Peqqinnissaqarfiup aqunneqarnera aaqqissuussaaneralu pillugit Inatsisartut peqqussutaat
Kalaallit Nunaanni Peqqinnissamik Isumaginnittoqarfik pillugu inatsimmi 369-imi, ulloq 6. juni 1991-imeersumi § 1 malillugu aalajangersarneqarput:
Qitiusumik aqutsineq
§ 1. Naalakkersuisut peqqinnissaqarfimmi sulineq aqussavaat, pilersaarusiussavaat nakkutigalugulu.
Imm. 2. Naalakkersuisut peqqinnissaqarfimmi inuit suliaminnut atatillugu sulinertik pillugu nalunaarutiginnittaqqullugit nalunaaruteqartaqqullugillu peqqusinnaavaat.
§ 2. Peqqinnissamut tunngatillugu sullissinerup ineriartortinneqarnerani Naalakkersuisut pi-lersaarusiortuussapput ataqatigiissaarisuullutillu.
Najukkani pinaveersaartitsinermut ataatsimiititaliat
§ 3. Naalakkersuisut kommunini tamani najukkami pinaveersaartitsinermut ataatsimiititaliamik pilersitsissapput najukkami peqqinnermik aallussinermik pinaveersaartitsinermillu nukittorsaasussanik, tamatumani aamma Naalakkersuisut tunngaviliussaasa iluanni:
1) Pinaveersaartitsineq aqqutigalugu kommunimi peqqissusermut sunniuteqarneq akisussaaner lu nukittorsassavaat,
2) kommunimi pinaveersaartitsinerup peqqinnermillu aallussinerup aaqqissuunneqarnerat tulleriiaarneqarnerallu siuarsassavaat, kiisalu
3) peqqinnissaqarfiup taakkununngalu attuumassuteqartut suleqatigiinnerat annertusarlugulu nukittorsassavaat.
Imm. 2. Pinaveersaartitsinermut ataatsimiititaliap suliassat inunnut ataasiakkaanut tunngasut eqartut suliarisassanngilai.
Imm. 3. Sumiiffinni kommuninut agguataarinerup avataanniittuni najukkami pinaveersaartitsinermut ataatsimiititalianik Naalakkersuisut pilersitsisinnaapput.
Imm. 4. Najukkani pinaveersaartitsinermut ataatsimiititaliat inuttalersugaanerat sulinerallu pillugit Naalakkersuisut erseqqinnerusunik malittarisassiussapput.
Peqqinnissaqarfiup aaqqissuussaanera
§ 4. Nuna najukkani peqqinnissaqarfinnut aggorneqassaaq.
Imm. 2. Dronning Ingridip Napparsimmavissua nuna tamakkerlugu napparsimmaviuvoq.
Imm. 3. Nunap najukkani peqqinnissaqarfinnut agguataarneqarnera, aaqqissuunneqarnera suliaallu pillugit kiisalu Dronning Ingridip Napparsimmavissuata nunamut tamarmut suliai pillugit Naalakkersuisut malittarisassiussapput.
Peqqinnissaqarfimmik Nakkutilliisoqarfik
§ 5. Peqqinnissamik sullissinermut tunngasut pillugit Naalakkersuisunut oqartussaasunullu allanut siunnersuisarlunilu allatigut ikiuuttartussamik Naalakkersuisut Peqqinnissaqarfimmik Nakkutilliisoqarfimmik pilersitsissapput.
Imm. 2. Peqqinnissaqarfimmik Nakkutilliisoqarfiup taamatuttaaq Naalakkersuisut peqqinnissakkut pissutsinik sianiginninnerannik ikiussavai inuillu peqqinnissaqarfimmi sulisorisat peqqinnissakkut ilinniakkatik atorlugit sulinerannik nakkutiginninnermigut ikiussavai.
§ 6. Nakorsap peqqinnissaqarfimmik nakkutilliisuutitap peqqinnissaqarfimmi unioqqutitsisoqarsimaneranik amigaateqartoqarneranilluunniit paasisaqaruni pisariaqartitsineq naapertorlugu oqartussaasunut pineqartunut ilisimatitsissaaq. Aammattaaq peqqinnissamut tunngatillugu immikkut pisariaqartoqalersillugu Nakorsaq peqqinnissaqarfimmik nakkutilliisuutitaq tamanut ammasumik paasissutissiisassaaq.
§ 7. Peqqinnissaqarfimmik Nakkutilliisoqarfiup sulinera pillugu malittarisassat sukumiinerusut Naalakkersuisut aalajangersassavaat.
Naammagittaalliuuteqarsinnaaneq
§ 8. Najukkani peqqinnissaqarfiit aamma Peqqinnissamut Pisortaqarfiup peqqinnissamut tunngasutigut naammagittaalliuuteqarsinnaaneq pillugu innuttaasunut paasissutissiisarnissaq ilitsersuisarnissarlu pisussaaffigaat.
Atortuulersitsineq
§ 9. Inatsisartut peqqussutaat manna ulloq 1. august 2000 atulerpoq.
Imm. 2. Peqatigalugu Peqqinnissaqarfiup siulersorneqarnera aaqqissuussaaneralu pillugit Inatsisartut peqqussutaat nr. 7, 30. oktober 1992-imeersoq atorunnaarsinneqarpoq.
Imm. 3. Peqatigalugu Peqqinnissamut ataatsimiititaliat peqqinnissamullu pilersaarusiat pillugit Namminersornerullutik Oqartussat nalunaarutaat nr 38, 15. november 1993-imeersoq atorunnaarsinneqarput. Malittarisassat allat, Inatsisartut peqqussutaat imm. 2-mi taaneqartoq naapertorlugu aalajangersarneqarsimasut, atuutiinnassapput, malittarisassanik Inatsisartut peqqussutaat manna peqqussutilluunniit allat tunngavigalugit aalajangersarneqarsimasunik taarserneqarnissamik atorunnaarsinneqarnissamilluunniit tungaanut.
Namminersornerullutik Oqartussat, ulloq 23. maj 2000
Jonathan Motzfeldt
/
Alfred Jakobsen