Aalisarneq pillugu Inatsisartut inatsisaat nr. 18, 31. oktober 1996-imeersumi, Inatsisartut inatsisaat nr. 6, 20. maj 1998-imeersukkut allanngortinneqartumi, § 9, imm. 1, § 23, imm. 1, § 26, imm. 1 aamma § 33, imm. 2-4 naapertorlugit aalajangersarneqarpoq:

Atuuffia

§ 1. Nalunaarut angallatinut Kalaallit Nunaanni angerlarsimaffeqartunut, Kalaallit Nunaata aalisarnermut oqartussaaffeqarfiani, naalagaaffiit allat aalisarnermut oqartussaaffeqarfiini imaluunniit nunat tamalaat imartaanni aalisartunut imatullu immikkoortitigaasunut ilaasunut atuuppoq:
1) Aalisariutit, angallatip imartussutsimut uuttuutaa malillugu 50 BRT/BT 90-inik angissusillit anginerusulluunniit.
2) Aalisariutit, aalisariummi tunisassiornissamut akuerisat, angissusii apeqqutaatinnagit.
3) Angallatit suugaluartulluunniit, Kalaallit Nunaata aalisarnermut oqartussaaffiani aalisakkanik aalisakkanilluunniit tunisassianik aalisariummit usilersortut aalisariutip angissusia naalagaaffimmillu suminngaanneernera apeqqutaatinnagu.
Imm. 2. Nalunaaruttaaq nunani allamiut aalisariutaannut Kalaallit Nunaata aalisarnermut oqartussaaffigisaani aalisartunut angissusiat apeqqutaatinnagu atuuppoq.

Nassuiaatit

§ 2. Angallatinik nakkutilleeriaaseq (FOS) paasineqassaaq tassaasoq Kalaallit Nunaanni Aalisarsinnaanermut Akuersissutinik Nakkutilliisoqarfiup angallatip sumiiffimminik nalunaarutigisartagaanik nassiussisarnermut, tigooraasarnermut suliarinnittarnermullu ataatsimut suliaqarnermik aaqqissuussineq.
Imm. 2. Angallatinik nakkutilliinermut atortulersuut (FOE) imatut paasineqassaaq tassaasoq aalisariummi FOS-imut ilaasumi elektronikimik atortut, tassa sarfalersuut, tigooraassut aallakaatitsissullu aamma antenne.
Imm. 3. Angallatinik Nakkutilliisoqarfiup Qullersaqarfia (FOC) paasineqassaaq tassaasoq Kalaallit Nunaanni Aalisarsinnaanermut Akuersissutinik Nakkutilliisoqarfiup nakkutilliinermi qullersaqarfiatut.
Imm. 4. Nunat tamalaat imartaattut paasineqassapput imartat naalagaaffiup inatsisitigut oqartussaaffigisaasa avataanniittut.

Ikkussuisimasussaatitaaneq

§ 3. Angallatit 1-imi pineqartunut ilaasut, kingusinnerpaamik ulloq 15. august 2001-imi angallammi FOE-mik ikkussiffigineqareersimassapput aamma FOS-imit nakkutigisassanngorsimassapput.
Imm. 2. FOE atorlugu sumiiffinnik nalunaarutit aallakaatinneqartarput imatut imallit: angallatip sorliunera, sumiiffia, siunnerfia, sukkassusia kiisalu taakku uuttortarnerani piffissaq.
Imm. 3. Inuussutissarsiornermut Pisortaqarfiup atortunut kiisalu ikkussuinermut angallatinik nakkutilliinermut atorneqartussanut naammassisassatut piumasaqaatit erseqqinnerusut aalajangersassavai.
Imm. 4. Atortunik § 3-mi taaneqartunik pisiortornermut, ikkussuussinermut atuinermullu atatillugu aningaasartuutit angallammik piginnittup nammineerluni akilissavai. Angallatip naalagaata piginnittaatalu akisussaaffigaat taamaallaat FOE-mut atortunik Kalaallit Nunaanni Aalisarsinnaanermut Akuersissutinik Nakkutilliisoqarfiup akuerisaanik ikkussisoqartarnissaa.

Sumiiffimmik nalunaarutiginnittartussaatitaaneq

§ 4. Angallatit § 1-mi pineqartunut ilaasut nalunaaqutap akunneri tamaasa ikinnerpaamik ataasiarlutik peqquneqaratik paasussutissat uku FOC-imut FOS aqqutigalugu nassiuttassavaat:
a) Angallatip aqqa
b) Angallatip umiarsualivimmi ilisarnaatitut normua
c) Angallatip radiokkut attaveqarniartilluni ilisarnaataa
d) Nalunaaruteqarnermi angallatip sumiiffia allorniusanut ammukartunut sanimukartunullu aamma minuttinut taallugu, kukkunerusinnaasoq 500 meterinut killilerlugu aamma 99 %-imik tatiginassusilerlugu.
e) Nalunaaruteqarnerup missarpiaani angallatip sukkassusia siunnerfialu.
Imm. 2. Kalaallit Nunaanni Aalisarsinnaanermut Akuersissutinik Nakkutilliisoqarfiup paasissutissat imm. 1-imi taaneqartut nalunaaquttap akunnerani ataasiaannarani pissarsiariniartarsinnaavai.
Imm. 3. FOE-mi aalisariummi ikkunneqarsimasumi ajoquteqartoqalerpat angallatip naalagaata imaluunniit taassuma sinniisuata piffissamit kukkunerup paasineqarfianit imaluunniit angallatip naalagaata tamatuminnga kalerrinneqarfianit avataasiorluni aalisarnermik nakkutilliineq pillugu nalunaarummi aalajangersakkat naapertorlugit sumiiffimmik nalunaaruteqartarnerit aallartissavai. Nalunaaruteqartoqartassaaq telex, telefax, imaluunniit sinerissami radioqarfik aqqutigalugu radio atorlugit Kalaallit Nunaanni Aalisarsinnaanermut Akuersissutinik Nakkutilliisoqarfimmut, Grønlands Kommandomut imaluunniit naalagaaffiup sineriallip pineqartup FOC-ianut. Periaaseq taanna atorneqartassaaq Kalaallit Nunaanni Aalisarsinnaanermut Akuersissutinik Nakkutilliisoqarfiup FOC-ia ajoquteqalerpat tigooraasinnaajunnaarluni. Nalunaaruteqartarnerit siuliani taaneqartut ingerlatiinnarneqassapput FOE-p imaluunniit FOC-ip taarserneqarnissaata iluarsineqarnissaataluunniit tungaanut, takuuk § 4, imm. 1.

FOE-mik ingerlatsisussaatitaaneq aserfallatsaaliisussaatitaanerlu

§ 5. Angallatip naalagaa nunat tamalaat ajornartorsiulernermi attaveqarnermilu frekvesiinut (VHF aamma mellembølge) naalaartassaaq, taamaalilluni Kalaallit Nunaanni Aalisarsinnaanermut Akuersissutinik Nakkutilliisoqarfiup angallatip naalagaa FOE-mi imaluunniit FOC-imi kukkunermik Kalaallit Nunaanni Aalisarsinnaanermut Akuersissutinik Nakkutilliisoqarfiup paasisaanik ilisimatitsissuteqarfigisinnaaniassammagu.
Imm. 2. Angallammik piginnittoq taassumaluunniit sinniisaa pisussaapput aalisariut umiarsualivimmut tikinniariarpat erngertumikFOE iluarsaatsissallugu taarsertissalluguluunniit.
Imm. 3. Angallatip naalagaata aalisariarneq aallartissanngilaa FOE aserorsimappat.
Imm. 4. Angallatip naalagaata qulakkiissavaa FOE-p sukkulluunniit tamakkiisumik atorneqarsinnaanissaa sumiiffinnillu nalunaarutinik aallakaatitsissutigineqarsinnaanissaa, taamatuttaaq FOE-p teknikikkut akuliuffigineqannginnissaa assersuutigalugu antennep matullugu qallerneqarneratigut imaluunniit FOE-mut sarfamik pilersuinerup matuneqarneratigut.

Saneqqutilluni immikkut akuersissuteqarsinnaatitaaneq

§ 7. Naalakkersuisut piffissami atuutilersitsiartorfiusumi imm. § 3, 1-imi piffissamik killiliussatut aalajangersagaq saneqqullugu immikkut akuersissuteqarlutik atuutsinngikkallarsinnaavaat, novemberip 15. iat tikillugu.

Misissuisarneq

§ 8. Kalaallit Nunaanni Aalisarsinnaanermut Akuersissutinik Nakkutilliisoqarfik aamma Grønlands Kommando kinaassutsimut pisariaqartinneqartunik uppernarsaaserlutik sukkulluunniit tamanna pisariaqartinneqassappat siumoortumillu eqqartuussivimmik aalajangiisitseqqaaratik angallatip FOE-anik misissuisinnaatitaapput.
Imm. 2. Angallatip naalagaa piginnittaalu imm. 1-imi taaneqartutut misissuisoqarnerani ikiuunnissaminnut pisussaatitaapput.

Pineqaatissiissutit

§ 9. Nalunaarummi § 3, imm. 1, 2 aamma 4, § 4, imm. 1 aamma 3, § 5 aamma § 8, imm. 2-mi aalajangersakkanik unioqqutitsinerit akiliisitaasitsinermik kinguneqarsinnaapput. Tamakkuninnga suliassat aalisarneq pillugu Inatsisartut inatsisaanni maleruagassat malillugit suliarineqartassapputtaaq.

Atuutilerfia

§ 10. Nalunaarut 15. juni 2001-imi atuutilerpoq.

Namminersornerullutik Oqartussat, ulloq 30. maj 2001.

Simon Olsen

/

Jørn Birk Olsen