Avatangiisit innarlitsaaliorneqarnissaat pillugu Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqartumi § 7, imm. 1, nr. 1 aamma 9, § 7, imm. 2, nr. 6 aamma 11, § 15 kiisalu § 46, imm. 2 tunngavigalugit makku aalajangersarneqarput:

Kapitali 1.
Atuuffissai il.il..

§ 1. Nalunaaruirani matumani pineqarput suliffeqarfinnit, atortunit, maskinanit, sakkuutinit, kiassaateqarfinnit assartuutinillu avatangiisit innarlitsaaliorneqarnissaat pillugu Inatsisartut peqqussutaanni kapitali 5-imi malittarisassat tunngavigalugit akuerineqarsimanngitsunit mingutsitsinerup killilersimanissaa.

§ 2. § 1-imi suliffeqarfiit il.il. taaneqartut ingerlanneqarnerisa makku kingunerissanngilaat:
1) Pujornermikkut, pujoralatsitsinermikkut, silaannarnik assigiinngitsunik aniatitsinermikkut, nipiliornermikkut, sajuppilutsitsinermikkut, imermik eqqagassamik kuutsitsinermikkut allatigulluunniit annertuumik mingutsitsinerat.
2) Innuttaasut eqqiluisaarnikkut peqqissutsikkullu atugaasa annertuumik ajorseriarnerat.

Kapitali 2.
Nakkutilliineq il.il..

§ 3. Pissutsinik § 2-mi taaneqartunik unioqqutitsineq nakkutilliinikkut malugineqarpat taamaattoqarnera nakkutilliisup unitsissavaa, tak. avatangiisit innarlitsaaliorneqarnissaat pillugu Inatsisartut peqqussutaanni § 10.
Imm. 2. Nakkutilliisoq tamatumunnga atatillugu peqqussuteqarluniluunniit inerteqquteqarsinnaavoq.
Imm. 3. Nakkutilliinermut atortitsinermullu atatillugu avatangiisit innarlitsaaliorneqarnissaat pillugu Inatsisartut peqqussutaanni kapitali 4-mi aamma § 44, iinm. 2-mi malittarisassat aamma atuupput.

Kapitali 3.
Aalajangersakkat allat.

§ 4. Peqqinnissamut navianarnera imaluunniit tamatumunnga ajutooriataarfiusinnaanera tunngavigalugu inerteqquteqarnerup peqqussuteqarnerulluunniit nalunaarutigineqarnera sioqqullugu Peqqinnissakkut Nakkutilliisoqarfik aalajangiinermi peqataatinneqartassaaq, tak. avatangiisit innarlitsaaliorneqarnissaat pillugu Inatsisartut peqqussutaanni § 39.

§ 5. Nalunaarut manna tunngavigalugu aalajangiinerit tamarmik avatangiisit innarlitsaaliorneqarnissaat pillugu Inatsisartut peqqussutaanni kapitali 10-mi malittarisassat tunngavigalugit naammagittaalliuutigineqarsinnaapput.

Kapitali 4.
Pinegaatissiisinnaaneq atortuulersitsinerlu pillugit aalajangersakkat.

§ 6. § 3, imm. 2 tunngavigalugu peqqussutinik inerteqqutinilluunniit unioqqutitsisoq pillaammik akiliisinneqarsinnaavoq.

§ 7. Aktiaateqarluni ingerlatseqatigiiffik, piginneqatigiilluni ingerlatseqatigiiffik, piginneqatigiiffik killilimmik akisussaaffilik assigisaaluunniit unioqqutitsisuuppat ingerlatseqatigiiffik pillaammik akiliisinneqarsinnaavoq. Naalagaaffik, Namminersornerullutik Oqartussat, kommuni kommunilluunniit ataatsimut ingerlasseqatigiiffiat unioqqutitsisuuppat naalagaaffik, Namminersornerullutik Oqartussat, kommuni kommunilluunniit ataatsimoorlutik ingerlasseqatigiiffiat pillaainmik akiliisinneqarsinnaavoq.

§ 8. Nalunaarut manna 1. september 1994 aallarnerfigalugu atortuulersinneqarpoq.

Namminersornerullutik Oqartussat, ulloq 30. august 1994.

Ove Rosing Olsen

/

Torben Cordtz