§ 1

Aningaasanik ikisilluni pinnguaatinut akileraarut pillugu Inatsisartut inatsisaanni nr. 3-mi, 17. maj 1990-imeersumi, kingullermillu Inatsisartut inatsisaatigut nr. 10-kkut, 13. junil 1994-imeersukkut allanngortinneqartumi, makku allanngortinneqassapput:

1. § 9-p kingornanut ilanngunneqassapput:
"§ 9 a. Aningaasanik ikisilluni pinnguaatinik ikkussuinissamut akuersissummik pigisaqartut aningaasaasanik assigisaannillu pinnguaatitigut pissarsiassaqartitsiviusutigut (enarmede tyveknægt-itigut) pissarsiarineqarsimasunik nalinginnaasumik akiliutigineqartartunut aggortitsisarsinnaapput.
Imm. 2. Aningaasaasanik assigisaannillu aggortitsinerni eqquiniaasitsinermi akileraarutit pillugit Inatsisartut inatsisaanni aalajangersakkat aamma atuuttassapput."

2. § 10, imm. 1 aamma imm. 2 imatut oqaasertalerneqassapput:
"Aningaasanik ikisilluni pinnguaatinut akileraarutit ukiumoortumik ima annertussuseqarput:
1) aningaasanik ikisilluni pinnguaammut pissarsissutaasinnaasumut pigisamut siullermut 18.000 kr.-it, pigisap aappaanut 20.000 kr.-it kiisalu pigisanut tulliuttunut tamanut 22.000 kr.-it.
2) aningaasanik ikisilluni pinnguaammut pissarsissutaasinnaanngitsumut pigisamut siullermut 5.000 kr.-it, pigisap aappaanut 6.000 kr.-it kiisalu pigisanut tulliuttunut tamanut 7.000 kr.-it.
Imm. 2. Akileraarutissat sisamararterutaat kvartalimut siumoortumik akilerneqartassaaq akiliiffigineqartassallutik 1. december, 1. marts, 1. juni aammalu 1. september, akiliiffissarlu kingulleq tassaavoq qaammatip akiliiffissap ulluisa 10-at."

3. § 14, imm. 1 imatut oqaasertalerneqassaaq:
"Inatsisip matuma atuutsinneqarnissaanut Naalakkersuisut malittarisassiorsinnaapput, tamakkununnga ilanngullugit ikisilluni pinnguaatit aaqqissuunneqarneri, taakku eqqunneqarneri atorneqarnerilu, uppernarsaatinik saqqummiussisarnerit, aggortitsisarnerit, nakkutilliinerit paasissutissanillu tunniussisarnerit pillugit, kiisalu malittarisassiorsinnaallutik unioqqutitsinerit akuersissutit tunniunneqarsimasut utertinneqarnerinik kinguneqarsinnaaneri pillugit."

§ 2

§ 1, nr. 2 atortuulissaaq ullormi 30. november 1994-imi, siullermeertumillu atortuulissalluni januar kvartalimut 1995-imut akileraarummut, 1. december 1994-imi akiligassanngortussanut.
Imm. 2. § 1, nr. 2-p nr. 3-llu piffissaq atortuulerfissaat Naalakkersuisunit aalajangersarneqassaaq.

Namminersornerullutik Oqartussat, ulloq 3. november 1994.

Lars Emil Johansen

/

Emil Abelsen