Nioqqutissanik eqqussuineq annissuinerlu pillugit Inatsisartut inatsisaanni nr. 18-imi 30. oktober 1992-imeersumi, kingullermik Inatsisartut inatsisaatigut nr. 16-ikkut, 3. november 1994-imeersukkut allanngortinneqartumi § 2, imm. 1, § 3, § 11, imm. 2, § 16, § 18, § 19, imm. 2, § 20, § 22, imm. 2, § 35, § 39, § 40 aamma § 46, imm. 5 naapertorlugit aalajangersarneqarput:

 

Kapitali 1
Ataatsimut aalajangersakkat

§ 1. Danmarkimit, Savalimmiunit nunanilluunniit allanit eqqussinermi aammalu Danmarkimut, Savalimmiunut nunanulluunniit allanut annissinermi nioqqutissanik tigusisussat nioqqutissanillu nassiussisut nioqqutissat eqqunneqartut anninneqartullu nalingi, suussusaat, annertussusaat, nunamit sumit pisiaaneri, nunamit sumit pinngortuuneri, nunamut sumut tunineqarneri, nunami sumi atorneqarnissaat, qanoq assartorneqarneri il.il. pillugit paasissutissat nalunaarutigisassavaat.
Imm. 2. Oqimaassutsimik, angissutsimik aammalu nalinginik il.il. aalajangiinermi maleruagassat danskit ilanngaaserisoqarfiannit maleruarneqartut taamatulli atuupput.

 

Kapitali 2
Nioqqutissanik eqqussuineq

§ 2. Useqarnermik nalunaaruteqarnermi, akitsuusigassanik nalunaaruteqarnermi aammalu eqqussinermik nalunaaruteqarnermi immersugassat Akileraartarnermi Pisortaqarfimmit akuerineqarsimasut aammalu peqqissaartumik immersorneqartussat aammalu immersugassami immikkoortortat taaguutit pingaarnerit tunngavigalugit immersorneqartussat atorneqassapput.
Imm. 2. Immersugassat ilaqartinneqassapput ilumoortuuneranik uppernarsaatitut allagartanik, soorlu akiligassat allagartaanik, nassiussinermi uppernarsaatinik aammalu eqqussinissamut akuersissutaasinnaasunik.

§ 3. Danmarkimit, Savalimmiunit nunanilluunniit allanit sikaritsinik tunisinermi tunisisup pisussaaffigaa poortat ataasiakkaat Kalaallit Nunaannut eqqunneqarnerannut nipitittakkamik nalunaaqutsissalugit akitsuuserneqarsimanerannut takussutissamik.

§ 4. Nioqqutissat toqqaannartumik imaluunniit Danmarki aqqusaarlugu Savalimmiunit nunanilluunniit allanit nassiunneqartut pillugit eqqussinermik nalunaarut Akileraartarnermi Pisortaqarfimmut tunniunneqassaaq.
Imm. 2. Nioqqutissat Danmarkimi pisiat Kalaallit Nunaanni akitsuusigassat Akileraartarnermi Pisortaqarfimmut akitsuusiinissamik nalunaaruteqartoqassaaq.
Imm. 3. Eqqussinermik nalunaarummut akitsuusiinissamillu nalunaarummut ilanngunneqassapput tunisisumit akiligassap allagartaa, nassiussat uppernarsaataat allallu akitsuusiinermut kisitsisitigullu naatsorsueqqissaarluni takussutissiornermut il.il. uppernarsaatitut pisariaqartinneqarsinnaasut.

§ 5. Nioqqutissat Danmarkimi pisiarineqartut Kalaallit Nunaanni akitsuusigassat Akileraartarnermi Pisortaqarfimmut akitsuusigassatut nalunaarutigineqartassapput, taamaattorli tak. imm. 2.
Imm. 2. Nioqqutissat imm. 1-imi taaneqartut Aalborgimi Grønlandshavni aqqutigalugu umiarsuakkut nassiunneqarpata tunniunneqarnerannut atatillugu akitsuusiinissamik nalunaarut Aalborgimi Akileraartarnermi Pisortaqarfimmut tunniunneqartassaaq.
Imm. 3. Akitsuusiinissamik nalunaarummut ilanngunneqassapput tunisisumit akiligassap allagartaa, nassiussat uppernarsaataat allallu akitsuusiinermut kisitsisitigullu naatsorsueqqissaarluni takussutissiornermut il.il. uppernarsaatitut pisariaqartinneqarsinnaasut.

§ 6. Palitsit, containerit imaqanngitsut, qerattaqqutit, poortuutit imaqanngitsut atornikullu, illerfiit aamma toqusut ikuallatat arssakuinut qummuattaasat kiisalu angalanermi atortut, angalanermi taqussat assigisaallu eqqussinermik nalunaarsorneqarnissaat piumasarineqanngillat.
Imm. 2. Aammattaaq eqqussinermi nalunaarsorneqartariaqanngillat Akileraartarnermi Pisortaqarfiup nassiussat tigusassatut tunniuppatigik. Nassiussat nioqqutissanik akitsuusigassanik imaluunniit eqquteqqusaanngitsunik imaqanngippata Akileraartarnermi Pisortaqarfiup nassiussat makkuninnga imallit tigusassatut tunniunneranni nalunaarutigineqartussaajunnaarsissinnaavai:
1) tunissutit inunnut ataasiakkaanut ingerlatitat,
2) atortut pilertortumik annertunerusumillu annaassiniarnerni ikiuiniarnerniluunniit atorneqartussat,
3) imarsiortunik sammissasaqartitsiniutit umiarsuit umiarsualivissisimaneranni inuttaasunit atorneqartussat,
4) imarsiortunik sammisassaqartitsiniutit nunat allat umiarsuaasa nunat tamalaat akornanni angalaartut iluarsagassatut nunamut oqqussaat,
5) danskit savalimmiormiullu umiarsuaataannut timmisartuinullu nunanut allamukartaatinut aammalu nunat allamiut umiarsuaannut timmisartuinullu kingoraartissat atortussallu, kingoraartissat atortussallu umiarsuarnut timmisartunulluunniit pineqartunut tunniunneqarpata,
6) nioqqutissat, Danmarkimi, Savalimmiuni nunaniluunniit allani iluarsarneqarsimallutik atorneqarallarsimallutilluunniit eqquteqqinneqartut, nioqqutissanik tigusisoq annissinermik nalunaarutip nuutinneranik uppernarsaatilluunniit allap pisariaqartup takutitsisinnaappat,
7) pequtit pialuutillu atoreersimasutut isikkullit inunnillu Kalaallit Nunaanni najugaqalersunit eqqunneqartut, imaluunniit
8) nioqqutissat atortussallu sakkutooqarfinni USA-p sakkutuuinut, Kalaallit Nunaata illersorneqarnissaa pillugu isumaqatigiissut 27. april 1951-imeersoq naapertorlugu ingerlatsinerannut atugassatut eqqunneqartut.

§ 7. Nioqqutissat § 6, imm. 1-imi taaneqartut assigisaat, eqqunneqarneranni anniseqqinneqartussatut aalajangerneqartut eqqaassanngikkaanni, nioqqutissat Savalimmiunit nunanilluunniit allanit umiarsuakkut toqqaannartumik tikittut kiisalu nioqqutissat Danmarkimiit, Savalimmiuniit nunanilluunniit allanit timmisartukkut tikittut usigineqartutut nalunaarsorneqartassapput.
Imm. 2. Usigisanik nalunaarsuineq pissaaq nassiussat ataasiakkaat immikkut usigineqarnerisa nalunaarutigineqarnerisigut.
Imm. 3. Usigisanik nalunaaruteqarneq nassiussalerisumit (speditørimit), assartuisumit taas-sumaluunniit tuniniaasuanit suliarineqartassaaq, tunisisumillu akiligassap allagartaata assilineranik kiisalu usilersuinermik nalunaarutip allagartaata assilineranik (umiarsuup imaluunniit timmisartup usiisa nalunaarsorneqarfiannik) ilaqartillugu Akileraartarnermi Pisortaqarfimmut tunniunneqarluniluunniit nassiunneqartassaaq usit Kalaallit Nunaanni umiarsualivimmut timmisartoqarfimmulluunniit siullermik tikiunneqaqqaarnerisa kingorna piaartumik.
Imm. 4. Nassiussat usinik isumannaallisarneqarsimasunik imaqartunut tunngatillugu usigisat suuneri pillugit sukumiisumik nalunaarsuiffiup assilineqarnera Akileraartarnermi Pisortaqarfimmut nassiunneqassaaq.

§ 8. Usigisanik nalunaaruteqartussaanermut ilaapputtaaq aalisakkat aalisakkanillu tunisassiat danskit, savalimmiormiut nunallu allat aalisariutaannit nunnigunneqartut. Usigisanik nalunaaruteqarneq umiarsuup ingerlatitsisuanit imaluunniit umiarsuup piffimmi tassani tuniniaasuanit assigisaannilluunniit isumagineqartassaaq.
Imm. 2. Umiarsuarmik timmisartumilluunniit Danmarkimi, Savalimmiuni nunaniluunniit allani pisinermut atatillugu, umiarsuarlu timmisartorluunniit nammineq ingerlalluni Kalaallit Nunaannukarpat usigisanik Akileraartarnermi Pisortaqarfimmut nalunaaruteqartoqassaaq. Usigisanik nalunaaruteqarneq umiarsuup timmisartulluunniit ingerlatitsisuanit, piginnittuanit imaluunniit piginnittup sinniisuanit isumagineqartassaaq.
Imm. 3. Usigisanik nalunaarut Kalaallit Nunaannut apuunnerup kingorna piaartumik Akileraartarnermi Pisortaqarfimmut nassiunneqarluniluunniit tunniunneqartassaaq.

§ 9. Usit nassiunneqarfiannut tikiunneqarnerisa kingorna kingusinnerpaamik ulluinnaat qulit (arfininngornerit sapaatitut nalliuttutullu naatsorsuutigineqassapput) qaangiunnerini nioqqutissanik tigusisup nioqqutissat anniseqqillugilluunniit Akileraartarnermi Pisortaqarfimmut eqqussinermik nalunaarsuusiussaaq imaluunniit akitsuusiinissamik nalunaaruteqassaaq.
Imm. 2. Assartuinermik isumaginnittoq pisussaavoq nassiussat nassiussatut nalunaarsorneqarsimasut nassiunneqarfiannut apuunnerat nalunaarutigissallugu.
Imm. 3. Nioqqutissat anniseqqitassatut aalajangerneqarsimasut kissaatigineqartulluunniit ammarnagit puuiniitiinnarneqassapput.
Imm. 4. Pissutsit immikkut ittut atuutsillugit Akileraartarnermi Pisortaqarfiup eqqussinermut nalunaarsuummik akitsuusiinissamillu nalunaarummik tunniussinissamut piffissarititaq sivitsorsinnaavaa.

§ 10. Taamaattorli § 9, imm. 1-imi 3-milu aalajangersagaq atuukkaluartoq, nioqqutissat makku eqqunneqarnerminni anniseqqitassatut aalajangiivigineqareersimasut anninneqarnissaannut piffissaliussaq qaammatit arfineq-pingasut tikillugit sivitsorneqarsinnaavoq:
1) Ilisimatusarnermut atortut kiisalu ilisimasassarsiortut atortui, piginnitsiminnit danskiusumit, savalimmiormiuusumit nunamilluunniit allamiumit atugassatut eqqunneqarallartut.
2) Radiomut, videomut fjersynimullu atortut kiisalu filmiliornermut atortut piginnitsiminnit danskiusumit, savalimmiormiuusumit nunamilluunniit allamiumit radiukkut fjersynikkullu aallakaatitassiornissat imaluunniit filmiliornissaq siunertaralugit eqqunneqarallartut.
3) Sulinermi atortut, soorlu sakkuutit, atortut, apparatit, uuttortaatit maskiinallu, piginnitsiminnit danskiusumit, savalimmiormiuusumit nunamilluunniit allamiumit atugassatut eqqunneqarallartut.
Imm. 2. Annisseqqinnissap sivitsorneqarsinnaaneranut piumasaqaataavoq nioqqutissat immikkuutaarlugit nalunaarsuutip useqarnermik nalunaarummut ilanngullugu nassiussat tunniunneqannginneranni Akileraartarnermi Pisortaqarfimmut tunniunneqarsimanissaa.

§ 11. Nioqqutissat nassiussatut nalunaarsuinerup nalaani allamut tigusassanngortinneqarpata nassiussalerisup allamulluunniit tigusassanngortitsisup piginnittup allanngornera piaartumik Akileraartarnermi Pisortaqarfimmut nalunaarutigissavaa, piginnittunngortup aqqa najugaalu nalunaarutigalugit.

§ 12. Nioqqutissat Kalaallit Nunaanni najugaqanngitsumut nalunaarneqarsimappata, nassiussinermi nalunaarummik suliaqartoq nioqqutissanik tigusisutut isigineqassaaq, taamalu eqqussinermi akitsuutip suliarinninnermilu akiliutinngorsinnaasut akilerneqarnissaannut akisussaassalluni.

§ 13. Nioqqutissat nassiussatut nalunaarsorneqartut tigusisussamut tunniunneqarsinnaalissapput eqqussinermut nalunaarsuineq Akileraartarnermi Pisortaqarfimmit. Piumasaavorli nioqqutissanik tigusisup nioqqutissanut pineqartunut immikkut eqqussinermi piumasaqaataasinnaasut naammassisimappatigit, aamma akitsuutit akitsuutit akilerneqartussanngortinneqarsinnaasut akilerneqarpata.

§ 14.Piffissaliussatut aalajangikkap qaangiutinnginnerani eqqussinermik nalunaaruteqartoqanngippat Akileraartarnermi Pisortaqarfiup nalunaaruteqartussaq allakkatigut piumasaqarfigissavaa aaqqiinissamullu ullut pingasut piffissaliunneqassallutik.
Imm. 2. Piumasaqaat nalunaaruteqartussamik pisussaaffiliissaaq suliarinninnermut 500 kr.-inik akiliinissamut.

Allakkat

§ 15. Allakkat toqqaannartumik Savalimmiuniit nunanilluunniit allanit Kalaallit Nunaannut apuunneqartut illoqarfimmi apuunneqarfimminni Post Greenlandimit nalunaarsorneqassapput.

§ 16. Poortukkat Savalimmiuneersut nunanilluunniit allaneersut Danmark aqqusaarlugu Ka-laallit Nunaannut nassiunneqartut adressekortimik, akiligassat allagartaannik, immaqalu eqqussisinnaanermut akuersissummik uppernarsaammillu allamik eqqussisinnaanermut nalunaaruteqarnissamut, kiisalu nassiussap akitsuutip nioqqutissalluunniit akitsuusigassaasut naatsorsorneqarnissaanut pisariaqartumik ilaqartinneqassapput.
Imm. 2. Post Greenland Akileraartarnermi Pisortaqarfimmut eqqussisinnaanermut nalunaarummik tunniussissaaq, kiisalu akitsuutit annertussuserisinnaasaannik naatsorsuissaaq akitsuullu naatsorsorneqartoq nassiussat tunniutinnginnerini akileqqullugu.

§ 17. Poortukkanik nioqqutissanik akitsuusigassanik Danmarkimi pisiarineqarsimasunik imalinnik Danmarkimi inuussutissarsiornermut tunngassuteqartunik nassiussisut Post Greenlandimut akitsuusiinissamik nalunaaruteqassapput, tassunga ilanngullugit adressekortit, tunisisumit akiligassap allagartaa, eqqussisinnaanermut akuersissutaasinnaasoq il.il.
Imm. 2. Poortukkanik nioqqutissanik akitsuusigassanik Danmarkimi pisiarineqarsimasunik allanik nassiussat adressekortimik, tunisisumit akiligassap allagartaanik, uppernarsaammilluunniit allamik, akitsuutip naatsorsorneqarnissaanut pisariaqartinneqartunik, ilaqartinneqassapput.
Imm. 3. Post Greenlandip nassiussanut imm. 2-mi ilaatinneqartunut akitsuutissat annertussusiat naatsorsussavaa, kiisalu nassiussanut imm. 1-imi 2-milu ilaatinneqartunut akitsuutit nassiussat tunniutinnginnerini akileqqussallugit.

§ 18. Akileraartarnermi Pisortaqarfiup ilitsersuutaani inassutigineqarpoq Post Greenlandip allakkerisarfikkut nassiussanik annikitsunik kisitsisitigut naatsorsueqqissaarnermut tunngasunut il.il. nalunaarsorneqanngitsumik ingerlatseqqiisarnissaa.

Sakkutooqarfinnut nioqqutissanik eqqussineq

§ 19. Sakkutooqarfimmi Pituffimmi danskisut innuttaassuseqartunut danskillu suliffeqarfiinut nioqqutissanik eqqussineq, niuernikkut kisitsisinik naatsorsueqqissaarnermut tunngasunik nalunaarsuutinik paasissutissiinissaq pissutigalugu nioqqutissanik eqqussinermi Kalaallit Nunaata sinneranut maleruagassat naapertorlugit pissaaq.

 

Kapitali 3
Eqqussuinermi akitsuutit

§ 20. Nioqqutissamut akiligassap allagartaata annertussusia akiitsuummik naatsorsuinermi tunngavigineqassappat, akiligassap akia naleqassutsimik, ilanngaatissat ilanngaatigereerlugit nioqqutissap akianik naleqassutsinik naatsorsuinermi tunngavigineqassaaq, piffissami nioqqutissap eqqunneqarfissaa sioqqullugu akilerneqarsimasoq, imaluunniit aki piffissami nioqqutissap eqqunneqarfiani akilerneqartussaagaluaq. Tamatuma nassataraa nioqqutissamut akikillisaatitut ilanngaatip suulluunniit, imaluunniit akimik appartitsissut alla, naliliinermi ilanngaatigineqarsinnaaneri, nioqqutissamut akikillisaatitut ilanngaat akimut akilerneqarsimasumut akiligassamulluunniit naapertuuttuuppat. Piumasaqaataavoq akikillisaatitut ilanngaat nioqqutissanut nalilerneqartussanut tunngassuteqartuussasoq. Nioqqutissamut akillisaatitut ilanngaatit kingumoortumik atortuusut ilanngaatigineqarsinnaanngillat.
Imm. 2. Akiligassat allagartaata aningaasartaasa nunat allamiut aningaasaataannit naatsorsornissaanni, Kalaallit Nunaanni aningaaserivinni aningaasat nalingisa allattorsimaffiat kingulleq atorneqassaaq.
Imm. 3. Naatsorsuinermi tunngavigineqartut pillugit Akileraartarnermi Pisortaqarfimmut assuarlertoqassaaq nalunaarummik tigusinerup kingorna ullut 14-it qaangiutsinnagit.

§ 21. Akitsuutit naatsorsorneqassapput ullormi nioqqutissat akitsuuteqarfiusumut eqqunneqarfianni akitsuutit atuuttut tunngavigalugit.
Imm. 2. Nioqqutissanut § 5, imm. 2-mi ilaatinneqartunut ullormi akitsuusiinissamik nalunaarutip Aalborgimi Akileraartarnermi Pisortaqarfimmit tiguneqarfianit akitsuutit atuuttut tunngavigineqassapput.

§ 22. Akitsuutit akilerneqartussanngussapput nioqqutissat akitsuuteqarfiusumut eqqunneqarnerini.
Imm. 2. Aalakoornartumik etanolimik akullit immiaaqqat t, viinnit imigassallu Inatsisartut inatsisaanni taaneqartut nioqqutissat puui Kalaallit Nunaanni puiaasaaqqanik utertittakkanik aaqqissuussinermi atorneqartut atorlugit inuussutissarsiutigalugu tuneqqinneqarnissaat siunertaralugu eqqunneqarpata, akitsuutit akilerneqartussanngussapput nioqqutissat tunniunneqarpata.

§ 23. Nioqqutissat toqqaannartumik Savalimmiuniit nunanilluunniit allaniit umiarsuakkut tikittut imaluunniit Danmarkimiit Savalimmiuniit nunanilluunniit allaniit timmisartukkut tikittut akitsuutaasa akilerneqanngitsut ulloq piffissaagallartillugu akilerneqarfissaat kingulleq tassaavoq akileeqqusilluni qinnuiginninnerup kingorna ullut 14-it qaangiunneranni, taamaattorli tak. § 25, imm. 1.

§ 24. Nioqqutissat Danmarkimiit umiarsuakkut tikittut akitsuutaasa akilerneqanngitsut ulloq piffissaagallartillugu akilerneqarfissaat kingulleq tassaavoq ulloq nioqqutissat tigusisussamut tunniunneqarfiat, taamaattorli tak. § 25, imm. 1.

§ 25.Nassiussanut inuussutissarsiornermut tunngassuteqartut Danmarkimit, Savalimmiunit nunanilluunniit allanit tikittunut tunngatillugu Akileraartarnermi Pisortaqarfiup qinnuteqartoqarneratigut inussutissarsiutinut tunngasunik suliffeqarfinnut Kalaallit Nunaanni angerlarsimaffeqartunut § 23-mi aamma § 24-mi akiliinissamut piffissarititaasutut taaneqarsimasut sivitsorsinnaavai. Tamatumunnga peqatigitillugu Akileraartarnermi Pisortaqarfiup aalajangersinnaavaa akuersissut nassiussamut ataatsimut akuersissuteqarnermi normulimmut taamaallaat atuutissasoq.
Imm. 2. Imm. 1 malillugu akuersissutinik nalunaaruteqarnissamut piumasaqaataavoq, su-liffeqarfiup qinnuteqaammut ilanngullugit nassiutissagai inuussutissarsiummik ingerlataqarsinnaanermut uppernarsaatitut allagartap atuuttup nuutinnera, kiisalu aningaaserivimmit sillimmasiisarfimmilluunniit akiliinissamut 200.000 kr.-inik qularnaveeqqut akitsuutit akilerneqarnissaannut sillimmatitut. Aammattaaq suliffeqarfiup SE-normua, imaluunniit taama ittoq pigineqanngippat piginnittup inuttut normua qinnuteqaammi nalunaarneqassaaq, suliffeqarfiup suunera pillugu paasissutissat ilanngullugit.
Imm. 3. Akuersissutit imm. 1 malillugu nalunaarutigineqartut akiliinissamut piffissarititaasumik annertuumik arlaleriarluniluunniit atornerluinerni, tamaatulluunniit pisoqarnialersillugu utertinneqarsinnaapput.
Imm. 4. Qinnuteqartup aalajangersimasumik ingerlatsivia tunngavigalugu imm. 1 malillugu akiliiffissamik piffissaliussaq sivitsugaq, uku saniatigut piffissaliussaq sivitsoqqinneqarsinnaanngilaq:
1) Nanortallup, Qaqortup, Narsap, Ivittuut, Paamiut, Nuup, Maniitsup Sisimiullu kommunii nunaqarfii ilanngullugit qaamm. marluk ingerlareernerisa kingorna qaammatip naanerani.
2) Aasiaat, Kangaatsiap, Qeqertarsuup, Qasigiannguit Ilulissallu kommunii nunaqarfii ilanngullugit qaamm. marl. ingerlareernerisa kingorna qaamm. naanerata king. qaamm. 15-ianni.
3) Uummannap Upernaviullu kommunii nunaqarfii ilanngullugit qaamm. pingasut ingerlareernerisa kingorna qaammatip naanerata king. qaamm. 15-ianni.
4) Tasiilap Kommunia nunaqarfii ilanngullugit Kangerlussuarmilu qaammatit sisamat ingerlareernerisa kingorna qaammatip naanerani.
5) Ittoqqortoormiit Avanersuullu kommunii nunaqarfii ilanngullugit qaamm. tallimat ingerlareernerisa kingorna qaammatip naanerata king. qaamm. 15-ianni.
Imm. 5. Nassiussanut Danmarkimit umiarsuarmik tikittunut imm. 4 malillugu piffissarititaasut Aalborgimit ulloq umiarsuup aallarfia aallarnerfigalugu naatsorsorneqartassapput. Nassiussanut allanut imm. 4 malillugu piffissarititaasut nioqqutissat ulloq Kalaallit Nunaanni umiarsualivimmut siullermut tikiffia aallarnerfigalugu naatsorsorneqartassapput.

§ 26. Akiliiffigineqartussamut innersuussamut akitsuutit akilerneqartassapput.
Imm. 2. Akiliiffigineqartartup akitsuutit qaammatip siuliani akiligassanngorsimasut kingusinnerpaamik qaammatip tulliata ulluisa 15-ianni Akileraartarnermi Pisortaqarfimmut akilertassavai.

§ 27. Inunnut ataasiakkaanut tunissutitut nassiussat akitsuutitai nassiussamut ataatsimut 50 kr.-it inorpagit akitsuumik akileeqqusisoqassanngilaq.

§ 28. Timmisartunut mittarfeqarfinni niuertarfiit nioqqutissanik akitsuuteqanngitsunik eqqussuinissamut nioqquteqarnissamullu akuersissuteqarfigineqarsimasut Akileraartarnermi Pisortaqarfimmit nalunaarfigineqartassapput, akitsuuteqanngitsunillu nioqqutissaasivinnut il.il. nioqqutissanik pilersuineq tassanngaanneersunillu toqqortarinninneq nakkutilliinerlu pillugit erseqqinnerusunik aalajangersagaliorsinnaalluni.
Imm. 2. Niuertarfiit ammasarfiisa avataanni nioqqutissat akitsuuteqanngitsut inimi parnaarsimasumi toqqortarineqartassapput.

§ 29. Umiarsuit silaannakkullu angallatit danskit, savalimmiormiut nunalluunniit allat umi-arsualiviinut mittarfiinullu ingerlassallutik Kalaallit Nunaanni akitsuuteqarfiusumik qimatsilersut akitsuuteqanngitsunik taquassarsiniarsinnaapput.
Imm. 2. Nioqqutissanik ataani taaneqartunik umiarsuit taquassarsiniarneranni annertussutsit inummut ataatsimut ullormut unnuamullu ataatsimut angallavissamut naatsorsuutigineqartumut sinnerneqassanngillat:
1) 40 g tupat,
2) 0,25 liter imigassaq kimittooq,
3) 0,25 liter viinni aamma
4) 2 liter immiaaqqat.
Imm. 3. Akileraartarnermi Pisortaqarfik umiarsuit ilaasunik angallassisut nunanit allaneersut Kalaallit Nunaanni umiarsualivimmit aallarfimmit kingullermit umiarsualivimmi siusinnerusumi akitsuuteqanngitsumik taquassarsiniarnissaannut akuersisinnaavoq.
Imm. 4. Imm. 3 malillugu nioqqutissat taquassarsiarineqartut umiarsuup akitsuuteqarfiusumik qimatsinissaata tungaanut akitsuuteqanngitsumik nioqqutissaasivimmut Akileraartarnermi Pisortaqarfimmit naqissuserlugit parnaarneqartumut toqqorneqassapput.
Imm. 5. Umiarsuit imm. 3-mi taaneqartut kiisalu timmisartut taquassarsiniarneranni ilaasuisa inuttaasalu amerlassusaat kiisalu umiarsuarmi timmisartumiluunniit atugassatut tunisassatullu naatsorsuutigineqartut eqqarsaatigineqartassapput.
Imm. 6. Timmisartut akitsuuteqarfiusumut tikinnerminni imm. 1 naapertorlugu nioqqutissanik pisiarineqarsimasunik nassataqarpata taakku timmisartup tikinnerani akitsuuteqanngitsumik nioqqutissaasivimmut parnaarsimasumut immikkoortillugit ingerlaannaq toqqorneqassapput.

§ 30. Akitsuuteqanngitsumik taquassarsiniarnermi inuussutissarsiummik ingerlatsisumut, taquassarsiarineqartut annertussusaat pillugit taquassarsiniarnermut qinnuteqaatikkut Akileraartarnermi Pisortaqarfimmit akuerineqarsimasukkut uppernarsaaserneqartassapput, umiarsuaq silaannakkulluunniit angallat akitsuuteqarfiusumit danskit, savalimmiormiut nunalluunniit allat umiarsualiviannut mittarfiannulluunniit ingerlaassalluni taquassarsiniaraangat.
Imm. 2. Inuussutissarsiummik ingerlataqartup, umiarsuarnik silaannakkullu angallatinik nioqqutissanik akitsuuteqanngitsunik taquassarsisitsisimasup, akitsuutip utertinneqarnissaa siunertaralugu taquassarsiniarnermut qinnuteqaat imm. 1-imi pineqartoq, akiligassallu allagartaata assilineranik ilaqartinneqartoq Akileraartarnermi Pisortaqarfimmut nassiutissavaa.

§ 31. Akitsuutit akilerneqarsimasut qinnuteqarnerup kingorna utertinneqarsinnaapput nioqqutissanut
1) assartuinermi ingerlatseqatigiiffimmit isumagineqarnerini tammartutut ajoquserneqartutullu nalunaarutigineqartunut,
2) inuussutissarsiuteqartumit paarineqartillugit ajoquserneqarsimasunut tillinneqarsimasunulluunniit,
3) inuussutissarsiuteqartumit paarineqartillugit ilanngaaserisunik nakkutigineqartumik suujunnaarsinneqarsimasunut
4) inuussutissarsiutigalugu tuniniaaqqinnermut atatillugu Danmarkiliaanneqartunut, Savalimmiuliaanneqartunut nunanulluunniit allanukaanneqartunut,
5) inuussutissarsiummik ingerlataqartumit inunnut ataasiakkaanut suliffeqarfinnulluunniit sakkutooqarfimmi Pituffimmi aalajangersimasumik najugaqartumut najugaqaravissumulluunniit tuniniaqqinneqartunut,
6) inunnit ataasiakkaanit eqqunneqartunut, nioqqutissap amigaateqarnera kukkuneqarneraluunniit pissutigalugu akitsuuteqarfimmit utertinneqartunut,
7) tunisisumit kukkusumik akitsuusigassatut nalunaarutigineqartunut, imaluunniit
8) naatsorsuinerlunnikkut kukkusumik akitsuuserneqarsimasunut.
Imm. 2. Imm. 1, nr. 3-mi taaneqartutut nakkutigineqartumik suujunnaarsitsineq inuussutissarsiuteqartup aamma Akileraartarnermi Pisortaqarfiup isumaqatigiissuteqarnerisigut aalajangersarneqassaaq.
Imm. 3. Akitsuutit utertinneqarnissaannik qinnuteqaateqarnermi Akileraartarnermi Pisortaqarfiup qinnuteqaateqarnermi immersugassiaa atorneqassaaq. Qinnuteqaat akitsuutit uppernarsaatitaannik, tunisisumit akiligassap allagartaanik, nassiussinermi uppernarsaatinik kiisalu nioqqutissaq tammarsimappat tammarsimaneranut, aserorsimaneranut, anniseqqinneqarsimaneranut il.il. uppernarsaatinik pisariaqartunik ilaqartinneqartoq Akileraartarnermi Pisortaqarfimmut nassiunneqassaaq nioqqutissanik nassiussinermut pineqartumut akitsuusiinermut uppernarsaammik ilaqartillugu.
Imm. 4. Nioqqutissanut imm. 1-imi, nr. 1-imiit 5-imut taaneqartunut akitsuutit annertussusiat 500 kr.-it inorpassuk akitsuut utertinneqassanngilaq.

§ 32. Qamutinut motoorilinnut inatsisini aalajangersakkat naapertorlugit akitsuuteqanngitsumik eqqunneqarsimasut Akileraartarnermi Pisortaqarfiup, akitsuusiinissamut pisussaaffik atuutilersimappat, qinnuteqarnerup kingorna nioqqutissanik eqqussuinermi akitsuutit pillugit Inatsisartut inatsisaanni aalajangersakkat naapertorlugit pisinermi akia naapertorlugu appaasoqarsinnaavoq, taamaattorli minnerpaamik nalinginnaasumik niuernermi nalinga aallaavigalugu.
Imm. 2. Akitsuutinik appaanissaq taamaallaat pisinnaavoq qamutit motoorillit siunertanut ukiut sisamat sinnerlugit atorneqarsimappata imaluunniit sumiiffinni ukiut sisamat sinnerlugit akitsuuteqarfiunngitsut avataanni nalunaarsorneqarsimappata.

§ 33. Qamutit motoorillit nunakkoorutit minnerit sisamanik amerlanerusunilluunniit assakaasullit angallannermut inatsimmi § 2, imm. 1, nr. 3 naapertorlugu qamutitut motoorilittut taaneqarsinnaasut eqqussuinermi akitsuutit pillugit Inatsisartut inatsisaanni taaneqartunut taarsiullugu eqqunnerini 5.000 kr.-inik akitsuuserneqassapput.

 

Kapitali 4
Annissuineq

§ 34. Nioqqutissanik Savalimmiunut nunanulluunniit allanut toqqaannartumik imaluunniit Danmarki aqqusaarlugu annissinermi tuniniaasoq/nassiussisoq annissineq pillugu nalunaaruteqassaaq.
Imm. 2. Nioqqutissat, nioqqutissat allattorsimaffianni kapitalini 2-mi, 3-mi, 5-imi, 15-imi, 16-imi, 22-mi, 23-mi, 25-mi, 26-mi, 41-mi, 43-mi 51-imilu inissisimasut Kalaallit Nunaanniit umiarsuakkut Danmarkimut assartorneqartut pillugit avammut nioqquteqartup/nassitsisup annissinermik nalunaarut Akileraartarnermi Pisortaqarfimmut nalunaarutigissavaa.
Imm. 3. Aammattaaq annissinermut nalunaarut piumasarineqarpoq nunat allamiut umiarsuaat, tassani ilaallutik danskit savalimmiormiullu umiarsuaat, Kalaallit Nunaanniikkallarnerminni uuliamik orsussamillu immerneqartillugit. Tamanna aamma timmisartunut Kalaallit Nunaanni nalunaarsorneqarsimanngitsunut akitsuuteqarfiusumi uninngagallarnerminni orsersortunut atuuppoq.

§ 35. Annissinermik nalunaaruteqarnissamik piumasaqaammi uku pineqanngillat:
1) Tunissutitut nassiussat annerpaamik 950 kr.-inik nalillit (Kalaallit Nunaanni pisiniarfimmi akia) inuussutissarsiornermut attuumassuteqanngitsut inummut ataasiakkaamit nassiunneqartut. Nassiussat allagartaanni allassimassaaq:"Tunissutitut nassiussaq".
2) Nioqqutissat misiligutit niuernermut attuumassuteqartut annerpaamik 500 kr.-inik nalillit. Puuanni nassiussallu allagartaanni allassimassaaq: "Nioqqutissat misiligutit".
3) Kitaata Tunullu akornanni nassiussat Danmarki aqqusaarlugu ingerlatitat.
4) Aalisakkat aalisakkanillu nioqqutissiat nunat allamiut aalisariutaanneersut, danskit savalimmiormiullu aalisariutaanneersut ilanngullugit, nioqqutissiat pineqartut Kalaallit Nunaanni aalisakkerivinni suliarineqarsimanngippata.
Imm. 2. Annissinermik nalunaaruteqarnissamut aammattaaq ilaatinneqanngillat:
1) Nioqqutissat tigummiaannarlugit nassarneqartut imaluunniit nassatatut tunniunneqarsimasut, anninneqarnerat inuussutissarsiummik ingerlatsinissamik siunertaqanngippat.
2) Angalanermi atortut, taqussat nioqqutissallu allat angalanermi nassatarineqartut, anninneqarnerat inuussutissarsiummik ingerlatsinissamik siunertaqanngippat.
3) Sakkuutit, uuttortaatit, atortut assigisaallu, assassorlutik sulisartut eqqumiitsuliortulluunniit assassornerminni eqqumiitsuliornerminniluunniit atortagaat aallarnerminni nassataat.
4) Nigaliliat naasullu, ilisinermut imaluunniit ilivernut pinnersaatissatut naatsorsuussat nunanut allanut nassiunneqartut nassarneqartulluunniit kiisalu naasut qilertat assigisaalluunniit nalliuttorsiornermi tunissutissatut nunanut allanut nassiunneqartut nassarneqartulluunniit.
5) Silaanakkut angallatit qamutillu motoorillit nunani allani nalunaarsortissimasut, Kalaallit Nunaannut eqqunneqarallarsimasut.
6) Umiarsuit, pujortuleeqqat angallatillu tuniniagaanngitsut nammineerlutillu aallartut. Tuniniarnissaat siunertarineqarpat annissinermi nalunaarusiortoqassaaq Umiarsuillu Nalunaarsorneqarfianni allassimajunnaarnissaannik nalunaarnermi annissinermi nalunaarusiaq takutinneqassalluni.
7) Timmisartut Kalaallit Nunaanni angerlarsimaffeqartut tuniniagaanngitsut. Tuniniarnissaat siunertarineqarpat annissinermi nalunaarusiortoqassaaq taannalu Silaannakkut Angallannikkut Pisortaqarfimmi allassimajunnaarnissaanik nalunaarnermi annissinermi nalunaarusiaq takutinneqassalluni.
8) Atuakkat, nuutit, allatsitsivissat, akit allattorsimaffii, nalunaarutit, allagartarsuit, atuinissamut ilitsersuutit naqitallu allat, atukkiussassatut tunissutissatulluunniit anninneqartut.
9) Naqitigassanngorlugit allatat, atuagassiat qaammatikkuutaartumik sapaatip akunnikkuutaartumillu saqqummersartut, aviisit assigisaallu Kalaallit Nunaanni naqiterneqarsimasut, kalaallillu suliffeqarfiinit nunani allani pisartagalinnut tuniniaasartunullu nassiunneqartut.
10) Frimærkit frimærkinik allanik paarlaalluni taarsigassanngorlugit nunanut allanut nassiunneqartut.
11) Illerfiit inuup timaanik imallit qummuattaasallu inuit timaasa ikuallanneqarsimasut arsakuinik imallit.
12) Klichit aamma papmatricet.
13) Timersornermi atortut, tamatumani ilaallutik qamutit sukkaniutit umiatsiallu iporsuutit, nunani allani timersuutinik assigisaannillu unamminermi atugassatut anninneqarallartut, imaluunniit Kalaallit Nunaanni taamatut atorneqareerlutik anniseqqinneqartut.
14) Aningaasat pappiaqqat aggorsimasullu, akiitsukkanut uppernarsaatit (vekselit), checkit assigisaallu, kiisalu naalagaaffiup pappiaraatai, aktiat piginneqataasutsit pappiaqqallu allat nalillit.

§ 36. Nioqqutissanik nalunaarsorneqarsimasunik akitsuusiiffigineqaratillu kisitsisinut naatsorsoqqissaagassanut ilanngullugit nalunaarsorneqanngitsunik annisseqqinnermi annissinermik nalunaarusiortoqassanngilaq, akerlianilli useqarnermik nalunaarutip qiugassartaatut uppernarsaatitaa Akileraartarnermi Pisortaqarfimmut annisseqqinnermi uppernarsaatitut takutinneqassalluni.
Imm. 2. Timmisartukkut nassiussat Kalaallit Nunaannut eqqunneqartutut nalunaarsorneqarsimasut, Danmarkimiillu tikittut danskiusumillu pisiffimmit nassiunneqarsimasut anniseqqinneqarpata imm. 1-imi allassimasoq apeqqutaatinnagu annisseqqinnermik nalunaaruteqartoqassaaq.

§ 37. Nioqqutissat nassiunneqartut anninneqarnerminni nalingisa tamarmiusut 10.000 kr.-it sinnersimappatigik, avammut niuertup nioqqutissanik tigusisussamut akiligassanut allagartaliaa imaluunniit taassuma assilinera Akileraartarnermi Pisortaqarfimmut tunniutissavaa.
Imm. 2. Nioqqutissanut atorneqarallartussanngorlugit nassiunneqartunut akiligassanut allagartaliaagallartoq tunniunneqassaaq anninneqartut qanoq naleqarnerat apeqqutaatinnagu.

Allakkat

§ 38. Poortukkanik Savalimmiuni nunaniluunniit allani tigusisussanut nassiussinermi annissinermik nalunaarusiortoqassaaq.
Imm. 2. Annissinermili nalunaarusiortoqassanngilaq § 35, imm. 1, nr. 1 aamma 2 kiisalu imm. 2, nr. 1-imiit 4-mut aammalu 8-miit 14-imut allassimasunik nassiussinermi.
Imm. 3. Nioqqutissat nassiunneqalerneranni annissinermik nalunaarut Post Greenlandimut tunniunneqassaaq.

§ 39. Poortukkanik Danmarkimut nassiussinermi Kalaallit Nunaanni annissinermik nalunaarusiortoqassanngilaq.

Danmarkimut nunanullu EU-mut ilaasortaasunut allanut annissinermi nioqqutissat uppernarsaataat

§ 40. Nunanut EU-mut ilaasortaasunut eqqussineq akitsuutitigut ajornaannerusumik pisinnaaqqullugu nioqqutissaq nioqqutissat uppernarsaataannik Akileraartarnermi Pisortaqarfimmit atsiorneqarlunilu naqissuserneqarsimasumik EUR 1-imik ilaqartinneqassaaq.
Imm. 2. Allakkatigut nassiussanut, taamaallaat nioqqutissat nunami aalajangersimasumi pi-lerseqqaarneqarnertik pissutigalugu nioqqutissanik eqqussinermi akitsuutitigut ajornaannerusumik pineqartussat, aammalu nalingisa EU-p killissarititaanik qaangiisimanngitsunut, avammut niuertup uppernarsaat EUR 2, Akileraartarnermi Pisortaqarfimmut atsiugassanngortitassaanngitsoq, atorsinnaavaa.
Imm. 3. Nioqqutissat inuussutissarsiornermut tunngassuteqanngitsut poortukkani mikisuni Danmarkimi inunnut ataasiakkaanut nassiunneqartut nioqqutissat uppernarsaataannik ilaqartinnagit nassiunneqarsinnaapput, nassiussat tamakkerlutik nalingisa EU-p killissarititaa qaangersimanngippassuk, aammalu nassitsisup nalunaarutigippagu nassiussat nunami aalajangersimasumi pilerseqqaarneqarnertik pissutigalugu akitsuutitigut ajornannginerusumik pineqartussanik nioqqutissanik imaqartut.

Nunanut allanut, Kalaallit Nunaata niueqateqarnissamik isumaqatigiissuteqarfigisimasaanut annissinermi nioqqutissat uppernarsaataat

§ 41. Nunami, Kalaallit Nunaata niueqateqarnissamik assigisaanilluunniit isumaqatigiissuteqarfigisimasaani nioqqutissanik eqqussineq akitsuutitigut ajornaannerusumik pisinnaaqqullugu, nioqqutissaq nioqqutissat uppernarsaataanik imaluunniit nioqqutissat nunami sorlermi pilersinneqaqqaarneranut uppernarsaammik ilaqartinneqassaaq, Akileraartarnermi Pisortaqarfimmit atsiorneqarlunilu naqissuserneqarsimasussamik.
Imm. 2. Nioqqutissat uppernarsaataat imaluunniit suminngaanneernerinut uppernarsaat isu-maqatigiissutigisamik imaqarlunilu iluseqarpoq, taamaammat nioqqutissanik avammut niuertoq/nassiussisoq uppernarsaatip suunissaa pillugu Akileraartarnermi Pisortaqarfimmut sukumiinerusumik paasiniaasariaqarpoq, uppernarsaat qanoq ittoq atorneqassanersoq.

Nioqqutissanik annissuineq pillugu aalajangersakkat nalinginnaasut

§ 42. Aalisakkanik aalisakkanillu nioqqutissianik annissinermi, aalisakkat sumi pisarineqarsimaneri, angallat suna atorlugu pisarineqarsimaneri, suuneri, anninneqartut qanoq annertutigineri, avammut nioqquteqarsinnaanermut akuersissutip normua il.il. pillugit paasissutissiinissamut Akileraartarnermi Pisortaqarfik erseqqinnerusunik aalajangersaasinnaavoq.
Imm. 2. Nioqqutissat uppernarsaataannik § 40-mi § 41-milu taaneqartunik atsiuinissamut naqissusiinissamullu piumasarineqarsinnaavoq paasissutissanik imm. 1-imi pineqartunik eqqortumik piffissarlu eqqorlugu paasissutissiisoqarnissaa.

§ 43. Annissinermik nalunaaruteqarnermi immersugassat Akileraartarnermi Pisortaqarfimmit akuerineqarsimasut aammalu peqqissaartumik immersorneqartussat aammalu immersugassami immikkoortortani taaguutit pingaarnerit tunngavigalugit immersorneqartussat atorneqassapput.
Imm. 2. Immersugassat uppernarsaatinik soorlu akiligassat allartaannik, nassiussinermut uppernarsaatinik, immaqalu avammut nioqquteqarsinnaanermut akuersissutinik ilaqartinneqassapput.

 

Kapitali 5
Nakkutilliineq

Umiarsuarnik nakkutilliineq

§ 44. Umiarsuarmi, ingerlaarfimmik Akileraartarnermi Pisortaqarfimmut siumut nalunaarutigineqarsimasumik aalajangersimasumik ingerlaarfeqanngitsumi naalagaasoq, umiarsuup Kalaallit Nunaanni akitsuuteqarfiusumut tikinnerani, erngerluni tikinnertik umiarsualivimmi oqartussaasunut qaninnerpaanut nalunaarutigissavaa, Kalaallillu Nunaanni umiarsualiviup tikinnissaa kingusinnerpaamik nal.ak. 24-t sioqqullugu umiarsualivimmi tikiffissami oqartussaasut nalunaarfigissallugit piffissaq umiarsuup tikiffissaatut ilimagisaq pillugu. Danskit umiarsuaasa sinerissami nakkutilliisut taamaallaat umiarsualivimmi oqartussaasunut tikiffissartik nalunaarutigisassavaat, tamanna suliaminnut naapertuuttuuppat.
Imm. 2. Umiarsuup qaqugu tikissangatinneqarneranik nalunaarut tiguinnarlugu umiarsualivimmi oqartussaasut Akileraartarnermi Pisortaqarfik tamatuminnga nalunaarfigissavaat kiisalu umiarsuit nalunaaruteqarsimanngitsut tikinneri nalunaarutigissallugu. Umiarsualivimmi oqartussaasut umiarsuit, ingerlaarfimmik Akileraartarnermi Pisortaqarfimmut siumut nalunaarutigineqarsimasumik aalajangersimasumik ingerlaartut tikiffissaat nalunaarutigisariaqanngilaat.
Imm. 3. Tikinnermi piaarnerpaamik umiarsuup naalagaata imaluunniit umiarsuup piginnittuata tuniniaasiataluunniit Akileraartarnermi Pisortaqarfik umiarsuaq, usit taqussallu pillugit allakkatigut nalunaarfigissavaa, kiisalu umiarsuup inuttallu nioqqutissaataat akitsuusigassaatitat pillugit allakkatigut nalunaaruteqassalluni, taamaattorli takukkit imm. 4 aamma 5.
Imm. 4. Umiarsuarmi Kalaallit Nunaanni nalunaarsorneqarsimasumi naalagaasup imaluunniit umiarsuup piginnittua tuniniaasialuunniit, umiarsuup Danmarkimi Savalimmiuni nunaniluunniit allani angalareerluni akitsuuteqarfiusumut tikinnissaa nal.ak. 24-nik sioqqullugu Akileraartarnermi Pisortaqarfimmut allakkatigut nalunaarutigissavai umiarsuaq, usit taqussallu kiisalu umiarsuup inuttallu nioqqutissaataat akitsuusigassaatitat pillugit allakkatigut nalunaarutigissallugit.
Imm. 5. Akitsuuteqarfimmut tikinnermi umiarsuup naalagaa erngerluni nioqqutissat akitsuusigassat umiarsuup nassatai pillugit akitsuusiinissamik nalunaaruteqassaaq akitsuusertissallugillu, aammalu inuttat ataasiakkaat nioqqutissat akitsuusigassaatitat namminneq atugassatut nassataasa allattorsimaffiannik Akileraartarnermi Pisortaqarfimmut tunniussaqassalluni.
Imm. 6. Umiarsuup akitsuuteqarfiusumi umiarsualivimmiit umiatsialivimmiilluunniit aallartussanngortup naalagaata aallarnissaq Akileraartarnermi Pisortaqarfimmut nalunaarutigissavaa, umiarsuarlu aallassanngilaq Akileraartarnermi Pisortaqarfik akuersissuteqartinnagu. Aallarnissamik nalunaaruteqartussaatitaanngillat umiarsuit, angalanermut pilersaarut Akileraartarnermi Pisortaqarfimmut siumut nalunaarutigineqareersimasoq naapertorlugu angalasut.
Imm. 7. Nioqqutissanut taqussanullu, malittarisassat unioqqutillugit akitsuuteqarfiusumit anninneqartunut atorneqartunulluunniit akitsuutit umiarsuup naalagaata akisussaaffigai.

Timmisartunik nakkutilliineq

§ 45. Timmisartoqarfimmi pisortat Akileraartarnermi Pisortaqarfimmut timmisartup tikiffissaatut aallarfissaatullu naatsorsuutigisaq nalunaarutigissavaat kiisalu timmisartut tikinnissartik nalunaarutigisimanagu tikittut nalunaarutigissallugit. Timmisartut aalajangersimasumik angalaartut, angalanermut pilersaarut Akileraartarnermi Pisortaqarfimmut siumut nalunaarutigineqareersimasoq naapertorlugu tikittut nalunaarutigineqartariaqanngillat.
Imm. 2. Akitsuuteqarfiusumut tikinnermi piaarnerpaamik timmisartup naalagaata nalunaarutigissavaa timmisartoq suminngaanneernersoq, kiisalu timmisartoq, usit taqussallu pillugit Akileraartarnermi Pisortaqarfimmut allakkatigut nalunaaruteqassalluni aammalu timmisartup inuttallu nioqqutissaataat akitsuusigassaatitat pillugit allakkatigut nalunaaruteqassalluni.
Imm. 3. Timmisartumi, nunat tamalaat akornanni ilaasunik angallassissutitut angalanngitsumi naalagaasup, imm. 2-mi taaneqartup saniatigut, akitsuuteqarfimmut tikiinnavilluni nioqqutissat akitsuusigassat, timmisartup nassatai akitsuusigassatut nalunaarutigissavai akitsuutillu akilerlugit.
Imm. 4. Timmisartup, akitsuuteqarfiusumi timmisartoqarfimmit aallartussanngortup naalagaata aallarnissaq Akileraartarnermi Pisortaqarfimmut nalunaarutigissavaa, timmisartorlu aallassanngilaq Akileraartarnermi Pisortaqarfik akuersissuteqartinnagu. Aallarnissamik nalunaartussaanngillat timmisartut, angalanermut pilersaarut Akileraartarnermi Pisortaqarfimmut siumut nalunaarutigineqareersimasoq naapertorlugu angalasut.
Imm. 5. Nioqqutissanut taqussanullu, malittarisassat unioqqutillugit akitsuuteqarfiusumit anninneqartunut atorneqartunulluunniit akitsuutit timmisartup naalagaata akisussaaffigai.

Akileraartarnermi Pisortaqarfiup pisussaaffii piginnaatitaaffiilu il.il.

§ 46. Akileraartarnermi Pisortaqarfiup Kalaallit Nunaanni Politimesteri isumaqatigiissuteqarfigisinnaavaa, politiit nakkutilliinermik sulianik Akileraartarnermi Pisortaqarfittuulli isumaginninnissaannut piginnaatitsinissamik, nioqqutissanik eqqussuineq annissuinerlu pillugit Inatsisartut inatsisaanni § 38 naapertorlugu.

§ 47. Nassiussat usigineqartut Akileraartarnermi Pisortaqarfiup piumasaqarneratigut ammarlugit misissorneqarsinnaapput
Imm. 2. Nioqqutissat nassiussat misissorneqarnerannut atatillugu nioqqutissanik tigusisut nassiussisullu pisussaapput pisariaqartunik isumaginnissallutik, matumanilu puuiaallutik, poortuillutik, oqimaalutaallutik aamma uuttortaallutik nioqqutissat misissorneqarnerinut atasumik. Nioqqutissat, puuiarneqarnerminni akornuserneqarsinnaasut aserorneqarsinnaasulluunniit, imaluunniit pigisanik inunnilluunniit ajoquseeratarsinnaasut, nassiussatut nalunaarsortinnerannut atasumik nakkutilliinermi ammarneqassanngillat. Tamatumani soorlu makku pineqarput: natrium, gassit naqitsinilinnik puullit, akuutissat radiop qinngornerinik ulorianartunik akullit, akuutissat tunillannartut, filmit qaamanermut misikkarissut qajuusaasallu plasticimik seqqitsaatissiat aqerlorterlugit matusanik puukkat.
Imm. 3. Nassiussat nioqqutissanik imm. 2-mi taaneqartunik imallit ammarneqarniarpata tigusisussaq Akileraartarnermi Pisortaqarfimmit tamatuminnga nalunaarfigineqassaaq, taamaalilluni taassuma ilitsersuussutigisinnaammagu nioqqutissat illersorneqarsinnaasumik qanoq ammarneqarsinnaanersut.
Imm. 4. Akileraartarnermi Pisortaqarfik taarsiinertaqanngitsumik nioqqutissanik misissugassanik misissuinissamut naammattunik tigusisinnaatitaavoq. Akileraartarnermi Pisortaqarfik nioqqutissat misissorneqartussat tigusat assinginik amerlaqataannillu taarserneqarnissaannut akuersissuteqarsinnaavoq.
Imm. 5. Nioqqutissanik nassitsisoq nioqqutissat misissorneqareernerisa kingorna pisinnaatitaavoq misissugassatut tiguneqartut misissuinermi atorneqanngitsut piumasaqarnikkut utertissallugit.
Imm. 6. Nioqqutissanik nassitsisoq, tigusisoq imaluunniit annissisoq pisussaavoq nioqqutissat Akileraartarnermi Pisortaqarfimmut piaartumik takutissalugit pisarialimmik misissuisinnaaneq ingerlanneqarsinnaaqqullugu.

§ 48. Poortukkat Post Greenlandip ingerlassai adressekortiusinnaasunik sunillu imaqarnerinik nassuiaatinik ilaqartinneqartut Akileraartarnermi Pisortaqarfimmut misissugassanngorlugit allakkerivimmit saqqummiunneqassapput.
Imm. 2. Misissuineq allakkeriviup iniutaani ingerlanneqassaaq, taamalu Akileraartarnermi Pisortaqarfik piginnaatitaavoq nakkutilliinerup ingerlanneqarnissaanut pisariaqartumik qanorluunniit iliorluni misissuinissaminut. Misissuinermi allakkerisoqarfimmit puuiaaneq poortuinerlu isumagineqassaaq.

 

Kapitali 6
Pineqaatissiisarnermut atortussanngortitsinermullu aalajangersakkat

§ 49. § 1, imm. 1-imi, § 2, imm. 1-imi 2-milu § 4-mi, § 5-imi, § 7-imi, § 8-mi, § 9, imm. 1-imiit 3-mut, § 34-mi, § 36-mi, § 37-mi, § 38 imm. 1-imi, § 43, imm. 1-imi 2-milu aamma § 47, imm. 2-mi aalajangersakkanik piaaraluneerluni mianersuaalliorujussuarluniluunniit unioqqutitsisoq akiliisitaasussanngorlugu eqqartuunneqarsinnaavoq.
Imm. 2. Taamatuttaaq § 11-mi, § 44, imm. 1-imi aamma 3-miit 7-imut, § 45, imm. 2-miit 4-mut aamma § 47, imm. 6-imi aalajangersakkanik unioqqutitsisoq akiliisitaasussanngorlugu eqqartuunneqarsinnaavoq.
Imm. 3. Taamatuttaaq § 3-mi, § 28, imm. 2-mi, § 29, imm. 2, 4, aamma 6-imi aammalu § 33-mi aalajangersakkanik unioqqutitsisoq unioqqutitseriaraluartorluunniit akiliisitaasussanngorlugu eqqartuunneqarsinnaavoq.
Imm. 4. Imm. 3-mi taaneqartutut unioqqutitsisoqarneratigut imaluunniit unioqqutitseriartoqaraluarneratigut akiliisitaasussanngortitsilluni akiliisitaasussanngortitsinaniluunniit eqqartuussinermi, nioqqutissaq, taannaluunniit peqanngippat taassuma aningaasanngorlugu nalingata amerlaqatai, arsaarinnissutigineqarsinnaapput.

§ 50. Nalunaarut manna 1. april 2000-mi atortuulissaaq.
Imm. 2. Tamatumunnga peqatigitillugu Nioqqutissanik eqqussuineq annisuinerlu pillugit Namminersornerullutik Oqartussat nalunaarutaat nr. 7, 9. marts 2000-imeersoq atorunnaarsinneqarpoq. 

Namminersornerullutik Oqartussat, 21. marts 2000. 

Josef Motzfeldt

/

Kaare Hagemann