataqartut savaateqartut hestiuteqartullu Nunalerinermut Siunnersorteqarfimmut nerukkaatissanik pigisat, nerukkaatissat annertussusii kiisalu nersutit inaata aaqqissuussaanera pillugit paasissutissiisartussaatitaapput.

§ 9. Nunalerinermik nakkutilliinermut ataatsimiititaliat paasissutissat Nunalerinermut Siunnersorteqarfimmut paasissutissiissutigineqartut aallaavigalugit nalunaarut manna malillugu aalajangersakkat aalajangersarneqarsimasut malinneqarnerat nakkutigissavaat, § 8 takuuk.

 

Immikkut akuersissuteqarsinnaaneq

§ 10. Inuussutissarsiornermut Naalakkersuisoq nalunaarummi aalajangersakkat saneqqunneqarnissaannut akuersissuteqarsinnaavoq, pingaartumik ilisimatusarnermut tunngatillugu misissuinerit pissutsilluunniit immikkut ittut tamanna pisariaqalersippassuk.

 

Pineqaatissiisarnerit

§ 11. §§ 3-miit 7-imut aalajangersakkanik unioqqutitsinermi akiliisitassussanngortitsilluni eqqartuussisoqarsinnaavoq.
Imm. 2. §§ 3-miit 5-imut malinneqarnissaat qulakkeerniarlugu Inuussutissarsiornermut Naalakkersuisoq inassuteqartoqarnissaanik inerteqquteqartoqarnissaanillu piginnittup akiligassaanik sulissuteqarsinnaavoq, taamatuttaaq nerukkaatissanik ilassutissanik pisiniartoqarnissaanik kiisalu nersutit inaanni naammattumik inissaqartitsisoqarnissaanik imaluunniit nersutit ikilisinneqarnissaannik taamaalilluni tamakku nerukkaanissamut inissaqassusermut nersutinullu inissaqartitsinissamik piumasaqaatinut naleqquttunngortillugit.

 

Atuutilersitsineq il.il.

§ 12. Nalunaarut manna 10. juli 2001 atuutilerpoq.

Namminersornerullutik Oqartussat, 22. juni 2001.

Simon Olsen

/

Amalie Jessen