Inuussutissarsiutitigut ilinniartitaaneq, ilinniagaqarnermut tapiissutit inuussutissarsiutinullu tunngasunik siunnersuineq pillugit Inatsisartut peqqussuttaanni nr. 16-imi, 28. oktober 1993-imeersumi § 1, imm. 4 naapertorlugu makku aalajangersarneqarput:

Kapitali 1.
Kultureqarnermut, Ilinniartitaanermut Ilageeqarnermullu Pisortaqarfik

§ 1. Kultureqarnermut, Ilinniartitaanermut Ilageeqarnermullu Pisortaqarfimmit, kinguliini Pisortaqarfimmik taagorneqartumit, qitiusumik ilinniarfiit aammalu inuussutissarsiutinut ilinniartitaanermi ilinniartut pillugit suliassaqarfiit aningaasatigut, inatsisilerinikkut, allaffitsigut aqutsinikkut pilersaarusiornikkullu qitiusumik ingerlanneqarnerat isumagineqassaaq.

§ 2. Pisortaqarfiup qitiusumik ilinniartitaanermi ataatsimiititaliap inassuteqarnera naapertorlugu ilinniakkami ataatsimi taassumaluunniit ilaani, aammalu ilinniartitaanerit ataasiakkaat sammiviillu ataasiakkaat ingerlanneqarnerini atuaqatigiit ikinnerpaaffissaat aalajangersartassavai.

§ 3. Pisortaqarfiup ukiut tamaasa inuussutissarsiutitigut ilinniartitaanermi ilinniartussatut tiguneqarnissamik qinnuteqarnermi piffissarititaasut kingulliit periusissallu pillugit paasissutissiinerit pisariaqartinneqartut aallartittassavai.

§ 4. Pisortaqarfiup inuussutissarsiutitigut ilinniartitaanerni ilinniartut atuarnerminni Kalaallit Nunaanniinngitsut siulersorneqarnerat isumagissavaa. Pisortaqarfik tamatuma oqartussaaffiginissaanut qitiusumik ilinniarfinni sinniisuutitaqarsinnaavoq.

Kapitali 2.
Qitiusumik ilinniarfiit pillugit siunnersuisoqatigiit

§ 5. Qitiusumik ilinniarfiit pillugit siunnersuisoqatigiit qitiusumik ilinniarfinni pisortaasunit aammalu qitiusumik ilinniartitaanermi ataatsimiititaliat siulitaasuinit ilaasortaqartut pilersinneqassapput. Siunnersuisoqatigiit inuussutissarsiutitigut ilinniartitaanernut aammalu inuussutissarsiutitigut pikkorissarnernut apeqqutit tamanut atuuttut aammalu apeqqutit immikkoorutillit siunnersuisuuffiginissaat suliassaraat.
Imm. 2. Pisortaqarfiup qitiusumik ilinniarfinnut siunnersuisoqatigiit ataatsimeeqataasartussanik ilasinnaavai.
Imm. 3. Pisortaqarfik qitiusumik ilinniarfinnut siunnersuisoqatigiinnut allattoqarfiussaaq.
Imm. 4. Pisortaqarfik qitiusumik ilinniarfinnut siunnersuisoqatigiit suliassaannut sulinissaannullu malittarisassanik aalajangersaasinnaavoq.

Kapitali 3.
Qiotiusumik ilinniartitaanermut ataatsimiititaliaq

§ 6. Pisortaqarfiup ilinniagassat imminnut assingusut annertunerusut iluanni qitiusumik ilinniartitaanermut ataatsimiititaliamik pilersitsinissaq akisussaaffigaa.
Imm. 2. Qitiusumiuk ilinniartitaanermut ataatsimiititaliaq tallimaniit qulinut ilaasortaqarpoq. Pisortaqarfiup qitiusumik ilinniarfiup inassuteqarneratigut atuarfimmi qitiusumik ilinniartitaanermi ataatsimiititaliamut kikkut ilaasortaatitaqarnissaat aalajangissavaa. Sulinermik inuussutissarsiutillit kattuffii aammalu sulisitsisut kattuffii suliamut tunngassuteqartut isumaqatiginninniarsinnaatitaasullu kiisalu pisortani oqartussaasut suliamut attuumassuteqartut peqatigiiffiillu qitiusumik ilinniartitaanermi ataatsimiititaliami sinniisuutitaqassapput. Qitiusumik ilinniartitaanermi ataatsimiititaliaq ataatsimeeqataasussanik ilassusiisinnaavoq.
Imm. 3. Ilaasortat ilinniakkap ineriartuaarneranik ilisimaarinnilluartuussapput.
Imm. 4. Ilaasortat susassaqartunit imm. 2 naapertorlugu Pisortaqarfiup akuersissutigisimasaanit toqqarneqartassapput. Piffissamut ukiunik sisamanik sivisussusilimmut toqqaasoqartassaaq. Siullermik piffissami 1. august 1999-imiit 31. juli 2003-mut. Toqqagaaqqittoqarsinnaavoq.

§ 7. Qitiusumik ilinniartitaanermut ataatsimiititaliaq toqqaaqqaarnerup kingornatigut ataatsimiinnermi siullermi siulittaasulerluni siulittaasullu tullilerluni inissitsitissaaq.
Imm. 2. Pisortaqarfiup ataatsimiititaliap suleriaasissaanut najoqqutassiaq, aammattaaq ilaasortalersugaaneranut suliassanullu killissarititanik imaqartoq suliarissavaa. Qitiusumik ilinniartitaanermi ataatsimiititaliaq ataatsimiititaliap suleriaasissaanut siunnersuusiussaaq Pisortaqarfimmit akuerineqartussanik.

Qitiusumik ilinniartitaanermut ataatsimiititaliap suliassai

§ 8. Qitiusumik ilinniartitaanermi ataatsimiititaliap inuussutissarsiutitigut ineriartorneq aammalu ataatsimiititaliap suliassaqarfiata iluani ineriartorfiusinnaasut malinnaaffigissavai pisariaqartitsinerlu naapertorlugu ilinniartitaanerit nutaat pilersinnissaannut, allanngortiternissaannut kiisalu atorunnaarsinnissaannut suliniuteqartassalluni.
Imm. 2. Qitiusumik ilinniartitaanermi ataatsimiititaliap ilinniartitaanerit ilusilersortuarnissaat aaqqissuuttuarnissaallu, taamaalilluni ilinniartitaanerup qaffasissusiata qitiusumik ilinniartitaanerup ineriartortinneqarneranut naleqqiulluni tunngavigineqarnissaa aammalu naammalluinnartuunissaa isumagissavai.
Imm. 3. Qitiusumik ilinniartitaanermi ataatsimiititaliap ukiumi tulliuttumi ilinniarfiup suliassaasa aaqqissuunneqarnerat Pisortaqarfimmut akuerisassanngorlugu innersuussutigisassavaa. Inassuteqarneq ilinniarfiup forstanderiata siunnersuuteqarneratigut pisassaaq.

§ 9. Qitiusumik ilinniartitaanermiataatsimiititaliap suliamik misiliiffiusuni ilinniagassanut tunngasut sapinngisamik pitsaanerpaanissaat suliarissavaa.
Imm. 2. Qitiusumik ilinniartitaanermi ataatsimiititaliap suliffeqarfinnik attaveqarnikkut sulissutigissavaa suliammik misiliiffissat ilinniartut ilinniagassaminnik kissaatigisaannik siunissamilu suliffeqarnikkut periarfissatut naatsorsuutigineqartunik naliliineq aallaavigalugit amerlassusilerneqartut pissarsiarineqarnissaat sulissutigissallugulu sungiusarluni suliffissaasinnaasut suliffeqarfiup angissusia teknikikkullu ineriartornera eqqarsaatigalugit tamatigoortuussasut.

§ 10. Qitiusumik ilinniartitaanermi ataatsimiititaliap Pisortaqarfimmut makku inassutigisassavai:
1) Ilinniartitaanernut ataasiakkaanut tamanut ilinniartitsissutissat pilersaarusiornerat. Ilinniartitsissutissat pilersaarusiornerat ilinniakkap siunertaata imaatalu, sivisussusiata katitigaaneratalu allaaserineqarnerannik imaqassaaq, tamatumani ilanngullugu ilinniartitaanermi tamarmiusumi atuarfiup najugaqarfissap sumi inissinneqarsimanera.
2) Suliffimmik misiliiffiusuni sungiusarnissamut maleruagassat.
3) Misilitsinnermut nalilersuinermi pilersaarusiat maleruagassallu.
4) Suliffiit misiliiffiusussat akuersissutigineqarnissaannut maleruagassat.
5) Ilinniarfiup suliaqarfiata iluani ilinniartitsinernik nutaanik aallartitsineq.
6) Ilinniarfiup suliaqarfiata iluani ilinniaqqiffissanik ingerlaqqillunilu ilinniarfissanik kiisalu allatut atuaqqiffissanik aallartitsinerit.

Kapitali 4.
Qitiusumik ilinniarfiit

§ 11. Qitiusumik ilinniarfik forstanderimit Pisortaqarfimmit toqqarneqartumit siulersorneqassaaq.
Imm. 2. Forstanderi atuarfimmi suliassanut, allaffitsigut siulersuinermut aningaasaqarnermullu akisussaavoq.
Imm. 3. Forstanderi ukiumi qaangiuttumi atuarfiup suliarisimasai pillugit qitiusumik ilinniartitaanermi ataatsimiititaliamut allakkatigut ukiumoortumik nalunaarusiortassaaq.

§ 12. Qitiusumik ilinniarfiup inuussutissarsiutitigut ilinniartitaanermi ilinniarfiup suliassaqarfiata iluani suliniuteqarnerit Pisortaqarfimmit akuersissutigineqartut isumagissavai. Tamatumunnga atatillugu ilinniarfiup makku suliarissavai:
1) Inuussutissarsiutitigut ilinniartitaanerit taakkununngaluunniit ilaatinneqartut Pisortaqarfimmit akuersissutigineqartut naammassissallugit. Qitiusumik ilinniartitaanermi ataatsimiititaliaq suleqatigalugu ilinniartitaanerit imaat aaqqissuuttassallugit, tamatumani ilanngullugit ilinniagassat pilersaarusiorneri, siunnersuusiornerit aammalu ilinniarfiusup ingerlanera tamaat atuartitsinermi atortussat suliarinissaat.
2) Ilinniartitsinerit nutaat siunnersuusiortassallugit aammalu ilinniartitsinerit pioreersut misissuiffigeqqittassallugit.
3) Ingerlaqqilluni pikkorissartitsinerit pikkorissartitseqqinnerillu siulersussallugit naammassissallugillu.
4) Najukkani inussutissarsiutinut ilinniarfinnut Pisortaqarfimmullu ilinniakkat pillugit siunnersortaasassalluni.
5) Ilinniarfiup ilinniartuinut ilinniartitaanikkut inuussutissarsiutitigullu siunnersuineq isumagissallugu.
6) Pisortaqarfiup erseqqinnerusumik innersuussineri malillugit suliassat pisariaqartinneqartut inuussutissarsiutitigut ilinniartitaanermut attuumassuteqartut isumagissallugit, tamatumani ilanngullugit STI-ni aqutsinikkut suliassat.

§ 13. Qitiusumik ilinniarfik qitiusumik ilinniartitaanermi ataatsimiititaliamut ataatsimiititalianulluunniit ilinniarfimmi ilinniartitaanernut attuumassuteqartunut allattoqarfiuvoq.

Kapitali 5.
Ilinniartitsisut siunnersuisoqatigiivi

§ 14. Qitiusumik ilinniarfinni tamaginni ilinniartitsisut siunnersuisoqatigiivi pilersinneqassapput. Ilinniartitsisut siunnersuisoqatigiivi fortanderimik, inspektørinik faginullu ilinniartitsisunik tamarmik aalajangersimasumik atorfeqartunik inuttaqassaaq.

§ 15. Ilinniartitsisut siunnersuisoqatigiivi ilinniagassanik aalajangersimasunik ilinniartitsisut aalajangersimasumik atorfeqartut akornanni namminneq siulittaasussaminnik qinersissapput. Qinersineq ukiumoortumik qaammatip septemberip naannginnerani pisassaaq ukiullu atuartitsiviusup sinneranut atuuttassalluni. Qinigaaffiup nalaani siulittaasoq tunuarpat, ukiumut atuartitsiviusumut sinneruttumut qinerseqqittoqassaaq.

§ 16. Ilinniartitsisut siunnersuisoqatigiivisa sulinissaminnut malittarisassat namminneerlutik aalajangersartassavaat.

§ 17. Ilinniartitsisut siunnersuisoqatigiivinut ilaasortat ilinniartitsisut siunnersuisoqatigiivisa ataatsimiinneranni pinngitsooratik najuuttussaatitaapput.

Kapitali 6.
Ilinniagaqartut siunnersuisoqatigiivi

§ 18. Qitiusumik ilinniarfinni tamaginni ilinniagaqartut siunnersuisoqatigiivi pilersinneqartassapput.
Imm. 2. Ilinniagaqartut siunnersuisoqatigiivini ilaasortat tassaassapput ilinniarfimmi klassit, holdit, ukiumi ataatsikkut aallartittut, ilinniakkat, ilinniakkat iluini sammiviit assigiinngitsut allatulluunniit naleqquttumik agguataarinerni ataasiakkaani atuartut sinniisaat. Ilinniagaqartut siunnersoqatigiivisa siulittaasoq taassumalu tullissaa namminneq iluminni qinissavaat.
Imm. 3. Pisortaqarfik ilinniagaqartut siunnersuisoqatigiivinik qinersinissamut malittarisassanik aalajangersaasinnaavoq.

§ 19. Apeqqutini tamanut attuumassuteqartuni ilinniagaqartut siunnersuisoqatigiivi ilinniarfiup siulersuisuinut ilinniartitsisuinullu ilinniartut sinnerlugit saqqummertassapput, taakkualu kissaateqarneri naapertorlugit suliassani aalajangersimalluinnartuni ikiortassallugit.
Imm. 2. Ilinniagaqartut siunnersuisoqatigiivisa suleriaasissatik namminneq aalajangersassavaat. Forstanderip suleriaasissat akuersissutigissavai.

Kapitali 7.
Atortuulersitsinermi atorunnaarsitsinermilu malittarisassat

§ 20. Nalunaarut 1. januar 1999 atortuulersinneqarpoq.
Imm. 2. Tamatumunnga peqatigitillugu inuussutissarsiornermi ilinniartitaanerup siulersorneqarnissaanik nalunaarummi nr. 20, 27. maj 1991-imeersumi aalajangersakkat makku atorunnaarsinneqarput:
1) §§ 1 - 4 aamma §§ 24 - 31 qitiusumik ilinniartitaanermut ataatsimiititalianut qitiusumillu ilinniartinnut tunngatillugu atorunnaarsinneqarput.
2) §§ 5 - 14 atorunnaarsinneqarput.

Namminersornerullutik Oqartussat, ulloq 19. november 1998..

Konrad Steenholdt

/

Karl Kristian Olsen