Namminersornerullutik Oqartussat umiarsualiveqarfiutaannik sanaartorneq, aserfallatsaaliineq, ingerlatsineq il.il. pillugit Inatsisartut peqqussutaat
Innaallagiaq, imeq kiallu, qatserisartoqarneq, umiarsualiviit, aqqusernit, nalunaarasuaatikkut atassuteqarneq il.il. pillugit Kalaallit Nunaannut inatsimmi nr. 943-mi 23. december 1986-imeersumi § 3 tunngavigalugu aalajangersarneqarput:
Atuuffii
§ 1. Inatsisartut peqqussutaat Namminersornerullutik Oqartussat umiarsualiveqarfiutaasa sanaartorneqarnerannut, aserfallatsaalineqarnerannut ingerlanneqarnerannullu kiisalu umiarsualivinnut qitiusumik oqartussaanerup umiarsualivinnilu suliassatigut oqartussaanerup ingerlanneqarnerannut atuuppoq.
Imm. 2. Inatsisartut peqqussutaat manna umiatsilivinnut sunngiffimmi atorneqartunut imaluunniit Kangilinnguani Pituffimmilu sakkutuut umiarsualiviinut atuutinngilaq. Aammattaaq Inatsisartut peqqussutaat manna umiarsualivinnut il.il. tankeqarfinnut toqqaannartumik atasunut atuutinngilaq, taakku Pilersuisoq A/S-imit pigineqarmata.
Siunertaa
§ 2. Namminersornerullutik Oqartussat umiarsualiveqarfiutaasigut usinik tigooraaneq usilersuinerlu, aalisartunik sullissineq kiisalu imaatigut ilaasunik angallassisunik sullissineq pingaarnertut siunertarineqarput.
Imm. 2. Inatsisartut peqqussutaatigut siunertarineqarpoq qulakkiissallugu Namminersornerullutik Oqartussat umiarsualiveqarfiutaat pilersaarusiorneqassasut, annertusarneqarlutik, aserfallatsaalineqarlutik allaffissornikkullu aqunneqarlutik, umiarsualiveqarnikkut siunertat pingaarnerusut sapinngisamik pitsaanerpaamik salliutinneqartussanngorlugit.
Namminersornerullutik Oqartussat umiarsualiveqarfiutaannik sanaartorneq, aserfallatsaaliineq ingerlatsinerlu
§ 3. Naalakkersuisut Namminersornerullutik Oqartussat umiarsualiveqarfiutaanni sanaartukkat, aserfallatsaaliinerup ingerlatsinerullu allaffissornikkut aqunneqarnerat pillugu aalajangersaassapput, matumani umiarsualiviit nunaminertaanik atuinermut akiliuteqartitsisinnaaneq ilan-ngullugu eqqarsaatigalugu.
§ 4. Naalakkersuisut umiarsualiveqarfimmi oqartussaanerup ingerlanneqarnissaanut aalajangersaassapput, kikkut najukkami suliassatigut umiarsualiveqarfimmi oqartussaaneq ingerlatissaneraat ilanngullugu.
Pineqaatissiissutit, atuutilerfia il.il.
§ 5. Malittarisassani inatsisartut peqqussutaat naapertorlugu atuutilersinneqartuni pillaammik akiliisitsinikkut pineqaatissiissutissanik aalajangersaasoqarsinnaavoq.
Imm. 2. Kalaallit Nunaanni umiarsualiveqarnermi malittarisassat 5. maj 1951-imeersut kingusinnersukkut allannguuteqartinneqartarsimasut kiisalu malittarisassat taakku tunngavigalugit maleruaqqusaliat atorunnaarsinneqarnissamik tungaanut imaluunniit Inatsisartut peqqussutaat manna tunngavigalugu maleruaqqusalianit taarserneqarnissamik tungaanut atuutissapput.
§ 6. Inatsisartut peqqussutaat manna 1. december 1999 aallarnerfigalugu atuutilerpoq.
Namminersornerullutik Oqartussat, 29. oktober 1999
Jonathan Motzfeldt
/
Steffen Ulrich-Lynge